Category: Uncategorized

Mu butumwa yanyujije ku rukuta rwe rwa Instagram kuri uyu wa Kabiri tariki 8 Mata 2025, Isheja Butera Sandrine yifashishije amashusho agaragaza ubunyamanswa bw'interahamwe muri Jenoside yakorewe Abatutsi, avuga ko ibyo atari filime cyangwa inkuru mpimbano ahubwo ko ari inkuru mpamo y’ibyabayeho.

Yagize ati: 'Ibi si filime twarebye, si inkuru twahimbye. Ni ubuzima/urupfu twabayemo.'

Isheja, yifashishije ijambo Perezida Paul Kagame yavuze ubwo yatangizaga ibikorwa byo kwibuka ku nshuro ya 31 Jenoside yakorewe Abatutsi mu 1994, aho Umukuru w’Igihugu yavuze ko nta kindi kibi kurusha Jenoside kizongera kuba ku banyarwanda.

Sandrine Isheja yasubiyemo amagambo ya Perezida Kagame, ati: 'Ntibizongera kubaho ukundi, atari uko ababiteye batazongera kubigerageza, cyangwa batari kubigerageza ubu. Ahubwo ntibizongera kuba kuko hazabaho abantu bazahaguruka bakarwana.'

Sandrine yabwiye urubyiruko ati: 'Ntimuzigere mujya ku ruhande rw'umwijima. Ntimuzemere ko hari umuntu wabasubiza muri biriya bihe by'umwijima. Mumenye ukuri, muhagarare ku mucyo, murwanire ubuzima.'

Umwaka ushize, nabwo Sandrine Isheja yakomoje ku bunyamaswa bw'Interahamwe yabonesheje amaso ubwo yari afite imyaka itanu mu gihe cya Jenoside yakorewe Abatutsi.

Icyo gihe mu butumwa yanyujije ku mbuga nkoranyambaga, yavuze ko hari Interahamwe yitwaga Bosco yamukubise umugeri mu gatuza inamugera umuhoro igihe kumwica, ashima Imana yamwongereye iminsi yo kubaho.

Yanasabye abarokotse Jenoside yakorewe Abatutsi ko bakwiye guharanira ko kubaho kwabo kuba uk'umumaro. Ati: ''Ndibuka ngera kuri bariyeri yuhuyeho Interahamwe, nari umwana muto mfite imyaka itanu hafi itandatu, nari njyenyine, mama yaragiye ukwe, basaza banjye na bo barajyanye na papa ukwabo i Nyanza ya Butare. Njye nari ku Kabeza, maze Interahamwe yitwaga Bosco inkubita umugeri mu gatuza.

Ndabyibuka ko yari yambaye 'Bottines' za gisirikare amponyora nk'uhonyora ikinyenzi, maze afata umuhoro arawuzamura ati 'Ni wowe wari usigaye muri Kabeza, …' Hashimwe Nyagasani watwongereye iminsi yo kubaho kandi reka kubaho kwacu kube uk'umumaro.''

Isheja yatanze ubu butumwa nyuma y'ubundi yari aherutse gutangira mu kiganiro ngarukakwezi cyashyiriweho gukomeza gufasha umuryango no kugira uruhare mu gukemura ibibazo biwugarije, Kigali Family Night.

Icyo gihe yavuze ko uburyo iwabo bari babayeho neza mbere ya Jenoside yakorewe Abatutsi kuko Se yari umuganga, gusa nyuma yo kwicwa kwe (Se) abasigaye bo mu muryango we banyura mu buzima bushariye.

Ati: ''Icyo gihe rero mama wanjye Madamu Dogiteri urabyibaza, kuko muri 'weekend' twajyaga kwa Lando mu byicungo, gusohoka, urabyumva ubwo buzima twari dufite mbere. Jenoside ikirangira, kugira ngo tubashe kurya mama agasuka inweri […] yari Madamu Dogiteri.''

Isheja Butera Sandrine yongeyeho ko ubwo buzima yanyuzemo we n'umuryango we bwamwigishije guca bugufi ku buryo adashobora kwitwaza ubwamamare afite ngo abe yakwitwara mu buryo budahwitse.

