Category: Uncategorized

Umwana w'umukobwa twahisemo guha izina rya Gasaro avuka mu Karere ka Rwamagana ku myaka 14, yatewe inda n'uwari umwarimu we nyuma yo kumushuka amubwira ko kuba akiri isugi ari amakosa akomeye.

Gasaro watewe inda yiga mu mwaka wa Kabiri w'amashuri yisumbuye, umwarimu wamwigishaga yamwumvishije ko agomba kumufasha gutakaza ubusugi kandi ko ari igikorwa cy'ubugiraneza yari agiye kumukorera.

Uyu mwana twise Gasaro yaremeye asambanywa n'umwarimu wamwigishaga.

Ati'Ajya kumbwira yambwiye ko isugi ari ikintu kizira cyane ku mukobwa cyangwa se ku muntu wenda kubaka. Kandi ko kugira ngo umuntu ate ubusugi ari ibintu bigoranye cyane, aza kumbwira ko none yemeye kunyitangira, kuko umuntu wagusujyura ni umuntu wakwitangiye, ndakwitangiye uyu munsi reka ngufashe. We yabinkoreye nk'umuntu umfasha biza kurangira ntwaye inda.'

Gasaro yahise asama inda kuri ubu umwana yabyaye afite imyaka 4, ariko na n'ubu uwayimuteye ahari ntihazwi, dore ko n'umwirondoro we wuzuye utari uzwi.

Ati 'Niba tutari tuzi izina tumwita Tonton, ntabwo wari kugenda uvuga ngo ngiye kurega Tonton. Twagerageje gukurikirana amakuru ariko amakuru twarayabuze neza nta zina rye twigeze tubona.'

Uko byagendekeye uyu mwana w'umukobwa twahaye izina rya Gasaro, ni nako byagendekeye mugenzi we twahaye izina rya Fillette nawe wo muri Rwamagana, wasambanijwe n'umugabo mukuru amushutse bikavumiramo gutwita afite imyaka 17, nawe ntiyashoboye kumenya umwirondoro w'uwamuteye inda kuko yamubwiye amazina atari yo.

Ati 'Mbere bansabye ko namutanga bakamufunga, ariko kuko yari yarambeshye amazina, amazina yose navugaga  barayashakaga bakayabura.'

Nyuma y'inzira y'umusaraba n'ubuzima bugoye aba bana bombi b'abakobwa, ni bamwe mu bagera muri 300  bafashijwe gusubira ku ishuri.

 Uwo twise Gasaro kuri ubu yiga mu mwaka wa Gatanu, Fillete we yarangije amashuri yisumbuye, bigizwemo uruhare n'ihuriro  ry'abagore riharanira amajyambere y'icyaro  Reseau de Femme.

Icyakora hari abanyamategeko bagaragaza impungenge ko igihe hakiriho guhishira abagize uruhare mu guhohotera abana, ngo ntibagezwe imbere y'ubutabera ikibazo gishobora kwiyongera aho kugabanuka.

Maître Gatari Salimu Steven ni umunyamategeko ati 'Ikibazo gihari kinini cyane ikintu bita guhishira abantu batera inda abana. Ni yo mbogamizi ikomeye kurenza itegeko, kubera ko ujya kugenza icyaha cyangwa ujya gushakisha umunyacyaha ahera ku makuru.'

Ihuriro  ry'Abagore riharanira Amajyambere y'Icyaro  'Reseau de Femme' naryo risaba ko hadakwiye kubaho gukingira ikibaba, abagize uruhare mu guhohotera abana b'abakobwa.

 Kandi ko bakwiye kugezwa imbere y'ubutabera, ndetse ntibinagarukire aho ahubwo uwahohotewe agahabwa indishyi z'akababaro.

Madamu Uwimana Xaverine ayobora Reseau De Femme.

Ati 'Twe guceceka. Kuba uwahohoteye umwana yanamuteye inda agashyikirizwa ubutabera agafungwa ni ubutabera. Ubutabera buba bubonetse ariko ubutabera buba bwuzuye iyo wawundi wahohotewe, iyo wawundi wakorewe icyaha ahawe indishyi z'akababaro.'

