Category: Uncategorized

Mu butumwa Perezida Samia yatanze yavuze ko yababajwe n’izo mpfu zabayeho, anihanganisha ababuze ababo.

Abinyujije ku rubuga rwe rwa Twitter, Perezida Samia yagize ati 'Nababajwe cyane n’impfu z’abantu 14, harimo n’abanyamakuru 6, zabayeho ubwo imodoka imwe mu zari kumwe n’Umuyobozi w’Intara ya Mwanza igonganye n’imodoka itwara abagenzi 'Daladala’. Nihanganishije ababuze ababo, abanyamakuru n’imiryango yose. Imana yakire roho za ba nyakwigendera kandi n’abakomeretse bakire vuba'.

Aganira n’Ikinyamakuru 'Mwananchi’ cyandikirwa muri Tanzania, Umuyobozi w’Akarere ka Busega, Gabriel Zakaria, yemeje ko hapfuye abantu 14, harimo 11 bahise bapfa ako kanya impanuka ikimara kuba, ndetse n’abandi 3 bapfuye nyuma y’aho gato.

Yagize ati 'Ni byo koko, impanuka yabaye, abantu 11 bapfira aho impanuka yabereye, harimo abanyamakuru n’umushoferi wabo ndetse n’abandi bari bari mu yindi modoka. Mu minota mikeya nyuma y’uko abakomeretse bagejejwe ku ivuriro rya Nasa, abandi batatu bahise bapfa'.

Polisi yo yatangaje ko icyateye iyo mpanuka yahitanye abo 14, ari umuvuduko ukabije. Imibiri y’abaguye muri iyo mpanuka biteganyijwe ko isezerwaho bwa nyuma ikanashyingurwa uyu munsi tariki 12 Mutarama 2022.

Bifuza ko abarimu bo mu mashuri abanza bakongererwa imishahara hatagendewe ku 10% gusa kuko imishahara yabo ikiri hasi

Umuyobozi wa GS Cyarwa, Donatha Akayezu, agira ati 'Aho hashyiriweho kongera 10% ku mishahara y’abarimu buri mwaka, baranezerewe. Ariko abanezerewe cyane cyane ni abahemberwa impamyabumenyi zo ku rwego rwa kaminuza.'

Akomeza avuga ko abigisha mu mashuri abanza bahemberwa impamyabumenyi za A2, bo urebye nta gifatika cyiyongera ku mishahara yabo, bituma atekereza ko byarushaho kuba byiza babanje kongererwa imishahara, hanyuma hakabona gutekerezwa ku kubongereraho 10%.

Ati 'Ku bigisha mu mashuri abanza, kubera ko umushahara wabo usanzwe uri hasi cyane, iyo hongereweho 10% ubona nta kintu gifatika cyiyongereyeho. Njyewe nifuza ko mwalimu yatangirira byibura nko ku bihumbi 70, ku buryo bamwongereyeho 10% hari ikintu kigaragara cyaba cyiyongereye ku mushahara we.'

Inama y’Abaminisitiri yateranye ku itariki ya 28 Mutarama 2019, yemeje ko umushahara w’abarimu uzagenda wongerwaho 10% buri mwaka. Kubera ko hari andi mafaranga abarimu bari bagiye bongererwaho mbere, byatumye ubwo bongererwagaho 10% mu mwaka ushize wa 2021, umushahara w’abatangizi bahemberwa A2 warageze ku bihumbi 55, na ho uw’abatangizi bahemberwa A0 ukagera ku bihumbi 176.

Ni ukuvuga ko abarimu bafite uburambe bagiye bazamurwa mu ntera bo bahembwa aruta ayo, kuko kongera 10% ku mushahara bidakuraho izamurwa mu ntera rishingiye ku burambe no ku kwesa imihigo.

Thomas D. Ntawangwanabose, umuyobozi ushinzwe amasomo mu ishuri ryigenga, Ikibondo, avuga ko n’ubwo we akora mu ishuri ryigenga, aho imishahara y’abarimu bahemberwa A2 iruta ay’abakorera Leta, abona ko Leta iramutse itongereye imishahara y’abarimu ariko igafasha abana babo kwiga na byo byafasha.

