Webrwanda Backend

Category: Uncategorized

  • Meteo Rwanda yagaragaje iteganyagihe ry’imvura izagwa mu gihe cy’umuhindo – #rwanda #RwOT

    Mu cyegerenyo cyatanzwe n’Umuyobozi Mukuru wa Meteo Rwanda, Gahigi Aimable, yagaragaje ko hazagwa imvura isanzwe ariko mu Turere twa Rusizi, Nyamasheke, Rutsiro, Rubavu, Ngororero, Musanze na Burera hazagwa imvura nyinshi irenze milimetero 500 mu mezi atatu ari imbere.

    Gahigi yasabye abahinzi, inzego za leta, abikorera, imiryango itegamiye kuri leta ndetse n’abaturarwanda bose muri rusange kubyaza umusaruro amakuru y’uko ibihe by’imvura bizaba bimeze, kuko bayahawe mbere y’igihe.

    Ati “Turabasaba ko bakwiriye gushingira kuri iri teganyagihe bagafata ingamba zigamije kongera umusaruro w’ubuhinzi n’ubworozi, kwirinda no gukumira ibiza, kwirinda no gukumira indwara, kubungabunga ibidukikije, gufata neza imiyoboro y’amazi n’ibindi bikorwa remezo bifitiye igihugu akamaro cyane cyane mu bice biteganyijwemo imvura nyinshi.

    Umuyobozi w’Ishami rishinzwe ubutabazi no gusana ibyangijwe n’ibiza muri Ministeri y’ibikorwa by’ubutabazi, MINEMA, Habinshuti Philippe, yavuze ko iri teganyagihe riziye igihe kuko rizafasha gutegura neza ingamba zo kurengera ahashobora kwangizwa n’imvura hakiri kare kugira ngo barengere ubuzima bw’abaturage.

    Ati “Aya makuru azadufasha kunoza neza ingamba twari dufite [zijyanye no kurwanya Ibiza] kuko bizatuma igihembwe cy’imvura kijya gutangira abantu bazi icyo bagomba gukora kugira ngo tugabanye ingaruka ziterwa n’ibiza bituruka ku mihindagurikire y’ibihe.”

    Gahigi yasabye abaturage kuba maso ntibirare kuko ibipimo byatanzwe ari ingano y’imvura izagwa mu mezi atatu yose, ariko hatagaragajwe uko izagenda igwa mu byumweru. Cyane ko muri iki gihe ikirere gisigaye gihindagurika kenshi.

    Ati “Kuvuga ko imvura yagabanutse mu gihembwe ni ingano y’imvura iteganyijwe kuboneka uyiteranyije yose, ariko ntibishobora gukuraho ko ishobora no kugwa rimwe ari nyinshi, kuko ni ibintu bigaragazwa n’andi mateganyagihe ategurwa kugira ngo yunganire iri.”

    Yabasabye ko abantu bakomeza gukurikirana amateganyagihe atangazwa na Meteo Rwanda mu gihe cy’ukwezi, iminsi 10, itanu n’ itatu, iritangwa buri munsi ndetse n’iteganyagihe riburira iyo bibaye ngombwa.

    Kwitonda Philippe, Umuyobozi w’Ishami rishinzwe ubutaka, amazi n’amashyamba muri MINEMA we yasabye abaturage gusukura imiyoboro y’amazi kugira ngo imvura izagwa itazateza isuri, asaba abatuye mu Turere tuzagwamo imvura nyinshi mu Burengerazuba no mu Majyepfo gutera ibiti kuko biri mu bikumira ibiza.

    Biteganyijwe ko imvura izatangira kugwa hagati y’itariki 29 Nzeri na 9 Ukwakira 2021 mu bice byinshi by’igihugu, ariko mu majyaruguru y’uburengerazuba izatangira kugwa kuva mu cyumweru cya 2 cya Nzeri, mu majyaruguru no mu burengerazuba bw’amajyepfo izatangira kugwa mu Cyumweru cya 3 cya Nzeri mu gihe igice gito cy’amajyepfo y’uburasirazuba iteganyijwe gutangira hagati y’itariki 9 na 19 Ukwakira 2021.

    Iyi mvura biteganyijwe ko izacika hagati y’itariki 21 na 31 Ukuboza 2021, mu gihe mu ntara y’Iburengerazuba ndetse n’igice cy’amajyepfo y’uturere twa Nyaruguru, Nyamagabe na Gisagara izacika Gisagara hagati y’itariki ya 31 Ukuboza 2021 kugeza 10 Mutarama 2022.

    Imvura iteganyijwe kugwa mu gihe cy’umuhindo ni isanzwe igwa ndetse n’igwa neza ishobora kutazateza inkangu cyangwa imyuzure

    Mu bice byinshi by’igihugu imvura izatangira kugwa hagati y’itariki 29 Nzeri na 9 Ukwakira 2021

    Mu turere twinshi imvura izacika hagati ya 31 Ukuboza kugeza tariki 10 Mutarama 2022

    Mu mezi atatu ari mbere, hateganyijwe kugwa mvura isanzwe igwa mu gihe cy’umuhindo

    source : https://ift.tt/3mNJntg

  • Abitwaje intwaro bikekwa ko ari abarwanyi ba FDLR barashe inka eshanu i Rubavu – #rwanda #RwOT

    Ahagana saa yine z’ijoro mu Mudugudu wa Bereshi, Akagari ka Hehu, mu Murenge wa Bugeshi wo mu Karere ka Rubavu, niho byabereye.

    Inka eshanu z’umuturage witwa Twagirayezu Jean De Dieu zarashwe ababikoze banahata ibikoresho bya gisirikare birimo amasasu na Grenade.

    Mutuyimana Fabien umuturage uturiye aho byabereye, akeka ko bari baje bateye bakikanga Ingabo z’u Rwanda bagahita basubira muri RDC ariko babanje kurasa inka.

    Ati “Hari mu masaha ya saa yine z’ijoro turyamye twumva amasasu menshi cyane mu gitondo ni bwo tubonye amakuru y’uko ari abanzi bari bateye baje kwangiza igihugu bikanga Ingabo z’u Rwanda bahita basubira muri Repubulika Iharanira Demokarasi ya Congo noneho babonye inka ibyutse bahita barasa, muri eshanu zarashwe imwe yapfuye.’’

