Category: Uncategorized

Muri bimwe byitezwe muri ayo mavugurura nuko umubare w’Indembo (ururembo ni nk’Intara) zavuye kuri enye (4)n’umugi wa Kigali zikaba icyenda (9)
Nanone ni uko icyahoze ari uturere tw’itorero natwo twa kuweho burundu hanyuma hakabaho no guhuza amaparuwasi nayo akava kuri maganane arenga agasigara ari 182 murwego rwo kuyongerera ubushobozi.

Muri uko gutegereza izompinduka n’amatsiko menshi yo kumenya abazaba abashumba b’indembo bashya, kuruyu wa 13.1.2021 hasohotse liste yariho abashumba muri ubu buryo bukurikira nkuko mu bibona hano

1. Ururembo rwa Huye Pst Rutegamihigo Come, wahoze ari umuvugizi wungirije ku gihe biro yari iyobowe na Usabwimana Samuel, bakuweho batarangije manda kubera imiyoberere mibi yaranze biro yari iyoboye icyo gihe.

2.Ururembo rwa Gihundwe Pst Nsengiyumva Laurient wayoboye ururembo kungoma ya Usabwimana Samuel, ubu akaba yarayoboraga akarere ka Rwamagana kakuweho.

3.Ururembo rwa Muhoza Pst Nsabayesu Aimable, asanzwe yigisha musique bikavugwa ko ari musanzire w’Umuvugizi wa ADEPR.

4.Ururembo rwa Kigali Pst Mutaganzwa Viator, wabaye umunyamabanga mukuru wa ADEPR mu gihe cya Biro yari iyobowe na Sibomana Jean, akaza guhagarikwa bitewe n’amakosa yakoze, nyuma ahabwa kuyobora Itorero ry’Akarere ubu ryakuweho.

5.Ururembo rwa Nyagatare Pst Hakizamungu Josephe, yabaye umushumba w’ururembo wungirije, kugeza ubwo urwego rw’ururembo rwakurwagaho.

6.Ururembo rwa Gicumbi Pst Ruzibiza Viator, yahoze ari umunyamabanga mukuru wa ADEPR mu gihe cya biro ya Karuranga Ephrem akurwamo n’amatora, kugeza ubu yari umushumba w’ururembo wungirije, uwo mwanya nurwego byakuweho.

7.Ururembo rwa Rubavu Pst Masumbuko Josue, yabaye umunyamabanga Mukuru wa ADEPR, ubu yari umushumba w’Itorero ry’Akarere, ariko uru rwego rwakuweho.

8.Ururembo rwa Ngoma Pst Sebugorore Henri , asanzwe ari umushumba wa paruwasi ya Nyarugenge, arinawe wakoranye ihererekanyabubasha nuwari umushumba w’iryo torero.

9.Ururembo rwa Nyabisindu Pst Karayenga Jean Jacques, yahoze ari umushumba w’ururembo wungirije urwo rwego rutarakurwaho.

Nubwo iyo liste yasohotse ntarwego narumwe rwohejuru mu itorero rwaba rwaremeje iyo liste cyangwa ngo rubihakane

Ikinyamakuru imirasire.rw cyashatse kumenya ukuri kwiyo liste dore ko yari yatangiye kwibazwaho byinshi nabamwe mu bayoboke ba ADEPR

Umuvugizi wa ADEPR Pasteur Ndayizeye Isaie yahakanye yivuye inyuma ko iriya liste batazi aho yakorewe ndetse n’uwayikoze, yagize ati” mubyukuri natwe twayibonye gutyo turi mu isi y’aho abantu bahimba ibinyoma ibyo bikaba byarabaye murwego rwo kugirango barangaze abantu, abakristo bagomba kwirinda ibihuha kuko igihe ni kigera cyo kuyishyiraho tuzayibatangariza.”

Twababwira ko hari andi makuru twamenye yuko kuwa kane 14/01/2021 hateranye inama kuri Dove Hotel yari iyobowe n’imuvugizi wa ADEPR Pasteur Ndayizeye Isaie, iyo nama yakozwe muburyo bwa video confrence mu rwego rwo kwirinda Covid-19

Iyo nama yabanje guhuza abari abacungamutungo b’indembo n’uturere hakurikiraho abahoze ari abashumba b’indembo n’uturere, kukibazo cyabahoze ari abacunga mutungo babwiwe ko bagomba kwitegura ko mu kwezi kwa kabiri hazabaho gusesa amasezereno hanyuma hakarebwa icyo amategeko y’umurimo mu Rwanda ateganya, ikindi ni uko muri ayo mavugurura harimo abazahabwa kuba abacunga mutungo b’indembo ariko bikazaba hari ibigendeweho.
gusa babwiwe ko ukwezi kwa mbere ba zakubahembera.