Agira ati 'Buriya umwana wa mwalimu ahawe imfashanyo y’uburezi, akigira ubuntu mu mashuri abanza, ayisumbuye na kaminuza, ntacyo mwalimu yashinja Leta icyo gihe, kuko usanga ku mushahara mwalimu ahembwa hazaho no kurihira abana, bikabyara ikibazo.'

Innocent Hagenimana ushinzwe itangazamakuru mu kigo REB, avuga ko n’ubwo umushahara wa mwalimu ari mutoya, kuba ugenda wongerwa bivuze ikintu kinini.

Ati 'N’ubwo umushahara waba mutoya, iyo wiyongera urafasha. Kandi hariho ingamba zo kugira ngo mwalimu azamurirwe ubushobozi mu mafaranga, ari na wo murongo wa gahunda yo kongera umushahara ho 10% buri mwaka. Kandi bizakomeza.'

Yongeraho ko hariho n’izindi gahunda zo gufasha mwalimu gutera imbere abarimu bagiye bashyirirwaho harimo Koperative Umwalimu Sacco ibaha inguzanyo ku nyungu ntoya, hakabaho no kuba barashyiriweho uburyo bwo kongera ubumenyi bafashwa kwiga muri za kaminuza.

Kandi ngo ibifasha abarimu ntibihagararira aho, kuko igihe bizagaragara ko hari ibindi bishoboka kandi bikwiriye, bizakorwa.

Intara ya Québec muri Canada igiye kujya ica umusoro w'ubuzima ku bayituyemo batakingiwe Covid-19.

Québec — intara ifite umubare wa mbere munini muri Canada w'impfu zitewe na Covid — ubu irimo kugorwa no kwiyongera kw'ubwandu.

Ku wa kabiri, umutegetsi mukuru wa Québec yatangaje ko igiye kuba intara ya mbere mu gihugu igiye gushyiraho igihano cyo guca amafaranga abatarikingije Covid.

Abagera kuri 12.8% by'abaturage ba Québec ntibakingiwe, ariko bihariye hafi kimwe cya kabiri cy'abari mu bitaro bose.

Nkuko imibare ya leta ya Canada ibigaragaza, kugeza ku itariki ya mbere y'uku kwezi kwa mbere abarenga gato 85% by'abaturage ba Québec bari bamaze guhabwa nibura doze imwe y'urukingo.

Umwuka i Rubavu uragenda ubamwiza

Ibyo bije nyuma y’uko mu cyumweru gishize, REMA yari yohereje abakozi bayo mu Karere ka Rubavu kugenzura ubuziranenge bw’umwuka n’ubw’amazi y’ikiyaga cya Kivu, maze ibipimo by’umwuka wo mu Karere ka Rubavu bigaragaza ko utujuje ubuziranenge.

Icyo kigo binyuze ku rubuga rwacyo rwa Twitter, cyatangaje ko ubu ibipimo bishya by’umwuka muri uwo mujyi bigaragaza ko ugenda uba mwiza.

REMA kandi yagiriye inama abagirwaho ingaruka n’ihumana ryikirere, aho yagize iti: “abagirwaho ingaruka n’ihumana ry’ikirere, barimo abakuze n’abana, barasabwa kugabanya ibikorwa bakorera hanze aho bishoboka”.

Abakozi ba REMA boherejwe mu mujyi wa Rubavu, nyuma y’uko Ikigo gishinzwe kugenzura Ibirunga cyo Mu mujyi wa Goma, gitangaje amakuru y’uko ikirunga cya Nyiragongo gikomeje kugaragaza ibimenyetso by’uko gishobora kongera kuruka, cyane kirimo kohereza imyotsi myinshi mu kirere.

Ikipe ya Kiyovu Sports ni imwe mu makipe yasubukuye imyitozo kuri uyu wa Kabiri, aho ifite umukino ukomeye uzayihuza na APR Fc ku Cyumweru tariki 16/02/2022 kuri Stade ya Kigali i Nyamirambo.

