Blog

Ni mu butumwa bwatangiwe mu kibaya cya Mvurwa mu Murenge wa Murambi ku wa 8 Ukwakira 2024, ahatangirijwe ku mugaragaro igihembwe cy'ihinga cya 2025A ku rwego rw'Akarere ka Karongi.

Ni igihembwe gitangijwe mu gihe mu matariki nk'aya bamwe abahinzi babaga bageze mu ibagara, ariko uyu mwaka bakaba baratinze guhinga bitewe n'uko imvura yaguye itinze.

Murebwayire Epiphanie yabwiye IGIHE ko kimwe n'uko basanzwe babigenza buri mwaka, uyu mwaka barimye baniyandikisha mu gufata imbuto n'ifumbire ariko ntibatera kuko bari bagitegereje ko imvura igwa.

Ati “Dufite impungenge ko uyu mwaka tutazabona umusaruro ushimishije kuko niba imvura yaratinze kugwa ishobora no kuzacika vuba imyaka itarera.”

Munyeshyaka Charles yavuze ko nk'abahinzi batazi uko babyitwaramo kugira ngo bazabone umusaruro bitewe n'uko imvura yaguye itinze.

Ati 'Imirima twayiteguye ku gihe tubura imvura, none iguye igihe cyarahise. Imbere turabona hatazaba heza kubera imvura itagwiriye igihe.”

Umuyobozi w'Ishami ry'Ubuhinzi n'Umutungo Kamere mu Karere ka Karongi, Gahutu Mbabarira Anastase, yavuze ko Umurenge wa Murambi utangiye ihinga utinze kuko watinze kubona imvura.

Ati 'Ni yo mpamvu twaje kubabwira ngo na bo bafate isuka bashoke imirima, batere kugira ngo nabo bazabone ikibatunga.”

Umuyobozi wa RAB, Ishami rya Gakuta rikorera mu turere twa Karongi na Rutsiro, Kimenyi Martin, yabwiye IGIHE ko nta minsi ibiri irashira imvura y'umuhindo itangiye kugwa mu Murenge wa Murambi.

Ati 'Icyo dukangurira abahinzi ni ugutera vuba, tukaba twarangije gutera ibigori bitarenze tariki 11 Ukwakira, tukabona kujya guhinga izindi mbuto zitandukanye.”

Kimenyi yavuze ko intego ya Guverinoma y'u Rwanda ari uko Abanyarwanda bagira ibiryo kandi ibyo ngo kubigeraho bisaba gukoresha imbuto y'indobanure, ishwagara, ifumbire y'imborera n'iy'imvaruganda, kurwanya indwara n'ibyonnyi, kubagara ku gihe, gusarura no guhunika neza umusaruro.

Abahinzi basanga icyaba umuti urambye mu kubafasha guhingira igihe kabone nubwo imvura yaba yaguye itinze ari uko Leta yaborohereza kubona imashini n'ibindi bikoresho byifashishwa mu kuvomerera kuko nubwo Leta ishyiraho nkunganire nk'abahinzi basanga ibi bikoresho bigihenze.

Mu Karere ka Karongi, ubuso buhingwaho ibihingwa ngandurarugo bugeze kuri hegitari 32000, naho ikibaya cya Mvurwa cyatangirijwemo igihembwe cy'ihinga gifite ubuso bwa hegitari 12.

Abahinzi bo mu Karere ka Karongi basabwe kwihutisha itera mu guhangana n’ingaruka zo kuba imvura yaraguye itinze

Mu Karere ka Karongi, igihembwe cy’ihinga cy’umuhindo wa 2025 cyatangirijwe mu Murenge wa Murambi

Abaturage bahinze bagasatira inkombe z’Ikiyaga cya Kivu babujijwe gutera imyaka kuko bahinze ahatemewe

Aba bahinzi bari gushyira ifumbire mvaruganda mu mirima

Abahinzi basabwe gukoresha ifumbire kugira ngo babone umusaruro mwinshi

Izo serivise za RICA zizajya zitangirwa ku Irembo ni ukwandikisha ubucuruzi, kwaka icyangombwa cyo gukora ubucuruzi no kwandikisha aho ubucuruzi bukorerwa.