    Amakuru avuga ko nta muturage wahaguye cyangwa ngo akomereke.

    Muri iki gitondo inzego z’ubuyobozi zirimo iz’ibanze n’iz’umutekano zigiye kugirana inama n’abatuye mu gace ibi byabereyemo.

    Colonel Nyamvumba Andrew ushinzwe ibikorwa muri Division ya 3 y’ingabo z’u Rwanda, yahumurije abaturage avuga ko umwanzi wateye nta ngufu afite.

    Ati ’’Yahunze ingabo ahitamo gutera inka z’umuturage; ingabo zanyu murazizi, aho ari turahazi yashakaga kutwereka ko ahari. Ndabahumuriza ntabwo azongera, dufite ubushobozi n’ubushake’’.

    Umuyobozi w’Akarere wungirije ushinzwe iterambere ry’ubukungu Nzabonimpa Deogratias yijeje umuturage warasiwe inka ko ubuyobozi bumushumbusha, izakomerekejwe na zo zikavuzwa.

    Yasabye abaturage gutanga amakuru y’ibyahungabanya umutekano ndetse abizeza ko Akarere kazakorana n’ubuyobozi bwa Repubulika Iharanira Demokarasi ya Congo kugira ngo ababikoze bakurikiranwe.

    Nyuma y’inama umuturage warasiwe inka yemerewe izindi eshatu imwe y’akarere ka Rubavu, indi y’abaturage ba Bugeshi n’indi yemerewe n’ubuyobozi bw’Umurenge wa Busasamana azabona mu byumweru bibiri.

    Ku itariki 10 Ukuboza 2018 ni bwo abarwanyi bivugwa ko ari aba FDLR baheruka kugaba igitero mu Karere ka Rubavu Umurenge wa Busasamana, icyo gihe bakomwe imbere n’ingabo z’u Rwanda ndetse barindwi muri bo bahasize ubuzima.

    Iyi nyama yakomerekejwe ku kuguru ku buryo bigoye ko yakongera guhagarara

    Iyi nka na we yakozweho n’amasasu irakomereka byoroshye

    Inka imwe mu zarashwe yahise ipfa

    Umuyobozi Wungirije w’Akarere Ushinzwe Iterambere ry’Ubukungu, Nzabonimpa Deogratias, yahumurije abaturage

    source : https://ift.tt/3joyPPx

  • Mbakumbuze Bruxelles, Umujyi Rudahigwa yari afitemo ubutaka (Amafoto) – #rwanda #RwOT

    Muri uyu mujyi bibarwa ko hari abakozi barenga ibihumbi 40 ba EU n’abarenga ibihumbi bine ba NATO. 27% by’abawutuye ntabwo ari Ababiligi, ni abantu baturuka mu mpande zitandukanye z’Isi.

    Birashoboka ko ari wo Mujyi utuyemo abanyarwanda benshi mu Ntara ya Gatandatu y’u Rwanda cyane ko u Bubiligi aribwo bucumbikiye benshi nyuma y’urwa Gasabo.

    Indimi enye nizo zivugwa muri uyu mujyi kurusha izindi, izo ni Igifaransa, Icyongereza, Igi-Flamand n’Ikidage. Ni umujyi kandi ubumbatiye amateka menshi yo hambere, nk’aho kugeza magingo aya ari wo ubazwamo iguriro rimaze imyaka myinshi ku Isi. Ryitwa “Galeries St Hubert” ryafunguwe mu bantu bari ku Isi nta n’umwe uravuka kuko hari mu 1847.

    Niba uri umuntu ukunda Chocolat, i Bruxelles ni ho hantu hawe kuko zihaba ku bwinshi. Ikindi ni uko mu Bubiligi ari ahantu “Bière” ifite icyicaro kuko ku isoko ryaho hari amoko arenga 800 y’inzoga, byumvikane neza ko nuramuka ugiyeyo agakonje n’agashyushye buhoro uzakabona ukagasoma ukumva uko ubaye.

    Ku munyarwanda wifuza kujyayo, ubu ibintu byaroroshye kuko RwandAir ihakorera ingendo eshatu mu cyumweru. Umuntu uvuye i Kanombe akoresha amasaha arindwi kugira ngo abe ageze ku Kibuga cy’Indege cya Zaventem.

    Muri uyu mujyi harimo inyubako y’amateka akomeye ku Rwanda. Abantu bayizi nka Rwanda House, ni yo Ambasade y’u Rwanda ikoreramo ndetse aho yubatse hari ubutaka bw’Umwami w’u Rwanda Mutara III Rudahigwa.

    Uyu mwami wa mbere w’u Rwanda wuriye rutemikirere yaguze ubwo butaka mu mafaranga yaturutse mu kigega cye cyitwaga “Fond Mutara”. Icyo gihe yateganyaga ko hagomba kubakwa inzu abanyeshuri b’abanyarwanda bajya kwiga mu Bubiligi bazajya babamo.

    Yatanze ayo macumbi atubatswe, nyuma y’aho Ingoma ya cyami ikuriweho, ubwo butaka bwe buza kujya mu maboko ya leta, bwubakwamo “Rwanda House”, inyubako ikoreramo Ambasade y’u Rwanda. Yatashywe mu 1984.

    Ibintu biteye amatsiko kuri Bruxelles ifite inyubako zimwe zubatswe mu mafaranga yaturutse muri Afurika y’Ibiyaga Bigari.

    Nyinshi mu nyubako ziri muri uyu mujyi, zubatswe mu mafaranga y’umutungo kamere waturutse mu bihugu byo mu Karere u Rwanda ruherereyemo. N’uyu munsi, iyo uhageze abazi amateka bakwereka inzu z’umweru zubatswe biturutse kuri uwo mutungo.

    Nuramuka usuye uyu mujyi, hari ibintu byinshi uzabona cyangwa hari ibyo wabonye ubwo wawusuraga. Urugero ni “Manneken Pis”, ikibumbano cy’umwana muto w’umuhungu wambaye ubusa, uri kwihagarika.