Se wa Isheja Butera Sandrine si we wo mu muryango we gusa wishwe muri Jenoside yakorewe Abatutsi, kuko harimo na sekuru, nyirasenge witwaga Adidja Butera n'abandi.

Umuyobozi Wungirije wa RBA, Butera Isheja Sandrine yahamagariye urubyiruko kwitandukanya n’abashaka kubasubiza mu bihe by’umwijima byaranze u Rwanda, bakarwanira ubuzima 

Ni igikorwa cyabereye mu Mujyi wa Ottawa ku wa 7 Mata 2025 hanatangizwa iminsi 100 yo kunamira inzirakarengane zishwe muri Jenoside yakorewe Abatutsi mu 1994.

Cyaranzwe na gahunda zitandukanye zirimo gushyira indabo ahari ikimenyetso cyo kwibuka, gusura imurikabikorwa rigaragaza amateka ya Jenoside, gucana urumuri rw'icyizere no gutanga ubutumwa buhamagarira isi kurwanya ingengabitekerezo ya Jenoside.

Abashyitsi bitabiriye uyu muhango basuye imurikabikorwa rigaragaza amateka y'u Rwanda mbere ya Jenoside yakorewe Abatutsi, igihe yabaga na nyuma yayo. Ryari ririmo ubuhamya, amafoto n'amashusho, bigaragaza ko Jenoside yakorewe Abatutsi itatunguranye, ahubwo yari umugambi wateguwe neza.

Mu ijambo rye, Ambasaderi w'u Rwanda muri Canada, Higiro Prosper, yavuze ko kwibuka ari uguhagarara ku kuri, kwifatanya n'abarokotse Jenoside no kwamagana abayihakana. Yibukije ko Jenoside yakorewe Abatutsi yari umushinga w'igihe kirekire, wubakiye ku macakubiri n'urwango byatangiye gukwirakwizwa n'abakoloni.

Yagize ati: 'Twahuriye hano twibuka  ku nshuro ya 31 Jenoside yakorewe Abatutsi. Kwibuka ni uguhagarara ku kuri, kwifatanya n'abarokotse no kwamagana abayihakana.'

Major (Rtd) Philip Charles Lancaster, wahoze ari Umujyanama wa gisirikare ku Muyobozi w'ingabo za Loni zari mu Rwanda mu 1994, yavuze ko urwango rwakwirakwijwe mu gihe cy'ubukoloni rwafashije mu gukwirakwiza ibinyoma no gutegura Jenoside yakorewe Abatutsi, ibyakomeje no kwifashishwa mu kuyihakana na nyuma yayo.

Ati: 'Urwango rwigishijwe n'abakoloni rwabaye umusingi w'ibinyoma byabaye intwaro y'abateguye Jenoside, ndetse bigikomeza kugeza n'uyu munsi.'

Umuyobozi w'Ihuriro Humura Association, Kanyemera Pascal yavuze ko guhakana Jenoside yakorewe Abatutsi no kugoreka amateka atari amagambo gusa, ahubwo ari intwaro zongera gukomeretsa.

Ati: 'Kwicara tukicecekera ni nko guhemukira inzirakarengane zishwe ku nshuro ya kabiri, kandi ni amakosa akomeye mu nshingano duhuriyeho nk'abantu.'

Mu buhamya bwe, Gustave Mukurarinda, umwe mu barokotse Jenoside yakorewe Abatutsi, yagaragaje uburemere bw'ibyo yabayemo, avuga ko kurokoka atari ukubaho gusa, ahubwo ari ukwitwaza ukuri, guhangana n'ipfobya no guharanira ubutabera.

Abasizi Sandrine Nkunda na Ikirezi Deborah baserutse mu buhanzi bwuje amagambo y'urukumbuzi, intimba n'icyizere. Binyuze mu buvanganzo, basubije amaso inyuma mu mateka, bagaruka ku bumwe n'ubwiyunge.

Mu gusoza, abari bitabiriye basabwe kudaheranwa n'intimba gusa, ahubwo bakwiye no kugira uruhare mu kurwanya ipfobya n'amacakubiri. Basabwe gukomeza urugendo rwo gusigasira ukuri no gukumira ko ibyabaye byasubira ukundi.

