Webrwanda Backend

Category: Uncategorized

  • Nyagatare: Abayobozi b’Amasibo batangiye gusinya imihigo yo kwirinda Covid-19 #Rwanda #RwOT via @kigalitoday #rwanda #RwOT

    Biyemeje gukaza ingamba zo kwirinda Covid-19
    Biyemeje gukaza ingamba zo kwirinda Covid-19

    Akagari ka Rwisirabo, Umurenge wa Karangazi ni ko kabimburiye utundi, aho abayobozi b’Amasibo 49 bagiranye imihigo yo kwirinda Covid-19 n’abayobozi b’imidugudu.

    Umunyamabanga Nshingwabikorwa w’Akagari ka Rwisirabo, Mutesa Hope, avuga ko impamvu ba mutwarasibo biyemeje kugira uruhare runini mu gukumira Covid-19, ari uko hari abantu bakigaragara hirya no hino batubahiriza amabwiriza yo kuyirinda.

    Ati “Nyuma yo kubona ko hari abantu bagenda bagaragara batambaye udupfukamunwa, ba mutwarasibo biyemeje ubwabo kunoza ubukangurambaga, kugira ngo abaturage bose barusheho kumva akamaro ko kubahiriza amabwiriza ndetse banamenye ububi bw’icyorezo barusheho gukaza ingamba”.

    Urutse kurushaho kwigisha abaturage ububi bwa Covid-19 no kurushaho kubahiriza amabwiriza, ba mutwarasibo baniyemeje kumenya ingo zirimo abarwayi, bakamenya imibereho yabo ndetse bakanabafasha ku byo bakeneye kugira ngo badasohoka bakaba bakwirakwiza indwara.

    Abayobozi b’Amasibo bakazafatanya n’abayobozi b’imidugudu muri ubwo bukanguramba, ubirenzeho akajya abibazwa.

    Agira ati “Gukumira icyorezo cya Covid-19 bigomba gukorwa n’Abanyarwanda twese mu gihe hakigaragara abantu batambaye udupfukamunwa, ni bo batuma indwara idacika nyamara twese tubigize ibyacu yacika burundu”.

    Umuyobozi w’Akarere ka Nyagatare, Mushabe David Claudian, aherutse gusaba abaturage kujya batanga amakuru ku bantu babonye batubahiriza amabwiriza yo kwirinda Covid-19, harimo abatambara udupfukamunwa ndetse no gusengera ahatemewe.

    Kuri ubu ngo bamaze kuvugana n’abayobozi b’amadini n’amatorero kugira ngo barusheho kwegera abayoboke babo, barekere kurenga ku mabwiriza basengera ahatemewe.


    source : https://ift.tt/3ljFLgs

  • Minisitiri w'intebe wa Haiti yabujijwe kuva mu gihugu kubera iperereza ku iyicwa rya Perezida #rwanda #RwOT

    Umushinjacyaha arimo gushaka gushyiraho ibirego kuri Bwana Henry, wasabwe gusobanura aho ahuriye n'ucyekwa w'ingenzi (w'ibanze) muri ubwo bwicanyi, witwa Joseph Felix Badio.

    Ibimenyetso bigaragaza ko abo bagabo bombi bagiranye ibiganiro byinshi kuri telefone hashize amasaha gusa Perezida yishwe, nkuko abashinjacyaha babivuga.

    Bwana Moïse yiciwe mu rugo rwe ku itariki ya 7 y'ukwezi kwa karindwi.

    Yishwe arashwe nyuma yuko abagabo bitwaje imbunda biraye mu rugo rwihariye rwe mu nkengero y'umurwa mukuru Port-au-Prince.

    Urupfu rwe rwateje amakuba muri politiki, yahuhuwe n'umutingito w'isi (nyamugigima mu Kirundi) wibasiye amajyepfo y'iki gihugu mu kwezi gushize.

    Ku wa mbere, Bwana Henry yohereje ibaruwa bigaragara ko ari iyirukana ku kazi umushinjacyaha mukuru Bed-Ford Claude anamushinja “ikosa rikomeye ry'imitegekere”. Nyuma yatangaje uwo kumusimbura.

