Category: Uncategorized

Yabitangaje ku wa 8 Mata 2025 ubwo yari yifatanyije n'inzego zitandukanye mu gikorwa cyo kwibuka ku nshuro ya 31 Jenoside yakorewe Abatutsi mu 1994, cyabereye muri Kaminuza y'u Rwanda, Ishami rya Busogo, riherereye mu Karere ka Musanze mu Murenge wa Busogo.

Yavuze ko abihayimana bagize uruhare rutari rwiza, aho bigishije ivangura rivuga ko Umututsi ari umwanzi, akaba inyangarwanda.

Yatanze urugero ku ba padiri 15 bari aba Diyosezi ya Ruhengeri bandikiye Papa Pawulo II ku wa 05 Werurwe 1993 bamubwira ko mu Rwanda hari intambara yatejwe n'Abanya-Uganda.

Abo bihayimana babwiye Umushumba Mukuru wa Kiliziya Gatolika ko Inkotanyi zikwiriye gusubira iwabo (muri Uganda), ko ari abanzi b'u Rwanda, ndetse ko n'imiryango y'Abatutsi yasigaye mu Rwanda ari abafatanyacyaha bagomba kwicwa.

Dr. Bizimana yavuze urwo ruhare rw'abihayimana ruri mu byatumye Jenoside yihuta na nyuma yayo bagira uruhare mu bikorwa byo kuyihakana no kuyipfobya.

Ati 'Inyandiko za mbere zipfobya Jenoside yakorewe Abatutsi zanditswe n'abihayimana. Hari n'uwanditse igitabo avuga ko Abatutsi ari babi no mu mimerere yabo, mu gihe Abahutu ari abanyakuri ndetse bishe Abatutsi barimo kwirwanaho bikiza umwanzi.'

Yanagarutse ku rundi rugero rw'abapadiri 28 bishyize hamwe ku wa 02 Kanama 1994 bakandika inyandiko bakayishyikiriza Papa na Musenyeri wabo irimo ibitekerezo byabo bibi.

Yaboneyeho gusaba amadini kwigira ku mateka, kugira ngo bakosore ibibi byakozwe.

Yasabye kandi abaturage kurushaho kumva ko Jenoside yakorewe Abatutsi itaje nk'impanuka, ahubwo yabibwe ndetse igashyirwa mu bikorwa kubera politiki mbi yigishijwe Abanyarwanda.

Theophilla Nyirahonora, wavutse mu 1962 watanze ubuhamya nk'uwarokokeye mu yahoze ari Komini ya Mukingo (Umurenge wa Gataraga w'ubu) yavuze ko kubera politiki mbi yo kudafata abantu kimwe, biri mu byatije umurindi Jenoside yakorewe Abatutsi, ahamya ko batotejwe kuva kera.

Yavuze ko yatotejwe kuva mu mashuri abanza, aho ishuri yigagaho rya Gataraga, abayobozi baryo babafataga bakabazengurutsa ikigo cyose hagamijwe kwerekana uko Umututsi yasaga.

Minisitiri w'Ubumwe bw'Abanyarwanda n'Inshingano Mboneragihugu, Dr. Bizimana Jean Damascène yagaragaje uruhare rw’abihayimana muri Jenoside yakorewe Abatutsi

Abayobozi batandukanye bitabiriye igikorwa cyo kwibuka ku nshuro ya 31 Jenoside yakorewe Abatutsi mu 1994, cyabereye muri Kaminuza y'u Rwanda, Ishami rya Busogo, riherereye mu Karere ka Musanze mu Murenge wa Busogo

Abaturage batandukanye bitabiriye igikorwa cyo kwibuka ku nshuro ya 31 Jenoside yakorewe Abatutsi cyabereye i Busogo muri Kaminuza y’u Rwanda

Mu bitabiriye igikorwa cyo kwibuka cyabereye i Musanze mu Murenge wa Busogo harimo n’urubyiruko

Raporo ngarukakwezi y'umusaruro w'inganda, IIP (Index of Industrial Production), yasohotse kuri uyu wa 9 Mata 2025, yagaragaje ko inzego zirimo ubucukuzi bw'amabuye y'agaciro na kariyeri, amashanyarazi, amazi n'isukura biri mu byiyongereye ku gipimo kinini.

