Webrwanda Backend

Category: Uncategorized

  • Kamonyi-Rukoma: Abagabiwe Inka babwiwe ko kuyigurisha ari nko 'Kunyereza umutungo wa Leta' #rwanda #RwOT

    Ku gicamunsi cy'uyu wa 23 Gashyantare 2021, imiryango 10 yo mu Murenge wa Rukoma yagabiwe Inka muri gahunda ya 'Girinka'. Abagabiwe, mu butumwa bahawe, basabwe kuzifata neza zikabateza imbere, bagahindura ijibereho, ikaba myiza kurusha. Babwiwe kandi ko uzahirahira ayigurisha azafatwa nk'uwanyereje umutungo wa Leta.

    Mukangoga Drocella, ni umubyeyi utiye mu Kagari ka Taba akaba umwe mubagabiwe. Yabwiye intyoza.com ko ashimishijwe no kuba agabiwe Inka, ko agiye guhindura imibereho ye ndetse n'umuryango ukamererwa neza.

    Ubwo zagezwaga Mukiryamo cy'Inzovu, buri umwe mu bagabiwe yari afite ikiziriko ariko kandi n'amashyushyu.

    Avuga ko ubu ari ubukungu butashye mu rugo, ko kandi ari agaciro gakomeye kuri we n'umuryango bakesha Perezida Kagame. Ashimangira ko iyi nka izamuha ifumbire agahinga akeza, akihaza akanasagurira isoko, ko izamuha amata ndetse n'amafaranga.

    Nyirishema Patrice, ku myaka 60 y'amavuko avuga ko nta kuntu atakwishima kuba agabiwe inka ngo kuko ni ubwa mbere kuva yavuka iwe hatashye inka. Avuga ko agiye kujya ayifata neza akagerageza kuyiba hafi kugira ngo amenye ubuzima bwayo nayo imukamirwe, ikamirwe abana, imuhe ifumbire ndetse n'amafaranga bityo batere imbere.

    Inka ziri Mukiryamo cy'Inzovu.

    Nkurunziza Jean de Dieu, Umunyamabanga Nshingwabikorwa w'Umurenge wa Rukoma yabwiye umunyamakuru ko abahawe izi nka ari abaturage bari ku rutonde rw'abagombaga kuzihabwa muri gahunda ya Girinka, babarizwa mu cyiciro cya mbere cy'Ubudehe( ibyiciro byacyuye igihe).

    Gitifu Nkurunziza, avuga ko nta wagabiwe ugomba gufata nabi iyi nka cyangwa se ngo ayigurishe, ko kuyigurisha ari nko kunyereza umutungo wa Leta. Ati' Gufata nabi cyangwa kugurisha izi nka za Girinka ni ukwangiza gahunda ya Leta kandi ntabwo twabyihanganira. Umuntu ugurishije iriya Nka ni nko kunyereza umutungo wa Leta. Nutangiye kubikinisha duhagarara ahirengeye iyo tugize Imana tukamenya amakuru'. Avuga kandi ko Leta iba yatanze amafaranga menshi kuri izi Nka ku bwo gushakira ubuzima bwiza abaturage, ko rero uyu ari umutungo wa Leta udakwiye kwangizwa.

    Akomeza avuga ko mu bihe bishize hari abaturage ndetse na bamwe muri Komite zishinzwe iyi gahunda bagiye bafatwa bagahanwa. Avuga kandi ko iyo inka itashye mu rugo rw'umwe mu baturage muri uyu murenge ari ubukire buba bwinjiye, buje guhindura imibereho myiza y'abaturage kuko abana n'abakuru babona amata, bakabona ifumbire ndetse n'amafaranga bityo umuryango mu buryo bugari ugatera imbere.

    Gutombora nibwo buryo bwiza bwakoresheje ku bagabiwe.

    Kuva mu mwaka wa 2006, mu Murenge wa Rukoma hamaze gutangwa inka 1085 muri gahunda ya Girinka. Mu muhigo w'uyu mwaka, bahize gutanga inka 91, ubu bamaze gutanga 46. Abazigabiwe basabwa kuzifata neza no kwibuka ko kugabirwa bisobanuye kuzamuka mu mibereho, ariko kandi no kwibuka kwitura. Inka zagabiwe aba baturage zose zirahaka, ifite amezi make ni ane nkuko ushinzwe ubworozi mu karere ka Kamonyi yabitangaje, akanasaba abagabiwe kumenya ko aya ari amahirwe bagize, bakwiye kutayapfusha ubusa, ahubwo bakayafata, bakayakomeza bakagira ubuzima buteye imbere.

    Munyaneza Theogene / intyoza.com

    Source : http://www.intyoza.com/kamonyi-rukoma-abagabiwe-inka-babwiwe-ko-kuyigurisha-ari-nko-kunyereza-umutungo-wa-leta/

  • Ubuhamya:N’ubwo bamaze imyaka 11 batarabyara,Muhire na Gen baracyakundana #rwanda #RwOT

    Pastor Muhire Faustin umushumba mu itorero Joshua Harvest n’umufasha we Pastor Gen Muhire bamaze imyaka 11 bategereje urubyaro, baracyakomeje gukorera Imana kandi bafite ibyiringiro ko Uwiteka azabaha abana. Banaboneraho kugira inama abafite icyo kibazo gukomeza gutegereza gukora kw’Imana bihanganye kandi bakundanye.

