Category: Uncategorized

Iki ni kimwe mu byagarutsweho muri Komisiyo Komisiyo ishinzwe gukurikirana imikoreshereze y’imari n’umutungo by’igihugu, ku wa Kane tariki ya 16 Nzeri 2021.

Hashize imyaka ibiri hagiyeho itegeko rigenga umujyi wa Kigali, uyu munsi ntirirubahiriza bitewe n’uko imbonerahamwe y’imyanya y’imirimo itarashyirwaho.

Visi Perezida wa Komisiyo ya PAC, Uwineza Beline, yavuze ko kuba ibi bitarakorwa abifata nk’aho Umujyi wa Kigali uri mu nzibacyuho kuko itegeko ritabiteganyaga.

Perezida w’Inama Njyanama y’Umujyi wa Kigali, Dr. Kayihura Muganga Didas, yavuze ko bitoroshye kumva impamvu iyi nzibacyuho yabaye ndende, nyuma y’uko hemejwe ko uturere tw’umujyi wa Kigali duhuzwa.

Yavuze ko habayeho hashyizweho abahanga bategurira imbonerahamwe y’imirimo iganirwaho igihe kirekire, imaze gutangazwa mu Nama y’Abaminisitiri icyagombaga gukurikiraho kikaba ari ukugena imiterere n’ibisabwa buri mukozi ukenewe.

Ati “Birumvikana igihe ni kirekire, turimo gushyira itegeko mu bikorwa ariko nk’uko mubizi si akazi koroshye hari n’amateka dutegereje yo gushyira mu bikorwa iryo tegeko. Turasaba imbabazi kuba byaratinze ariko ibyo dushoboye ku ruhande rwacu turimo kubikora.”

Umuyobozi w’Umujyi wa Kigali, yavuze ko ibijyanye no kwemeza imiterere n’inshingano z’abakozi bateganyijwe bafatanyije na Minecofin, RALGA, Minaloc na MIFOTRA bizakorwa kuri uyu wa Gatandatu banemeranye ku ngengabihe yo gushyira abakozi mu myanya.

Depite Uwineza Beline yavuze ko nubwo Umujyi wa Kigali uri gukorana n’abafatanyabikorwa benshi kuri iki kibazo gikwiye gushishikaza ubuyobozi bwawo.

Ati “Mu Kinyarwanda baravuga ngo ‘ubabaye ni we ubanda urugi’, Umujyi wa Kigali ndumva ari mwe mubabaye kurusha abandi mu kunoza imikorere y’abakozi, mwakagombye kubyihutisha kugira ngo mutazisanga mumaze imyaka itatu muri mu nzibacyuho; kandi ntacyo byabamarira na bya bindi twavugaga byo kunoza imikorere ntimuzabishobora nimudakemura icy’abakozi.”

Kwima amahirwe yo gupiganirwa amasoko kuri ba rwiyemezamirimo bato

Umujyi wa Kigali kandi watahuweho kubuza sosiyete zigitangira amahirwe yo gupiganira amasoko biciye mu kuzisaba uburambe kandi itegeko ribibuza.

Ubwo isuzuma ryakorwaga, Umujyi wa Kigali watanze ibisobanuro ko isoko ryitwa “Maintenance of sound and video system for the City of Kigali” ryasabaga isosiyete ifite ubuzobere buhanitse bitari gushoboka kuriha uwo ari we wese.

Imbere ya PAC, Umuyobozi Mukuru w’Ibikorwa by’Umujyi, Rugaza Julian, yemeye ko aya makosa yabayeho ariko ko batari basomye itegeko abisabira imbabazi.

Ati “Ni byo koko hari sosiyete twimye amahirwe yo gupiganira isoko; hari amasoko twatanze mu kwezi kwa gatandatu 2020 dusaba uburambe kuri sosiyete zitagombaga kubusabwa kuko tutari twasomye itegeko neza ngo tumenye ibirikubiyemo. Ibyo tukaba tubisabira imbabazi.”

Mukabalisa Germaine ati “Ubu koko Umujyi wa Kigali, uba mu Mujyi umwe na Minisiteri y’Ubutabera, ufite n’abanyamategeko, twakire igisubizo ngo ntibasomye itegeko neza? Ndashaka kumenya ubufasha baba bakeneye.”