Ubukana bw'ikibazo cy'ihohoterwa rikorerwa abana mu Rwanda cyatumye Komisiyo y'Ubumwe bw'Abanyarwanda, Uburenganzira bwa muntu no Kurwanya Jenoside mu Mutwe w'Abadepite, ihamagaza Minisiteri y'Uburinganire n'Iterambere ry'Umuryango tariki 16 Ukuboza 2021, ngo baganire kuri icyo kibazo 

Abadepite bagize iyi komisiyo basabye ko hafatwa  ingamba ziyongera ku zisanzweho, kuko nubwo hari amategeko ahana abahohotera abana hakiri icyuho mu ishyirwa mu bikorwa ryayo.

Tito DUSABIREMA

The post Ku myaka 14 yatewe inda nyuma yo kubeshywa ko ubusugi ari ikizira-Ubuhamya appeared first on FLASH RADIO&TV.

Source : https://flash.rw/2021/12/17/ku-myaka-14-yatewe-inda-nyuma-yo-kubeshywa-ko-ubusugi-ari-ikizira-ubuhamya/?utm_source=rss&utm_medium=rss&utm_campaign=ku-myaka-14-yatewe-inda-nyuma-yo-kubeshywa-ko-ubusugi-ari-ikizira-ubuhamya

Inama Nkuru ya Polisi y'Igihugu, yafashe icyemezo cyo kwirukana burundu mu kazi abapolisi 481 kubera amakosa n'ibyaha bihabanye n'imyitwarire y'umwuga iranga igipolisi cy'u Rwanda, aya makosa akaba arimo ruswa, ubusinzi no gutoroka mu kazi.

Umuyobozi Mukuru wa Polisi y'Igihugu, IGP Dan Munyuza yavuze ko umubare w'abapolisi bagaragaweho amakosa atandukanye ari munini, ari nayo mpamvu hafashwe iki cyemezo mu rwego rwo kurushaho kunoza ubunyamwuga muri Polisi y'Igihugu.

The post Inama Nkuru ya Polisi y'Igihugu yirukanye burundu Abapolisi 481 appeared first on FLASH RADIO&TV.

Source : https://flash.rw/2021/12/17/inama-nkuru-ya-polisi-yigihugu-yirukanye-burundu-abapolisi-481/?utm_source=rss&utm_medium=rss&utm_campaign=inama-nkuru-ya-polisi-yigihugu-yirukanye-burundu-abapolisi-481

Umufaransa Klyan Mbappe n'umunya-Norvege Erling Braut Haaland bafatwa nk'abakinnyi b'ikiragano gishya nyuma ya Cristiano Ronaldo na Lionel Messi basa n'abari gutamba bava mu kibuga.

Shampiyona ya Espagne yakurikirwaga na benshi ku Isi ubwo yakinagamo Cristiano na Messi, gusa aho bahaviriye ntigishishikaza benshi ndetse n'amakipe yaho amwe yatangiye gusubira hasi ku buryo iyi shampiyona izwi nka 'La Liga' bigaragarira buri wese ko urwego rwayo rwasubiye hasi.

Benshi mu basesenguzi b'umupira w'amaguru bemeza ko kugira ngo iyi shampiyona izongere gukurura abayireba ndetse ubwayo yiyubake bifatika, ari ukugura abakinnyi bagezweho ndetse bahanzwe amaso na buri wese nk’uko byari bimeze igikinwamo na Cristiano na Messi.

Kugarura muri Espagne aba bakinnyi bari kugana mu zabukuru biragoye, igikenewe ni ugushaka abakinnyi bafite izina rikomeye ariko bakiri bato.

Byatangajwe kenshi ko Klyan Mbappe ukinira PSG kuri ubu yagiye agirana ibiganiro na Real Madrid kugira ngo ashake uko yayerekezamo, ndetse na Perezida w'iyi kipe, Perez yijeje abafana ko azagura uyu rutahizamu ufatwa nk'umusimbura w'ejo hazaza wa Cristiano Ronaldo muri iyi kipe.

