Webrwanda Backend

Category: Uncategorized

  • NABU yatangaje impinduka nshya muri porogaram… – #rwanda #RwOT

    NABU niyo porogaramu iyoboye mu gufasha gusoma neza hamwe n'inkuru zishimishije zingana n'ubushobozi bw'umwana mu gusoma.

    Kuri ubu, NABU yagejeje abagera muri miliyoni bamaze kumanura (Download) Porogaramu yayo mu Burasirazuba bwa Afurika. Nta kiguzi cyo gusoma kuri iyi porogaramu.

    Uyu muryango udaharanira inyungu, NABU, kuri ubu uratangaza impinduka mu mimerere ya porogaramu ikazitwa 'NABU: Multilingual kids book app' ikazaba iboneka kuri Google Play Store  na  iOS app store.

    Iyo mpinduka muri porogaramu ifite ibiyiranga bishya bishimishije harimo, ibishushanyo-mbonera byasubiwemo byorohereza abana gushaka no gusoma ibitabo bakunda, bityo bakigenga mu misomere yabo.

    NABU yizera ko uko umwana arushaho gusoma, ari nako aba inararibonye mu gusoma ibitabo. Ubushobozi bwe bwo gusobanukirwa, kwandika, kuvuga no kuboneza imvugo buriyongera.

    Isomero rya NABU kuri ubu rigaragaza inkuru zirenga 1000 zishimishije, zivuga indimi nyinshi zirimo ibyegeranyo mu Kinyarwanda, Igishwahili, igikerewole n'Icyongereza.

    Kubera impinduka muri porogaramu, NABU ivuga ko ababyeyi n’abarezi noneho bazashobora gukora imyirondoro itandukanye ku bana benshi mu rugo, bityo bagakurikirana uburambe bwo gusoma kuri buri mwana.

    Ngo ibi bituma ubushobozi bwo gukurikirana urugendo rwo gusoma kuri buri mwana n'ubushobozi bwe buzamuka mu rwego rwisumbuyeho.

    Gushakisha ibitabo bizarushaho kunezeza kuko isomero ryahinduwe kugira ngo ihuze ibihugu porogaramu rusange ikoreramo.

    Abiga, ababyeyi n’abarimu bashobora kandi gushakisha ibitabo mu byiciro bitandukanye no kumenya ibihuye n'urwego rw'umwana.

    Amashusho nayo yongerewe ubushobozi bwo kuboneka hakoreshejwe igihe gito na interineti nkeya.

    Ikirango(feauture) gishya cyo gusoma udafite internet (offline) gifitiye inyungu cyane kizagirira akamaro gakomeye abakoresha porogaramu ya NABU baherereye aho interineti itagera neza.

    Ibitabo by'inkuru birashobora gukururwa aho umuntu ashobora kubona interineti, hanyuma bikabikwa mu isomero agasoma ku murongo mu gihe kizaza. Ibi bifasha abarimu gukundisha abanyeshuri ibitabo by'ururimi rwabo kavukire nta mpungenge yo kutabona interineti.

    Umubyeyi witwa Uwiringiyimana Marie Claudine, avuga ko urubuga rwa NABU rwafashije cyane abana be kumenya gusoma.

    Ati 'Ni byinshi byahindutse kuva abana banjye batangira gusoma ibitabo kuri porogaramu ya NABU. Bashobora kumva no gusobanura ibishushanyo bitandukanye biba biri mu bitabo. Abana banjye kandi basigaye bashobora guhanga inkuru zabo bagendeye ku bitabo bagiye basoma kuri NABU.'

    Ni mu gihe Joseph Nzioka Umuyobozi w'abarimu mu ikigo Kenya Primary School, avuga ko iyi porogaramu ya NABU yaje ari ingongera 'ishimishije kuri sisitemu y'uburezi cyane cyane ku banyeshuli bakiri bato.'

    Ati 'Kuba babona iyi porogaramu ku buntu bisobanura ko bashobora gusoma inkuru zabo bari mu rugo.'

    Porogaramu ya NABU ifite ibyiciro bitandukanye. Hari icyiciro cy'ibigezweho (Trending now), ibyo NABU yahisemo (NABU top picks) n'abasoma kare (easy and early readers).