Perezida w’Inama Njyanama, yavuze ko nta rwitwazo na rumwe babona kuba batarasomye itegeko cyangwa ntibarisome neza aboneraho no kubisabira imbabazi.

Ati “Icyumvikana kandi dusabira imbabazi ni uko tutakoze ibyo amategeko ateganya. Umuntu twimye amahirwe yashoboraga gushyirwa hamwe n’abandi agapiganwa agatsinda cyangwa agatsindwa, ni amakosa rero yabaye ku ruhande rwacu kandi twemera.”

Perezida wa PAC, Muhakwa Valens ati “Ahubwo uwanabikurikirana neza, kwima umuntu amahirwe ni icyaha kiri mu masoko ya leta, turaza kureba amategeko abiteganya icyo avuga.”

Visi Perezida wa PAC, ati “Ubundi bagombye kuba batubwira abimye rwiyemezamirimo amahirwe yo kwinjira mu ipiganwa uko babakurikiranye kuko ni icyaha gihanwa n’amategeko, ni cyo twashakaga kumva kuruta ibindi.”

“Amahame agenga imitangirwe y’amasoko mu ngingo ya 6 y’itegeko rigenga amasoko ya leta harimo ibijyanye no gupiganwa, abashinzwe amasoko ni cyo kintu bazi kurusha ibindi ariko sinzi ukuntu ‘city manager’ yihandagaza akabivuga, Ni ukuri mwavuze ibintu bitari bikwiriye abantu bacunga iby’amasoko ya leta, ubwo turamenya uko aba bantu bagomba gukurikiranwa.”

Ikindi kibazo cyagaragajwe mu bifitanye isano no kutubahiriza amategeko ni icya rwiyemezamirimo wahinduye abakozi yatanze igihe cy’ipiganwa bitemejwe n’Umujyi wa Kigali.

Uyu rwiyemezamirimo yashyikirije Umujyi inyemezabuguzi zifite agaciko ka 560.000.000 Frw ku mirimo yo kubungabunga imihanda zemejwe n’abagenzuzi batari ku rutonde rw’abakozi rwa sosiyete y’ubugenzuzi yagaragaje igihe yapiganiraga isoko.

Umuyobozi w’Umujyi wa Kigali, Pudence Rubingisa, yavuze ko habayeho intege nke zo kutandika ibijyanye n’impinduka zabayeho kuko sosiyete ya mbere yavuyemo hinjiramo indi.

Inyubako y’Ibiro by’Umujyi wa Kigali

‘Ubuhuza’ (mediation), ni igikorwa cyo guhuza abantu bafitanye ikibazo bagahuzwa n’undi muntu bahisemo udafite aho ahuriye n’ikibazo, kugira ngo abafashe kuganira no kumvikana ku mwanzuro warangiza ikibazo bafitanye.

Ubu buryo bwatangijwe mu nkiko zo mu Rwanda mu 2012 ariko butangira kumenyekana cyane guhera mu mwaka wa 2018 ubwo mu miburanishirize y’imanza z’imbonezamubano, iz’ubucuruzi, iz’umurimo n’izubutegetsi hashyizwemo ingingo iha ububasha umucamanza kuba yahuza cyangwa kunga abafitanye ikibizo.

Urubanza aho rwaba rugeze hose, ababuranyi bashobora ubwabo gusaba urukiko kubakorera ubuhuza cyangwa se umucamanza wahawe kuburanisha urubanza ashobora gushishikariza ababuranyi iyo nzira abereka inyungu ziri mu gukoresha iyo nzira.

Ubwo buhuza bushobora gukorwa n’umwanditsi, umucamanza cyangwa abandi bahuza bigenga babihuguriwe bemewe n’amategeko. Igitandukanya urubanza n’ubuhuza, ntawe utsindwa kuko umwanzuro wose ufatwa, ufatwa ku bwumvikane bw’ababuranyi.

Nibyo byabaye kuri Nshogoza n’abandi bashoramari 112 bari baraguze ibyumba mu isoko, ubwo haburaga gato ngo isoko ry’Inkundamahoro bubatse biyushye akuya, ritezwe cyamunara.

Icyiciro cya kabiri cy’iri soko cyubatswe guhera mu 2013 ubwo aba bashoramari babonaga ko hakenewe inzu zigezweho zo gucururizamo Nyabugogo, nyuma y’iza mbere bari bubatse zikaba iyanga.