    Pstor Muhire yavukiye mu muryango ukijijwe bituma mu busore bwe adata umurongo w’umuco n’ubupfura. Ariko ibyo byose yabikoraga ataragira amahitamo ye. Mu mwaka wa 2000 nibwo Imana yamuganirije yiyegurira Imana akomeza ubuzima bw’agakiza kugeza aho yinjiye mu ivugabutumwa aba Pasiteri.

    Pastor Gen we yakuze arerwa na se kuko mama we yapfuye akiri mutoya ntiyamumenye, ibi byatumye akurira ku gitsure cya se bituma atamenya ubuzima bwo hanze cyane kuko n’aho yakuriye akajya mu kazi, se yari azi amasaha agomba kugendera no kugarukira. Igihe kimwe yahuye n’umupasiteri atangira kuza mu rugo rw’iwabo arababwiriza niho Gen yakirijwe yakira Yesu nk’Umwami n’Umukiza w’ubugingo bwe.

    Igihe cyarageze Pastor Muhire n’umufasha we Pastor Gen barahura baramenyana ndetse biyemeza gushinga urugo barashyingirwa imbere y’amategeko n’imbere y’Imana. Bakimara kugera mu rugo ibyo bari biteze ntabwo byosea ariko babibonye nk’uko Muhire abisobanura:

    Ati: 'Mu byo twari twiteze ntitubibone ni urubyaro kuko mu myaka 11 tumaranye ntiturabyara. Imyaka 3 ya mbere ntabwo nakunze kuba mu rugo kuko nari ndi mu masomo i Nairobi . Mubyukuri twumvaga bitaremereye cyane. Mu myaka yakurikiyeho ikibazo cyaje kuremera kiremerejwe n’abantu, aho twahuraga n’abantu tudaherukana bakatubaza abana tumaze kubyara, undi ati 'Ese byagenze bite, mwarifungishije mwanze kubyara murashaka kuba abanyamugi? Ntabwo ari ikintu cyoroshye ariko iyo ufite Imana ugenda urushaho gukomera nk’uko Bibiliya ivuga ko urubyaro ari umwandu uva k’Uwiteka, nasobanukiwe ko kubyara atari ubushake bwo guhura k’umugabo n’umugore, ahubwo ari ubushake bw’Imana'.

    Ku ruhande rwa Pastor Gen aragira ati: 'Kenshi impamvu ikibazo gikomera ku buzima bw’abantu, ni uko baba badafite icyo bavuganye n’Imana. Ikintu cyaje kungora ni ukwakira ko umuntu ashobora kubyara umwana akamuta, undi akamushaka akamubura. Ibyo birangora kubyiyumvisha ariko kuko nkijijwe mbiharira Imana.

    Impamvu rero twe bitaturemereye cyane, ni uko Imana yavuganye natwe, njyewe yavuganye na njye ku giti cyange nkiri umukobwa, ivugana n’umutware wanjye ku giti cye akiri umusore Imana imubwira ko azabanza umwana w’umuhungu akitwa Joshua. Nanjye Imana yabimbwiye nkiri umukobwa ntafite fiancé, imbwira ko nzabyara umwana w’umuhungu akazitwa Joshua. Tukimara guhura numvaga ngomba gutwita muri uko kwezi nibwo namubwiye icyo Imana yambwiye, na we arambwira twumva birahuye'.

    Uyu muryango uhamya ko n’ubwo batarabona urubyaro umuryango wabo ubaba hafi nk’uko Gen abivuga:'Umuryango wacu cyangwa ababyeyi aho kutubaza ibintu byinshi baradusengera kuko barakijijwe. Naho ku ruhande rw’incuti zacu, twirinda kubahisha niba tugiye kwa muganga kureba aho ikibazo kiri, iyo tuvuyeyo tubabwira uko basanze bimeze aho gukekana hagati yacu ahubwo tugategereza Imana'.

    Pastor Muhire Faustin aragira ubutumwa atanga ku bantu bahuye n’ikibazo cyo gutinda kubona urubyaro agira ati: 'Nabagira inama yo gukomeza gukundana kuko njyewe nkunda Gen ntabwo namukunze kugira ngo azampe abana, uyu ni umuntu uza kumfasha gusohoza umugambi w’Imana muri ubu buzima kandi umugambi w’Imana urenze kubyara, urenze kubaka amazu, urenze gukora business. Ibi bindi biza byiyongera ku mugambi w’Imana, ariko kubaho mu buzima bwubahisha Imana nicyo kintu cy’ingenzi. Nababwira ngo bakundane, bashyigikirane, bomorane, ntibemerere icyo ari cyo cyose kiza kubashengura umutima kuko iyo abantu basezerana biyemeza kubana mu bibi no mu byiza, babyaye batanabyaye'.

