Category: Uncategorized

Yabigarutseho ubwo Abanyarwanda batuye muri Leta Zunze Ubumwe za Amerika n'inshuti z'u Rwanda bibukaga ku nshuro ya 31 Jenoside yakorewe Abatutsi mu 1994.

Ni igikorwa cyabaye ku wa 07 Mata 2025, ku Munsi Mpuzamahanga Ngarukamwaka Isi yose yibukaho Jenoside yakorewe Abatutsi mu 1994, yahitanye abarenga miliyoni mu mezi atatu gusa.

Wilkens yagarutse ku buryo butangaje u Rwanda rwishatsemo ibisubizo ku bijyanye n'ubutabera no gukira ibikomere, anagaragaza uburyo gahunda zitandukanye nka Gacaca zagize uruhare mu bijyanye n'ubwiyunge cyane ko igihugu cyari cyacitsemo ibice.

Ati 'Gacaca n'ubundi buryo bwo gukemura ibibazo, bwibanze ku kumva neza ingaruka z'ibyabaye n'ingaruka byagize noneho abaturage bagafatanya mu rugendo rwo gukira. Ntabwo ari uburyo bwo kwishyura cyangwa kwihorera.'

Yagarutse ku buryo abaturage bagaragaje uburemere bw'ibyo bakoze, avuga ko Abanyarwanda bamugaragarije ko bafite intego n'uburyo bashobora guhinduka.

Troy Fitrell wari uhagarariye Ubunyamabanga bwa Leta Zunze Ubumwe za Amerika, yagaragaje uburyo igihugu cye kirajwe ishinga no gufatanya n'u Rwanda mu butabera ndetse yongera kwibutsa ububi bw'imvugo z'urwango n'ibijyanye no guhakana Jenoside.

Ati 'Twitandukanyije n'ibikorwa ibyo ari byo byose bigoreka amateka bikorwa ku mpamvu za politiki. By'umwihariko ntitwemeranya na busa n'ibikorwa ibyo ari byo byose bihakana cyangwa bigapfobya Jenoside yakorewe Abatutsi.'

Uyu muyobozi yagaragaje ko Amerika isaba abashyira imbaraga mu bikorwa byo gukwirakwiza imvugo z'urwango kwisubiraho ahubwo bagakoresha izo mbaraga mu kubiba amahoro aho kubiba urwango no kugira uruhare mu bugizi bwa nabi.

Immaculée Ilibagiza warokotse Jenoside yakorewe Abatutsi yatanze ubuhamya bw'uko yakorokotse, anagaragaza uburyo kubabarira ari ingenzi.

Ati 'Kuva narokoka Jenoside yakorewe Abatutsi mu 1994, nagize imbaraga zo kwibutsa abantu ko urwango ari ikintu kibi. Ndi umuhamya w'uko ahatari urukundo abantu bica abaturanyi babo, bakabakorera iyicarubozo mbere y'uko babambura ubuzima n'ibindi. Aho ni ho ivangura rihera.'

Umuyobozi wa IBUKA muri Amerika, Nicole Karekezi, yagaragaje ko Jenoside yakorewe Abatutsi igomba guhabwa inyito ya nyayo, aho kuba buri wese yayivuga uko yiboneye, ashimangira ko kuyivuga mu buryo bwa nyabwo ari ingenzi mu guha icyubahiro abazize Jenoside.

Ati 'Ni Jenoside yakorewe Abatutsi mu 1994 nk'uko Loni yabyemeje. Ntabwo ari amabi yabaye muri Afurika, ubugizi bwa nabi bushingiye ku moko, ntabwo ari Jenoside yakorewe Abatutsi, Abahutu n'Abatwa. Ibyo bihanagura ukuri ndetse bigasubiza ibikomere byacu ibubisi.'

Ambasaderi w'u Rwanda muri Amerika, Mathilde Mukantabana, yavuze ko kwibuka ari inshingano z'abatuye Isi yose aho kuba iz'abarokotse Jenoside gusa.

Ni mu gihe umwe mu bagize Inteko Ishinga Amategeko ya Amerika, Tim Welberg, yagarutse ku iterambere ry'u Rwanda nk'urugero rw'icyizere no kubabarirana ndetse biba impamvu y'ubudaheranwa.