Nshogoza yabwiye IGIHE ko bitabaje ibigo by’imari bitandukanye ariko hakabura ikibahereza miliyari zisaga esheshatu bifuzaga ngo isoko ryuzure. Bashyikirije uwo mushinga BRD, ibyumva vuba amafaranga irayabaha.

Kubera ko amafaranga yo kwishyura yagombaga kuva mu miryango yagurishijwe isoko, Nshogoza yavuze ko byageze aho abakiliya bakabura, bananirwa kwishyura banki ifata umwanzuro wo guteza cyamunara iyo nyubako.

Ati “Twagezemo hagati tunanirwa kwishyura birongera biratumbagira, n’abakiliya batangira kubura tujya mu birarane. BRD iti ‘cyamunara’, abashoramari baraduhindukirana bati ‘mwaratubeshye, mwaradushutse none twaguze ahantu bagiye kutugurishiriza umutungo’.”

Abashoramari babahindukiranye, ni abari baratanze amafaranga yabo mbere inzu icyubakwa bagasezeranywa ko niyuzura bazahabwamo imiryango yo gucururizamo. Inzu zimaze kuzura, bahawe imiryango yabo ariko nta byangombwa byihariye bari bayifitiye. Bivuze ko BRD iyo iramuka ije guteza cyamunara, yari guteza inzu yose ititaye ko hari imiryango yamaze kugurishwa.

Ubwo itangazo rya cyamunara ryashyirwaga hanze, abashoramari bagera kuri 55 bahise batanga ikirego, basaba ko amasezerano y’ubugwate ku mutungo wabo yabaye hagati ya BRD n’Inkundamahoro ateshwa agaciro kuko yabayeho batabizi.

Inyubako y’Inkundamahoro yari igiye gutezwa cyamunara, ubuhuza burabagoboka

Umucamanza mu rukiko rw’Ubucuruzi yemeje ibyo abo bashoramari bari baregeye, atesha agaciro amasezerano y’ubugwate ngo kuko yakozwe abashoramari batabizi. Bivuze ko BRD yari ihombye miliyari zose yatanze cyangwa se ikaba yahabwa indi ngwate.

Habayeho kujurira, ikirego kijya mu rukiko rukuru rw’ubucuruzi. Umucamanza wahawe kuburanisha ikirego asanga byaba byiza habayeho guhuza impande zose zifitanye ikibazo kuko byatanga umusaruro kurusha gukomeza urubanza, bityo asaba ko n’abandi bashoramari batareze ariko bafite icyo kibazo baza bose bakabiganirira hamwe. Ababuranyi bose bakaba barasabye ko umucamanza wavuzwe haruguru ariwe ubabera umuhuza.

Icyo gihe BRD niko yakomezaga kubara ideni Inkundamahoro ibafitiye, rigeze kuri miliyari zisaga umunani.

Nyuma y’ibiganiro byinshi impande zose zemeranyijwe ko mu gihe ibyangombwa by’umutungo bitaraboneka, umushoramari wese waguze akishyura amafaranga yose y’umuryango ahabwa icyangombwa cyizwi nka ‘Comfort letter’, kuburyo Inkundamahoro niramuka inaniwe kwishyura burundu abashoramari bahawe iyo comfort letter imiryango yabo itatezwa cyamunara.

Nshogoza yavuze ko ubu bafite ibyumba hafi 187 birimo amaseta 2059, bategereje ko bibonerwa abakiliya bagakomeza kwishyura umwenda.

Ati “Umwuka mwiza ukomeje uko byari bimeze, twazishyura n’umutima mwiza. Kuri ubu umubano wacu na BRD umeze neza. Hari imishyikirano twagiranye batwemerera ko tugiye gufatanya kugurisha.”

Kubera ingaruka za Covid-19, ntabwo abakiliya bahise babonekera igihe dore ko kuva mu ntangiriro z’umwaka ushize kugeza ubu, ngo bamaze gushyikiriza BRD miliyoni zigera kuri 400 Frw, gusa ngo bizeye ko ibintu bizagenda neza.

Nshogoza ati “Iyo bidakemuka kuriya tuba twaranasaze cyangwa twaraniyahuye, twari twarumaganye. Bamwe tugeze mu zabukuru ariko twari twashaje kabiri. Iyo urebye icyerecyezo cy’ejo nubwo Covid-19 irimo, ubona ko tuzagurisha.”