Uku kongera izo serivise mu zitangwa mu buryo bw'ikoranabuhanga, RICA itangaza ko bigamije gufasha abakorera ubucuruzi mu Rwanda koroherwa.

Ibi bivuze ko izo serivise zose umucuruzi azajya azisabira kuri internet bitabaye ngombwa kujya gutonda umurongo aho RICA ikorera.

Serivise yo kwandikisha ubucuruzi muri RICA ireba abacuruza cyangwa abakora ibijyanye no gutunganya ifumbire n'imiti yica udukoko. Bazajya babanza bakorerwe isuzuma na RICA harebwe niba ibyo bakora byujuje amabwiriza y'ubuziranenge ateganywa n'icyo kigo.

Igihe iryo suzuma rizaba rirangiye neza, ikigo gikora ubwo bucuruzi nibwo kizajya gihabwa icyangombwa cy'uko cyanditswe mu Rwanda kandi cyemerewe kuhacururiza.

Kwandikisha ubwo bucuruzi binyuze ku Irembo bizajya byihuta kandi bitume n'ibicuruzwa bigera ku isoko vuba. Bizajya kandi bifasha abaturage cyane cyane abahinzi kubona ibifashisha mu buhinzi byujuje ubuziranenge bwose bugenwe.

Serivise yo kwaka icyangombwa cyo gukora ubucuruzi yo izajya ifasha umucuruzi kuzuza ibikenewe ngo akorere mu Rwanda kandi RICA ikomeze gukurikirana ibikorwa bye ireba ko byubahiriza ibiteganyijwe byose.

Ibyo bizajya bifasha umucuruzi gukora mu buryo bukurikije amategeko ndetse n'abaturage babone serivise zinoze kubera iryo suzumwa.

Ni mu gihe serivise yo kwandikisha ahantu ubucuruzi bukorerwa yo ireba ibikorwa byo gusiga amarangi ku bintu, gupfunyika ibicuruzwa, gusana ibinyabiziga, gutunganya inyama no gukusanya amata.

Ibyo bigomba kwandikishwa muri RICA ngo harebwe niba byujuje ubuziranenge busabwa mu bijyanye n'ubuzima n'andi mabwiriza.

Nyuma y'iryo suzuma ni bwo hazajya hatangwa icyangombwa ku bakora ubwo bucuruzi.

Ibyo bizafasha ubwo bucuruzi gukorwa mu buryo butangiza ubuzima ndetse n'abaturage bungukire mu kugura ibicuruzwa na serivise byujuje ubuziranenge.

Uyu muhanda uzubakwa mu Kagari ka Nyamagana mu Midugudu ya Gataka na Ruhuha, akavuga ko yabitewe n'impanuro za Perezida Kagame uhora asaba Abanyarwanda kwishakamo ibisubizo.

Mu gutangiza imirimo yo kubaka uyu muhanda, ku wa 08 Ukwakira 2024, Rwemayire wahize kubaka uyu muhanda, yavuze ko iki gitekerezo yari akimaranye imyaka 10, ariko akagenda agira imbogamizi.

Yavuze ko inkomoko y'iki gikorwa ari impanuro za Nyakubahwa Perezida wa Repubulika, zo gusaba Abanyarwanda bose guhora batekereza uko bishakamo ibisubizo aho bishoboka hose, badategereje Leta igihe cyose.

Ati “Iyo turebye dusanga mu Karere ka Ruhango hari imihanda myinshi idakoze kandi si uko itihutirwa. Ubushobozi bw'Akarere ntabwo bwakorera byose rimwe, ni yo mpamvu twabonye natwe twakwishakamo ibisubizo,tukubaka uyu muhanda.''

Yakomeje avuga ko yumva umusanzu we uzagirira akamaro abazakoresha uyu muhanda bose bityo Akarere na ko kagakora indi mihanda na yo ikenewe muri uyu mujyi wa Ruhango no mu bindi bice by'akarere.