    Gifite santimetero 61 kandi gikoze muri bronze, cyakozwe na Jérôme Duquesnoy l’Ancien gishyirwa Grand-Place mu 1618, gusa ikihaboneka ubu si cyo cya nyacyo ahubwo ni icyiganano. Icyo uyu mugabo yakoze, kiri mu Nzu Ndangamateka y’u Bubiligi.

    Gishushanya umuntu ufite ukwishyira ukizana muri we ariko ku rundi ruhande kikaba giteye amarangamutima ku buryo umuntu wese akibona agaseka.

    Abantu bakunze kucyiba, bakacyambika imyenda itandukanye nyuma bakagisubiza aho kigomba kuba kiri. Hari ubwo cyafotowe cyambaye imyenda isa n’iy’Abapolisi bo mu Bubiligi, ubundi bacyambika imyenda ya FC Barcelone gutyo gutyo.

    Ku wa 3 Nyakanga 2019, cyigeze kwambikwa ibendera ry’u Rwanda n’umushanana, ku buryo umuntu wahanyuraga wese yibazaga ku bijyanye n’u Rwanda.

    Nk’uko umuntu uri i Paris aba ashaka gufatira agafoto k’urwibutso kuri Tour Eiffel, mu Bubiligi ho ni Atomium. Ni inyubako ifatwa nk’ikirango cy’uyu mujyi, yubatswe mu 1958 mu gace ka Laeken.

    Buriya mu buzima bwa buri munsi, abenshi babaho nk’abantu bo mu Bubiligi nubwo batajya babimenya. Iyi firiti bamwe bakunda, amateka agaragaza ko ifite inkomoko i Bruxelles mu myaka ya 1780. Abayikunda bavuga ko iryoha kurushaho iyo ariho ka mayonnaise.

    Mu 2017, byabarwaga ko nibura ku ntera ya kilometero imwe, haba hari restaurants 138.

    Matonge, Quartier yari yaritiriwe iy’Abanyafurika

    Matonge ni agace kazwi cyane muri Repubulika Iharanira Demokarasi ya Congo muri Komine ya Kalamu.

    I Bruxelles naho karahari ndetse mu myaka yashize, ni ahantu hakundaga kuba abirabura benshi, hari utubari tw’abanye-Congo n’abandi banyafurika muri rusange.

    Ubu ibintu byarahindutse, ntabwo hakiganje abirabura gusa ahubwo hatangiye gusatirwa n’ibikorwa bishamikiye ku bakozi cyane aba EU ku buryo bugaragara. Impamvu ni uko aka gace kari hagati mu mujyi, gahana imbibi n’ibigo bikomeye.

    Abirabura batangiye kwinjira mu Bubiligi mu myaka ya za 1960 (abahageraga muri iyo myaka, babaga bagiye kwiga, niho babaga), bacumbikiwe muri ako gace, kuva icyo gihe hitirirwa agace k’abirabura ariko uyu munsi si bo bonyine bahatuye.

    Mu mafoto, reka dutemberane i Bruxelles

    Grand Place ni hamwe mu hantu hakurura ba mukerarugendo. Ni agace kazwi cyane kari mu izingiro ry’Umujyi wa Bruxelles

    Maison Antoine ni inzu iri muri Komine ya Etterbeek. Yaramamaye cyane mu bucuruzi bw’amafiriti dore ko yashinzwe mu 1948

    Kiliziya yitiriwe Mutagatifu Boniface iri rwagati mu Mujyi wa Bruxelles mu gace kazwi nka Matonge. Agace biteganye kagizwe “Car Free Zone” nta modoka zigendamo, hari restaurant ikundwa n’abahanzi bakomeye

    U Bubiligi bubamo ubwoko butandukanye bw’inzoga, bibarwa ko ku isoko hari uburenga 800

    Waterloo ni mu Majyepfo ya Bruxelles. Aha mu mateka ni ahantu hazwi kubera intambara ikomeye yahabereye mu myaka ya 1815 yarangiye ingabo za Napoleon Bonaparte zitsinzwe

    Mu Mujyi wa Bruxelles mu gace Porte de Namur hazwi nka Matonge. Abantu baba ari urujya n’uruza, abenshi bagenda ku magare

    Restaurant yitwa Ultime Atome ni imwe mu zikunzwe muri uyu mujyi zakira abantu bakomeye

    Mu masaha y’umugoroba, abantu benshi baba bagiye kuruhuka baganirira muri restaurant ziri impande n’impande mu mujyi

    Kimwe mu biranga Bruxelles, ni monument ziba ziri impande n’impande. Ni uburyo bwo guha icyubahiro abakoze ibikorwa bikomeye no gusigasira amateka. Usanga ba mukerarugendo bahagera bagahagarara bagasoma amateka ajyanye nazo

    Aha ni mu Majyaruguru ya Bruxelles muri Komine ya Jette. Hagaragara inzu za kera, ni ahantu hahoze higanje Aba-Framand kera

    “Musée royal de l’Armée et de l’Histoire militaire”, ni inzu ndangamateka y’u Bubiligi ibumbatiye ajyanye n’igisirikare cy’iki gihugu. Harimo imbunda zakoreshejwe mu myaka ya 1815

    Imbere ya Africa Museum hari ikiyaga gitanga amafu muri ako gace ku buryo abantu bahicara bakaruhuka ari nako bazirikana ibyo baba bamaze kubona muri iyo ngoro

    Mu Bubiligi hari uduce twinshi twahariwe abanyamaguru gusa…

    Aha hitwa Place Eugène Flagey, hahoze hakorera Radio na Televiziyo, RTBF

    Unyuze muri aya marembo, hari inzu ikoreramo ubushakashatsi bw’ibintu byose bifite inkomoko kuri Afurika. Ni mu cyanya kirimo Ingoro Ndangamateka ya Afurika, Africa Museum

    Aha ni mu marembo magari mashya ya Africa Museum. Iyo winjiyemo ubona byinshi bijyanye n’u Rwanda