    Pstor Gen we agira inama abantu batinze kubona urubyaro ati: 'Igisubizo ni kimwe ni ugusenga. Iyo usenga wumva ijwi ry’Imana kandi iraguhumuriza kandi mwibuke ko ijambo ry’Imana rivuga ngo Imana ibana natwe mu makuba no mu byago kuko Imana ntijya itujya kure ahubwo Ibana na twe'.

    Source: nkunda gospel

    [email protected]

    Source : https://agakiza.org/Ubuhamya-N-ubwo-bamaze-imyaka-11-batarabyara-Muhire-na-Gen-baracyakundana.html

  • MINEDUC igiye guha inkunga ibigo bifite abanyeshuri biga babamo –

    MINEDUC izatanga inkunga y’amafaranga y’u Rwanda angana na 25 000 kuri buri munyeshuri wiga aba mu kigo, nyuma y’uko hagaragajwe ko amashuri azahura n’ikibazo cy’amikoro mu gutunga abanyeshuri.

    Ku ruhande rw’abayobozi b’ibigo, bo bavuga ko bibaye byiza ababyeyi bakongezwa amafaranga y’ishuri ku kigero kirenga 60%, kubera ko abanyeshuri bagiye kumara amezi atanu biga, mu gihe ubusanzwe bamaraga atatu cyangwa abiri.

    Ikindi kandi ngo basabwa kwishyura amazi menshi ndetse n’ibindi bikoresho byifashishwa mu guhangana n’ikwirakwira rya Coronavirus.

    Abayobozi b’amashuri bamwe muri Kigali, bavuga ko byibura ababyeyi bagomba kongeraho amafaranga angana n’ibihumbi 49000 Frw cyangwa 35000 Frw kugira ngo babashe gutunga abanyeshuri mu mezi abiri asigaye.

    Umuyobozi wa Kagarama Secondary School iherereye mu mujyi wa Kigali, Sam Nkurunziza, yabwiye Rwanda Today ko iyi nkunga bahawe na MINEDUC izabafasha mu kugabanya ibibazo by’amikoro nubwo itazabikuraho byose.

    Yagize ati “Iyi nkunga izoroshya umutwaro haba ku bigo ndetse no ku babyeyi, ariko ntabwo izakemura ibibazo byose by’amikoro ibigo by’amashuri bihura nabyo kubera ko igihembwe kizatinda. Igiciro cy’amafaranga twakoreshaga cyariyongereye.”

    Umuyobozi wa GS Rambura giherereye mu Karere ka Nyabihu, Etienne Mukeragabiro, yavuze ko iyi nkunga bemerewe na Minisiteri y’Uburezi ije kurokora ibigo by’amashuri, gusa asabako yakwihutishwa kugira ngo ibigo bibone uko bibaha ibyo bikeneye bikiri ku giciro cyo hasi.

    Kugeza ubu nta gihe kiratangazwa ibi bigo bizabonera inkuga gusa ku itariki 4 Gashyantare, MINEDUC yari yabwiye abayobozi b’ibigo by’amashuri kwandika bisaba iyi nkunga hakurikijwe umubare w’abanyeshuri bafite biga babamo.

    Ingengabihe Mineduc yashyize hanze mu Ukwakira umwaka ushize, ivuga ko igihembwe cya mbere ku mashuri yisumbuye n’icyiciro cya kabiri cy’abanza kizasozwa ku wa 2 Mata 2021 cyaratangiye mu Ugushyingo 2020, ni ukuvuga ko bazaba bamaze hafi amezi atanu ku mashuri.

    Abanyeshuri bazatangira igihembwe cya Gatatu ku wa 19 Mata 2021 kikarangira ku wa 9 Nyakanga 2021, nyuma y’uko bagize icyiruhuko cy’igihembwe cya kabiri kizava ku wa 3 Mata 2021 kikageza ku wa 15 Mata 2021.

    MINEDUC igiye gutanga inkunga y’ibihumbi 25000 kuri munyeshuri wiga aba mu kigo, kugira ngo yunganire ibigo by’amashuri kubagaburira

  • MINEDUC igiye guha inkunga ibigo bifite abanyeshuri biga babamo – #rwanda #RwOT

    MINEDUC izatanga inkunga y'amafaranga y'u Rwanda angana na 25 000 kuri buri munyeshuri wiga aba mu kigo, nyuma y'uko hagaragajwe ko amashuri azahura n'ikibazo cy'amikoro mu gutunga abanyeshuri.

    Ku ruhande rw'abayobozi b'ibigo, bo bavuga ko bibaye byiza ababyeyi bakongezwa amafaranga y'ishuri ku kigero kirenga 60%, kubera ko abanyeshuri bagiye kumara amezi atanu biga, mu gihe ubusanzwe bamaraga atatu cyangwa abiri.

    Ikindi kandi ngo basabwa kwishyura amazi menshi ndetse n'ibindi bikoresho byifashishwa mu guhangana n'ikwirakwira rya Coronavirus.