Bamwe mu batuye mu gace uyu muhanda uzanyuramo, bavuze ko iki gikorwa ari icy'agaciro kandi gikwiye kuba urugero rwiza no ku bandi bose.

Umwe muri bo yagize ati “Kubona umuntu ku giti cye yubaka umuhanda nk'uyu rwose, biba bikwiriye kubera abandi urugero rwiza bagatera ikirenge mu cye. Tunaretse ko uyu muhanda uzatworohereza mu ngendo abawuturiye, kubaka umuhanda ubundi bizatanga akazi ku bantu benshi nanjye ndimo.'

Umuyobozi w'Akarere ka Ruhango, Habarurema Valens,wanayoboye imirimo yo gutangiza iyubakwa ry'uyu muhanda, yavuze ko uje wiyongera ku yindi mihanda itari mike Leta imaze kubaka, ashima ubwitange bw'uyu muturage.

Ati “Uyu munsi turishimira ko mu mihanda iri kubakwa mu Karere ka Ruhango, tugiye kongeraho undi ariko noneho ku bufatanye n'abaturage ubwabo. Twaje kumushyigikira ngo tumwereke ko ibyo akora tubishima nka Leta. Uyu muhanda uzagirira akamaro abantu benshi, tukaba dushishikariza abaturage kugira imvumvire nk'uyu,abaturage bagashishikarira gukora ibikorwa nk'ibi.''

Yakomeje avuga ko muri Ruhango bakomeje kurangwa n'ibikorwa by'ubumwe n'ubudaheranwa n'ubutwari bwo kubaka u Rwanda, birimo iby'abana baramiye ibendera ry'igihugu ryari rigiye gutwarwa n'umuyaga,ndetse n'icy'uyu uri kubaka umuhanda unahenze, ibimenyerewe kuri Leta, avuga ko byo bishimangira gukunda igihugu no kwitanga.

Uyu muhanda uzaba ufite metero zirenga 800, ufite ubugari bwa metero icyenda, zirimo esheshatu z'umuhanda wa tricouche (usanzwe umenyere gucaho n'imodoka ziremereye), ukanagira metero 1.5 kuri buri ruhande ahagenewe abanyamaguru, hazaba harimo n'amapave, ukazubakwa mu gihe cy'amezi atatu.

Usibye uyu, mu Mujyi wa Ruhango hamaze kuzura imihanda ya kaburimbo, igera kuri kilometero eshanu,n'ibindi 4.5 biri hafi kuzura, byose bikaba 9.5Km.

Ni mu gihe muri gahunda ya NST2 y'imyaka itanu iri imbere, hari gahunda yo kubakamo ibindi bilometero 15.

Ibi byose bikaba biri muri gahunda yo kurimbisha umujyi, no kuwuzamurira agaciro ndetse no gufasha abahatuye gutura neza.

Ni mu gihe uyu mujyi ufite intego yiswe 'Ruhango ikeye', ikaba gahunda igamije kurushaho kunoza isuku mu mujyi wa Ruhango.

Ubwo abayobozi batambagiraga ahgiye kubakwa uyu muhanda

Meya Habarurema Valens uyobora Akarere ka Ruhango, yavuze ko igikorwa nk’iki cy’umuhanda wubatswe n’umuturage bishushanya gukunda igihugu kuko ugirira akamaro abantu benshi.

Rwemayire Rekeraho Pierre Claver, usanzwe anayobora ishuri rya Lycee de Ruhango, yavuze ko umutima wo kubaka uyu muhanda yawukuye mu mpanuro za Perezida Paul Kagame zo kumenya kwishakamo ibisubizo

Imihanda ikomeje kubakwa mu Mujyi wa Ruhango, igenda irushaho kuwongerera isuku

Uyu muhanda uzaba ushamikiye ku wundi munini wa Kigali-Ruhango-Huye

Abaturage b’ahazanyuzwa uyu muhanda n’abandi muri rusange, bishimiye iki gikorwa cyiza, bavuga ko gikwiye kubera abandi urugero

Gahunda ya ‘Ruhango icyeye’ igamije kurimbisha Umujyi wa Ruhango

Ni ingingo Umukuru w'Igihugu yagarutseho kuri uyu wa Gatatu tariki 9 Ukwakira 2024, ubwo yatangizaga inama izwi nka 'Biashara Afrika'. Iyi nama igamije guteza imbere ubucuruzi n'ubuhahirane hagati y'ibihugu bya Afurika binyuze mu Isoko Rusange rya Afurika (AFCFTA).