Yavuze ko ubu icyo bifuza ari ikigo cy’imari cyakwemera kuguriza abaturage bifuza kugura ibibanza n’imiryango, bakishyurira rimwe ubundi bo bakagenda bishyura gahoro gahoro.

KBS yari igiye guseswa…..

Ingero z’aho ubuhuza bwabashije gufasha abarebanaga ay’ingwe mu nkiko ni nyinshi. Mu minsi ishize, hari ikindi kirego cyakemuwe muri ubwo buryo cyari gihuriwemo sosiyete itwara abantu mu modoka, KBS Ltd n’Urwego Ngenzuramikorere (RURA).

Byatangiye ubwo KBS yari ibereyemo sosiyete zitandukanye imyenda ingana na miliyari umunani z’amafaranga y’u Rwanda. Nka Ecobank yari ifitiwe miliyari 3.6 Frw, PTA Bank yari iberewemo miliyari 1.2 Frw, Yutong Hing Kong yari iberewemo miliyari 3.4 Frw.

Urwego rw’Igihugu rushinzwe Iterambere (RDB), rumaze kubijyaho inama na RURA yari yakoze igenzura, basabye ko KBS ishyirwa mu gihombo kuko ifite imyenda myinshi itazabasha kwishyura.

Icyo gihe hanafashwe umwanzuro wo guhindura ubuyobozo bwa KBS, hajyaho umucungamari washyizweho na RURA sosiyete idakomeza kugwa mu bihombo. Ba nyiri KBS barabyamaganye, bavuga ko sosiyete nta gihombo irimo, yewe ko n’abo bari babereyemo imyenda nta kibazo bigeze bagaragaza.

Za sosiyete zari ziberewemo imyenda na KBS nazo zahise zitanga ikirego kuko gushyira mu gihombo KBS, byashoboraga gutuma bahomba ntibishyurwe.

Umucamanza wwaburanishije ubwo bujurire yabwiye IGIHE ko akimara guhabwa iyo dosiye mu bujurire, yabonye kubikemura mu bwumvikane aribyo byiza kurusha gukomeza imanza.

Ati “Ni ibintu nabonaga bishobora gushyira ishoramari ry’u Rwanda mu bibazo kuko abari baberewemo imyenda bari abanyamahanga. Kuba barashoye imari ikigo bashoyemo kigashyirwa mu bihombo, byari kugabanya icyizere abashoramari b’abanyamahanga bagirira u Rwanda.”

Nyuma y’ibiganiro byinshi abari bafitanye ikibazo bumvikanye ko hashyirwaho ubuyobozi bushya bwemejwe n’impande zombi. Muri Kanama 2018 nibwo amasezerano y’ubwumvikane yasinywe, KBS Ltd ikomeza imirimo yayo, RURA ikomeza iyayo nk’umugenzuzi n’abari baberewemo amadeni bakomeza kwishyurwa.

Nyuma y’ubuhuza, KBS yakomeje imirimo yo gutwara abantu mu mujyi wa Kigali, abo yari ibereyemo imyenda bakomeza kwishyurwa

Me Idahemuka Tharcisse wunganiraga KBS, yavuze ko kuba ikibazo cyarakemuwe mu buhuza, byatanze umusaruro ufatika.

Ati “Ubuhuza bwa mbere ni uko nyiri sosiyete yayisubiranye, icya kabiri ni ukuba barakomeje gukorana. Nta ruhande rwatashye rubabaye kuko murumvakina kugeza ubwo mugeze ku masezerano.”

Yakomeje agira ati “Niba umuntu ugenzura ashobora kumvikana n’umuntu agenzura nkuko byagenze kuri iyo dosiye yacu, ni ikimenyetso cy’uko n’abandi bantu bashobora kumvikana.”

Nubwo ubu buryo bw’ubuhuza butarasakara muri benshi, inzego z’ubutabera zigaragaza ko aribwo butanga umusaruro w’igihe kirambye kubera ko bukuraho ikibazo ababuranyi bahanganye baba bafite.

Umwaka ushize wa 2020-2021, imanza 922 nizo zarangirijwe mu buhuza, zivuye ku manza 850 zari zarangijwe mu buryo nkubwo mu mwaka wabanje.

