Webrwanda Backend

Category: Uncategorized

  • Ibihe by’ingenzi bimaze kuranga urugamba rwa RDF muri Mozambique (Amafoto) – #rwanda #RwOT

    U Rwanda rwabanje gukora isesengura ry’uko ikibazo cyifashe, hanyuma muri Nyakanga 2021, rwoherereza ingabo n’abapolisi 1000 muri Mozambique gufatanya n’ingabo z’icyo gihugu guhashya imitwe y’iterabwoba muri Cabo Delgado.

    Ibibazo by’umutekano muke muri iyi ntara bifite imizi mu 2017. Icyo gihe Umutwe w’Iterabwoba wa Jamaat Ansar al-Sunnah wagabye ibitero byinshi mu mijyi itandukanye mu Turere tugize Intara ya Cabo Delgado turimo Palma, Macomia, Nagande, Muidube ndetse n’Ibirwa bya Vamuzi, Quefuque na Metundo.

    Ibikorwa bya Jamaat Ansar al-Sunnah, abaturage bo muri Mozambique bita ‘Al-Shabaab’, byatangiye gufata indi ntera mu mpera za 2020 n’intangiriro za 2021. Byageze iki gihe umaze kwigarurira uturere dutanu mu tugize Cabo Delgado.

    Ibyihebe byo muri uwo mutwe byibasiraga abasivili, bikabica bibaciye imitwe ndetse bikanatwika sitasiyo za Polisi. Ibi bitero byahitanye abaturage 3000 mu gihe abarenga ibihumbi 800 bavuye mu byabo ndetse byinshi mu bikorwa by’iterambere birahagarara kubera umutekano muke.

    Ibi byihebe byafungaga imihanda y’ingenzi irimo iy’ubucuruzi igashyirwamo za bariyeri ku buryo abantu badakomeza ubuhahirane hagati ya Palma na Mocimboa da Praia. Byabaga bigamije gukora ubucuruzi butemewe ku cyambu kandi nta nkomyi.

    Ibikorwa bya Jamaat Ansar al-Sunnah byo kwibasira ubuzima bw’inzirakarengane no gukorana na Islamic State [nyuma y’ibiganiro byo mu 2019] byatumye ku wa 10 Werurwe 2021, Amerika isohora itangazo rivuga ko washyizwe ku rutonde rw’imitwe y’iterabwoba ku Isi.

    Cabo Delgado ni yo byahanze amaso kuko ari intara ikungahaye kuri Gaz karemano. Mbere y’ibi bitero, Sosiyete y’Abafaransa Total Energies yari yatangiye kuyicukura ariko ibikorwa byayo bikomwa mu nkokora, ihita ikiza amagara y’abakozi bayo.

    Muri iyi nkuru, IGIHE iragaruka ku bihe by’ingenzi byaranze urugamba rwo guhashya ibi byihebe kuva ingabo z’u Rwanda n’iza Mbozambique zakwinjira mu bufatanye bugamije kubitsinsura.

    Kuva ku wa 9 Nyakanga uyu mwaka, ingabo n’abapolisi b’u Rwanda 1000 bari muri Mozambique mu bikorwa byo kugarura amahoro mu Ntara ya Cabo Delgado, kubungabunga umutekano no gukora amavugurura mu rwego rw’umutekano.

    Byageze mu ntangiriro za Nzeri 2021 uduce hafi ya twose ibyihebe byari byarigaruriye twarasubijwe mu maboko y’ingabo za Leta. Ubu icyiciro kigezweho ni icyo kubihiga mu bice byahungiyemo byiganjemo amashyamba ndetse no gusubiza mu byabo abaturage bari bamaze igihe ari impunzi.

    Urugendo rwa RDF na Polisi y’u Rwanda mu kubohoza Cabo Delgado yashegeshwe n’ibyihebe

    Ingabo n’abapolisi b’u Rwanda 1000 boherejwe muri Cabo Delgado ku wa 9 Nyakanga 2021. Izi ngabo zahise zinjira mu bufatanye n’iza Mozambique aho zashyikiye mu duce twa Mueda na Afungi mbere yo gutangira urugamba rwo guhashya ibyihebe.

    Urugamba rwahiniye mu Mujyi wa Mueda, aho icyiciro cya mbere cy’ingabo zahagurukiye zerekeza Diaca-Awasse- Mumu- Ntotwe mu Mujyi wa Mocimboa da Praia wafatwaga nk’ibirindiro bikuru by’ibyihebe. Ubwo zageraga mu Mujyi wa Awase, umwanzi yabanje kwihagararaho ariko aza kuva ku izima nyuma yo kuraswaho urufaya rw’amasasu n’ibisasu biremereye.

    Icyiciro cya kabiri cy’ingabo cyanyuze mu duce two mu Majyaruguru, ku Cyambu cya Afungi muri Palma ahari ikibuga cy’indege ndetse n’agace gacukurwamo gaz muri Cabo Delgado.

    Tariki ya 10 Nyakanga 2021 ni bwo, ingabo z’u Rwanda n’iza Mozambique zatangiye ibikorwa byo kurwana zihereye mu Majyaruguru mu duce twa Afungi-Quitunda- Quelimane – Maputo- Mapalanganha-1st May mbere yo guhura na bagenzi babo banyuze muri Mueda, bagahita babohoza Umujyi uri ku cyambu ariwo Mocimboa da Praia.

    Izi ngabo ntabwo zahagaze ahubwo zahise zikomeza kotsa igitutu ibyihebe, zibikurikira mu gace ka Mbau kari mu Majyepfo, ndetse no mu duce twa Siri 1 na Siri 2, aho byihishe nyuma yo gukwirwa imishwaro no gutatanira mu Turere twa Muidube na Macomia.

    Urugamba rw’i Cabo Delgado hagati yo ku wa 10 Nyakanga n’iya 9 Nzeri 2021

    -  Ku wa 10 Nyakanga 2021: Ingabo zashyize icyicaro muri Afungi.

    -  Ku wa 20 Nyakanga 2021: Zahuriraga mu Gace ka Palma.