Abanyarwanda baba muri Canada bibutse ku nshuro ya 31 inzirakarengane zazize Jenoside yakorewe Abatutsi

Hafashwe umwanya muto wo kwibuka no kunamira abishwe muri Jenoside yakorewe Abatutsi

Hacanwe urumuri rw’icyizere

Ambasaderi w'u Rwanda muri Canada, Higiro Prosper, yavuze ko kwibuka ari uguhagarara ku kuri, kwifatanya n'abarokotse Jenoside yakorewe Abatutsi no kwamagana abayihakana

Umuyobozi w'Ihuriro Humura Association, Kanyemera Pascal yasabye abatuye muri Canada kudaceceka ku bahakana Jenoside yakorewe Abatutsi no ku bagoreka amateka 

Major (Rtd) Philip Charles Lancaster yavuze uko urwango rwabibwe n’Abakoloni rwagejeje kuri Jenoside yakorewe Abatutsi mu Rwanda

Gustave Mukurarinda, umwe mu barokotse Jenoside yakorewe Abatutsi

Abasizi Sandrine Nkunda na Ikirezi Deborah

Urubyiruko rwitabiriye ku bwinshi

Habaye imurikabikorwa ku mateka y’u Rwanda

Beretswe n’amashusho

Abitabiriye basabwe kudaheranwa n’agahinda

Abanyarwanda batuye muri Canada bifatanyije n’u Rwanda ndetse n’Isi yose mu #Kwibuka31

Gahongayire yabigarutseho mu kiganiro cyihariye yahaye InyaRwanda, muri iki gihe u Rwanda n'inshuti bibuka ku nshuro ya 31 Jenoside yakorewe Abatutsi mu 1994, yatwaye ubuzima bw'abarenga Miliyoni mu gihe cy'iminsi ijana gusa. 

Uyu muhanzikazi wakoze indirimbo nyinshi zubakiye ku isanamitima, no kwizera Imana, yavuze ko ari ikibazo gikomeye kandi gihangayikishije, kuba imyaka 31 ishize, hakaba hakiri umubare munini w'abantu bahakana ko Jenoside yakorewe Abatutsi itabayeho, ndetse ugasanga mu bavuga ibyo harimo n'abayirokotse. 

Aravuga ati 'Birababaje kumva ko hari abagipfobya Jenoside yakorewe Abatutsi banayita izindi nyito cyangwa bavuga ko itabayeho. Murabo harimo n'abayirokotse ariko kubera kutavuga rumwe n'ubuyobozi bakagoreka amateka.'

Yavuze ko hejuru y'ibi, hari n'imvugo zihembera urwango, izitoneka abarokotse Jenoside zigaragara mu banyapolitiki hirya no hino ku Isi, ndetse benshi ugasanga baratizwa umurindi n'imbuga nkoranyambaga.

Gahongayire yavuze ko hakwiye gukomeza gutangwa umurongo uhamye ku mateka yagejeje kuri Jenoside yakorewe Abatutsi, cyane cyane urubyiruko rukaba nyambere mu kwihutira kuyamenya.

Yagize ati: 'Hakorwa iki ngo abantu bayivuge kimwe kandi baharanire ngo ntizongere kubaho?. Hari imvugo zitoneka abarokotse Jenoside zigomba kwamaganwa cyane cyane mu banyapolitiki no ku mbuga nkoranyambaga. Hagomba kuba ibisobanuro bitagoretse cyane cyane urubyiruko ari rwo Rwanda rw'ejo rwiyumvamo rukirinda abagoreka amateka y'u Rwanda.'

Gahongayire yabwiye abahanzi nyarwanda bagenzi be ko ari ba Ambasaderi b'Igihugu cyabo, bityo aho bajya hose mu bihugu bitandukanye, bakwiye guserukira neza u Rwanda.

Arakomeza ati 'Umuhanzi agomba gusigasira umuco w'igihugu cye, akaba Ambassaderi w'umuco n'amateka y'igihugu cye, akaba umukangurambaga cyane cyane mu rubyiruko, akarukundisha igihugu bavukamo cyangwa abababyara bavukamo.'

