Category: Uncategorized

Perezida Kagame asanzwe ari Umuyobozi wa gahunda igamije gushishikariza ibihugu bya Afurika kongera ubushobozi bw'urwego rw'ubuzima mu bihugu byabo, kuko uru rwego rukibeshejweho cyane n'inkunga z'amahanga kandi ari urw'ingenzi mu iterambere ry'umugabane muri rusange.

Perezida Kagame witabiriye Inama y'Abakuru b'Ibihugu ya 34 y'Umuryango wa Afurika Yunze yatangiye kuri uyu wa Gatandatu, yasabye bagenzi be gufata ingamba zigamije guteza imbere urwego rw'ubuzima.

Ati “Ndifuza gukoresha uyu mwanya mu gushimangira akamaro ko gutera inkunga ubuvuzi bwa Afurika, cyane cyane muri ibi bihe by'icyorezo cya Covid-19. Tudafite urwego rw'ubuzima rukomeye muri buri gihugu, Umugabane wacu uzakomeza kwibasirwa n'ibyorezo”.

Umukuru w'Igihugu yongeyeho ko ibyo bigomba kujyana no guteza imbere Ikigo cya Afurika Gishinzwe kurwanya Indwara z'Ibyorezo (Africa CDC).

Ati “Dukwiye gukomeza ubushake bwo kongera ibyo dushyira mu rwego rw'ubuzima no kuzamura umusaruro ubiturukamo. Ndanasaba ko twongera ubushobozi bwa 'Africa CDC' kugira ngo igire ububasha kandi itange umusaruro”.

Perezida Kagame kandi yanatanze raporo igaragaza aho gahunda y'amavugurura y'inzego z'Umuryango wa Afurika Yunze Ubumwe igeze.

Yavuze ko muri rusange hari byinshi byo kwishimira byagezweho, ati “Hari intambwe twateye nko mu bikorwa byo kugarura amahoro, n'ubwo ingengo y'imari igishingiye ku nkunga ituruka hanze”.

Yongeyeho ko uku gushyira hamwe kwa Afurika kwatumye intego yo gushyiraho Isoko Rusange rya Afurika (AfCFTA) igerwaho.

Ati “Ibi ni byo byatumye tugera ku bikorwa bikomeye, birimo Isoko Rusange rya Afurika. Ndashimira Moussa Faki na komisiyo yari ayoboye ku bw'akazi k'intangarugero bakoze mu gihe cy'imyaka ine”.

Ku bijyanye n'aya mavugurura, Perezida Kagame yavuze ko hari ibitarabashije kugerwaho, birimo amavugurura ajyanye n'inzego z'ubutabera, Inteko Ishinga Amategeko y'Umuryango wa Afurika Yunze Ubumwe, ndetse n'imiterere ya Komisiyo”.

Yasabye Komisiyo nshya igiye guhabwa inshingano zo kuyobora Umuryango wa Afurika Yunze Ubumwe, kuzahera kuri ibi bibazo bigihari bigakemurwa vuba.

Perezida Kagame kandi yanifurije imirimo myiza Perezida Felx Tshisekedi wa Repubulika Iharanira Demokarasi ya Congo ugiye kuyobora Umuryango wa Afurika Yunze Ubumwe muri uyu mwaka, amusezeranya ko igihe cyose azakenerwa, azatanga umusanzu we.

Ijambo Perezida Kagame yagejeje ku bayobozi ba Afurika mu Nama ya 34 ya AU

Perezida Kagame yitabiriye Inama ya 34 y’umuryango wa Afurika Yunze Ubumwe

Ni Inama yabaye hifashishijwe ikoranabuhanga mu kwirinda ikwirakwira ry’icyorezo cya Coronavirus

Perezida Kagame yasabye ko ibihugu bya Afurika birushaho guteza imbere urwego rw’ubuzima

Perezida Kagame yavuze ko amavugurura y’Umuryango wa Afurika Yunze Ubumwe yagenze neza, ariko hari ibikeneye kunozwa

Perezida Kagame yishimiye amasezerano y’Isoko Rusange rya Afurika yatangiye gushyirwa mu bikorwa ku wa 1 Mutarama uyu mwaka

Iyi Nama yari yitabiriwe n’Abakuru b’Ibihugu batandukanye

Perezida Tshisekedi wa RDC agiye kuyobora AU muri uyu mwaka

Amafoto na Video: Village Urugwiro

Abana uyu mugabo ashinjwa gusambanya ni abo mu Kagari ka Rwimbogo mu Murenge wa Nyakaliro.

