Category: Uncategorized

Umunyamabanga Nshingwabikorwa w’Umurenge wa Katabagemu, Karengera Katabogama Alex, avuga ko Rukundo ngo yageze iwe ava mu nshuti ze afite icupa rya essence mu ntoki yinjira mu nzu.

Ngo umugore yari mu gikoni atetse, nyuma ngo yinjiye mu nzu yumva iranukamo essence abajije umugabo aramwihorera ndetse ngo anamubaza iby’ikibiriti amubonana, nabwo akomeza guceceka.

Ati “Umugore yari atetse ariko yinjiye mu nzu agiye gutunganya uburiri kugira ngo basoze kurya baryama, yumva haranukamo essence na ho umugabo yari yamaze kuyisiga umubiri wose ndetse yayinyanyagije mu bintu bimwegereye”.

Akomeza agira ati “Umugore yaramubajije undi araceceka ahubwo mu gihe akimubaza undi aba arashe ikibiriti, umugore akurura umwana wari mu muryango arasohoka, umugabo asubizaho urugi atangira gushya”.

Karengera avuga ko ngo umugore yavugije induru ariko abaturanyi baje bazibiranywa n’ikibatsi cy’umuriro bategereza ko inzu ikongoka basanga yamaze gushiramo umwuka.

Rukundo ngo yari amaze iminsi anyura mu baturanyi n’inshuti ababwira ko ashaka kuvugana na bo ndetse ashaka kubasezeraho bwa nyuma, nk’uko Gitifu Karengera akomeza abivuga.

Agira ati “Mbere y’uko agera iwe yari yagiye anyura mu baturanyi ababwira ko ashaka kuvugana nabo kuko ngo ibyo arimo gutegura bishoboka ko batazongera kubonana bityo bamusezeraho, kandi yari amaze iminsi abivuga ariko atababwira aho ajya”.

Rukundo ubusanzwe ngo nta makimbirane azwi yari afitanye n’umugore we babyaranye umwana umwe, uretse ko ngo yagendaga yivugira ko ashobora kuzikura ku isi.

Gitifu Karengera avuga kandi ko ubuzima bw’umuntu butarangirira mu biganza bye, bityo ko akwiye kubuha agaciro ntabwiyambure.

Kuri Rukundo by’umwihariko haranakekwa ko kwiyahura kwe ari umuvumo w’umuryango dore ko ngo na se yapfuye yiyahuye.

Ati “Uretse nk’uyu ibyo abaturage bavuga bishobora kuba ari nk’umuvumo uri mu muryango, kwiyahura si umuco mwiza no mu muco nyarwanda ubundi kirazira, kuko ni umuvumo ku muryango”.

Asaba abaturage kudatekereza kwiyahura kuko uretse kuba ari ikizira mu muco nyarwanda, ari n’umuvumo ku muryango.

Karengera akomeza asaba abaturage kwegera ubuyobozi mu gihe bafite ibibazo bukabafasha kubikemura aho kwifatira umwanzuro.

Rukundo Emmanuel asize umugore n’umwana umwe.

Rangira Anicet

Ni yo mpamvu Kigali today yegereye Umuyobozi w’ikigo Isange One Stop Center, maze adusobanurira ihohoterwa icyo ari cyo ndetse n’uburyo bakira ababagana.

Umuyobozi wa Isange one stop center, akaba n’umugenzacyaha ushinzwse ubukangurambaga mu Rwego rw’igihugu rw’Ubugenzacyaha (RIB), Rangira Anicet, asobanura ko icyo kigo cyakira abantu bafite ibibazo bitandukanye, by’umwihariko abahuye n’ibibazo by’ihohoterwa.

Ihohoterwa ni igikorwa icyo ari cyo cyose gikorewe ku mubiri kandi ku gahato, ndetse kikanagaragara ko kizagira ingaruka mu gihe kizaza.