Yavuze ko nk'umwe mu bahanzi bakunze gukorera ibitaramo hirya no hino ku Isi, yita cyane mu kugaragaza neza u Rwanda aho yaba ari hose. Kandi agakora uko ashoboye, abo ahuye nabo bose akabereka urugendo rw'imyaka 31 ishize u Rwanda rwiyubaka.

Ati 'Nkanjye ukunze kujya mu mahanga mu bitaramo cyangwa mu zindi gahunda mpagararira igihugu cyangwa mu nzinduko zindi, ngomba gukundisha igihugu cyanjye urubyiruko rwo muri 'Diaspora'. Bakamenya umuco, amateka n'imibereho y'abaturarwanda. Bakubaha ubuyobozi, bakabagira inama mu kunoza imiyoborere.'

Gahongayire yavuze ko Guverinoma y’u Rwanda yakoze byinshi mu myaka 31 ishize, ariko ko mu bihugu birimo U Bubiligi, U Bufaransa, Canada, Pays-Bas, U Bwongereza, Leta Zunze Ubumwe za Amerika n'ahandi, hatuye Abanyarwanda biganjemo urubyiruko bakeneye kumenya ukuri ku mateka yagejeje u Rwanda muri Jenoside yakorewe Abatutsi.

Yatanze icyifuzo cy'uko muri Ambasade zo muri biriya bihugu, n'izindi Ambasade ziri hirya no hino ku Isi, hakongerwamo umukozi ushinzwe umuco kugira ngo bajye baganiriza urubyiruko rubarizwa muri biriya bihugu, amateka y'u Rwanda.

Ni igitekerezo avuga ko yagize nyuma y'ibitaramo n'ingendo yagiye akorera hirya no hino ku Isi, akaganira n'urubyiruko akumva ibyifuzo byabo.

Ati 'Leta yashyiraho abakozi bashinzwe Umuco muri za Ambasade ziri mu bihugu bituyemo Abanyarwanda benshi (U Bubiligi, u Bufaransa, Canada, Pays-Bas, UK, USA, Allemagne, …). Ako kazi nagakora. 

Aba Jeunes (Urubyiruko) bo muri Diaspora nahuye nabo, abenshi bakunda igihugu cyacu ariko basaba ko Ambasade zibegera zikabakuramo ubwoba baterwa n'abapfobya Jenoside cyangwa bavuga nabi igihugu cyacu ku mpamvu zabo bwite.'

Aline Gahongayire yavuze ko hakenewe umuhate wa buri wese mu guhangana n'abahakana, bakanapfobya Jenoside yakorewe Abatutsi

Ubutumwa bwa Gahongayire mu kwibuka ku nshuro ya 31 Jenoside yakorewe Abatutsi 

Mu butumwa yanyujije ku rubuga rwa X, Minisitiri w'Uburinganire n'Iterambere ry'Umuryango, Uwimana Consolée, yavuze ko 'muri iki gihe twibuka ku nshuro ya 31 Jenoside yakorewe Abatutsi mu w’i 1994, Minisiteri y’Uburinganire n’lterambere ry’Umuryango yihanganishije Abanyarwanda bose n’abacitse ku icumu rya Jenoside by’umwihariko. Abateguye n’abakoze Jenoside bifuzaga kuzimya umuryango, kuko bishe abagabo, abagore bataretse n’abana.'

Ati: 'Abagize umuryango twese turasabwa kwamagana ikibi, ababyeyi by’umwihariko twite ku nshingano zacu zo kurerera u Rwanda duhereye iwacu mu rugo, turinde abana bacu ingengabitekerezo ya Jenoside n’amacakubiri.'

Yasabye ababyeyi kuzirikana ko ibyo babamo, ibyo bavuga n'ibyo bakora ari byo babaraga, abasaba kubatoza gukomera ku bumwe n’ubudaheranwa by’Abanyarwanda, guha agaciro ubuzima no gukunda igihugu

Minisitiri Uwimana, aherutse kuvuga ko icyerekezo igihugu gifite cya 2035 na 2050 gisaba indi mitekerereze, imbaraga n'imikoranire idasanzwe mu guharanira ko hazaba hari Umunyarwanda uturuka mu muryango ushoboye kandi utekanye.