    -  Ku wa 26 Nyakanga 2021: Ingabo z’u Rwanda n’iza Mozambique zakomeje imbere zijya guhurira mu Mijyi ya Tete na Mute.

    -  Ku wa 27 Nyakanga 2021: Hashyizweho icyicaro muri Zambia.

    -  Ku wa 29 Nyakanga 2021: Zakozanyijeho n’ibyihebe muri Mapalanganha.

    -  Ku wa 30 Nyakanga 2021: Maputo yatsintsuwemo umwanzi burundu.

    -  Ku wa 2 Kanama 2021: Quelimane yaranduwemo ibirindiro by’umwanzi.

    -  Ku wa 6 Kanama 2021: Njama na Primario de Mao, zabaye utundi duce twatsintsuwemo umwanzi.

    -  Ku wa 7 Kanama 2021: Ingabo zahanganye bikomeye n’ibyihebe.

    -  Ku wa 8 Kanama 2021: Umujyi wa Mocimboa da Praia warafashwe.

    Uduce twa Mocimboa da Praia, Palma na Afungi ni tumwe mu twibasiwe n’imitwe y’iterabwoba

    Uduce twandikishije umutuku, twose twatewe n’ibyihebe biratwangiza

    Ku rundi ruhande, ingabo zanyuze Mueda- Diaca-Awasse- Chinda zigana Mocimboa da Praia zarwanye urugamba rukomeye rurimo no gutegwa ibico mu Mijyi ya Awasse ku wa 24 Nyakanga 2021 no mu wa Chinda ku wa 2 Kanama 2021. Muri Awasse habereye imirwano ikomeye ariko ihosha ibyihebe bikubiswe inshuro bikwira imishwaro; byasize byangije urugomero runini mu zitanga amashanyarazi muri Awasse.

    Nyuma yo gufata Mocimboa da Praia, ingabo za RDF n’iza Mozambique zakomereje muri Mbau zinyuze mu byerekezo bibiri birimo icy’izanyuze mu gace ka Chinda n’icyanyuze Nakitenge. Izi ngabo zaje gufata Mbau ku mugoroba wo ku wa 20 Kanama 2021, ahagana saa Kumi.

    Ibyihebe byari bisigaranye amahitamo amwe ari yo yo guhungira mu mashyamba yitwa Syria (Siri I na Siri II) mu Karere ka Mocimboa da Praia. Siri I yatsintsuwemo ibyihebe ku wa 1 Nzeri 2021 mbere y’uko ingabo zikomereza muri Siri II aho urugamba rwasakiranye ku wa 5 Nzeri 2021 nyuma yo kuva mu gace ka Limala ku wa 2 Nzeri 2021.

    Kugeza ku wa 5 Nzeri 2021, Ingabo z’u Rwanda na Mozambique zari zamaze gufata imijyi yose y’ingenzi, uduce dukorerwamo ubucuruzi ndetse n’ibyaro byo mu Turere twa Palma na Mocimboa da Praia.

    Muri ibi bitero, ibyihebe bibarirwa mu 100 bimaze kwicwa ndetse iyi mibare ishobora kuba irenga kuko ahenshi hari aho byicwaga ariko bikajyanwa na bagenzi babyo. Mu kubihashya kandi hagiye haterwa ibisasu mu bice bitandukanye byabaga birimo ibyihebe.

    Ingabo z’u Rwanda n’iza Mozambique kandi zanafashe ibikoresho by’ibi byihebe birimo imbunda nini, SMGs na magazine zazo, RPG, Pistol, grenade, imodoka z’intambara, moto n’ibindi bikoresho byihariye ndetse n’ibyo kurya.

    Nyuma y’urugamba rwo kwatsa umuriro ku byihebe, hakomeje urugendo rwo gusubiza abaturage mu byabo nyuma y’igihe bari mu nkambi z’impunzi.

    Ku wa 9 Nyakanga 2021, Ingabo n’Abapolisi b’u Rwanda 1000 bagiye gufasha Mozambique guhangana n’imitwe y’iterabwoba

    Ingabo n’abapolisi b’u Rwanda boherejwe muri Mozambique bahise bashyikira ku Kibuga cy’Indege cya Nacala. Aha ni ho ziva zijya ku rugamba mu bice bitandukanye mu Ntara ya Cabo Delgado

    Ku Cyambu cya Afungi, Ingabo z’u Rwanda ziba zigenzura amazi no hakurya ku butaka umunota ku wundi

    Ibitaro Bikuru byo muri Palma byaratwitswe ibintu byose birangirika. Iyo winjiyemo imbere, ubonamo na za serumu zahiye ku buryo bishoboka ko hari n’abarwayi bapfiriyemo. Agace ibitaro birimo kamaze kubohorwa

    Ibitero by’imitwe y’iterabwoba byibasiye Palma byatumye Abafaransa bari barashoye miliyari 20 z’amadolari hafi ahitwa Afungi bazinga utwangushye baritahira

    Polisi n’Ingabo z’u Rwanda bakomeje gucunga umutekano muri aka gace nyuma yo kukirukanamo abarwanyi

    Aka gace kazwi nka 1st May kamaze kwirukanwamo inyeshyamba

    source : https://ift.tt/3CUVQjN

  • Imbamutima z’abaryamana bahuje igitsina mu Rwanda kuri Raporo ya HRW yabakozweho – #rwanda #RwOT

    Uyu muryango uvuga ko amakuru washingiyeho muri iyi raporo yavuye mu nkuru yakozwe n’ikinyamakuru ‘Vice’ igaruka ku birego by’abantu batavugwa amazina, bavuze ko bahohotewe mu bihe bitandukanye bikitirirwa Leta.

    Muri iyo nkuru, nta hantu hagaragazwa ko ibyakozwe byari umugambi cyangwa gahunda y’igihugu iri kubahirizwa n’inzego zigarukwaho, zirimo Polisi ahubwo iki kinyamakuru cyerekana ko u Rwanda ari kimwe mu bihugu byo mu Karere ka Afurika y’Iburasizuba bitanga uburenganzira busesuye ku Banyamuryango ba LGBTQ.