Ku ruhande rw'umukinnyi ubwe, arashaka kwerekeza muri Espagne aho yiteze kuzahabwa agaciro n'umwanya kugira ngo ayobore ubusatirizi bw'iyi kipe y'ubukombe ku Isi ndetse anashake uburyo yakwegukana Ballon d'Or.

Mbappe w'imyaka 22 y'amavuko, yanze kongera amasezerano muri PSG anamenyesha ubuyobozi bw'iyi kipe ko ashaka kwerekeza ahandi, ndetse bihumira ku mirari ubwo PSG yaguraga Messi n'abandi bakinnyi bakomeye mu mpeshyi y'uyu mwaka.

Amakuru ahari kandi yizewe yemeza ko Mbappe yamaze kumvikana na Real Madrid ndetse muri Mutarama 2022, uyu mukinnyi azasinya imbanzirizamasezerano, akazayerekezamo ubwo shampiyona izaba irangiye, nawe asoje amasezerano afite i Paris.

Undi mukinnyi bivugwa ko azerekeza muri shampiyona ya Espagne ni rutahizamu wa Borussia Dortmund n'ikipe y'igihugu ya Norvege, Erling Haaland wifuzwa na FC Barcelona.

Nubwo Manchester United igicungiye hafi uyu mukinnyi, Perezida wa FC Barcelona Laporta yatangaje ko mu mpeshyi y'umwaka utaha azagurira iyi kipe umukinnyi ukomeye kandi bikavugwa ko ari Haaland.

Uyu mukinnyi ufatiye runini Dortmund, ari gushakwa cyane na Manchester United yifuza kumugura mu mpeshyi gusa bizayigora kuko Haaland ashaka Barcelona kuruta kujya mu Bwongereza.

Amakuru aturuka muri Espagne avuga ko abahagarariye uyu mukinnyi baganiriye n'ubuyobozi bwa Barcelona bagira ibyo bumvikanaho ku hazaza h'uyu mukinnyi wifuzwa i Catalonia mu mpeshyi.

La Liga yasubirana ubuzima ibonye aba bakinnyi kuko bakongera kugarura ubushyuye muri Espagne ndetse bigatuma abantu bongera kugira inyota yo kuyikurikira.

Byitezwe ko muri Mutarama 2022 hashobora gutangazwa imbanzirizamasezerano z'aba bakinnyi muri aya makipe yo muri Espagne.

Source : https://inyarwanda.com/inkuru/112683/ni-wo-muzuko-wa-la-liga-klyan-mbappe-muri-real-madrid-erling-haaland-muri-barcelona-112683.html

Ku wa gatanu, tariki ya 17 Ukuboza 2021,uyu mukobwa w'umuyobozi w'ishuri ryisumbuye rya Gayaza Robina Kizito yashakanye n'umukunzi we Derrick Wabwire mu birori byiza byabereye kuri All Saints Cathedral, nyuma baza kubakira muri Sheraton Hotel, Kampala.

Nk'uko amakuru yatangajwe n'umuvugizi wa CID, Charles Twiine, mu kiganiro yagiranye n'abanyamakuru ku cyicaro gikuru cya Polisi kiri Naguru mu ntangiriro ziki cyumweru, abashakanye baraye muri hoteri ya Sheraton bitegura kujya mu kwezi kwa buki.

Ariko, kuwa gatandatu, abashakanye bahisemo kubanza kujya mu bitaro by'abagore i Bukoto gufata inshinge zo kuboneza urubyaro.

Twine yagize ati:“Bakigera ku bitaro, abaganga babagiriye inama yo gufata intrauterine device (IUD). 'Yarasuzumwe ariko nyababyeyi ye ntabwo yari ihagaze neza.Abaganga bamuhaye amazi bizeye ko bishoboka ko bizahuza nyababyeyi. Byagaragaye kandi ko na we yari afite imihango kandi yiyiriza ubusa. '

Polisi yavuze ko umuganga w'ubuzima bw'imyororokere yabagiriye inama ko umuntu ufite imihango adashobora gufata IUD, ariko nyuma y'impamvu zitazwi, bamwizamo ubwo buryo maze agira ububabare bukabije bwo mu gifu araremba.

