Category: Uncategorized

Hafashwe ingamba zo kongera guhagarika ibikorwa by'Abanyakigali, kugira ngo inzego z'ubuzima zibanze zisuzume neza aho ibintu bigana na cyane ko zari zagaragaje impungenge ko icyorezo gishobora kuba cyaramaze kwinjira mu baturage ku buryo kitakigenzurwa.

Ibi byose ni byo byatumye hafatwa icyemezo cyo guhagarika ibikorwa hafi ya byose mu Mujyi wa Kigali, hagasigara gusa serivisi z'ingenzi.

Ni muri urwo rwego Leta yiyemeje gushaka amafunguro azifashishwa n'abantu bazagirwaho ingaruka zikomeye na gahunda ya Guma mu Rugo, kugira ngo bazakomeze kubona iby'ibanze birimo amafunguro, bityo mu gihe bazaba basubiye mu buzima busanzwe, bazabe bafite imbaraga n'ubuzima bwiza buzababashisha gusubukura ibikorwa byabo nta nkomyi.

Mu kiganiro na IGIHE, Minisitiri w'Ubutegetsi bw'Igihugu, Prof. Shyaka Anastase, yavuze ko nk'uko byari byagenze muri Guma mu Rugo y'umwaka ushize, Leta yateganyije ko hari abantu bashobora kuzagira ikibazo cyo kubura ibyo barya kuko imirimo yafunzwe, bityo igateganya ibiribwa bishobora kugoboka abo bantu.

Ni ibiribwa Leta y'u Rwanda yakuye mu buhuniko bw'ibiribwa ifite hirya no hino mu gihugu, ndetse Prof. Shyaka yavuze ko 'gahunda yo gutangira gutanga ibiribwa ishobora gutangira uyu munsi mu bice bimwe by'umujyi, ahandi ikazatangira ku munsi w'ejo'.

Uburyo bwo gutanga ibiribwa kuri iyi nshuro butandukanye n'ubwari busanzwe bukoreshwa, kuko aho kugira ngo abantu bazajye bajya gufata ibiribwa ahantu byashyizwe, kuri ubu bazajya babizanirwa n'abakozi bateguwe, ibi bikaba bigamije kwirinda ko muri cya gihe abantu bahuriye ahantu hamwe ari benshi, bashobora kwanduzanya Coronavirus mu buryo bworoshye.

Indi mpamvu ni uko abazatanga ibiribwa bamaze gutegurwa, bapimwe Coronavirus ndetse bazajya baba bafite ibikoresho byabugenewe, birimo agapfukamunwa n'uturindantoki mu rwego rwo kuzuza inshingano zabo ariko badakwirakwije ubwandu bwa Coronavirus.

Prof. Shyaka yagize ati 'Ibi biryo tuzatanga, tuzabitanga mu buryo buri ku murongo. Turi mu gihe cya Coronavirus, ubwo rero bizajya bitangwa n'abantu babanje gupimwa kandi banafite ubwirinzi, bakazajya batanga ibiribwa urugo ku rundi, nta muntu uzasohoka ngo ajye gushaka ibiribwa'.

Kugeza ubu, iki gikorwa kiri gutegurwa n'Ubuyobozi bw'Umujyi wa Kigali, aho kizagirwamo uruhare n'ubuyobozi bw'inzego z'ibanze kuva ku isibo kugera ku karere.

Mu gihe habura igihe gito ngo iyi gahunda itangire, Prof. Shyaka yavuze ko ibikorwa byo gutegura abazatanga ibi biribwa birimbanyije. Mu bazabitanga harimo urubyiruko rw'abakorerabushake, inzego z'umutekano ndetse n'abayobozi b'inzego z'ibanze.

Prof Shyaka yavuze ko impamvu bashyize imbaraga nyinshi mu gupima abazatanga ibiribwa, ari ukugira ngo 'ababijyamo bose babe ari abantu twizeye, tuzi ko bameze neza kuko twabapimye. Ntidushaka ko ari bo bazakwirakwiza icyorezo ahubwo wenda bazagende bakirinda'.

Iyi mpamvu ni nayo nyamukuru ituma Minisiteri y'Ubutegetsi bw'Igihugu isaba buri wese ufite umugambi wo gufasha, gushyikiriza inkunga ye inzego z'ubuyobozi, kuko ari zo zifite ubushobozi bwo gutanga imfashanyo mu buryo budashobora gukurura ibibazo.

Shyaka yagize ati 'N'uwifuza gutanga ubufasha, abunyuze ku buyobozi bumwegereye. Ushobora kuba ufite nka toni ijana, ukaba wazishyikiriza Umujyi wa Kigali kugira ngo uzikwirakwize hose. Ushobora no kuba ufite umufuka umwe ukawujyana ku buyobozi bw'umudugudu na byo nta kibazo'.