Ni inama yitabiriwe n'abanyacyubahiro batandukanye barimo Mahamadou Issoufou wabaye Perezida wa Niger, Umuyobozi wungirije wa Komisiyo y'Umuryango w'Ubumwe bwa Afurika, Monique Nsanzabaganwa, Minisitiri w'Intebe w'Ubwami bwa Eswatini, Russell Dlamini n'abandi.

AFCFTA ni ryo soko ryagutse ku Isi rihuza ibihugu 54 byo mu Muryango wa Afurika Yunze Ubumwe n'indi miryango y'ubukungu itandukanye.

Kugeza ubu ibihugu 47 ni byo byamaze kwemeza ayo masezerano, mu gihe u Rwanda ruri mu bihugu birindwi bya mbere byamaze gutangira gukora ubucuruzi binyuze muri ayo masezerano rusange.

Iyi nama igamije kurebera hamwe uburyo ibihugu bya Afurika byarushaho kubyaza umusaruro aya masezerano binyuze mu gukorana ubucuruzi.

Minisitiri w'Ubucuruzi n'Inganda mu Rwanda, Prudence Sebahizi yavuze ko ari ishema kuba u Rwanda rwakiriye iyi nama cyane ko gahunda y'Isoko rusange rya Afurika ariho yatangiriye mu 2018.

Yavuze ko Biashara Afrika ari urubuga rukomeye rw'ibiganiro n'ubufatanye hagati y'abakora ubucuruzi n'izindi nzego zitandukanye ku Mugabane wa Afurika.

Umunyamabanga Mukuru w'Isoko Rusange rya Afurika, Wamkele Keabetswe Mene, yavuze ko iyi nama ari ingenzi cyane kuri ba rwiyemezamirimo bo muri Afurika.

Ati 'Ni iby'agaciro gakomeye kuri twe kugaruka i Kigali mu Rwanda muri iyi nama ya kabiri ya Biashara Afrika […] Ndashimira Perezida Paul Kagame na Guverinoma ayoboye ku bwo kwakira 'Biasha Afrika' ifasha nk'urubuga rukomeye mu kunganira n'urwego rw'abikorera muri Afurika by'umwihariko ibigo bito n'ibiciriritse na barwiyemezamirimo b'urubyiruko.'

Yakomeje avuga ko isoko rusange rya Afurika ari amahirwe yo kurwanya ubukene bukigaragara ku mugabane wa Afurika banyuze mu gukorana.

Ati 'Abanyafurika barenga miliyoni 400 babayeho mu bukene bakomeye, ubucuruzi no kugera ku masoko mashya ni ingenzi kuri twe ngo tubashe kugabanya ubukene, isoko rusange rya Afurika riha Abanyafurika amahirwe yo kuva mu bukene binyuze mu bucuruzi, iyo dushyize imbaraga zacu mu bijyanye no kwihuza mu bukungu no gushyiraho imikorere ya Afurika nk'isoko rimwe rusange, nemera ko nk'Abanyafurika tuba twiyongereye amahirwe yok urwanya ubukene bukabije.'

Dukeneye kunoza politike n'imiyoborere yacu

Perezida Kagame yavuze ko ibyakozwe byose mu kunoza imikorere y'Isoko Rusange rya Afurika bishimangira ubushake uyu mugabane ufite mu gukorana no gushaka ibisubizo by'ibibazo biwugarije.

Yavuze ko koko Afurika ifite ubushobozi bwo gukemura Ibibazo ifite, gusa ashimangira ko kugira ngo bigerweho hari icyo abayobozi basabwa.