    Abayobozi b'amashuri bamwe muri Kigali, bavuga ko byibura ababyeyi bagomba kongeraho amafaranga angana n'ibihumbi 49000 Frw cyangwa 35000 Frw kugira ngo babashe gutunga abanyeshuri mu mezi abiri asigaye.

    Umuyobozi wa Kagarama Secondary School iherereye mu mujyi wa Kigali, Sam Nkurunziza, yabwiye Rwanda Today ko iyi nkunga bahawe na MINEDUC izabafasha mu kugabanya ibibazo by'amikoro nubwo itazabikuraho byose.

    Yagize ati 'Iyi nkunga izoroshya umutwaro haba ku bigo ndetse no ku babyeyi, ariko ntabwo izakemura ibibazo byose by'amikoro ibigo by'amashuri bihura nabyo kubera ko igihembwe kizatinda. Igiciro cy'amafaranga twakoreshaga cyariyongereye.'

    Umuyobozi wa GS Rambura giherereye mu Karere ka Nyabihu, Etienne Mukeragabiro, yavuze ko iyi nkunga bemerewe na Minisiteri y'Uburezi ije kurokora ibigo by'amashuri, gusa asabako yakwihutishwa kugira ngo ibigo bibone uko bibaha ibyo bikeneye bikiri ku giciro cyo hasi.

    Kugeza ubu nta gihe kiratangazwa ibi bigo bizabonera inkuga gusa ku itariki 4 Gashyantare, MINEDUC yari yabwiye abayobozi b'ibigo by'amashuri kwandika bisaba iyi nkunga hakurikijwe umubare w'abanyeshuri bafite biga babamo.

    Ingengabihe Mineduc yashyize hanze mu Ukwakira umwaka ushize, ivuga ko igihembwe cya mbere ku mashuri yisumbuye n'icyiciro cya kabiri cy'abanza kizasozwa ku wa 2 Mata 2021 cyaratangiye mu Ugushyingo 2020, ni ukuvuga ko bazaba bamaze hafi amezi atanu ku mashuri.

    Abanyeshuri bazatangira igihembwe cya Gatatu ku wa 19 Mata 2021 kikarangira ku wa 9 Nyakanga 2021, nyuma y'uko bagize icyiruhuko cy'igihembwe cya kabiri kizava ku wa 3 Mata 2021 kikageza ku wa 15 Mata 2021.

    MINEDUC igiye gutanga inkunga y’ibihumbi 25000 kuri munyeshuri wiga aba mu kigo, kugira ngo yunganire ibigo by’amashuri kubagaburira

    Source : http://igihe.com/amakuru/u-rwanda/article/mineduc-igiye-guha-inkunga-ibigo-bifite-abanyeshuri-biga-babamo

  • Umukunzi wa Cristiano Ronaldo ifoto ye yambaye ubusa buri buri yashituye benshi #rwanda #RwOT

    Georgina Radriguez, umunyamideli akaba n’umukunzi w’umukinnyi w’icyamamare, Cristiano Ronaldo hagiye hanze amashusho ye yambaye ubusa buri buri akaba yatunguye benshi.

    Uyu munyamideli bikaba bigaragara ko bari mu ifatwa ry’amashusho cyangwa amafoto ashobora kwifashishwa mu kwamamaza.

    Ni amashusho yafashwe yambaye ubusa buri buri aryamye ahasi ariko yikinze igikapu ku myanya y’ibinga, ni igikapu cyo mu bwoko bwa Gucci asanzwe uruganda asanzwe yamamaza.

    Nyuma y’ifatwa ry’aya mashusho akaba yatunguye benshi asangiza abamukurikira ifoto imwe yambaye ubusa.

    Georgina Radriguez, ubwo bari bamaze gufata aya mashusho akaba yaganiriye n’ikinyamakuru cyo muri Espagne, InStyle aho baganiriye byinshi ku buzima bwe.

    Yavuze ko mu buzima bwe akunda kubaho afasha abandi kuko azi ubuzima bubi icyo ari cyo.

    Ati'gufasha abantu nicyo kintu kishimisha mu buzima. Nzi icyo bisobanuye gutangira akantu gato ariko buri nyuma y’ukwezi ukagira icyo winjiza.'

    'Narakoze cyane, ubuzima bwanjye nabugize nk’igitambo ariko Isi yanyituye impano nziza. Umuryango mwiza.'

    Cristiano Ronaldo na Georina urukundo rwabo rwamenyekanye muri 2016, ubu babaka bafitanye umwana umwe ari we; Alan Martina

    Ifoto ya Georgina yambaye ubusa yatunguye benshi

    Cristiano Ronaldo na Georgina bakundana kuva muri 2016

    Source : http://isimbi.rw/siporo/article/umukunzi-wa-cristiano-ronaldo-ifoto-ye-yambaye-ubusa-buri-buri-yashituye-benshi

  • Kigali : Habonetse igisubizo ku bifuza kuvuga neza icyongereza mu gihe gito #rwanda #RwOT

    Uwayezu Theoneste uyobora ICT For All avuga ko bafite abarimu bo ku rwego rwo hejuru hakiyongeraho n’abanyamahanga cyane cyane mu biganiro mpaka, aba bose bakaba ari bo bafasha ababagana kunguka ubumenyi bwinshi mu rurimi kandi mu gihe gito. Mu kwigisha Icyongereza, bibanda cyane ku kuvugira mu ruhame uru rurimi. Ati “Twibanda kuri speaking (kuvuga ururimi) kandi biba byiza kuvuga uri kumwe n’abandi ngo ukosorwe unabigireho”.

