Category: Uncategorized

Uru rubanza ruri kuburanishwa n’Urukiko Rwisumbuye rwa Musanze. Rwakomeje kuburanishwa kuri uyu wa Mbere tariki 12 Mata 2021, nyuma y’uko rusubitswe inshuro eshatu.

Manirafasha Jean de la Paix na bagenzi be Habimana Fidèle, Dusengemungu Emmanuel, Mbatezimana Anastase na Kwizera Emmanuel bashinjwa gutanga amasoko ya leta mu buryo bunyuranyije n’amategeko no gukoresha umutungo wa Leta icyo utateganyijwe, gufata icyemezo gifitanye isano n’itonesha, icyenewabo, ubucuti bwihariye na Visi Meya Manirafasha.

Ubushinjacyaha bwasabye ko imanza zombi zihuzwa kuko Visi Meya Manirafasha yari afite imanza ebyiri ariko muri rumwe harimo ingingo yo gutanga amasoko ya Leta mu buryo bunyuranyije n’amategeko.

Iyi ngingo yateje impaka zamaze iminota 40 ariko zisoza urukiko rwanzuye ko imanza zihuzwa hirindwa imbogamizi zari zagaragajwe n’Ubushinjacyaha ko hashobora kuzabaho ko byabangamira ihame rivuga ko nta muntu uregwa cyangwa ngo ahanirwe icyaha kimwe inshuro ebyiri kuko n’ubusanzwe iyo ngingo bari bazi neza ko bazayiburanaho.

Abaregwa bose uko ari batanu bahakanye ibyaha bakurikiranyweho ku gutanga isoko rya leta binyuranyije n’amategeko bitanyuze mu ipiganwa bavuga ko ibyo bakoze babisabwe n’Akarere ka Burera kubera ko ayo masoko yihutirwaga.

Visi Meya Manirafasha Jean dela Paix yagaragaje ko nta masoko yatanze ngo kuko byemezwaga n’akanama kayashinzwe, we akabisinya nk’Umunyamabanga Nshingwabikorwa kandi ko nta bubasha yari afite bwo kubyanga.

Ashinjwa guha Karemire Thierry isoko ryo kubaka isoko rito ku Ibanda rya miliyoni 24 n’igice bitanyuze mu ipiganwa, mu gihe ritagombaga kurenza miliyoni 10 Frw.

Ubushinjacyaha buvuga ko iryo soko ryatanzwe mu buryo bwihutirwaga kandi Manirafasha yari yarabimenye mbere abihisha bagenzi be bari mu kanama k’amasoko ahubwo ahitamo kuritanga ntawe ubizi.

Manirafasha yavuze ko ibikorwa byo kubaka isoko byihutishijwe kuko hari abaturage bajyaga guhahira muri Uganda bagahohoterwa haza gufatwa umwanzuro ko begerezwa ibikorwa remezo byihuse.

Kuri iyi ngingo Ubushinjacyaha bwagaragaje ko iyo hagiye gutangwa amasoko mu buryo bwihuse urwego ruritanga rwandikira ababishinzwe rukagisha inama aribyo Maniraguha yirengagije nkana ngo kubera inyungu bwite yari abitegerejemo.

Buvuga ko uwahawe isoko atari ubwa mbere yari aribonye bitanyuze mu ipiganwa kuko hari n’irindi yahawe rya 16.554.524 ryo kugura ibikoresho birimo matela, amarido n’ibikoresho byo kubikamo amazi ku bari gutuzwa mu Mudugudu wa Gitesi Model Village naryo ryamuhawe bitanyuze mu ipiganwa.

Kuri ibi byaha akurikiranyweho, Visi Meya Manirafasha, ayo mafaranga yayahembye abakozi bubatse amashuri kubera ko ngo bari basa n’abakoze imyigaragambyo bakajya ku Murenge yamara kubimenyesha Akarere kakamusubiza kamwemerera ko yayakoresha bakazaboherereza andi.

Ku ngingo yo gutanga isoko ryo kugura ibikoresho byahawe abari gutuzwa muri Gitesi Model Village bitanyuze mu ipiganwa, Manirafasha yavuze ko yabikoze biciye mu myanzuro y’akanama k’amasoko.