    Iyi raporo yunganirwa n’ibiganiro HRW ivuga ko yagiranye n’abantu umunani bafungiwe mu kigo ngororamuco kiri i Gikondo, bakavuga ko bahohotewe n’abafungwa bagenzi babo ndetse na Polisi ikongera gushinjwa, gusa nabwo ntihagaragazwe uburyo ibyakozwe n’abo bafungwa cyangwa abapolisi byari gahunda ya Leta iri kubahirizwa n’inzego bireba, ku buryo ari yo yabyitirirwa.

    IGIHE yaganiriye n’abanyamuryango ba LGBTQ mu Rwanda, batubwira ko batunguwe no kubona iyi raporo, kuko amakuru ayirimo adahuye n’ukuri, bigaterwa n’uburyo u Rwanda ruzwi ku rwego mpuzamahanga mu bijyanye no kurengera uburenganzira bw’abanyamuryango ba LGBTQ.

    Mu 2011, u Rwanda rwabaye igihugu rukumbi kiri muri Afurika yo Hagati n’Iburasirazuba, cyasinye amasezerano mpuzamahanga y’Umuryango w’Abibumbye yamagana ihohoterwa rikorerwa abanyamuryango ba LGBTQ.

    Mu 2017, u Rwanda rwasinye umwanzuro w’Umuryango w’Abibumbye, wamagana ibihugu bikoresha igihano cy’urupfu ku bantu bakoze imibonano mpuzabitsina babihuje kandi babyumvikanyeho. Ni amasezerano na Leta Zunze Ubumwe za Amerika zitashyizeho umukono.

    Raporo Ngarukamwaka ya ILGA yo mu 2020, igaragaza uburyo amategeko y’ibihugu bitandukanye ashyirwa mu bikorwa ku bijyanye n’abaryamana bahuje ibitsina, igaragaza ko u Rwanda rutagira amategeko ahana cyangwa abangamira uburenganzira bw’abanyamuryango ba LGBTQ.

    Leta ntiyivanga mu buzima bw’abanyamuryango ba LGBTQ

    Mu Kiganiro na IGIHE, Nabonibo Albert uri mu baharanira uburenganzira bw’abanyamuryango ba LBGTQ, yavuze ko yatunguwe no kubona raporo ya HRW na cyane ko mu myaka irenga itatu amaze atangaje ku mugaragaro ko ari umunyamuryango wa LGBTQ, atigeze ahura n’ihohoterwa iryo ari ryo ryose rikozwe n’urwego urwo ari rwo rwose rwa Leta.

    Ati “[Tukimara kubona iriya raporo] Byaradutunguye cyane, kuko ubundi u Rwanda ruzwi nk’ahantu abanyamuryango ba LGBTQ bisanzura. Ibindi bihugu byose mu Karere [ka Afurika y’Iburasirazuba] bigira ibihano bihanishwa abanyamuryango ba LGBTQ, mu Rwanda ntabyo tugira. Rero kumva ko ari twe duhohoterwa ku buryo bijya muri raporo mpuzamahanga, byarantunguye.”

    Nabonibo usanzwe anakora ibikorwa by’ubuvugizi ku banyamuryango, yavuze ko ahura na benshi bagize ibibazo by’ihohoterwa cyakora “ariko ntabwo ari ihohoterwa rikorwa n’inzego za Leta, ni ihohoterwa rishobora gukorerwa mu miryango cyangwa rigakorwa n’abandi bantu kubera ubumenyi bucye, ariko ubusanzwe tubanye na Leta neza kuko niyo tugize ibibazo, tuyibigezaho nk’abandi Banyarwanda bose kandi sindabona yanga kudufasha.”

    Umubano mwiza hagati ya Leta n’abanyamuryango ba LGBTQ, wemezwa na Gasore (amazina twahinduye) wavuze ko Leta ibitaho nk’uko yita ku bandi Banyarwanda.

    Ati “Leta itwitaho nk’uko yita ku bandi Banyarwanda, niba ndwaye mbona ubuvuzi, ndetse ubu dufite abaganga bari hirya no hino batojwe kwita ku bibazo byacu by’umwihariko kandi no mu mavuriro ya Leta turahavurirwa. Ibyo ntibyashoboka Leta iramutse iturwanya.”

    Yongeyeho ati “Turi umuryango mugari, tugira aho tubarizwa, tugira inama zihoraho dukora mu buryo bwagutse, dutuye ahantu hazwi, dukoresha imbuga nkoranyambaga ndetse tugira n’urusengero.”

    “Ibyo byose ntabwo byabaho Leta itabishaka, kuko ntabwo dukora mu buryo bwihishe, tunagira konti dutangarizaho ibikorwa byacu kuri Twitter, Instagram na Facebook, nonese kuki batwihorera niba batadushaka? Hari abantu batangaje ko ari abanyamuryango mu buryo buzwi, nta n’umwe urabifungirwa. Ni ibyerekana ko Leta irengana kuko ntacyo idutwara na kimwe, ahubwo iradufasha mu bibazo byacu birimo kubona ubuvuzi, bikenewe kongerwamo imbaraga ariko birakorwa.”

    Nabonibo Albert yavuze ko yatunguwe no kubona raporo ya HRW na cyane ko mu myaka irenga itatu amaze atangaje ku mugaragaro ko ari umunyamuryango wa LGBTQ, atigeze ahura n’ihohoterwa

    Ihohoterwa ntirirashira mu muryango nyarwanda

    Nubwo Leta itivanga mu mibereho y’abanyamuryango ba LGBTQ, umubare munini w’Abanyarwanda ntabwo urasobanukirwa iby’uyu muryango, ari nayo mpamvu ugihura n’ihohoterwa ritandukanye, ariko rikorwa n’abantu ku giti cyabo, aho kuba urwego rwa Leta.

    Nabonibo yavuze ko ajya yakira ibibazo byinshi by’abanyamuryango bahohotewe, ariko wakurikirana ugasanga ni ibibazo by’imiryango ukwayo, cyangwa abantu ku giti cyabo.