    Ariko, ku wa kabiri bisa nkaho Bwana Claude yari akiri mu kazi ke ubwo yasabaga umucamanza ukora iperereza ku iyicwa rya Bwana Moïse kurega Minisitiri w'intebe kubera uruhare “acyekwaho” muri ubwo bwicanyi.

    Abazi ibyo muri Haïti bavuga ko kwirukana umushinjacyaha bitari mu nshingano za minisitiri w'intebe.

    Minisitiri w'ubutabera wa Haïti yategetse ko Bwana Claude yongererwa abapolisi bo kumurinda, nyuma yuko hatangajwe ko hari inkeke yagiye ashyirwaho.

    Ni iki Minisitiri w'intebe avugwaho muri iyi dosiye?

    Abashinjacyaha bavuga ko amakuru babonye avuye muri kompanyi Digicel y'itumanaho ryo kuri telefone yemeje ko Bwana Badio – umutegetsi wo muri minisiteri y'ubutabera ushinjwa gucura umugambi w'ubwo bwicanyi – na Bwana Henry bavuganye inshuro ebyiri nyuma gato y'iyicwa rya Bwana Moïse.

    Uburyo kwo kugaragaza aho umuntu aherereye (geolocation) na bwo bwerekanye ko Bwana Badio, waburiwe irengero nyuma y'ubwo bwicanyi ubu akaba arimo gushakishwa na polisi, yari arimo kuvugira ahantu hafi y'ahakorewe icyaha. Nta cyo aratangaza ku mugaragaro kuri ibi bimuvugwaho.

    Minisitiri w'intebe aherutse kwamagana icyo yise “amayeri yo kuyobya uburari” agamije “guteza urujijo”, ntiyasubiza ku byo ashinjwa.

    Mbere yaho, Bwana Henry yabwiye ibitangazamakuru byo mu gihugu ko azi Bwana Badio. Yaramushyigikiye anavuga ko atemeza ko yagize uruhare mu bwicanyi kuko nta bushobozi yari afite bwo kubukora.

    Amakuru avuga ko Minisitiri w'intebe yari yahawe igihe ntarengwa cyo ku wa kabiri ku itariki ya 14 y'uku kwezi kwa cyenda ngo abe yahaye amakuru abakora iperereza.

    Bibaye mu gihe abategetsi bongereye imbaraga mu bikorwa byo guta muri yombi abandi bacyekwaho kugira uruhare mu iyicwa rya Perezida.

    Polisi ivuga ko ubu hari abantu 44 bamaze gutabwa muri yombi bacyekwaho kugira aho bahuriye n'umugambi w'iyicwa rya Perezida, barimo 18 bahoze ari abasirikare ba Colombia.

    BBC

    Source : https://umuryango.rw/amakuru/mu-mahanga/politiki/article/minisitiri-w-intebe-wa-haiti-yabujijwe-kuva-mu-gihugu-kubera-iperereza-ku

  • Ubufaransa bwaburiye Mali kwirinda gukorana n'abacanshuro bo mu Burusiya #rwanda #RwOT

    Minisitiri w'ingabo w'Ubufaransa Florence Parly yaburiye Mali kwirinda kugirana amasezerano na kompanyi icunga umutekano yo mu Burusiya.

    Hashize igihe hari amakuru yuko abasirikare bari ku butegetsi muri Mali bari hafi yo guha akazi abacanshuro (abacangero mu Kirundi) bo muri kompanyi Wagner.

    Madamu Parly yavuze ko ayo masezerano ashobora kugerwaho n'impande zombi “ahangayikishije bikomeye” – avuga ko yabangamira ibikorwa by'Ubufaransa byo guhangana n'inkeke itewe n'intagondwa ziyitirira idini ya Islam zikorera muri ako karere.

    Bivugwa ko kompanyi Wagner ikorera mu bihugu byinshi byo muri Afurika, mu gihe Uburusiya bushaka kongera ijambo ryabwo kuri uyu mugabane.

