Webrwanda Backend

Category: Uncategorized

  • Mashami Vincent yatangaje 23 b' Amavubi bazacakirana na Mali na Kenya. #rwanda #RwOT

    Kuri uyu wa Gatanu tariki ya 27 Kanama 2021, umutoza w'ikipe y'igihugu Mashami Vincent nibwo yatangaje urutonde rw'abakinyi bazahura na Mali ndetse na Kenya mu mikino y'amajonjora yo gushakisha itike yo kwerekeza mu gikombe cy'Isi kizabera muri Qatar umwaka 2022.

    Nk' uko amakuru abivuga, uretse rutahizamu Kevin Monnet Packet utaritabiriye ubutumire, abandi bakinnyi bose bagaragara kuri uru rutonde batageze mu gihugu ngo bakore umwiherero na bagenzi babo, bazahurira muri Maroke, bakomerezeho bakina n'ikipe y'igihugu ya Mali.

    Abakinnyi barimo NGWABIJE Bryan Clovis, MANZI Thierry, RWATUBYAYE Abdul, RAFAEL York, MUKUNZI Yannick, BIZIMANA Djihad baturuka ku mugabane w'i Burayi bazifashishwa harimo abazahurira n'Ikipe y'Igihugu muri Maroc kuko bafite imikino mu makipe basanzwe bakinira, bakiyongeraho IMANISHIMWE Emmanuel usanzwe akina muri Maroc.

    ABAKINNYI BAZIFASHISHWA KU MIKINO YA MALI NA KENYA

    ABANYEZAMU

    MVUYEKURE Emery
    BUHAKE Twizere Clément
    NDAYISHIMIYE Eric

    AB'INYUMA

    FITINA Omborenga
    RUKUNDO Denis
    RUTANGA Eric
    IMANISHIMWE Emmanuel
    RWATUBYAYE Abdul
    MANZI Thierry
    NIRISARIKE Salomon
    NGWABIJE Bryan Clovis
    BAYISENGE Emery

    ABO HAGATI

    BIZIMANA Djihad
    TWIZERIMANA Martin Fabrice
    MUHIRE Kévin
    MUKUNZI Yannick
    NIYONZIMA Olivier
    NIYONZIMA Haruna

    AB'IMBERE

    KAGERE Medie
    TUYISENGE Jacques
    BYIRINGIRO Lague
    TWIZERIMANA Onesme
    HAKIZIMANA Muhadjir.

    Source : https://impanuro.rw/2021/08/28/mashami-vincent-yatangaje-23-b-amavubi-bazacakirana-na-mali-na-kenya/

  • Amavu n’amavuko y’ikipe y’igihugu, amwe mu mateka yayo, inkomoko y’izina 'Amavubi’ rikomeje kubabaza benshi #rwanda #RwOT

    Harabura iminsi mike ngo Amavubi atangire urugamba rwo gushaka itike y’igikombe cy’Isi cya 2022, gusa uwavuga ko abakunzi bayo bishimye muri iyi minsi, yaba abeshye icya Semuhanuka. Benshi banyotewe no kuyibona itsinda umusubirizo, uyu munsi tugiye gusubiza amaso inyuma turebe bimwe mu bihe by’ingenzi by’ikipe y’igihugu ndetse n’aho izina ‘Amavubi’ ryakomotse.

    Igihugu cyabonye Ubwigenge tariki ya 1 Nyakanga 1962. Ishiyirahamwe ry’umupira w’amaguru mu Rwanda 'FERWAFA’ ryashyizwe mu 1972. Ryaje kwemezwa nk’umunyamuryango w’Impuzamashyirahamwe y’Umupira w’Amaguru ku Isi 'FIFA’ ndetse n’Impuzamashyirahamwe y’Umupira w’Amaguru muri Afurika 'CAF’ mu 1976.

    Umukino wa mbere uzwi n’aya mashyirahamwe u Rwanda rwawukinnye tariki ya 29 Kamena 1976 aho rwatsinzwe n’u Burundi 6-2 mu mukino wabereye muri Gabon.

    Ntabwo byoroshye kuba wabona amateka y’ikipe y’igihugu Amavubi, muri iyi nkuru ISIMBI yagerageje guhuza bimwe mu byanditswe biri mu bubiko ndetse inavugana n’umwe mu bakiniye ikipe y’igihugu bwa mbere, tugiye kubagezaho amavu n’amavuko y’Amavubi ndetse na bimwe mu bigwi byayo.

    Bwa mbere ikipe y’igihugu ihamagarwa byari mu 1964 ariko byari ugukora imyitozo gusa, harimo abakinnyi nka Butare, Hardi, Kamatari, Rutanga Pierre, Nshimyumurwa Denis.

    Yongeye guhamagarwa mu 1970, irimo abakinnyi nka Runyinya, Mbaraga, Nshimyumurwa, Donat, Kamatari, Ngezi, nabwo byari ugukora imyitozo gusa.

    Nk’ibisanzwe usanga amakipe y’ibihugu aba afite andi mazina azwiho(nicknames), akenshi agenda yisanisha n’imyamaswa z’inkazi mu kugaragaza ubukana bw’ikipe yabo, inyamaswa zifite icyo zisobanuye mu muco wabo cyangwa ikindi kintu gifite ubusobanuro cyane kuri icyo gihugu, nka Uganda yitwa 'Uganda Cranes(Imisambi ya Uganda)’ iyo urebye mu ibendera ry’iki gihugu harimo umusambi, Tanzania ni 'Taifa Stars(Inyenyeri z’igihugu)’ Cote d’Ivoire yitwa 'Les Éléphants
    (Inzovu)’ n’andi menshi.

    U Rwanda rwahisemo kwitwa Amavubi, agakoko gato k’inigwa habiri ariko kagira ubukana, akenshi ubwumva iyo kakudwinze.