    Ati ‘Hari abajya bampamagaraga bambwira ibibazo bahuye nabyo, kenshi usanga ari ababyeyi bavumbuye ko abana babo ari abanyamuryango ba LGBTQ bikabarakaza, ugasanga birukanye umwana mu rugo cyangwa baramuheje.”

    “Ibyo nkunda kubibona, ariko ibyo biba bikozwe n’ababyeyi, ntabwo wavuga ko ari ihohoterwa rikozwe na Leta, kandi nabwo uwo mubyeyi aramutse arengereye dushobora kumurega, kuko amategeko y’u Rwanda atanga uburenganzira bungana kuri buri wese. Ni ibintu dukemura binyuze mu biganiro.”

    Ku ruhande rwa Ntaganda Imanzi Dylan, yavuze ko ikibazo gihari gishingiye ku myumvire, igituma abantu bafata abanyamuryango ba LGBTQ nk’abafite uburwayi bwo mu mutwe.

    Ati “Hari ubwo uba uri kugenda mu muhanda, abantu bakakureba cyane, abandi bakaguseka […] Ikibazo ni uko abo bantu baba bataratojwe, ariko ntabwo wabyitirira urwego rwa Polisi muri rusange, ahubwo ni imyitwarire itari myiza y’uwo mupolisi kuko nawe ni umuntu utuye mu muryango utaratwakira.”

    Leta ikwiye gushyira imbaraga mu bukangurambaga

    Imanzi yavuze ko aho ibintu bigeze, Leta ikwiye guhaguruka ikigisha Abanyarwanda uburenganzira bw’abaryamana bahuje ibitsina, kuko ari ho hakiri icyuho cy’abantu bayitukisha bavuga ko ibarenganya, nyamara barenganyijwe n’abantu ku giti cyabo.

    Yagize ati “Leta ikwiye guhaguruka igakora ubukangurambaga bwagutse, abantu bose bakabimenya ko badakwiye kurenganya abanyamuryango ba LGBTQ. Nk’urugero, mbere abantu bafite ubumuga bwo kutavuga cyangwa kutumva babitaga amazina abatesha agaciro, ariko ubu nta muntu ushobora kubikora kuko Leta yarabihagurukiye ikigisha abantu.”

    Kuri twe ntibirakorwa, umuntu arajya mu rusengero akatwita amazina adakwiye (abatinganyi), akajya kuri radio na televiziyo akabivuga ntacyo yikanga, mugahura mu nzira akagutuka mu ruhame, ku buryo tumeze nk’abamenyereye gukorerwa iryo hohoterwa, aho umuntu agutuka ukumva ni ibisanzwe.”

    “Hakenewe ko Leta ishyiramo imbaraga, ikigisha abantu kutwubaha nk’uko byagenze ku babana n’ubumuga. Ni ibintu bikenewe cyane, kandi bikagirwamo uruhare n’inzego nkuru za Leta, naho ubundi ntabwo bizapfa kwihindura, kandi bitugiraho ingaruka mbi.”

    Imanzi kandi yavuze ko abantu bakora mu nzego za Leta bakunda guhura n’abantu benshi “Bakwiye kongererwa amahugurwa ku bijyanye n’abanyamuryango ba LGBTQ, bakamenya imvugo zikwiriye, uburyo babaha ubufasha bw’ibanze mu gihe bahohotewe mu ruhame n’ibindi bituma no mu gihe umuntu ahohotewe, ashobora kubona ubufasha byoroshye, kuko kububura biganisha ku bindi bibazo birimo uburwayi bw’agahinda gakabije.”

    Nabonibo yavuze ko Leta ikwiye no gutekereza uburyo hashyirwaho “Urwego rutuvuganira, rushinzwe ibikorwa byacu mu buryo bw’umwihariko kandi rufite ibyangombwa byose. Ibi bizatuma no mu gihe hakozwe raporo nk’izi z’ibinyoma, tubona urwego rushobora guhaguruka rukabyamagana kandi rufite ibimenyetso, rwarakoze ubushakashatsi ku buryo haba hari imibare izwi, ishobora kwifashishwa mu bihe ikenewe.”

    Mu Karere ka Afurika y’Iburasirazuba, mu Rwanda niho honyine kuryamana cyangwa gukundana n’uwo muhuje igitsina atari icyaha gihanirwa n’amategeko.

    Nko muri Kenya, iki gikorwa ni icyaha, gihanishwa igifungo cy’imyaka 14, bikaba imyaka ibiri mu Burundi. Muri Sudani y’Epfo, iki cyaha gihanishwa imyaka 10 y’igifungo, mu gihe muri Uganda na Tanzania gishobora gufungisha umuntu ubuzima bwe bwose, nk’uko raporo ya ILGA ibyerekana.

    Video ku mibereho y’abanyamuryango ba LGBTQ mu Rwanda

    source : https://ift.tt/3manSRv

  • Rutahizamu wa APR FC n’Amavubi yambitse impeta umukunzi we #rwanda #RwOT

    Rutahizamu w’ikipe ya APR FC utarimo gukina muri iyi minsi kubera imvune yambitse impeta umukunzi we Uwase Kelia amusaba ko yazamubera umugore.

    Byiringiro Lague na Uwase Kelia bamaze imyaka irenga ine bakundana, akaba yamwambitse impeta ku mugoroba w’ejo hashize ku wa Kabiri.

    Amakuru avuga ko uyu muhango wabereye mu Mujyi wa Kigali ahazwi nko muri Mera Neza.

    Uwase Kelia na we akaba yahise amwemera kuzamubera umugore maze igihe gisigaye ku Isi bakazakimarana.

    Amakuru ISIMBI yamenye ni uko amusabye kumubera umugore mu gihe umuhango wo Gufata Irembo wabaye mu minsi ishize.

    Ku munsi w’ejo ku wa Kane tariki ya 30 Nzeri nibwo bazasezerana imbere y’amategeko.

    Biteganyijwe ko ubukwe bwabo buzaba mu mpera z’uyu mwaka mu kwezi k’Ukuboza.

