Category: Uncategorized

Itsinda ry’abaganga b’Abashinwa bari mu Rwanda

Umuntu urwaye iyo ndwara ya Hernia, ashobora kubimenya nyuma y’igihe kirekire imufashe, bitewe n’aho yafashe ndetse n’uko ingana.

Ishami ry’Umuryango w’Abibumbye ryita ku Buzima (WHO), ritangaza ko hari ibikorwa bimwe na bimwe byaba intandaro yo kurwara ‘hernia’ harimo guterura ibintu biremereye cyane.

Abo baganga b’Abashinwa batangaje iby’ubwo burwayi butari bumenyerewe bwa hernia bakorera ku Bitaro bya Masaka mu Mujyi wa Kigali ndetse no ku Bitaro bya Kibungo biherereye mu Karere ka Ngoma mu Ntara y’u Burasirazuba.

Abo baganga bageze mu Rwanda ku itariki 14 Ukuboza 2020. Mu gusobanura uko iyo ndwara ihagaze mu baturage, bavuze ko mu bantu umunani (8) baje kwivuza bataka ko bababara mu nda, batandatu muri bo babapimye bakabasangana iyo ndwara bakabavura bagakira.

Dr Wu Yao uhagarariye iryo tsinda ry’abaganga b’Abashinwa, yagize ati “Hernia ni indwara igaragara cyane kandi ifata abato ndetse n’abakuze. Mu mpamvu ziyitera, harimo izitangira no mu gihe umwana akirimo kwirema mu nda y’umubyeyi, imyaka (kuba umuntu atangiye gusaza), gukomereka cyangwa kubagwa, imyitozo ngororamubiri ikomeye cyane cyangwa se guterura ibintu biremereye cyane.”

Hernia ni indwara ivurwa igakira

Nk’uko bitangazwa na WHO, ibimenyetso by’indwara ya hernia harimo kugira umuriro, kubyimba bidasanzwe no kubabara ku gice cyo mu nda (abdomen), kudashobora kwihagarika /gusoba ndetse no kuva amaraso (bleeding).

Umwe muri abo baganga asuzuma umurwayi

Iryo tsinda ry’abaganga b’Abashinwa bavuga ko iyo ndwara itakwikiza ubwayo, kandi ko iyo itavuwe ishobora kwica, kuko ibice by’umibiri bimwe bigenda byangirika kuko bitageramo amaraso uko bikwiye n’ibindi.

Dr Wu Yao ati “Guterura ibintu biremereye cyane, na byo bishobora gutera indwara ya hernia, njya mbona abana bikoreye amajerekani y’amazi bakayazamukana imisozi. Ni bibi cyane, kuko bishobora kuba impamvu yo kubabara ku gice cyo mu nda, bikaba byatera hernia”.

Dr. Chai Guo Dong yavuze ko bakiriye abarwayi bagera ku 180 barwaye hernia bakaba baranamaze kubabaga ngo babavure.

Dr Dong ati “Ni indwara itera ububabare bukomeye iyo itavuwe. Ni indwara ikomeye, abantu bagombye kuyigiraho amakuru ahagije, kugira ngo bamenye uko bayitwara”.

WHO ivuga ko indwara ya Hernia ikunze gufata igice cyo mu nda cyane cyane, ariko ngo hari n’ubwo ifata ibindi bice.

WHO yatangaje ko mu 2015, abantu barwaye Hernia hirya no hino ku Isi, bageraga kuri Miliyoni 18.5, yica abagera kuri 59.800.

Dr. Ignace Nyaziyose, umuyobozi w’ishami rijyanye n’ibyo kubaga mu Bitaro bya Masaka, yavuze ko abo baganga b’Abashinwa barimo gukora akazi gakomeye.

Yagize ati “Barimo gukora akazi gakomeye, barafasha mu kubaga imvune, hernia, n’izindi ndwara. Mu mahame agenga ubuvuzi, harimo gusangira ubumenyi, kandi twabigiyeho byinshi. Ariko icy’ingenzi cyane cyane ni uko bakijije ubuzima bw’abantu”.