    Iri somero ryemerera abana, ababyeyi n'abarimu guhitamo ibitabo bitandukanye, rikereka abanyeshuri itandukaniro ry'ibitabo binabahishurira ubuzima bw'isi itandukanye.

    Amor Furaha Umuyobozi Ushinzwe gukurikirana abakoresha iyi porogaramu, ati 'Ibintu byiyongereye kuri porogaramu yacu yo gusoma bivuze ko dushobora noneho gupima neza uburyo abakoresha porogaramu bitabira ibyo dukora ndetse no kumenya aho dukeneye kwagura ibikorwa byo gusoma.”

    Arongera ati 'Turimo kubona iterambere ryinshi haba mu Rwanda no muri Kenya mu muryango w'abambasaderi, bivuze ko intego yacu yo kugera ku basomyi miliyoni imwe mu mpera za 2021 igenda yegereza.'

    Ubushakashatsi bwerekana ko abana basoma ibitabo mu rurimi rwabo kavukire bakiri bato bituma ikiraro cyo gusoma mu cyongereza no mu zindi ndimi cyihuta cyane.

    Muri NABU, baharanira gusangiza inkuru nziza, zishishikaje aho abana bashobora kwibona ubwabo bagaragara ku mpapuro basomye, bityo bakura bakigirira icyizere kandi bakagira uruhare runini mu miryango yabo.

    Ibitabo by’ururimi kavukire nabyo byagaragaye ko bivamo uruhare rukomeye rw’ababyeyi mu myigire y’abana babo.

    Iyi porogaramu ntabwo ari igikoresho cyo kurema urukundo rwo gusoma kubana, ahubwo inemerera abakuze gusoma mu cyongereza. Ntabwo ari kare cyane gutangira gusoma hamwe n'umwana wawe- downloadinga Nabu App uyu munsi.

    Ku bijyanye na NABU

    NABU ni umuryango udaharanira inyungu, ufite ubutumwa bwo gukemura ikibazo cyo kudasoma no kwandika ku Isi hose kugira ngo buri mwana abashe gusoma no kuzamuka mu bushobozi bwe bwose.

    Guhagarika inzitizi y'ubukene, bakoresha ikoranabuhanga kugira ngo basohore ibitabo by'abana ku buntu ku rubuga rwa sisitemu mu ndimi kavukire.


    Urubuga rwa NABU rwatangaje impinduka nshya muri porogaramu yayo imaze kumanurwa (Downlaod) n'abasaga miliyoni


    Umubyeyi ari gukoresha porogaramu ya NABU afasha umwana we gusoma ibitabo, inkuru n’ibindi


      

    Kaliza Barbara avuga ko umwana we ameze kumenya gusoma neza abicyesha kwifashisha urubuga rwa NABU


    Abagera kuri miliyoni bamaze kumanura (Download) porogaramu ya NABU

    Source : https://inyarwanda.com/inkuru/111851/nabu-yatangaje-impinduka-nshya-muri-porogaramu-yayo-imaze-kumanurwa-downlaod-nabasaga-mili-111851.html

  • Ubutumwa Masudi Djuma yageneye abafana n’abakunzi ba Rayon Sports #rwanda #RwOT

    Umutoza w’ikipe ya Rayon Sports, Irambona Masudi Djuma yasabye abakunzi b’iyi kipe kwihangana kuko barimo kubaka ikipe kandi bitewe n’ibimenyetso arimo kubona yizeye ko mu minsi mike izatanga ibyishimo.

    Ni nyuma y’umukino wa 4 wa shampiyona yatsinzwemo na APR FC 2-1.

    Uyu mutoza yavuze ko abizi neza intsinzwi zose zijya ku munota ariko na none bakwiye kubyemera kuko mu kubaka ariko bigenda.

    Ati “Ikintu cya mbere mbabwira turimo kubaka, ariko dufite amahirwe yo gutsinda indi mikino myinshi, ariko babyemere nta kundi byagenda, intsinzwi zose ndabizi ko bazishyira ku mutoza, ariko mu kubaka ntabwo wubaka iminsi 2.”