Minisitiri w'Uburinganire n'Iterambere ry'Umuryango, Uwimana Consolée arasaba ababyeyi kwita ku nshingano zo kurerera u Rwanda no gutoza abana gukura bakomera ku bumwe n'ubudaheranwa by'Abanyarwanda

‎Ku wa Mbere tariki ya 7 Mata 2025 ni bwo Abanyarwanda n’inshuti zabo batangiye icyumweru cy’Icyunamo mu rwego rwo Kwibuka ku nshuro ya 31 Jenoside yakorewe Abatutsi mu 1994.

‎‎Minisitiri w’Urubyiruko n’Iterambere ry’Ubuhanzi, Dr. Utumatwishima Jean Nepo Abdallah, yasabye Urubyiruko gukomezanya muri ibi bihe. Ati: “‎Muri iyi minsi yo kwibuka, mujye mubaza amakuru bagenzi banyu muti ‘waramutse, komera, turi kumwe’. Ntibatubure kandi badukeneye ngo dukomezanye”.

‎‎Yabwiye Urubyiruko ko nirujya rumenya aho inshuti ziri bujye Kwibuka mu Turere dutandukanye bagomba kujya baziherekeza.. ‎‎Ati: “Nimujya mumenya aho inshuti zanyu zijya kwibuka mu Turere dutandukanye, mujye mubaherekeza”.

‎‎Yatanze urugero ko kuri uyu wa Kabiri mu karere ka Musanze ari bwo baribuka Abatutsi biciwe mu yahoze yitwa Komini Mukingo ahitwa i Busogo kuri ubu.

‎‎Dr. Utumatwishima Jean Nepo Abdallah yasabye Urubyiruko gukomeza kwiga Amateka. Ati: “Mukomeze mwige Amateka twigishwa na Minisiteri y'Ubumwe bw'Abanyarwanda n’Inshingano Mboneragihugu (MINUBUMWE), Ibuka Rwanda no kuri Kwibuka.rw”.

‎‎Yasabye urubyiruko ko nibajya bakira ubutumire bwa ‘Our Past Initiative’ cyangwa ikindi gikorwa cyo Kwibuka bagomba kujya bagenda bakahahurira ari benshi.

‎Minisitiri Utumatwishima yasabye Urubyiruko gukomezanya no gukomeza kwiga Amateka

Perezida wa IBUKA mu Karere ka Kayonza, Ndindabahizi Didace, yavuze ko muri aka karere hakiri imibiri irenga ibihumbi 10 y'Abatutsi bishwe muri Jenoside yakorewe Abatutsi mu 1994, itari yaboneka ngo ishyingurwe mu cyubahiro.

Byagarutsweho ku wa 7 Mata 2025 ubwo hatangizwaga icyumweru cy'Icyunamo n'iminsi 100 yo kwibuka ku nshuro ya 31 Jenoside yakorewe Abatutsi mu 1994, igikorwa cyabereye ku Rwibutso rwa Jenoside yakorewe Abatutsi rwa Mukarange.

Ndindabahizi yasabye buri muntu waba uzi ahari imibiri itari yashyingurwa kuhagaragaza igashyingurwa mu cyubahiro kuko byafasha abatari babona ababo.

Ndindabahizi yavuze ko iyari Komini Rukara, Kayonza, Kabarondo, Muhazi , Kigarama n'agace gato k'iyari Komini Rukira byahujwe bikaba Akarere ka Kayonza habarurwaga Abatutsi basaga ibihumbi 50.

Icyakora iyo ubaze abarokotse Jenoside yakorewe Abatutsi n'abishwe n'uburwayi nyuma usanga basaga ibihumbi icumi.

Ndindabahizi yavuze ko Abatutsi bishwe muri Jenoside ari ibihumbi 40 ariko ko abo bantu bose bapfuye mu minsi itageze kuri 14 kuko indi minsi yakurikiye Inkotanyi zari zamaze kubohora ibyo bice.

