Category: Uncategorized

Ni umukino wari ukomeye, aho Cameroon yawinjiyemo nta mbaraga igaragaza, kuko igice cya mbere cy’umukino cyarangiye Burkina Faso itsinze ibitego 2-0, igice cya kabiri kigitangira itsinda icya 3, ikaba yari yamaze kwizera intsinzi, gusa si ko byayihiriye kuko mu gice cya kabiri cy’umukino ibintu byaje guhindura isura.

Cameroon yakiniraga imbere y’abafana bayo ndetse ari nayo yakiriye iyo mikino, yaje gukora amateka mu minota ya nyuma y’umukino, aho yakomeje gusatira ishaka kwishyura, ariko biyisaba gutegereza umunota wa 71, ibona igitego cya mbere cyatsinzwe na Stephane Bahoken.

Icyo gitego cyongereye imbara Cameroon, maze si ugukina isya itanzitse, bituma ku munota wa 85 ibona igitego cya kabiri cyatsinzwe na Vincent Aboubakar, ndetse uwo mukinnyi nyuma y’iminota ibiri gusa atsinda igitego cya gatatu.

Iminota 90 y’umukino yaje kurangira amakipe yombi anganya bitego 3-3, ari bwo haje kwiyambazwa penaliti kugira ngo hagaragare ikipe yegukana intsinzi.

Cameroon yaje kwitwara neza kuko yinjije penaliti zose eshanu (5) mu gihe Burkina Faso yatsinze penaliti eshatu (3) gusa, Cameroon yegukana umwanya wa gatatu ityo mu Gikombe cya Afurika 2021.

Kuri iki Cyumweru tariki 6 Gashyantare 2022, ni bwo hateganyijwe kuba umukino wa nyuma (Final), w’Igikombe cya Afurika 2021, uza guhuza Misiri na Senegal.

Ntawutifuza kubaho igihe kirekire cyangwa se kubona abe bose bamaranye imyaka myinshi cyane. Hari bimwe mu bintu dukora umunsi ku munsi bigaragazwa n'ubushakashatsi byagufasha kubaho igihe kirekire.

Bimwe mu byagufasha kubaho igihe kirekire nk'uko byatangajwe n’urubuga Healthline rutanga inama ku buzima:

1. Kugira inshuti musangira ubuzima busanzwe

Inshuti ni izigufasha mu buzima, zikagutabara mu byago, zikakuba hafi uri mu byishimo.

Ubushakashatsi bwakozwe n'ikigo cya Harvard ku byerekeye kwishima, bwasanze abantu bafite inshuti basangira byose ndetse bagafatanya muri byose, bishobora gufasha mu buzima no kukurinda kubaho wenyine, bityo bikaba byagufasha kubaho igihe kirekire. Ubu bushakashatsi kandi bwerekanye ko abantu batagira inshuti, bakunze gupfa imburagihe kubera kubaho bonyine.

2. Kwizera Imana

Burya ukwizera ugira, kugira uruhare mu gutuma urushaho kubaho iminsi myinshi. Aho waba usengera hose, cyangwa se uko waba wita Imana yawe kose, kwizera ko hariho umusumba byose uturinda ndetse akadufasha mu buzima bwa buri munsi burya bituma icyizere cyo kubaho kiyongera.

Abantu bizera Imana nk'uko byerekanwe n'ubushakashatsi bwakozwe, bagira ibyago biri hasi cyane byo kwibasirwa n'indwara z'umutima ndetse no kwicwa na kanseri.

N'ubwo benshi bashobora gucyeka ko kwizera atari ibintu byakongerera kubaho igihe kirekire, ariko imyizerere ndetse n'uburyo usengamo bigira uruhare runini mu mibereho ya buri munsi.

3. Kurya urusenda

Ibiryo birimo urusenda bishobora kongera igihe cyawe cyo kubaho. Urusenda rugira uruhare runini mu kurinda uturemangingo fatizo no kugabanya imfu.

4. Kwiyiriza

Kwiyiriza bifitiye akamaro kanini ubuzima bwacu. Byongerera ingufu urwungano rw'ubwirinzi bw'umubiri, bikagabanya ibyago byo kwibasirwa na kanseri, bikongera ubushobozi bwo gufata mu mutwe ndetse bikagabanya ibyago byo kwibasirwa n'indwara zizanwa n'ubusaza. Ibi byose bifasha mu kongera igihe cyo kubaho.

5. Gusoma ibitabo

Niba ushaka kubaho igihe kirekire, tangira usome ibitabo niba utajyaga ubikora. Ubushakashatsi bwakozwe bwerekana ko ugereranyije n'abadasoma ibitabo, abantu bakunda gusoma ibitabo igihe cyabo cyo kubaho kiyongeraho byibuze imyaka 2.

