Blog

Iki kigo kizatangira kubakwa mu mpera z'uyu mwaka, mu nshingano kizaba gifite harimo no gusuzuma ibihingwa ku buryo umuhinzi uzajya abona imyaka ye yarwaye, azajya aca akababi akakajyana kuri iki kigo bakagapimisha ibyuma byabugenewe mu kumenya iyo ndwara iyo ariyo.

Musabyimana Theophile, umuhinzi-mworozi ntangarugero wo mu murenge wa Nyabitekeri mu kiganiro na IGIHE yavuze ko mu byo yiteze kuri iki kigo harimo kumufasha kongera umusaruro kuko hari ubwo yajyaga ahinga adakoreshe inyongeramusaruro.

Ati 'Hari ubwo nabonaga kubona ingongeramusaruro bingoye ngapfa gutera bigatuma ntabona umusaruro uhagije'.

Igiraneza Berthe yashimye kuba muri iki kigo kigiye kubakwa harimo n'isuzumiro ry'ibihingwa avuga ko rizaba ari igisubizo kuko hari ubwo bahingaga imyaka ikuma ntibabone umusaruro kandi wenda bashoboraga gutera umuti igakira.

Umukozi w'Umushinga Hinga Wunguke uterwa inkunga na USAID, Nyabyenda Jean Paul, yavuze ko impamvu bahisemo kubaka iki kigo mu karere ka Nyamasheke ari uko mu turere bubatsemo ikigo nk'iki babonye gitanga umusaruro.

Ati 'Ikigo Farm Service Center mu byo kizakemura harimo ibura ry' inyongeramusaruro ku bahinzi kuko bazajya bayibonera hafi. Kizaba gifite abakozi bajya hasi mu mirenge guhugura abaturage bakora ubuhinzi n'ubworozi,”

“Umuhinzi uzajya abona imyaka ye yarwaye yemerewe gusoroma ibabi akarizana bakamubwira icyo icyo gihingwa kirwaye. Muri iki kigo kandi hazaba harimo ikoranabuhanga ku buryo umuhinzi cyangwa umworozi ashobora gufata umwanya akareba mu mashusho uko ubuhinzi n'ubworozi bikorwa kinyamwuga'

Akarere ka Nyamasheke kagiye kubakwamo iki kigo kari mu turere dufite abaturage benshi batihagije mu biribwa kuko mu baturage barenga ibihumbi 400 bagatuye abihagije mu biribwa ari 74% mu gihe ku rwego rw'igihugu Abanyarwanda bihagije mu biribwa ku kigero cya 80%.

I Nyamasheke hagiye kubakwa Ikigo cy'Ikitegererezo mu buhinzi n’ubworozi

Hashize iminsi hakorwa ubugenzuzi ku mashuri hirya no hino mu gihugu, harebwa niba yubahiriza ibyangombwa bituma atanga uburezi bufite ireme.

Mu biganiro Abadepite bagize Komisiyo y'Uburezi, Ikoranabuhanga, Umuco, Siporo n'Urubyiruko bagiranye n'ubuyobozi bwa NESA kuri uyu wa 31 Ukwakira 2024, Dr. Bahati Bernard yavuze ko mu bugenzuzi bwakozwe mu gihugu hose basanze hari amashuri 650 akora nta byangombwa, ndetse batangiye kuyasura ngo harebwe niba yafungwa cyangwa azahabwa ibyangombwa.

Ati 'Tumaze gusura amashuri arenga 500, ubundi ukuntu tubigenza turitonda n'iyo ari ishuri dushaka gufunga turabyitondera. Kuko buriya niba ufunze ishuri birasaba no kureba ku ngaruka zishobora kugera ku bana baryigagamo, birasaba ko ufunga ishuri utegura aho wimurira abana bagomba kujya kwiga kuko ugiye ugafunga gutyo gusa wasanga ahubwo byateza ibibazo kurusha ibyo washakaga gukemura.'

Yavuze ko hari ayo basanga yashyira ubuzima bw'abnyeshuri mu kaga bagahitamo kuyafunga abanyeshuri bakoherezwa mu bindi bigo.