Amakuru y'uko uyu mugabo asambanya abana yamenyekanye kuri iki Cyumweru ahagana saa Munani z'amanywa ubwo umwana w'imyaka 13 yavaga mu rugo rwe ataka ko aribwa mu kibuno nyuma yo kumusambanya akamubabaza.

Ababyeyi b'uyu mwana ngo bahise bamubaza aho avuye n'icyo yabaye abasobanurira ibyo uwo mugabo yamukoreye, bitabaje abaturanyi uwo mwana avuga amazina menshi y'abandi bana akunda gusambanya ngo yabirangiza ngo abakiri bato akabaha imineke na avoka n'aho abakuze akabaha amafaranga.

Abana bose bagiye bahamagarwa bakabazwa aya makuru bose bemeye ko uyu mugabo akunze kubasambanya akababuza kubivuga kubera ibyo yabahaye.

Umunyamabanga Nshingwabikorwa w'Umurenge wa Nyakaliro, Muhigirwa David, yabwiye IGIHE ko uyu mugabo yamaze gutabwa muri yombi.

Yagize ati “Umwana w'imyaka 13 ni we wavuyeyo yamukomerekeje ari kubabara arabivuga. Twamuganirije atubwira ko yamurongoye mu kibuno ngo kandi hari n'abandi bana ajya abikora. Yahise atubwira amazina y'abandi bana tujya kubazana nabo turababaza barabyemera duhita tujya gufata wa mugabo.”

Yakomeje avuga ko mu makuru batohoje basanze uyu mugabo yari amaze umwaka afunguwe aho yari yarafungiwe n'ubundi icyaha cyo gusambanya abana b'abahungu, ubwo yafungagwa ngo yari yakatiwe imyaka icyenda.

Uyu mugabo wiyemereye ko amaze gusambanya abana b'abahungu barenga 20 mu mwaka amaze afunguwe, ngo yanavuze ko no muri gereza yajyaga asambanya bagenzi be.

Gitifu Muhigirwa yagize ati “Yatwemereye ko amaze gusambanya abana benshi kuva yafungurwa, aragereranya umubare akavuga ko nibura ari nka 20 mu gihe cy'umwaka ushize afunguwe. Gusa niba umuntu avuga ko ari nka 20 bashobora kuba barenga cyane kuko ntiwamwizera.''

Yasabye ababyeyi gukurikirana abana babo bakamenya aho baba bagiye ngo kuko abenshi bamusangaga mu rugo iwe.

Ati “Turabasaba gukurikirana abana babo bakamenya aho baba bagiye kuko abenshi bamusangaga aho yabaga, ni ahantu hakorerwaga ibikorwa by'ubuhinzi rero kuko ari umugabo utari ufite umugore ababyeyi babonaga abana babo bajyayo ntibasobanukirwe. Turabasaba kwita ku burere bw'abana babo bakamenya aho biriwe nabo bari kumwe. Twari tumenyereye ko abakobwa aribo bafatwa ku ngufu none n'abahungu bisigaye ari uko rero ni ukubitaho.”

Umugabo ukekwaho gusambanya abana yafungiwe kuri Sitasiyo ya RIB ya Karenge mu gihe iperereza rigikomeje ngo hamenyekane abana bose b'abahungu amaze gusambanya.

Mu mwaka ushize mu Karere ka Gasabo na ho havuzwe inkuru y'umusore w'imyaka 19 watawe muri yombi akekwaho gusambanya abana b'abahungu 17 mu bihe bitandukanye.

Mu Ukuboza 2020, Urukiko rwisumbuye rwa Gasabo rwategetse Ubushinjacyaha gukoresha ibizamini by'ubuzima bwo mu mutwe bw'uwo musore ngo harebwe niba nta kibazo afite.

Inama y'Abaminisitiri yateranye mu Cyumweru gishize, yanzuye ko Umujyi wa Kigali ukurwa muri Guma mu rugo guhera kuri uyu wa Mbere tariki 8 Gashyantare 2021, nyuma y'ibyumweru bitatu serivisi zose zihagaze kugira ngo hahashywe ubwiyongere bw'ubwandu bwa Coronavirus.