Kubijyanye n’abahoze ari abashumba b’indembo n’abuturere babwiwe ko bagomba kwitegura ko bazoherezwa gu korera mu maparuwasi basanzwe batuyemo.

Ikibazo cyibazwa na bamwe mu bashumba batashatse ko imyirondoro yabo ijya mu itangazamakuru ni ukuntu uzasanga muri Paruwase habaye hari uwahoze ayobora Ururembo ndetse n’uwahoze ayobora Akarere uko bizagenda, ikindi bibaza ese abari basanzwe bayobora iyo paruwase basanze aho bo bazajyehe?

Byose nugutegereza kugeza igihe ibyavuye mu mavugurura bizashyirwa ahagaragara nkuko twa bitangarijwe n’imuvugizi w’itorero Pasteur Ndayizeye isaie

Bagabo John.

Komisiyo y’Igihugu y’Amatora muri Uganda yatangaje ko Yoweli Kaguta Museveni ari we watsinze amatora aheruka kuba muri icyo gihugu kuwa 14/2021 Perezida Mseveni yatowe na baturage bangana 5.851,037 bihwanye na 58.64% Mugihe

Mugihe umuhanzi akaba n’umunyeporitike Robert Kyagulanyi uzwi ku mazina ya Bobi Wine yatowe na baturage bangana na 3,475, 398 bahwanye na majwi 34.83%

Tubibutse ko Bobi Wine yamaganiye kure ibyavuye mu matora kuko habayeho uburiganya aho yavuzeko ariwe Perezida watowe n’abaturage.

Urukiko rw'Ibanze rwa Nyarugenge rwategetse ko mu rwego rwo kubona ibimenyetso bikenewe mu rubanza rw'abana babiri barimo uw'imyaka umunani n'undi w'imyaka 30 bavuga ko ari aba Mirimo Gaspard wapfuye mu 2016, hatabururwa umurambo we hagafatwa ibipimo bya ADN.

Aba bana bari bamaze igihe baburana basaba urukiko kwemeza ko ari aba Mirimo, mu gihe abo mu muryango we barimo n'umugore we w'isezerano babiteye utwatsi bavuga ko batabazi.

Umunyemari Mirimo Gaspard yitabye Imana muri Gicurasi 2016 aguye muri Kenya aho yari arwariye cyane ko yari amaze iminsi atuye i Nairobi. Umurambo we washinguwe mu Rwanda mu irimbi rya Rusororo mu Karere ka Gasabo.

Amakuru IGIHE yamenye ni uko ku wa Gatanu tariki 15 Mutarama 2021, aribwo abahanga bo muri Laboratwari y'u Rwanda y'ibimenyetso bya gihanga byifashishwa mu butabera (Rwanda Forensic Laboratory) n'Urukiko rw'Ibanze rwa Nyarugenge bagiye ahari irimbi rya Rusororo gufata ibimenyetso [Sample] bizifashishwa mu kugaragaza niba koko abo bana ari aba Mirimo.

Urukiko rw'Ibanze rwa Nyarugenge rwavuze ko bisanzwe bibaho nyuma yo kubona ko hari ibyo rudashoboye ku kirego runaka, aho hitabazwa abahanga kugira ngo haboneke ibimenyetso.

Kuri iki kirego cya Mirimo ngo nta bundi buryo bwashobokaga uretse gufata ibimenyetso kandi bigafatwa kuri nyir'ubwite. Bivuze ko ibimenyetso byafashwe bizakorerwa ibizamini bya ADN, bityo hakaragazwa niba koko abo bana ari aba Mirimo cyangwa atari abe.

Imiterere y'ikibazo

Ubusanzwe Mirimo Gaspard n'umugore we, Gahongayire Winifride bashakanye mu buryo bwemewe n'amategeko mu 1995, mu gihe Mirimo yapfaga bari bamaze kubyarana abana bane.

Mu 2019, nibwo habonetse abandi bana babiri bavuga ko babyawe na Mirimo ndetse baregera Urukiko basaba ko rwategeka ko bazungura, bagahabwa umunani wabo nk'uko biteganywa n'amategeko.

Muri abo bana harimo umwe ufite imyaka irenga 30 [ubu ni umugore wubatse] uba mu gihugu cya Suède, undi bivugwa ko afite imyaka umunani atuye muri Leta Zunze Ubumwe za Amerika ari naho abana n'umubyeyi we uvuga ko yabyaranye na Mirimo.