    Yasabye abafana kudacika intege ngo n’ubwo abakinnyi bafite bataramenya uburemere bw’iyi kipe ariko birimo kugenda biza.

    Ati “dutsinze APR FC dutsinzwe na Gicumbi byose ni kimwe. Icya mbere abakinnyi dufite ntibaramenya uburemere bw’iyi kipe. Abafana ntimucike intege urugendo ruracyari rurerure uburyo turimo gukina, abakinnyi barimo kugenda bamenyerana kandi bamenya agaciro k’iyi kipe.”

    Ni kenshi uyu mutoza yagiye yumvikana avuga ko abakinnyi Rayon Sports ifite batari ku rwego rwayo, ni mu gihe ariko na none abafana bo baba bumva bakeneye intsinzi mu buryo bumwe cyangwa ubundi.

    Source : http://isimbi.rw/siporo/article/ubutumwa-masudi-djuma-yageneye-abafana-n-abakunzi-ba-rayon-sports

  • Sweden: Minisitiri w'intebe wa mbere w'umugore yeguye ku munsi wa mbere #rwanda #RwOT

    Minisitiri w'intebe wa mbere w'umugore wa Sweden yeguye ku mirimo ye nyuma y'amasaha make ashyizweho, nk' uko BBC dukesha aya makuru yabitangaje.

    Nk' uko amakuru akomeza abivuga dukura kuri kiriya kinyamakuru twavuze haruguru nuko ku wa gatatu, Magdalena Andersson, yatangajwe nka Ministri w'Intebe ariko hashize igihe gito cyane ahita yegura. Ibi byatewe nuko rinwe mu mashyaka yari amushyigikiye rya Green Party, ryamukuyeho amaboko.

    Indi mpamvu kandi yatumye yegura ni uko inteko nshingamategeko yanze gutora ingingo y'imari yari yashyize ku meza maze ahubwo ikitorera ingingo y'imari y'abatavugarumwe n'ubutegetsi.

    Rimwe mu mashyaka ryari rimushyigikiye, Green Party, ryavuze ko ridashobora kwakira ingengo y'imari 'yateguwe muri ubwo buryo'.

    Madamu Andersson yavuze ko yizeye ko azagerageza kongera kuba minisitiri w'intebe.

    Madamu Anderson yari yatorewe kuba Ministri w'intebe kubera ko mu mategeko ya Sweden, ntabwo uba ukeneye abagutora benshi kugirango utsinde. Ahubwo uba ukeneye ko umubare w'abakurwanya utaruta umubare w'abatakurwanya.

    Sweden ni kimwe mu bihugu biri ku isonga mu guteza imbere uburinganire ku isi yose. Itorwa ry'uyu mugore ryari ryazanye ibyishimo byinshi ariko ntanamaze umunsi umwe gusa ategeka.


    Mbere yaho ku wa gatatu, abadepite benshi bahagurutse mu guha icyubahiro Magdalena Andersson (iburyo) mu nteko ishingamategeko izwi nka Riksdag ubwo yari atowe nka Minisitiri w'intebe

    Source : https://impanuro.rw/2021/11/25/sweden-minisitiri-wintebe-wa-mbere-wumugore-yeguye-ku-munsi-wa-mbere/

  • Real Madrid yabonye itike, PSG izamuka mu its… – #rwanda #RwOT

    Kuri uyu wa Gatatu no ku wa Kabiri nibwo hakinwaga umunsi wa gatanu wa Champions League aho Manchester City na PSG zahise zibona tike ya 1/8 cya Champions League, ariko PSG yemera kugenda ari iya kabiri.

    Mbappe yongeye gutsinda ku mukino wa Manchester City 

    Mu itsinda D, Real Madrid yari yasuye Sheriff yayitsinze ibitego 3-0 naho Inter Milan itsinda Shskhtar ibitego bibiri ku busa, byatumye Real Madrid izamuka mu itsinda ari iya mbere nta mananiza.

    Mu itsinda A, Manchester City yari yatsindiwe iwayo, mu mukino ubanza, yaje kwihorera itsinda ibitego bibiri kuri kimwe. Leipzig yanyagiye Club Brugge ibitego bitanu ku busa. 