Ubushinjacyaha bwagaragaje ko Manirafasha avuga amagambo buri wese yabwira urukiko ndetse ko adakwiye gushingirwaho ahubwo hakagaragazwa ibimenyetso bifatika harimo n’ibyanditse kuko mu buhamya bwatanzwe n’abari mu kanama k’amasoko bagaragaje ko uregwa yimanye amakuru yose y’iri soko akaritanga ntawe amenyesheje.

Kwizera Emannuel we akurikiranyweho gutanga amasoko ya Leta bidaciye mu ipiganwa aho yatanze irya 5.420.596 Frw ryahawe Nzanzuwera Desire ryo kugura matela, amarido n’ibindi bikoresho by’amazi byo kujyana mu Mudugudu w’Icyitegererezo wa Rurembo yatanze ubwo yari Umunyamabanga Nshingwabikorwa wa Rugarama.

Yavuze ko byose yabikoze ahawe uburenganzira n’Akarere ka Burera kubera ukuntu byihutirwaga, ikintu Ubushinjacyaha bwasabiye ibimenyetso ariko ntibiboneke kuko yemezaga ko yabibwiwe kuri telefoni.

Nyuma yo kumva ubwiregure bw’abaregwa Ubushinjacyaha bwasabwe kugira icyo buvuga maze busaba urukiko kwakira ikirego no kwemeza ko gifite ishingiro maze bubasabira ko bahabwa igihano cy’igifungo cy’imyaka irindwi n’ihazabu ya miliyoni 5 Frw kuri buri wese.

Urukiko rwanzuye ko uru rubanza ruzasomwa ku wa 11 Gicurasi 2021 saa Munani n’igice.

Aba bose baregwa muri uru rubanza bahoze bashinzwe akanama k’amasoko mu Murenge wa Butaro, Manirafasha Jean de la Paix yabereye Umuyobozi akanakurira ako kanama.

Kuri ubu bafite inshingano zitandukanye mu Karere ka Burera kuko Habimana Fidèle ni Umukozi ushinzwe Imibereho myiza y’Abaturage mu Murenge wa Butaro, Dusengemungu Emmanuel ashinzwe Uburezi mu Murenge wa Butaro, Mbatezimana Anastase ushinzwe Ubuhinzi mu Murenge wa Gatebe naho Kwizera Emmanuel ni Umunyamabanga Nshingwabikorwa w’Umurenge wa Kinyababa.

Visi Meya Manirafasha Jean de la Paix yabaye Umunyamabanga Nshingwabikorwa mu Mirenge ya Butaro na Bungwe yo mu Karere ka Burera mbere y’uko aba Umuyobozi w’Akarere wungirije ushinzwe Imibereho myiza y’Abaturage.

Ibi Bankundiye yabitangaje ku Cyumweru tariki ya 11 Mata 2021, ubwo habaga igikorwa cyo gushyingura mu cyubahiro imibiri ibiri yabonetse mu Murenge wa Rweru mu Karere ka Bugesera.

Iyi mibiri yabonetse muri uyu Murenge ni iy’Abatutsi bishwe mu 1992 nk’uko abatanze amakuru babivuze, cyane ko muri Bugesera hari umubare munini w’Abatutsi bagiye bicwa na mbere y’uko Jenoside itangira.

Bankundiye yavuze bibabaje kuba hashize imyaka irenga 20 hakigaragara imibiri itarashyingurwa asaba abantu bazi aho ikiri gutanga amakuru.

Ati “Imibiri itarashyingurwa ni uko itabashije kuboneka, impamvu iri hejuru, ni uko abayijugunye batarabasha kuyiranga ngo bayigaragaze, ihakurwe kuko akenshi usanga yarajugunywe mu binogo byari mu masambu yabo. Aho rero usibye amahirwe ariko hari imibiri igihishwe, ku bw’isoni no ku bw’ipfunwe.”

Yakomeje ati “Niba turi muri gahunda y’Ubumwe n’Ubwiyunge bakagize impuhwe bakavuga ngo runaka uriya duturanye, yasigaye ku isambu y’iwabo, akagiramo abo ashyingura kuko hari abaguye muri aka gace, ni ukuri baba batanze umusanzu tukaruhuka.”

Bankundiye yavuze ko gushyingura mu cyubahiro bifasha uwiciwe kuruhuka.