Dr. Feng Kai (ibumoso) na Dr. Wu Yao

Ambasade y’u Bushinwa mu Rwanda, yatangaje ko Guverinoma y’u Bushinwa yohereza abaganga mu Rwanda guhera mu 1982. Hakaba hari n’amavuriro u Bushinwa bwubatse mu Rwanda, harimo n’ibitaro bya Masaka byubatswe ku gaciro ka Miliyoni 10 z’Amadolari ya Amerika.

Impunzi zose zabaga mu nkambi ya Gihembe zamaze kugezwa mu nkambi ya Mahama

Ni nyuma y’uko iyo nkambi yagiye yugarizwa n’ibiza binyuranye byiganjemo iby’imvura, imikingo itangira kuriduka ari na ko ibyo biza bigenda bisatira iyo nkambi yari icumbikiye imiryango isaga 2000.

Nk’uko byatangajwe na Minisiteri ishinzwe ibikorwa by’Ubutabazi, kuri uyu wa Mbere tariki 18 Ukwakira 2021, ngo kwimura izo mpunzi zikavanwa mu nkambi ya Gihembe zikajyanwa mu ya Mahama isanzwe icumbikiye impunzi z’Abarundi, ngo bigamije gutuza impunzi ahadashyira ubuzima bwazo mu kaga.

Nta mpunzi n’imwe ikirangwa mu nkambi ya Gihembe

Ubutumwa bwa MINEMA, bugira buti “Kwimura impunzi mu nkambi ya Gihembe zikajya gutuzwa mu nkambi ya Mahama bisojwe himurwa impunzi 911 zari ziyisigayemo. Hagiye gukurikiraho ibikorwa byo kubungabunga ibidukikije ahari inkambi no mu nkengero zayo. Ikigamijwe ni ugutuza impunzi ahadashyira ubuzima bwazo mu kaga”.

Kwimura izo mpunzi ni igikorwa cyakurikiwe no gutangiza umushinga wo kubungabunga ibidukikije, aho ahahoze iyo nkambi no mu nkengero zayo kuri uyu wa Mbere tariki ya 18 Ukwakira 2021 hakorewe umuganda wo gutera ibiti, igikorwa cyayobowe na Kayumba, Umunyamabanga uhoraho muri MINEMA.

Inkambi ya Mahama ni yo nini mu Rwanda, aho ifite ubushobozi bwo kwakira impunzi zisaga 50,000

Izo mpunzi zabaga mu nkambi ya Gihembe zaturutse mu gihugu cya Repubulika Iharanira Demokarasi ya Congo (RDC), mu 1997, aho zimaze imyaka 24 mu Rwanda nyuma y’uko zihunze intambara yaberaga mu gihugu zaturutsemo.

Impunzi zikomeje kwimurirwa mu nkambi ya Mahama ni izabaga mu nkambi ya Gihembe mu Karere ka Gicumbi, na zimwe mu zari zicumbikiwe mu nkambi ya Kigeme mu Karere ka Nyamagabe, aho zagiye zimurwa mu byiciro binyuranye, nyuma y’uko zimwe mu mpunzi z’Abarundi zabaga mu nkambi ya Mahama zamaze gutahuka.

Ibiza byari bikomeje gusatira inkambi ya Gihembe

Inkambi ya Gihembe yari icumbikiye impunzi zaturutse muri Repubulika iharanira Demokarasi ya Congo zikabakaba ibihumbi 10.

Bahise batangira gutera ibiti ahari inkambi ya Gihembe

Emery Bayisenge ngo azakomeza gukina umupira n’ubwo atarabona ikipe

Emery Bayisenge wafashize ikipe ya AS Kigali kurangiza shampiyona idatsinzwe ikabona umwanya wa kabiri muri shampiyona ya 2020-2021, yavuze ko kugeza ubu n’ubwo hataramenyekana aho azerekeza ariko umupira ari akazi ke kandi ko azakomeza kuwukina bityo ko ahazaza he hazamenyekana vuba.