    Ikiganza cya Kelia hejuru y’icya Lague nyuma yo kwambikwa impeta

    Kelia yishimiye kwambikwa impeta na Lague

    Ntibajya bahisha ko bakundana

    Lague na Kelia bamaze igihe bakundana

    Source : http://isimbi.rw/siporo/article/rutahizamu-wa-apr-fc-yambitse-impeta-umukunzi-we

  • ‘Briquette’ igurwa amafaranga 125 ihisha ibishyimbo n’umuceri, nta myotsi #Rwanda #RwOT via @kigalitoday #rwanda #RwOT

    Ikilo kimwe cya ‘briquette’ kigurwa amafaranga y’u Rwanda 250 ku ruganda ruzikora rukoresheje ibarizo rwitwa OAK Investment ruri i Mageragere muri Nyarugenge.

    Nyirambarushimana wirirwa ategurira amafunguro abakozi b’urwo ruganda, avuga ko adashobora gucana inkwi n’amakara mu rugo iwe bitewe n’uko byo bihenze kandi bikaba biteza imyotsi n’umwanda.

    Nyirambarushimana yagiye ku ruganda OAK Investment atira imbabura (na zo zicuruzwa n’urwo ruganda), agura ‘briquette’ imwe ariko atekesha igice cyayo kigurwa amafaranga 125, ayicana muri ya mbabura, aterekaho inkono y’ibishyimbo.

    Briquette igurwa amafaranga 125 yahisha ibishyimbo n
    Briquette igurwa amafaranga 125 yahisha ibishyimbo n’ibindi

    Abanyamakuru basuye Nyirambarushimana basanga ibishyimbo yatetse bikiri bibisi(imitura), yari amaze gucimburira mu mbabura ibice bitatu by’iyo briquette, hasigaye igice kimwe yakuramo ibicimbu bibiri.

    Nyuma y’isaha imwe irenga, Nyirambarushimana yari ahishije bya bishyimbo akoresheje bya bicimbu bitatu bya ‘briquette’ yashyizemo kare, avuga ko ibyo bishyimbo byamaze amasaha abiri arengaho iminota mike ku ziko.

    Nyirambarushimana avuga ko icyo yakoze gusa ari ugukomeza kongera amazi mu nkono kuko cya gice cya briquette yari asigaje cyari kikiri cyose.

    Yahise asuka amazi mu isafuriya acimburamo kabiri ya briquette yasigaye, ashyira ku yindi mbabura aterekaho amazi yo guteka umuceri, ndetse akavuga ko uwo muceri numara gushya aza no gushyiraho amazi yo koza abana.

    Nyirambarushimana yagize ati “Inusu ya ‘briquette’ igurwa amafaranga 125, uramutse utatetse ibishyimbo iyo nusu yahisha imvange, nyuma ugashyiraho umuceri, hanyuma ugateka imboga, ndetse ukaza no gushyiraho icyayi, icyo gihe ariko waba wakoresheje amakara agurwa amafaranga arenga 400 ukaba wateka umuceri n’imboga gusa”.

    Briquettes zikorwa mu ibarizo n
    Briquettes zikorwa mu ibarizo n’uruganda rwitwa OAK Investment

    Uretse kuba umuntu yazigama amafaranga menshi akoreshwa mu kugura ibicanwa, ‘briquette’ uko bigaragara zaba inshuti y’ubuzima n’ibidukikije kuko nta myotsi zitera, ntizisaba umuntu guhora acungana n’imbabura kugira ngo idateza inkongi mu nzu ye.

    Kigali Today yaganiriye na Munyarubuga Javan, nyiri uruganda OAK Investment Ltd, avuga ko yashoye amafaranga y’u Rwanda arenga miliyoni 300 mu kubaka no kugura imashini zibumbabumba ibarizo zikarikoramo ‘briquettes’.

    Yagize ati “Ibarizo ryitwaga umwanda kuko uretse abantu barisasira inkoko hamwe n’abajya kuricanisha amatafari nta kindi rikora, aho babariza mu Gakiriro ka Gisozi hari igihe ribabana ryinshi bakabura aho barishyira bakaritwika, ariko twe twaribyajemo ibicanwa birengera ibidukikije, dufite ubushobozi bwo gukora toni 30-40 ku munsi za ‘briquettes’ iyo tutabuze umuriro”.

    Mu mezi abiri urwo ruganda rumaze rukora ngo rumaze kugira ububiko bwa briquettes zipima toni 200
    Mu mezi abiri urwo ruganda rumaze rukora ngo rumaze kugira ububiko bwa briquettes zipima toni 200

    Munyarubuga ashimangira ko ikilo kimwe cya ‘briquettes’ kigurwa amafaranga 250 nk’uko twabitangarijwe na Nyirambarushimana, ariko we akavuga ko icyo kilo kimwe cyahisha amafunguro ashobora gutekwa n’amakara yaguzwe amafaranga 500.

    Icyakora iyo briquette ngo ntishobora kuramba mu ziko n’imbabura bisanzwe (byasamye cyane) nk’uko imara igihe kinini mu ziko rya rondereza cyangwa mu mbabura z’urwo ruganda.

    Avuga ko izo mbabura zitumizwa mu Bushinwa zigera mu Rwanda zigurwa amafaranga hagati y’ibihumbi 40-50, zikaba ngo zishobora kumara imyaka ibiri zitarangirika mu gihe umuntu yaba yazifashe neza.

    Avuga ko agiye kujya azana ibyuma byazo mu Rwanda akaba ari ho aziteranyiriza kugira ngo igiciro cyazo kigabanuke, kandi ko azakomeza kubaka amaziko ya rondereza cyane cyane mu bigo by’amashuri, mu magereza n’ahandi hacumbika abantu benshi.

    Munyarubuga avuga ko azashinga muri buri karere uruganda rukora ‘briquettes’ mu ibarizo, mu rwego rwo kurwanya umuco wo gutema amashyamba ateze avanwamo inkwi n’amakara.