Umusaruro w'amashanyarazi wiyongereyeho 21,5% muri Gashyantare 2025, ugereranyije na Gashyantare 2024, umusarururo w'amazi n'isukura wiyongereyeho17%, umusaruro w'ubucukuzi bw'amabuye y'agaciro na kariyeri wiyongeraho 14%, mu gihe umusaruro w'ibikorwa n'inganda wiyongereyeho 0,7%.

Urwego rw'Igihugu rushinzwe Mine, Peteroli na Gaz (RMB) ruherutse kugaragaza ko ibikorwa byo kongerera agaciro amabuye y'agaciro ari imwe mu ntwaro zizatuma amafaranga rwinjiza agera kuri miliyari 1,3$ mu mwaka w'ingengo y'imari wa 2024/2025.

Mu mihigo ya RMB y'umwaka wa 2024/2025, hagaragaramo uwo kongera ingano n'ubwiza bw'amabuye yoherezwa hanze, bikazatuma yinjiriza igihugu agera kuri miliyari 1,3$ mu 2024/2025 avuye kuri miliyari 1,2 yinjiye mu 2023/2024.

RMB igaragaza ko buri gihembwe amabuye y'agaciro azajya yinjiriza u Rwanda miliyoni 325$.

Ku bijyanye n'izamuka ry'umusaruro w'ibikorwa n'inganda wazamutseho 0,7%, NISR yatangaje ko byashyigikiwe n'izamuka rya 26% ku ikorwa ry'ibyuma, imashini n'ibindi bifitanye isano, izamuka rya 28,2% ku ikorwa ry'ibikoresho bikomoka ku mabuye. Gusa umusaruro w'ikorwa ry'imyenda, ibitambaro n'ibikomoka ku ipamba wagabanyutseho 15,8%.

Minisitiri w'Intebe Dr. Edouard Ngirente yabwiye Inteko Ishinga Amategeko, ku wa 28 Werurwe 2025, ko guverinoma y'u Rwanda yatangaje ko iri gushyira imbaraga mu guteza imbere inganda zikorera imyenda imbere mu gihugu, ku buryo abo zambika bava kuri 5% by'Abanyarwanda bose, bakagera kuri 100%.

Minisitiri w'Intebe Dr. Ngirente yavuze ko Inama y'Abaminisitiri yo ku wa 26 Werurwe 2025 yaganiriye ku ngingo yo kongerera ingufu inganda zikora ibitambaro ku buryo abadoda bajya babibona bitabagoye.

Umusaruro w'inganda wiyongereyeho 7,1% muri Gashyantare 2025

Umusaruro w'amashanyarazi wiyongereyeho 21,5% muri Gashyantare 2025

Umusarururo w'amazi n'isukura wiyongereyeho17%

umusaruro w'ubucukuzi bw'amabuye y'agaciro na kariyeri wiyongeraho 14%

Umusaruro w’ubucukuzi ugenda uzamuka umunsi ku munsi

Umusaruro w'ikorwa ry'imyenda, ibitambaro n'ibikomoka ku ipamba wagabanyutseho 15,8% muri Gashyantare 2025

Iki gitabo gikubiyemo indirimbo 100, aho buri ndirimbo ihuriza hamwe ubuhamya n'amateka ashimangira uburyo amateka y'ibi bihe bikomeye by'u Rwanda atibagirana, ndetse bigamije kubungabunga ubuhamya bwa Jenoside yakorewe Abatutsi mu 1994. 

Igitabo gikubiyemo indirimbo zigaragaza uko Jenoside yakorewe Abatutsi yagiye igira ingaruka zitazibagirana ku buzima bw'abantu. Indirimbo zitandukanye zikubiyemo ubuhamya bw'ababaye muri ibyo bihe, zigaragaza akababaro, intambara y'ubuzima ndetse n'uburyo abantu biyubaka no gukomeza gushyira hamwe mu cyerekezo cyo kwiyubaka no gukomera ku ndangagaciro z'ubumuntu. 

Mu kiganiro na InyaRwanda, Munyanshoza yavuze ko mu myaka 30 ishize 'Maze gukora indirimbo 100. Izo ndirimbo rero 100 ni iz'udusozi naririmbye. Uyu mwaka nta ndirimbo nshya nakoze, kubera ko nari nitaye kuri icyo gitabo.'