    Iyo ubajije abantu ntabwo bakubwira umwaka nyirizina, ikipe y’igihugu yahawe akabyiniriro k’Amavubi, izina ryafashe kugeza n’uyu munsi.

    Kanamugire Aloys wakiniye ikipe y’igihugu yahamagawe bwa mbere igiye gukina amarushanwa mu 1976, yabwiye ISIMBI ko nabo batazi aho icyo gitekerezo cyavuye ariko icyo gihe babwiwe na Minisiteri ko batanze itangazo mu baturage ngo batange izina ryakwitwa ikipe y’igihugu, bagatoranyamo Amavubi.

    Yagize ati 'mu by’ukuri kuvuga ngo iryo zina ryavuye he kuko icyo gihe nanjye nari nk’iri umukinnyi, ariko ibyo nagiye numva ntangiye gukora muri iyo Minisiteri, ni itangazo ryatanzwe mu baturage bavuga ngo buri wese arebe izina yakwita ikipe y’igihugu, batanze amazina menshi ariko nyuma yaho bemeza ko ikipe izitwa Amavubi, bambwiye ko uwaritanze impamvu yarihisemo ari uko Amavubi adwinga ntashireyo, aradwinga agashira ariko ejo hakaza andi nayo akadwinga. Icyo nicyo gisobanuro bampaye.'

    Amavubi 1978: Abahagaze uhereye ibumoso, Dusange Jean Pierre, Mugemana, Kassim, Dr Ndagijimana Emmanuel, Bayingana, Ntacyabukura Sabbit, Rugirangoga na Runuya. Abicaye ni; Kirenga Louis, Minani, Habantake, Alfred, Kamali, Enos Gatari, Kanamugire Aloys na Baruwani Suedi

    Bwa mbere ikipe y’igihugu yahamagawe igiye gukina amarushanwa hari mu 1976, yari igiye gukina amarushanwa yo muri Afurika yo hagati(central African football competition) ryabereye muri Gabon, yatozwaga n’umudage Otto Pifster, bamwe mu bakinnyi bahamagawe icyo barimo Bapfakurera Alfred, Kamatali, Ndiramiye Gabon, Antoine wa Nyanza, Karenzi, Aloys Kanamugire, Deo Kanamugire, Nshimyumurwa, Rutanga, Nyinyoli, Donat, Mike, Jumapili, Barabwiriza Runyinya n’abandi.

    Iri rushanwa ni naryo rigaruka mu bihe bibi u Rwanda rwatsinzwemo ibitego byinshi mu mateka yayo, uretse kuba baratsinzwe n’u Burundi 6-2 mu mukino wabo wa mbere, batsinzwe na Cameroun 5 — 0, tariki ya 7 Nyakanga 1976, rutsindwa na DR Congo icyo gihe yari Zaire, hari tariki ya 12 Nyakanga 1976.

    Ibi byiyongera ku bitego 5-0 Amavubi yatsinzwe na Tunisia tariki ya 10 Mata 1983 mu gushaka itike y’igikombe cy’AfurikaTunisia.

    Kubera Jenoside yakorewe Abatutsi muri Mata 1994, u Rwanda rwisanze mu bihe bitatumaga rwashyira umutima kuri ruhago, ndetse na nyuma ya Jenoside byafashe imyaka kugira ngo rwisuganye ari nacyo gihe Imisambi ya Uganda yayadonze inshuro 5 zose nta rubori rw’Ivubi rwabashije kuyihamya, hari tariki ya 1 Kanama 1998.

    Mu gushaka itike y’igikombe cy’Isi cyo mu 1998 u Rwanda rwakuwemo na Tunisia mu ijonjora rya mbere, icya 2002 rwakuwemo Cote d’Ivoire mu ijonjora rya mbere.

    Bimwe mu bihe byiza bitibagirana u Rwanda rwagize, harimo kuba Rwanda B yaregukanye irushanwa rihuza ibihugu byo ku karere ka Afurika y’Iburasirazuba n’iyo hagati(CECAFA) mu 1999, hari nyuma yo gutsinda ku mukino wa nyuma Kenya ibitego 3-1 bya Ndindiri Mugaruka, Nshizirungu Hubert Bebe na Ndizeye ni mu gihe Kenya yatsindiwe na Kimuyu.

    Icyo gihe u Rwanda rwari rufitemo amakipe 2, Rwanda A na Rwanda B, impamvu ni uko igihugu cyabaga cyakiriye cyahabwaga amahirwe yo kugiramo amakipe 2.

    Rwanda B yegukanye CECAFA: Uhereye iburyo abahagaze, umunyezamu Ishimwe Claude, Batu Jean, Ndindiri Mugaruka na Gishweka Faustin. abapfukamye ni; Sibo Abdul, Munyaneza Djuma, Habimana Sostene, abicaye; Rusanganwa Fredy Ntare, Hassan, Nshizirungu Hubert Bebe na Muronda Jean Pierre.

    Igitego cy’umutwe cya Jimmy Gatete ku mupira wari uvuye kuri Ntaganda Elias, cyahesheje u Rwanda intsinzi imbere ya Ghana kuri Stade Amahoro tariki ya 6 Nyakanta 2003 ndetse ruhita rubona itike y’igikombe cy’Afurika cya 2004 cyabereye muri Tunisia, akaba ari nacyo gikombe rukumbi u Rwanda rwitabiriye, ndetse benshi bakurikirana umupira w’amaguru bemeza ko ari byo byishimo bikomeye cyangwa intsinzi ikomeye Amavubi yagize.

    Muri iki gikombe cy’Afurika ntabwo u Rwanda rwabashije kurenga itsinda A rwari rwisanzemo, rwasoje ku mwanya wa 3 n’amanota 5, nyuma ya Guinea ya kabiri yari ifite 5, Tunisia yari ifite 7 ni mu gihe DR Congo yasoje n’ubusa iri ku mwanya wa nyuma.