    Uyu mushoramari kandi ngo afite gahunda yo gufatanya n’inzego zibishinzwe gutera amashyamba menshi yazajya akorwamo ibikoresho bitandukanye, we bakamusigira ibarizo gusa.

    Munyarubuga avuga ko aramutse anahawe imigano yeze iri ku nkombe z’imigezi hirya no hino mu gihugu, na byo ngo byamufasha gukora ‘briquettes’ nyinshi zisimbura inkwi n’amakara.

    source : https://ift.tt/3ijcEZX

  • Perezida Biden arashinjwa gusuzugura inama yagiriwe n'abajenerali bakomeye ba US #rwanda #RwOT

    Ubuhamya Jenerali Mark Milley na Jenerali Frank McKenzie bagejeje ku nteko ishingamategeko y'Amerika busa nk'ubuvuguruza Perezida Joe Biden, wavuze ko atibuka agirwa inama nk'iyo.

    Aba Taliba bafashe ubutegetsi mu kwezi kwa munani, nyuma yuko bigaruriye ibice byinshi by'igihugu mu buryo bwihuse.

    Jenerali Milley yavuze ko Amerika yatunguwe n'umuvuduko leta ya Afghanistan yahirimyeho.

    Ku wa kabiri, aba bajenerali babiri bahaswe ibibazo n'akanama ka sena y'Amerika kibanda ku by'igisirikare, bari kumwe na Minisitiri w'ingabo Lloyd Austin.

    Ibazwa ryabo ribaye hashize ibyumweru ingabo z'Amerika zivuye ku kibuga cy'indege cy'i Kabul mu buryo bw'akajagari, mu gihe ibihugu bikomeye by'amahanga byashakaga gutahukana abaturage babyo n'Abanya-Afghanistan babarirwa mu bihumbi bingingaga ngo batabarwe.

    Igitero cy'ubwiyahuzi cyishe abantu 182 muri icyo gikorwa cyo kuva muri Afghanistan. Abasirikare 13 b'Amerika n'Abanya-Afghanistan batari munsi ya 169 biciwe ku irembo ry'ikibuga cy'indege ku itariki ya 26 y'ukwezi kwa munani.

    Kugumishayo abasirikare

    Jenerali McKenzie, nk'ukuriye ibiro bikuru by'ingabo z'Amerika, ni we wahagarikiye kuva muri Afghanistan kwazo.

    Ahatwa ibibazo n'abasenateri b'abarepubulikani, yavuze ko yagiye inama yo kugumisha abasirikare bacye 2,500 muri Afghanistan.

    Ibi bisa nk'ibivuguruza ibyashimangiwe na Perezida Joe Biden mu kiganiro n'umunyamakuru wa ABC ku itariki ya 19 y'ukwa munani ko atibuka umuntu n'umwe amugira inama nk'iyo.

    Jenerali Milley yavuze ko yemeye iyo nama, ariko abajijwe na senateri w'umurepubulikani Dan Sullivan niba amagambo ya Bwana Biden yari “itangazo ritari ukuri”, yanze gutanga igisubizo kidaciye ku ruhande.

    Nyuma yaho, Jen Psaki, umuvugizi w'ibiro bya perezida bya White House, yavuze kuri iyo ngingo.

    Madamu Psaki yagize ati: “Perezida aha agaciro inama y'ukuri ya… abakuru b'ingabo n'igisirikare. Ibyo ntibivuze ko buri gihe yemeranya na yo”.

    Yavuze ko iyo ingabo ziguma muri Afghanistan nyuma y'itariki ntarengwa yo mu kwezi kwa munani, Amerika yari kuba noneho yinjiye mu ntambara n'aba Taliban.

    BBC

    Source : https://umuryango.rw/amakuru/mu-mahanga/umutekano/article/perezida-biden-arashinjwa-gusuzugura-inama-yagiriwe-n-abajenerali-bakomeye-ba

  • Perezida wa APR FC yashimiye abakinnyi b’iyi kipe, asura ibikorwaremezo bishya iyi kipe yujuje(AMAFOTO) #rwanda #RwOT

    Nyuma yo kuva mu butumwa bw’akazi, Lt Gen Mubarakh Muganga akaba umuyobozi wa APR FC, yasuye ikipe ya APR FC i Shyorongi ashimira abakinnyi uburyo bitwaye mu mikino iheruka CAF Champions League, aboneraho no gusura bimwe mu bikorwa iyi kipe yujuje bizajya bifasha abakinnyi mu myitozo.

    Ku munsi w’ejo hashize ku wa Kabiri tariki ya 28 Nzeri 2021 nibwo Lt Gen Mubarakh Muganga yasuye aba bakinnyi aho bakorera imyitozo i Shyorongi ari nabo bakorera umwiherero.

    Lt Gen Mubarakh Muganga yashimiye abakinnyi b’iyi kipe kuba barasezereye Mogadishu City Club mu ijonjora ry’ibanze rya CAF Champions League nubwo atabashije kuwukurikirana bitewe n’ubutumwa bw’akazi ariko yawukurikiranye mu mashusho, gusa yabasabye kwitwara neza mu mikino iri imbere.

    Ati 'Ndabashimira uburyo mwitwaye mukuramo iriya kipe nyamara ibarizwamo abakinnyi mpuzamahanga barenga barindwi byari ibyishimo, n’ubwo ntabashije kugera kuri sitade ngo nkurikirane uriya mukino kuko narindi mu butumwa bw’akazi, ariko nawukurikiranye mu buryo bw’amashusho. Mwitwaye neza, ntabwo nari narabonye uburyo bwo kubashimira ku mugaragaro ubu nicyo cyanzanye.'

    'Nsoje mbasaba gukomeza imyitozo myiza kugira ngo tuzabashe no gutahana intsinzi mu mikino tuzakurikizaho, imyitozo murayikora neza twizeye ko n’ahandi tuzabona intsinzi ituma Ingabo z’Igihugu zishima, abakunzi ba APR FC n’abakunzi b’umupira w’amaguru muri rusange bikaba akarusho.'

    Uyu muyobozi kandi yasuye ibikorwa iyi kipe yujuje i Shyorongi bizajya bifasha abakinnyi mu myitozo cyane kongerera abakinnyi imbaraga.