    Aka gace kari mu marembo ya Matonge, karimo amaduka menshi y’Abanyafurika

    Aha ni muri Komine ya Watermael-Boitsfort, ni hamwe mu haboneka inyubako nyinshi zo mu bihe byo hambere

    Muri aka gace usangamo nk’umuntu umwe atuye mu nyubako nk’iyi

    Africa Museum ifite ubusitani bwiza…Ifite ishyamba ryiza, akenshi usanga abantu mu mpera z’icyumweru bagiye gutembereramo

    Uyu muhanda witwa Avenue Franklin Roosevelt, ugera ku nyubako zikoreramo Ambasade nyinshi ziherereye i Bruxelles. Ni umuhanda mwiza urambuye

    Aha ni mu marembo ya Parc du Cinquantenaire ahari Ingoro ibumbatiye amateka y’igisirikare cy’u Bubiligi

    Iyi nyubako aho yubatse hari ubutaka bw’Umwami Rudahigwa. Ubu niho hakorera Ambasade y’u Rwanda ndetse hitwa “Rwanda House”

    Monument zifite ibisobanuro bitandukanye uzisanga hirya no hino. Iyi iri imbere ya Université Libre de Bruxelles

    Iyi hotel yitwa “The Hotel” ikunda gucumbikwamo n’abantu bifite

    Uyu muhanda ni umwe mu igana mu Mujyi rwagati ahakorerwa imirimo itandukanye

    Iyi nyubako ni yo ikoreramo Minisitiri w’Intebe w’u Bubiligi. Muri iki gihe ni Alexander De Croo. Bitewe n’imitegekere yo muri iki gihugu, afatwa nk’Umuyobozi Mukuru wacyo ku ruhando mpuzamahanga muri Politiki

    RTBF ni Radio na Televiziyo y’Igihugu. Izi modoka ziba ziri hirya no hino zifashishwa mu gusakaza amakuru

    Iyi nyubako yahoze ikorerwamo na RTBF ndetse n’ubu iminara yayo iracyagaragara

    Uyu muhanda ugana ku Biro bya Minisitiri w’Intebe…

    Izi monument ni izo muri Africa Museum. Zerekana amateka y’Abanyafurika

    Iyi ni Bazilika Nkuru mu gihugu yitiriwe Umutima mutagatigu (Basilique Nationale du Sacré-Cœur), iherereye i Koekelberg

    Iyi nyubako ikoreramo ibigo bikomeye birimo iby’itumanaho nka Belgacom

    Muri Komine ya Ixelles hari ibiyaga bifasha uyu mujyi guhora uhehereye (Étangs d’Ixelles)

    Mu bice bitandukanye hari imihanda ica munsi y’ubutaka. Uyu ni uwo mu gace ka Madou

    Usohotse muri Africa Museum ni aha unyura ugana mu Mujyi rwagati

    Izi ni inyubako zicumbikwamo n’abantu b’ingeri zitandukanye hafi ya Gare de Bruxelles-Nord

    Iyi ni yo nyubako isumba izindi muri Bruxelles ikoreramo Belgacom

    Iyi nyubako ikorerwamo ubushakashatsi ku bintu byose bifite inkomoko muri Afurika

    Indi sura igaragaza inyubako yahoze ikoreramo RTBF

    Hafi y’uru ruzi hari uruganda rutunganya umucanga. Rwitwa La Senne

    Parc du Cinquantenaire ni ahantu abantu bashaka kuruhuka bahurira…

    Iki kiraro kiri kuri Senne ahari uruganda rutunganya umucanga

    Iyi nyubako izwi nka Tour & Taxis ikunze kuberamo inama mpuzamahanga zitandukanye

    Abatuye mu Mujyi, baraza imodoka zabo ku muhanda

    Kuri Grand Place hari ibiro bikuru bya Komine. Abashaka gushyingirwa barahaza kimwe n’abandi bafite ibirori bitandukanye. Mu masaha y’umugoroba, abashaka kuruhuka no kwidagadura niho basohokera

    Izi ni inzira nto bita “Ruelle” zigaragara mu nkengero za Grand Place. Kera niho hacaga ingamiya

    Iyo ugana kuri Basilique Nationale du Sacré-Cœur ni aha unyura

    Polisi y’u Bubiligi ikoresha izi modoka mu gucunga umutekano

    Atomium ni inyubako ifatwa nk’ikirango cya Bruxelles ku buryo usanga ba mukerarugendo bayisura kugira ngo babone urwibutso

    Manneken Pis: Aha ntabwo ari ikibumbano ahubwo ni Chocolat iteye gutya

    Niba utaragura ka Chocolat ko mu Bubiligi, uzarebe aho ukagura uzambwira nyuma

    Jardins du Mont Des Arts naho ni ahantu abantu benshi bahurira cyane mu masaha y’umugoroba

    Musées Royaux des Beaux-Arts ni imwe mu nzu ndangamateka zirimo ibikorwa byinshi by’ubugeni kandi bifite amateka akomeye

    Scooter zikunze gukoreshwa cyane n’urubyiruko muri uyu mujyi

    Ubuzima bwo mu Mijyi ikomeye nka Bruxelles si bwiza kuri bose, hari n’ahagaragara abantu basabiriza

    Bus nini zikunda kwifashishwa mu ngendo rusange mu buryo bwo kugabanya umuvundo

    Aha ni mu marembo ya Musées Royaux des Beaux-Arts

    Chocolat ni kimwe mu biboneka i Bruxelles ku bwinshi

    Tram nazo zifashishwa mu ngendo rusange. Ni uburyo bwabayeho mu myaka ya kera cyane

    “Gaufre de Bruxelles” ni kimwe mu byo Ababiligi bazi gukora cyane. Iyo baguhaye ikawa, niyo iyiherekeza

    Amagare rusange aba aparitse hirya no hino mu mujyi cyakora ushaka kurigendaho, bimusaba kwishyura

    Iyi nyubako ni yo ikoreramo Komisiyo y’Umuryango w’Ubumwe bw’u Burayi

    Umuryango w’Ubumwe bw’u Burayi ufite abakozi barenga ibihumbi 40 bakorera i Bruxelles

    Kanda hano urebe andi mafoto menshi

    Amafoto: Karirima A. Ngarambe

    [email protected]

    source : https://ift.tt/3Bi6vnW

  • Gashyantare 2022 izasiga Gaz Methane yo mu Kivu itanga amashanyarazi – #rwanda #RwOT

    Ku ikubitiro megawatt 15 nizo zizatangwa n’uruganda ruri kuhubakwa ariko uko ruzagenda rwagurwa, bizarangira rufite ubushobozi bwo gutanga izigera kuri 56.

