Category: Uncategorized

Bruce Melodie ni umuhanzi watangiye umuziki by'umwuga mu mwaka wa 2011 ikibuga yinjiyemo impanga zari ebyiri zemewe Meddy na The Ben aho aba bahanzi babiri bari bamaze imyaka igera kuri itatu mu muziki. Nyamara nyuma y’ibyabaye mu minsi micye ishize, Bruce Melodie ugira amashyengo menshi, hari amajwi yasakaye avuga ko nawe ari umwe mu banyabigwi mu muziki akaba yariyunze kuri bakuru be yubaha bakaba batatu.

Munyakazi impanga ya Meddy na The Ben mu muziki

Ibi yabigarutseho mu kiganiro yagiranye na Isimbi Tv mu masaha macye ashize cyari kiyobowe n'umunyamakuru Murungi Sabin. Mu minsi micye ishize hasohotse amajwi y’uyu muhanzi yagiraga ati 'Sha man Emmy buriya rero igihe kirageze ko ibintu bisobanuka njyewe ibyo bibolu byawe ntabwo nabyumva kimwe nawe aba batipe banyu b’abasani nta kintu nta kimwe na kimwe cyakagombye gutuma ungereranya na bo kuko iki ni igihe cyanjye, erega ntabwo ari ibintu byo kwikina, kwikina ni ukwivuga ibigwi bitari byo umva impamvu ya mbere udakwiye kungereranya nabo.'

Akomeza asobanura impamvu ati “Aba batipe icya mbere cyo ni abanebwe, ni abanebwe ni abanebwe babi!. Abantu basohora akaririmbo kamwe mu mwaka icyamamare ndakora ubuse ngaho shaka nki kintu shaka ikintu kimwe mpuriyeho na bariya batipe, nta na kimwe habe habe. Njyewe mba numva binambabaje iyo uvuze ngo nkwi ngo runaka na runaka si nk’uriya muniga wabo wirirwa abavugira kuri instagram uriya sha uhm sha nani yirirwa abavugira kuri instagram, yiririrwa asakuza aranabavugira yewe yewe diaspora, si instagram nanjye nkagira indi hari umunsi nawe nzabyuka nkahita murangiriza gahunda nawe nk’ukuntu yirirwa araburiza abandi.'

Bruce Melodie wemera ko amajwi amaze iminsi acicikana ari aye

Aya majwi akimara kujya hanze byahise byemezwa ko yavugaga Meddy na The Ben. Ku ruhande rwe mu kiganiro yagaragaje ko byamutunguye kumva ikiganiro yagiranaga n'umuntu witwa Emmy mu mwaka wa 2017 hari n’aho avuga 2018 cyaragiye hanze kandi bwari ubutumwa buri hagati y'abantu babiri bugaherezwa abanyarwanda by'umwihariko abakunzi b'umuziki bigafata intera ihambaye nk’iyo byafashe maze abantu harimo n'inararibonye bagafata umwanya wo kumwambika urubwa batabanje no kumubaza.

Nambitswe urubwa ariko wacika njye nyamara ntiwacika Imana

Ikindi hari n'abahanzi batarava mu muziki bamwe muri bo banabarizwa muri Diaspora batigeze biyumva bagafata umwanya wo kumva ko yavuze bakuru be babiri Meddy na The Ben asa n’ugaragaza ko aribo kuri ubu ageraranwa nabo kuko abo bandi batiyumvise bumvise abo bamushyira mu rwego rumwe nabo.

Bruce Melodie avuga ko yakuyemo isomo kandi yahaboneye inshuti n'umwanzi binamwereka ishyari n'urwango abantu bamwe bamufitiye ati 'Njye umutipe yarambwiye ngo abahanzi bo muri Diaspora barusha gukora abahanzi bari Local bo mu Rwanda njyewe ndavuga ntabwo bishoboka noneho ndavuga nti runaka ari gukora ibi runaka ari gukora ibi noneho muha ibyanjye nitangaho urugero.'

Agaruka kuri Emmy ati “Wandaburije nk'inshuti utuma abantu bantuka kubera amajwi twohererezanyaga tuganira nk'inshuti, njyewe wenda wacika ariko Imana ntiwayicika.'

Uko ufata umuntu ntibyagakwiye guhindurwa n’akantu gato

Abajijwe ati 'Ese abantu barakurenganije bagendeye kuri Audio', Bruce Melodie yahise asubiza ati 'Yego, kuko ntabwo wafata Sabin ngo umuntu akubwire ngo yatukanye ntabyo umuziho ngo uhite wemeza ngo yatukanye”. Bamubajije bati ‘ese hari umunyamakuru waguhamagaye cyangwa umuntu uwo ari wese mu bakuvuzeho ngo agusobanuze’, ati 'Nibwo namenye ikibazo mfite mu bantu, abantu bari barwaye akantu barabuze ahantu baturikira bagira gutya bohererezwa Audio.'