Ati 'Mu nzibutso zose dufite uko ari enye tubara imibiri itaranagera ku bihumbi 30 ishyinguwemo, bivuze ko hari imibiri irenga ibihumbi 10 itaraboneka, uwo na wo ni umwihariko dufite hano.''

Yasobanuye ko hari imibiri y'Abatutsi bapfuye bagerageza kwambuka ngo bajye muri Tanzania baciye muri Pariki ya Akagera, abariwe n'inyamaswa, abiciwe mu mashyamba bishwe n'abahigi, abagerageje kwambuka umugezi wa Akagera bakagwamo avuga ko abo bose bari mu babuze burundu.

Ati 'Na none hari imigezi n'inzuzi biri muri aka Karere kacu ka Kayonza n'Icyuzi cya Ruramira byaroshywemo abantu benshi cyane, ku bufatanye n'akarere twabashije kugira bake dukura mu cyuzi cya Ruramira, twakoresheje imbaraga z'umurengera dukuramo bake abandi tubashyingura ku mutima.'

Yavuze ko hari n'abandi bagiye barohwa mu birombe by'amabuye y'agaciro bya Rwinkwavu, 'abo na bo twabashyinguye mu mitima yacu kuko tutabonye uko tubakuramo.''

Ndindabahizi yanavuze ko hari n'abandi bagiye bicirwa mu misarane y'ahari hatuye abantu benshi, abajugunywe mu miringoti, n'abandi, avuga ko hari ababizi binangiye ku gutanga amakuru, asaba inzego za Leta n'abaturage kubafasha iyo mibiri ikaboneka kugira ngo ishyingurwe mu cyubahiro.

Ati 'Ntituzabikora mu buryo bw'urugomo, ntituzabikora mu buryo bw'iterabwoba ariko tuzabivuga kandi tuzabibaza igihe icyo ari cyo cyose tugihagaze.''

Umunyamabanga Nshingwabikorwa w'Intara y'Iburasirazuba, Dr. Nyirahabimana Jeanne, yashimiye Inkotanyi zahagaritse Jenoside yakorerwaga Abatutsi ndetse zikanakomeza kubaka igihugu kizira ivangura iryo arir yo ryose.

Yasabye buri wese ufite amakuru y'ahari imibiri kuhagaragaraza anabasaba kwirinda gukina n'ingengabitekerezo ya Jenoside.

Ati 'Ntabwo dukwiriye kurebera imvugo zuzuye ingengabitekerezo ya Jenoside ngo turekere aho, nta muntu ukina akinisha ingengabitekerezo ya Jenoside, nta n'uganira aganira ingengabitekerezo ya Jenoside. Ibyo ni ibyo kwamagana aho tubibonye hose kandi tugatunga agatoki kugira ngo uwo muntu akurikiranwe.''

Rutayisire Jean Baptiste warokokeye muri Kiliziya ya Mukarange, yatanze ubuhamya bw'uburyo Interahamwe n'abasirikare bahiciye abantu benshi, ashimira Inkotanyi zamurokoye nyuma yo kumusanga yaratemwe mu mutwe, yaranatewe icumu mu gatuza ariko zikamuvuza akongera kubaho.

Urwibutso rwa Jenoside rwa Mukarange rushyinguwemo imibiri irenga 9.300, imibiri myinshi ikaba ari iy'Abatutsi bari bahungiye muri Kiliziya cya Mukarange bakagabwaho ibitero n'Interahamwe zifatanyije n'abasirikare ba FAR.

Perezida wa Ibuka mu Karere ka Kayonza, Ndindabahizi Didace, yavuze ko hari imibiri irenga ibihumbi icumi itari yaboneka ngo ishyingurwe mu cyubahiro

Umuyobozi w'Akarere ka Kayonza, Nyemazi John Bosco, yasabye buri wese kwirinda ingengabitekerezo ya Jenoside

Abo mu Nteko Ishinga Amategeko na bo bitabiriye

Abo mu nzego z'umutekano na bo bitabiriye igikorwa cyo kwibuka ku nshuro ya 31 Jenoside yakorewe Abatutsi