    Ubu impombo zizakira gaz zubatswe imusozi, hanyuma mu bilometero bitanu ujya hagati mu kiyaga hashyizwe ibitembo binini mu mazi hejuru yabyo hamanikwa utumenyetso dutukura, tuburira abashobora kuba babyangiza banyuze inzira y’amazi nk’ubwato.

    Ibyo bitembo bizahuzwa n’andi matiyo azamanurwa hasi mu mazi mu bujyakuzimu bwa metero zisaga 350 kuko ikiyaga cya Kivu gifite metero zisaga 500 z’ubujyakuzimu, akaba ariho bizakurura Gaz Methane bikayivangura n’amazi.

    Uyu mushinga wose wo kubyaza Gaz Methane amashanyarazi witezweho gutanga megawati 56, uzubakwa mu byiciro bine bizatwara asaga miliyoni 400 z’amadorali ya Amerika.

    Mu gihe uyu mushinga uzaba ugeze ku musozo, bizakemura ikibazo cy’umuriro muke n’ibura ryawo rya hato na hato. Mu duce twegereye uru ruganda, nta kibazo cy’amashanyarazi make kizongera kuhagaragara kuko ubundi ayahakoreshwaga yavaga i Karongi na Musanze.

    Ambasaderi wa Israel mu Rwanda, Dr. Ron Adam, ku wa Gatanu tariki ya 27 Kanama yasuye Sosiyete eshatu zo muri Israel ziri kugira uruhare mu iyubakwa ry’uyu mushinga, areba aho imirimo igeze.

    Today I visited the Methane Gas electricity production site KIVU56 Gas in Gisenyi. Impressive infrastructure project to produce 56MW under the umbrella of SPLK and implementation by 3 Israeli companies : A.S Bidud, Galil Engineering Group and Sea Tech. @RwandaInfra @reg_rwanda pic.twitter.com/JeCFoI7ACg

    — Dr. Ron Adam (@AmbRonAdam) August 27, 2021

    Byari biteganyijwe ko muri uyu mwaka aribwo aya mashanyarazi agomba kuba yabonetse gusa imirimo yagiye idindira, igihe ntarengwa cyashyizweho ni mu ntangiriro za 2022.

    source : https://ift.tt/2WyijDy

  • Menya ibitera kurwara umugongo n'uko wabyirinda . – YEGOB #rwanda #RwOT

    Indwara y'umugongoni bumwe mu burwayi bukomeje kwibasira abantu b'ingeri zose muri iy'iminsi biturutse ku mpamvu zitandukanye zirangajwe imbere no kudakora imyitozo ngororamubiri.

    Abantu benshi cyane usanga akenshi bibasirwa n'uburwayi bw'umugongo, aho yicara agataka, yahaguruka agataka, yatambuka agataka, biturutse ku mpamvu zitandukanye.

    Ubushakashatsi bwakorewe mu Busuwisi bugaragaza ko abantu umunani ku bantu icumi (8/10) baba bafite ububabare bw'umugongo. Ubu bubabare kandi ngo bukaba bushobora no gukwira mu bindi bice by'umubiri.

    Urubuga rwa liguerhumatisme, dukesha iyi nkuru ruvuga zimwe mu mpamvu zitera kubabara umugongo, murizo harimo :

    • Kudakora imyitozo ngororamubiri

    • Kwicara umwanya munini cyangwa se ukicara nabi (Kwicara umuntu yihengetse cyangwa yunamye) no guhagarara nabi.

    • Guterura ibintu biremereye ukabiterura uhese umugongo.

    •Umubyibuho ukabije ushobora guhungabanya imikorere myiza y'uruti rw'umugongo.

    • Imvune.

    • Hari n'igihe umuntu ashobora kubabara umugongo biturutse ku ndwara. Muri izo ndwara harimo rubagimpande, igituntu gifata mu magufwa, koroha no gusaza kw'amagufwa byaterwa no kubura imyunyu ngugu ihagiye nka calcium n'ibindi .

    • Guhora uhetse igikapu kirimo mudasobwa(Laptop), amasakoshi aremereye bishobora gutera indwara z'umugongo.

    • Inkweto ndende ku badamu zigira uruhare mu guhindura imiterere y'urutirigongo (Deformities) bigatera n'ububabare bw'umugongo.

    • Matelas zinepa cyangwa zikomeye cyane nazo ziri mu bitera umugongo.

    Ese wakora iki ngo wirinde uburwayi bw'umugongo ?
    1. Gukora Imyitozo ngororamubiri :

    Umubiri ukomeye/igihagararo bifasha umubiri guhagarara uhamye bikarinda umugongo. Niyo mpamvu abantu ubona badakomeye ubona badahagarara neza baba bameze nk'abihengetse bikangiza umugongo.

    2. Irinde kwicara cyangwa guhagarara ndetse no kugenda nabi (kwicara cyangwa guhagarara hamwe umwanya muremure urenze isaha)

    ibi nibimwe mu byagufasha kwirinda indwara y'umugongo .

    Source : https://yegob.rw/menya-ibitera-kurwara-umugongo-nuko-wabyirinda/

  • Dore uburyo 6 bwiza wakoresha uturisha umugore wawe mu gihe wamurakaje #rwanda #RwOT

    Ibintu 6 byoroshye wakora ugaturisha umugore wawe mu gihe yakurakariye:

    1.Emera ikosa ryawe

    Niba wakoze ikintu kibi cyateye umugore wawe uburakari, ikintu cya mbere cyo gukora cyigaturisha uburakari bwe ni ukwemera ikosa ryawe. Mwereke ko we ari mukuri ko wowe uri mu makosa uburakari bwe buzagabanukaho nka 50%.