Mu kiganiro cyatambutse kuri RBA, Minisitiri Shyaka yavuze ko imyitwarire yaranze Abanya-Kigali muri iyi minsi ishize bari mu rugo, yatumye umubare w'abandura ugabanyuka ari nacyo cyahereweho gahunda ya Guma mu rugo ikurwaho.

Icyakora, Prof Shyaka yavuze ko icyorezo kitarangiye, bityo ko ubwirinzi budakomeje Abanya-Kigali bashobora kwisanga basubiye mu rugo.

Ati 'Ejo Guma mu rugo izaba irangiye ariko Covid-19 ntabwo irangiye. Amabwiriza ya Covid-19 agira umumaro kuko abaturage bayagizemo uruhare. Uko tugenda twubahiriza amabwiriza neza, ni ko tugenda dutsinda igisa nka Guma mu rugo, byagenze neza ariko hari ahakiboneka utwo dutotsi.'

Yakomeje agira ati 'Twitware neza nk'abantu tugifite ikibazo cy'icyorezo, nubwo bitewe n'intambwe tumaze gutera mu rwego rwo kugabanya ubukana bwacyo ariko Covid-19 iracyahari. Icyo nasaba ni uko Abanyarwanda bakomeza umurego mu kwirinda icyorezo mu kumenyekanisha no kwirinda amabwiriza yo kwirinda.'

'Turabizi abantu bakeneye kujya ku mirimo ariko tuzirikane aho tujya gukorera dushyiramo ka kanya. Ntabwo twifuza ko nyuma y'ukwezi dusubira mu rugo kuko twahuriye ahantu hahurira abantu benshi kwirinda bikatunanira […] Tutaza kumva bavuga ko hari za restaurants zatangiye kwakira abantu. Twibukiranye umunsi w'ejo utaba umunsi utarabayeho mu mateka yacu wo guhana cyane. Ntabwo twifuza guhana Abanyarwanda.'

Umunyamabanga wa Leta muri Minisiteri y'Ubuzima Ushinzwe Ubuzima bw'Ibanze, Dr. Mpunga Tharcisse, yavuze ko mu byumweru bitatu bishize, umubare w'abandura Covid-19 wagabanyutse ku buryo bugaragara.

Yatanze ingero nk'aho ubwo Guma mu rugo muri Kigali yatangiraga, ku munsi handuraga abantu bagera kuri 200, ubu ku munsi handura abari hagati ya 50 na 60.

Mu barwayi bose, icyo gihe hakiraga abantu bagera kuri 50 ku munsi, none ubu hakira abagera kuri 430. Muri iyo minsi nabwo ku munsi hapfaga abantu hafi icumi, kuri ubu bagera kuri batatu ku munsi.

Ati 'Ibyumweru bitatu bidusigiye akanya ko guhumeka kuko iyo urebye imibare iragenda igabanyuka, ibyo bigaha inzego z'ubuzima guhumeka no kongera kwitekerezaho neza kugira ngo bafashe ba bantu barwaye.'

Icyakora, Dr Mpunga yavuze ko kuba hari abarenga ku mabwiriza yo kwirinda ari ikibazo gikomeye, kuko bashobora kuba icyuho cyo kwiyongera k'ubwandu.

Ati 'Ni ikibazo iyo abantu batubahiriza ingamba, baba bafite ibyago byo kwandura. Ni impungenge ku gihugu kuko byongera akazi bikadushyira no ku gitutu cyo gufasha abantu rimwe na rimwe n'ibikoresho bikaba bike iyo babaye benshi.'

Umuvugizi wa Polisi y'u Rwanda, CP John Bosco Kabera, yavuze ko nubwo imibare y'abandura ikomeje kugabanyuka, hari umubare munini w'abarenga ku mabwiriza kandi bitemewe.

Yavuze ko mu byumweru bitatu bishize, abantu bagera mu bihumbi 180 bafashwe mu gihugu barenze ku mabwiriza. Abantu basabye impushya zo kuva mu rugo bagera ku bihumbi 300 ariko abazemerewe bagera ku bihumbi 230.

Yavuze ko hari n'abagiye bafatirwa mu tubari bagera ku bihumbi 60, abafashwe bari mu birori, mu nsengero n'ahandi hatemewe, bigaragaza ko hakiri uguteshuka ku ngamba.