Uwo mugeni yahawe ubuvuzi ariko ntibyagira icyo bitanga.Yahise yoherezwa mu bitaro bya Victoria,ari muri koma.

Nk'uko byatangajwe n'Umuvugizi w'ibitaro bya Women Hospital International,Arthur Metso, ngo abo bashakanye basabye ubufasha mu kuboneza urubyaro, ariko nyuma yo gushyirwamo igikoresho cya IUD cyo kuboneza urubyaro, Joanna yagize ikibazo bituma abaganga bamwitagaho bahita bamwohereza ahandi kugira ngo arusheho kwitabwaho.

Ku wa gatatu, abaganga bane bo muri ibyo bitaro batoranyijwe n'abapolisi kugira ngo babazwe.

Joanna yitabye Imana nyuma yo kuvurwa ntibigire icyo bitanga.

Source : https://umuryango.rw/ubuzima-115/imibereho/article/umugeni-yapfuye-nyuma-y-icyumweru-kimwe-akoze-ubukwe-kubera-uburyo-bwo-kuboneza

Ibiro by’Umukuru w’Igihugu byatangaje iby’uru ruzinduko rwa Perezida Kagame kuri uyu wa Gatanu tariki 17 Ukuboza mu butumwa bwanyujije kuri Twitter.

Ubutumwa bw’Ibiro by’Umukuru w’Igihugu, bugira buti 'Perezida Kagame yageze muri Istanbul aho agiye kwifatanya n’Abakuru b’Ibihugu na za Guverinoma baturutse muri Africa bitabiriye ihuriro rya gatatu ry’ubufatanye bwa Africa na Turkia [Africa-Turkey Partnership Summit].'

Ubu butumwa buherekejwe n’amafoto agaragaza Perezida Paul Kagame ageze ku kibuga cy’indege muri Istanbul yakirwa n’akarasisi k’inzego z’umutekano zo muri Turkia.

Iyi nama yitabiriwe na Perezida Kagame w’u Rwanda yatumijwe kanzi izayoborwa na mugenzi we Perezida wa Turkia, Recep Tayyip Erdoğan.

Iyi nama kandi yitabiriwe na Perezida wa Repubulika Iharanira Demokarasi ya Congo, Félix Antoine Tshisekedi Tshilombo unayoboye Umuryango wa Africa Yunze Ubumwe ndetse na Perezida wa Komisiyo y’uyu muryango, Moussa Faki Mahamat.

Iri huriro rifite insanyamatsiko igira iti “Enhanced Partnership for Common Development and Prosperity”, tugenekereje [Ubufatanye bwimbitse bugamije iterambere no kuzamura ubukungu].

Iri huriro rya Gatatu ry’imikoranire ya Africa na Turkia, riri kubera hamwe imishinga mishya yashorwamo imari mu mikoranire hagati y’Iki Gihugu n’Umugabane wa Africa.

Ibikorwa by’iri huriro kandi bizaberamo ibiganiro bizahuza ba Minisitiri b’Ububanyi n’Amahanga bazarebera hamwe ibijyanye n’imibanire ya Turkia na Africa.

Hazanaganirwa kandi ku mishinga yo mu nzego zinyuranye zirimo ubuvuzi, uburezi bizahuza ba Minisitiri bo muri izi nzego.

Source : http://www.ukwezi.rw/1-1/Amakuru-anyuranye/article/AMAFOTO-Perezida-Kagame-yitabiriye-inama-muri-Turukiya

Perezida Kagame akaba n'Umugaba w'Ikirenga w'Ingabo z'u Rwanda, yazamuye mu ntera abasirikare mu ngabo z'u Rwanda, Col François Regis Gatarayiha agirwa umuyobozi mukuru wungirije ushinzwe ubutasi mu gisirikare n'Umuyobozi w'ishami ry'Ikoranabuhanga.