    Uwayezu Theoneste yakomeje agira ati “Twabonye ko hari ikibazo mu mivugire n’imikoreshereze y’Icyongereza, nibwo twatangiye gahunda ya 'English for Business and Leaders', aho twigisha abantu Icyongereza mu kukivuga cyane cyane hagati ya 70 na 80 ku ijana tuzamura urwego umuntu avugaho Icyongereza kugira ngo wa mucuruzi ujya i Dubai, ujya mu Bushinwa, ujya muri Amerika atazakenera umuntu uzajya umusemurira”.

    Yavuze ko impamvu bibanda ku rurimi rw’Icyongereza ari uko rufatwa nk’ururimi rw’ubucuruzi, rukaba rukoreshwa ku isi hose. Ati “Noneho wa mukiliya uvuga icyo Cyongereza kuko tuvugishije ukuri Icyongereza ni ururimi rw’Ubucuruzi gikoreshwa ku isi hose wa mukiliya umugana bitazamugora kuvugana nawe, kimwe n’abayobozi bakamenya kugaragaza ibikorwa byabo mu Cyongereza, yaba abacuruzi cyangwa abayobozi mu gihe cy’amezi ane uba uri ku rwego rwo gutembera isi ufite ishema ryo kuba uzi kwandika no kuvuga Icyongereza neza'.

    Uwayezu akomeza asobanura ko bigisha n’abantu babasanze aho bari, urugero nk’abakozi bakaba bashobora kwishyira hamwe bakabigisha bari kumwe kandi bakabasanga aho bifuza. Avuga kandi ko bashobora kwigisha abantu bagendeye ku gihe babonera umwanya. Abifuza kwiga uru rurimi mu bizwi nka TOEFL na IELTS nabo aha bahakura igisubizo.

    Ukeneye kubagana no gusobanuza byinshi kuri serivisi batanga, wabahamagara kuri telefone ikurikira : 0788302964.

    Source : http://www.ukwezi.rw/mu-rwanda/Amakuru-anyuranye/article/Kigali-Habonetse-igisubizo-ku-bifuza-kuvuga-neza-icyongereza-mu-gihe-gito

  • Ibisobanuro by’ibyaha bine Idamange akurikiranyweho –

    Uyu mugore w’imyaka 42 y’amavuko yatawe muri yombi ku wa 15 Gashyantare 2021, nyuma y’iminsi akoresha imbuga nkoranyambaga agatangaza amagambo arimo gushishikariza abantu gukora imyigaragambyo imbere y’Ibiro by’Umukuru w’Igihugu.

    Mu bindi biganiro Idamange yanyuzaga ku shene ye ya YouTube, harimo n’aho yavugaga ko imibiri y’abazize Jenoside yakorewe Abatutsi iri mu nzibutso yabaye igicuruzwa.

    Uretse ibi kandi, ubwo Abagenzacyaha na Polisi bajyaga kumuta muri yombi, Idamange akekwaho kuba yarakubise umupolisi witwa CSP Silas Karekezi icupa mu mutwe akamukomeretsa bikomeye.

    Ashobora gufungwa imyaka irenga 10

    Muri rusange ibyaha bine Idamange akurikiranyweho, byose biramutse bimuhamye yakatirwa gufungwa imyaka iri hejuru ya 10 kuko nk’icyaha cyo guteza imvururu cyangwa imidugararo muri rubanda gihanishwa imyaka itari munsi y’icumi.

    Guteza imvururu cyangwa imidugararo muri rubanda ni icyaha giteganywa n’ingingo ya 204 y’itegeko No 68/2018 ryo kuwa 30/08/2021 mu gitabo cy’amategeko ateganya ibyaha n’ibihano mu Rwanda.

    Iyo ngingo ya 204 ivuga ko umuntu wese, mu ruhame, ukoresha imvugo, inyandiko z’ubwoko bwose, amashusho cyangwa ibimenyetso by’amoko yose, bimanitswe, bitanzwe, biguzwe cyangwa bigurishijwe cyangwa bitangajwe mu bundi buryo bwose, uwangisha rubanda ubutegetsi buriho, utera imvururu mu baturage ashaka ko basubiranamo cyangwa utera rubanda intugunda ashaka kubyutsa imidugararo muri Repubulika y’u Rwanda, aba akoze icyaha.

    Iyo abihamijwe n’urukiko, ahanishwa igifungo kitari munsi y’imyaka icumi ariko kitarenze imyaka cumi n’itanu.