    Real Madrid nayo yabonye itike ya kimwe cya kane 

    Mu itsinda B, Liverpool  yabonye itike ya kimwe cy’umunani ku buryo bweruye aho batsinze FC Porto ibitego 2-0, Milan AC nayo yabonye amanota atatu ya mbere aho yatsinze Atletico Madrid igitego kimwe ku busa. Ubu Liverpool irarusha amanota 10 ikipe za kabiri arizo Porto, Milan, na Atletico Madrid irusha amanota 11.

    Aya niyo makipe amaze kuboa tike ya 1/8 cya Champions League uyu mwaka

    Source : https://inyarwanda.com/inkuru/111858/real-madrid-yabonye-tike-psg-izamuka-mu-itsinda-ari-iya-kabiri-111858.html

  • Libya: Umuhungu wa Col Muammar Kadhafi yangiwe kwiyamamariza kuba Perezida #rwanda #RwOT

    Umuhungu w'uwahoze ari Perezida wa Libya Col Muammar Kadhafi yakuwe ku rutonde rw'abashaka kuba abakandida mu matora y'umukuru w'igihugu ateganyijwe tariki 24 Ukuboza (ukwa 12).

    Komisiyo y'amatora mu Gihugu cya Libya, yangiye abakandida benshi kuri uyu mwanya barimo Saif al-Islam Kadhafi, ivuga 'impamvu z'amategeko', nk'uko ibinyamakuru byaho bibivuga.

    Saif al-Islam Kadhafi yari yateje impaka nyuma y'uko atangaje ko azahatanira kuba perezida. Arashakishwa n'Urukiko Mpuzamahanga Mpanabyaha kubera ibyaha by'intambara n'ubwicanyi acyekwaho ubwo se yari akiri ku butegetsi.

    Gusaba guhatanira uwo mwanya kwa Khalfa Haftar nako kwateje impaka zikomeye mu gihugu kuko aregwa ibyaha bikomeye mu nkiko za Amerika, ariko ntabwo bizwi neza niba nawe ari mu bangiwe kwiyamamaza.

    Abashinjacyaha ba gisirikare muri Libya nkuko BBC ibitangaza, basabye komisiyo y'amatora kwanga kandidatire za Kadhafi na Haftar kugeza basubije ibibazo ku byo baregwa.

    Kugeza ku munsi ntarengwa wo kuwa mbere, abantu 60 bari batanze inyandiko basaba guhatanira kuba Perezida. Impirimbanyi y'uburenganzira Leila Ben Khalifa w'imyaka 46, niwe mugore rukumbi uri mu bifuza guhatana.

    intyoza

    Source : https://www.intyoza.com/libya-umuhungu-wa-col-muammar-kadhafi-yangiwe-kwiyamamariza-kuba-perezida/

  • Umuryango wa Rusesabagina n'abandi ba rusisibiranya mu kurya imitsi abantu ngo barashaka amafaranga yo kumufunguza #rwanda #RwOT

    Kwa Rusesabagina byose ni ukurya imitsi y'abantu. Byatangiye amaze kwamamazwa na Film ahita ashoraho icyitwaga 'Paul Rusesabagina Hotel Rwanda Foundation' abeshya abazungu ko ishinzwe gutera inkunga imfubyi za Jenoside mu Rwanda. Muri 2010 Leta y'u Rwanda binyuze mu Bushinjacyaha yatangaje ko Paul Rusesabagina yohereza amafaranga umutwe wa FDLR nkuko byagaragazwaga n'impapuro za Western Union.