Asobanura ibimenyetso biranga uwahohotewe by’umwihariko mu bijyanye n’ihungabana, avuga ko ibimenyetso bigaragara bitewe n’imiterere y’umuntu kuko buri wese afite uko ateye, ati “hari uza afite ibimenyetso bigaragara hari n’uwo biba byihishe utahita ubibona ariko bitabujije ko abifite”.

Ihohoterwa rishyirwa mu byiciro bine nk’uko uyu muyobozi wa Isange one stop center abisobanura.

Ati “Irya mbere n’ihohoterwa ryo gufata ku ngufu, umuntu agasambanywa ku gahato, ihohoterwa rishingiye ku mubibi aho umuntu akubitwa, ihohoterwa rishingiye ku itotezwa ryo ku mitungo, ihohoterwa rishingiye ku mutima, aho usanga umuntu ahora atotezwa cyangwa n’ibindi bintu bikora ku mutima w’umuntu”.

Avuga ko iyo umuntu yahuye n’ihohoterwa runaka bwa mbere, abagomba kubanza kunyura kuri RIB ikamwohereza kuri Isange. Ariko na none akenshi urwo rwego rwa Isange rushobora kwakira uwasambanyijwe ku gahato kugira ngo ibimenyetso bidasibangana, agahura n’abagenzacyaha bahakorera ku buryo izo serivisi zose azifashwa akabasha no kubona ubutabera.

Ati “Hari ihungabana rishobora kugaragaza ibimenyetso ako kanya, hakaba n’irindi ritabigaragaza ako kanya. N’ubwo buri wese bitamugaragaraho, nkatwe twakira abantu benshi hano twemeza neza ko bahura n’ikibazo cy’ihungabana. Akenshi uje yahohotewe akunze kuza yibaza ku muntu wamuhohoteye niba yamwanduje indwara zandurira mu mibonano mpuzabitsina, abenshi bagira ubwoba, kwishinja n’ibindi”.

Urugero iyo umukobwa asuye umuhungu akamufata ku ngufu buri gihe umukobwa yishinja ko yijyanye, akagira ubwoba, yewe akaba yagira n’isoni kuko hari isoni ziterwa n’ihungabana.

Umwana w’umukobwa w’umwangavu iyo asambanyijwe ku gahato, akenshi agira isoni kuko iyo ajyanywe gusobanura uko byagenze kuri RIB baramubaza, na we agasubiza uko byagenze. Ahanini biba byarabaye mu ibanga, nyuma iyo ajyanywe kwa muganga benshi babyibazaho, iwabo mu rusisiro na ho bakabimenya bityo bigatuma yishinja ndetse akagira n’isoni z’ibyamubayeho.

Rangira asobanura ku ihohoterwa ryo gukubitwa ku baturutse mu ngo zabo, avuga ko akenshi abafata icyemezo cyo kuregana babikora byamaze kurenga ubushobozi bwabo bwo kwiyunga cyangwa kwikemurira ikibazo, bararembye cyangwa bakazanwa ku gahato, rimwe na rimwe bahabwa imiti ibafasha muri iryo hungabana.

Ati “Akenshi usanga iyo imiryango igiranye amakimbirane, hari abafata ibiyobyabwenge kugira ngo biyibagize ibyo bibazo biri mu rugo cyangwa babashe gusinzira. Icyo gihe twebwe nka Isange One Stop Center tubohereza ku bitaro bidukuriye ku rwego rwa santé mental, bagakurikiranwa nko kuri Caraes Ndera”.

Icyo gihe ariko iyo wafashe ibiyobyabwenge bikomeye hari ibitaro bikuru bikomeye byomu kigo cya Reabilitation center ya Huye bigufasha.

Ibyo bitaro baragusuzuma ku buryo bashobora kumenya ubwoko bw’ibiyobyabwenge wafashe, uko bingana n’uburyo wafashwamo mu gihe basanze bikomeye, birimo ibiterwa mu nshinge, Urumogi n’ibindi, nk’uko Rangira akomeza abivuga.