Abamaze kubona ibyiza by’ubuhuza, bemeza ko mu manza mbonezamubano cyangwa iz’ubucuruzi, ubuhuza ari yo nzira nziza.

Me Rwigema Vincent yunganiye sosiyete Oxyprop Rwanda mu rubanza yaburanagamo na sosiyete Shelter Afrique yo muri Kenya.

Mu mwaka wa 2013, Shelter yari yaragurije Oxyprop miliyoni 4.5 z’amadolari mu mushinga wo kubaka inzu zigurishwa ku Kicukiro. Bagombaga kubaka amagorofa umunani ageretse kane.

Byageze hagati habamo kutumvikana, Shelter Afrique isigaje gutanga miliyari 3.35 Frw ngo inyubako zirangire. Inzu bari barubatse ntizari zakarangiye ngo nibura zigurishwe.

Izo nzu akaba ari nazo Shelter yatanzeho ingwate, bivuze ko Oxyprop itashoboraga kuzigurisha ngo yishyure. Ikindi ni uko nta yindi banki yashoboraga gutanga indi nguzanyo kuri uwo mushinga hakurikijwe icyiciro umwenda wari ugezemo ndetse na sosiyete yarashyizwe mu badashobora guhabwa inguzanyo ukurikije urwego yarimo mu kigo gishinzwe kugenzura inguzanyo, CRB.

Bagannye inkiko, ku rwego rwa mbere urukiko rw’ubucuruzi rwemeza ko amasezerano aseswa, naho Oxyprop itegekwa kwishyura Shelter miliyoni 4.3 z’amadolari n’inyungu zingana na miliyoni 171 Frw.

Impande zombi ntizanyunzwe n’umwanzuro, zirajurira ari nabwo bumvishwaga ko ikibazo gishobora gukemurwa mu buhuza.

Mu byemeranyijweho nyuma yo kubereka igihombo kiri mu gukomeza imanza, bemeye gukomeza umushinga, Shelter ivanamo bimwe mu byo yasabaga, umwenda iberewemo usigara ari miliyari zisaga gato 4 Frw.

Shelter kandi yemeye kurekura andi mafaranga yaburaga ngo umushinga ukomeze.

Me Rwigema yavuze ko habayeho kwitanga kuri buri ruhande kugira ngo ubwumvikane bugerweho.

Ati “Umucamanza wari ufite dosiye ni umuntu wabonaga ko ashishikajwe n’ubwumvikane, arabidusaba tubyakira neza. Twagize ibiganiro byamaze hafi umwaka biza kurangira twumvikanye.”

Yavuze ko ubu inzu za mbere zamaze kuzura ndetse batangiye no kuzishakira abaguzi, kandi impande zombi kuri ubu ziri kubona inyungu yo kuba barumvikanye.

Bisaba ubwitange…

Ubuhuza ku manza zaregewe Inkiko bushobora gukorwa n’abanditsi b’Inkiko cyane cyane mu gihe cy’Inama ntegurarubanza. Bikorwa kandi n’abacamanza mu gihe urubanza rugeze mu iburanisha ndetse n’ abahuza bigenga bari ku rutonde rwemejwe n’ Urukiko rw’ Ikirenga.

Umuvugizi w’inkiko, Mutabazi Harrison avuga ko ubuhuza ari inzira nziza abafitanye amakimbirane bakwiriye kugana kugira ngo bubafashe gukemura amakimbirane bafite.

Yagize ati “ Ubuhuza bukozwe mu manza zaregewe Inkiko bufite inyungu nyinshi cyane cyane ku baburanyi, kubera ko bubafasha kubona igisubizo mu buryo bwihuse kandi burambye , butuma ababuranyi bashyamiranye bongera kunga ubumwe , bwanakwifashishwa mu kugabanya ibirarane mu Nkiko n’ibindi”

Umwe mu bacamanza bagize uruhare mu guhuza ababuranyi, yavuze ko ubuhuza mu gihe abantu bageze mu rukiko atari ibintu byoroshye kuko bisaba umwanya ariko ko bishoboka.

Ati “Bisaba umwanya kandi bisaba ko umucamanza aba uri umuntu ukunda kunga abantu. Bisaba kandi kwihangana, ubwitange n’ubushishozi bukomeye kuko hari nk’abazaga bagashaka kurwana.”