Perezida Kagame akaba n'Umugaba w'Ikirenga w'Ingabo z'u Rwanda yakoze impinduka mu gisirikare ku buryo bukurikira:

Col François Regis Gatarayiha yagizwe Umuyobozi Mukuru wungirije ushinzwe ubutasi mu gisirikare n'Umuyobozi w'ishami rishinzwe Ikoranabuhanga.

Abasirikare 460 bazamuwe mu ntera bavanwa ku ipeti rya Major bahabwa irya Lieutenant Colonel.

472 bari bafite ipeti rya Captain bahawe irya Major.

Uyu Col.François Regis Gatarayiha akomeje kuzamurwa mu ntera kuko muri Nzeri 2021 aribwo yakuwe ku ipeti rya Lt Col.

Lieutenant Colonel Francis Regis Gatarayiha nyuma yo kuzamurwa mu ntera kuwa 9 Nzeri 2021,yahise ahabwa inshingano nshya nk'Umuyobozi w'Ishami ry'Itumanaho, Ikoranabuhanga n'Umutekano mu by'Ikoranabuhanga muri RDF.

Yahawe uyu mwanya nyuma y'iminsi itatu akuwe ku Buyobozi Bukuru bw'Urwego rw'Abinjira n'Abasohoka yari yashyizweho mu 2018.

Col François Regis Gatarayiha yahawe inshingano nshya

Source : https://umuryango.rw/amakuru/mu-rwanda/politiki/article/perezida-kagame-yazamuye-mu-ntera-bamwe-mu-basirikare

Urubyiruko rwize imyuga n'ubumenyingiro rurinubira amafaranga rucibwa  n'ibigo n'inganda by'abikorera  mugihe rugiye gusaba imenyerezamwuga (Stage) babwirwa ko ari ayo kuriha ibikoresho bakwangiza bimenyereza umwuga.  Aba barasaba  Guverinoma kwinjira muri iki kibazo kuko gituma batabona imirimo.

U Rwanda ni igihugu gishyize imbaraga mu kwigisha imyuga n'ubumenyingiro hagamijwe guhangana n'ikibazo cy'ubushomeri, ndetse abarangiza mu mashuri y'imyuga  biganjemo urubyiruko bariyongera ariko ngo kubona aho bimenyereza umwuga ni ingume, kuko ngo abafite inganda zakabafashije kwimenyereza (Stage) ngo baba bafite ubwoba bw'imashini zishobora gupfa kubwo gukoreshwa n'abimenyereza.

 Ibi ngo bituma bacibwa amafaranga yitwa aya kosiyo (Caution) babwirwa ko ari ayo kuriha ibikoresho bakwangiza babikoreraho.

Umwe ati 'Kugira ngo ubone stage mubigo by'abikorera bisaba ko hari ikintu ubaha, ayo mafaranga badusaba batubwira ko ari ay'ibintu wakwangiza.'

Undi ati 'Muby'ukuri  kubona stage biragora cyane ndetse ugasanga niba ari umuntu ushaka kudefiriza imisatsia (gutera produit) bakagubwira ngo jya kwigurira produit umukorereho.'

Undi nawe ati ' Kompanyi ntabwo zikunda kwakira abantu, hari igihe ziba zivuga ngo ushobora kuza ukagira ibyo wangiza.'

Muri 2017 mu Rwanda hashyizweho gahunda yiswe IGIRA KU MURIMO igamije gufasha abanyeshuri bize imyuga n'ubumenyingiro, bafashwa kubona aho bimenyereza umwuga.

Mu Myaka itanu ishize abagera kuri 461 bahujwe n'ibigo by'abikorera byemera Ko bimenyereza umwuga (stage).

 Umwe mubanyenganda bemeye kwakira abimenyereza umwuga bamwe akanabaha imirimo, asanga nta gikwiye kubuza abikorera gutanga 'stage' kubize imyuga n'ubumenyingiro.