Ibikorwa byo kwibuka ku nshuro ya 31 Jenoside yakorewe Abatutsi bizakomeza kubera mu bice bitandukanye bya Leta Zunze Ubumwe za Amerika aho bizagirwamo uruhare n'Abanyarwanda batuye muri icyo gihugu ku bufatanye n'inshuti z'u Rwanda.

Umunyamerika witwa Carl Wilkens, wagumye mu Rwanda mu bihe bya Jenoside yakorewe Abatutsi mu 1994 yashimiye u Rwanda ku iterambere ritangaje rumaze kugeraho

Umwe mu bagize Inteko Ishinga Amategeko ya Amerika, Tim Welberg, yavuze uburyo Jenoside yari igambiriye kumaraho Abatutsi ariko Imana igakinga ukuboko

Immaculée Ilibagiza warokotse Jenoside yakorewe Abatutsi yatanze ubuhamya bw'uko yakorokotse mu buryo butangaje

Troy Fitrell wari uhagarariye Ubunyamabanga bwa Leta Zunze Ubumwe za Amerika, yagaragaje uburyo igihugu cye kirajwe ishinga no gufatanya n'u Rwanda mu kwimakaza ubutabera

Umuyobozi wa IBUKA muri Amerika, Nicole Karekezi, yagaragaje ko abantu bagomba guha Jenoside yakorewe Abatutsi inyito ya nyayo aho kuvuga ibyo bishakiye

Abantu batandukanye muri Amerika bifatanyije n’u Rwanda mu kwibuka ku nshuro ya 31 Jenoside yakorewe Abatutsi

Yabigarutseho ubwo hatangizwaga icyumweru cy'icyunamo n'ibikorwa byo kwibuka ku nshuro ya 31 Jenoside yakorewe Abatutsi mu 1994. Uyu muhango mu Karere ka Rwamagana watangirijwe ku rwibutso rwa Ruhunda ruherereye mu Murenge wa Gishari.

Umuyobozi w'Akarere ka Rwamagana, Mbonyumuvunyi Radjab, yakomeje abitabiriye uyu muhango wo kwibuka, yibutsa ko Umurenge wa Gishari ubarizwamo inzibutso ebyiri bigaragaza ubukana Jenoside yakorewe Abatutsi yakoranwe muri uyu Murenge.

Perezida wa Ibuka mu Karere ka Rwamagana, Musabyeyezu Dative, yashimiye Leta y'ubumwe yafashije abarokotse Jenoside kongera kwiyubaka no kwigarurira icyizere.

Ati ''Ibikorwa byo kwibuka abacu bitubere umusingi ukomeye ari naho dukura imbaraga zo kongera kwiyubaka. Muri iyi myaka 31 ishize turashimira Leta y'ubumwe ko yongeye kugarurira abarokotse Jenoside icyizere cy'ubuzima.''

Guverineri w'Intara y'Iburasirazuba, Pudence Rubingisa we yagarutse ku ngabo za MINUAR zabaye muri Gishari ariko ntizigire icyo zikora ngo zifashe Abatutsi bicwaga. Yakomeje akebura urubyiruko rwavutse nyuma ya Jenoside rukigaragarwaho n'ingengabitekerezo ya Jenoside.

Ati 'Turi muri Gishari ariko turacyahabona ibisigisigi n'ingengabitekerezo ya Jenoside n'ibindi bitari bikwiriye muri iyi myaka 31. Igitangaje kandi tukabisanga no mu rubyiruko rw'imyaka 21, 22 rwavutse nyuma y'imyaka icumi Jenoside ihagaritswe. Ibi Leta ntizabyihanganira, ya Ngengabitekerezo yo ku ishyiga nta mwanya ifite.''

Guverineri Rubingisa yakomeje avuga uburyo ingabo z'u Rwanda zafashe iya mbere zikajya guharanira amahoro mu mahanga ya kure, avuga ko umutekano usesesuye ibisigaye ari ibyo gukemurirwa ku Isibo, mu Mudugudu, mu Kagari mu Murenge.

Ati 'Buri wese abe ijisho ry'umuturanyi, hari n'aho tuvuga ngo ngira nkugire, ninkubura umbazwe. Si ngombwa gushyira Umupolisi ku rugo rw'Uwarokotse Jenoside, ngo kuko hari ukwirakwiza amagambo agize icyaha cy'ingengabitekerezo ya Jenoside, abaturanyi be bamubwira buri munsi, si n'inshingano gusa ya IBUKA, biratureba nk'Abanyarwanda. Ibyo tugomba kubikemura hakiri kare, ubutabera bugakora akazi kabwo.''

