Ntabwo ari ibintu bisanzwe kuba ikinyamakuru cyaganiriza umuntu uri gukorwaho iperereza mu gihe akiri mu maboko y’inzego z’umutekano, icyakora Leta y’u Rwanda yatanze ubwo burenganzira. Bidateye kabiri, Abdi Latif Dahir, Umunyamakuru uhagarariye The New York Times mu Karere ka Afurika y’Iburasirazuba ufite ibiro muri Kenya, yari asesekaye i Kigali, ahabwa ikaze mu cyumba Rusesabagina yari afungiyemo, bagirana ikiganiro kirambuye.
Mu kiganiro cyabaye kirekire, Rusesabagina yasobanuye amateka ye kugera ku ifatwa rye, anagaruka ku bitero byagabwe n’umutwe w’iterabwoba wa FLN yari ayoboye, n’uburyo utari ugamije gukoresha intambara mu gukuraho Leta y’u Rwanda yatowe n’abaturage.
Umuntu yagatekereje ko ingingo yo kubaza Rusesabagina ku bikorwa bishinjwa umutwe wa FLN atigeze yihakana, yari kwiharira igice kinini cy’ikiganiro. Icyakora mu nkuru y’amagambo hafi ibihumbi bine Latif yafashijwemo n’abarimo Declan Walsh uhagarariye The New York Times muri Afurika, Matina Stevis-Grineff uyihagarariye mu Burayi na Ruth Maclean uyihagaririye mu Burengerazuba bwa Afurika, bayikomojeho mu gice gito cyane, ubundi inkuru yibanda ku isano iri hagati y’ifungwa rya Rusesabagina n’ubwamamare yaheshejwe na filime ya Hotel Rwanda, ari na bwo yahowe na Perezida Kagame, nk’uko inkuru ikomeza ibisobanura.
Iyi ngingo n’izindi zirimo ifatwa rya Rusesabagina, iyoherezwa rye mu Rwanda, uruhare yagize mu kurokora abahungiye muri Hotel des Mille Collines byihariye igice kinini cy’inkuru zatambutse mu binyamakuru mpuzamahanga, birimo BBC, CNN, The Guardian n’ibindi bitandukanye, mu gihe nta shyaka byagize ryo kumenya ingaruka za FLN ku miryango yatakaje abantu icyenda babiguyemo, cyangwa ngo hagarukwe ku buryo uyu mugabo yemereye mu rukiko uruhare rwe mu ishingwa rya FLN n’ibikorwa byayo, ibintu ‘yicujije, akabisabira imbabazi.’
Uretse urubanza rwa Rusesabagina, ibikorwa by’u Rwanda birimo ubufatanye bwarwo na Arsenal, ubuziranenge bw’izamuka ry’ubukungu bwarwo, iyubahirizwa ry’uburenganzira bwa muntu ndetse no kugera ejo bundi ku iyoherezwa ry’ingabo muri Mozambique, byose byakomeje kugarukwaho mu buryo bumwe n’ibinyamakuru mpuzamahanga, ku buryo bitagoye kubona ko bikubiye mu mugambi umwe wo guharabika u Rwanda.
Mu kiganiro Perezida Kagame aherutse kugirana na RBA, yagarutse kuri uyu mugambi, ndetse anasobanura ko bishobora kuba biterwa n’impamvu ebyiri.
Yaragize ati “Hari ibintu bibiri [bishobora gusobanura uwo mugambi. Icya mbere] kugerageza kwikuraho uruhare mu bibazo [bya Jenoside yakorewe Abatutsi] byabaye ku gihugu cyacu. Bakavuga bati ‘aba bantu ni abantu bicanye, nta ruhare tubifitemo’, nubwo mu by’ukuri babifitemo uruhare.”
“Icya kabiri nkeka ni uko abantu [n’ibihugu] bikomeye ku Isi, bihora bigerageza gutuma ibindi bihugu bibaho nka bo. [Bagashaka kubigisha indangagaciro zabo]. Ni nk’aho twebwe Abanyafurika tutagira indangagiciro, ubwo rero tukagomba gukurikira izo ndangagaciro zabo.”
Kuki u Rwanda ari umwihariko?
U Rwanda ni igihugu kitagira umutungo kamere mwinshi, kidakora ku nyanja ndetse ntikigire ubuso bunini, byose bikiyongera ku mateka mabi arimo Jenoside yakorewe Abatutsi n’ibibazo by’ubukene byari byarabaye akarande mu myaka myinshi ishize.
Kubasha kwikura mu bihe bikomeye nk’ibya Jenoside, igihugu kikubaka umutekano urambye, kigashyiraho ingamba z’iterambere, kigakurura abashoramari ndetse kikaza mu bihugu byigirwaho mu ngeri nyinshi zirimo imiyoborere myiza n’umutekano, ni ibintu bidatandukanye cyane n’ibitangaza.