Yavuze ko bisaba ko umuhuza aba atekereza kure kurusha abo yunga kuko agomba kubafasha kugera ku bwumvikane na cyane ko akenshi bo baba bishakira inzira yoroshye ariyo yo kugana urukiko.

Ati “Buriya iyo ibintu birangiriye mu buhuza ntabwo uba ukemuye ikibazo gusa, ni no kubanisha abantu mu mahoro. Burya iyo umwe atsinzwe ntabwo ikibazo kiba gikemutse.”

Umuvugizi w’inkiko, Mutabazi Harrison avuga ko ubuhuza ari inzira nziza abafitanye amakimbirane bakwiriye kugana

Kimwe mu byumba byagenewe ubuhuza ku cyicaro cy’urukiko rw’Ikirenga

Ibiro bikoreramo urukiko rukuru rw’ubucuruzi mu karere ka Nyarugenge

Mukayiranga avuga ko Abanyarwanda basabwa kuzirikana ibikorwa bituma barushaho kwiyunga

Ibyo bitangajwe mu gihe kuri uyu wa 18 Nzeri 2021 u Rwanda rwifatanya n’ibihugu bigize Umuryango w’Abibumbye (U N) kwizihiza umunsi mpuzamahanga w’amahoro.

Umunsi mpuzamahanga w’amahoro watangijwe mu mwaka wa 1982, nyuma yo gusuzuma ibibazo by’intambara byibasira abaturage bikababuza umudendezo ndetse bamwe bakabisigamo ubuzima, u Rwanda rukaba ruwizihiza ku itariki 18 Nzeri buri mwaka.

Insanganyamatsiko izirikanwa uyu munsi ku rwego rw’isi no mu Rwanda igira iti “Duharanire amahoro arambye dufatanya gutsinda Covid-19”, ari na ho NURC ihera igaragaza ko abantu bakwiye kumva ko kugira amahoro atari ugukira urusaku rw’amasasu ahubwo ari no guhangana n’ibindi bibazo bibuza umuntu umudendezo.

Umuyobozi w’ishamiri rishinzwe guteza imbere ubumwe n’Ubwiyunge muri (NURC), Mme Laurence Mukayiranga, atangaza ko amahoro atareberwa gusa mu gihe cy’intambara ahubwo aharanirwa kandi agakomeza agasigasirwa, kuko iyo yabuze ubumwe burabura.

Avuga ko Igihugu cy’u Rwanda cyabayeho mu bihe bitandukanye by’amacakubiri byarugejeje no kuri Jenoside yakorewe Abatutsi, ari na yo mpamvu politiki ya Leta y’Ubumwe bw’Abanyarwanda ishyira imbere kwimakaza umuco w’amahoro kugira ngo ibimaze kugerwaho bikomeze gusigasirwa.

Agira ati “Amahoro ni umudendezo wa buri wese kandi Indangagaciro Nyarwanda zishyira imbere ibyiza by’imibanire yimakaza umuco w’amahoro, kubahana, gushyira imbere ikiremwa muntu n’umudendezo wa buri wese”.

Yongeraho ati “Dushyize imbere imibanire myiza ni ko kubaka amahoro, burya indangagaciro nyarwanda ni umusingi ushyira imbere ibyahuzaga Abanyarwanda kandi byimakaza amahoro kandi kwimakaza amahoro mu Rwanda ni yo nzira yo kubanisha Abanyarwanda”.

Kuri iyi tariki imitwe ihanganye ku rugamba isabwa gufata akaruhuko igatekereza ku mahoro

N’ubwo hari abavuga ko ushaka amahoro ategura intambara, byagaragye ko n’abari mu ntambara bahanganye ku rugamba basabwa gutekereza ku mahoro babuzanya cyangwa umwe abuza mugenzi we bityo basabwa ko nibura buri tariki ya 18 Nzeri, abahanganye ku rugamba bajya barambika intwaro hasi bagatekereza ku cyo bapfa.

Aho amahoro yagezweho rero ngo ni ngombwa gutekereza ku bibazo byugarije abaturage bishobora no kuba bikomoka ku bisigisigi by’amateka yabanjirije amahoro, ari na ho Mukayiranga avuga ko uyu munsi amahoro akenewe ari uko ubuyobozi n’abaturage bakorera hamwe mu gushakira umuti ibibazo byugarije igihugu birimo no guhangana n’icyorezo cya Covid-19.