Uyu muyobozi yibukije abaturage ba Ruhunda ko icyifuzo cyabo cyo gushyira ikimenyetso cy'Urwibutso i Kavumu kuri Muhazi aho Abatutsi benshi baroshywe muri Muhazi, cyakiriwe ndetse ko biri mu nzira yo gukorwa ku bufatanye bw'Akarere, Minubumwe na Ibuka.

Hashyizwe indabo ku mva zirimo imibiri y'abishwe muri Jenoside yakorewe Abatutsi muri Ruhunda

Umuyobozi wa Ibuka mu Karere ka Rwamagana, Musabyeyezu Dative, yashimiye Inkotanyi zagaruriye icyizere abarokotse

Umuyobozi w'Akarere ka Rwamagana, Mbonyumuvunyi Radjab yashimiye Leta yafashije abarokotse kongera kwiyubaka

Guverineri Rubingisa yasabye urubyiruko kwirinda ingengabitekerezo ya Jenoside

Umuyobozi wa IBUKA mu Karere ka Karongi, Ngarambe Vedaste, yabitangarije ku Rwibutso rwa Gatwaro mu Murenge wa Bwishyura ahatangirijwe ku rwego rw'Akarere icyumweru cy'icyumano n'iminsi 100 yo kwibuka ku nshuro ya 31 Jenoside yakorewe Abatutsi.

Mu gihe cya Jenoside yakorewe Abatutsi ahubatswe Urwibutso rwa Jenoside yakorewe Abatutsi rwa Gatwaro hari sitade. Yahungiyemo Abatutsi baturutse mu Karere ka Rutsiro no mu mirenge itandukanye y'Akarere ka Karongi, abenshi muri bo bahicirwa n'Interahamwe.

Ngarambe avuga ko kuba uyu munsi aho hantu hubatse urwibutso ari ukwereka urupfu ko rwatsinzwe, bityo ko abarokotse Jenoside bakwiye kumwenyura kuko Perezida Paul Kagame yabijeje ko batazongera kwicwa.

Ati 'Aho twabashije kumenya ko mu myaka itatu ishize abarokotse Jenoside bubakiwe inzu 1850, bahawe inka zikabakaba 1000, bafashwa no gutangiza imishinga 250. Muri iyi myaka itatu turashima cyane'.

Ngarambe avuga ko nubwo hari intambwe yatewe mu kubakira abarokotse Jenoside batishoboye, urugendo rugihari kuko kuri ubu habarurwa abagera kuri 359 bakeneye kubakirwa.

Guverineri w'Intara y'Iburengerazuba, Ntibitura Jean Bosco, yijeje abarokotse Jenoside yakorewe Abatutsi badafite amacumbi ko gahunda yo kubabarura yarangiye ndetse no kububakira bikaba byaratangiye.

Ati 'Ntabwo inzu zose zabonekera rimwe ariko muri gahunda zose zitegurwa na Leta, kubakira abarokotse Jenoside ni igikorwa gikomeza, ni igikorwa kandi Leta y'u Rwanda ishyizeho umutima kandi twizera ko igihe kizagera bose bakaba bubakiwe.'

Urwibutso rwa Jenoside rwa Gatwaro rushyinguwemo imibiri y'abatutsi bishwe muri Jenoside barenga ibihumbi 15, biciwe n'Interahamwe muri Sitade ya Gatwaro no mu nkengero zayo.

Urwibutso rwa Jenoside rwa Gatwaro rushinguwemo abishwe muri Jenoside yakorewe Abatutsi barenga ibihumbi 15

Perezida wa IBUKA mu Karere ka Karongi, Ngarambe Vedaste yashimye imbaraga zishyirwa mu kubakira ubushobozi abarokotse Jenoside batishoboye

Ni igikorwa bakoze kuri uyu wa Kabiri tariki 8 Mata 2025, aho cyitabiriwe n'abayobozi ndetse n'abakozi b'uruganda, bagamije kwiga no kumenya amateka yagejeje u Rwanda mu icuraburindi, ndetse no gufata ingamba zihamye mu kugira uruhare mu rugamba rwo guhangana n'abahakana bakanapfobya Jenoside yakorewe Abatutsi. 