    Ibindi byaha Idamange akurikiranyweho harimo icyo gutangaza amakuru y’ibihuha giteganywa n’ingingo ya 39 mu itegeko No 60/2018 ryo kuwa 22/8/2018 ryerekeye gukumira no guhana ibyaha bikoreshejwe ikoranabuhanga.

    Umuntu wese, ubizi, wifashishije mudasobwa cyangwa urusobe rwa mudasobwa atangaza amakuru y’ibihuha ashobora guteza ubwoba, imvururu cyangwa ihohotera muri rubanda cyangwa ashobora gutuma umuntu atakarizwa icyizere, aba akoze icyaha.

    Iyo abihamijwe n’urukiko, ahanishwa igifungo kitari munsi y’imyaka itatu ariko kitarenze imyaka itanu n’ihazabu y’amafaranga y’u Rwanda atari munsi ya miliyoni 1 Frw ariko atarenze miliyoni 3 Frw.

    Ikindi cyaha Idamange akurikiranyweho ni ugusenya, konona cyangwa gutesha agaciro urwibutso rwa Jenoside cyangwa ahashyinguye imibiri y’abazize Jenoside giteganywa n’ingingo ya 10 y’itegeko No 59/2018 ryo kuwa 22/08/2018 ryerekeranye n’icyaha cy’ingengabitekerezo ya Jenoside n’ibyaha bifitanye isano nayo.

    Umuntu ukora ku bushake kimwe mu bikorwa byo gusenya cyangwa konona urwibutso rwa jenoside cyangwa ahashyinguye imibiri y’abazize jenoside, gusenya cyangwa konona ibimenyetso by’urwibutso rwa jenocide cyangwa ahashyinguye imibiri y’abazize jenoside; gutesha agaciro urwibutso rwa jenoside cyangwa ahashyinguye imibiri y’abazize jenoside; aba akoze icyaha.

    Iyo ahamijwe n’urukiko gukora kimwe mu bikorwa bivugwa muri iyi ngingo, ahanishwa igifungo kitari munsi y’imyaka 10 ariko kitarenze imyaka 15 n’ihazabu y’amafaranga y’u Rwanda atari munsi ya miliyoni 1 Frw ariko atarenze miliyoni 2 Frw.

    Uyu mugore anakurikiranyweho gukubita cyangwa gukomeretsa ku bushake icyaha giteganywa kandi kigahanishwa n’ingingo ya 121 y’itegeko No 68/2018 ryo kuwa 30/08/2018 itegeko riteganya ibyaha n’ibihano muri rusange.

    Ivuga ko umuntu wese, abishaka, ukomeretsa undi, umukubita cyangwa umusagarira ku buryo bwa kiboko bubabaje aba akoze icyaha.

    Iyo abihamijwe n’urukiko, ahanishwa igifungo kitari munsi y’imyaka itatu ariko kitarenze imyaka itanu n’ihazabu y’amafaranga y’u Rwanda atari munsi y’ibihumbi 500 Frw ariko atarenze miliyoni 1 Frw.

    Iyo gukubita cyangwa gukomeretsa byateye indwara cyangwa kudashobora kugira icyo umuntu yikorera ku buryo budahoraho, igihano kiba igifungo kitari munsi y’imyaka 10 ariko kitarenze 15 n’ihazabu ya itari munsi ya miliyoni 3 Frw ariko atarenze miliyoni 5 Frw.

    Iyo byateye indwara idakira, ubumuga buhoraho butuma ntacyo yikorera, kubuza burundu urugingo rw’umubiri gukora no gutakaza igice cy’umubiri, igihano kiba igifungo kitari munsi y’imyaka 10 ariko kitarenze imyaka 15 n’ihazabu itari munsi ya miliyoni 3 Frw ariko atarenze miliyoni 5 Frw.

    Iyo gukubita cyangwa gukomeretsa byagambiriwe, byategewe igico, uwakoze icyaha ahanishwa igifungo kitari munsi y’imyaka 10 ariko kitarenze imyaka 15 n’ihazabu itari munsi ya miliyoni 3 Frw ariko atarenze miliyoni 5 Frw.

    Iyo gukubita cyangwa gukomeretsa byateye urupfu, igihano kiba igifungo kitari munsi y’imyaka 15 ariko kitarenze imyaka 20 n’ihazabu itari munsi ya miliyoni 5Frw ariko atarenze miliyoni 7Frw.

    Ubushinjacyaha nibumara gusuzuma dosiye ya Idamange nibwo buzafata umwanzuro wo kuyiregera urukiko ubundi rutangire imirimo yo kumuburanisha.

    Idamange akurikiranyweho ibyaha bine birimo icyo guteza imvururu cyangwa imidugararo muri rubanda

  • RwandAir igiye gutangira igerageza ry’uruhushya ruzerekana niba umugenzi yarabonye urukingo rwa Covid-19 –

    Ubu buryo bwatangijwe n’ishyirahamwe ry’ibigo by’ubwikorezi bwo mu kirere (IATA) bugamije gufasha ibihugu kugira icyizere cy’abantu byakira bityo bigafungura ikirere cyabyo, maze ibigo bikora ingendo zo mu kirere bikongera kubona inyungu.