Ati 'Akenshi ubundi mu mastage iyo ukoresheje umuntu stage ukaba ufite ubwo bushobozi bwo kumuha akazi uhita umufata.'

Uko biri kose bisaba ko Guverinoma ijya hagati y'abikorera n'abize imyuga n'ubumenyingiro  bashaka kwimenyereza umwuga.

Umwe mu bize imyuga ati 'Guverinoma numva yajyamo igahugura abantu bafite izo nganda, bagahindura imyumvire kuri icyo kintu cyo kumva ko umunyeshuri  wize ashobora kuza akagira ibyo yangiza.'

Hasozwa ikiciro cya Mbere cy'imyaka itanu cya Gahunda ya IGIRA KUMURIMO, Minisitiri w'Abakozi ba Leta n'umurimo  Fanfan Rwanyindo Kayirangwa  yavuze ko Guverinoma hari imbaraga nyinshi  ishyize mu gufasha abiga imyuga n'ubumenyingiro kubona imenyerezamwuga.

Icyakora Guverinoma ngo ntiyabyishoboza yonyine.

Minisitiri Rwnayindo ati 'Iyo gahunda nubwo ifasha abanyeshuri kubona akazi muburyo bwihuse, ariko isaba amafaranga menshi. Rero icyo nka Guverinoma icyo dukora dukorana n'abafatanyabikorwa barimo Belgian cooperation, yaba Swiss cooperation ariko nka nka guverinoma icyo dukora ni no guha ibikoresho ama ibigo byigihsa imyuga n'ubumenyingiro (TVET SCHOOLS) abana bakabona aho babishyirira mu ngiro.'

Guverinoma y'U Rwanda yihaye intego yo kuzamura umubare w'abiga imyuga ukaba 60% mu mwaka wa 2024.

 Mugihe aba bose basohoka babasha guhangana ku isoko ry'umurimo, byatuma igihugu gihigura umuhigo wo guhanga imirimo  miliyoni 1.5 nk'uko bikubiye muri gahunda ya guverinoma y'imyaka 7.

Daniel Hakizimana

The post Urubyiruko rwize imyuga rurinubira amafaranga rucibwa rugiye gusaba imenyerezamwuga (Stage) appeared first on FLASH RADIO&TV.

Source : https://flash.rw/2021/12/17/urubyiruko-rwize-imyuga-rurinubira-amafaranga-rucibwa-rugiye-gusaba-imenyerezamwuga-stage/?utm_source=rss&utm_medium=rss&utm_campaign=urubyiruko-rwize-imyuga-rurinubira-amafaranga-rucibwa-rugiye-gusaba-imenyerezamwuga-stage

Cristiano Ronaldo n’umukunzi we, Georgina Rodriguez batangaje ko impanga bitegura kwibaruka ari umuhungu n’umukobwa.

Ni mu mashusho magufi Cristiano Ronaldo yashyize ku rukuta rwe rwa Instagram yaherekejwe n’amagambo agira ati 'aho ubuzima butangirira, urukundo ntirurangira.'

Muri aya mashusho abana be, abahungu babiri bari bafite igipurizo 1 n’abakobwa bafite ikindi, umukunzi we Georgina yumvikana ababarira kugeza kuri gatatu maze bagahita babituritsa, abahungu babiri bahita bavuga bati 'ni umuhungu! Ni umuhungu!' Abakobwa n’abo bahita bavuga ngo 'Ni umukobwa! Ni umukobwa.'

Mu mpera z’Ukwakira 2021 nibwo Cristiano Ronaldo n’umukunzi we bahishuye ko bitegura kwakira impanga mu muryango wabo.

Izi ni impanga za kabiri za Cristiano Ronaldo, ni nyuma ya Mateo Ronaldo na Eva Maria Dos Santos.

Georgina Rodriguez na Cristiano bakaba bari basanzwe bafitanye umwana w’umukobwa, Alana Martina Dos Santos Aveiro.