Ni ikiganiro cyamaze isaha n'iminota irenga itanu. Bruce Melodie yagaragaraga nk'umuntu uvuga ukuri ugereranije ariko na none wakozweho n’ubutumwa bumaze iminsi bucicikana ku mbuga nkoranyambaga no mu bitangazamakuru, yongeraho ko habaye hari uwamwangira ikiganiro cyagiye hanze agace gato uwo ataba yari asanzwe amukunda. Yatangaje ko na bakuru be mu muziki Meddy na The Ben batigeze bagira icyo batangaza, umubano bafitanye uramutse wangijwe n’ariya majwi yemera ko ari aye, uwo mubano waba utari usanzwe uhari.

“Ndi umuhanzi mukuru ariko nubaha bakuru banjye” Bruce Melodie

Bruce Melodie yagize ubutumwa agenera abafana be ati 'Ndi umuhanzi mukuru kuko singana na Juno, nubaha bakuru banjye umuntu wese wari watekereje ko natunze urutoki abo nasingije nkabasenya yaba yaribeshye kuko sintekereza bicuramye. Ikindi mbafitiye indirimbo nshya mu bihe bya vuba.'

Hari n’aho yagarutse ku burenganzira bwe bwo kuvuga uko yumva n’uko abona ibintu kandi bidakwiye kubuzwa kwivugira ko ari uwa danje 'arenze' kandi yumva ari uwa danje koko na cyane ko “Turi muri Showbizy ariko idakwiye kuvangwamo iby’imyaka yahise ni ko mbyumva njye n’abantu banjye”.

Kuri uyu wa Gatandatu tariki 20 Werurwe 2021, hatangijwe umuryango wa Rwanda Christian Movie Ministry (RCMM), ugamije kuvuga ubutumwa wifashishije filime.

Uyu muhango witabiriwe n’abavugabutumwa barimo Pasiteri Julienne Kabiligi Kabanda n’umugabo we Kabanda Stanley, Tom Gakumba n’umufasha we Gakumba Anitha ndetse n’umuhanzi Uwimana Aimé.

Iki gikorwa cyabaye hifashishijwe ikoranabuhanga ku rubuga rwa YouTube rwa Rwanda Christian Movie Ministry. Uyu muryango wanamuritse filime wakoze wise 4Cities[imijyi ine].

Uyu muryango wa Rwanda Christian Movie Ministry (RCMM) washinzwe na Araganje H.Gaspardos na Uwanyirigira Dative, akaba aribo bayobozi bawo kugeza ubu gusa haranatekerezwa abandi bayobozi mu nshingano zitandukanye kugira ngo bakomeze gukora imirimo bifuza neza.

Mu gutangiza uyu muryango byabimburiwe na Uwimana Aimé waririmbye ibihangano bitandukanye bihembura benshi. Hakurikiyeho kubwiriza ndetse no kwerekana filime nshya y’uyu muryango yitwa '4Cities’.

Pasiteri Julienne Kabiligi Kabanda watumiwe muri uyu muhango, yavuze ko ashimira cyane umuyobozi w’uyu muryango kuko waje ukenewe.

Ati 'Ndashimira umuyobozi wa Rwanda Christian Movie Ministry (RCMM) Ndibuka ambwira iby’uyu muryango mu myaka myinshi ishize wumvaga ari inzozi, yaransobanuriye tugenda tumufasha none biratangaje ko umwana avutse. Hari igihe kimwe yigeze kumbaza niba arota cyangwa niba bizashoboka. Naramubwiye nti nta kidashoboka. Naramubwiye nti iyo hari ubwitange umwana aravuka.'

Araganje H.Gaspardos watangije uyu muryango, yabwiye IGIHE dukesha iyi nkuru ko batekereje igikorwa nk’iki cyo kumurika uyu muryango ku mugaragaro bifashishije aba bakozi b’Imana kuko bafite amavuta kandi bafasha benshi.

Ati 'Impamvu twatumiye aba bakozi b’Imana ni uko bafite amavuta kandi bakaba bakundwa na benshi, yaba aba bavugabutumwa bakurikirwa na benshi ndetse na Uwimana Aimé ni umuhanga ufite ibihangano bifite icyanga.'