Agira ati “Guhangana n’icyorezo cya Covid-19 ni bumwe mu buryo abayobozi n’abaturage basabwa gufatanyamo ntawe uhutaje undi cyangwa ntawe wirengagije nkana kubahiriza amabwiriza yo kurwanya iki cyorezo kuko kitubuza umudendezo haba ku Banyarwanda n’abatuye Isi muri Rusange”.

Mukayiranga avuga ko abantu bakwiye kwagura imyumvire ku mahoro kugira ngo bahore bazirikana ko iyo umwe yabuze amahoro bishobora kuba intandaro yo kuyabura kuri benshi, bityo ko hakwiye gukomeza kuzirikanwa icyatuma buri wese agira umudendezo.

Kuri iyi tariki mu Rwanda hakorwa ibiganiro bigamije gushishikariza abaturage kurushaho kubaka umuco w’amahoro bazirikana Ubumwe n’Ubwiyunge, kuko ari yo soko yo kubaka amahoro ku bagizweho ingaruka na Jenosidide yakorewe Abatutsi.

Nyuma y’uko irimbi rya Kinigi ryuzuye abaturage bagowe n’ingendo ndende bakora bajya gushyingura kure

Ibi ngo bibateza ingaruka zo gukora ingendo ndende bajya gushyingura mu marimbi ya kure, abatabishoboye bagahitamo kurenga ku mategeko, bagashyingura mu masambu yabo kandi bitemewe.

Umuturage Kigali Today yasanze muri santere ya Kinigi witwa Mwumvaneza Jackson yagize ati: “Gupfusha umuntu muri aka gace kugira ngo tubone uko tumushyingura ni ikibazo. Tuvuge wenda nk’igihe apfiriye mu bitaro bya Ruhengeri, cyangwa ahandi hantu, muri kwa kubanza kujyana umurambo iwe ngo abe bamusezereho no kuwujyana ngo ushyingurwe mu irimbi riri mu Murenge wa Gacaca, ni urugendo rutari munsi y’ibirometero 50. Bikaba ari ibintu bitugoye cyane”.

Kuri ubu imbere y’uruzitiro rw’irimbi rya Kinigi, riherereye muri santere ya Kinigi, ryashyingurwagamo abantu bo mu Mirenge ya Kinigi, Nyange na Musanze; hanamanitse icyapa kivuga ko “Ubuyobozi bw’Umurenge wa Kinigi, bumenyesha abantu bose ko iryo rimbi ryuzuye kandi ko nta wemerewe kurishyinguramo”.

Bamwe mu baturage bavuga ko kuba nta rimbi riri muri ako gace, birimo kubagiraho ingaruka zo kuba hari n’abashyingura mu masambu yabo.

Mukamanzi Verediyana agira ati “None twabigenza gute kundi? Ko umuntu wawe atapfa ngo umugumane mu nzu? Ubu bamwe ni ugushyingura mu masambu cyagwa hafi y’ingo, kubera ikibazo cyo kuba badafite ubushobozi bwo kujyana umurambo kuwushyingura mu yandi marimbi ya kure. Icyo dusaba ubuyobozi ni ugukora uko bushoboye mu maguru mashya, bugakemura iki kibazo, kuko natwe bitubangamiye cyane”.

Ubuyobozi bw’Umurenge wa Kinigi bwemeza ko bwafashe icyemezo cyo kurifunga, nyuma yo kuzura, ndetse ikibazo bwagishyikirije Ubuyobozi bw’Akarere.

Mitali Narcisse, Umukozi ushinzwe ubuhinzi n’umutungo kamere mu Murenge wa Kinigi, yagize ati “Ntitwari kureberera ko ririya rimbi rikomeza gukoreshwa kandi ryaramaze kuzura. Byari guteza ikibazo cyo kugerekeranya abantu ku bandi basanzwe bahashyinguye. Iki kibazo kiri mu by’ingutu uyu Murenge uhanganye nacyo, kandi twakiganiriyeho n’Ubuyobozi bw’Akarere, butwizeza ko na bwo bugiye gushanga ingengo y’imari izakoreshwa mu kugura ubundi butaka irimbi rizimurirwaho”.

Ubuyobozi bw’Umurenge wa Kinigi bwizeza abaturage ko iki kibazo kiri mu byihutirwa buri gukurikirana, bukabizeza ko kitazatinda gukemuka.