    Martin Ngoga ukuriye Inteko Ishinga Amategeko ya EAC ariko akaba yari Umushinjacyaha Mukuru wa Leta y'u Rwanda muri 2010 yagize ati:

    'Mu myaka mike ishize nari Umushinjacyaha Mukuru. Abari abayobozi bakuru muri FDLR bafatiwe mu Burundi bafite inyandiko zigaragaza ko Rusesabagina atera inkunga uwo mutwe. Nagiye muri Amerika mpura n'abayobozi bo muri FBI tubasaba ubufatanye mu gukora iperereza kuko amafaranga yari yoherejwe avuye San Antonio muri Texas. FBI yabonye ibindi bimenyetso. Nyuma y'icyumweru umukozi wa FBI yaje mu Rwanda batangira gukora iperereza ricukumbuye'

    Mu bafashwe harimo Lt Col Noel Habiyaremye na Maj. Vital Uwumuremyi. Mu rubanza rwa Rusesabagina Noel Habiyaremye yabwiye urukiko amavu n'amavuko y'umubano we na Rusesabagina kugeza aho atangiye kumwoherereza amafaranga. Amafaranga yakusanywaga na Rusesabagina Leta y'u Rwanda yerekanye aho ajya haba muri FDLR ndetse no kwigwizaho amazu meza mu Bubiligi no muri Amerika.

    Rusesabagina yashyekewe akomeza kuzenguruka isi asaba amafaranga binyuze muri Fondation ye, noneho ashinga ishyaka rye PDR Ihumure rihurizwa mu mpuzamashyaka MRCD n'umutwe w'ingabo wa FLN.

    Aho Rusesabagina afatiwe umukobwa we Carine Kanimba ndetse nabo bafatanyije mu gusoroma amafaranga cyane cyane umuvugizi wa Fondation Rusesabagina Kitty Kurth birirwa mu bitangazamakuru bavuga ko Rusesabagina ari intwari bakiyibagiza ko ibimenyetso simusiga bimuhama byatanzwe n'Ububiligi ndetse na Amerika.

    Ikigezweho ubu ni ugukusanya amafaranga yo kurekura Paul Rusesabagina nkaho afungiye icyaha cy'ubwambuzi cyangwa umwenda abereyemo abantu.

    Abo mu muryango wa Paul Rusesabagina ndetse n'abandi banyuranye bakoresha urubuga rukusanyirizwaho amafaranga https://www.gofundme.com/ ngo barashaka gufunguza Paul Rusesabagina. Ibya Rusesabagina byose bishingiye mu gusoroma amafaranga nyamara ari ukwishyirira mu mufuka wabo.

    Icyo bagomba kumenya ni uko igihe ukusanyije amafaranga ukayakoresha icyo yakusanyirijwe ari ubwambuzi  bihanwa n'amategeko ubwabyo.

    The post Umuryango wa Rusesabagina n'abandi ba rusisibiranya mu kurya imitsi abantu ngo barashaka amafaranga yo kumufunguza appeared first on RUSHYASHYA.

    Source : https://rushyashya.net/umuryango-wa-rusesabagina-nabandi-ba-rusisibiranya-mu-kurya-imitsi-abantu-ngo-barashaka-amafaranga-yo-kumufunguza/?utm_source=rss&utm_medium=rss&utm_campaign=umuryango-wa-rusesabagina-nabandi-ba-rusisibiranya-mu-kurya-imitsi-abantu-ngo-barashaka-amafaranga-yo-kumufunguza

  • Masudi ati 'Umwaka ushize ntabwo Rayon Sports yari iriho' #rwanda #RwOT

    Hari nyuma yo gutsindwa umukino w’abakeba, aho baraye batsinzwe na APR FC 2-1.

    Ku ruhande rwe abona nta byacitse kuko avuga ko yatsinzwe no kuba abakinnyi be bataramenyerana, cyane ko bari mu rugamba rwo kubaka ikipe itari ihari, ahubwo bakishimiye ko hari abakinnyi byibuze babasha gukina.

    Ati “Reka mbabwire ikintu kimwe abanyarwanda batari bazi, tuvuye ku ikipe itari ihari, umwaka ushize nta Rayon Sports yari ihari, mu kubuka ikipe ntabwo wayubaka mu mezi abiri.”

    “Babyumve neza abantu bazi umupira barabizi, ahubwo ni amahirwe kuba twabonye abakinnyi bashobora gukina, ariko ushyiramo no guhuza, ntabwo byaza mu minsi ibiri.”

    Masudi Djuma, yizeye ko bitewe n’uko abona ikipe ye, mu minsi iri imbere izaba imeze neza kuko irimo kumenyerana.