Minisitiri Shyaka kandi yaboneyeho kumara impungenge abatekereza ko ibiribwa bishobora kuzaba bike, avuga ko 'hari ibiribwa bihagije kuri buri wese uzabikenera'.

Agashya kari muri gahunda yo gutanga ibiribwa muri Guma mu Rugo y'uyu mwaka, ni uko imiryango ifite abana bato, izajya ihabwa amata yo guha abana, mu gihe abandi bazahabwa ibirimo kawunga ndetse n'ibishyimbo, bikaziyongeraho ibizatangwa n'abagiraneza bishobora kuba mu byiciro bitandukanye.

Ni bande bazahabwa ibiribwa?

Nk'uko byagenze ubushize, abazahabwa ibiribwa ni abababaye kurusha abandi, badafite ubushobozi bwo kwitunga kubera ko imirimo yari ibatunze yahagaritswe muri gahunda ya Guma mu Rugo.

Kugira ngo aba bantu bashobore kuboneka, bizashingira ku makuru azatangwa n'ubuyobozi bubegereye, burimo ubw'umudugudu n'Isibo, ndetse n'amakuru aturuka mu baturanyi babo.

Ku rundi ruhande, amakuru azagena uhabwa ibiribwa azashingira ku byiciro by'ubudehe byari bisanzwe bihari mbere y'uko amavugurura y'ibyiciro bishya atangira.

Shyaka yavuze ko impamvu bashyira imbaraga nyinshi mu gusuzuma abahabwa ibiribwa ari uko hari abashaka kubyungukiramo, ati 'bakabihabwa batabikwiye kuko ari ubuntu'.

Nta mibare iratangazwa y'imiryango izahabwa inkunga y'ibiribwa ku ikubitiro ndetse Prof. Shyaka yirinze kugira icyo abivugaho kuko imibare ikivugururwa, gusa amakuru IGIHE yamenye, ni uko imiryango ikabakaba 30 000 mu Mujyi wa Kigali ishobora kuzatangira guhabwa inkunga y'ibiribwa guhera kuri uyu wa Gatatu.

Mu cyumweru cya nyuma cya Guma mu Rugo iheruka, imiryango irenga 280 000 yahawe ubufasha bw'ibiribwa, gusa bitewe n'uko iyi Guma mu Rugo ari bwo igitangira, Shyaka avuga ko bizeye ko imibare y'abakeneye inkunga izatangira iri hasi, gusa yongeyeho ko n'igihe byaramuka bihindutse, 'twe turiteguye n'ubwo byakwiyongera cyane tubifitiye ubushobozi'.

Ku bijyanye n'ingano y'ibiribwa bizatangwa, izashingira ku ngano y'umuryango, ndetse no ku bipimo mpuzamahanga ku ngano y'ibiribwa n'intungamubiri umuntu runaka akeneye. Ibiribwa bizajya bitangwa 'rimwe cyangwa kabiri mu cyumweru'.

---

Mu ijoro ryo kuri uyu wa 19 Mutarama, nibwo Minisiteri y'ubutegetsi bw'igihugu yasohoye urutonde rw'imirimo y'ingirakamaro ku gihugu ku buryo izakomeza gukorwa muri ibi bihe, rwiganjemo imirimo y'ubucukuzi bw'amabuye y'agaciro, ibikorwaremezo, ubuhinzi n'ubworozi, ubucuruzi, inganda na serivise.

Hari abahise bagaragaza ko itangazamakuru ryabujijwe uburenganzira bwo gukora akazi karyo kandi umuryango nyarwanda urikeneye cyane muri ibi bihe bikomeye. Minisitiri w'Ubutegetsi bw'Igihugu, Prof. Shyaka Anastase, yamaze impungenge abari bafite ikibazo, avuga ko Leta izi akamaro k'itangazamakuru 'ndetse n'umwihariko rigira mu guteza imbere imibereho y'Abanyarwanda muri rusange'.

Yabwiye IGIHE ko no muri ibi bihe bya Coronavirus, itangazamakuru rizemererwa gukomeza gukora akazi karyo nta nkomyi, gusa ko kubera ko ari ibihe bikomeye by'icyorezo, naryo rizakurikiza amabwiriza agenwa n'inzego z'ubuzima mu kwirinda ikwirakwira rya Coronavirus, agena ko inzego za Leta n'iz'abikorera zose, zigomba gukoresha abakozi batarenze 30% by'abari basanzwe bakora.