Ati 'Birumvikana ko isomo rikomeye hari abantu badohotse ariko bigaragazwa n'imibare y'abantu bacyandura […] Dufite akazi gakomeye ariko abaturage bumve ko atari inzego z'umutekano gusa n'inzego z'ibanze gusa, nabo bumve ko babifitemo uruhare.'

Yavuze ko hashize icyumweru hatangajwe amabwiriza y'uburyo ingamba zo kwirinda Covid-19 zizubahirizwa muri Kigali guhera kuri uyu wa Mbere, avuga ko uzabirengaho inzego z'umutekano zitazamwihanganira.

Inama y'abaminisitiri iyobowe na Perezida Kagame yateranye ku wa 2 Gashyantare, yafashe imyanzuro igaragaza ingamba zizakurikizwa kuva tariki ya 8 kugeza ku wa 22 Gashyantare 2021.

• Ingamba zihariye zizubahirizwa mu Mujyi wa Kigali

a. Ingendo zirabujijwe guhera saa Moya za nimugoroba (7:00Pm) kugeza saa Kumi
za mu gitondo (4:00Am).

b. Abakozi ba Leta bazakomeza gukorera mu rugo, kereka abatanga serivisi z'ingenzi zibasaba kujya aho basanzwe bakorera.

c. Ibikorwa by'inzego z'abikorera byemerewe kongera gukora ariko buri rwego rurasabwa gukoresha abakozi b'ingenzi.

d. Abikorera barasabwa gukoresha abakozi batarenze 30% by'abakozi bose, abandi bagakorera mu rugo ariko bakagenda basimburana. Amasoko n'amaduka (markets and malls) azafungura ariko hajye hasimburana umubare utarenze 50% by'abacuruzi b'ingenzi bemerewe kuyakoreramo. Ibikorwa byose byemerewe gukomeza bizajya bifunga saa Kumi n'imwe za nimugoroba (5:00Pm).

e. Amashuri yose (yaba aya Leta n'ayigenga) harimo na za kaminuza azakomeza gufunga.

f. Ingendo hagati y'Umujyi wa Kigali n'Intara ndetse n'uturere dutandukanye tw'igihugu zirabujijwe, kereka ku mpamvu za serivisi z'ingenzi cyangwa iz'ubukerarugendo. Ba mukerarugendo bagomba kubanza kwipimisha COVID-19. Icyakora imodoka zitwaye ibicuruzwa zizakomeza gukora mu gihugu hose ariko ntizitware abantu barenze babiri.

g. Ingendo mu modoka rusange cyangwa mu binyabiziga by'abantu ku giti cyabo ziremewe mu Mujyi wa Kigali. Imodoka zitwara abantu mu buryo bwa rusange (za bisi) zemerewe gutwara abantu batarenze 50% by'umubare w'abantu zagenewe gutwara. Abatwara za bisi barasabwa kugenzura ko abagenzi bahana intera kandi bagatwara gusa abambaye agapfukamunwa.

h. Moto n'amagare byemerewe gutwara abagenzi. Abatwara moto n'amagare barasabwa kubahiriza amabwiriza y'isuku buri gihe.

i. Inama zihuza abantu imbonankubone (physical meetings), ibirori n'amateraniro rusange birabujijwe.

j. Ahantu ho gukorera siporo, imyitozo ngororamubiri n'imyidagaduro hazakomeza gufunga. Kogera muri pisine (swimming pool) birabujijwe. Icyakora abantu bacumbitse muri hoteli bemerewe kogera muri pisine ya hoteli bacumbitsemo ariko berekanye ko bipimishije COVID-19. Siporo ikozwe n'umuntu ku giti cye iremewe hagati ya saa Kumi n'imwe na saa Tatu za mu gitondo (5:00 Am-9:00Am).

k. Resitora na café zizajya zitanga gusa serivisi zo kugeza ku bantu ibyo bakeneye batahana (Take away).

l. Utubari tuzakomeza gufunga.

m. Insengero zizakomeza gufunga.

n. Ikibuga Mpuzamahanga cya Kigali kizakomeza gukora. Abagenzi bose baza mu Rwanda bagomba kuba bafite icyemezo cy'uko bipimishije COVID-19 (PCR test) amasaha 72 mbere y'uko bahaguruka. Abagenzi bava mu Rwanda na bo bagomba kubanza kwipimisha COVID-19. Abagenzi bose binjira mu Rwanda bahita bishyira mu kato mu gihe cy'iminsi 7, icyo gihe cyarangira bakipimisha COVID-19 (PCR test).

