Category: Uncategorized

Ni abahinzi bibumbiye muri Koperative Coopthevigi (Cooperative du Thé Villagois de Gisakura), bagemura icyayi ku ruganda rugitunganya rwa Gisakura.

Aba bahinzi harimo abatangiye kugihinga mu mwaka wa 1973, barimo na bamwe bigeze kukirandura bagatera amashyamba kuko babonaga nta musaruro kibaha. Nyuma baje gusanga baribeshye bongera guhinga icyayi no kucyitaho bongera ubuso gihinzweho, kuri ubu kikaba kiri kubaha umusaruro ushimishije.

Umwe muri abo bahinzi ubimazemo igihe yitwa Kalisa Cyprien wo mu Murenge wa Ruharambuga. Yavuze ko yaje kuvumbura ko umusaruro w’icyayi uterwa n’uburyo umuhinzi yacyitayeho, bigatuma aza gufata umwanzuro wo kucyitaho no kugikorera, none kuri ubu kikaba gitumye abayeho neza.

Yagize ati “Natangiye guhinga icyayi mu mwaka wa 1973, icyo gihe ntabwo byari byiza cyane nk’ubu kuko gisigaye gifite inoti. Hari abagiye bakireka bagatera amashyamba kubera ko nta musaruro cyatangaga, kandi na bo ntabwo bakitagaho cyane. Nyuma yaho batangiye kutwigisha ibyiza byacyo, hari abongeye batema amashyamba barongera baragihinga kandi kiri kubaha umusaruro ushimishije.”

Yasobanuye ko kubera ubu buhinzi bw’icyayi, bwatumye abona inguzanyo zituma yiteza imbere binyuze mu kwagura ubuhinzi bwe ndetse no gukora irindi shoramari.

Yagize ati “Iyo nkeneye amafaranga, ndagenda kuri Sacco bakanguriza kuko baba bizeye ko nzabishyura bitangoye. Mfata hafi ibihumbi 80 Frw ku kwezi ku buso bwa hegitare mpinga, kandi ubu namaze kwiyubakira inzu nziza ntuyemo n’abo tubana.”

Amafaranga aturuka mu buhinzi bw’icyayi yatumye bamwe muri bo batangira indi mishinga irimo nko korora ndetse abanyamuryango ba Koperative ya Coopthevigi bose bishyura ubwisungane mu kwivuza ndetse bakigurira ubwishingizi bwa ‘Ejo Heza’.

Kabagwira Valérie wahawe inka muri uyu mwaka abikesha uburyo yita ku cyayi cye, yavuze ko byamuteye umuhate wo gukomeza gukorera icyayi cye.

Yagize ati “Narishimye cyane, ubu nanjye ngiye korora mbone umusaruro. Nzabonaho amata, ifumbire yo gufumbiza imyaka kandi byose biturutse ku buryo nita ku cyayi cyanjye.”

Mukarere Elina na we ati “Buri kwezi mbona ibihumbi 40 Frw, igihe maze mpinga icyayi cyaramfashije. Mfite akazi kanjye gahoraho, ndi umubyeyi w’abana batatu kandi icyayi cyamfashije kubarihira amashuri kugeza umwe muri bo anarangije kaminuza. Bampaye inka none nanjye noroje mugenzi wanjye kandi nanjye yanteje imbere kuko mbona ifumbire ndetse nabonye n’ikimasa ndakigurisha, amafaranga nkuyemo amfasha kwiteza imbere n’umuryango wanjye.”

Umuyobozi wa Koperative ya Coopthevigi, Nyiravuguzifa Drocella, yavuze ko gahunda yo gutanga inka ku bahinzi bahize abantu ituma abahinzi bose ba koperative bagira ishyaka ryo guhinga kinyamwuga no kwita ku mirima yabo, bityo umusaruro wa koperative ukiyongera muri rusange.

Iyi gahunda kandi inatuma abahinzi biteza imbere bakabona ahandi bakura amafaranga atari mu buhinzi gusa.

Yavuze ko muri uyu mwaka bafite intego yo gutanga inka esheshatu ku bandi banyamuryango kandi bakaba bafite icyizere cyo kuzatanga inka ku bahinzi bose b’iyo koperative mu myaka ya vuba.