Yagize ati “Ni akazi kanjye, amahirwe menshi ni uko nzagakomeza akazi kandi nzakomeza gukina umupir. Niteguye gukinira ikipe iyo ari yo yose yabinsaba, umukinnyi wese udafite amasezerano yifuzwa na buri wese, ikipe nzakinamo nzayibatangariza vuba”.

Uyu musore agaragara ku rutonde rw’abakinnyi b’ikipe ya AS Kigali yatanze kugeza ubu, ibintu we avuga ko kurugaragaraho ari we wabibasabye kuko ari ikipe babanye neza.

Ati “Ni ikipe yanjye twabanye neza, amasezerano yari yarangiye ariko bansabye ko twagumana ndabibemerera ariko mbabwira ko ari njyewe uzabyemeza, nari mbizi ko bantanze ku rutonde kandi ni njyewe wabibasabye”.

Amakuru kandi avuga ko Emery Bayisenge yaba yaragiranye ibiganiro n’ikipe ya Rayon Sports, ibintu na we ku giti cye atemera cyangwa ngo abihakane, kuko avuga ko atari byiza kubitangaza kubera impamvu ze bwite.

Isoko ry’igura n’igurisha ry’abakinnyi mu Rwanda rirafunga imiryango kuri uyu wa mbere tariki 18 Ukwakira 2021 i saa 23h59′, mu gihe shampiyona y’u Rwanda 2021-2022 biteganyijwe ko izatangira tariki 30 Ukwakira 2021..

Minisitiri Gatabazi mu gikorwa cyo gushyikiriza inka abaturage mu Murenge wa Bugeshi

Inka 20 zashyikirijwe icyo kigo tariki 13 Ukwakira 2012, ubwo Minisitiri w’Intebe yari yasuye urubyiruko rugororerwa mu kigo ngororamuco cya Iwawa, akarugezaho ubutumwa bwa Prezida wa Repubulika bwo kubagabira inka mu kubafasha kugira imibereho myiza.

Inka 20 zagejejwe Iwawa, ubu zimaze kuba 140, ndetse ikigo cya NRS cyatangiye ibikorwa byo kugabira abaturage batishoboye, mu kwitura Perezida wa Repubulika waboroje.

Tariki ya 17 Ukwakira 2021, inka umunani zatanzwe n’ikigo cya NRS zashyikirijwe imiryango yo mu Murenge wa Bugeshi ahari abana bafite ikibazo cy’imirire mibi kugira ngo babashe kwiteza imbere kandi babone amata yo guha abana.

Zitanzwe zikurikira inka 20 NRS yashyikirije abaturage mu Karere ka Rutsiro tariki 13 Ukwakira 2021.

Umuyobozi wa NRS, Mufulukye Fred avuga ko inka 20 bagabiwe na Perezida Kagame zimaze kwiyongera bigaragara.

Yagize ati “Turashimira umukuru w’igihugu waduhaye izi nka, yadusabye kuzifata neza, twazifashe neza zarorotse ubu zimaze kuba 140, none twaje kwitura kuko yari yadusabye ko tuzitura”.

Zimwe mu nka zahawe abaturage ba Bugeshi

Mufulukye avuga ko inka bahawe zagwiriye, urubyiruko runywa amata none batangiye kwitura.

Ati “Twituye abaturage ba Rutsiro na Rubavu kandi ni gahunda izakomeza. Inka zitanga umukamo, imirire n’imibereho myiza ku mwana ariko zitanga n’ifumbire igafasha umuturage kweza. Icyo dusaba abaturage baba bahawe inka ni ukuzifata neza kuko ari igihango, kandi bakazitura abandi.”

Uyu muyobozi avuga ko bakomeje guhangana no kugorora abakoresha ibiyobyabwenge n’abana bataye imiryango bakajya mu buzererezi kandi ababyeyi bitaye ku nshingano byacika.