    Ubwo yakoreshaga imyitozo ya mbere, Masudi Djuma yavuze ko ari bwo bwa mbere yabona Rayon Sports ifite abakinnyi batari ku rwego rwayo, ari nabwo yatangiye gukoresha igeragezwa bashaka abakinnyi ari naho bakuye bamwe mu bo bafite uyu munsi.

    Source : http://www.ukwezi.rw/11/article/Masudi-ati-Umwaka-ushize-ntabwo-Rayon-Sports-yari-iriho

  • Suède: Umunyarwanda yatawe muri yombi akekwaho kwica umugore we – #rwanda #RwOT

    Uwizeye yatawe muri yombi ku itariki ya 19 Ugushyingo, aho ari mu ba mbere bakekwaho kugira uruhare mu rupfu rw’umugore we dore ko bari bamaze igihe umubano wabo urimo igitotsi, ndetse Ingabire Diane akaba yari yaraganirije umuryango avukamo ku bibazo yari afitanye n’umugabo we, byarimo kumucunaguza no kumuhoza ku nkeke, nk’uko abo mu muryango we babyemeza.

    Umunsi umwe mbere y’uko yicwa, Ingabire yabanje kuganiriza inshuti ye yatanze ubuhamya, agamije kuyibwira ibibazo afitanye n’umugabo we. Ingabire ngo yabwiye inshuti ye ko afite impungenge z’imyitwarire y’umugabo we bivugwa ko yari yarahindutse cyane.

    Nyuma yo kumva ibibazo byari mu rugo rwa Ingabire, inshuti ye yamugiriye inama yo kugana inzego zirimo Polisi yo muri icyo gihugu kugira ngo itangire gukurikirana ibibazo by’aba bombi, bityo bivugutirwe umuti amazi atararenga inkombe.

    Uburemere bw’ibi bibazo kandi bwari buhangayikishije Ingabire cyane ku buryo yari yarateguye urugendo yari kuzagirira mu Rwanda mu kwezi gutaha (Ukuboza), kugira aze kugisha inama abo mu muryango we ku cyo yakora.

    Mu kiganiro na IGIHE, Amb Diane Gashumba yihanganishije umuryango wa Ingabire ndetse n’inshuti ze ziganjemo Abanyarwanda batuye muri Suède, ashimangira ko Ambasade iri gufatanya n’inzego zitandukanye mu gukurikirana iki kibazo, yaba izo mu Rwanda no muri Suède.

    Amb Gashumba yirinze kugira byinshi avuga ku ntandaro y’urupfu rwa Ingabire, avuga ko ‘abantu bakwiye gutegereza ikizaba mu iperereza riri gukorwa n’inzego zitandukanye.’

    Icyakora Amb Gashumba abajijwe icyo avuga kuri aya makuru, ndetse n’inama atanga, yavuze ko “nta muntu ukwiye kuvutsa mugenzi we ubuzima,” ndetse avuga ko ari ngombwa ko Abanyarwanda bakwiye gukaza ingamba zo gukumira ibyaha nk’ibi byo mu miryango bitaraba.

    Yashimangiye ko mu gihe ubana n’umuntu uguhoza ku nkeke, ari ngombwa “Kuganira n’uwo wizeye ndetse n’inzego zikwegereye kandi zifite ubushobozi bwo gukumira ibyaha. Uganirijwe [kuri icyo kibazo ntakwiye] kubyihererana, akwiriye kubimenyesha inzego zishobora gufasha mu gukumira no kujya inama ziboneye.”

    Izo nzego zirimo nka ambasade z’u Rwanda mu bindi bihugu, Polisi zo muri ibyo bihugu mu gihe abari mu Rwanda nabo bashobora gukoresha inzego zirimo Urwego rw’Igihugu rw’Ubugenzacyaha (RIB), Isange One Stop Center n’izindi nzego zitandukanye.

    Yashimangiye ko kandi ko mu gihe imiryango ifitanye amakimbirane, ari ngombwa kwitabira ibiganiro bitangwa n’inzobere mu mitekerereze n’ihungabana.