0. Ibikorwa by'Ubukerarugendo bizakomeza hubahirizwa amabwiriza yo kwirinda COVID-19. Muri ibyo bikorwa harimo amahoteli, abashinzwe kuyobora ba mukerarugendo (tour operators) na serivisi zo gutwara ba mukerarugendo. Ba mukerarugendo n'ababafasha bagomba kumenyesha RDB gahunda y'ingendo zabo.

p. Umubare w'abitabira ikiriyo ntugomba kurenza abantu 10 icyarimwe. Imihango yo gushyingura ntigomba kurenza abantu 15.

q. Ibikorwa by'imikino y'amahirwe bizakomeza gufungwa.

Minisitiri w’Ubutegetsi bw’Igihugu, Prof Shyaka Anastase, yaburiye abatuye Kigali ko baramutse bitwaye nabi mu kwirinda Covid-19 bashobora gusubira muri Guma mu rugo

CP John Bosco Kabera yasabye Abanya-Kigali kurushaho kubahiriza ingamba zo kwirinda Covid-19 guhera kuri uyu wa Mbere

Dr Mpunga Tharcisse yavuze ko mu gihe abantu badohotse ku ngamba zo kwirinda, bishyira igitutu ku nzego z’ubuvuzi

Kuri uyu wa Gatandatu tariki ya 6 Gashyantare 2021 nibwo iyi miryango miryango yashyikirijwe amata n'imigati.

Litiro 5800 z'amata nizo zahawe imwe mu miryango itishoboye ifite abana bari munsi y'imyaka itanu yari yarahawe ibiryo muri gahunda ya Guma mu rugo kugira ngo abana bayivukamo batazarwara indwara ziterwa n'imirire mibi.

Umuryango wabwaga amata bitewe n'ingano y'abana bari munsi y'imyaka itanu ufite.

Bamwe mu bagize iyi miryango babwiye IGIHE ko bishimye cyane kuba bahawe amata kuko azatuma abana babo batarwara bwaki.

Afisa Mukandayisenga wo mu Kagari ka Biryogo yagize ati 'Aya mata aramfasha kongera imirire myiza y'umwana no mu bijyanye no kubyiruka kwe dukurikije n'ibihe turimo kandi ndabashimiye cyane kuko hari byinshi bangabanyirije bitewe n'uko no kumubonera icyo kurya byangoraga cyane.'

Uwitwa Kayitesi Scovia yavuze ko ashimira Leta yabafashije ikabaha amata y'abana kuko baba bayakeneye mu bihe nk'ibi.

Ati ' Ndashimira leta ibashije kudufasha ikaduha amata, nubwo bampaye Litiro imwe iri bumfashe kuko ndaza kumuvangira mu gikoma iminsi ibe yicuma.'

Umuyobozi ushinzwe ubuzima mu Karere ka Nyarugenge, Nyagahinga Jean de Dieu yavuze ko litiro 5800 arizo zahawe imiryango yo muri aka Karere ifite abana bari munsi y'imyaka itanu.

Ati ' Amata ni ikinyobwa cyiza gifite intungamubiri ni nayo mpamvu imiryango yari yahawe ibiryo ifite abana bari munsi y'imyaka itanu yayahawe kugira ngo ayifashe kugira ngo abana batazarwara indwara zituruka ku mirire mibi cyane cyane muri ibi bihe turimo.'

Yibukije ababyeyi guha abana aya mata kuko azabafasha kutarwara indwara ziterwa n'imirire mibi.

Muri iki gikorwa buri muryango wanahabwaga ipaki y'umugati abana bazajya bifashisha bari kunywa ayo mata.

Scovia yishimiye kuba yahawe amata n’umugati by’umwana we uri munsi y’imyaka itanu

Umuyobozi w'Ubuzima mu Karere ka Nyarugenge, Nyagahinga Jean de Dieu ashyikiriza umubyeyi amata n’umugati

Buri murenge wo mu Karere ka Nyarugenge wahawe amata n’imigati