Mu kugaragaza uburyo ari abana ba Mirimo, uw'imyaka 30 avuga ko Nyina [yitabye Imana], yamubyaranye na Mirimo [ntabwo bari barasezeranye nta n'ubwo yamwandikishije mu irangamimerere], mbere ya Jenoside yakorewe Abatutsi ariko ubwo Jenoside yabaga uwo mugore aza guhungira muri Repubulika Iharanira Demukarasi ya Congo ari naho yaje kuva yerekeza muri Suède.

Ku rundi ruhande umubyeyi w'umwana w'imyaka umunani we avuga ko yamenyanye na Mirimo mbere gato y'uko yitaba Imana ndetse ngo n'igihe yarwaraga mu 2016 niwe wamurwaje cyane ko babanaga nk'umugore n'umugabo.

Nyuma y'uko Mirimo yitabye Imana, uwo mugore yagiye gutura muri Amerika ariko ajyana n'umwana yabyaranye na Mirimo.

Umwe mu bo mu muryango wa Mirimo utifuje ko imyirondoro ye itangazwa yabwiye IGIHE, ko abo bana batabazi muri uwo muryango yewe nta n'abo Mirimo yigeze avuga ko yabyaye.

Gusa ku rundi ruhande hari amakuru y'uko ubwo Mirimo yitabaga Imana, yari amaze igihe atabana n'umugore ibizwi nka 'séparation de corps', aho abashakanye bashobora gufata igihe runaka batabana ku bw'impamvu runaka bumvikanyeho.

Bivugwa rero ko uwo mugore ufite umwana w'imyaka umunani yaje ubwo Mirimo atabanaga n'umugore we w'isezerano ari nabwo baje guhura babyarana uwo mwana. Uyu babyaranye ngo ni nawe wamurwaje mbere y'uko yitaba Imana.

Mu 2019, nk'umuntu uvuga ko yabyaranye na Mirimo yaje kwitabaza urukiko kugira ngo umwana we azungure, yarwitabaje ari kumwe n'uriya uba muri Suède.

Nyuma yo kwitabaza urukiko basaba kuzungura, baratsinzwe ku mpamvu z'uko nta bimenyetso bigaragaza ko ari abana ba Mirimo ariko baza gusubira mu rukiko kuregera ko rwemeza ko ari abana ba nyakwigendera Mirimo.

Mu kiganiro na IGIHE, Me Rukangira Emmanuel, Umunyamategeko wunganiye aba bana yavuze ko beretse urukiko ibimenyetso birimo amafoto yabo na Mirimo mu bihe bitandukanye ndetse no kuba uyu w'imyaka 30 yarashyingiwe na Mirimo.

Yagize ati 'Twebwe twagaragaje ibimenyetso noneho Umucamanza aravuga ati ikimara impaka kubyerekeranye no kumenya niba umubyeyi yarabyaye umwana ni ADN, kandi iteganywa n'itegeko hafatwa icyemezo cy'uko bazajya gutaburura umurambo bagafata 'sample' zizashingirwaho bapima.'

Ni ibintu bisanzwe

Laboratwari y'u Rwanda y'ibimenyetso bya gihanga byifashishwa mu butabera (Rwanda Forensic Laboratory, RFL) itangaza ko kuba hashobora kuvuka impaka runaka, Ubugenzacyaha cyangwa Urukiko rushobora gutegeka ko umurambo utabururwa kugira ngo hafatwe ibipimo bya ADN.

Umuvugizi wa RFL, Samvura Jean Pierre, yabwiye IGIHE ko ari ibintu bisanzwe bibaho kenshi ariko bikorwa hagendewe ku cyemezo cy'urukiko cyangwa urundi rwego rubifitiye ububasha.

Ati 'Bijya bibaho, dushobora kujya gutaburura umuntu twabisabwe, nk'iyo hari imiryango yitabye Imana, umwe akagaragaza ko uwapfuye yari afitanye nawe isano kandi hari abandi batabyemera, urukiko rushobora gutegeka cyangwa Pariki, tujya ku Irimbi, tugakurayo umuntu, tugafata sample, twamara kuzifata tukongera tumusubiza mu mva mu cyubahiro cye.'

Yakomeje agira ati 'Muri rusange mu kazi kacu ka buri munsi dushobora kujya gutaburura, icyo nakubwira ni uko, dushobora gufasha abantu kujya gutaburura nk'umuntu, ariko icyo gihe iyo duhari amabwiriza tuba tuyafite twayahawe n'Urukiko cyangwa RIB.'