    Abakozi b'iyo kompanyi barimo kurwana n'inyeshyamba muri Centrafrique, aho amakompanyi y'Uburusiya yabonye impushya zo gucukura amabuye y'agaciro.

    BBC

    Source : https://umuryango.rw/amakuru/mu-mahanga/umutekano/article/ubufaransa-bwaburiye-mali-kwirinda-gukorana-n-abacanshuro-bo-mu-burusiya

  • Irushanwa Nyafurika mu mukino w'intoki wa Volleyball ryasojwe Tunisia itwaye igikombe mu bagabo naho u Rwanda rusoza ku mwanya wa 6 #rwanda #RwOT

    Kuva ku itariki ya 5 kugera ku ya 14 Nzeri 2021, mu Rwanda mu nyubako ya Kigali Arena hakinwaga irushwanwa Nyafurika mu mukino w'intoki wa Volleyball mu bagabo, ni irushanwa ryasojwe ikipe y'igihugu ya Tunisia yegukanye iki gikombe.

    Mu mukino wa nyuma wakinwe kuri uyu wa Kabiri tariki 14 Nzeri 2021, ni umukino wahuje ikipe y'igihugu ya Tunisia yatsinze amaseti 3-1 ikipe y'igihugu ya Cameron (16-21, 25-21, 25-21, 25-16).

    Uyu mukino wa nyuma wari wabanjirijwe ariko no guhatanira umwanya wa gatatu, wahuje ikipe y'igihugu ya Misiri yo yatsindaga ikipe ya Maroc, amaseti atatu kuri imwe ( 23-25, 28-26, 25-21, 25-18), bityo ikipe ya Misiri isoza ku mwanya wa gatatu muri iri rushanwa.

    Urutonde rw'abakinnyi bitwaye neza mu irushanwa:

    Umukinnyi wakoze serivisi nziza kurusha abandi (Best Server): Arthur Kody (Cameroun), Umukinnyi wazibiye abo bahanganye kurusha abandi (Best Blocker): Christian Voukeng Mbativou (Cameroun), Umukinnyi wahize abandi mu gukinisha abakora amanota (Best Setter): Khalid Ben Slimane (Tunisia)

    Umukinnyi wagerageje gutsinda cyane (Best Attacker): Wassim Ben Tara (Tunisia)

    Libero mwiza: Mohamed Reda (Misiri), Umukinnyi warushije abandi guhagarika imipira y'abo bahanganye (Best Receiver): Zouheir Elgraoui (Maroc)

    Umukinnyi mwiza w'irushanwa (MVP): Mohamed El Hachdadi (Maroc).

    Muri rusange dore uko amakipe yakurikiranye:

    1. Tunisia
    2. Cameroon
    3. Egypt
    4. Morocco
    5. Uganda
    6. Rwanda
    7. Nigeria
    8. DR Congo
    9. Kenya
    10. Mali
    11. Burundi
    12. Niger
    13. Burikina Faso
    14. South Sudan
    15. Ethiopia
    16. Tanzania

    Nyuma yo gusoza iri rushanwa mu bagabo, harakomeza imikino mu kiciro cy'abagore aho kuri uyu wa gatatu ndetse no kuwa kane hakinwa imikino ya nyuma yo mu matsinda.

    The post Irushanwa Nyafurika mu mukino w'intoki wa Volleyball ryasojwe Tunisia itwaye igikombe mu bagabo naho u Rwanda rusoza ku mwanya wa 6 appeared first on RUSHYASHYA.

    Source : https://rushyashya.net/irushanwa-nyafurika-mu-mukino-wintoki-wa-volleyball-ryasojwe-tunisia-itwaye-igikombe-mu-bagabo-naho-u-rwanda-rusoza-ku-mwanya-wa-6/?utm_source=rss&utm_medium=rss&utm_campaign=irushanwa-nyafurika-mu-mukino-wintoki-wa-volleyball-ryasojwe-tunisia-itwaye-igikombe-mu-bagabo-naho-u-rwanda-rusoza-ku-mwanya-wa-6

  • Rubavu: Yafatanywe amabalo y' imyenda itemewe mu Rwanda_ inkuru irambuye #rwanda #RwOT

    Umugabo witwa Kayitare Faustin w'imyaka 47 y' amavuko , abapolisi b' u Rwanda bo mu ishami rishinzwe kurwanya ubucuruzi bwa magendu bamufatanye amabalo 11 y'imyenda ya caguwa ya magendu n'ibikapu 3 birimo inkweto nazo za caguwa.