Rwanda Christian Movie Ministry (RCMM) ni umuryango utegamiye kuri leta washinzwe nyuma yo gutekereza ukuntu impano Imana yahaye abantu bajya bazikoresha mu kwigisha ijambo ryayo nk’uko Araganje H.Gaspardos yabitangaje.

Ati 'Hari impano karemano Imana yaduhaye, izo mpano iyo zidakoreshejwe ntacyo zimarira sosiyete. Ni muri urwo rwego rero RCMM yahagurukijwe no kubyutsa izo mpano z’abakristo ngo zikoreshwe mu bwami bw’Imana zivuga ubutumwa bwiza, ikindi kandi hano hanze uhasanga filime nyinshi ariko washaka iz’umwihariko wa Gikiristo ntuzibone. Byose ni ukugira ngo umukirisito abe yihagije muri byose.'

Yakomeje avuga ko hari abantu bashobora kubura umwanya wo kumva ijambo ry’Imana cyangwa se bikabagora ariko bakaba bareba filime, bagakuramo inyigisho zitandukanye ari nako bumva ijambo ry’Imana.

Uyu muryango umaze gukora filime ebyiri zirimo iya mbere yitwa 'Nabali’ ndetse n’iyitwa 4Cites bamuritse kuri uyu wa Gatandatu.

Uko igikorwa cyo kumurika uyu muryango cyagenze

RWANDA CHRISTIAN MOVIE MINISTRY IBAZANIYE FILM NSHYA YITWA 4CITIES,IYI NI TRAILER YAYO.

Source: Igihe.com

[email protected]

Mu kiganiro Jules Karangwa umuvugizi wungirije wa FERWAFA yagiranye na CAF, yatangaje ko imikino ya Shampiyona izakinwa mu buryo bw’amatsinda kugira ngo imikino irangire vuba aho gukinwa mu buryo bwari busanzwe. Karangwa kandi yatangaje ko shampiyona izasubukurwa tariki 15 Mata 2021.

Amakipe 16 akina icyiciro cya mbere azashyirwa mu matsinda 4 ubundi muri buri tsinda amakipe ahure, imikino ibanza n’iyo kwishyura, amakipe 2 yo mu itsinda akomeze mu mikino ya 1/4 cy’irangiza.

Amakipe 2 azagera ku mukino wa nyuma niyo azasohokera u Rwanda mu mikino ya CAF Champions League ndetse na Total CAF Confederation Cup. Karangwa Jules kandi yabwiye CAF ko iyi mikino y’amatsinda izakinwa hagati y’ibyumweru bine na bitandatu.

Iyi shampiyona izatangira tariki 15 Mata 2021, izaba ibaye ku nshuro ya gatatu ikinwa mu matsinda nyuma ya Shampiyona 1989/1990 yatwawe na Kiyovu Sports itsinze Pantheres Noirs ibitego 2-1, ndetse no mu 1993 nabwo igikombe cyakimwe mu matsinda, umukino wa nyuma Kiyovu Sports itsinda Mukura Victory Sport ibitego 3-0.

Mu kwezi k’Ukuboza 2020 shampiyona y’u Rwanda yaje gusubikwa igeze ku munsi wa 3 kubera kutubahiriza gahunda zo kwirinda Covid-19.

Ibi Dr Ngamije yabitangaje kuri uyu wa 21 Werurwe mu Kiganiro yagiranye na Radio Rwanda.

Minisitiri w'Ubuzima yavuze ko u Rwanda rwubatse ubushobozi burufasha gutahura ubwoko bushya bwa Coronavirus muri Kanama 2020.

Ati 'Icyo navuga ni uko kuva muri Kanama umwaka ushize twongereye ubushobozi bwacu mu buryo bwo gukurikirana no gusuzuma imiterere ya Coronavirus, uko iri mu gihugu dukora ibizwi nko gushaka amakuru yimbitse ku miterere ya virusi kuko virusi zishobora kugira igisekuru kimwe ariko ishami rimwe ry'icyo gisekuru akaba ari ryo rigira virusi yahinduye imiterere ku buryo igira ubukana kurusha izindi ziva ku gisekuru kimwe.'

'Ikagira ubukana mu kwandura vuba kuko iyi igiye mu mubiri yikuba vuba cyane, ikagira ubukana mu guhangana n'inkingo ndetse n'imiti iyivura.'

Minisitiri Ngamije yavuze ko kuva u Rwanda rwakubaka ubu bushobozi bagiye bapima bagasanga hari abantu bafite ubwoko butandukanye bwa Coronavirus ariko bwo ngo budateye ikibazo.