    U Rwanda rwatangiye rutsindwa na Tunisia 2-1 Ziad Jaziri ku munota wa 27 na Francileudo dos Santos ku munota wa 57 nibo batsindiye Tunisia ni mu gihe u Rwanda rwatsindiwe na Joao Rafael Elias ku munota wa 32.

    Umukino wa kabiri rwanganyije na Guinea 1-1, Karim Kamanzi ni we watsindiye Amavubi ku munota wa 93 yishyura igitego cya Aboubacar Titi Camara wari watsinze ku munota wa 49.

    Amavubi yasoje itsinda atsinda DR Congo igitego 1-0 cya Said Abed Makasi ku munota wa 74.

    Mu gushaka itike y’igikombe cy’Isi cya 2006, Amavubi yatsinze Namibia mu ijonjora rya mbere ariko isoza ku mwanya wa nyuma mu cyiciro cya 2 inyuma ya Angola, Nigeria, Gabon, Zimbabwe na Algeria.

    Ibitego byinshi Amavubi yatsinze mu mateka yayo hari tariki ya 13 Ukuboza 2007 Dar es Salaam muri CECAFA ubwo batsindaga Djibouti 9-0, Karekezi Olivier yatsinzemo 2, Ahmed Abdi yitsinze igitego, Kamana Bokota Labama atsinda 3, Roger Tuyisenge atsinda 1, Elias Uzamukunda atsindamo kimwe na Hegman Ngomirakiza na we yatsinze 1.

    Tariki ya 10 Nzeri 2019 Amavubi yatsinze Seychelles 7-0 mu mu ijonjora ry’ibanze ryo guashaka itike y’igikombe cy’Isi cya 2022, Jacques Tuyisenge na Meddie Kagere buri umwe yatsinze 2, Djihad Bizimana, Yannick Mukunzi na Hakizimana Muhadjiri buri umwe atsinda 1.

    Amavubi yakinnye igikombe cy’Afurika cya 2004, iyi yakinnye umukino ufungura na Tunisia. Uhereye ibumoso abahagaze ni; Nkunzingoma Ramazan (goalkeeper), Bizagwira Leandre, Ndikumana Kataut, Said Abed, Karekezi Olivier na Nshimiyimana Eric. Abicaye ni; Ntaganda Elias, Nshimiyimana Canisius, Mbonabucya Desire, Manamana na Sibomana Abdul

    Uretse igikombe cya CECAFA cyo mu 1999 Rwanda B yegukanye, Amavubi amaze kugera ku mukino wa nyuma wa CECAFA inshuro 5 zose ariko ntarabasha kwegukana iki gikombe, aho muri 2003 igikombe cyabereye muri Sudani, Amavubi yatsinzwe na Uganda ku mukino wa nyuma 2-0, 2005 cyabereye mu Rwanda, Amavubi atsindwa na Ethiopia ku mukino wa nyuma 1-0, 2007 cyabereye muri Tanzania maze u Rwanda rutsindwa na Ethiopia ku mukino wa nyuma kuri penaliti 4-2, ni nyuma y’uko bari banganyije 2-2.

    2009 Amavubi yongeye gutsindirwa ku mukino wa nyuma na Uganda 2-0, igikombe cyabereye muri Kenya, 2011 ku nshuro ya 3 Uganda yatsindiye Amavubi ku mukino wa nyuma wa CECAFA, amakipe yombi yanganyije 2-2 aho ibitego by’Amavubi byombi byatsinzwe na Kagere Meddie, bageze muri penaliti Uganda itsinda 3-2, yari yabereye muri Tanzania, 2015 yabereye Ethiopia, Uganda n’Amavubi nizo zageze ku mukino wa nyuma nabwo Uganda itwara igikombe itsinze 1-0.

    Umusaruro w’ikipe y’igihugu Amavubi ntabwo ari mwiza ugereranyije n’ibihugu by’ibituranyi nka DR Congo yegukanye igikombe cy’Afurika cyo mu 1974 ndetse kujya muri iki gikombe yabigize akamenyerero.

    Uganda yasoje ku mwanya wa kabiri mu gikombe cy’Afurika cyo mu 1978 ndetse kwitabira igikombe cy’Afurika kuri yo si inkuru, biba inkuru iyo itagiyeyo. Hari u Burundi, Tanzania ndetse na Kenya nazo zisa nk’aho zirimo kugenda zisiga u Rwanda.

    Ibi akenshi iyo urebye usanga bishingira ku kuba nta gahunda ihamye ihari yo gutegura ndetse no kwimakaza umuco w’iterambere rya ruhago rishingiye ku bana cyane ko igihe bateguwe batanze umusaruro nk’aho 2011 bitabiriye igikombe cy’Isi cy’abatarengeje imyaka 17 muri Mexique.

    Muri 2014 u Rwanda rubuze itike y’igikombe cy’Afurika cya 2015 nyuma yo gutsinda Congo Brazaville ariko bagasanga Daddy Birori hari andi mazina akiniraho muri Congo, u Rwanda rwacitse ku muco wo guha abakinnyi baturuka mu bindi bihugu ubwenegihugu ngo bakinire u Rwanda, aho n’umukuru w’igihugu, Perezida Kagame yigeze kubigarukaho avuga ko kugura abakinnyi ubazana mu ikipe y’igihugu uretse no mu Rwanda nta n’ahandi byigeze biba igisubizo bityo ko bikwiye guhinduka ahubwo hagashyirwa imbaraga mu gutegura.

    Perezida Kagame ni kenshi yagiye agaragaza ko ashyigikiye y’igihugu Amavubi ariko yo ikamutenguha, kugeza aho yanasabye ko gukina babireka bakajya bakurikirana iby’aho babizi.