    Hari ikibuga cy’umucanga abakinnyi bazajya bifashisha, hari inzu irimo ibikoresho bizajya bifasha abakinnyi mu myitozo yo gukomeza inyama.

    Lt Gen Mubarakh Muganga yasuye APR FC

    Inzu yo abakinnyi bazajya bajyamo bagiye gukomeza imitsi nayo yaruzuye

    Source : http://isimbi.rw/siporo/article/perezida-wa-apr-fc-yashimiye-abakinnyi-b-iyi-kipe-asura-ibikorwaremezo-bishya-iyi-kipe-yujuje-amafoto

  • Umunyenga, amandazi n’amata mu bishukishwa abanyeshuri bagasambanywa #rwanda #RwOT

    Umunyenga, amandazi n’amata bimwe mu bishukishwa abanyeshuri bagasambanywa. Abakurikirana ubuzima bwa buri munsi bw’abanyeshuri mu duce tumwe na tumwe mu Rwanda, batunga urutoki abamotari n’abacuruza amabutike kuza ku isonga mu guhohotera abanyeshuri b’abakobwa biga mu mashuri abanza n’ayisumbuye.
    Hakizimana Emmanuel ushinzwe uburezi mu murenge wa Bweramana mu karere ka Ruhango. Yagize ati 'Ahanini bashukwa n’insoresore z’abamotari n’abacuruza mu ma butike, aho usanga babashukisha amafaranga (…)

    – Ibikorwa

    Source : http://agasaro.com/spip.php?article4385

  • Icyifuzo cya Eric Nshimiyimana k’umutoza w’ikipe y’igihugu, Mashami Vincent #rwanda #RwOT

    Umutoza wa AS Kigali, Eric Nshimiyimana avuga ko ashaka gusaba umutoza w’ikipe y’igihugu, Mashami Vincent ko abakinnyi bahamagawe mu Mavubi yabareka bagakina umukino wa gicuti bafitanye na Rayon Sports ku wa Gatandatu bagasubira mu mwiherero.

    Mashami Vincent yahamagaye abakinnyi 36 bagomba kwitegura imikino 2 yo mu itsinda E mu ushaka itike y’igikombe cy’Isi cya 2022 yo u Rwanda ruzakinamo na Uganda mu kwezi gutaha.

    Aba bakinnyi bahamgawe by’umwihariko abakina mu Rwanda, bagomba gutangira umwiherero uyu munsi bitegura uyu mukino aho bazawukorera La Palisse Hotel Nyamata.

    Uyu mwiherero ukaba wahuriranye n’umukino wa gicuti AS Kigali ifitanye na Rayon Sports ku wa Gatandatu mu rwego rwo kwitegura shampiyona y’icyiciro cya mbere izatangira tariki ya 30 Ukwakira 2021, buri kipe yifuzaga gukina n’indi yuzuye.

    Eric Nshimiyimana avuga ko nta kibazo kuko igihugu cyabahamagaye, ariko na none yifuzaga gukina uyu mukino ikipe ye yuzuye, bityo akaba ashaka gusaba Mashami niba aba bakinnyi atabareka bagakina uyu mukino ubundi bagasubira mu mwiherero bitegura umukino uzaba tariki ya 7 Ukwakira.

    Ati 'nko ku wa Gatandatu hari abo tuzaba tudafite, ariko wareba n’ikipe y’igihugu nabo irabashaka, irashaka gutegura, tuzakomeza tuvugane niba bishoboka twavugana bakaza bagakina bagasubirayo, ibyo ariko ndavuga nibikunda, ntabwo bitubangamiye ariko ni ukureba ukuntu twagirana imikoranire myiza kuko twese turi mu irushanwa.'

    AS Kigali ifite abakinnyi 5 bahamagawe mu ikipe y’igihugu barimo Ntwari Fiacre, Rukundo Denis, Niyibizi Ramadhan, Niyonzima Olivier Seif na Haruna Niyonzima, ni mu gihe Rayon Sports ifite 4, Niyigena Clement, Nsengiyumva Isaac, Nishimwe Blaise na Muhire Kevin.

    Mashami abakinnyi yahamagaye bagomba gutangira umwiherero uyu munsi

    Eric Nshimiyimana avuga ko bazasaba Mashami akareka aba bakinnyi bagakina uyu mukino wa gicuti

    Source : http://isimbi.rw/siporo/article/icyifuzo-cya-eric-nshimiyimana-k-umutoza-w-ikipe-y-igihugu

  • Abapolisi b’u Rwanda bari mu butumwa bwo kubungabunga amahoro bambitswe imidali y’ishimwe #Rwanda #RwOT via @kigalitoday #rwanda #RwOT

    Umuhango wo kwambika imidali aba bapolisi wari uyobowe n’intumwa yihariye y’umunyamabanga w’umuryango w’abibumbye mu butumwa bwo muri Sudani y’Epfo (UNMISS), Nicholas Haysom.

    Hari kandi uhagarariye intumwa z’umuryango w’abibimbye muri Sudani y’Epfo, Police Commissioner, Madam Unaisi Lutu Vuniwaqa, umuyobozi wa Polisi wungirije muri Polisi ya Sudani y’Epfo, Lt Gen. Abraham Manyuat Peter, hari n’abayobozi b’amashami y’umuryango w’abibimbye muri Sudani y’Epfo.

    Mu ijambo rya Haysom yashimiye Leta y’u Rwanda ku ruhare rwayo n’umurava ku mahoro.

    Yagize ati “Nubwo u Rwanda rwagize amateka atari meza ya Genoside yakorewe abatutsi muri Mata 1994, ubu u Rwanda ruri ku mwanya wa 3 mu gutanga umusanzu mu butumwa bw ‘umuryango w’abibumbye bugamije kubungabunga amahoro. Ubu turi hano mu gushimira no no guha icyubahiro abasore n’inkumi b’u Rwanda.”