Aba bana bose bakaba biyongera ku mfura ya Cristiano Ronaldo ari we Cristiano Jr.

Cristiano Ronaldo na Georgina bagiye kwibaruka impanga z’umukobwa n’umuhungu

Source : http://isimbi.rw/siporo/article/cristiano-n-umukunzi-we-bahishuye-igitsina-cy-impanga-zabo-bitegura-kwibaruka

Mu itangazo ryashyizwe hanze na Julia Morley, uhagarariye iri rushanwa yatangaje ko bahisemo kuba barisubitse mu minsi 90 iri imbere ngo barengera ubuzima bw'abari guhatana ndetse n'abandi bafitemo akazi.

Hari aho yagize ati 'Miss World 2021 yasubitse by'agateganyo gusoza irushanwa ryagombaga kwerekwa Isi yose riri kubera muri Puerto Rico kubera inyungu z'umutekano by'abahatana, abakozi n'abaturage muri rusange. Irushanwa rizaba muri Puerto Rico Coliseum José Miguel Agrelot mu minsi 90 iri imbere.'

Nyuma yo gukora ubushakashatsi mu bijyanye na Virus nshya ya Omicron, ni bwo hazamenyekana uko irushanwa rigomba kugenda.

Itangazo rya Miss World rivuga ko mu gihe abahatana n'abakozi muri iri rushanwa bazaba bamaze gupimwa no kugenzurwa neza bazasubira mu bihugu byabo kugeza igihe bazongera guhamagarirwa ngo rikomeze.

Iri rushanwa ryasubitswe nyuma yaho abakobwa 17 basanzwemo Coronavirus. Mu 2020 ryagombaga kuba ariko kubera iki cyorezo nabwo ntiryaba, bituma Umunya-Jamaica Toni-Ann Singh akomeza kwambara ikamba yegukanye mu 2019.

Ingabire Grace wabaye Nyampinga w'u Rwanda 2021 ni we uri guhatana ahagarariye igihugu muri Miss World y'uyu mwaka yabaye isubitswe.

Source : https://umuryango.rw/imyidagaduro/article/miss-world-2021-yagombaga-gusozwa-mu-ijiro-ryakeye-yasubitswe-mu-buryo

Bikubiye mu itangazo ryashyizwe hanze na Minisiteri y’Ingabo kuri uyu wa Gatanu tariki 17 Ukuboza 2021.

Iri tangazo rivuga ko Perezida wa Repubulika Akaba n’Umugaba w’Ikirenga w’Ingabo z’u Rwanda yashyizeho Col François Regis Gatarayiha nk’Umuyobozi Mukuru Wungirije Ushinzwe Ubutasi mu Gisirikare n’Umuyobozi w’ishami ry’Ikoranabuhanga.

Col François Regis Gatarayiha wabaye umuyobozi w’Urwego rw’Igihugu Rushinzwe Abinjira n’Abasohoka kuva muri 2018, mu ntangiro za Nzeri 2021 yari yazamuwe mu mapeti aho yari yavuye kuri Lieutenant Colonel agahabwa ipetirya Colonel ndetse agahita anagirwa Umuyobozi w’Ishami ry’Itumanaho n’Umutekano mu by’Ikoranabuhanga muri RDF.

Itangazo rya Minisiteri y’Ingabo z’u Rwanda kandi rivuga ko kuri uyu wa Gatanu, Perezida Kagame yazamuye mu mapeti abasirikare 460 bari bafite ipeti rya Major bakaba bahawe ipeti rya Colonel.

Abandi basirikare bazamuwe mu mapeti, barimo 472 bari bafite ipeti rya Captain bakaba bahawe ipeti rya Major.

Yanazamuye abasirikare 12 690 bari bafite ipeti rya Private, abaha ipeti rya Corporal naho 2 836 bari bafite ipeti rya Corporal bahabwa ipeti rya Sergeant.

Source : http://www.ukwezi.rw/1-1/2/article/BREAKING-Abasirikare-ibihumbi-12-bazamuwe-mu-mapeti