Ati “Kuko iyo ushyinguye umuntu wawe, ukamushyiraho indabo uraryama ugasinzira, ukagira amagambo umubwira umusezeraho bwa nyuma. Badufasha umuntu wese uzi amakuru y’ahantu hari umubiri wishwe muri Jenoside akayatanga, tugafatanya gushyinguramu cyubahiro.”

Umunyamabanga Nshingwabikorwa w’Umurenge wa Rweru, Gasirabo Gaspard, yavuze ko iyi mibiri yabonetse mu 2020 ariko itinda gushyingurwa kuko hari mu bihe bya COVID-19.

Yavuze ko hari imibiri myinshi itaraboneka muri aka gace ahanini bitewe n’imiterere y’Umurenge wa Rweru kuko ukikijiwe n’inzuzi.

Ati “Hari abantu benshi bigaragara ko bataraboneka ariko kuko ari agace gakikijwe n’inzuzi n’ibiyaga, imigezi ku buryo yabaye intwaro mbi yo kugira ngo abakoraga Jenoside bagende baburizamo ibimenyetso, baba bateganya no kuzabihakana, ku buryo hari n’impungenge y’uko abantu bose batazaboneka.”

Tariki ya 11 Mata 1994, ni bwo mu yahoze ari Komini Gashora, yari igizwe n’Imirenge ya Rweru, Gashora, Juru , Rilima , Mayange habaye ibitero byagabwe ku Batutsi maze benshi baricwa mu buryo ndengakamere.

Mu Karere ka Bugesera habaye igikorwa cyo gushyingura imibiri y’Abatutsi bishwe mu 1992

Iyi mibiri yabonetse mu Murenge wa Rweru mu 2020 ariko itinda gushyingurwa kubera COVID-19

Ubutumwa Ambasade y’u Rwanda muri UAE yashyize ku rukuta rwa Twitter kuri uyu wa 12 Mata 2021, buragira buti “Ibiganiro byabo byibanze ku kongerera ingufu ubufatanye mu rwego rw’uburezi, by’umwihariko kurushaho guteza imbere ubufatanye hagati y’amashuri makuru.”

Ambasade y’u Rwanda yatangaje ko imikoranire na UAE mu burezi iri ku rwego ku rwego rushimishije, ibintu bizaba akarusho nyuma y’ibi biganiro.

Mu butumwa bwayo yakomeje iti “Ahandi hazahuzwa imbaraga ni mu mikoranire ya za kaminuza, gahunda zo gusurana kw’abanyeshuri bareba ibyo abandi biga, ubushakashatsi no guterana inkunga mu buryo bw’amafaranga. Byose bizakorwa hubahirizwa amasezerano areba ibihugubyombi.”

U Rwanda na UAE bisanzwe bifitanye andi amasezerano y’imikoranire byasinye mu 2017, ajyanye no guteza imbere no kubungabunga umutekano w’ishoramari rya buri gihugu n’ayo kunoza imisoreshereze hirindwa ko ibicuruzwa bisoreshwa inshuro zirenze imwe.

Ibihugu byombi binafitanye umubano ushingiye ku bucuruzi kuko mu 2018 byahahiranye ibicuruzwa bifite agaciro karenga miliyoni 750$. Mu Ukwakira 2019 ku bufatanye bwa Leta y’u Rwanda na Sosiyete ya Dubai Ports World izobereye mu gucunga no kubaka ububiko bw’imizigo iva cyangwa ijya mu mahanga, hakaba harafunguwe ububiko bw’ibicuruzwa bwiswe ‘Kigali Logistics Platform’.

Ubu bubiko buzafasha abacuruzi bo mu Rwanda bajyaga bagorwa no kuvana ibicuruzwa byabo mu mahanga, bigatinda mu nzira biva ku byambu nka Mombasa cyangwa Dar es Salaam.

Ibiganiro byibanze ku guteza imbere uburezi, aho buri ruhande hari ibyo rusabwa kuzakora mu gushyigikira urundi

Ambasaderi w’u Rwanda muri Leta Zunze Ubumwe z’Abarabu, Emmanuel Hategeka (ibumoso) na Minisitiri w’Uburezi muri icyo gihugu, Hussain Ibrahim Al Hammadi nyuma y’ibiganiro