Ati “NRS nk’ikigo gishinzwe igororamuco duhangana n’ibibazo bijyanye n’abaturage bagaragayeho imyitwarire itari myiza, ari abari mu biyobyabwenge, ari abari mu bucoracora nko mu Karere ka Rubavu, n’ abana bagaragara ku mihanda bitwa inzererezi. Icyo dusaba abaturage rero ni uko ibyo bibazo twabyikemurira kandi biroroshye, abana bose bakwiye kujya ku ishuri, ikindi barinde abana ubuzererezi, ari abajya mu masoko, muri gare no mu mihanda. Abaturage baramutse bitaye ku nshingano umutungo igihugu gikoresha kuri ibi bigo by’igororamuco wajya mu bikorwa by’iterambere, mu bikorwa byo kubaka amashuri, imihanda n’amavuriro, ariko nta yandi mahitamo iyo abaturage batakoze inshingano Leta irazifata.”

Mufuluke Fred Umuyobozi wa NRS aganiriza abaturage mu kwita ku nshingano zo kurera abana

Mufulukye asaba abaturage gufata inshingano zo kwita kubana.

Ati “Hari ibibazo biri mu miryango birebana n’ imibanire, ndetse bamwe ibibazo bibananira bitewe n’imibereho yabo, abo bahawe izi nka baba batoranyijwe n’abandi baturage bari mu byiciro by’ubukene, iyo bazifashe neza babona umukamo ndetse bakabona ifumbire. Inka rero ifasha umuturage gukemura ikibazo cy’imibereho.”

Ahakana ko ikibazo cy’ibiyobyabwenge n’ubuzererezi bidaterwa n’ubukene kuko abana bo mu miryango ikennye si bo bari mu mihanda, mu bari mihanda harimo n’abana bo mu miryango yifashije bitewe n’ikibazo cy’uburere mu miryango. Iyo ibibazo by’amakimbirane mu miryango bidakemutse umwana arabihunga akigira mu muhanda.

Guverineri w’Intara y’Iburengerazuba, Habitegeko François, avuga ko abaturage bagabiwe inka basabwa kuzazifata neza kugira ngo zizabafashe kwivana mu bukene.

Perezida wa Repubulika yabagabiye inka 20 ziroroka zigera mu 140

Minisiteri w’Ubutegetsi bw’Igihugu, Gatabazi Jean Marie Vianney, avuga ko gufata inka neza bidasaba ubushobozi bwinshi ahubwo bisaba kuyikunda.

Agira ati “Ntabwo inka yananira umuturage iyo azi icyo ayitezeho. Inka igorana iyo itinda kwima ariko izi zarimye mu gihe gito zirabyara zitange umukamo.”

Uwo mugore w’imyaka 54 yahaguye mu kwezi gushize ubwo yari yagiye kuhivuriza, agapfa ari kubagwa byoroheje.

The New Times yatangaje ko uwo mubyeyi yari yagiye kwikuzamo agapira ko kuboneza urubyaro.

Abaganga babiri bari bari kumuvura aribo Alfred Mugemanshuro uzobereye mu gutera ikinya na Gaspard Ntahonkiriye, inzobere mu by’indwara z’abagore bahise batabwa muri yombi bakekwaho uburangare muri urwo rupfu.

Minisiteri y’Ubuzima na yo yahise itangiza iperereza ku mikorere y’ibyo bitaro. Hagenzuwe ingingo zirimo imitangire ya serivisi, ubushobozi bw’abakozi harebwa by’umwihariko abaganga niba bafite ibyangombwa bibemerera gukora umwuga.

Harebwe kandi ku bikoresho ibi bitaro bifite, imiti, inyubako ndetse niba bifite imiyoborere ihamye ishobora kuba yatanga icyerekezo nyacyo cyangwa se igakemura ibibazo mu gihe byagaragaye.

Isuzuma ryakozwe ryanarebye ku isuku n’umutekano. Niba ibitaro bifite amazi meza cyangwa se niba bifite uburyo bwo kurwanya inkongi mu gihe yaba ibaye.

Ibyavuyemo byagaragaje ko hari amakosa yakozwemo, hafatwa umwanzuro wo gufunga iryo vuriro.

Baho Hospital yafunzwe mu kwezi gushize