    Nk' uko urubuga rwa Polisi y' u Rwanda rukorera kuri murandasi dukesha aya makuru , rubivuga kuri uyu wa Kabiri tariki ya 14 Nzeri ahagana saa kumi za mu gitondo , nibwo yafashwe , afatirwa mu Karere ka Rubavu, Umurenge wa Gisenyi, Akagari ka Nengo, Umudugudu wa Nyaburanga.

    Umuvugizi wa Polisi mu Ntara y'Iburengerazuba,Chief Inspector of Police (CIP) Bonavature Twizere Karekezi yavuze ko Kayitare yafashwe bivuye ku makuru yatanzwe n'abaturage.

    Ati'Abaturage batubwiye ko hari imodoka ivuye mu Mujyi wa Kigali ije mu Karere ka Rubavu irimo umuntu uje gutwara magendu y'imyenda ya caguwa n'inkweto. Hahise hategurwa igikorwa cyo gufata uwo muntu n'iyo magendu ya caguwa.'

    CIP Karekezi akomeza avuga ko Kayitare yafatiwe ku nkengero z'ikiyaga cya Kivu  ahitwa Tam Tam amaze gupakira iyo myenda n'inkweto mu modoka. Kayitare yavuze ko ibyo bicuruzwa ari ibye hari uwari ubimukuriye mu gihugu cya Repubulika iharanira Demokarasi ya Congo agiye kubicuruza mu Rwanda mu Mujyi wa Kigali.

    Umuvugizi wa Polisi mu Ntara y'Iburengerazuba yashimiye abaturage batanze amakuru yongera kwibutsa abantu ko bagomba kwirinda ubucuruzi bwa magendu kuko buhanwa n'amategeko. Yanabibukije ko iyo basorera iyo myenda n'inkweto nk'uko amategeko y'imisoro abiteganya ntacyo byari kumutwara.

    Ati' Abinjiza ibicuruzwa bya magendu mu Rwanda baba barimo gusubiza inyuma igihugu mu iterambere kuko baba barimo kunyereza imisoro ya Leta kandi bihanwa n'amategeko. Caguwa ntabwo yaciwe mu Rwanda ahubwo ugiye mu bucuruzi bwayo agomba kubahiriza amategeko ajyanye n'imisoro.'

    Kayitare yahise ajyanwa aho agomba gusuzumirwa icyorezo cya COVID-19 nyuma akazashyikirizwa Urwego rw'ubugenzacyaha hagakorwa iperereza. Ibicuruzwa yari afite byahise bijyanwa mu bubiko bw'ikigo cy'Igihugu gishinzwe imisoro n'amhoro (RRA).

    Source : https://impanuro.rw/2021/09/15/rubavu-yafatanywe-amabalo-y-imyenda-itemewe-mu-rwanda_-inkuru-irambuye/

  • Ruhango: Batangije gahunda yo kubaka ibiro by’imidugudu yose igize akarere #Rwanda #RwOT via @kigalitoday #rwanda #RwOT

    Abayobozi b
    Abayobozi b’Akarere ka Ruhango bifatanyije n’abaturage mu gutangiza kubaka ibiro by’imidugudu

    Ubuyobozi bw’Akarere ka Ruhango butangaza ko abaturage bazagira uruhare kuri izo nyubako binyuze mu miganda, na ho akarere kagashaka isakaro n’ibindi bikenera amafaranga nko gukinga n’ibindi.