Ati 'Afurika ifite ubushobozi bwo kunga ubumwe mu gukemura Ibibazo byacu, ariko Ndasaba Abayobozi bacu kumva ko bimwe mu bintu bitwitambika bitagoye gukemura, ntabwo bikwiriye gukomeza kuba ikibazo, dukwiriye gukemura Ibibazo biri muri politike yacu, imiyoborere yacu kandi Byose bitangirira ku myumvire no kugira Icyerekezo gisobanutse.'

Perezida Kagame yagaragaje ko kimwe mu bintu bitumvikana kugeza uyu munsi ari uburyo Abaturage ba Afurika bagorwa no kugenderanirana.

Ati 'Kuki hakwiriye kubaho Ikintu nk'icyo, kuki hatabaho urujya n'uruza rw'abantu mu bwisanzure ndetse n'urw'ibicuruzwa na serivisi, kubera iki? Kubera iki abaturage b'igihugu kimwe badashobora kwambuka imipaka bajya mu kindi gihugu cyo hirya no hino ku Mugabane nta nkomyi? Ikibazo ni ikihe? Birangira twemeranyije ko turi abavandimwe, turi abantu bamwe, bakeneye ibintu bimwe ariko bikarangira tubuze uru rujya n'uruza rw'abantu rukozwe mu bwisanzure. Ndavuga urujya n'uruza rwo kurenga imipaka ariko hari n'abantu batagenda imbere mu mipaka yabo mu bwisanzure, kandi ibyo byose ni politike ikwiriye kunozwa kandi tugomba kuyinoza.'

Kugeza ubu u Rwanda rwatangiye kubyaza umusaruro amahirwe y'Isoko Rusange rya Afurika aho rwohereza hirya no hino muri Afurika ibicuruzwa birimo ikawa, icyayi, amavuka akomoka kuri avoka, ubuki n'ibindi binyuranye.

Umuyobozi wungirije wa Komisiyo y'Umuryango w'Ubumwe bwa Afurika, Monique Nsanzabaganwa, yavuze iyi nama ishimangira ubushake bw'umugabane wa Afurika bwo guhuza isoko.

Yavuze ko kuba Afurika ituwe n'abantu hafi miliyari ebyiri ari amahirwe akomeye akwiriye kubyaza inyungu mu bijyanye n'ubucuruzi.

Minisitiri w'Ikoranabuhanga na Inovasiyo, Ingabire Musoni Paula, aganira na mugenzi we w'ibikorwaremezo, Dr. Jimmy Gasore

Umuyobozi Mukuru w'Urwego rw'Igihugu rw'Iterambere, Francis Gatare, aganira na bamwe mu bitabiriye iyi nama

Minisitiri w'Ikoranabuhanga na Inovasiyo, Ingabire Musoni Paula, aganira na mugenzi we w'ibikorwaremezo, Dr. Jimmy Gasore, uw'ubuzima, Dr Sabin Nsanzimana n'uw'ubuhinzi n'ubworozi, Dr. Ildephonse Musafiri

Umuyobozi Mukuru wa I&M Bank Rwanda, Benjamin Mutimura, hamwe n'Umuyobozi Mukuru wa RwandAir, Yvonne Makolo

Minisitiri w'Ubuzima, Dr Sabin Nsanzimana hamwe na Minisitiri w'Ububatera, Dr Emmanuel Ugirashebuja

Umuyobozi w'Umujyi wa Kigali, Samuel Dusengiyumva ni umwe mu bitabiriye inama ya Biashara Afrika

Minisitiri w'Intebe w'Ubwami bwa Eswatini, Russell Dlamini yitabiriye iyi nama

Mahamadou Issoufou wabaye Perezida wa Niger yashimiwe uruhare yagize mu ishyirwaho ry’Isoko Rusange rya Afurika

Perezida Kagame yavuze ko ibyakozwe byose mu kunoza imikorere y'Isoko Rusange rya Afurika bishimangira ubushake uyu mugabane ufite mu gukorana no gushaka ibisubizo

Perezida Kagame yagaragaje ko kimwe mu bintu bitumvikana kugeza uyu munsi ari uburyo Abaturage ba Afurika bagorwa no kugenderanirana.