Rangira avuga kandi ko n’ibitaro biherereye ku Kacyiru bifasha cyane ndetse ko babona umusaruro wabyo.

Ati “Ukurikije ibibazo baba bafite cyangwa ibyo twakira hano, abenshi bava hano bakize. Iyo ufashije umuntu ukamwereka ko utameze nka wa wundi wamuhohoteye arishima agakira. Ikindi kandi dukurikije imiterere y’ibibazo by’ihohoterwa twakira hano, iyo dufite umurwayi tumuha imiti ishobora kumufasha ndetse tukamuha rendez-vous akagaruka guhura na muganga ku buryo akurikirana ihungabana rye kugeza akize”.

Avuga ko hari abarwayi bamwe na bamwe bakira, kabone n’ubwo yaba yaranyoye imiti agakira ariko bafata umwanzuro wo kujya bamusura aho ataha cyangwa atuye, ndetse bakifashisha n’inzego zibanze kugira ngo atazongera akagira ihungabana bitewe n’ihohoterwa yakorewe rishobora kugaruka mu gihe runaka.

Avuga kandi ko ku bijyanye n’ihohoterwa ryo mu muryango, akenshi umwana wahohotewe avurwa ari kumwe n’ababyeyi kuko umwana hari igihe ashinja nyina ko yaba yaragize uruhare mu ihohoterwa yakorewe, kabone n’ubwo uwarimukoreye yaba afunzwe. Icyo gihe ngo bavura umubyeyi n’umwana bakoresheje ‘approche systemique’ ifasha abantu bafite ihohoterwa ryo mu muryango.

Kuva 2009 ubwo Ikigo Isange One Stop Center cyatangiraga kwakira umurwayi wa mbere waje abagana, kugeza 2021 ubwo Kigali Today yagiranaga ikiganiro n’umuyobozi wa Isange, bari ku mubare wa 25,931 ariko ukomeza kwiyongera uko bakiriye umurwayi mushya.

Reba uko icyo gikorwa cyagenze muri iyi Video:

Niyonsaba na Mbarushimana baracyekwaho guhuza umugambi wo gukora ibyangombwa bihimbano ngo bagurishe umutungo w’umuturage

Uwari ugiye kugura iyo mitungo ni Kimenyi Vincent wo mu Karere ka Kicukiro mu Murenge wa Kanombe, akavuga ko mu cyumweru gishize yari agiye kwamburwa n’abo bagabo babiri bamushuka ko bafite ikibanza kirimo inzu bashaka kugurisha, nyuma Polisi ibafata batarangije umugambi wabo.

Yagize ati “Tariki ya 13 Nyakanga 2021 umuntu ntazi yarampamagaye ambwira ko azi ahantu hagurishwa ikibanza cya make, byahuriranye ko nagishakaga. Yambwiye ko agiye kumpuza n’umuntu witwa Ndori utuye mu Karere ka Gasabo, Umurenge wa Gisozi mu Kagari ka Ruhango, ari na ho hari icyo kibanza”.

Kimenyi akomeza avuga ko yagiyeyo ndetse n’ikibanza arakibona aragishima, hanyuma uwo Ndori amuca Amafaranga y’u Rwanda Miliyoni 15, ariko kuko we yari umukomisiyoneri yamubwiye ko agiye kumuha nimero ya telefoni y’uwitwa Ngarambe Antoine, ari na we bita nyiri ikibanza.

Ati “Amaze kumpa iyo nimero koko nasanze yanditse kuri Ngarambe Antoine ari na we bitaga nyiri ikibanza. Twemeranyije ko muri Miliyoni 15 mbanza nkamuha Miliyoni 13 andi nkazayamuha tumaze kurangiza ibijyanye no guhererekanya ubutaka (Mutation), Polisi yabafashe turi kwa noteri wigenga, turi mu nzira zo gukora Mutation”.