    Ubu buryo bw’ikoranabuhanga buzajya bwerekana niba umuntu yarapimwe Covid-19 bikagaragara ko ntayo afite, ndetse mu gihe kiri imbere, byitezwe ko ubu buryo buzanajya bwerekana icyemezo cy’uko umuntu yakingiwe iki cyorezo, ku buryo mu gihe bitaba byarakozwe, uwo mugenzi ashobora kubuzwa kwinjira mu bihugu bizashyiraho amabwiriza yo kwinjirwamo gusa n’abikingiwe Covid-19.

    RwandAir yabaye ikigo gitangije ubu buryo ku Mugabane wa Afurika, aho iri gerageza rizakorerwa mu cyerekezo cyo kuva i Kigali werekeza i Nairobi muri Kenya. Iri gerageza rizamara ibyumweru bitatu, rikazaba muri Mata.

    Umuyobozi Mukuru wa RwandAir, Yvonne Makolo, yavuze ko bishimiye kuba ikigo cya mbere kuri uyu mugabane mu kugerageza ubu buryo bwa IATA.

    Yagize ati “Dutewe ishema ryo kuba ikigo cya mbere ku mugabane wa Afurika kigiye kugerageza uruhushya rw’ingendo, ruzatuma ingamba zo kurinda ubuzima ndetse n’imyiteguro twatangiye ikaba igamije kugarura icyizere cy’abagenzi.

    Umuyobozi wa IATA, Alexandre de Juniac, yavuze ko ibikorwa bya RwandAir ari urugero rwiza ku bindi bigo bitwara abantu mu ndege.

    Yagize ati “RwandAir ikomeje kwerekana urugero rwiza mu kuba ikigo cya mbere ku mugabane gitangiye iri gerageza. RwandAir yakomeje kwifashisha amakuru atangwa na IATA. Iri gerageza rizubakira kuri ibyo bikorwa kandi ni intambwe nziza itewe mu guhangana n’icyorezo cya Covid-19”.

    Iri koranabuhanga rizaba rikozwe ku buryo rishyirwa muri porogaramu z’ibigo by’indege bitandukanye.

    Urwego rw’ubwikorezi bwo mu kirere ni rumwe mu rwahungabanyijwe cyane n’ikwirakwira ry’icyorezo cya Covid-19, aho byitezwe ko uru rwego ruzahomba miliyari 38$ muri uyu mwaka, avuye kuri miliyari 118$ mu mwaka ushize, ndetse bikazasaba umwaka wa 2024 kugira ngo uru rwego ruzasubire ku bipimo rwariho mbere ya Covid-19.

    RwandAir izatangira gukoresha uburyo buzasuzuma niba umuntu atarwaye Covid-19 cyangwa yarahawe urukingo

  • Ruhango: Yasabye umugore ko baryamana, abyanze aramutema amusambanya ku gahato –

    Umugore wo mu Mudugudu wa Gitwa, Akagali ka Munini, Umurenge wa Ruhango, Akarere ka Ruhango, Intara y’Amajyepfo, yahamagawe n’umugabo basanzwe baziranye ngo aze amubwire bahurire mu gisambu cyo haruguru y’aho uwo mugore atuye.

    Ubushinjacyaha buvuga ko bahageze uwo mugabo yasabye umugore ko bakorana imibonano mpuzabitsina, uwo mugore arabyanga undi amukubita umuhoro yikubita hasi amusambanya ku gahato.

    Hari abagabo babiri bumvise umuntu atabaza, baza biruka ngo batabare. Uregwa yahise ava kuri uwo mugore yambaye ubusa, atemesha umuhoro umwe muri abo bagabo ku itako, mu nkokora no ku kirenge cy’ibumoso, undi na we aje kumufata amutema mu mutwe , ku kaboko no mu bitugu.

    Byarangiye uregwa atawe muri yombi, ashyikirizwa inzego zibishinzwe iperereza riratangira.

    Uregwa aramutse ahamwe n’ibyaha aregwa, yahanishwa igihano cy’igifungo cy’imyaka 15 ku cyaha cyo gusambanya ku gahato giteganywa kandi kigahanwa n’ingingo ya 134 y’itegeko riteganya ibyaha n’ibihano.

  • Huye : Hari inyamaswa ziri kwica amatungo y’abaturage…Ubuyobozi bubivugaho iki ? #rwanda #RwOT

    Mu kwezi k’Ukuboza umwaka ushize ni bwo uyu murenge wa Gishamvu watangiye kwibasirwa n’ibi bikoko birya amatungo y’abaturage. Nkubana Vianney, uyobora uyu Murenge avuga ko izi nyamaswa zirya aya matungo ziyasanze ku gasozi andi zikayasanga mu ngo.

    Impirimbanyi z’uburenganzira bw’inyamaswa zivuga ko mbere yo gutega no kwica izi nyamaswa hakwiye kubanza gukorwa ubushakashatsi.