Ikirenze kuri ibyo ariko, ni uko ibyo u Rwanda rwagezeho, ahanini rubikesha amaboko y’abana barwo, kuko nubwo rwakiriye inkunga z’amahanga, rwazikoresheje neza no kurenza ibyo zagenewe, ndetse runafite intego yo kureka gushingira kuri izo nkunga mu gihe cya vuba, kuko ubu zigize 17% by’ingengo y’imari y’igihugu, byose bigaherekezwa n’imiyoborere myiza, dore ko mu 2019, Banki y’Isi yashyize u Rwanda ku mwanya wa mbere muri Afurika, mu bihugu bifite Leta zikorera mu mucyo, zigateza imbere abaturage, ndetse zikubahiriza amategeko.
Mu kiganiro ‘In the Room’ Perezida Kagame aherutse kugira na Fred Swaniker watangije Kaminuza ya African Leadership University (ALU), yaciye amarenga ku mpamvu ishobora kuba ikizitira iterambere rirambye ry’Umugabane wa Afurika, agaragaza ko ikibazo cy’imiyoborere ari imwe mu nzitizi zikomeye z’iterambere ry’uyu Mugabane.
Yaragize ati “Dukeneye kumva ko tutagomba gutwara ibintu uko bisanzwe. Kuko ureba aho twari mu myaka 40 ishize, wareba aho tuzaba turi mu myaka 40 iri imbere, ukareba n’aho abandi bari bari mu myaka 40 ishize, abo usanga twari mu buzima bujya kumera kimwe, usanga barateye imbere inshuro nyinshi, naho twe n’aho twari turi icyo gihe, [hari aho usanga] twarasubiye inyuma.”
Yongeyeho ati “Hari ibyo twakora kugira ngo tuzamure ubukungu bwacu ku kigero cyo hejuru kurusha aho turi ubu. Wenda icyo dukeneye ari kugira umurongo muzima, tugafata inshingano [zo kubaka iterambere ryacu], ndetse ibyo dukora tukabikorana imbaraga nyinshi kuko hari ikibazo gikomeye tugomba gucyemura [ubukene].”
Iki kibazo cyo kutagira icyerekezo nicyo u Rwanda rwahereyeho mu gucyemura ibindi bibazo, kuko imiyoborere yarwo yashyizwemo imbaraga, birangira ibaye umusingi wo kubakiraho irindi terambere rufite mu nzego zose, kuva mu bukungu kugera ku mutekano.
U Rwanda ni kimwe mu bihugu byageze ku iterambere n’umutekano mu myaka 27 ishize, ariko ruhora rugaragazwa nk’igihugu kidashobotse, kitita ku burenganzira bwa muntu kandi kigahora mu makosa
Akaga kagwirira amahanga mu gihe ibihugu bya Afurika byakwigira ku Rwanda
Mu myaka iri imbere, imiterere y’Isi izahinduka mu buryo bufatika. Umubare w’Abanyafurika uziyongera, ku buryo mu 2050, umwe mu baturage bane ku Isi azaba ari Umunyafurika. Ni mu gihe abaturage b’i Burayi bazarushaho kugabanuka, aho umubare wabo ugereranyije n’abazaba batuye Isi, uzagera kuri 7% uvuye ku 9,8% uyu munsi. Abazungu bo muri Amerika nabo bazaba ari 49% by’abatuye icyo gihugu mu 2060, bavuye kuri 72% uyu munsi.
Ibi kandi bizajyana n’ubukungu, kuko mu 2050, ibihugu bitandatu muri birindwi bifite ubukungu bunini kurusha ibindi, bizaba ari ibihugu bifatwa nk’ibikiri mu nzira y’Amajyambere uyu munsi. Ibi biterwa n’uko iterambere ry’ibihugu biri mu nzira y’amajyambere, ryihuta ku muvuduko ukubye kabiri uw’ibihugu biri muri G7.
Ibi rero bisobanuye ko mu gihe ibihugu birimo ibya Afurika n’ibindi biri mu nzira y’amajyambere, byarushaho gukira no kugira abaturage benshi, bizagira ingaruka ku miterere y’imiyoborere y’Isi, ku buryo ingingo zirimo nko kuba Akanama Gahoraho k’Umutekano mu Muryango w’Abibumbye, LONI, gashobora guseswa, imiryango nka Banki y’Isi na IMF ikavugururwa, ku buryo imbaraga z’ibihugu bikize uyu munsi, zishobora kuzahinduka umuyonga mu myaka iri imbere.
“Ibi bitera impungenge abazungu, biganje mu bihugu bikize uyu munsi, ariko bitazaba bikize kurusha ibindi mu myaka iri imbere,” nk’uko impuguke mu bya politiki mpuzamahanga itashatse ko amazina yayo atangazwa, yabitubwiye.
Yakomeje ati “Buriya baricara bakibaza bati ’mu myaka 200 Isi izaba imeze ite? Uruhare rwacu mu biyikorerwamo ruzaba rungana gute? Ni gute twabikumira cyangwa tukabitinza?’”