Niyonsaba aremera ko koko yari mu mugambi wo kugurisha ikibanza cy’umuturage witwa Ngarambe Antoine, akaba ari umugambi yafatanyije na Mbarushimana Emmanuel ari na we wamufashije guhindura nimero ya telefoni (Sim Swap) ya Ngarambe ndetse anahimba icyangombwa cy’ubutaka cya Ngarambe.

Niyonsaba yagize ati “Tariki ya 16 Nyakanga 2021 nafashwe na Polisi ndi mu Murenge wa Muhima mu Kiyovu, nafashwe turi mu mugambi wo kugurisha ikibanza kitari icyacu. Tariki 15 Nyakanga nahamagawe na Mbarushimana Emmanuel n’umugore witwa Claudette bambwira ko bafite ikibanza bashaka kugurisha, njyewe nkitwa umugabo w’uwo mugore banyita Ngarambe. Nari mbizi ko icyo kibanza atari icyabo, bari bambwiye ko bazampemba ariko ntibambwiye amafaranga nzahembwa”.

Niyonsaba avuga ko mbere yo gucura uwo mugambi yari asanzwe aziranye na Mbarushimana kuko bigeze guturana ku Gisozi. Muri uwo mugambi yari kuba yitwa nyiri ikibanza, Claudette akamubera umugore we.

Ati “Claudette yari afite icyangombwa cy’ubutaka cy’igihimbano njyewe mfite nimero ya telefoni bahinduye ya nyiri ikibanza ari we Ngarambe. Twageze kwa noteri wigenga adusaba indangamuntu zacu dusohoka nk’abagiye kuzizana dusiga aho uwo twari tugiye kugurishaho ikibanza. Nkimara gusohoka ngeze hanze ni bwo nagiye kubona mbona abapolisi baramfashe”.

Mbarushimana Emmanuel aremera ko yagize uruhare mu guhindura nimero ya telefoni yakoreshwaga muri ubwo bwambuzi, bari bamwemereye Amafaranga y’u Rwanda ibihumbi 300 nyuma yo kugurisha ikibanza.

Ati “Nimero twayambuye umuturage witwa Ngarambe Antoine tuyiha Niyonsaba Marcel atangira kuyikoresha mu izina rya Ngarambe Antoine mu bikorwa byo kugurisha imitungo y’uwo Ngarambe Antoine”.

Umuvugizi wa Polisi y’u Rwanda, Commissioner of Police(CP), John Bosco Kabera, yavuze ko abo bantu bafatiwe mu bikorwa bya Polisi nyuma y’amakuru yari ahari ko barimo gushaka kugurisha imitungo y’umuturage, nk’uko bigaragara ku rubuga rwa Polisi y’u Rwanda.

CP Kabera yongeye kwibutsa abantu ko bagomba kwitondera kugura ibintu ibyo ari byo byose batabanje gushishoza ngo bamenye ko uwo bagiye kugura ari nyirabyo koko.

Ati “Ubwambuzi nk’ubu buriho, aho abantu bafata nimero ya telefoni y’umuntu bashaka kwiba imitungo bakayimwambura bakajya bayikoresha (Sim Swap), bakanahimba ibindi byangombwa bye nk’indangamuntu cyangwa icyangombwa cy’uwo mutongo bashaka kugurisha. Abantu bitondere abababwira ko bagiye kubagurisha imari ishyushye, bajye babanza bashishoze, babaze abantu batandukanye, barebe inzego zishinzwe kwandika imitungo y’abantu nk’ikigo cy’ubutaka cyangwa ikigo gishinzwe imisoro n’amahoro (RRA) bamurebere ko uwo bagiye kugura ari we nyiri umutungo ugurishwa koko”.

Mbarushimana na Niyonsaba bahise bashyikirizwa Urwego rushinzwe ubugenzacyaha (RIB) kugira ngo bakorerwe idosiye.