Ati 'Hari ayo dusanga rwose aho gukorera uko hameze atari ishuri tugafata icyemezo cyo kurifunga ariko nk'uko nabivuze kurifunga turitonda. Nk'ubu ayo twasanze ameze gutyo ashobora kuba arimo abana, kuko aba akeneye no gufungwa byihutirwa kuko n'umutekano w'abana uba ari ngombwa, turi guteganya ko mu gihembwe cya kabiri tuzaba twagiye dukorane inama n'ayo mashuri n'ababyeyi tubabwire ibyo tugiye gukora n'abana tubashakire ahandi bajya kwiga hanyuma ayo mashuri tubona atameze neza ahagarare.'

Dr. Bahati yahamije ko hari ikindi cyiciro cy'amashuri basanga adafite ibyangombwa byo gukora ariko yujuje ibisabwa ku buryo ahita ahabwa ibyangombwa byo gukora, hakaba n'andi akora ariko ataragera ku bipimo bisabwa ariko agerageza.

Ati 'Ayo tuyaha igihe, tukababwira ngo dusanze muhagaze aha, mwujuje ibi, murabura ibi. Tubaha igihe cy'umwaka ku buryo mu mwaka utaha nimutaba mwujuje ibi n'ibi ntabwo muzongera gufungura.'

Imibare ya NESA igaragaza ko mu Rwanda hari amashuri yujuje ibyangombwa atanga uburezi bw'ibanze 5045 ari hirya no hino mu gihugu, harimo 1268 ari mu Ntara y'Iburasirazuba, 1153 ari mu Majyepfo, 1121 mu Burengerazuba, 792 mu Majyaruguru na 711 mu Mujyi wa Kigali.

Umuyobozi Mukuru wa NESA, Dr Bahati Bernard yavuze ko badapfa gufunga ishuri batarebye ingaruka byagira ku bana

Iby'abanyeshuri batsindwa amasomo ya siyansi byatangiye kuvugwa cyane nyuma y'uko abatsinze ibizamini bya Leta mu mashuri abanza n'ayisumbuye bamenyeshwaga ibigo bazigaho mu mwaka w'amashuri wa 2024/2025, bagasanga harimo abagize zeru mu masomo ya siyansi boherejwe kuyiga mu cyiciro cya kabiri cy'amashuri yisumbuye.

Uretse ibizamini bya Leta, isuzuma rikorwa ku banyeshuri bo mu burezi bw'ibanze harebwa ubumenyi bafite mu Kinyarwanda, Icyongereza n'Imibare rigaragaza ko abanyeshuri bo mu mwaka wa gatatu w'amashuri abanza mu 2021 batsinze imibare bari 69,94% bigeze mu 2023 biragabanyuka bagera kuri 55.6%.

Mu biganiro abadepite bagize Komisiyo y'Uburezi, Ikoranabuhanga, Umuco, Siporo n'Urubyiruko bagiranye n'ubuyobozi bwa NESA kuri uyu wa 31 Ukwakira 2024, Depite Niyongana Gallican yagaragaje ko igihugu gishaka ko abana benshi bashobora kubona aho biga amasomo ya siyansi bakwiye kuyiga ariko ikibazo kikaba ko usanga mu nguni zitandukanye bazitsindwa.

Ati 'Ikibazo cyabaye ni uko bavugaga ngo babashyize muri siyansi kandi barazitsinzwe. Umuti ni ugushaka impamvu bazitsindwa nyine. Numva ari ho hashakirwa ingamba kuko ubundi turifuza ko abana biga siyansi kandi nemera ko ubundi umwana wese afite ubwo bushobozi bwo kuziga ateguwe uko bikwiye, kandi ninabyo twifuza, twifuza ko abafite ayo mahirwe yo kuba bakwiga siyansi baziga.'

Umuyobozi Mukuru wa NESA, Dr. Bahati Bernard yagaragaje ko amasomo ya siyansi asaba ibintu byinshi birimo abarimu bayize neza n'ibikoresho kenshi usanga bihenze.