Yagize ati 'N'abanyamakuru rero kimwe n'izindi serivise zose, badufashe kubahiriza izo ngamba bakoresha abakozi batarenze 30% mu rwego rwo kwirinda ko bashobora kwandura no gukwirakwiza Coronavirus kandi byagakozwe neza twese tukirinda'.

Prof Shyaka yasobanuye ko abanyamakuru babinyujije mu Rwego rwabo Rwigenzura rwabo (RMC), bazajya basaba impushya mu gihe hari inkuru bashaka gutara mu mujyi wa Kigali uri muri Guma mu Rugo, urwo ruhushya rukazajya rushyikirizwa inzego zirimo Polisi kugira ngo mu gihe bari mu kazi kabo, batagongana n'inzego z'umutekano.

Yagize ati 'Turashaka ko ibintu bizajya binyura mu Rwego rw'Abanyamakuru Bigenzura. Ruzajya rutanga urutonde rw'abanyamakuru bari mu kazi kuri Polisi, ku buryo baba bazwi, bafite amakarita y'akazi kandi bemerewe gukora, maze na Polisi y'Igihugu ikorohereza ba banyamakuru bari mu kazi'.

Ku bigendanye n'imiterere y'itangazamakuru isaba ko amakuru abonekera ku gihe kugira ngo anatangirwe ku gihe, Minisitiri Shyaka yavuze ko izi ngamba zubahirijwe neza zitabangamira abanyamakuru muri rusange.

Yagize ati 'biramutse bikozwe neza, abantu bakabikora mbere y'igihe, inzego zose zigashyira hamwe, ntabwo bizabangamira akazi kabo'.

Shyaka yavuze ko izi ngamba zitagamije kubuza abanyamakuru uburenganzira bwabo bwo gutangaza amakuru, ahubwo ko zigamije kubarinda, ndetse no kurinda abanyarwanda muri rusange muri ibi bihe bitoroshye.

Minisitiri kandi yaboneyeho kwibutsa abanyamakuru kutazakoresha nabi uburenganzira bwabo, kandi ko mu gihe umunyamakuru yahaniwe gukoresha uburenganzira bwe nabi, bidakwiye kwitiranywa no kubangamira uburenganzira bw'abanyamakuru.

---

Abineza Cyprien w'imyaka 31 y'amavuko yafashwe n'abanyerondo mu rukererera rwo ku wa 17 Mutarama 2021 yikoreye umufuka urimo inanasi bakeka ko azibye bahita bamujyana bamushyikiriza abakozi b'aho yazikuye. Abo bakozi bamurambitse hasi baramukubita kugeza igihe ashiriyemo umwuka.

Umunyamabanga Nshingwabikorwa w'Umurenge wa Musambira, Mpozenzi Providence, yabwiye IGIHE ko hamaze gufatwa abantu barindwi bakekwaho kumukubita agapfa.

Ati 'Abakekwaho kumukubita bikamuviramo urupfu barafashwe; ku cyumweru twafashe batanu n'ejo hari undi wafashwe ndetse no mu ijoro ryakeye hafashwe undi.'

Mu bafashwe bose, batandatu bafungiye kuri Sitasiyo ya RIB y'Akarere ka Kamonyi naho undi umwe waraye afashwe aracyari kuri Sitasiyo ya Musambira.

Nyuma yo gufatwa bagiye gukorerwa dosiye bashyikirizwe ubushinjacyaha nk'uko amategeko abiteganya.

Uyu muyobozi kandi yavuze ko ku bufatanye n'izindi nzego zirimo RIB hakomeje iperereza kugira ngo hamenyekane n'abandi baba baragize uruhare mu rupfu rw'uwo musore kugira ngo babiryozwe.

Mpozenzi yibukije abaturage ko ntawe ufite uburenganzira bwo kwihanira, ahubwo iyo umuntu afashwe akekwaho icyaha akwiye gushyikirizwa inzego zibishinzwe.

Yasabye abaturage kandi kwirinda ibyaha ahubwo bakitabira umurimo kugira ngo batere imbere kandi imibereho yabo ihinduke myiza. Yibukije ko ufite ikibazo wese akwiye kugana ubuyobozi bukamufasha gushaka igisubizo.

[email protected]

---

Byabaye kuwa Mbere saa munani z'amanywa bibera mu Kagari ka Gatonze mu Mudugudu wa Nyagatovi mu Murenge wa Kibungo mu Karere ka Ngoma. Uyu mugore nyuma yo kujyanwa mu bitaro bya CHUK , yashizemo umwuka mu ijoro rishyira kuri uyu wa Gatatu.