Itegeko nº68/2018 ryo ku wa 30/08/2018 riteganya ibyaha n’ibihano muri rusange Ingingo ya 174 ivuga ko Umuntu wese wihesha umutungo w’undi, imari ye yose cyangwa igice cyayo mu buryo bw’uburiganya yiyitiriye izina ritari ryo cyangwa umurimo adafitiye ububasha cyangwa akizeza icyiza cyangwa agatinyisha ko hari ikibi kizaba, aba akoze icyaha.

Iyo abihamijwe n’urukiko, ahanishwa igifungo kitari munsi y’imyaka ibiri (2) ariko kitarenze imyaka itatu (3) n’ihazabu y’amafaranga y’u Rwanda atari munsi ya miliyoni eshatu (3.000.000 FRW) ariko atarenze miliyoni eshanu (5.000.000 FRW).

Iyo icyo cyaha gikozwe n’umuntu kugira ngo atange impapuro z’inyemezamigabane, z’inyemezamyenda, inyandiko zigereranywa n’amafaranga, imigabane cyangwa indi nyandiko yose ifite agaciro k’ifaranga ari ibya sosiyete y’ubucuruzi, iby’ikigo gicuruza cyangwa iby’uruganda, igihano kiba igifungo kitari munsi y’imyaka itatu (3) ariko kitarenze imyaka itanu (5) n’ihazabu y’Amafaranga y’u Rwanda arenze miliyoni eshanu (5.000.000FRW) ariko atarenze miliyoni zirindwi (7.000.000 FRW).

Ingingo ya 177 ivuga ko Umuntu wese ugurisha cyangwa utangaho ingwate ikintu cyimukanwa cyangwa kitimukanwa azi ko atari icye aba akoze icyaha. Iyo abihamijwe n’urukiko, ahanishwa igifungo kitari munsi y’umwaka umwe (1) ariko kitarenze imyaka ibiri (2) n’ihazabu y’amafaranga y’u Rwanda atari munsi y’ibihumbi magana atanu (500.000 FRW) ariko atarenze miliyoni imwe (1.000.000 FRW).

Kimenyi wari ugiye kwamburwa miliyoni 15

Ingingo ya 276 ivuga ko Umuntu wese uhimba cyangwa uhindura mu buryo ubwo ari bwo bwose inyandiko cyangwa ikindi kintu cyanditseho igitekerezo, ashyiraho umukono cyangwa igikumwe bitari byo, yonona inyandiko cyangwa imikono, asimbuza abantu abandi, ahimba amasezerano, imiterere y’ingingo zayo, igitegetswe gukorwa cyangwaicyarangije kwemeranywa, aba akoze icyaha.

Umuntu wese, ku bw’uburiganya, wandika, wandikisha ibintu bidahuye n’ukuri cyangwa ukora imenyekanisha ritari ryo afatwa nk’uwakoze icyaha cyo gukora ibihimbano. Iyo abihamijwe n’urukiko, ahanishwa igifungo kitari munsi y’imyaka itanu (5) ariko kitarenze imyaka irindwi (7) n’ihazabu y’amafaranga y’u Rwanda atari munsi ya miliyoni eshatu (3.000.000 FRW) ariko atarenga miliyoni eshanu (5.000.000 FRW) cyangwa kimwe gusa muri ibyo bihano.

Umuntu wese uzi ko inyandiko ari impimbano, akayikoresha ku buryo ubwo ari bwo bwose, aba akoze icyaha. Iyo abihamijwe n’urukiko, ahanishwa ibihano biteganyijwe mu gika cya 3 cy’iyi ngingo. Iyo guhimba byakozwe n’umukozi wa Leta mu murimo ashinzwe cyangwa n’undi ushinzwe umurimo w’igihugu, igihano kiba igifungo kitari munsi y’imyaka irindwi (7) ariko kitarenze imyaka icumi (10) n’ihazabu y’Amafaranga y’u Rwanda atari munsi ya miliyoni ebyiri (2.000.000 FRW) ariko atarenze miliyoni eshatu (3.000.000 FRW) cyangwa kimwe gusa muri ibyo bihano.