Visi Perezida wa Komisiyo y'Umuryango wa Afurika Yunze Ubumwe, AU, Dr Nsanzabaganwa Monique, yitabiriye iyi nama

Amafoto: Niyonzima Moses & Habyarimana Raoul

Dore ibyiza byo kureba filime ziteye ubwoba ku buzima:

1. Gutuza

Nubwo iyo uri kureba izi filimi usanga stress yazamutse ariko nanone bitegurira umubiri wacu kuzabasha kwihanganira stress mu buzima buzaza.

2. Kuzamuka kwa adrenarine

Uyu musemburo ukorwa mu gihe cya stress ni umusemburo utuma ubwonko buvamo umunabi kandi bibushyiramo ingufu bityo ukagira umutuzo

3. Bifasha ubwonko (by'umwihariko abagore)

Kureba izi filimi bituma amarangamutima azamuka cyangwa akamanuka bitewe n'aho bageze bakina. Ibi rero ku bagore, dore ko aribo bakunze kugaragaza amarangamutima ku buryo bworoshye bituma ubwonko bwabo burekura dopamine, glutamate na serotonin bikabatera kuba maso kandi n'ubwonko bwabo bugakora cyane

4. Gusangira amarangamutima

Iyo uri kurebana iyi filimi nuwo mukundana bituma nk'iyo bigeze ahateye ubwoba cyane mufatana mu biganza cyane cyangwa mugasa n'abahoberana. Ibi bituma buri wese abasha gutuza kandi bikabafasha kongera ubusabane

5. Gutwika calories

Ubushakashatsi bwakorewe muri Westminster University bugaragazako kureba iyi filimi igihe cy'iminota 90 (isaha n'igice) birekura umusemburo wa adrenalin ufasha gutwika 113 calories. Ibi bikaba bifasha abashaka kugabanya ibiro kuko bingana no gukora urugendo rw'isaha n'amaguru.

6. Kongera ubudahangarwa

Nyuma yo kureba izi filimi umubiri wacu uratuza bityo ubudahangarwa bukazamuka bitewe na serotonin, glutamate na dopamine biba byazamutse kandi bigatera umubiri kuba maso

7. Kugabanya stress

Nubwo iyo uri kureba iyi filimi bizamura igipimo cya stress ariko nanone bifasha mu kugabanya igipimo cya stress yo mu buzima busanzwe. Ikorwa rya adrenaline rituma imvubura za adrenal zikora bityo bikagabanya kwiheba no kwigunga

8. Ni nziza kuri DNA

Kureba izi filimi kandi bifasha mu gukabura DNA kuko tuba tumeze nk'abahanganye n'ibiteye ubwoba ariko birenze ibitubaho mu buzima busanzwe. Kuri bamwe kureba izi filimi bizamura igipimo cyabo cyo kwigirira icyizere no kugaragaza amarangamutima mu buzima busanzwe

9. Gufasha amaraso gutembera neza

Iyo tureba izi filimi umutima uteragura cyane ibi bikaba kimwe na kwa kundi utera iyo twirukanka. Ibi bituma imiyoboro y'amaraso yaguka bigafasha n'umutima gukora neza mu nyuma

10. Bivura ubwoba

Kureba izi filimi bifasha bamwe kutagira ubwoba cyane cyane nk'ubwo kuba yagenda mu mwijima, kwiraza mu nzu, n'ubundi bwoba bumeze nk'ubudafite ishingiro cyane.

Yatangaje ibi mu gihe u Rwanda rwiteguye kwakira Inama Mpuzamahanga izarebera hamwe uruhare rw'Abenjeniyeri mu iterambere rirambye mu nzego zinyuranye.