    Kuva mu 1930 igikombe cy’Isi kibaye bwa mbere kugeza mu 1994 Amavubi ntabwo yigeze yitabira iki gikombe, 1998, 2002 na 2006 yaviriyemo mu ijonjora ry’ibanze, 2010 yageze mu ijonjora rya nyuma ariko ntiyahirwa, 2014 yarenze ijonjora ry’ibanze gusa, 2018 ntiyakinnye ijonjora ry’ibanze ariko yaviriyemo mu cyiciro gikurikiyeho ikuwemo na Libya ku bitego 4-1.

    Mu gikombe cy’Afurika cyatangiye mu 1957, Amavubi yatangiye gushaka itike yacyo mu 1982 aho yaviriyemo mu ijonjora kimwe no mu 1984. Yongeye kugaruka mu 2000 aviramo nabwo mu ijonjora kimwe no mu 2002. 2004 Amavubi yabonye itike y’igikombe cy’Afurika, kimwe rukumbi yitabiriye, kuva icyo gihe kugeza ku gikombe cy’Afurika cya 2021 kizakinwa muri Mutarama 2022 ntabwo Amavubi arongera kubona itike yacyo, uretse icya 2015 yari yabonye itike ariko agakurwamo kubera umukinnyi(Daddy Birori) wakiniraga ku byangombwa bitandukanye.

    Amateka agaragaza ko Haruna Niyonzima ari we mu mukinnyi umaze gukinira ikipe y’igihugu y’u Rwanda imikino myinshi y’amarushanwa nta ya gishuti irimo, aho kuva muri 2006 ahamagawe bwa mbere kugeza uyu munsi amaze gukina imikino 105, muri yo mikino ari kumwe n’Amavubi batsinze imikino 33, banganya 25 batsindwa 47, binjije ibitego 102 binjizwa 125, muri ibyo bitego afitemo 6 aho aheruka gutsinda igitego tariki ya 26 Ugushyingo 2012 muri CECAFA yabereye Uganda, u Rwanda rutsinda Malawi 2-0, harimo igitego cye, akaba ari ku mpuzandengo ya 43.33%.

    Hagiyemo n’imikino ya gishuti Karekezi Olivier ni we ufite imikino myinshi aho afite 134 mu gihe Haruna ari 133 nk’uko ububiko bw’umwe mu banyamakuru b’imikino mu Rwanda, Nkusi Denis uzwi nka Mtangazaji bubigagaragaza

    Ububiko bw’uyu munyamakuru kandi bugaragaza ko, Karekezi ari we watsindiye Amavubi ibitego aho yayitsindiye ibitego byinshi ni Olivier Karekezi watsinze ibitego 38 mu mikino 134 yayikiniye.

    Haruna Niyonzima ni we umaze gukinira Amavubi imikino myinshi

    Olivier Karekezi ni we watsindiye Amavubi ibitego byinshi

    Umusaruro w’Amavubi muri iyi minsi ntumeze neza

    Source : http://isimbi.rw/siporo/article/amavu-n-amavuko-y-ikipe-y-igihugu-amwe-mu-mateka-yayo-inkomoko-y-izina-amavubi-rikomeje-kubabaza-benshi

  • GS Remera Catholique yahawe ubwiherero bugezweho – #rwanda #RwOT

    Sato Rwanda ni ikigo gisanzwe gikora ubucuruzi bw’ubwiherero n’ibindi bikoresho bifasha mu isuku n’isukura bigezweho. Ubu bwiherero bufite umwihariko w’uko buba bukozwe muri ‘plastique’ kandi bugaterekwa hejuru y’imisarane isanzwe mu rwego rwo kwimakaza isuku no gufasha abana bato bayitinya.

    Kuri uyu wa Gatanu tariki ya 27 Kanama 2021, ubwo bagezwagaho ubu bwiherero buzwiho kurwanya umwanda no gukumira indwara ziterwa na wo, abarezi, abayobozi n’ababyeyi barerera muri GS Remera Catholique bagaragaje ko bishimiye iyi nkunga izabafasha guhangana n’ikibazo cy’isuku nke.

    Ubuyobozi bwa Sato Rwanda bwabanje gusobanurira ubw’ishuri n’abarezi mu buryo bwimbitse uko ubu bwiherero bukoreshwa ndetse n’icyo buzafasha abanyeshuri mu myigire yabo.

    Umuyobozi wa Sato Rwanda, Ntaganira Cyrus, yavuze ko bitewe n’umwihariko w’ubwiherero bwa Sato abana bazabasha gutinyuka kubukoresha ndetse n’indwara zishobora guterwa n’umwanda zikumirwe.

    Yagize ati “Kuba twabashije kubatera iyi nkunga, abana bahigira bazagira ubuzima buzira umuze kubera ko za ndwara na ya masazi batazongera guhura na byo. Hano higa abana benshi barenga ibihumbi bibiri, muri bo harimo na ba bandi b’incuke bato. Bamwe batinyaga gukoresha ya misarane yo hanze bafite impungenge ko bashobora kugwamo ariko iyi yacu umwana muto aba ashobora kuyikoresha bimworoheye.”

    Yagaragaje ko umwihariko w’umusarane wa Sato Rwanda, ari imiterere yawo yo kwimakaza isuku bidatwaye amazi menshi kandi mu buryo bworoshye.

    Ati “Sato ikoresha amafaranga make mu kuyisukura, byumvikane ko n’amazi bakoreshaga nayo azagabanuka cyane. Birumvikana ko bizagira umusaruro mwiza cyane ku bana bagana iki kigo.”

    Yagaragaje ko ikindi cy’umwihariko ari uko imisarane ya Sato idakoreshwa mu bice by’umujyi gusa ahubwo no mu cyaro bayiyobotse.