    Yabashimiye uruhare rwabo mu kubungabunga amahoro n’umutekano muri iki gihugu cya Sudani y’Epfo no gufasha abaturage b’iki gihugu kwiyubakira ubushobozi binyuze mu kwicungira umutekano no kurwanya ihohotera rishingiye ku gitsina n’ibindi bitandukanye.

    Abapolisi bambitswe imidali y’ishimwe biganjemo ab’igitsina gore ari nabyo Haysom yashimye kuba abagore nabo bagira uruhare mu kurinda amahoro.

    Ati “Ibikorwa mwakoze bizahora byibukwa n’abaturage b’iki gihugu. Mwaranzwe n’ubushishozi, kwihesha agaciro kugeza ubwo mugiye gusubira iwanyu. Imidali mwambitswe uyu munsi ni ishimwe ry’ubwitange bwanyu no kuba ba ambasaderi beza b’Igihugu cyanyu ndetse n’umuryango w’abibumbye.”

    Umuyobozi w’itsinda ry’abapolisi bambitswe imidali, Senior Superintendent of Police(SSP) Jeannette Masozera yashimiye ubuyobozi bw ‘intumwa z’umuryango w’abibumbye muri Sudani y’Epfo, Polisi ya Sudani y’Epfo ndetse n’abaturage b’iki gihugu uburyo babafashije kugira ngo bashobore gusohoza inshingano zabo.

    Yagize ati “Imirimo yacu yari ijyanye n’inshingano z’umuryango w’abibumbye, kurinda abasivili, kugarura umwuka mwiza wo gufasha ikiremwa muntu, kugenzura no guperereza ku burenganzira bwa muntu no gufasha ishyirwa mu bikorwa ry’amasezerano y’amahoro muri iki gihugu.”

    SSP Masozera yakomeje avuga ko nubwo bahuye n’imbogamizi zitandukanye ,itsinda yari ayoboye ryakomeje kwihangana bacyemura ibibazo byari bihari. Yavuze ko yishimiye kuba bambitswe imidali y’ishimwe kubera ubwitange no gukora cyane bibaranga.

    Ni inkuru dukesha Polisi y’u Rwanda

    source : https://ift.tt/3od5uu5

  • Umunyamakuru Sam Karenzi yasezeye kuri Radio 10 yari abereye umuyobozi #rwanda #RwOT

    Umunyamakuru w’imikino ukunzwe mu gihugu, Sam Karenzi yasezeye kuri Radio 10 yari abereye umuyobozi abashimira uko babanye mu gihe kirenga umwaka yari ahamaze.

    Sam Karenzi ni umwe mu banyamakuru b’imikino bakomeye mu Rwanda, benshi banyurwa n’ubusesenguzi bwe ahanini kubera kudaca ibintu k’uruhande.

    Abinyujije ku rukuta rwe rwa Twitter, yasezye kuri iki kigo cy’itangazamakuru agishimira ku bw’inshingano cyamuhaye ndetse ko azagihoza ku mutima.

    Ati 'Ndashima Radio TV10 Rwanda, ubuyobozi ndetse n’abakozi bose ntibagiwe n’abakunzi batahwemye kudushyigikira! Mwarakoze kunyizera mukampa inshingano mu bihe bitari byoroshye, ndashima akazi keza twakoze dufatanyije! Nzabahoza k’umutima. Mwarakoze!'

    #Gushima: Ndashima @Radiotv10rwanda ,#Ubuyobozi ndetse n’abakozi bose ntibagiwe n’abakunzi batahwemye kudushyigikira! Mwarakoze kunyizera mukampa inshingano mubihe bitari byoroshye,ndashima akazi keza twakoze dufatanyije! Nzabahoza ku umutima. #Mwarakoze🙏 pic.twitter.com/nykJ7itu1A

    — Sam Karenzi (@SamKarenzi) September 28, 2021

    Nyuma yo gusezera amakuru avuga ko uyu mugabo kimwe n’abandi babiri bakoranaga kuri Radio 10, Taifa Bruno na Axel Horaho bagomba guhita batangira akazi tariki ya 1 Ukwakira kuri Fine FM.

    Amakuru ISIMBI yamenye ni uko na Taifa na we yanditse asezera kuri iyi radio, ni mu gihe Axel we yabikoze kera, gusa hari andi makuru avuga ko aba bagabo badashobora gutangira tariki ya 1 Ukwakira kuko hari ibikinozwa.

    Sam Karenzi yinjiye kuri Radio muri Kamena 2020, yahahuriye na Kalisa Bruno Taifa, Kazungu Claver na Horaho Axel wari uhasanzwe, bazanye imikorere itamenyerewe mu kiganiro bise 'Urukiko’, uburyo bakoragamo basa n’abahanganye bajya impaka ku ngingo zitandukanye (debate) byatumye bigarurira imitima ya benshi, kuzana uburyo abantu bakurikira ikiganiro kuri YouTube, byahise biba icyita rusange ku yandi maradiyo.

    Nyuma y’umwaka umwe bakora iki kiganiro, hahise habamo impinduka maze ikipe y’Urukiko barayitandukanya, Sam Karenzi agirwa umuyobozi wa Radio, Taifa ajyanwa mu kiganiro cya nimugoroba cya 'Ten Zone’ gukorana na Jado Max maze Faustin amanurwa mu Rukiko asangayo Kazungu Claver wahagumye na Antha kuko Axel we nta minsi yahamaze yahise agenda.

    Tariki ya 1 Nyakanga 2021 nibwo izi mpinduka zose zabaye, amakuru avuga ko Sam Karenzi atishimiye gukurwa kuri Micro, ari nayo mpamvu asezeye nyuma y’amezi 3 gusa agizwe umuyobozi wa Radio.

    Sam Karenzi yasezeye kuri Radio 10, bivugwa ko yerekeje kuri Fine FM

    Ukuyemo Kazungu Claver(wa kabiri uturutse ibumoso) abandi bategerejwe kuri Fine FM guhera mu kwezi gutaha

    Source : http://isimbi.rw/imyidagaduro/article/umunyamakuru-sam-karenzi-yasezeye-kuri-radio-10-yari-abereye-umuyobozi