Ati “Mu bahinzi dufitemo inka 30 zigenda zibyara zijya ku bandi bahinzi. Iyi gahunda yatangiye kuva mu mwaka wa 2017 kandi tugendera ku muntu ufite umurima mwiza kuko hari abagiye bakirandura bagatera amashyamba. Ubu twamaze koroza abantu babiri bo mu Mirenge ya Bushekeri na Ruharambuga. Turacyoroza abantu inka kuko esheshatu tugomba kuzitanga muri uyu mwaka.”

Ku ruhande rwa Yvan Munezero, Umunyamabanga Nshingwabikorwa w’Umurenge wa Bushekeri, yavuze ko umurenge wageze ku iterambere rikomeye bitewe n’ubuhinzi bw’icyayi, kuko cyatumye abawutuye biteza imbere.

Yagize ati “Badufasha muri byinshi, usanga kwishyura imisanzu ya mituweli ndetse n’iya Ejo Heza byoroha. Bituma abaturage babona akazi bakiteza imbere, ugasanga abana benshi bajya ku ishuri aho kwirirwa iwabo kandi bakaba bameze neza bariye.”

Coopthevigi igizwe n’abanyamuryango 978 barimo abagabo 633 n’abagore 345. Bose hamwe bibumbiye mu mashyirahamwe icyenda ahingira hamwe ku butaka buhuje.

Mu mwaka wa 2020, aba bahinzi babonye umusaruro w’icyayi ungana n’ibilo miliyoni 2.645.130 ukaba warabahaye inyungu y’amafaranga angana na miliyoni 606.635.530 Frw.

Aha ni ho Coopthevigi ihingira icyayi

Iyi koperative yamaze kwiyubakira inzu abanyamuryango bayo bakoreramo

Abagize koperative bagenda borozanya inka, mu rwego rwo kwiteza imbere

Batawe muri yombi kuri uyu wa mbere aho Polisi yabikoze ku bufatanye n’izindi nzego. Bose uko ari bane bakomoka mu Karere ka Rusizi ariko umwe ni we uhaba, babiri batuye mu Mujyi wa Kigali naho undi aba mu Karere ka Kamonyi.

Umuvugizi wa Polisi mu Ntara y’Amajyepfo, SP Theobald Kanamugire, yavuze ko amafaranga bari bagiye guha uwo muturage yari ibipapuro birengejeho inoti.

Yavuze ko bari bafite agasanduka karimo ibipapuro bisanzwe ariko hejuru barengejeho inoti y’impimbano isa nk’amadorali ya Amerika.

Ati “Bamubwiraga ko bingana n’amadorali ya Amerika ibihumbi 100. Uriya muturage bari bamubwiye ko bamuha ayo bitaga amadorali noneho we akabaha amafaranga y’u Rwanda ibihumbi 500 akaziyungukira agiye kuvunjisha.”

SP Kanamugire yavuze ko uwo muturage yahise abimenyesha inzego zitandukanye noneho zirakorana bahita bafatirwa mu cyuho.

Bose bahise bashyikirizwa Urwego rw’Igihugu rw’Ubugenzacyaha (RIB) kuri sitasiyo ya Kayenzi.

Yagiriye inama abaturage yo kujya bagira amakenga y’abaza bababwira ko bashaka kubagirira neza no kubungukira, kandi bakajya bihutira kubimenyesha inzego z’ubuyobozi n’iz’umutekano igihe bahuye n’abantu nk’abo.

Itegeko riteganya ibyaha n’ibihano muri rusange, rivuga ko umuntu wese, ku bw’uburiganya wigana, uhindura amafaranga y’ibiceri cyangwa inoti akoreshwa mu Rwanda cyangwa mu mahanga, aba akoze icyaha. Iyo abihamijwe n’urukiko ahanishwa igifungo kitari munsi y’imyaka itanu ariko kitarenze imyaka irindwi.

Naho umuntu wese wihesha umutungo w’undi, imari ye yose cyangwa igice cyayo mu buryo bw’uburiganya yiyitiriye izina ritari ryo cyangwa umurimo adafitiye ububasha cyangwa akizeza icyiza cyangwa agatinyisha ko hari ikibi kizaba, aba akoze icyaha.

Iyo abihamijwe n’urukiko ahanishwa igifungo kitari munsi y’imyaka ibiri ariko kitarenze imyaka itatu n’ihazabu y’amafaranga y’u Rwanda atari munsi ya miliyoni eshatu ariko atarenze miliyoni eshanu.

[email protected]

Ni telefone bari guhabwa n’ubuyobozi bw’iyo ntara kuko bari bamaze igihe bagaragaza ko bahura n’imbogamizi ntibabashe gukora akazi kabo neza kubera kutagira telefone zigezweho ndetse na murandasi (internet).