    2.Muzanire impano

    Wowe muzanire impano n'ubwo we kubera uburakari atari bupfe kuyakira, ariko uzaba utambukije ubutumwa bumwereka ko ukimwitayeho ushaka ko umubano wanyu watera imbere, abagore bakunda gufatwa nk'abamikazi, wowe fata umugore wawe nk'umwamikazi bizatuma umujinya we ugabanuka.

    3.Mukorere imwe mu mirimo

    Niba yarakaye, ufite gutuma amenya ko uri gusaba imbabazi kandi ko umushaka nk'igice kinini cyawe cy'ubuzima. Iyo umufashije gukora ibintu yakoraga arabyishimira ndetse bimujya mu bwonko bwe nubwo atabasha kubikubwira, Niyo wamufasha nko koza amasahani, guteka ndetse nindi mirimo yoroheje yo mu rugo azabyakira neza nubwo adashobora kubikwereka.

    4.Nubwo utabyemera, mwereke icyubahiro

    Mwereke icyo cyubahiro ndetse ko nibyo avuga ubyubashye nubwo utabyemeranwa nawe, buri mugore aho ava akagera akunda umugabo umwubaha,mwubahe mu gihe yarakaye nawe ntazigera agutakariza icyizere.

    5.Mera nk'aho nta kintu cyabaye

    Nyuma yintonganya cyangwa ikindi kintu cyamuteye uburakari,bikaba byatuma umubano wanyu uzamo agatotsi,Inzira imwe ushobora gukoresha,ni ukumera nkaho nta kintu cyabaye,ntabwo azatuza byoroshye ariko igihe kizagera atuze;Kumera nkaho nta kintu cyabaye ntabwo ndi gusobanura ko wahunga ibibazo wateje,oya!ahubwo ndashaka kuvuga ko wowe wamera nkaho nta kintu cyakubayeho mbese ukamwereka ko utigeze urakara nubwo wowe ubwawe waba uziko warakaye,nibwo azatuza.

    6.Iga kumugendera kure

    Kumugendera kure rimwe na rimwe bishobora kuba uburyo bwiza bwo guturisha umugore wawe uburakari bugashira. Nugumya kumuvugisha mu gihe agifite umujinya, ahubwo uzajya uba uri kumukongeza-mbse ni nko gufata Peteroli maze ugasuka mu muriro. Uburyo bwiza bwo guturisha umugore wawe ni ukumuhunga ukareba aho uba ugiye mu gihe bigishyushye aho kugira ngo ukomeze umukongeze.

    Refe:www.Lifehack.com

    Source : https://umuryango.rw/ubuzima-115/udushya/article/dore-uburyo-6-bwiza-wakoresha-uturisha-umugore-wawe-mu-gihe-wamurakaje

  • Mashami Vincent yavuze ku bakinnyi babiri baturutse muri Uganda batazakina umukino wa Mali #rwanda #RwOT

    Umutoza w’ikipe y’igihugu y’u Rwanda, Mashami Vincent yavuze ko abakinnyi b’abanyarwanda bakina muri Uganda bahamagawe bwa mbere, ari abakinnyi beza yashimye urwego rwabo ariko akaba atazabakoresha ku mukino wa Mali bitewe n’uko batarabona ibyangombwa.

    Nsengiyumva Isaac wa Express na Kalisa Jamil wa Vipers nibo bakinnyi bakina muri Uganda bahamagawe bwa mbere mu Mavubi arimo yitegura imikino y’ijonjora ry’igikombe cy’Isi cya 2022.

    Mashami Vincent avuga ko yashimye urwego bariho ndetse ko nibamara kubona ibyangombwa bazafasha byinshi.

    Ati 'Ni abakinnyi beza, ni abakinnyi beza, kuva umunsi wa mbere bahageze, imyitozo ya mbere bakoze burya umuntu uzi umupira uhita umubona, uburyo bahise bisanga mu bandi bigaragaza uko bameze, amaso araduha bagenzi babo barabyibonera, ni abakinnyi beza.'

    'Nibamara kubona ibyangombwa byose, kuko ubu niyo gahunda igezweho yo gukurikirana ibyangombwa byabo kandi ngira ngo birimo kugenda neza kugeza kuri aka kanya, twarabashimye nibamara kwinjira mu bandi hari icyo bazatwongerera kinini.'

    Yakomeje avuga igihe aba bakinnyi bazabonera ibyangombwa maze bagatangira gukinira ikipe y’igihugu y’u Rwanda.

    Ati 'Nibyo navugaga, ba Isaac baracyari mu nzira zo kubona ibyangombwa, ibya Isaac(Nsengiyumva) byo bigeze nko kuri 95% kuko yamaze kubona indangamuntu hasigaye passport, Kalisa we hari ibikibura kugira ngo atangire inzira zo gushaka ibyangombwa. '

    Tariki ya 1 Nzeri u Rwanda ruzakina na Mali muri Maroc mu mukino wo mu itsinda E mu gushaka itike y’igikombe cy’Isi cya 2022 kizabera muri Qatar, tariki ya 5 Nzeri azakina na Kenya i Kigali ni na wo mukino aba bakinnyi bashobora kuzakina.

    Kalisa Jamil wa Vipers

    Nsengiyumva Isaac wa Express

    Source : http://isimbi.rw/siporo/article/mashami-vincent-yavuze-ku-bakinnyi-babiri-baturutse-muri-uganda-batazakina-umukino-wa-mali

  • Nta wakwihandagaza ngo avuge ko amatora azaba muri uyu mwaka-Prof. Mbanda/NEC #rwanda #RwOT

    Perezida wa Komisiyo y'Igihugu y'amatora mu Rwanda, Prof. Kalisa Mbanda avuga ko bigoye kwemeza ko amatora y'inzego z'ibanze ashobora kuba muri uyu mwaka wa 2021. Icyatumye asubikwa ngo ni Covid-19 kandi iracyahari. Ibi, yabivuze mu kiganiro cyagarukaga ku ngaruka zo gusubika amatora y'inzego zibanze ku miyoborere, cyateguwe n'umuryango w'Abanyamakuru baharanira amahoro-Pax Press, cyatambutse kuri Radio Flash FM n'andi maradio 4.