Uyu mugabo yavuze ko ateganya ko ateganya kumurika iki gitabo yise 'Indirimbo 100, imisozi 100' hagati ya Gicurasi na Kamena 2025 mu rwego rwo gufasha abakiri bato kumenya amateka.

Avuga ati 'Icyo gitabo rero kizaba gikubiyemo za ndirimbo zose nahimbiye twa dusozi. Ariko hazaba harimo n'amafoto agaragaza ka gasozi, harimo igihe indirimbo yahimbiwe, impamvu yahimbwe, umwihariko ukomeye. N'ubwo ubwicanyi bwagiye buba muri rusange, ariko bujya buri gasozi gafite umwihariko wako muri Jenoside yakorewe Abatutsi.'

Munyanshoza yavuze ko bimufasha imyaka ibiri yandika iki gitaramo, kandi yagiteguye nk'umusanzu we mu kubaka u Rwanda, ndetse no kubika ibihangano bye neza.

Yavuze ko ariwe wagize igitekerezo cyo gukora igitabo, ariko kandi yashingiye cyane mu murongo wo gufasha buri wese ushaka kumenya amagambo aba aririmba mu ndirimbo.

Munyanshoza yagaragaje ko udusozi twatoranyijwe mu gitabo atari ukugaragaza gusa ubwiza nyaburanga, ahubwo n'ibyabereye kuri buri gace byabaye isoko y'ibitekerezo n'ubutwari.

Aha, indirimbo zihurira n'utusozi twibutsa amateka y'imibabaro ndetse n'uburyo icuraburindi rya Jenoside ryatanze isomo rikomeye mu buzima bw'Abanyarwanda.

Umuhanzi yatanze urugero rw'uko yagiye ashyira mu ndirimbo ubuhamya yumvise n'ibyabaye mu mibereho ye n'iy'abandi mu gihe cya Jenoside.

Buri ndirimbo rifite inkomoko, ikubiyemo uburyo amateka yahindutse ndetse n'aho impinduka zabaye mu buzima, bigafasha abakunzi b'ubuhanzi kumva neza ikimenyetso cy'ububabare n'ubushake bwo kubaho nyuma y'ibihe bikomeye.

Munyanshoza Dieudonne, wamenyekanye nka Mibirizi, yatangiye urugendo rwe rw'ubuhanzi mu bihe byari bikomeye nyuma ya Jenoside.

Yizeye ko indirimbo zifatwa nk'inzira yo gukiza imitima ndetse no kuzirikana amateka, bityo akaba yarahisemo gukoresha ijwi rye mu guhuza no guhumuriza abakomeje kugira ihuriro n'amateka mabi y'ibyo bihe.

Yagize uruhare rukomeye mu gushimangira umurage w'ubuhanzi bwibutsa amateka, aho indirimbo ze zabaye igikoresho gikomeye mu kwigisha abakiri bato ndetse n'abandi banyarwanda uburyo ibyabaye mu mwaka wa 1994 bitakwiye gusubirwamo.

Ubuhanga bwe bwahaye amahirwe yo gutanga ubutumwa bw'ubumwe, ubwiyunge ndetse no gukangurira abantu guharanira amahoro n'ubwiyunge mu muryango nyarwanda.

Mibirizi yabaye icyitegererezo ku bahanzi batangiye gukoresha ubuhanzi bwabo mu guhangana n'ibibazo by'amateka, abigaragarije mu ndirimbo ze zikubiyemo ubuhamya, ibitekerezo by'imibabaro ndetse n'uburyo abantu bashobora gusabana n'amateka.

Uruhare rwe rugaragara cyane mu buryo yagiye akora indirimbo zifasha mu kumvikanisha isomo rikomeye ryo kutibagirwa amateka ya Jenoside.

Indirimbo 100 ziri mu gitabo zitanga ubuhamya bw'ibyakorewe Abatutsi, zikaba uburyo bwo kubungabunga amateka no kwirinda ko ibihe bya Jenoside bisubira.

Ubutumwa buri mu ndirimbo bugamije gukangurira abantu gukomeza gushimangira ubumwe n'ubwiyunge mu muryango nyarwanda, ndetse no gushyigikira ibikorwa bigamije amahoro.

Igitabo kigaragaza ko kubika no gusakaza amateka ya Jenoside ari ingenzi, kugira ngo abakomoka ku baturage bagumane isomo ryo guhora biteguye gukumira ko amateka yongera kwisubiramo.