Urwibutso rwa Jenoside rwa Nyanza ya Kicukiro, rushyinguyemo imibiri y'Abatutsi bagera ku 105 000.

Umukozi ku Rwibutso rwa Nyanza ya Kicukiro, Gasigwa Gilbert yasobanuriye abayobozi n'abakozi b'uruganda rwa SKOL, uko abatutsi bari bahungiye i Nyanza batereranwe.

Yavuze ko umunsi mubi ku batutsi ari tariki 11 Mata 1994, ubwo Ingabo z'Ababiligi zataga impunzi z'Abatutsi muri Eto Kicukiro, bakicirwa i Nyanza ya Kicukiro, aho abagera ku bihumbi bitatu (3000) bishwe mu ijoro rimwe.

Gasigwa yavuze ko kuva mu 1963, Abatutsi bahungiraga ku ishuri ry'imyunga rya Kigali (ETO), kandi bahabwaga ubufasha n'abapadiri b'Abasalizayani bariyoboraga, ariko kiriya gihe siko byagenze, kuko batereranwe, baricwa.

Yasobanuye ko hari Abatutsi bari bageze kuri ETO ku wa 8 Mata 1994 kugeza tariki 11 Mata 1994, aho bose bashyizwe hamwe bajya kwicirwa i Nyanza ya Kicukiro. Ni nyuma y'uko ingabo za Loni (MINUAR) zibasize mu maboko y'interahamwe n'abasirikare bari bambariye kubarimbura.

MINUAR imaze kubasiga mu menyo y'Interahamwe n'abasirikare biteguye guhita babica ku wa 11Mata 1994. Col Rusatira Leonidas yazanye abasirikare benshi batangira Abatutsi bashakaga guhungira kuri CND, (ku ngoro y'Inteko ishinga Amategeko) no kuri Stade Amahoro i Remera, barabashorera bagenda babica kuva kuri SONATUBES kugera i Nyanza ya Kicukiro barahabicira babatera amagerenade ubundi Interahamwe zikajya mu mirambo gutema abatashizemo umwuka no kubacuza.

Ingabo za MINUAR zatereranye Abatutsi muri ETO zari ziyobowe na Lieutenant Luc Lemaire, akaba yari akuriwe na Lieutenant-colonel Dewez, bose bakaba bari bayobowe na Colonel Luc Marshall ari nawe wari wungirije Jenerali Dallaire ku buyobozi bw'ingabo za MINUAR.

Nyuma yo gusobanurirwa amateka, abayobozi n'abakozi ba SKOL bafashe umunota wo Kwibuka inzirakarengane zihashyinguye ndetse banashyira indabo ku mva zishyinguyemo imibiri.

Basuye kandi Ubusitani bw'Urwibutso buri ku Rwibutso rwa Nyanza mu Karere ka Kicukiro. Ubu busitani ni ikimenyetso cyo Kwibuka iteka ryose.

Bugizwe n'ibice birimo amabuye yerekana abazize Jenoside, uko ibidukikije byahishe abahigwaga, imyobo ifunguye ishushanya aho bajugunywe, ikimenyetso cy'ubuzima no kongera kubaho, ndetse n'ibiti bigaragaza ko Abanyarwanda ari bamwe.

Ubusitani bwatangiye gukorwa mu mwaka wa 2019, bukaba bugizwe n'ibice bifite aho bihuriye n'amateka ya Jenoside yakorewe Abatutsi mu 1994, yaba ayo mu gihe cya Jenoside cyangwa nyuma yayo. 

Bwashyizweho ibuye ry'ifatizo na Madamu Jeannette Kagame ku Cyumweru, tariki ya 11 Nzeri 2022.

Ubwo yatahaga ubu busitani bw'Urwibutso, Madamu Jeannette yavuze ko 'Icyifuzo cya buri wese, ni uko ubu busitani bukomeza kutubera ahantu hadufasha Kwibuka no kwiyubaka. 

Muri ubu busitani harimo ubuzima n'umurava wanyu ndetse ni isezerano rishya ko tutazongera kunyura mu bihe nk'ibyatugejeje hano uyu munsi. Urwo rukundo, icyo cyubahiro byose biri muri buri rurabo, igiti, buri buye na buri kimenyetso kidukikije.''