Abakunda gusoma ibitabo nk'uko bigaragazwa n'ubu bushakashatsi bwasohotse mu gitabo Social Science & Medicine, ntibakunze kwibasirwa n'imfu zidasobanutse.

Muri rusange, gukora ibi byose bizagufasha kubaho igihe kirekire no kubaho ubuzima wishimye. Abantu bishimye bakunze kubaho neza kandi igihe kirekire kurusha abahora barakaye cyangwa batishimye.

Mu rukerera rwo kuri uyu wa Gatandatu, tariki 5 Gashyantare 2022, ahagana saa kumi n’imwe z’igitondo nibwo UMUSEKE wamenye amakuru ko uyu mukecuru yagenderewe n’irondo ry’umwuga ry’Umurenge wa Gitega, aba bakaba bari baje bakurikira Abapolisi baje inshuro ebyiri kuri uyu wa Gatanu harimo n’abaje ahagana saa cyenda z’amanywa bari kumwe nabo kwikorera ibintu by’uyu mukecuru.

Mu kumenya byimbitse iki kibazo, UMUSEKE wageze aho uyu mukecuru arara hanze maze uhurirana n’uwabwiye uyu mukecuru ko yitwa Sibomana Richard ushinzwe Imiyoborere myiza mu Murenge wa Gitega, wavugaga ko aje kumva ikibazo cy’uyu mubyeyi nyuma y’uko abandi bayobozi bamubwiye ko aroga.

Gusa ariko biza kurangira nawe asa nk’umushyiraho igitutu , uyu mugabo yaje guhindura imvugo. Gusa ubuyobozi bw’Umurenge wa Gitega bwabwiye UMUSEKE ko Sibomana Richard atari umukozi w’uyu murenge.

Uwanyirigira Agnes aganira n’UMUSEKE, yavuze ko atewe agahinda no kubona ubuyobozi ntacyo bukora ku kibazo cye ngo areke kunyagiriwa hanze ahubwo bakitwikira ijoro baza kumutera ubwoba harimo n’Abapolisi baje bagatera ubwoba abana be adahari.

Yagize ati 'Ibyumweru bigiye kuba bibiri nyagirirwa aha. Nta muyobozi wigeze ungeraho ngo ampumurize ahubwo baraza bakentera ubwoba harimo n’Abapolisi baje ejo inshuro ebyiri, nahavuye nka saa tatu ubwo nkigenda nibwo bahise baza, mu kugaruka nimugoroba nabwo nsanga havuye abandi baje bitwaje n’abikorera ibintu, mu rukerera nka saa cyenda hafi saa kumi z’igitondo, imodoka y’Umurenge yaje yuzuye abanyerondo ngo baje kwikorera ibintu byanjye babijyane aho bankodeshereje.'

'Iyo nzu sinzi aho iherereye, nta muntu waje ati dore twagushakiye aho kuba. Ubu havuye umuntu ngo witwa Sibomana Richard ushinzwe imiyoborere myiza mu Murenge wa Gitega nawe mweretse ikibazo cyanjye ariwe uje ambwira ko ngo bashaka ko nava ku muhanda nkajya aho bankodeshereje.'

Uwiringiyimana Agnes avuga ko atigeze yigomeka ku cyemezo cy’urukiko, icyo akeneye n’ukurenganurwa akagumishwa mu nzu ye harimo n’inkurarwobo yahawe musaza we.

Akavuga ko nubwo uwo wavugaga ko avuye ku Murenge yamubajije kumwereka aho iyo nzu iherereye ariko bakanga kuhamubwira ngo urufunguzo rumaze iminsi rubitswe na Mudugudu.

Mu kumenya byinshi kubivugwa n’uyu mukecuru ko hari abarimo Abapolisi n’irondo baje kumutera ubwoba, UMUSEKE wegereye abaturanyi be maze bawuhamiriza ko aba Bapolisi baje kumanywa y’ihangu ndetse n’iri rondo ryahageze mu rukerera rwo kuri uyu wa Gatandatu.

Umwe muri bo yagize ati 'Twagiye kumva twumva umwana we avugije induru, turabyuka n’abatuye hano dusanga abanyerondo barimo bakurubana ibintu babishora epfo, maze abaturage tuvuza induru turakomera nibwo kubita bariruka basanga imodoka aho bari bayisize haruguru mu ikorosi. Mudugudu yatubwiye ko bagenzwaga no gutwara ibintu by’uyu mukecuru bakabijyana mu nzu bamukodeshereje.'