Munyanshoza yatangaje ko agiye gushyira hanze igitabo yise 'Indirimbo 100, imisozi 100' 

KANDA HANO UBASHE KUREBA IKIGANIRO TWAGIRANYE NA MUNYANSHOZA

“>

Ni umuhango wabaye ku gicamunsi cyo ku wa 8 Mata 2025.

Abakozi n'abayobora SBL batambagijwe ibice bigize uru rwibutso banasobanurirwa amateka ya Jenoside yakorewe Abatutsi mu 1994 by'umwihariko ay'abashyinguwe ku Rwibutso rwa Nyanza ya Kicukiro.

Umukozi ushinzwe gusobanura amateka kuri urwo Rwibutso, Gasigwa Gilbert yavuze rushyinguyemo inzirakarengane z'Abatutsi barenga 105.600 harimo abagera ku bihumbi bitatu bahaguye n'abandi bakuwe mu bindi bice bya Kicukiro no hafi yaho.

Yavuzue ko harokokeye Abatutsi bagera ku 100 gusa barokowe n'Inkotanyi nyuma y'uko abandi bari kumwe bari bamaze kwicwa umunsi wose abicanyi bagataha bazi ko bagaruka bukeye kureba ko nta wasigaye agihumeka ngo bamuhuhure.

Ku wa 11 Mata 1994, ingabo zari mu Butumwa bwa Loni bwo kugarura amahoro mu Rwanda (MINUAR) zatereranye Abatusti barenga 3000 bari bahungiye muri ETO Kicukiro (RP Kicukiro College y'ubu) burira indege basubira iwabo babasigira Interahamwe n'ingabo za Leta zirabica.

Abatutsi bari basigaye abo bicanyi barabashoreye ngo bajye kubicira ahazwi nka Sonatubes ariko bahabagejeje uwari Meya w'Umujyi wa Kigali, Col. Renzaho Tharcisse atanga amabwiriza yo kujya kubicira i Nyanza ya Kicukiro kugira ngo abanyamahanga bari bari guhunga basubira iwabo badasanga bari kwicirwa Sonatubes kuko hari inzira ijya ku Kibuga cy'Indege.

Muri urwo rugendo ruva Sonatubes bamwe mu Batutsi bagiye bicwa umugenda bakiri mu nzira kugeza bageze i Nyanza ya Kicukiro bamishwamo amasasu ugerageje gutoroka interahamwe zikamwicisha intwaro gakondo.

Ku wa 12 Mata ni bwo Inkotanyi zahanyuze zigiye ku i Rebero zumva imiborogo y'abari bagihumeka zihita zibatabara zirokora abagera ku 100 mbere y'uko abicanyi bagaruka kubahuhura na bo kuko bari bararanye uwo mugambi mubisha.

Gasigwa yakomeje ati 'Uru rwibutso rufite umwihariko wo kuba ikimenyetso cyerekana ubugwari bw'ingabo z'Umuryango w'Abibumbye kuko zari zifite inshingano zo kurinda abasivile ariko ntizibarinde abagera ku 3000 bakicwa kandi bari bari mu biganza byazo.'

Abakora muri SBL kandi bunamiye inzirakarengane zishyinguye muri uru rwibutso, banashyira indabo ku mva baruhukiyemo mu rwego rwo gusubiza agaciro ubuzima bambuwe bicwa urw'agashinyaguro.

Uwashinze SBL, Thibault Relecom yavuze ko amateka ya Jenoside yakorewe Abatutsi ashengura imitima kuyumva ariko ko adakwiye kwibagirana kuko gukomeza kuyibuka ari isomo rikomeye ry'ahazaza.

Yavuze kandi ko urumuri rw'icyizere beretswe rushimangira koko icyizere Igihugu gifite mu ntambwe ifatika cyatangiye gutera yo kugera kure.

Ati 'Biragaragara ko nyuma ya Jenoside yakorewe Abatutsi mu 1994 u Rwanda rumaze gutera intambwe mu iterambere kandi aho ruzaba rugeze mu gihe kizaza hamwe n'urumuri rw'icyizere ni ho na twe dushaka kuba turi.'