Muri iyi gahunda yo gutahura niba hari abantu baba bafite ubwoko bushya bwa Coronavirus ngo hapimwe abantu 400 mu banduye COVID-19.

Minisitiri Ngamije yavuze ko mu cyumweru gishize aribwo mu Rwanda habonetse abantu babiri bafite ubwoko bushya bwa Coronavirus bwabonetse bwa mbere Bwongereza n'abandi 10 bafite ubwabonetse muri Afurika y'Epfo.

Ati 'Mu cyumweru gishize nibwo twabonye abantu 12, babiri bafite ibipimo bifite Coronavirus imeze nka ya yindi yo mu Bwongereza, 10 nibo bafite ibipimo bigaragaza ko bafite coronavirus yo muri Afurika y'Epfo.'

'Abo bantu twababonye mu bantu bari baje mu Rwanda kwa kundi tubakira ku kibuga cy'indege tugafata ibipimo byabo, nibo twasuzumye tubona harimo abanduye ni ukuvuga ngo ni abantu bari baturutse hanze.'

Yavuze ko aba bantu bahise bajyanwa ahabugenewe batangira gukurikiranwa kugira ngo batanduza abandi ndetse nyuma ngo biza kugaragara ko iyi virusi bamwe ntayo bagifite mu maraso.

Ati 'Nk'uko bisanzwe murabizi ko iyo tubonye umuntu urwaye ntabwo tumwemerera gusohoka ahubwo tumujyana ahantu agomba gukurikiranwa by'umwihariko, abo rero barakurikiranywe kugeza igihe bakiriye turabapima dusanga nta virusi bagifite mu mubiri bajya mu byari byabazanye.'

Nta muturage iragaragaraho

Minisitiri Ngamije yavuze ko uretse aba bantu batahuweho ubu bwoko bushya bwa Coronavirus baturutse mu mahanga, ko nta muturage w'imbere mu gihugu buragaragaraho.

Ati 'Mu baturage muri rusange kuko nabo tugenda dusuzuma, aho tuvurira abantu bose bafite COVID-19 buriya tugenda dufata ibipimo byabo tukajya kubisuzuma mu buryo bwimbitse cyane bw'ikoranabuhanga tukareba uko bameze kugeza ubu ni Coronavirus isanzwe twabonye kuva muri Werurwe 2020 kugeza ubu niyo dufite mu gihugu, niyo abantu bagenda banduzanya ariko ubu bwoko bushya ntabwo turabona mu gihugu imbere kandi dukurikirana amakuru.'

Kugeza ubu mu Rwanda abamaze kwandura Coronavirus barenga ibihumbi 20 mu gihe abo imaze guhitana ari 287.

---

Ubwo habaga ‘Final’ y’irushanwa rya Nyampinga w’u Rwanda 2021 ryakurikiranywe hifashishijwe ikoranabuhanga mu kwirinda Covid-19, Kayirebwa Marie Paul wamaze kubatizwa ‘Miss Ikinyafu’ biturutse ku kuba yaramamaye mu mashusho y’indirimbo agaragaramo ‘Ikinyafu’ ya Bruce Melodie Ft Kenny Sol ndetse akaba yanegukanye ikamba rya Miss Popularity, Lucky Nzeyimana wa RBA wari MC muri ibi birori yamubajije ikibazo, maze nawe mu kugisubiza akoresha ijambo ryaje gukosorwa na Minisitiri Bamporiki wahise anamubwira ijambo rikwiriye yagombaga gukoresha.

Ibintu byafashe indi ntera ku mbuga nkoranyambaga! #NdiMuKaziPetit niyo ntero

Uburyo uyu muyobozi yakosoyemo uyu mukobwa ntibwishimiwe na bamwe mu bakoresha urubuga rwa Twitter dore ko umwe muri bo yahise abwira uyu muyobozi ko atari akwiriye gukosora uyu mukobwa kuko ibyo yari yavuze byumvikanaga. Minisitiri Bamporiki yahise amusubiza ati ‘Ndi mu kazi petit’ (ndi mu kazi wa mwana we). Nyuma yo kumusubiza gutya, bamwe mu bakoresha imbuga nkoranyambaga cyane cyane Twitter bahise batangiza ‘Hashtag’ bise #NdiMuKaziPetit ndetse kuri ubu hakomeje gukorwa imyenda inyuranye yanditseho iri jambo.