Yakomeje akomoza ku Bapolisi baje kwimura ibintu by’uyu mukecuru, ati 'Haje umudamu w’Umupolisi ari nawe wari uhagarariye abasenyaga basohora ibintu mu nzu, sinahegereye gusa yari kumwe n’undi wari ufite amanyenyeri menshi. Twahagaze hano iwacu nyuma yo kuvugana nabi n’umwana barikubuye baragenda, tubajije umwana atubwira ko bababwiraga ngo bahakure ibintu. Saa cyenda nibwo haje abandi bayobowe ngo n’uwitwa Kabera Eric yitwaje abakarani ariko nawe nyuma yo kutumvikana n’umwana w’umukecuru yasubiyeyo ariko n’ijoro nibwo twatunguwe n’induru itewe n’abanyerondo.'

Nubwo uyu mukecuru avuga ko nta muyobozi wamwengereye ngo amubwire iby’inzu yakodesherejwe ngo areke kunyagirirwa hanze, Umunyamabanga Nshingwabikorwa w’Umurenge wa Gitega, Mugambira Etienne, yabwiye UMUSEKE ko bamwegereye bakamubwira ko bamukodeshereje inzu ariko akinangira akanga kumva.

Ati 'Iby’abaza kumutera ubwoba ntabyo tuzi, ariko twe turimo tumugira inama ko atagakwiye kunyagirirwa hanze, ni umunyarwanda ntabwo twifuza gutakaza umuntu kuko turi mu bihe by’imvura atazavaho atwarwa n’umuvu. Inzu twarayikodesheje irahari igisigaye nuko we afata icyemezo akayijyamo, twaramwegereye araganirizwa inshuro nyinshi ariko aracyatsimbaraye ko aho ari ariwe kandi siwe.'

Mugambira Etienne, akomeza avuga ko ntawigeze aza kumutera ubwoba, agahakana ko Sibomana Richard atari umukozi w’Umurenge wa Gitega ushinzwe imiyoborere myiza nk’uko uyu mugabo yari yabwiye uyu mukecuru.

Yagize ati 'Sibomana Richard si umukozi w’Umurenge wa Gitega. Irondo ry’umwuga rikora amasaha yose kandi rigomba kubungabunga umutekano, umubyeyi ari mu muhanda rero abanyerondo baba bahagendagenda bashobora kuba bababonye bakagirango baje kugira icyo bababwira. Icyo tumubwira nuko yava hariya.'

Uwanyirigira Agnes nyuma yo gusohorwa mu nzu, ahangayikishijwe n’abakomeje kuza kumutera ubwoba

Ikibazo cy’uyu mukecuru kikaba cyarafashe indi ntera ubwo ku wa 24 Mutarama 2022 umuhesha w’inkiko yamusohoraga mu nzu ku ngufu, ubuyobozi bukavuga ko byakozwe nyuma y’uko Uwanyirigira Agnes yanze kubaha ibyemezo by’urukiko.

Icyemezo cy’urukiko UMUSEKE weretswe, kivuga ko umutungo uri muri parcelle numero 46 na 162 wa Rwankesha ufite agaciro ka miliyoni zigera kuri 30 Frw, bine bya gatatu byahawe Sebera Jean Paul, Sebera Victor, Sebera Marie Paul na Sebera Herve Benoit bakabihabwa mu rwego rw’umwana wa Rwankesha witwa Uwanyirigira Suzanne.

Abanyerondo bitwikiriye ijoro baza gutwara ibintu aho bimaze ibyumweru bibiri binyagirirwa

Ni mu gihe urukiko rwari rwemeje ko Munyabugingo Isaac na mushiki we Uwanyirigira Agnes bahabwa kimwe cya gatanu kingana na miliyoni zirenga eshanu ariko 1/5 habariwemo inzu y’itegura Munyabugingo Isaac yahawe nk’inkuracyobo.

Gusa uyu mukecuru bashatse kumuha amafaranga y’u Rwanda arenga miliyoni eshanu nk’uko urukiko rwari rwahaye agaciro kimwe cya gatanu cya Uwanyirigira na Munyabugingo. Ibintu umukecuru adakozwa kuko urukiko rutanzuye ko ahabwa amafaranga ahubwo rwategetseko ahabwa kimwe cya gatanu cy’umutungo.

Nubwo ubuyobozi buvuga ko n’aya mafaranga yayahawe, we avuga ko ntayo yigeze ahabwa kuko ubwe yabyemereye imbere y’urukiko ko atayafata nyuma yo kwanga gutanga konti ashyirwaho.