    Umuyobozi w’Akarere ka Ruhango, Habarurema Valens, avuga ko kubaka ibiro by’umukuru w’Umudugudu bitazahindura cyane imikorere y’umuyobozi wawo ngo yirirwe ku biro kuko n’ubundi azakomeza gukora nk’umukorerabushake wikorera n’indi mirimo ye, icyakora ngo bizoroshya gutanga serivisi inoze no kubika ibikoresho bye, ibyo biro kandi bikazaba binakorerwamo n’abagize komite z’imidigudu n’abajyanama b’ubuzima.

    Agora ati “Turasaba abaturage gukomeza gushyira imbaraga mu kwiyubakira igihugu natwe tubatere inkunga kugira ngo uyu muhigo tuzawese. Abakuru b’imidugudu bakeneye aho gukorera heza kandi bizarushaho kunoza serivizi bagomba abaturage”.

    Abaturage bo mu Karere ka Ruhango bavuga ko bishimiye kuba abayobozi b’imidugudu bagiye kubona aho bakorera hazwi, kuko byabagoraga kubona serivisi zo kwa mudugudu kubera ko yakoreraga ahabonetse hose.

    Kagame Pascal wo mu Kagari ka Karambi, avuga ko serivisi zo kwaka ibyangombwa zitatangwaga uko bikwiye kubera kutagira aho gusanga mudugudu.

    Agira ati “Byasabaga gushakisha mudugudu aho yagiye ngo agufashe bikaba byanatuma serivisi ukeneye wanayibura, ariko ubu nta kongera kwirirwa tumushakisha azaba ari ahantu hazwi”.

    Abaturage bavuga ko kugira ibiro by
    Abaturage bavuga ko kugira ibiro by’umudugudu bizatuma babona serivisi mu buryo bworoshye

    Tumukunde Bernadette avuga ko ari akarusho kuba mudugudu abonye ibiro kuko noneho azajya abonana n’umuyobozi ahantu hazwi akizeza ubufatanye mu gukomeza kwiyubakira ibiro by’umudugudu kugira ngo bongere iterambere.

    Agira ati “Mudugudu namugereranyaga na ‘dorone’, kuko yirirwaga aca hirya no hino, ariko ubu kugira icyicaro ni akarusho”.

    Imidugudu umunani muri 513 ni yo yari ifite ibiro ikoreramo, uyu mwaka w’imihigo ukaba uzarangira indi midugudu isaga 110 yiyongereye kuri iyo na yo ikagira aho ikorera.


    source : https://ift.tt/3nAvu2k

  • Ruhango : Umwaka umwe uzasiga hubatswe ibiro by’Imidugudu 118 #rwanda #RwOT

    Ni igikorwa cyatangiye gushyirwa mu bikorwa aho kizagirwamo uruhare runini n’abaturage ubwabo ubundi Ubuyobozi bw’Akarere bugatanga isakaro.

    Umukuru w’Umudugudu wa Karambi mu Murenge wa Kabagari Murindankaka Assiel avuga ko iki gitekerezo cyabajemo, nyuma yo kubona ko abaturage babashakaga bakababura kuko babaga bagiye mu mirimo yabo isanzwe bagasubirayo badakemuriwe ibibazo.

    Yagize ati 'Ibiro by’Umudugudu nibyuzura, bizatuma serivisi duha abatugana zirushaho kuba nziza.'

    Murindankaka avuga kandi ko serivisi zose zikorerwa mu Mudugudu zizaba ziri muri iyi nyubako.

    Tumukunde Bernadette avuga ko ibibazo byinshi by’abaturage kuri kuri ubu , bikemukira ku rwego rw’Umudugudu, akavuga ko ibyananiranye aribyo byoherezwa ku Kagari.

    Yagize ati 'Ushaka icyangombwa cyose, agisaba Mudugudu, wasangaga abakuru b’Imidugudu bakorera mu kirere kuko ntaho babarizwaga.'

    Umuyobozi w’Akarere ka Ruhango Habarurema Valens, avuga ko abaturage bitwa abafatanyabikorwa, kuko bafatanya n’Ubuyobozi gukora ibikorwa bibateza imbere.