Abakora mur SBL basobanuriwe buri kimenyetso kiri mu Busitani b’Urwibutso

Abakora muri SBL banasoabanuriwe urumuri rw’icyizere ruhari

Uwashinzwe SBL, Thibault Relecom yavuze ko amateka ya Jenoside yakorewe Abatutsi ashengura imitima kuyumva ariko ko adakwiye kwibagirana kuko gukomeza kuyibuka ari isomo rikomeye ry'ahazaza

Ubusitani bw’Urwibutso rwa Jenoside yakorewe Abatutsi rwa Nyzanza bushushanya byinshi ku kuyirokoka

Ubutwari bw’Abanyarwandakazi buri mu bifite ikimenyetso mu Rwibutso rwa Jenoside yakorewe Abatutsi rwa Nyanza ya Kicukiro

Amafoto: Nezerwa Salomon

Hashize imyaka myinshi imiryango mpuzamahanga igaragaza ko mu Karere k'Ibiyaga bigari na Afurika y'Iburasirazuba hakwirakwiza imvugo z'urwango n'ibindi bimenyetso mpuruza bisa n'ibyagaragaye hategurwa Jenoside yakorewe Abatutsi, ariko hari benshi banze kubyumva bakomeza kubipfukiranira mu bibazo bya politike.

Arkiyepiskopi wa Kigali, Antoine Cardinal Kambaba yavuze ko nta muntu uhitamo umuryango avukiramo ahubwo ari Imana iwumugenera.

Ati 'Ni umugambi w'Imana ku buryo ari yo mpamvu usanga ari ikibazo gikomeye, ari ibintu bibabaje cyane kugira ngo umuntu azire uko yavutse atahisemo, biba ari no guhinyuza Imana kuko ari yo igenera umuntu umuryango avukamo.'

Yavuze ko Abatutsi barenga miliyoni bishwe babaye ibitambo by'inabi, urwango n'amacakubiri yabibwe n'abakoloni bigasenya ubumwe n'ubuvandimwe by'Abanyarwanda, ndetse abasigaye ntibagira amahirwe yo kubaherekeza ari na yo mpamvu yo gufata igihe cyo kubibuka kuva ku wa 7 Mata kugeza iminsi 100 irangiye.

Cardinal Kambanda yanenze amahanga yahumwe amaso n'inyungu z'ibintu ntakure isomo kuri Jenoside yakorewe Abatutsi, ku buryo n'ubu hari ahantu hagaragara imvugo zibiba urwango.

Ati 'Haracyari abafite umutima unangiye n'amahanga yakagombye kuba yigira ku mateka ya Jenoside yakorewe Abatutsi areba inyungu zayo bigatuma yirengagiza ukuri. Dukomeze rero cyane cyane gutegura abato no kurera Abanyarwanda b'ejo ngo umurage w'ubumwe n'ubuvandimwe abe ari wo bazakuriramo ibyabaye bitazongera.'

Yashimangiye ko ibihe byo kwibuka buri mwaka bihurirana n'igihe cya Pasika bikongera kwibutsa Abakisitu ko inabi itaganza ineza, umwijima utatsinda urumuri.

Ati 'Buri mwaka iki gihe cyo kwibuka gihura n'ibihe bya Pasika, nk'Abakirisitu dufite ukwizera ko nubwo icyaha n'urupfu byagaragaje ubukana bukomeye no muri Jenoside by'umwihariko twarabibonye ariko Kirisitu yarabidutsindiye, yemera kudupfira ku musaraba. Ibi rero biduha ukwizera ko ikibi kitarusha icyiza imbaraga, urwango rutarusha urukundo imbaraga, urupfu rutarusha ubuzima imbaraga, urumuri rurusha imbaraga umwijima.'

Yavuze ko ibihe bya Jenoside yakorewe Abatutsi byaranzwe n'umwijima w'icuraburindi ariko mu gihe cyo kwibuka abarenga miliyoni yahitanye hakoreshwa urumuri rutazima.

Cardinal Kambanda yashimye ubuyobozi bwiza buyoboye igihugu, abitangiye guhagarika Jenoside, abahishe abahigwaga, ababavuganiye n'abemeye gupfa aho gutererana abahigwa.