Ati 'Igihe cyose tuje muri ubu busitani bwo kwibuka, bijye biduha imbaraga zo guhobera ubuzima, no kugirana isezerano n'abacu ndetse n'igihugu, ko tutazahwema kurasanira u Rwanda.'

Urwibutso rwa Jenoside rwa Nyanza rugizwe n'ibice bitatu. Igice cya mbere kiriho amazina y'Abatutsi bahashyinguye bishwe bazizwa uko bavutse, igice cya kabiri kirimo imva irimo imibiri y'Abatutsi ibihumbi 105 bishwe muri Jenoside naho igice cya Gatatu kibarizwamo Ubusitani.

Abayobozi n'abakozi b'uruganda rwa Skol, bifatanyije n'Abanyarwanda Kwibuka Jenoside yakorewe Abatutsi, basura Urwibutso rwa Jenoside rwa Nyanza ya Kicukiro

Abayobozi n'abakozi b'uruganda rwa SKOL, baganirijwe amateka yo ku wa 11 Mata 1994 ubwo Ingabo za MINUAR zataga impunzi z'Abatutsi muri ETO Kicukiro  

  

Nyiri uruganda rwa SKOL, Thibault Relecom yashyize indabo ku mva yunamira inzirakarengane zishyinguye muri uru rwibutso    

Urumuri rw’Icyizere ni kimwe mu bimenyetso biri muri ubu Busitani bw’Urwibutso rwa Nyanza ya Kicukiro

Umuyobozi w'Uruganda rwa SKOL, Eric Gilson yashyize indabo ku mva yunamira inzirakarengane zishyinguye mu rwibutso rwa Nyanza ya Kicukiro 

Nyiri uruganda rwa Skol, Thibault Relecom yanditse mu gitabo ubutumwa bukomeza Abanyarwanda n'inshuti muri iki gihe cyo Kwibuka ku nshuro ya 31 Jenoside yakorewe Abatutsi

 

Kanda hano urebe amafoto menshi yaranze igikorwa cyo kwibuka ku nshuro ya 31 Jenoside yakorewe Abatutsi mu 1994

AMAFOTO: Dox Visual- InyaRwanda.com

Ku gicamunsi cyo kuri uyu wa Kabiri ni bwo Boulos yahuye na Perezida Kagame hamwe n'itsinda bari kumwe.

Ibiro by'Umukuru w'Igihugu, Village Urugwiro, byatangaje ko bagiranye ibiganiro byiza ku mikoranire 'igamije kugera ku mahoro arambye mu Karere k'Ibiyaga Bigari na gahunda zo kongera ishoramari rya Leta Zunze Ubumwe za Amerika mu nzego z'ingenzi ku bukungu mu Rwanda no mu karere muri rusange'.

Mu kiganiro n'abanyamakuru cyabereye kuri Ambasade ya Leta Zunze Ubumwe za Amerika, Boulos yavuze ko we na Perezida Kagame baganiriye ku mikoranire ya bugufi mu rugendo rugamije amahoro n'umutekano n'ubufatanye hagati y'ibihugu, kandi ko ashingiye ku bindi biganiro yari yagiranye na Perezida Ruto wa Kenya, Tshisekedi wa RDC na Museveni wa Uganda, hari ubushake bwo kugira ngo amahoro aboneke.

Ati 'Dushyigikiye umutekano n'ubusugire bw'ibihugu byose muri aka karere. Hari sosiyete nyinshi z'Abanyamerika zashoye imari mu Rwanda, Guverinoma y'u Rwanda ifite icyerekezo cyo kuba nyambere mu bukungu kandi ifite abaturage biteguye gushyigikira icyo cyerekezo.'

'Twiteguye gukorana n'u Rwanda kugira ngo iyo ntego igerweho. Ni yo mpamvu gushakira igisubizo amakimbirane yo muri RDC ari ingenzi cyane kuko bizatuma amahirwe y'akarere atabyazwa umusaruro atangira gukoreshwa.'

Boulos yasobanuye ko mu biganiro yagiranye na Perezida Kagame, yasanze ashyigikiye icyo cyerekezo cyo kugira ngo amahoro aboneke.

Yavuze ko Leta Zunze Ubumwe za Amerika zishyigikiye ko amahoro aboneka mu karere, kandi ko ari cyo Perezida Trump yiyemeje ku buyobozi bwe.