Ati 'Siyansi isaba icya mbere abarimu bayize neza, reka tuvuge ko tubafite ariko igasaba ibikoresho ari byo bidahari ari na yo mpamvu usanga mu masuzuma yaba ayo twavuze mbere yaba no mu bizamini bya Leta, mwavuze mu mibare, n'andi masiyansi rwose ntabwo abana bayatsinda neza.'

Yavuze ko hari igenzura ryakozwe basanga integanyanyigisho ikoreshwa ikubiyemo ibintu byinshi ku buryo umwalimu atabasha kuyigisha mu buryo buboneye.

Ati 'Hari impamvu nyinshi abantu barebaho harimo uko kubura kw'ibikoresho, abantu bareba ku barimu, integanyanyigisho burya na yo igira uruhare. Hari ibyo tumazemo iminsi ubwo twari turi guhuza isuzuma rya LARS n'ibipimo mpuzamahanga abantu baje kubidufashamo barebye integanyanyigisho yacu batubwira ko iremererye, ni ukuvuga ngo dushaka kwigisha abana byinshi cyane bikarangira tubahaye bikeya.'

'Twabiganiriyeho na REB tunabereka raporo baduhaye nkeka ko mu minsi iri imbere hazabaho kugenzura ryo kureba uburemere ngo harebwe ibigomba kwigwa ibyo ari byo kuko ni na kimwe mu ntego Minisitiri w'Uburezi afite cyo kuvugurura integanyanyigisho abana bakiga iby'ingenzi aho kugira ngo dushake kubaha byinshi twibone twabahaye duke cyane kubera ko aba ari byinshi abarimu bakabinyuramo biruka.'

Imibare ya Minisiteri y'Uburezi igaragza ko abanyeshuri binjiye mu mashuri y'uburezi rusange bw'amashuri yisumbuye bavuye kuri 168.595 mu 2022 bagera kuri 170.399 mu 2023.

Perezida wa Komisiyo, Rubagumya Furaha Emma yavuze ko hakwiye kwitabwa ku buryo bw'imyigishirize n'abigisha kuko ahari umwalimu mwiza ireme ry'uburezi riba ari ryiza umunyeshuri agasohokana ubumenyi buzamugirira akamaro.

Umuyobozi Mukuru wa NESA, Dr Bahati Bernard yavuze ko hakiri ikibazo cy’ibikoresho n’integanyanyigisho iremereye

Depite Niyongana Gallican yavuze ko hakwiye gushaka umuti w’ikibazo gituma abana batsindwa siyansi

Perezida wa Komisiyo Rubagumya Furaha Emma yavuze ko ari byiza kwita ku buryo bw’imyigishirize

Ku wa 29 Ukwakira 2024, Bishop Harerimana n'umugore we bakekwaho ibyaha bitatu birimo kwihesha ikintu cy'undi hakoreshejwe uburiganya, gukangisha gusebanya no gukwirakwiza amafoto y'imikoreshereze y'ibitsina, bagejejwe imbere y'ubutabera baburana ifungwa n'ifungurwa ry'agateganyo.

Nyuma yo kumva impande zombi mu rubanza rwabaye mu muhezo, kuri uyu wa kane tariki ya 31 Ukwakira 2024 nibwo urukiko rwasomye umwanzuro warwo rwemeza ko Bishop Harerimana n'umugore we barekurwa by'agateganyo.

Aba bombi batanze inzu yabo ifite agaciro ka Miliyoni 60 nk'ingwate y'ikimenyetso cy'uko batazigera batoroka ubutabera.

 

Ndagijimana Rukwene watawe muri yombi akekwaho kwiba inka ku wa 30 Ukwakira 2024. Yibwe mu Murenge wa Mudende, Akagari ka Ndoranyi ho mu Mudugudu wa Nyabishongo mu rugo rw'uwitwa Nsengiyumva Alphonse.