#Kwibuka31 pic.twitter.com/S3N7gbeWyG

— Antoine Cardinal KAMBANDA (@KambandaAntoine) April 9, 2025

Antoine Cardinal Kambanda yavuze ko amahanga atigeze akura isomo kuri Jenoside yakorewe Abatutsi

Ku wa 19 Kanama ni bwo Monica Geingos w'imyaka 48 yagizwe Umuyobozi w'Icyubahiro wa Kepler College.

Geingos yize ibijyanye n'Amategeko, aho binyuze mu bumenyi bwe yakoreye inzego zitandukanye zaba iz'abikorera ndetse n'iza Leta.

Yabaye umuyobozi ndetse n'umunyamigabane w'ikigo cya mbere muri Namibia cy'abikorera gikorana n'abashoramari mu bijyanye no kugura imigabane.

Monica Geingos yabaye umugore wa Perezida wa Namibia kuva mu 2015 ubwo yasezeranaga kubana nk'umugabo n'umugore na Hage Geingob wayoboye iki gihugu kugeza muri Gashyantare mu 2024, ubwo yitabaga Imana azize uburwayi.

Mu kiganiro yagiranye na The NewTimes yagarutse ku ngingo zitandukanye zirebana n'uburyo yabonye u Rwanda ndetse avuga ko agiye gushinga ikigo cy'imiyoborere mu Rwanda.

Abajijwe icyo icyo kigo gisobanuye ndetse n'impamvu yahisemo kukizana mu Rwanda, yavuze ko mu Rwanda borohereza abashoramari ndetse hakaba ahari n'ubuyobozi bufite intego

Ati 'Impamvu ni ukubera ko nizera ko u Rwanda rworohereza abashoramari. Ubuyobozi bwubakitse neza, budaheza ndetse no kuba bushingira ku bikorwa aho kuba amagambo, ibyo byose ni byo bigira Kigali ahantu heza ho gukorera.'

Icyo kigo cyiswe Leadership Lab Yetu.

Geingos ati 'Ni twe tugomba kugena uko ubuyobozi butubereye bugomba kugenda n'icyo busobanuye. Intego ni ukubakira ubushobozi urubyiruko rwa Afurika rugahabwa ubushobozi burufasha kuyobora mu nzego zitandukanye.'

Yavuze ko icyo kigo kizajya gitanga amahugurwa yibanda ahanini ku bijyanye n'ubuyobozi. Azahabwa abari mu itangazamakuru, politiki, ubucuruzi, ndetse n'izindi nzego zitandukanye.

Ibi byose bizaba ari ukubafasha uburyo bahangana n'ingorane zitandukanye ziza mu buyobozi ari na ko baharanira inyungu z'inzego bayobora.

Monica Geingos yagaragaje ko ubu yamaze gusinyana amasezerano y'imikorere na Minisiteri y'Urubyiruko n'Iterambere ry'ubuhanzi ndetse n'abandi Banyafurika ku buryo bigenze neza icyo kigo kizamurikwa muri Nzeri 2025.

Monica Geingos yahishuye ko agiye gushinga ikigo cyigisha imiyoborere mu Rwanda

Ni mu gihe abasore n'inkumi bakunze kwinemfagusa ubuhinzi ari nabyo bituma usanga ubuhinzi bubyara amafaranga nk'ubw'icyayi na kawa bukorwa gusa n'abantu bakuze, ku buryo hari impungenge ko mu myaka iri imbere ibi bihingwa bishobora kuzabura ababyitaho.

Tariki 4 Mata 2025, mu ishuri ryisumbuye rya Rugabano habereye igikorwa cyo guha impamyabushobozi abahinzi b'icyayi 598 bize guhinga icyayi bagahinduka abahinzi b'icyayi b'umwuga.

Abitabiriye aya masomo biganjemo abantu bakuze kuko ari bo benshi bari mu buhinzi bw'icyayi.

Umuyobozi wa ES Rugabano, akaba n'umuhinzi w'icyayi, Frodouard Ndihokubwimana yavuze ko kuba umurimashuri w'ubuhinzi bw'icyayi warashyizwe muri iki kigo cyigaho abanyeshuri 508 bizatuma bakunda ubuhinzi bw'icyayi kuko bazamenya uko gihingwa, uko gikatwa n'uko gisoromwa.