Ati 'Turashaka kubona amahoro arambye mu karere. Perezida Trump ni perezida ushaka amahoro, ashyigikiye amahoro. Ni yo mpamvu turi hano, ni yo mpamvu ndi hano.'

'Arashaka ko aya makimbirane arangira vuba. Yumva neza ko abaturage bababaye bihagije, by'umwihariko muri aya makimbirane amaze imyaka irenga 30. Igihe kirageze ngo amahoro aboneke.'

Boulos yavuze ko uruzinduko rwe rutari rugamije gushyira igitutu ku Rwanda, ahubwo ko ikigamijwe ari amahoro arambye.

Perezida Kagame yakiriye muri Village Urugwiro, Massad Boulos, Umujyanama Mukuru wa Trump ku bireba Afurika

Mu bitabiriye ibi biganiro harimo na Minisitiri w’Ububanyi n’Amahanga, Olivier Nduhungirehe (uwa kabiri ibumoso) hamwe na Ambasaderi wa Amerika mu Rwanda, Eric Kneedler (ubanza ibumoso)

Ni mu ibaruwa IGIHE yaboneye kopi, MINEDUC yandikiye ubuyobozi bwa École Belge de Kigali, burimo Richard Rwihandagaza usanzwe ari Umuyobozi w'Ababyeyi akaba na Perezida w'Inama y'Ubutegetsi na Delphine Vico usanzwe ari umuyobozi w'iryo shuri.

Iyi baruwa yohererejwe abo bayobozi kuri uyu wa 08 Mata 2025, ije nyuma y'uko Guverinoma y'u Rwanda icanye umubano ndetse n'imikoranire n'u Bubiligi bijyanye n'uko iki gihugu cyakunze kuyobora icengezamatwara rigamije gukomanyiriza u Rwanda ku bafatanyabikorwa barwo.

Ikindi MINEDUC yashingiyeho n'itangazo ry'Urwego rw'Igihugu rw'Imiyoborere, RDB ryo ku wa 27 Werurwe 2025.

Icyo gihe RGB yabujije imiryango itari iya Leta yaba iyo mu gihugu na mpuzamahanga, ishingiye ku myemerere n'igamije inyungu rusange yanditse inakorera ku butaka bw'u Rwanda, kugirana imikoranire iyo ari yo yose na Guverinoma y'u Bubiligi cyangwa ibigo biyishamikiyeho.

Muri iyi baruwa MIDEDUC irakomeza iti 'Turabagira inama yo gutangira gutegura ibikenewe byose kugira ngo mwimukire ku bundi buryo bw'imyigishirize muzakoresha mu mwaka w'amashuri wa 2025-2026.'

MINEDUC yijeje iri shuri ko izakomeza kurifasha muri uru rugendo rwo guhindura imikorere, ryiyomora ku myigishirize y'Ababiligi.

École Belge de Kigali yatangiye gukorera mu Rwanda mu 1965. Mu 2018 yavuze mu Kiyovu mu Mujyi wa Kigali rwagati yimukira mu Karere ka Gasabo mu Murenge wa Gisozi mu buryo bwo kubahiriza igishushanyo mbonera cy'Umujyi.

Nko mu 2022/2023 ryigagamo abanyeshuri barenga 500 bigishwa n'abarimu 45.

Aya mashuri azwi nka École Belge aboneka mu Rwanda, mu Burundi, muri Repubulika Iharanira Demokarasi ya Congo no muri Maroc.

Itangazo RGB yatanze ku wa 27 Werurwe 2025 yakomeje ivuga ko nta nkunga, ubufasha, impano n'umusanzu mu by'amafaranga bigomba kwakirwa biturutse kuri Guverinoma y'u Bubiligi n'ibigo byabwo, ibibishamikiyeho na gahunda zabwo zinyuranye.

Kuri byo harimo inkunga ku ngengo y'imari, gushyigikira imishinga, ubufasha mu bya tekinike byatangwaga n'amafaranga yishyurwaga anyujijwe ku bindi bigo n'ibindi bitandukanye.

Uru rwego rufite imiyoborere mu nshingano, rwakomeje rutangaza ko uzanyuranya n'ayo mabwiriza azahanwa bikomeye.