Umusigire w'Umunyamabanga Nshingwabikorwa w'Umurenge wa Nyakiliba, Sinabakeka Jean de Dieu, yemeye ko uwo mudugudu yatawe muri yombi agashyikirizwa RIB Sitasiyo ya Kanama, agira inama abayobozi yo kutararikira iby'abandi kugeza aho babyibye.

Yagize ati “Ayo makuru twayamenye, inka bayimusanganye niba hari ukuntu akorana n'abajura bakaba bari bayimubikije ntabwo tubizi, ariko yashyikirijwe RIB Sitasiyo ya Kanama ubu ari gukurikiranwa. Ni ubwa mbere bibaye nta bujura yari yaraketsweho na rimwe.”

Yakomeje agira ati “Abantu b'abayobozi icyo tubashishikariza ni ukureka akaboko karekare bagakora inshingano kandi bakaba intangarugero mu byo bagomba gukora cyane cyane mu mico no mu myifatire kugira ngo abaturage babarebereho urugero rukwiye. Inka yari yibwe yo yasubijwe nyirayo.”

Itegeko riteganya ibyaha n'ibihano muri rusange, mu ngingo yaryo ya 166, ivuga ko uhamwe n'icyaha cy'ubujura ahanishwa igifungo kuva ku mwaka umwe ariko kitarenze imyaka ibiri, n'ihazabu y'amafaranga y'u Rwanda kuva kuri miliyoni imwe ariko atarenze miliyoni ebyiri, imirimo y'inyungu rusange mu gihe cy'amezi atandatu cyangwa kimwe gusa muri ibyo bihano.

Inka yari yibwe mu Murenge wa Mudende yasubijwe nyirayo

Aba bagabo bafatiwe mu Karere ka Gakenke muri Santere ya Gakenke mu ijoro ryo ku wa 29 Ukwakira 2024, bivugwa ko umwe afite imyaka 30 undi akagira 31. Bafashwe na Polisi ubwo yabahagarikaga ikababaza ibyo batwaye bakababwira ko ari amashu, basabwa gukuraho ihema bari batwikirije bagasanga ayo mashu bayarengeje ku mabalo 40 y'imyenda ya caguwa.

Umuvugizi wa Polisi mu Ntara y'Amajyaruguru, SP Jean Bosco Mwiseneza, yemeje aya makuru avuga ko abafashwe nabo ubwabo bahise babyiyemerera bakajya gucumbikirwa kuri Sitasiyo ya Polisi ikorera mu Gakenke.

Yagize ati “Iriya modoka yaje iturutse mu Karere ka Rubavu igeze mu Gakenke abapolisi barayihagarika bababajije ibyo bapakiye kubera ko yari itwikiriye, bavuga ko ari amashu, ni bwo babasabye gukuraho ihema yari itwikirije basanga ya mashu bayarengeje ku mabalo 40 y'imyenda ya caguwa.”

SP Mwiseneza yibukije abaturage ko Polisi y'Igihugu ihora iri maso kuko inzira zose bakoresha binjiza magendu mu gihugu zizwi kandi abazigerageza babatahura kandi amategeko akabahana, ashimira imikoranire myiza bafitanye n'abaturage kuko babafasha gutahura abanyabyaha.

Ati “Turabagira inama rero yo kubivamo bagakora ibyemewe kuko nta kindi bazabikuramo uretse ibihombo birimo no kuba bafungwa imiryango yabo ikahazaharira. Turashimira kandi abaturage bamaze kumva ko kurwanya ibyaha ari ubufatanye bakadufasha mu kuduha amakuru yo gutahura abakomeje kwijandika mu byaha.”

Hagendewe ku Itegeko ry'Umuryango w'Afurika y'Iburasirazuba (EAC), mu ngingo yaryo ya 199 ivuga ko ibicuruzwa bya magendu byafashwe bitezwa cyamunara.

Imodoka yakoreshejwe muri ubwo bucuruzi bwa magendu na yo itezwa cyamunara ndetse umushoferi wayo agacibwa amande angana n'ibihumbi bitanu by'amadolari y'Amerika (US$ 5000).