Ati “Ubuhinzi bw'icyayi ni inkomoko y'amafaranga, haba ku bagihinga no ku bagisoroma, kugeza no ku bagitunganya mu ruganda, kuba abana babimenye biratuma bagikunda kugira ngo igihe bazava ku ntebe y'ishuri abe yagihinga cyangwa abe yagikangurira n'ababyeyi be aho aturuka mu mu muryango”.

Ndihokubwimana uyobora imwe muri koperative zikomeye z'ubuhinzi bw'icyayi mu Karere ka Karongi yavuze ko biteye impungenge kuba ubuhinzi bw'icyayi bukorwa n'abantu bakuru.

Ati “Mu gihe urubyiruko rutakwibona mu buhinzi abakuze baburimo bagenda basaza bazasazana na bwo, birakwiye rero ko dushyira imbaraga mu rubyiruko kugira ngo abakuze nibavamo urubyiruko rujye rubasimbura”.

Umuyobozi w'Akarere ka Karongi, Muzungu Gerald yavuze ko amakuru yahawe n'abakora kinyamwuga ubuhinzi bw'icyayi ari uko kuri hegitari imwe havamo miliyoni 6Frw.

Ati “Ni akazi keza cyane, turashishikariza urubyiruko rwacu rero kuba bashyiramo imbaraga bakitabira ubuhinzi bwa kijyambere'.

Meya Muzungu yavuze ko u Rwanda rufite urubyiruko rumaze gusobanukirwa kuko rwigishijwe ku buryo rushobora kumenya guhingira isoko mu gihe abakuze bamenyereye guhinga ibyo kujyana mu rugo.

Ati 'Urubyiruko rufite n'ubumenyi bwo gushakisha hirya no hino impinduka zigenda zibaho mu bijyanye n'amasoko n'ubucuruzi mpuzamahanga, byaborohera kuba ari bo bafata iya mbere kugira ngo bakore ubuhinzi kandi bw'umwuga”.

Meya Muzungu yasabye urubyiruko kwitabira ubuhinzi

Muri urwo rwandiko, bagaragaje ko guhera mu 1990 kugera mu 1994, Umuryango w'Abibumbye wimye amatwi ibitero byagabwaga ku Batutsi, ubifata nk'ibidafite ishingiro, hirengagizwa imvugo z'urwango zakwirakwizwaga n'itangazamakuru, imyitozo yari yarahawe Interahamwe ndetse n'ibikorwa by'ubwicanyi byakorwaga.

Bakomeje bagira bati 'Abateguye Jenoside yakorewe Abatutsi mu Rwanda batewe imbaraga no kutita ku bikorwa by'ivangura byakorwaga ku rwego mpuzamahanga, banzura ko bashobora kwica miliyoni y'Abatutsi. Jenoside batangije ku itariki ya 7 Mata 1994 yahagaritswe n'uko Ingabo za FPR Inkotanyi zafashe igihugu ku ngufu z'igisirikare.'

Bagaragaje ko ubwo imiryango y'Abatutsi yicwaga, u Bwongereza n'ibindi bihugu by'ibihangange byabatereranye, ahubwo bisaba ko habaho guhagarika imirwano kuri FPR.

Ati 'Basaba ko habaho guhagarika imirwano ibintu byari kuba ikimenyetso cy'iherezo ryacu. Ni ibyo gushimirwa kuba FPR yarirengagije ibyo Akanama ka Loni k'Umutekano kasabaga ikadukiza.'

Bakomeje berekana ko nyuma ya Jenoside yakorewe Abatutsi, abayigizemo uruhare bahungiye mu bihugu bitandukanye birimo na Zaire (RDC uyu munsi).

Kuri ubu hari abarenga 500 bakurikiranyweho kugira uruhare muri Jenoside yakorewe Abatutsi bakidegembya muri icyo gihugu, ibintu bigaragara nk'icyasha ku butabera kandi bitagakwiye kuba byihanganirwa n'ibihugu bitandukanye birimo na n'u Bwongereza.

Berekanye ko imbuto z'umutekano muke muri RDC zabibwe mu myaka myinshi ishize kandi n'u Bwongereza bwabishyigikiye.

Mu 1994 Abayobozi ba Congo bahaye ubuhingiro Abasize bakoze Jenoside yakorewe Abatutsi, biyegerezwa cyane mu kurwanya Abatutsi bo muri RDC no guhangabanya u Rwanda.