    Amb Gashumba yasobanuye ko atari byiza kwihererana ibibazo umuntu afite, asaba abantu kugira umuco wo gusangiza abandi ibibazo bafite, bagacika ku mvugo zirimo ‘ihangane ni ko zubakwa,’ ’ihangane wikwishyira hanze,’ ’witandukana n’uwo mwashakanye utadukoza isoni’ n’izindi zica intege abagize umuryango bifuza kwerekana ibibazo byabo.

    Kuri iyi ngingo, yavuze ko ari byiza gufata umwanzuro urengera ubuzima bw’abagize umuryango ndetse n’abana babo mu gihe kumvikana no kubana byananiranye.

    Yagarutse ku rubyiruko, abasaba ko mu gihe bitegura kubaka imiryango, ari ngombwa kwitoza kugira umuco wo kuganira ku bibazo n’abo bitegura kurwubaka, asobanura ko nubwo icyifuzo cy’ababyeyi ndetse n’abagiye kubana ari ukugira ukubakana neza urugo rukaramba, iyo byananiranye, ’umuti atari ukurwana no guhozanya ku nkeke bigera aho umwe yica undi.’

    Abana ba Ingabire bari maboko ya ’service sociale’ za Leta ya Suède, aho Ambasade y’u Rwanda muri icyo gihugu iri gukora ibishoboka byose kugira ngo abagize umuryango wa Ingabire bajye muri icyo gihugu kwegera aba bana, mu rwego rwo kubarinda ihungabana, dore ko bakiri bato cyane.

    Amb Gashumba yavuze ko Ingabire yari umuntu ufite akamaro mu muryango Nyarwanda uri muri Suède, aho yitabiraga ibikorwa byose bijyanye n’umuco Nyarwanda, n’ibindi byose bihesha isura nziza u Rwanda muri Suède no mu bindi bihugu bya Scandinavia, aboneraho kuvuga ko Ambasade ayoboye ndetse na Leta y’u Rwanda yifatanyije n’umuryango wa Ingabire Diane.

    Ingabire Diane yitabye Imana bikekwa ko yishwe n’umugabo we

    Ingabire Diane yari yaragerageje kwegera inshuti n’umuryango ababwira ku bibazo yari afitanye n’umugabo we

    source : https://ift.tt/32xWjeX

  • Menya amagambo aryoheye amatwi 4 wabwira umukunzi wawe akamurutira andi yose wamubwiye #rwanda #RwOT

    Aho uzaba hose nzaba ndi kumwe nawe

    Wari wabwirwa iri jambo ngo wumve ukuntu riryoha? Si ugupfa kurivuga gusa kuko riraremereye, Kumva umuntu umubwiye ngo nzaba aho uzaba uri hose n'iby'agaciro gakomeye by'umwihariko ku bantu bakundana.

    Ni byiza kuribwira umukunzi wawe kenshi muri ahantu hatuje, mwishimye atari mu bibazo kugirango adakeka ko ari bya bindi bisanzwe byo kwihanganisha uwagize ibibazo wese.

    Uri uw'agaciro kuri njye

    Ubusanzwe tuzi ko ibyo twagereranya nk'iby'agaciro ari zahabu n'ifeza wenda rimwe na rimwe hakaza n'amaafaranga menshi. Ibaze rero umuntu akubwiye ko uri uw'agaciro kuri we byaba biryoshye kubyumva kurusha uko yakubwira ngo ndagukunda.

    Umfatiye runini.

    Mu buzima bwa muntu akenera umufasha mu buzima bwa buri munsi, umuntu ubana n'abantu benshi mu buzima, afashwa n'abantu benshi kandi bakomeye.

    Ngaho rero ibaze umuntu kugutoranya mu bandi benshi bamufasha cyangwa bamuba hafi akakubwira ngo umufatiye runini muri make ½ cy'ubuzima bwe ni wowe umugize.

    Nkwibonamo

    Ibaze uhuye n'umuntu akakubwira ngo nkwibonamo, urumva ukuntu byaba bimeze bishatse kuvuga ngo iyo akubonye aribona nkuko nta wakwiyifuriza ibibi ubwo bivuze ko nawe yakwifuza ko uhora mu bihe byiza.