    Abaturage bavuga ko igikoko kiri kurya amatungo yabo ari igikoko kinini. Mu mpera z’icyumweru gishize kishe ihene ya Nshimiyimana Alexis indi kirayikomeretsa.

    Nshimiyimana uvuga ko yakibonye agira ati 'Hari ku wa Gatanu saa kumi n’ebyiri n’iminota nka 40. Ihene zari zikiri ku irembo hariya, njya kumva numva ihene iratatse, ndasohoka njya hanze ndebye mbona imwe yikubise hasi, mbona ikintu kirirukanse, nakibonye inyuma. Ni ikintu kinini ubona gifite imbaraga.'

    Abaturage bavuga ko ibi bikoko bituruka mu bisi bya Huye. Iki gikoko nyuma yo kwica no gukomeretsa ihene ya Nshimiyimana Alexis, cyarakomeje kica intama ya Gabiro Bertin.

    Gabiro yumvise iki gikoko gihumira mu rugo rwe, arasohoka asanga cyamaze kwica intama yari aherutse kubanguriza. Ati 'Dukeneye ubufasha no kongererwa umutekano'

    Ibi bikoko nyuma yo guteshwa intama ya Gabiro, yashyizweho umuti wica. Mu ijoro ryakurikiyeho ibikoko byaragarutse birayirya hapfamo bibiri. Ibyapfuye ni ibikoko bimeze nk’imbwa, ndetse hari abaturage bemeza ko ari imbwa.

    Amatungo izi nyamaswa zariye, arimo ayo mu tugari twa Nyakibanda na Ryakibogo.

    Umunyabanga Nshingwabikorwa w’Umurenge wa Gishamvu Nkubana Vianney yabwiye Ukwezi ko izi nyamaswa zimaze kurya amatungo 41 ayapfuye ni 31.

    Ati 'Turakangurira abaturage, dufatanyije nabo bakubaka ibiraro bikomeye, kuko ikiraro cyubatse gikomeye ntaho igikoko cyabasha guca'

    Ikindi uyu muyobozi asaba abaturage ni uko bajya bacyura kare amatungo magufi baba baziritse ku gasozi.

    Dr Ange Imanishimwe, Umuyobozi w’umuryango utari uwa Leta wita ku binyabuzima, BIOCOOR avuga ko bakeka ko inyamaswa ziri kurya aya matungo ari imbwebwe.

    Ati 'Icyo kibazo twarakimenye. Ni inyamaswa zitwa shachal abandi bita imbwebwe. Mu karere ka Huye hari amashyamba nka arboretum n’ibisi bya Huye. Izo nyamaswa abantu bagiye bazihohotera bakazirukana aho zari zituye, zimwe rero zikomeza kuba muri ayo mashyamba'

    Dr Imanishimwe avuga ko izi nyamaswa ari indyanyama. Ngo ahantu zahoze zituye abantu bagiye bahafata bakahahinga, zisanga ziri kuba ahantu zidashobora kubona inyamaswa zo kurya.

    Nk’umushakashatsi mu bijyanye n’ibinyabuzima, avuga ko mbere yo gutega no kwinca izi nyamaswa hakenewe ubushakashatsi, bakamenya umubare w’izisigaye mu Rwanda kugira ngo zitazicwa zose zigashira mu gihugu.

    Ati 'Mu gihe haba hasigaye nk’eshanu gusa, zose zikicwa urusobe rw’ibinyabuzima rwazazikenera rukazibura'

    Ubuyobozi bw’inzego z’ibanze mu karere ka Huye buvuga ko inyamaswa ebyiri arizo bamaze kumenya ko zapfuye nyuma yo kurya ku ntama yari yashyizweho umuti wica.

    Abaturage b’umurenge wa Gishamvu mu mpungege bafite harimo no kuba ibi bikoko bishobora kuzageraho bikarya n’abantu ari na byo byatumye ubu basigaye bitwararika bagataha kare.

    Muyango Gaspard, izi nyamaswa ziherutse kwicira ingurube agira ati 'Ubu ntushobora kugenda nijoro, ntushobora kuryama ufite itungo mu rugo ngo umare nk’amasaha abiri utarabyuka ngo uge kureba. Nkatwe dufite amasambu hari hakurya, ntabwo ushobora kugoroberezayo'

    Umuyobozi w’Akarere ka Huye, Ange Sebutege asaba abaturage kujya batangira amakuru ku gihe mu rwego rwo kwicungira umutekano, akabizeza ko bazashumbushwa.

    Yagize ati 'Turihanganisha abagize ibyago tubizeza ko tuzabashumbusha, ariko no gukomeza kubasaba gukomeza gahunda zo kwiteza imbere'

    Mu mezi abiri ashize izi nyamaswa zimaze kurya amatungo 41, ayapfuye ni 31 arimo ihene 9, intama 6 n’ingurube 16. Izi nyamaswa mu kwica ihene n’intama ziyiruma ku ijosi no ku maguru, naho ingurube ziyiruma ku gikanu.

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/Huye-Hari-inyamaswa-ziri-kwica-amatungo-y-abaturage-Ubuyobozi-bubivugaho-iki