    Habarurema yavuze ko hari igihe n’ibitabo bifashishaga byangirika kubera kutagira ibiro babibikamo.

    Yagize ati 'Mu mihigo 96 y’Akarere isaga 50 muri iyo iri mu mibereho y’abaturage.'

    Uyu Muyobozi avuga ko ibi bishatse kuvuga ko ikibashishikaje ari kuzamura ubuzima bw’abaturage bwa buri munsi bw’umuturage.

    Habarurema yavuze kandi ko ibiro by’Imidugudu nibyuzura bizaba birimo n’icyumba abajyanama b’ubuzima bazajya bakoreramo.

    Gutangiza ku mugaragaro umuganda wo kubaka ibiro by’Umudugudu byabereye mu Murenge wa Kabagari.

    Source : http://www.ukwezi.rw/mu-rwanda/Amakuru-anyuranye/article/Ruhango-Umwaka-umwe-uzasiga-hubatswe-ibiro-by-Imidugudu-118

  • Musore ,ntukwiye gukora ibi bintu niba inkumi yagusuye iwawe. – YEGOB #rwanda #RwOT

    Muri iyi nkuru tugiye kugaruka ku bintu bitanu uzirinda gukora, igihe ubona inkumi isigaye igusura kenshi uri ingaragu.

    1.Umukobwa wagusuye uzamwibutse ko agomba gutaha

    Nk'uko twigeze kubigarukaho, si byiza kwemerera inkumi yagusuye kurara iwawe, kuko hari ibyago byagutse wahura nabyo nk'uko twabivuze haruguru. Kabone n'ubwo yaba ari umukunzi wawe uzamwibutse gutaha, bizarushaho kubaka ubucuti bwanyu.

    2.Ntuzamwemerere kuzana ibintu bye iwawe

    Ni ikosa rikomeye kwemerera umukobwa ko azana ibintu bye iwawe mu gihe atari umugore wawe. Yewe si nabyiza mu gihe ari inshuri yawe. Ibi byakuviramo ibyago bitandukanye wahura nabyo. Bishobora no kugutandukanya n'umukunzi wawe mu gihe azanye ibintu iwawe. Akenshi ahamara igihe bikaba byabaviramo kutumvikana no gutandukana, kubera ko uko bwije n'uko bukeye buri wese agenda amenya imico y'undi bikaba byabatandukanya umwe abonye ko yibeshye!

    3.Ntuzamwemerere kurara iwawe

    Hari abasore usanga bashimishwa no kuba inkumi yabasura ikarara, cyane cyane ab'ingaragu. buriya rero ni ikosa rikomeye kwemerera inkumi yagusuye ko irara iwawe, mu gihe nta bucuti bwihariye mufitanye cyangwa se atari umugore wawe. Ibi bishobora gukurura ibyago utateguye mu ijoro, bishobora kugushyira mu kaga gakomeye. Urugero ashobora kurwara akaremba bikamuviramo urupfu, nawe bikaba ngombwa ko ukurikiranwa mu iperereza! Mushobora no kugira ibyo mupfa bindi byagukururira ibibazo.

    4.Uzirinde icyatuma umukubita

    Gukubita umukobwa ni ikosa ryatuma wisanga mu buroko! N'ubwo warakara birenze urugero, ni ikosa rikomeye gukubita inkumi yagusuye. Icyo mwapfa cyose uzirinde kumukubita. Navuga 'oya' ku kintu runaka adashaka, uyubahe bitabaye ibyo numukubita mukarwana bizaba bibi.

    5.Uzirinde kumuha urufunguzo rw'inzu yawe

    Utitaye ku kuntu agira umutima mwiza n'uko mubanye, ntuzahe na rimwe umukobwa urufunguzo rw'inzu yawe. Urubuga legitpost.com twifashishije dukora iyi nkuru, rwo ruvuga ko kabone n'ubwo yaba ari umukunzi wawe si byiza kumuha urufunguzo rw'inzu yawe kuko hari ubwo yazakuvumbura bitewe n'ibyo ashobora gusanga mu nzu, bityo gahunda zose mwari mufitanye zigapfa. Uru rubuga rukomeza ruvuga ko igihe wahaye umukunzi wawe urufunguzo, nawe ahita yumva afite inshingano zo kumenya ibyakorewe mu nzu, abantu bahaje, n'ibindi byinshi bishobora kwangiza urukundo rwanyu.