    Refe:herbeauty.co

    Source : https://umuryango.rw/ubuzima-115/article/menya-amagambo-aryoheye-amatwi-4-wabwira-umukunzi-wawe-akamurutira-andi-yose

  • Mushikiwabo na Papa Francis bagiranye ibiganiro bitabariza Haiti na Liban #rwanda #RwOT

    Mu gitambaro cy’umukara mu mutwe nk’uko bisanzwe ku muntu w’igitsina gore wese wakiriwe mu biro bya Papa, Louise Mushikiwabo yavuze ko yanyuzwe n’uburyo yakiranywe urugwiro n’uwo muyobozi wa Vatican akaba n’umuyobozi wa Kiliziya Gatolika ku Isi.

    Ku rubuga rwa Twitter, Mushikiwabo yanditse ashimira cyane Papa Francis kubera umwanya yamuhaye, akanamugaragariza ukwiyoroshya, amwifuriza umugisha uturuka ku Mana.

    Yagize ati: “Nzahora nzirikana Papa Francis ku bw’umwanya mwiza yangeneye turaganira, ni umuntu w’imico myiza kandi arangwa no kwiyoroshya mu buryo butangaje, Imana ikomeze kumuhundagazaho umugisha.”

    Je suis infiniment reconnaissante au Saint-Père pour le temps précieux qu’il m’a accordé; un homme d’une générosité et d’une simplicité désarmantes. Que Dieu continue de le bénir abondamment!! https://t.co/0iEXOBaAEU

    — Louise Mushikiwabo (@LMushikiwabo) November 23, 2021

    Mu butumwa umuryango wa OIF washyize ku rubuga rwa Twitter, wahamije ko Louise Mushikiwabo yakiriwe i Vatican na Nyir’ubutungane Papa Francis.

    Uyu muryango wagize uti: “Louise Mushikiwabo yakiriwe na Nyir’ubutungane Papa Francis. Ibiganiro byabo bigamije guhuza amaboko mu gushakira ibisubizo abaturage ba Haiti na Liban.Ibihugu bibiri bigize Francophonie biri mu bibazo bikomeye.”

    .@LMushikiwabo a été reçue au Vatican par Sa Sainteté le Pape François. Leurs échanges ont porté sur la nécessité d’unir leurs forces en soutien aux populations du #Liban et de #Haïti. Deux pays de la #Francophonie soumis à des crises profondes. pic.twitter.com/48EY2nIp5J

    — La Francophonie (@OIFrancophonie) November 23, 2021

    Igihugu cya Haiti gisanzwe ari igihugu gifite ibibazo by’ubukungu ahanini bitewe n’ubutegetsi bwamunzwe na ruswa, kugira umubare munini w’abaturage batize, ikoreshwa ry’ibiyobwabwenge byiganje mu rubyiruko.

    Gusa ibi bibazo byarushijeho ubwo muri Nyakanga uyu mwaka uwahoze ari Perezida w’iki gihugu Juvenal Moise yaje kwicirwa iwe mu rugo n’abantu bataramenyekana.

    Ibyo byose bikiyongeraho umutingito ukomeye wabaye muri Kanama 2021 wangije ibikorwaremezo ndetse abaturage nibura abagera 2.248 bahaburiye ubuzima abandi 12,200 barakomereka.

    Ni mu gihe Liban yo ubu iri mu bibazo bikomeye by’ubukungu bwashegeshwe n’ingaruka za Coronavirus ndetse n’ubutegetsi bubi bwaranze iki gihugu mu myaka ibiri ishize.

    Iki gihugu cyarushijeho guhura n’ibibazo by’ubukungu ahanini bitewe n’iturika ry’icyambu cya Beirut ryabaye muri Kanama umwaka ushize maze rigahitana abagera kuri 216 abandi basaga 6000 barakomereka.

    Ibyo byose bituma ibihumbi by’abaturage bijya mu bushimeri ndetse n’gaciro k’ifaranga kakaba karatakaye hejuru ya 90%.

    Source : https://imirasire.com/?Mushikiwabo-na-Papa-Francis-bagiranye-ibiganiro-bitabariza-Haiti-na-Liban