    Impamvu ikoreshwa na buri wese ni uko umusarane wa Sato washyirwa ku wo ari wo wose ngo nubwo waba utindishije ibiti, sima, amakaro cyangwa itaka.

    Umuyobozi wa GS Remera Catholique, Mujawamariya Odette, yavuze ko iyi misarane bahawe igiye kubafasha kunoza isuku.

    Ati “Dutoza abana kugira isuku, ibi rero bizadufasha cyane kuko nta mpumuro mbi izava mu musarani. Baduhaye ibikoresho bidufasha ku buryo gukaraba intoki dukoresha amazi make. Uruhare rwacu ni ukubibungabunga no gutoza abana kubifata neza ndetse n’ibyangiritse tukaba twabisimbuza.”

    Umubyeyi uhagarariye abandi barerera muri GS Remera Catholique, Umutesi Marie Louise, yashimye Sato Rwanda yabatekerejeho, anayizeza ubufatanye mu gushishikariza abatuye mu bice bya Remera kurushaho kwitabira gukoresha ubwiherero bwayo.

    Ati “Isuku ni isoko y’ubuzima kandi abana bizabafasha mu myigire yabo. Ibi bikorwa twabihawe n’umuterankunga ku buntu ariko kugira ngo natwe tumutere ingabo mu bitugu ni uko twagerageza kwishakamo ubushobozi bwo kugira ngo umwana nagira isuku ku kigo anayigire mu rugo. Atazakura umwanda mu rugo akawuzana ku ishuri n’ubundi ntacyo byaba bimaze. Tuzashishikariza n’abandi babyeyi kugira ngo natwe tugire ibi bikorwa bya Sato mu rugo.”

    Kuva Sato yatangira gukorera mu Rwanda mu 2017 yayobotswe n’abatari bake. Kugeza ubu ifite imisarane y’ubwoko butatu kandi igezweho, ifite umwihariko wo kwifunga no kwifungura kandi yakoreshwa aho ari ho hose mu gihugu.

    Ubu bwiherero buzafasha abanyeshuri ba GS Remera Catholique kwimakaza isuku

    Abayobozi n’abarezi bagaragaje ko bishimiye kuba ishuri ryabo ryahawe ubu bwiherero

    Amazi ari mu icupa ashobora gukoreshwa n’abantu barenga 10

    Biyemeje gutangira ubukangurambaga ku gukoresha imisarane ya Sato

    Habayeho gusobanura byimbitse imikorere y’iyo misarane

    Hari n’imisarane yorohereza abageze mu zabukuru cyangwa abafite ubumuga

    Imiterere yayo yorohereza buri wese kuyikoresha

    Kugeza ubu hari ubwoko butatu bw’imisarane ya Sato Rwanda kandi bugezweho

    Umuyobozi wa Sato Rwanda, Ntaganira Cyrus, yasabye abantu gutangira kwifashisha iyi misarane kubera inyungu zitandukanye zibirimo

    Ubwo hatahwaga ku mugaragaro ibikorwa bya Sato Rwanda yahaye amashuri

    Amafoto: Niyonzima Moïse

    source : https://ift.tt/3sVtEJG

  • Chancelière Angela Merkel yahaye ikaze Perezida Kagame ku biro bye (Amafoto) – #rwanda #RwOT

    Iyi nama yabaye hagati ya tariki 26-27 Kanama 2021, yayobowe na Chancelière Markel, yitabirwa n’abakuru b’ibihugu na za guverinoma zigize G20, abashoramari, abacuruzi n’abandi bafatanyabikorwa.

    Mu butumwa yagejeje ku bitabiriye iyi nama Perezida Kagame, yagaragaje ko kuba Afurika yaruguruye amarembo ku bucuruzi n’ishoramari ritanga umusaruro kandi ubucuruzi ari inzira igana ku iterambere.

    Yagize ati “Afurika yuguruye amarembo ku bucuruzi no ku ishoramari ritanga umusaruro kandi ubucuruzi ni inzira igana ku iterambere n’umudendezo.”

    Yakomeje agira ati “Mu Rwanda, twabonye ubwiyongere bw’abacuruzi b’Abadage n’abashoramari. Turabyishimiye kandi twifuje kubona byinshi. Ikibazo kiri imbere yacu ni uguhindura ubushake bukomeye bwa politiki mu bisubizo bifatika bigaragara.”

    Umukuru w’Igihugu kandi yashimiye Chancelière w’u Budage, Angela Merkel, ku bw’iri huriro rigamije guteza imbere Afurika, ashimangira ko ari rumwe mu ngero nyinshi z’uruhare rwe bwite, imiyoborere no gufata ibyemezo bikwiye bikomeje kumuranga.

    Iri huriro rya G20 compact with Africa ryatangijwe n’u Budage mu mwaka wa 2017, ubwo bwayoboraga itsinda ry’ibihugu 20 bikize ku Isi.

    Kugeza ubu ibihugu 12 bya Afurika ni byo biri muri iri huriro ari byo Benin, Burkina Faso, Côte d’Ivoire, Misiri, Ethiopia, Ghana, Guinea, Morocco, Rwanda, Sénégal, Togo na Tunisia.

    Iri huriro riyobowe n’u Budage bufatanyije na Afurika y’Epfo, nka kimwe mu bihugu bigize iry’ibihugu 20 bikize ku Isi.