    Muri uyu mwaka wa 2021, Tariki ya 6 Gashyantare nibwo amatora y'inzego z'ibanze uhereye ku rwego rw'imidugudu n'utugari yagombaga kuba nkuko Komisiyo y'Igihugu y'Amatora yari yabitangaje. Nyuma yaje ku bihindura, ivuga ko azaba kuwa 20 Gashyantare 2021, mu gihe tariki 22 Gashyantare 2021 hari hateganijwe amatora yo ku rwego rw'uturere ari nayo ubusanzwe avamo abajyanama, ariko aya yose yarasubitswe, hatangwa impamvu z'icyorezo cya Covid-19 cyari gicanye maremare.

    Mbere yaho gato, kuwa 27 Mutarama 2021 nibwo Komisiyo y'Igihugu y'amatora yasohoye itangazo rivuga ko yasubitse igikorwa cyo gutangaza kandidatire zemejwe by'agateganyo ku ba kandida ku mwanya w'Abajyanama b'Akarere.

    Mu biganiro n'inkuru zitandukanye mu bitangazamakuru, hagiye humvikana abayobozi muri Komisiyo y'Igihugu y'amatora bavuga ko barimo gukora ibishoboka byose ngo barebe ko amatora yaba mbere y'uko uyu mwaka wa 2021 urangira, ariko ibyavuzwe na Perezida w'iyi komisiyo kuri uyu wa 28 Kanama 2021, bikuraho icyizere cyari gihari ko amatora ashoboka.

    Mu kiganiro Perezida wa Komisiyo y'Igihugu y'amatora, Prof. Kalisa Mbanda yagiriye kuri Radio Flash FM cyatambutse no ku ma Radio ane ariyo Salus, Izuba, Isangano n'Ishingiro, yavuze ko nta wakwihandagaza ngo avuge ko aya matora ashobora kuba muri uyu mwaka.

    Abajijwe niba umuntu wavuga ko aya matora ashoboka muri uyu mwaka yaba afite ishingiro, yagize ati' Nta ryo yaba afite, kuko icyahagaritse amatora ni Covid. Ubwo uvuze utyo waba uvuga ko mbere y'uko umwaka ushira Covid izaba yarashize! Ibyo rero nta muntu wa kwihandagaza ngo ahaguruke yihandagaze abibwire Abanyarwanda'.

    Akomeza avuga ati' Icyo twababwira ni uko duhora duhengereza tureba aho Covid igeze. Igeze mu gipimo umuntu yashobora kubana nacyo, icyo gihe tuzakoresha amatora'.

    Prof. Kalisa Mbada, asaba abantu kudahuza byinshi bibaza mu mu bibazo biri mu nzego z'ibanze no kuba Manda yarongerewe. Ashimangira ko imiyoborere myiza ntaho ihuriye no kongera Manda, ko imiyoborere myiza igomba kubaho muri Manda isanzwe no muri Manda idasanzwe, ko icyari kibi muri manda isanzwe n'ubundi kiba kibi no muri manda yongerewe. Avuga kandi ko ntawe ukwiye kwibwira ko kongera manda aribyo byatumye abantu baba babi.

    Itegeko Ngenga rivuguruye rigenga amatora mu Rwanda ryatowe n'inteko ishinga amategeko imitwe yombi, riha Guverinoma ububasha bwo gusubika amatora y'inzego z'ibanze n'ay'inama z'igihugu ndetse no kugena ikigomba gukurikiraho. Muri iri tegeko ngenga ryatowe muri Mutarama 2021 riha ububasha Minisitiri w'ubutegetsi bw'Igihugu gusohora iteka risubika amatora y'inzego zibanze kubera inzitizi ntarengwa (Covid-19 kuri ubu) no gusohora irindi tegeko teka risubukura amatora iyo izo nzitizi ntarengwa zarangiye cyangwa zavuyeho.

    Munyaneza Theogene / intyoza.com

    Source : https://www.intyoza.com/nta-wakwihandagaza-ngo-avuge-ko-amatora-azaba-muri-uyu-mwaka-prof-mbanda-nec/

  • Pariki y’Igihugu y’Ibirunga igiye kwagurwa #Rwanda #RwOT via @kigalitoday #rwanda #RwOT

    Kamwe mu duce tugize Pariki y
    Kamwe mu duce tugize Pariki y’Igihugu y’Ibirunga

    Mu kiganiro n’abanyamakuru cyabaye tariki 27 Kanama 2021 kigamije gusobanura uko umuhango wo kwita izina muri uyu mwaka wa 2021 uzakorwa, umuyobozi wa RDB wungirije w’agateganyo ushinzwe ibikorwa by’ubukerarugendo, Kageruka Ariella, yanagarutse ku buryo Pariki y’Igihugu y’Ibirunga igomba kwagurwa n’aho izagurirwa.

    Kageruka Ariella avuga ko kugira ngo barusheho kubungabunga ubuzima bw’ingagi hakozwe inyigo y’uko Pariki y’Igihugu y’Ibirunga igomba kwagurwa bikazakorwa mu byiciro.

    Ati “Hari gahunda yo kwagura Pariki y’Ibirunga, hakozwe inyingo igaragaza ko dukeneye hegitari 3740, izo hegitari ntabwo zose zizahita zagurwa icyarimwe, hazakorwa icyo nakwita prove of concept pilot phase ibasha kuduha ishusho ndetse inatugaragariza n’ibindi twakagombye mu nyingo zagiye zikorwa, iyo pilot phase irareba hegitari zirenga 400”.

    Ingagi muri Pariki y
    Ingagi muri Pariki y’Igihugu y’Ibirunga zirashakirwa aho kwisanzurira

    Kageruka avuga ko mu minsi iri imbere ingagi zishobora kuzaba zidafite aho gutura hahagije neza.