Iyi nama izaba hagati ya tariki 15-18 Ukwakira, yateguwe n'Urugaga Nyarwanda rw'Abenjeniyeri mu Rwanda, IER, ku bufatanye n'Ihuriro ry'Ingaga z'Abenjeniyeri ku Isi. Izitabirwa n'abarenga 800.

Mu kiganiro n'itangazamakuru cyabaye ku wa 08 Ukwakira 2024, Dr Ngarambe yavuze ko muri iyi nama hazabaho kwisuzuma ku ruhande rw'u Rwanda hagendewe ku bimaze kugerwaho ahandi, harebwe niba 'Turi ku rwego rw'Isi.'

Yagize ati 'Iyi nama izadufasha kwigisha abakozi ba Leta cyane ibigo dukorana muri Minisiteri y'Ibikorwaremezo. Cyane cyane nka Minisiteri twibanda ku iterambere rirambye ry'imijyi, tuzareba ese abandi bageze he, ni he twashyira imbaraga.'

'Si ukwiga gusa, tuzanareba ese ibyo bakora hariya, no mu Rwanda byakunda?'

Mu Cyerekezo 2050, u Rwanda rwiyemeje kuzaba rufite imiturire igezweho kandi igera ku byiciro byose by'abaturage.

Umubare w'ingo zo mu cyaro zituye ahantu hamwe hateguwe uzazamuke uve kuri 67,2% mu 2016/17 ugere kuri 80% mu 2024 no ku 100% mu 2035, bikomeze gutyo kugeza mu 2050.

Imidugudu yo mu cyaro izaba ijyanye n'igihe, iteye imbere, abantu batuye mu buryo bwiza, bafite ibikorwa remezo by'ibanze na serivisi nkenerwa.

Kubera ko byitezwe ko Abanyarwanda barenga 70% bazaba batuye mu mijyi, mu gihugu hazashyirwaho uburyo bw'imiturire bwerekana ahagomba guturwa n'ahagenewe gutangirwa serivisi, ndetse n'uko imiturire na serivisi byuzuzanya kandi ntibibangamire imikoreshereze myiza y'ubutaka bwagenewe ibindi bikorwa bitari imiturire.

Umunyamabanga Nshingwabikorwa wa IER, Steven Sabiti, yavuze ko u Rwanda hari aho rumaze kugera mu guteza imbere ibikorwaremezo birengera ibidukikije binagira uruhare mu iterambere rirambye, bishobora no kubera isomo abazitabira iyi nama.

Ati 'Urebye nk'Umushinga wo kubaka Umudugudu wa Mpazi, hagiye hakoreshwa ibikoresho bitangiza ibidukikije, ikindi hari umujyi wacu uko ugenda utunganywa hari icyo bivuze. Hari kandi ibishanga biri gutunganywa, ibyo rero ni byinshi biri gukorwa mu murongo n'ubundi w'intego z'iterambere rirambye.'

Umuyobozi Mukuru wa IER, Eng. Gentil Kangaho, yavuze ko kuba ari ubwa mbere iyi nama igiye kubera munsi y'Ubutayu bwa Sahara, bizaha urubuga umugabane ugaragaze ibyo wagezeho.

Biteganyijwe ko abazitabira iyi nama bazasura bimwe mu bikorwaremezo u Rwanda rwagezeho birimo, Kigali Norrsken House, Stade Amahoro, Inyubako ya I&M Bank, Ikibuga Mpuzamahanga cy'Indege cya Bugesera, Nyabarongo II n'ahandi.

Umuyobozi muri Minisiteri y’Ibikorwaremezo, Dr Jack Ngarambe, yavuze ko kimwe mu bishyirwa imbere n'iyi minisiteri harimo no kwita ku iterambere rirambye ry'imijyi mu gihugu

Umunyamabanga Nshingwabikorwa wa IER, Steven Sabiti yavuze ko u Rwanda hari aho rumaze kugera mu guteza imbere ibikorwaremezo birengera ibidukikije

Umuyobozi Mukuru wa IER, Eng. Gentil Kangaho, yavuze ko kuba ari ubwa mbere iyi nama igiye kubera munsi y'Ubutayu bwa Sahara, izaba ari urubuga rwo kugira ngo umugabane ugaragaze ibyo wagezeho

Iyi nama izaba hagati ya tariki 15-18 Ukwakira, izitabirwa n'abarenga 800

Amafoto: Rusa Willy Prince

Magingo aya iri shuri ryatangiye kwigirwamo, ryigisha amashami arimo Software Development na Electrical Technology, gusa ishami ryo kwigisha uburyo bwo gukora ubwato no kubukanika, ntabwo riratangira.