Samvura avuga ko kandi ko iyo hari impaka zigiwe n'abantu bigasaba ko hitabazwa za ADN ishobora kuboneka ku bantu bazima cyangwa abapfuye.

Gahongayire Winifride niwe mugore washakanye na Mirimo mu buryo bwemewe n’amategeko

Iyi Station iri i Nyabugogo iherutse gusenywa, ni kimwe mu bikorwa by’ubucuruzi byari bizwi cyane bya Mirimo

U Rwanda ni kimwe mu bihugu bya Afurika byafashe iya mbere mu kwemeza burundu amasezerano y'Isoko Rusange ry'uyu mugabane, yari yasinyiwe i Kigali muri Werurwe 2018.

Ibihugu byitezweho kuzakira umusaruro mwinshi w'ibyo u Rwanda rwohereza mu mahanga birimo Repubulika Iharanira Demokarasi ya Congo, isanzwe n'ubundi iri mu bihugu bikorana ubucuruzi bwinshi n'u Rwanda.

Ibicuruzwa by'u Rwanda kandi bizoherezwa mu bihugu byo muri Afurika y'Amajyepfo, birimo Afurika y'Epfo, Botswana, Namibia na Zambia.

Mu Burengerazuba bwa Afurika, ibihugu birimo Ghana, Nigeria na Senegal na byo byitezweho kuzaba isoko ry'ibicuruzwa biturutse mu Rwanda, byiganjemo ikawa n'ibikomoka ku buhinzi bikunze kugera muri ibyo bihugu biturutse ku mugabane w'u Burayi na Amerika.

Byitezwe ko Ikigo cya RwandAir kizagira uruhare rufatika mu guteza imbere ubucuruzi hagati y'u Rwanda n'ibi bihugu, dore gisanzwe cyarashoye agatubutse mu kwagurira ingendo muri ibyo bice byombi bya Afurika, ndetse gahunda akaba ari ugukomeza kwagura ingendo mu bindi byerekezo by'Umugabane itarageramo.

Umuyobozi w'Ubucuruzi n'Ishoramari muri Minisiteri y'Ubucuruzi n'Inganda, Antoine Kajangwe, yavuze ko ibicuruzwa u Rwanda rwitegura kuzagurisha ku Mugabane wa Afurika byiganjemo ibikomoka ku buhinzi, ibikoresho by'ubwubatsi, ibyerekeye ikoranabuhanga ndetse na serivise z'imari.

Umunyamabanga wa Leta muri Minisiteri y'Ububanyi n'Amahanga Ushinzwe Ibikorwa by'Umuryango wa Afurika y'Iburasirazuba, Nshuti Manasseh, yavuze ko abacuruzi bo mu Rwanda bakwiye kubyaza umusaruro amahirwe atangwa na RwandAir yo kubafasha kugeza ibicuruzwa byabo mu bihugu biri hirya no hino ku Mugabane wa Afurika.

Yanaboneyeho kubasaba kwibanda ku ikoranabuhanga, bagashyiraho uburyo bwo gucuruza bifashishije ikoranabuhanga kuko rizagenga ubucuruzi bw'iri Soko rusange rya Afurika mu myaka iri imbere.

Impuguke mu bukungu, Dr. Bihira Canisius, aherutse kubwira IGIHE ko kugira ngo abacuruzi b'Abanyarwanda bungukire muri iri soko, bakwiye guhindura imikorere bagakora ubucuruzi mu buryo bwagutse kandi bwa kinyamwuga.

Yagize ati 'abacuruzi bacu bakwiye kurangwa no kugira udushya tuzatuma bahangana ku Isoko rigari rya Afurika, ndetse bakiga gukora ibigezweho. Mu bucuruzi bwajemo ihangana aho umuguzi afite amahirwe yo guhitamo mu bintu byinshi, bisaba ko wowe umucuruzaho uba ufite ibintu byiza kurusha abandi'.

Ibihugu 34 muri 54 byasinye amasezerano y'Isoko Rusange rya Afurika bimaze kwemeza amasezerano yaryo burundu, mu gihe n'ibindi byamaze kugaragaza ubushake bwo kwemeza aya masezerano azahuriza hamwe abaturage barenga miliyari 1,2 batuye Afurika, bari mu bihugu bifite umusaruro mbumbe ugera kuri miliyari zirenga 3 000$.

Umusaruro u Rwanda rukura mu byo rwohereza hanze y’igihugu witezweho kuzagera kuri miliyari 5$ mu myaka 10 iri imbere, bigizwemo uruhare n’Isoko Rusange rya Afurika