Umunyamabanga Nshingwabikorwa w'Umurenge wa Kibungo, Kanzayire Consolée yabwiye IGIHE ko ubwo bageraga kuri uyu mugore basanze yatewe ibyuma mu maso ariko binagaragara ko yakubiswe ikintu kimeze nk'inyundo mu misaya.

Yagize ati ' Uriya mugore kuwa Mbere nka saa munani z'amanywa yatewe n'abantu mu mvura baramukomeretsa mu buryo bukomeye, nahise njyanayo na RIB na Polisi kureba ibyabaye, duhita duhamagara imodoka kugira ngo imujyane kwa muganga.'

Yakomeje agira ati ' Wabonaga ko bamushyize mu kintu kimeze nk'umufuka bagafata inyundo bagahonda mu mutwe nyuma bakanamutera ibyuma mu maso kuko abaganga bamaze kumukarabya nibwo twabibonye.'

Kanzayire yakomeje avuga ko bahise bajya gushaka umusore wabanaga na nyakwigendera mu rugo, uyu akaba ari umusore uri hejuru y'imyaka 20 aho umugabo w'uyu mugore yari amubereye se wabo.

Ati 'Bari bajyanye guhinga bahinguye amutuma kujya gushaka amakara ngo bateke icyayi, umwana wa nyakwigendera w'imyaka nk'itanu amutuma kujya kuzana amata, ariko uwo mudamu akaba yari afite amafaranga ibihumbi 500 yari yazaniwe n'umugabo we kugira ngo ayongere mu mari y'imyenda yacuruzaga, yayagendanaga ahantu hose, yari atarayajyana kuri banki.'

Yakomeje avuga ko uyu musore ukekwaho kumwica ngo ariyo yashakaga gutwara. Bikekwa ko yamwishe ubundi akajya gukaraba akazimangatanya ibimenyetso.

Ati ' Akana k'uwo mugore rero niko kaduhaye amakuru tujya kureba wa musore, ejo RIB na Polisi bajya gusaka inzu ya wa musore basangamo amafaranga ibihumbi 170 mu gisenge cy'inzu ariho n'amaraso, twahise dukeka ko yayahishe mu buryo butandukanye kugira ngo n'uwayabona azayabone ari igice.'

Umusore ukekwa yahise afatwa akaba afungiwe kuri sitasiyo ya RIB ya Ngoma.

---

Ibyari buve muri iyi nama byabaye nk'ibyihishura ubwo Perezidansi y'u Rwanda yasohoraga amafoto yayo, ubona ko buri muyobozi yayitabiriye atavuye aho ari ahubwo yagumye mu biro asanzwe akoreramo. Bamwe bati iyi 'Guma mu Biro' iratsura Guma mu Rugo ndetse biza kuba ari na ko bigendekera Umujyi wa Kigali.

Ku munsi wa Mbere wa Guma mu Rugo urujya n'uruza rwari rwagabanutse kuko ingendo rusange zitakorwaga yaba iz'imodoka zitwara abagenzi ndetse na moto, ariko wabonaga ko hari abagihaha n'abagikora ibindi bikorwa byo kwitegura.

Aho IGIHE yageze nko ku isoko rya Nyarugenge abantu batandukanye bari bari kujya guhaha ibiribwa, abandi ariko babizana babivana ahantu hatandukanye.

Muri Gare ya Nyabugogo naho umurongo w'abashaka kujya mu Ntara wari muremure, bari benshi cyane aho bafashwaga kujya mu miryango yabo. Inzego z'Umutekano ndetse n'Urwego rw'Igihugu Ngenzuramikorere RURA nibo babafashaga.

Muri rusange umunsi wa Mbere waranzwe n'urujya n'uruza rw'abajya mu masoko guhaha ibyo bazakoresha muri ibi byumweru bibiri ndetse n'abatega imodoka zibavana mu Mujyi wa Kigali bajya mu ntara.

---

Mu 2017 nibwo Col Ndamukunda yari ayoboye Ingabo z'u Rwanda zari mu butumwa bwa loni i Darfur. Muri uwo mwaka ni nabwo yazamuwe mu ntera ava ku ipeti rya Lieutenant Colonel agirwa Colonel.

Umuvugizi w'Igisirikare cy'u Rwanda, Lt. Col. Ronald Rwivanga, yemereye IGIHE ko Col Ndamukunda yitabye Imana. Gusa ntabwo yigeze atanga amakuru arambuye ku rupfu rwe.

Muri Nyakanga 2007, Col Ndamukunda wari ufite ipeti rya Majoro icyo gihe yahawe umudali w'ishimwe wiswe 'Combat Action Ribbon' kubera ibikorwa by'indashyikirwa bifitiye igihugu akamaro yakoze.

---