    Source : https://yegob.rw/musore-ntukwiye-gukora-ibi-bintu-niba-inkumi-yagusuye-iwawe/

  • Manchester United na FC Barcelona zatangiye nabi cyane UEFA Champions League #rwanda #RwOT

    Ikipe ya Manchester United yabimburiye izindi gukina irushanwa ry'uyu mwaka,yatangiye itsindwa na Young Boys ibitego 2-1 ndetse irushwa cyane mu gihe FC Barcelona yatsindiwe mu rugo na Bayern Munich ibitego 3-0.

    Manchester United yari yagaruye Cristiano Ronaldo mu irushanwa yisangamo cyane,yatangiye ifungura amazamu ku munota wa 13 ku gitego cyatsinzwe na Cristiano Ronaldo ku mupira mwiza yahawe na Bruno Fernandes.

    United yayoboye umukino kugeza ku munota wa 35 ubwo myugariro wayo Wan Bissaka yakandagiraga nabi umukinnyi wa Young Boys witwa Christopher Martins bimuviramo guhabwa ikarita itukura.

    Iri kosa rya Wan Bissaka ryatumye umutoza wa United agira ubwoba ahita asimbuza aho yazanye mu kibuga myugariro Diogo Dalot akuramo Jadon Sancho ufasha ba rutahizamu.

    Izi mpinduka zakuye United mu mukino itangira gukina yugarira cyane aho no kugera imbere y'izamu rya Young Boys byabaye ikibazo.Igice cya mbere cyarangiye United itsinze igitego 1-0.

    Ubwoba bwa Ole bwakomeje kuba bwinshi ubwo yakuraga mu kibuga Donny van de Beek wasubiye inyuma cyane amusimbuza myugariro Raphael Varane bituma agira abugarira 5.

    Uku kugarira cyane kwatumye icyizere cya United mu busatirizi kigabanuka cyane ari nabyo byatumye muri uyu mukino irangiza iteye mu izamu 2 konyine.

    Ikipe ya Young Boys yahawe urwaho rwo gusatira cyane na United byayihaye umusaruro ku munota wa 66 ibona igitego cyo kwishyura ibifashijwe na Nicolas Ngamaleu.

    Iki gitego cyinjiye nyuma y'icyo Ronaldo yahushije ubwo yahabwaga umupira mwiza asiga ba myugariro ba Young Boys ariko yigusha mu rubuga rw'amahina ashaka kubeshya umusifuzi ko myugariro wa nyuma bari kumwe yamuteze kugira ngo ahabwe penaliti n'uyu mukinnyi ahabwe ikarita y'umutuku,ntibyamuhira.

    Umutoza Ole yakomeje gukora amakosa mu gusimbuza aho ku munota wa 72 yakuye mu kibuga Cristiano Ronaldo amusimbuza Jesse Lingard hanyuma Bruno Fernandes amusimbuza Matic.

    United yakomeje kurushwa cyane byatumye ku munota wa 5 w'inyongera,Jesse Lingard utagize icyo afasha nyuma yo kwinjira, yihera umupira rutahizamu wa Young Boys Theoson Jordan Siebatcheu asigarana n'umunyezamu De Gea aramuroba atsinda igitego cya kabiri cy'iyi kipe yo mu Busuwisi.

    Umukino wahise urangira United itakaje amanota gutyo ndetse yaruhijwe mu guhererekanya umupira kuko yarangije ifite 47 kuri 53 ya Young Boys.

    Indi kipe yagaragaje ko igeze aharindimuka ni FC Barcelona ititeguye kongera gukomera nyuma y'igenda rya Lionel Messi.