    Ati “Kubungabunga ingagi bifitiye mbere na mbere akamaro umuturage uhaturiye kuko 35% by’amafaranga ajya mu mishinga ifasha abaturage baturiye ibirunga, umuturage rero ari ku isonga ni we mugenerwabikorwa wa mbere muri iyi gahunda, kuko umuturage azubakirwa icyo twise smart village, abaturage bizaba ngombwa ko bimurwa n’ubundi bazatuzwa n’ubundi hafi hariya kandi bakazatuzwa heza ndetse bakazahabwa n’imirimo, uyu munsi turi mu nyigo igaragaza ibikorwa by’iterambere biteza umuturage imbere bizabasha gukorwa muri iyo gahunda”.

    Ibi byose ngo birateganyijwe, bikaba ari byo bizabanza gukorwa nyuma yo kwimura abaturage hakazakurikiraho gukorwa icyo bise restoration nk’uko Kageruka akomeza abisobanura.

    Ati “Nk’uko mubyumva ni ahantu hagiye hahingwa ibihingwa hagomba gusubira mu buryo ingagi cyangwa ibindi binyabuzima by’agasozi bituye muri iriya pariki bibasha kuhatura ariko hasubiye gusubizwa uko nakwita restoration activities”.

    Aho abaturage bazatuzwa muri smart villages ngo ntabwo hazaba hari gusa ibikorwa by’iterambere ryabo by’ubuhinzi n’ubworozi kuko hazaba hari n’uburyo gahunda zabo z’ubuzima zihuzwa n’ibikorwa by’ubukerarugendo ndetse no kubungabunga ibidukikije bikazabaha umusaruro urenze uwo bari bafite uyu munsi.

    Mu mwaka wa 2019 amafaranga yabonetse mu bukerarugendo ni miliyoni 498 z’Amadorari ya Amerika, mu gihe muri 2020 bitewe n’icyorezo cya Covid-19 yagabanutse akaba miliyoni 121.

    source : https://ift.tt/3gHyDcd

  • Uwafashije Manchester United kwisubiza Cristiano Ronaldo yamenyekanye #rwanda #RwOT

    Ku wa gatanu ni bwo Manchester United yemeje ko yageze ku masezerano yo kongera kugura Cristiano avuye muri Juventus.

    United yemeye gutanga miliyoni 12.8 z'amapawundi (agera kuri miliyari 17 mu mafaranga y'u Rwanda) kuri uyu rutahizamu w'Umunya-Portugal w'imyaka 36.

    Ayo masezerano akaba acyeneye kubamo ingingo zihariye, ibijyanye na 'visa' no gukorerwa ikizamini cy'ubuzima.

    Mu gihe cye cya mbere muri iyi kipe, Cristiano yatsinze ibitego 118 mu mikino 292, mbere yuko yerekeza muri Real Madrid mu 2009.

    Mu itangazo, United yagize iti: “Buri muntu wese mu ikipe afite amashyushyu yo kongera guha ikaze Cristiano muri Manchester”.

    Avuga ku kugaruka kwa Cristiano, Ferdinand yagize ati: “Sir Alex yabigizemo uruhare rukomeye. Nta kuntu Cristiano yari kuza muri Manchester United atabivuganyeho na Sir Alex. Ni uko bimeze nta kundi”.

    Ferdinand yongeyeho ati: “Gukurikiranirwa hafi kw'ikipe, gukurikiranirwa hafi kw'abandi bakinnyi – ntabwo wabona amagambo wavugamo icyo bigiye gukora ku bakinnyi n'abafana”.

    “Muri uyu mwaka azagutsindira ibitego biri hagati ya 25 na 30. Ibyo ni byo akora – mu mwaka ushize yarushije ibitego Romelu Lukaku muri Serie A, ariko icyo ashobora gukora kuri Mason Greenwood, Marcus Rashford na Jadon Sancho cyonyine kirahagije ngo abe uwo kuzana”.

    “Azabereka icyo bivuze kuba umunyamwuga wo mu rwego rwa mbere, igihangange cya nyacyo no guhorana ishyaka [ryo gutsinda] umunsi ku munsi”.

    Avugira mu kiganiro BBC Radio 5 Live, Michael Owen na we wakiniye United yongeyeho ati: “Manchester United icyeneye rutahizamu wo hagati ushobora gutsinda ibitego birenga 25 ku mwaka; hashize igihe uwo nta we bafite”.

    “Ntabwo [Cristiano] aje guhumuriza abafana, azakina mu mikino yose ikomeye. Rwose aracyifitemo umwaka cyangwa ibiri yindi aho ashobora gutsinda ibitego birenga 20”.

    “Ashoboye gutsinda ibitego 30 muri uyu mwaka byandenga nkabura icyo mvuga, ariko nta kintu na kimwe navuga ko kidashoboka kuri we, n'ubu”.

    Owen Hargreaves, mu 2008 wegukanye Champions League ari kumwe na Cristiano, yagize ati:

    “Ndibuka umunsi wanjye wa mbere nitoza hamwe na we. Yabaga uwa mbere ku kugera ku kibuga cy'imyitozo, umuntu wa mbere wageraga mu bwogero bwa barafu n'umuntu wa mbere wageraga muri gym [ahakorerwa imyitozo ngororangingo]”.

    “Mwibuka akora imyitozo yo kugarama uhagurutsa igihimba [sit-ups] yasoza akicara akavuga ati: 'Mu mpera y'uyu mwaka ngiye kuba umukinnyi wa mbere w'intyoza ku isi'. Kandi yaramubaye.

    “Ubwitange bwe ku kazi ke bungana n'impano ye, bikaba ari ikintu kidasanzwe”.

    “Buri wese atekereza ko icyo aba ashaka cyonyine ari ukwishyira imbere we gusa, ariko ashaka gutsinda. Agarutse muri United gutsinda kandi ni yo mpamvu ntekereza ko nk'uwo gutanga urugero kuri aba basore bo muri United, ari we ukwiriye kandi bizanogera amaso kubireba”.

    BBC

    Source : https://umuryango.rw/imyidagaduro/imikino/article/uwafashije-manchester-united-kwisubiza-cristiano-ronaldo-yamenyekanye