Guverineri w’Intara y’Amajyepfo, Kayitesi Alice, yabwiye IGIHE ko bazibahaye mu rwego rwo gusubiza ibyifuzo byabo no kugira ngo babashe kunoza akazi kabo.

Ati “Abakuru b’imidugudu bakomeje kugenda bagaragaza ko bakeneye ikoranabuhanga ribafasha gutanga amakuru kandi neza, ariko kandi ko bazitirwa n’amatelefone atabibemerera kuko hari igihe bakenera gufata amafoto no gukoresha internet ariko bikababera imbogamizi.”

Yakomeje avuga ko nyuma y’uko ba Mudugudu babisabye abayobozi batandukanye bagiye babasura, ku rwego rw’Intara hafashwe umwanzuro wo kubafasha kubona izo telefone hashakwa uko buri Muyobozi w’Umudugudu azahabwa telefone.

Ati “Ubu zagajejwe mu turere twose, igikorwa cyo kuzibaha kirimo gukorwa; ariko ikigambiriwe kuruta ibindi ni ukugira ngo babashe kunoza serivise basanzwe batanga baha abaturage, kunoza uburyo bw’amakuru batanga ndetse no kubafasha mu nshingano zabo z’akazi ka buri munsi.”

Bamwe mu bakuru b’imidugudu bamaze guhabwa izo telefone babwiye IGIHE ko bazakiranye yombi kuko bari bazikeneye cyane, kandi bagiye guhindura byinshi mu mikorere.

Umuyobozi w’umudugudu wa Nyarusange mu Karere ka Nyaruguru, Vuganeza Emmanuel, yavuze ko nk’umuntu uyobora umudugudu uri ku mupaka w’u Rwanda n’u Burundi izamufasha byinshi.

Ati “Mbere byatugoraga kuko twatangaga amakuru ku munwa gusa. Ubu amakuru yose nzajya mba nyafite ndetse mfite n’amafoto kuko mba ngomba gutanga amakuru y’aho duhurira ku Kanyaru.”

Ibi kandi byemezwa na Nyirahabimana Cartas uyobora Umudugudu wa Kinyinya mu Murenge wa Busanze mu Karere ka Nyaruguru, avuga ko agiye kurushaho kunoza akazi cyane cyane yihutisha amakuru.

Ati “Igiye kumfasha kunoza akazi kuko hari igihe nahuraga n’ikibazo ngomba gutangaho amakuru, ariko nahamagara ntibihute kubera kutumva uburemere bwacyo. Ubwo urumva ko ninjya mbaha amafoto bazajya babyibonera bakihuta bakaduha ubutabazi.”

Guverineri Kayitesi yavuze ko ubusanzwe ba Mudugudu bose bari barashyizwe mu buryo bwo guhamagarana batishyuye (user group) ariko kuri ubu telefone bari guhabwa zirimo internet y’amezi abiri, kandi bemeranyije n’ubuyobozi bw’uturere ko buzabafasha kujya bakomeza kubona internet kugira ngo akazi kabo gakomeze neza.

Yabasabye gukoresha izo telefone neza zikabafasha kunoza akazi kabo.

Ati “Murabizi ko amakuru menshi dukenera tuyakura ku mudugudu, twizeye rero ko raporo zabo zigiye kunoga kurushaho, ariko kandi bikabafasha no kurushaho kwegera abaturage no gutanga serivise koko nk’uko ikenewe no kubakorera ubuvugizi aho bikenewe.”

Mu Ntara y’Amajyepfo hose hari gutangwa smart phones 3501 zingana n’imidugudu yose ihaboneka.

Abayobozi bose b’imidugudu mu Majyepfo batangiye guhabwa telefone zigezweho

Ba Mudugudu bahawe smart phones bavuze ko zigiye kubafasha kunoza akazi

Guverineri Kayitesi mu gikorwa cyo gutanga smart phones kuri ba Mudugudu bo mu Karere ka Nyaruguru

Guverineri Kayitesi yasabye ba Mudugudu gukoresha izo telefone neza kugira ngo zibafashe kunoza akazi kabo

Igikorwa cyo gutanga izo telefone mu karere ka Nyaruguru cyitabiriwe n’inzego zirimo iz’umutekano

Umuyobozi wungirije ushinzwe iterambere ry’ubukungu mu Karere ka Nyaruguru Gashema Janvier ashyikiriza umwe mu ba Mudugudu Smart phone

[email protected]