    FC Barcelona yari yakiriye Bayern Munich ariko imbere y'abakunzi bayo yatsinzwe ibitego 3-0 irushwa ndetse nta bwoba bataha izamu bateye ba myugariro b'iyi kipe yo mu Budage.

    Ku munota wa 34 nibwo Bayern Munich yafunguye amazamu ku gitego cyatsinzwe na Thomas Muller ku mupira yahawe na Leroy Sane arekura ishoti rigonga ku mukinnyi, Eric Garcia,wa Fc Barcelona rihindura icyerekezo umupira wijyana mu izamu.

    FC Barcelona yaheruka gutsindwa umukino ufungura Champions League muri 1997,yatsinzwe igitego cya 2 ku munota wa 56 gitsinzwe na Robert Lewandowski mu gihe ku munota wa 85 yatsinze n'icya 3 cya Bayern.

    Uyu rutahizamu yatsinze igitego cya 29 mu mikino 18 aheruka gukina mu gihe FC Barcelona yarangije umukino idateye mu izamu.

    Mu yindi mikino yari yitezwe,Chelsea yagowe bikomeye na Zenit yari yayisuye ariko birangira iyitsinze igitego 1-0 cya Romelu Lukaku.

    Uko Imikino yose yagenze:

    Barcelone 0-3 Bayern
    Kiev 0-0 Benfica
    Villarreal 2-2 Atalanta
    Lille 0-0 Wolfsburg
    Chelsea 1-0 Zénith
    Malmö 0-3 Juventus

    Source : https://umuryango.rw/imyidagaduro/imikino/article/manchester-united-na-fc-barcelona-zatangiye-nabi-cyane-uefa-champions-league

  • Hakorwa iki ngo Abanyarwanda barusheho kwishima ?- Ikibazo cya MINALOC…Umwe ati 'Mufungure utubari' #rwanda #RwOT

    Ni ikibazo kiri ku mbuga nkoranyambaga za Minisiteri y’Ubutegetsi bw’Igihugu, cyashyizweho mu gitondo cyo kuri uyu wa Gatatu tariki 15 Nzeri 2021.

    Kuri Twitter, uwitwa Cano Nyarwanda wabimburiye abandi mu gutanga ibitekerezo, yagize ati 'Munoze imiyoborere mukumira ruswa mu nzego zegereye abaturage bityo abaturage bazumva ko bashyizwe imbere. Urugero : Services z’ubutaka zose zamunzwe na ruswa iterwa no kudindiza ku 'bushake' ubusabe bw’abaturage. Ubuyobozi bwanyu na Minisiteri y’Ibidukikije mukeneye kugira icyo mubikoraho.'

    Abiganjemo urubyiruko bo bagaragaje ko hakwiye kongerwa ingufu mu bikorwa remezo bijyanye n’imyidagaduro.

    Uwitwa Nkuruniza Bonaventure yagize ati 'Ni ugufungura imyidagaduro n’utubari ariko bigakorwa hubahirizwa ingamba zokwirinda covid-19.'

    Manzi Tite na we yagize ati 'Ku cyanjye giti kubera Abanyarwanda bakunda imikino n’imyidagaduro uwatwubakira nk’ibibuga byinshi cyane cyane mu byaro ! Murakoze !'

    Uwitwa Bahati Abdou we yagize ati 'Mufungure imipaka mufungure utubari amasaha muyongere gahunda yogukingira yiyongere natwe twitabire gukingirwa.'

    Mutangana Bonny we yagize ati 'Hahagarikwe icyenewabo mu kazi Bityo hakore abafite ubushobozi.'

    Naho uwitwa Omusa ati 'Abayobozi mugabanye gutanga report zintekinikano musange abaturage mwirebere bya nyabo uko babayeho kuko birababaje cyane, gutanga amakuru atagize aho ahuriye na gato, izi nkunga mujyenera urubyiruko mukurikire kata zirimo njye nararekeye murakoze.'

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/Hakorwa-iki-ngo-Abanyarwanda-barusheho-kwishima-Ikibazo-cya-MINALOC-Umwe-ati-Mufungure-utubari