    Chancelière w’u Budage, Angela Merkel yahaye ikaze Perezida Kagame

    Abakuru b’ibihugu byombi bagendaga baganira

    Moussa Faki Mahamat uyobora Komisiyo y’Umuryango wa Afurika Yunze Ubumwe (AU) ari kumwe na Chancelière w’u Budage, Angela Merkel

    Ibendera ry’u Rwanda ryazamuwe i Berlin mu Budage

    Nyuma y’iki kiganiro hafashwe ifoto y’urwibutso

    Amafoto: Village Urugwiro

    source : https://ift.tt/3jqxebX

  • Ababyeyi b’i Kigali bibukijwe inshingano bafite zo kubyara abo bashoboye kurera – #rwanda #RwOT

    Ibi ababyeyi babisabwe ku wa 24 Kanama 2021, ubwo hatangizwaga ubukangurambaga bwo kurwanya ubuzererezi mu bana bwateguwe n’Ikigo cy’Igihugu gishinzwe Igororamuco, NRS.

    Bwatangirijwe mu Murenge wa Kigali mu Karere ka Nyarugenge nka kamwe mu gace kagaragayemo abana b’inzererezi benshi.

    Umuyobozi wa NRS, Mufulukye Fred, yongeye kwibutsa Abanyarwanda by’umwihariko ababyeyi n’abayobozi n’izindi nzego zirimo amatorero amadini kugira uruhare mu kurinda abana kuba inzererezi.

    Yavuze ko abana benshi bavanwa mu muhanda bavuga ko bayigiyemo bahunga amakimbirane y’ababyeyi babo aturuka ku mpamvu zitandukanye.

    Yakomeje ati “Icyo twibutsaga ababyeyi ni izo nshingano, ikindi hari n’aho usanga nk’ababyeyi bafite umwana umwe, babiri cyangwa batatu, wamubaza impamvu bagiye mu muhanda akakubwira ngo nta bushobozi.’’

    “Icyo rero dusaba abyeyi niba abona nta bushobozi afite bwo kurera umwana ntabwo anakwiriye kumubyara, namureke igihe azabona ubushobozi abyare cyangwa se anafite ubushobozi bw’umwana umwe amubyare niba afite ubwa bana babiri abyare babiri ariko kubyarira mu muhanda kandi uvuga ngo nta bushobozi ufite ntabwo ibyo bintu bijyana.”

    Ikigo cy’Igihugu gishinzwe Igororamuco, NRS, kigiye gushyiraho gahunda cyise “Tubagororere mu Mudugudu” igamije kurwanya ubuzererezi bihereye mu mudugudu; izaba igizwe na Komite irimo abajyanama b’ubuzima n’inshuti z’umuryango n’abayobozi b’imidugudu n’abamasibo.

    Mukaremezo Fortunata ufite umwana wavuye mu muhanda agasubira mu ishuri yabwiye IGIHE ko yishimiye ko yafashijwe kwiga.

    Ati “Akiba mu muhanda nta mahoro nagiraga, hari ubwo namutekerezaga nkumva agahinda kagiye kunyica. Njye nkeka ko byose biterwa n’ubushobozi buke kuko ntabwo umwana yakunanira ngo ajya mu muhanda abona buri kintu cyose akeneye. Ndashima Leta yabadukuriye mu muhanda iri no kubishyurira ishuri.”

    Umwe mu bana bavuye mu muhanda agasubira mu ishuri, we yagaragaje ko ubwo yari muri ubwo buzima yari abayeho nabi cyane anashimangira ko nta cyiza cyo kuba mu muhanda. Yasabye bagenzi be bakiri mu buzererezi kubuvamo.

    Ikigo cy’Igihugu gishinzwe Igororamuco, NRS, cyemeza ko abana 3096 aribo bari baragiye mu muhanda mu gihe 2641 muri bo bavuyemo ndetse muri bo 223 basubiye mu ishuri.

    Mu murenge wa Kigali abana bagera kuri 59 bakuwe mu muhanda basubizwa mu ishuri bashimiye Leta

    source : https://ift.tt/3kCVR4C

  • U Rwanda rwemerewe ikoranabuhanga rikoreshwa mu gukora inkingo #Rwanda #RwOT via @kigalitoday #rwanda #RwOT

    U Rwanda na Sénégal bemerewe iri koranabuhanga nyuma y’ibiganiro byahuje Perezida Paul Kagame n’ibigo bitandukanye harimo na BioNTech yo mu gihugu cy’u Budage.

    Perezida Paul Kagame ari mu gihugu cy’u Budage kuva tariki ya 26 Kanama 2021 mu nama izwi nka G20, igamije kongera ishoramari muri Afurika, mu nzego z’abikorera.

    Muri iyi nama rimwe mu ishoramari ryagaragajwe harimo no gukora inkingo za Covid-19 ikomeje kuzambya ubukungu n’ishoramari ku isi, mu gihe umugabane wa Afurika ukiri hasi mu gutanga inkingo aho abamaze gukingirwa batarenze 2%.

    Inganda eshatu muri Afurika zemerewe gukora inkingo harimo uruganda ruri muri Sénégal, u Rwanda na Afurika y’Epfo.

    U Rwanda rukaba rugeze kure ibikorwa byo kwitegura gukora inkingo kimwe mu byari bitegerejwe akaba ari ikoranabuhanga rikoreshwa mu gukora inkingo.

    Perezida Paul Kagame mu kwezi kwa Kamena 2021 yatangaje ko umugabane wa Afurika ukeneye kwikorera inkingo kugira ngo ubone izihagije, aho gutegereza izivuye mu bindi bihugu.

    Yagize ati “Biroroshye Afurika igomba kuba umufatanyabikorwa ungana n’abandi bose bo ku Isi cyane iyo bigeze ku gukora inkingo aho gutegereza inkingo ziturutse aho hantu bazikorera.”

    Perezida Paul Kagame avuga ku nkingo zizakorerwa mu Rwanda yavuze ko bizaba ari umwihariko.