Muri iyi myitozo, ntihigeze hagaragaramo abanya-Uganda babiri Emmanuel Okwi na Muzamir Mutyaba bari basubiye iwabo ubwo shampiyona yasubikwaga, abakunzi b’iyi kipe bakaba bibaza niba aba bakinnyi babiri bazakina uyu mukino.

Umutoza wa Kiyovu Sports Haringingo Francis nyuma y’iyi myitozo yatangaje ko bari gukora ibishoboka byose ngo barebe ko abakinnyi bagiye mu kiruhuko bagaruka bagakina umukino wa APR FC, aho yanavuze ko bifuza guhindura amateka y’uko Kiyovu Sports itajya ipfa gutsinda APR FC.

Yagize ati 'Imyitozo y’uyu munsi navuga ko ari imyitozo tutakoze ibintu byinshi, kwari ukureba uko imbaraga z’abakinnyi, dusanze abakinnyi batari hasi cyane, ariko sinanavuga ko bari hejuru, muri rusange urabona ko ikipe imeze neza.

'Uburyo twagiye mu karuhuko dufite forme, sinavuga ko tuzagaruka kwa kundi, dufite iminsi nk’itatu cyangwa ine turi gukora tuzagerageza turebe ko twabasubiza ku rwego bariho'

Haringingo Francis yavuze ko bari kugerageza ngo barebe ko aba bakinnyi bakina umukino wa APR FC

Yakomeje agira ati 'Abo mutabonye mu myitozo ntabahari, hari abo twari twarekuye ngo bajye mu karuhuko, muzi uburyo bari bafunze imikino, turi kuvugana nabo ngo turebe ko bagaruka vuba ngo babe badufasha mu mukino wo ku Cyumweru.'

Mu mikino 23 aya makipe aheruka gukina, ikipe ya APR FC yatsinzemo Kiyovu Sports inshuro 20, Kiyovu ibasha gutsindamo rimwe gusa, mu gihe banganyije kabiri. Kiyovu Sports iheruka gutsinda APR FC tariki 27/10/2017 ubwo yatozwaga na Cassa Mbungo André.

Kiyovu Sports yasubukuye imyitozo kuri uyu wa Kabiri

Umuvugizi wa Polisi mu Ntara y’Iburengerazuba, CIP Bonaventure Twizere Karekezi, yavuze ko Muhoza yafashwe agiye gukwirakwiza urumogi mu bakiriya be muri Karongi.

Yagize ati “Muhoza yafatiwe kuri bariyeri ya Polisi yari yashyizwe i Kamabuye mu muhanda Rubavu-Karongi. Yari ari mu mudoka itwara abagenzi mu buryo bwa rusange, abapolisi barayisaka bamusangana urwo rumogi yaruhishe mu gikapu cye arenzaho ibirayi.”

Muhoza amaze gufatwa yavuze ko urwo rumogi yari yaruguze ku mucuruzi warwo wo mu Karere ka Rubavu, na we yari agiye kurukwirakwiza mu bakiriya be muri Karongi.

CIP Karekezi yaburiye abantu bagikora ibyaha bijyanye n’ikoreshwa ry’ibiyobyabwenge, yakanguriye abaturage gukomeza ubufatanye na Polisi mu kurwanya ibiyobyabwenge binyuze mu gukwirakwiza amakuru.

Muhoza yahise ashyikirizwa Urwego rushinzwe Ubugenzacyaha (RIB) rukorera muri sitasiyo ya Polisi ya Kivumu kugira ngo hatangire iperereza.

Iteka rya Minisitiri nº 001/moh/2019 ryo ku wa 04/03/2019 rigena urutonde rw’ibiyobyabwenge n’ibyiciro byabyo rishyira ikiyobyabwenge cy’urumogi mu biyobyabwenge bihambaye.

Itegeko nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 263 ivuga ko Umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha.

Iyo abihamijwe n’urukiko ahanishwa igifungo cya burundu n’ihazabu y’Amafaranga y’u Rwanda arenze miliyoni makumyabiri (20.000.000 FRW) ariko atarenze miliyoni mirongo itatu (30.000.000 FRW) ku byerekeye ibiyobyabwenge bihambaye.