“Uburyo bwiza bwo kubikumira,” nk’uko iyi mpuguke yakomeje ibitangaza, “Ni ugutinza iterambere ry’ibihugu biri mu nzira y’amajyambere, hagakoreshwa uburyo bwose bwo kubisubiza inyuma. Niyo mpamvu usanga ibihugu bigerageza kwerekana ko Afurika n’ibindi bihugu bifite ubushobozi bwo kwiyubakira iterambere bidashingiye ku bandi bantu, babirwanya cyane, bakabisebya mu buryo bushoboka kugira ngo ibindi bihugu bibitere icyizere ku buryo uwo mwuka mubi ushobora kuvamo intambara yakongera gusubiza inyuma iterambere.”
Yavuze ko ari yo mpamvu uzasanga ibihugu bikize bishobora gukoresha amahirwe yose mu kwerekana ko u Rwanda rudakora ibintu bizima, kuri buri kintu cyose bagashaka impamvu barusebya, ibyo bikaba bishobora kunyuzwa mu itangazamakuru n’ubundi buryo butandukanye.
Ati “Reba nko ku rubanza rwa Rusesabagina, ntabwo ikiba kibaraje ishinga ari ukureba ibimenyetso no gushimira u Rwanda uruhare rugira mu bikorwa byo kurwanya iterabwoba, icyo baba bashaka ni amahirwe yo gusebya igihugu no kugitesha agaciro mu bindi bihugu kugira ngo hatagira uzagira ishyaka ryo kukigiraho. Ibi ni nabyo byakozwe ku masezerano y’u Rwanda na Arsenal, nubwo yatanze umusaruro wari witezwe. Nibwo buryo bakoramo ibintu byabo kuko byarabaye no kuri Singapore, biri kuba ku Bushinwa, bizakomeza no kuba ku wundi wese uzagerageza kubaka iterambere atabashingiyeho.”
Mu kiganiro na Swaniker, Perezida Kagame yakomoje kuri iyi ngingo, agaragaza ko mu gihe Afurika yakubaka imiyoborere irambye, iterambere ryakurikiraho.
Ati “U Rwanda rufite amahirwe amwe [n’ibindi bihugu bya Afurika] ndetse n’ibibazo [bimwe]. [Rero igikenewe] ni ukugira imiyoborere ihamye, na politiki yo kuzamura buri wese, tugakoresha neza umutungo mwinshi dufite. [Uburyo Afurika imeze] ni nk’aho waba ufite buri kintu cyose iwawe, ariko ukabisiga ukajya gusaba. Cyangwa se ukaba ufite ibintu byose, undi muntu akaza akabikoresha, noneho ukamwirukaho umusaba. Ibi ni ibintu Afurika ikwiye guhindura kandi turabishoboye…birashoboka mu gihe ubushake bwa politiki bwaba buhari.”
Perezida Kagame yavuze ko mu gihe Afurika yagira ubuyobozi bufite intego, ishobora gukemura ibibazo by’ubukene ifite
U Rwanda rukwiye kwitwara gute ku barusebya?
Nta wakwirengagiza ko kuba u Rwanda rukomeza kuvugwa nabi mu bitangazamakuru mpuzamahanga birugiraho ingaruka, kuko kimwe mu bikorwa gishingiraho ubukungu bwacyo ari ubukerarugendo ndetse n’ishoramari riturutse mu mahanga.
Mu kiganiro na IGIHE, impuguke muri politiki, akaba n’inararibonye muri mikorere y’itangazamakuru mpuzamahanga, Albert Rudatsimburwa, yavuze ko uburyo bwiza bwo gukomeza guhangana n’ibi bikorwa byo gusebya u Rwanda, ari ugukomeza kubaka iterambere rirambye.
Yagize ati “Leta ntikwiye gucika intege, ahubwo ikwiye kongera imbaraga mu guteza imbere Abanyarwanda, kuko nibatera imbere, bizarushaho kugora abifuriza igihugu nabi kubona ibyo bakinenga. Ibyo kandi ni wo mugambi wa Leta.”
Yongeyeho ko “Ibi bikwiye no kujyana n’ibikorwa byo kwamamaza igihugu, kugira ngo abantu bakomeze kukigiraho amatsiko bacyige ndetse banagisure, bityo nibasubira iwabo bazabe abahamya b’ibyo babonye bitandukanye cyane n’ibyo babwirwa mu bitangazamakuru byabo.”
Aha ni ho ahera ashima gahunda zirimo kwamamaza u Rwanda binyuze muri ‘Visit Rwanda’, ati “Buriya ni uburyo bwiza bwo kwerekana igihugu cyacu, tukerekana ko hari ibintu bindi byiza gifite bitandukanye n’ibyo kivugwaho n’itangazamakuru mpuzamahanga.”
Itabwa muri yombi rya Rusesabagina ryavugishije benshi babyuririraho basebya u Rwanda