Mu bihano biteganyijwe harimo kuba umuryango ushobora guhagarikwa cyangwa kwamburwa uburegangiza hakurikijwe amategeko agenga imiryango itari iya Leta, imiryango ishingiye ku myemerere n'ibigo.

Hari n'ibindi byemezo bishobora gufatwa ku bigo bizagaragara ko byatesheje agaciro iri tegeko kandi ko ryashyizweho hakurikijwe amategeko abigenga.

École Belge de Kigali imaze imyaka 60 itanga uburezi mu Rwanda

École Belge de Kigali yasabwe kureka gukoresha porogaramu y’imyigishirize y’u Bubiligi

Ni ikibazo gifitwe n'abaturage benshi bafite imirima yegereye Pariki y'Ibirunga, aho bavuga ko bakimaranye igihe kinini.

Nzayisenga Beatrice wari warahinze ibirayi, umurima umwe wose ukaribwa n'inkima, yasabye Leta kubafasha kwishyurwa no gukemura iki kibazo cy'inyamaswa zihora zona imyaka yabo.

Ati 'Zandiriye umurima wose, nta musaruro nabonyemo narahombye, ndasaba Leta ko yadufasha kurinda izo nyamaswa kandi bakajya banatwishyurira ku gihe ibyo ziba zariye.''

Habimana Theoneste we yavuze ko bishyize hamwe bashyiraho Irondo rikora ku manywa rishinzwe gukumira izo nkima, ariko ikibazo kikirenze ubushobozi bwabo.

Ati 'Mbere zarazaga zikajya mu mirima yacu abantu bakazihunga ugasanga na hegitari y'umurima w'ibirayi zayona zikayimara ku munsi, kuko usanga ziza ziri mu matsinda ari nka 30 cyangwa 50. Turasaba Leta ko yakongera giciro iturihiraho kuko ugereranyije n'igishoro dushyira mu murima ntabwo bihura, ikindi ntabwo ubwishingizi buturiha iyo twonewe n'inyamaswa.''

Twahirwa Theogene we yavuze ko ubushize zamwangirije 30% by'ibirayi yari yahinze ariko ko ikibazo bafite kinini ari uko abangirijwe n'izi nyamaswa batinda kwishyurwa bikabagusha mu bihombo.

Guverineri w'Intara y'Amajyaruguru, Mugabowagahunde Maurice, yavuze ko iki kibazo cy'inyamaswa zitoroka Pariki y'Ibirunga zikonera abaturage bakizi, avuga ko bakorana n'Urwego rw'Iterambere ndetse n'Ikigega cy'Ingoboka gihari kugira ngo abaturage barihwe imyaka yabo.

Ati 'Kimwe mu bisubizo bihari ni uko hari gahunda yo kongera gusubiramo uruzitiro rwa Pariki y'Ibirunga kugira ngo rukomere hari aho inyamaswa zagiye zirusenya zikambuka zikajya konera abaturage.''

Guverineri Mugabowagahunde yakomeje avuga ko hari n'uburyo bwo guhana amakuru mu buryo bwihuse bwari bwarashyizweho ariko ngo ntibwabasha gukora neza kuko abatanga raporo y'uko imyaka yabo yangijwe batayatangaga neza.

Ati 'Ubu rero twashyizeho uburyo bukomeye kuva ku buyobozi bwo ku Murenge n'ubuyobozi bwa RDB ku buryo bose bakorana kugira ngo amakuru aboneke vuba umuturage wangirijwe abashe kwishyurirwa ku gihe.'

Guverineri Mugabowagahunde yijeje abaturage ko gutinda kubishyura bitazongera kubaho nyuma y'aho hanogerejwe imikorere y'abari mu murongo ushinzwe kwishyura abangirijwe n'inyamaswa.

Guverineri w'Intara y'Amajyaruguru, Mugabowagahunde, yavuze ko hagiye kubakwa uruzitiro rushya rwa Pariki y'Ibirunga ruzafasha mu gukumira inyamaswa zoneraga abaturage

Nzayisenga Beatrice yasabye Leta kubafasha ikabarinda inkima zibonera ibirayi

Habimana Theoneste avuga ko bishyize hamwe bakora Irondo rya kumanywa rikumira inkima ariko ngo nijoro biranga bakonerwa n'imbogo

Umurenge wa Gataraga ubarizwamo imirima myinshi y'ibirayi