    Ati “Tuzaba turi mu hantu ku mugabane hazakorerwa inkingo, twakoranye n’inganda zifite ubunararibonye mu ikoranabuhanga rya mRNA, iri ikoranabuhanga rishya rikoreshwa mu bintu byinshi, mu buhinzi cyangwa ku bindi byorezo. Twamaze kuganira n’abafite iryo koranabuhanga turi kuganira n’abantu bazatanga inkunga mu buryo bw’amafaranga ndetse ndatekereza ko mu mezi make dushobora gutangira gukora ibitarigeze bibaho.”

    mRNA u Rwanda rwemerewe ni uburyo bushya buri kwifashishwa mu ikorwa ry’inkingo z’indwara zandura zirimo na COVID-19.

    mRNA ni bwo buryo inkingo z’Abanyamerika zirimo Moderna na Pfizer zakozwemo.

    source : https://ift.tt/38kkTj5

  • Hasobanuwe ikabazo cyatumye Rafael York atazakina umukino wa Mali #rwanda #RwOT

    Umukinnyi Rafael York wa Eskilstuna mu cyiciro cya kabiri muri Sweden ntabwo azakina umukino wa Mali kubera ko atarabona ibyangombwa byuzuye bimwemerera gukinira u Rwanda.

    Ku munsi w’ejo hashize nibwo Mashami Vincent yatangaje abakinnyi 23 azifashisha ku mikino ya Mali na Kenya mu gushaka itike y’igikombe cy’Isi cya 2022 kizabera muri Qatar.

    Mu ijoro ryo kuri uyu wa Gatandatu rishyira ku Cyumweru nibwo Mashami Vincent n’abakinnyi yatoranyije bahaguruka mu Rwanda berekeza Agadir muri Maroc ahazakinirwa umukino wa Mali tariki ya 1 Nzeri, ni mu gihe umukino wa Kenya uzaba tariki ya 5 Nzeri mu Rwanda.

    Benshi bahise batungurwa no kutabonaho Rafael York utarakinira u Rwanda umukino n’umwe ahahise hibazwa niba yaba yanze kwitabira ubutumire bw’Amavubi.

    Umuvugizi wa FERWAFA wungirije, Jules Karangwa yavuze ko uyu mukinnyi azaza ariko atazakina umukino wa Mali kubera ko atarabona ibyangombwa byuzuye bimwemerera gukinira Amavubi birimo na Passport y’u Rwanda.

    Ati “Rafael York arahari gusa bitewe n’uko ku mukino wa Mali ibyangombwa bisabwa kugira ngo umukinnyi akine umukino(eligible to play) bizaba bitaraboneka nka passport yatanzwe n’urwego rubishinzwe mu gihugu atayifite, birasaba ko ahura n’abandi muri Maroc hanyuma bakamufotora ndetse bakanafata n’ibikumwe bye nk’uko bisanzwe, hanyuma agahita akina umukino wa Kenya.”

    Biteganyijwe ko uyu mukinnyi no kwinjira mu gihugu cya Maroc azinjirira kuri passport ya Sweden cyane ko yo badasaba visa bitewe n’ubwumvikane bw’ibihugu byombi(Maroc na Sweden), nyuma nibwo hazahita hihutishwa gahunda yo kumushakira ibyangombwa nk’umunyaranda atangire gukinira Amavubi mu buryo bweruye.

    Rafael York uvuka kuri nyina w’umunyarwandakazi na se ukomoka muri Angola, niyitabira ubu butumire bizaba ari ubwa mbere aje kuko ubushize ahamagarwa ntiyaje kubera ko yari yanduye icyorezo Coronavirus.

    Rafael York ntazakina umukino wa Mali

    Source : http://isimbi.rw/siporo/article/hasobanuwe-ikabazo-cyatumye-rafael-york-atazakina-umukino-wa-mali

  • Umutoza w'Ikipe y'Igihugu MASHAMI Vincent yatangaje urutonde rw'abakinnyi 23 azifashisha mu mukino wa Mali #rwanda #RwOT

    Ikipe y'Igihugu y'u Rwanda Amavubi igiye kwerekeza mu gihugu cya Maroc mu mujyi wa Agadir aho izakinira umukino wa mbere n'Ikipe y'Igihugu ya Mali mu majonjora yo gushaka itike y'Igikombe cy'isi kizabera muri Qatar 2022.

    Amavubi azahaguruka I Kigali mu gicuku cyo ku wa 29 Kanama 2021 I saa saba z'ijoro. Ikipe y'Igihugu izakinira na Mali mu gihugu cya Maroc kubera ko nta kibuga na kimwe cyo muri Mali cyahawe uburenganzira bwo gukinirwaho imikino ya ''FIFA World Cup Qatar 2022 Qualifiers.''

    Umutoza w'Ikipe y'Igihugu bwana MASHAMI Vincent yatangaje urutonde rw'abakinnyi 23 azifashisha muri uwo mukino kimwe n'umukino u Rwanda ruzakiramo igihugu cya Kenya ku wa 5 Nzeri 2021 kuri Stade ya Kigali.

    Abakinnyi barimo NGWABIJE Bryan Clovis, MANZI Thierry, RWATUBYAYE Abdul, RAFAEL York, MUKUNZI Yannick, BIZIMANA Djihad baturuka ku mugabane w'iburayi bazifashishwa harimo abazahurira n'Ikipe y'Igihugu muri Maroc kuko bafite imikino mu makipe basanzwe bakinira. Aba biyongeraho IMANISHIMWE Emmanuel usanzwe akina muri icyo gihugu cya Maroc.

    Ikipe y'igihugu Amavubi Stars izakina na Mali ku wa gatatu tariki ya 1 Nzeri 2021 I saa mbiri za Kigali, nyuma y'uwo mukino Ikipe y'Igihugu izakira Kenya mu mukino w'umunsi wa kabiri mu itsinda E uzabera kuri Stade ya Kigali.