Aba Banyarwanda bongeye kwibutsa ko mu 2022 amasasu yavuye muri RDC yaguye ku butaka bw'u Rwanda mu Ntara y'Amajyaruguru mu gihe cy'Inama y'Abakuru b'Ibihugu na za Guverinoma bo mu Muryango w'Ibihugu bikoresha Icyongereza (CHOGM) yaberaga mu Rwanda.

Berekanye ko Umuryango Mpuzamahanga utakaza miliyari nyinshi mu butumwa bwo kugarura amahoro muri RDC, ariko ukaba warananiwe ahubwo ukomeza gukorana n'imitwe ifite intego yo gukora Jenoside.

Bagaragaje ko abagize imitwe yitwaje intwaro bakomeje gukora barebererwa na Loni, aho irenga 100 kuri ubu ikorera mu Burasirazuba bwa RDC kandi ishyigikiwe na Guverinoma yayo.

Ati 'Ibitero bigabwa ku Batutsi b'Abanye-Congo bikomeje guteshwa agaciro n'imiryango iharanira uburenganzira bwa muntu n'itangazamakuru nk'uko byakorwaga kuri twe mu Rwanda.'

Bahishuye ko imitwe yitwaje intwaro y'Abatutsi yashyizweho igamije kwirwanaho, yashinzwe nyuma y'ibitero byakomeje kubagabwaho kandi umuryango mpuzamahanga ukananirwa kubarinda.

Nko ku wa 23 Werurwe 2009 ni bwo umutwe wa CNDP wasinyanye amasezerano na Guverinoma ya RDC agamije kubahiriza uburenganzira bw'Abatutsi ariko yaje kwangizwa na Guverinoma ya Congo kandi ntiyigeze ibazwa uko kunanirwa kubahiriza ibyo yemeye.
Ibyo byatumye nyuma y'imyaka itatu hashingwa umutwe wa M23 wari ugamije kurinda Abatutsi b'Abanye-Congo.

Uwo mutwe washyizweho ndetse unitwa iryo zina, mu rwego rwo kugaragaza y'amasezerano atarashyizwe mu bikorwa no kugaragaza ko amahoro adashobora kuboneka hatabayeho gukemura ibibazo muzi.

Aba Banyarwanda bavuze ko imvugo z'urwango zibasira Abatutsi no gusaba ko Jenoside ibakorerwa yahagarara muri Congo ari ibintu byatangiye imyaka myinshi mbere y'ivuka rya M23.

Kuri ubu Abarokotse Jenoside yakorewe Abatutsi mu Rwanda, bari gufasha Abatutsi b'Abanye-Congo bahungiye mu Rwanda hashingiwe ku byo banyuzemo bari kubona uyu munsi bagenzi babo banyuramo, berekana ko gutwika abantu ari bazima, kubarya n'ibindi byari ibimenyetso simusiga.

Bakomeje bati 'Mu gihe mwahannye u Rwanda ntabwo mwigeze mugira icyo mukora kuri abo bagaba ibitero kuri M23 n'Abatutsi b'Abanye-Congo b'abasivili, rero kurwanya ibisubizo bya gisirikare bigaragara nko kwirengagiza ubuzima bw'abasivili.'

Beretse Minisitiri David Lammy ko Guveronoma y'u Bwongereza yananiwe gufatira ibihano RDC byo kuba iha intwaro umutwe wa FDLR kandi ibyo byawuhaye uburenganzira bwo gukora ibyo ushaka.

Ati 'Niba u Bwongereza budafite ubushake bwo kurinda abavandimwe bacu bo muri RDC mu by'ukuri ntibwakabaye bunitambika abashaka guhagarika akandi kaga kameze k'akarimbuye imiryango myinshi mu Rwanda mu 1994, Isi yose irebera.'

Iyo baruwa yasinyweho n'abarimo Beatha Uwazaninka, Apolinaire Kageruka, Bosco Ngabo, Chantal Uwamahoro, Egide Ruhashya, Eric Murangwa, Jean Claude Mujyambere, Julienne Mukabalisa, Naila Amida, Philomene Uwamaliya, Pierre Rurengatabaro, Stephanie Kayirangwa, Leonard Mutangana, Jimmy Kanyambo, Diocre Rwabutogo na Theo Nzabakirana.

Abarokotse Jenoside bandikiye David Lammy w'u Bwongereza wafashe uruhande ku bibera muri RDC