Ibi byabaye ubwo hatangazwaga abakobwa 10 bakomeje mu irushanwa rya Miss Rwanda 2021. Ni irushanwa abantu bose bakurikiye kuri Televiziyo Rwanda, KC2 Tv na shene ya Youtube y’abategura iri rushanwa. Ubwo yari amaze guhamaganwa mu bakobwa 10 bakomeje, Kayirebwa Marie Paul wamamaye nka ‘Miss Ikinyafu’ yabajijwe na Lucky Nzeyimana ikibazo yabaza Umukuru w’igihugu Nyakubahwa Paul Kagame baramutse bahuriye muri Assanseri (Ascenceur/Lift), maze uyu mukobwa asubiza ko yahita ‘amuhereza ikibazo cy’ubushomeri’ cyugarije urubyiruko, aha akaba yumvikanishaga ko yamubaza ikibazo cy’ubushomeri cyugarije urubyiruko.

Marie Paul Kayirebwa (Miss Ikinyafu) niwe wabaye Nyampinga wakunzwe cyane muri iri rushanwa

Kuba uyu mukobwa yakoresheje imvugo ‘namuhereza’ aho gukoresha ijambo ‘namubaza’, ni byo Minisitiri Edouard Bamporiki ufite umuco mu nshingano ze yagaragaje kuri Twitter. Yasoje abifuriza amahirwe muri iri rushanwa. Bamporiki yanditse ati “Ikibazo cya nyuma #MissRwanda2021 uramutse uhuye n’Umukuru w’u Rwanda wamubaza ikihe kibazo, umwana ati: ‘Namuhereza ikibazo cy’ubushomeri’. Ni byo ni ikibazo cyiza, gishakirwa igisubizo buri munsi. Ariko ntabwo bahereza ikibazo, babaza ikibazo. Uti namubaza nti; (……) Muhirwe”.

Uwitwa Marina_94 yasubije uyu muyobozi ko nta kosa uyu mukobwa Miss Kayirebwa yakoze, kuko wasanga wenda yari kwandika ikibazo akagihereza umukuru w’igihugu. Ati “Icyo utumvise n’iki se ko ukunda kwishyira imbere yamuhereza ikibazo nyine? Kuki utatekereje se yacyandika akakimuhereza? (…).” Hon. Edouard Bamporiki yahise asubiza uyu muntu ati “Ndi mu kazi petit” bishatse kuvuga ngo “Ndi mu kazi wa mwana we”. Nyuma yo kumusubiza gutya, ku mbuga nkoranyambaga ‘hahiye’ wa mugani ya ya mvugo y’ab’ubu (Iri jambo ryasakaye cyane kuri Twitter n’ahandi).

Minisitiri Bamporiki yakoze ibiri mu nshingano ze akebura ‘Miss Ikinyafu’

Ibyo Hon. Bamporiki yakoze akosora uyu mukobwa ntibyavuzweho rumwe kuko bamwe bamushimye cyane abandi baramunenga. Uwitwa Thadee Habanabakize yagize ati “Mutoza w’umuco mu rwa Gihanga, ibi ni urugero rwiza rw’ingano y’urugendo mufite imbere mu nshingano mwaramukijwe n’umutoza w’ikirenga Nyakubahwa Paul Kagame, ariko nanone bitureba twese. Umuco n’ururimi gakondo tubisigasire bitavaho biducika”. Eric Shaba wakoreye RTV, yagize ati “Ubwo atagize ati ‘Namukoma ikibazo cy’ubushomeri’”. Aziz Daluckyman ati “Ibyo yavuze yibeshye nk’uko ubushize wanditse ipfubyi mu mwanya wo kwandika impfubyi”.

Tugarutse ku kibazo Miss Kayirebwa Marie Paul yabaza Perezida Kagame baramutse bahuye, uyu mukobwa wavuze atazuyaje ko ikibazo yamubaza ari icy’ubushomeri mu rubyiruko, yakomeje avuga ko yasaba Umukuru w’Igihugu ko mu gushaka igisubizo cy’iki kibazo, urubyiruko rwajya rufashwa rugatanga imishinga yarwo ho ingwate mu kurufasha kubona byoroshye inguzanyo muri Banki. Kayirebwa byarangiye yegukanye ikamba rya Miss Popularity, ahembwa na MTN Rwanda ibihembo bitandukanye ari byo; 1,800,000 Frw, Telefone ya iPhone10 Plus, interineti y’umwaka wose no kuzajya ahamagara ku buntu. Yanahembwe Buruse yo kwiga muri Kaminuza ya Kigali.

Hatangiye gukorwa imipira yanditseho ijambo ‘Ndi mu kazi petit’

Miss Kayirebwa yahawe ibihembo bitandukanye na MTN Rwanda

Ubutumwa bw’abantu banyuranye ku byatangajwe na Minisitiri Bamporiki