    Abakinnyi bazifashishwa ku mukino wa Mali:

    ABANYEZAMU
    MVUYEKURE Emery
    BUHAKE Twizere Clément
    NDAYISHIMIYE Eric

    AB'INYUMA
    FITINA Omborenga
    RUKUNDO Denis
    RUTANGA Eric
    IMANISHIMWE Emmanuel
    RWATUBYAYE Abdul
    MANZI Thierry
    NIRISARIKE Salomon
    NGWABIJE Bryan Clovis
    BAYISENGE Emery

    ABO HAGATI
    BIZIMANA Djihad
    TWIZERIMANA Martin Fabrice
    MUHIRE Kévin
    MUKUNZI Yannick
    NIYONZIMA Olivier
    NIYONZIMA Haruna
    RAFAEL York

    AB'IMBERE
    KAGERE Medie
    TUYISENGE Jacques
    BYIRINGIRO Lague
    TWIZERIMANA Onesme
    HAKIZIMANA Muhadjir

    The post Umutoza w'Ikipe y'Igihugu MASHAMI Vincent yatangaje urutonde rw'abakinnyi 23 azifashisha mu mukino wa Mali appeared first on RUSHYASHYA.

    Source : https://rushyashya.net/umutoza-wikipe-yigihugu-mashami-vincent-yatangaje-urutonde-rwabakinnyi-23-azifashisha-mu-mukino-wa-mali/?utm_source=rss&utm_medium=rss&utm_campaign=umutoza-wikipe-yigihugu-mashami-vincent-yatangaje-urutonde-rwabakinnyi-23-azifashisha-mu-mukino-wa-mali

  • Icyo Imana yakuvuzeho kiruta icyo amateka yamaze kukwandikaho -Dominic Ashimwe #rwanda #RwOT

    Yesu Ashimwe benedata dusangiye gucungurwa muri Kristo Yesu! Amateka ya buri muntu ntacyo ya yahinduraho kuko ntiyayasibanganya nubwo yaba ari mabi gute! (Mu mateka ntibeditinga-Pst Desire niko yavuze). Nubwo bimeze bityo ariko, umuramyi, umuhanzi akaba n’umuririmbyi w’izihimbaza Imana, Ashimwe Dominic agaragaza ko nitudacika intege tuzagera ku cyo Imana yadusezeranyije. Kuko ntibeshya! Dominic ati”

    Hari icyo Imana yakuvuzeho mbere yuko ubaho, hari icyo Imana yibwira ku mibereho yawe ni yo mpamvu igusaba guhora imbere yayo, kugira ngo uhishurirwe urutonde rw’ibyiza igufiteye byose. Kwegera Imana niko kwiza kuri njye nawe.

    Ndakwifuruza ubuzima bwiza bwuzuye imbaraga zo guhangana n’ibikurwanya, ibigoye inzozi zawe, umuhamagaro wawe, ndetse n’ubuzima bwawe.

    Icyo Imana yakuvuzeho kiruta icyo amateka yamaze kukwandikaho! Kiruta ibyo abantu bavuga, kiruta ibyo Satani avuga. Nudacika intege uzagera ku cyo Imana yagusezeranyije. Kuko ntibeshya!

    Umusanzu wawe uroroshye, ni ugusangiza abandi ubu butumwa bwiza bw’ihumure.”

    Dominic Ashimwe niwe wasangije ubu butumwa, by’umwihariko ku bamukurikira kuri Instagram.

    Fungura hano urebe indirimbo: Ndacyagukunda-Dominic Ashimwe

    https://youtu.be/rfnfsaWFAME

    [email protected]

    Source : https://agakiza.org/Icyo-Imana-yakuvuzeho-kiruta-icyo-amateka-yamaze-kukwandikaho-Dominic-Ashimwe.html

  • Abantu 9 bahitanwe na Covid-19 mu Rwanda abandi 522 barayandura #rwanda #RwOT

    Minisiteri y'Ubuzima yatangaje ko kuri uyu wa Gatanu COVID-19 yahitanye abantu 9 mu Rwanda mu gjhe abarwayi bashya babonetse ari 522 bangana na 3.8% by'ibipimo.Abapfuye n'abagore 4 n'abagabo 5.

    Uyu munsi hakingiwe abantu bashya 87,401 bityo abantu bamaze gukingirwa bagera kuri1,425,407 mu Rwanda.Abahawe ibitaro ni 9 mu gihe abasezerewe ari 6.

    Mu gihe u Rwanda rutaragera nibura ku rugero rwa 60% bagomba gukingirwa, buri wese arasabwa kwitwararika no kubahiriza amabwiriza yo kwirinda ari yo gusiga intera ya metero, kwambara neza agapfukamunwa no gukaraba intoki kenshi bakoresheje amazi meza n'isabune cyangwa alukolo yabugenewe.

    Inzego z'ubuzima ziraburira abaturarwanda kwitwararika kuko mu Gihugu hari ubwoko bwa COVID-19 yihinduranyije bwitwa Delta bugize hafi 60% y'ubwandu bushya, bukaba bwandura vuba kandi bugatuma abantu banaremba vuba ndetse bamwe bakagira n'ibyago byinshi byo kubura ubuzima.

    Guhera ku wa gatandatu tariki ya 28.08.2021, mu Mujyi wa Kigali hazakomeza gukingirwa gusa abafata doze ya 2 y'urukingo rwa COVID-19 ku bigo nderabuzima n'abageze mu zabukuru basangishwa inkingo mu ngo.

    Abafata doze ya 1 bazamenyeshwa igihe gahunda izakomereza.


    Source : https://umuryango.rw/amakuru/mu-rwanda/ubuzima/article/abantu-9-bahitanwe-na-covid-19-mu-rwanda-abandi-522-barayandura