Bamwe mu baturage b'aka karere bari bagaragaje impungenge bibaza impamvu iri shami ritaratangira.

Kwizera Jean Bosco utuye hafi y'iri shuri yabwiye IGIHE ko batunguwe no kuba amashami yagaragajwe nk'umwihariko w'iri shuri nta na rimwe ryatangiranye.

Ati 'Turategereje ngo turebe niba koko ayo mashami batubwiye yo gukora no gutwara ubwato azigishwa.”

Akarere ka Karongi ni kamwe mu turere dutanu two mu Ntara y'Iburengerazuba dukora ku Kiyaga cya Kivu. Aka karere gafite umwihariko wo kuba ariko karere rukumbi mu Rwanda karimo uruganda rukora ubwato mu buryo bugezweho.

Umuyobozi w'uru ruganda, Alain Munyaburanga, aherutse gutangaza ko kuba mu Rwanda nta shuri rihari ryigisha gukora, gukanika no gutwara ubwato ari ikibazo.

Ibi abishingira ku kuba abanyeshuri uruganda Afrinest ruhuguye bahita batwarwa n'ibindi bihugu nka Kenya na Uganda.

Umuyobozi w'Akarere ka Karongi, Mukase Valentine, mu kiganiro na IGIHE yamaze impungenge abaturage banyotewe no kwiga ibijyanye no gukora no gutwara ubwato, ndetse n'ubworozi bw'amafi ashimangira ko iri shuri rizabyigisha nubwo bitari mu mashami iri shuri ryatangiranye.

Ati 'Ntabwo twababeshye. Ririya shuri ryatangiranye ishami Electrical Technology na Software development ariko mu minsi iza ku bufatanye na RTB (Ikigo cy'Igihugu Gishinzwe Amasomo y'Ubumenyi ngiro) hazatangira andi mashami ajyanye no gukora ubwato, kubukanika, no kubutwara mu Kiyaga cya Kivu, ndetse n'ishami ry'ubworozi bw'amafi.”

Meya Mukase ntiyatangaje umwaka aya mashami mashya azatangiriramo gusa yavuze ko azagenda atangira mu bihe bitandukanye kuko harimo izikiri gukorerwa integanyanyigisho.

Mu nta ngiriro za 2023 nibwo mu kagari ka Ryaruhanga, Umurenge wa Mubuga w'Akarere ka Karongi, hatangiye imirimo yo kubaka ishuri ry'icyitegererezo mu kwigisha amasomo y'imyuga n'ubumenyi ngiro, Mubuga TSS.

Iri shuri ryubatswe na Guverinoma y'u Rwanda ku nkunga ya Banki y'Isi, magingo aya ryigirwamo n'abanyeshuri 92, barimo impunzi 11.

Ni ishuri biteganyijwe ko rizigamo abanyeshuri 600, bose bacumbirwa mu kigo, ndetse rizaba ririmo amashami ataboneka ahandi arimo gukora, gukanika no gutwara ubwato mu kiyaga cya Kivu n'ubworozi bw'amafi.

Nubwo biri uko ariko, IGIHE yasuye iri shuri isanga rifite ishami abiri ry'ikoranabuhanga mu mashanyarazi n'ishami ryo gukora ubwonko bwa mudasobwa, Software development.

Ishuri rya Mubuga Technical Secondary School ryuzuye ritwaye miliyari 1 na miliyoni 332Frw.

Ishuri rya Mubuga Technical Secondary School ryuzuye mu Karere ka Karongi

Iri shuri rizigisha abanyeshuri bagera kuri 600