Webrwanda Backend

Category: Uncategorized

  • Muri Gashyantare 2022 ibiciro ku isoko byiyongereyeho 5.8% #Rwanda #RwOT via @kigalitoday #rwanda #RwOT

    NISR yatangaje ko ibiciro mu mijyi byiyongereyeho 5.8% muri Gashyantare 2022 ugereranyije na Gashyantare 2021. Ni mu gihe ihinduka ry’ibiciro muri Mutarama 2022, ryari ku kigereranyo cya 4.3%.

    Bimwe mu byatumye ibiciro byiyongeraho 5.8% muri Gashyantare ni ibiciro by’ibiribwa n’ibinyobwa bidasembuye byiyongereyeho 7.9%, iby’ibijyanye n’ubwikorezi byiyongereyeho 4.8%, iby’amazu, amazi, amashanyarazi, gaz n’ibindi bicanwa byiyongereyeho 4.5%.

    Icyo cyegeranyo kigaragaza ko iyo ugereranyije Gashyantare 2022 na Gashyantare 2021, usanga ibiciro by’ibintu bitarimo ibiribwa n’ibikomoka ku ngufu byariyongereyeho 5.3%, wagereranya Gashyantare 2022 na Mutarama 2022, ibiciro byiyongereyeho 1.8%.

    NISR ikomeza kivuga ko 'Iryo zamuka ahanini ryatewe n’ibiciro by’ibiribwa n’ibinyobwa bidasembuye byiyongereyeho 3.7% n’ibiciro by’amazu, amazi, amashanyarazi, gazi n’ibindi bicanwa byiyongereyeho 2%.'

    Muri icyo cyegeranyo, NISR igaragaza ko imiterere y’ibiciro mu byaro muri Gashyantare 2022, byazamutseho 3.1% ugereranyije na Gashyantare 2021. Ni mu gihe ihinduka ry’ibiciro mu byaro muri Mutarama 2022, ryari ku kigereranyo kingana na -0.8%.

    Bimwe mu byatumye ibiciro bizamukaho 31% mu kwezi kwa Gashyantare ni ibiciro by’ibinyobwa bisembuye n’itabi byiyongereyeho 4.9% n’ibiciro by’amazu, amazi, amashanyarazi, gaze n’ibindi bicanwa byiyongereyeho 16.3%.

    Ugereranyije Gashyantare 2022 na Mutarama 2022, ibiciro byiyongereyeho 4.5%. Iryo zamuka ahanini ryatewe n’ibiciro by’ibiribwa n’ibinyobwa bidasembuye byiyongereyeho 5%, n’ibiciro by’amazu, amazi, amashanyarazi, gaz n’ibindi bicanwa byiyongereyeho 9.4%.

    Icyegeranyo cy’ikigo cy’igihugu gishinzwe ibarurishamibare gisoza kigaragaza ko ibiciro bikomatanyijwe mu mijyi no mu byaro muri Gashyantare 2022, ibiciro mu Rwanda byiyongereyeho 4.2% ugereranyije na Gashyantare 2021. Ni mu gihe ihindagurika ry’ibiciro mu Rwanda muri Mutarama 2022 ryari ku kigereranyo kingana na 1.3%.

    Bimwe mu byatumye ibiciro byiyongeraho 4,2% mu kwezi kwa Gashyantare 2022, ni ibiciro by’amazu, amazi, amashanyarazi, gaz n’ibindi bicanwa byiyongereyeho 10,9% n’ibiciro by’ibikoresho byo mu nzu, isuku no gusana byiyongereyeho 12.3%.

    NISR igaragaza ko iyo ugereranyije Gashyantare 2022 na Mutarama 2022 ibiciro byiyongereyeho 3,3%. Iryo zamuka ahanini ryatewe n’ibiciro by’ibiribwa n’ibinyobwa bidasembuye byiyongereyeho 4.6%, n’ibiciro by’amazu, amazi, amashanyarazi, gaz n’ibindi bicanwa byiyongereyeho 6,1%.

    Source : https://www.kigalitoday.com/amakuru/amakuru-mu-rwanda/article/muri-gashyantare-2022-ibiciro-ku-isoko-byiyongereyeho-5-8

  • Mu magambo y'urukundo ! Umugore wa rutahizamu w'Amavubi yifurije isabukuru nziza y'amavuko umugabo we #rwanda #RwOT

    Nyangabire Francine, umugore wa rutahizamu wa Police FC n'Amavubi, Danny Usengimana yamufashije kwizihiza isabukuru mu magambo meza y'urukundo aryoheye amatwi asaba kutazabatandukanye bakibanira ubuziraherezo.

    Buri tariki ya 10 Werurwe, Danny Usengimana yizihiza isabukuru ye y'amavuko yishimira igihe amaze ku Isi.

    Ni ku nshuro ya kabiri yizihije isabukuru ye ari umugabo yarashatse umugore.

    Umugore we abinyujije ku rukuta rwe rwa Instagram, yamwifurije isabukuru nziza asaba Imana kuzagumya kubafasha bakibanira ubuziraherezo.

    Ati “Imana ntizadutandukanye dukomeze guhuza imitima. Isabukuru mugabo wanjye, ndagukunda mukundwa. Nizera ko inzozi zawe zose zizaba impamo! Nzagukunda ubuziraherezo mugabo wanjye.”

    Nyangabire Francine usanzwe uba muri Canada yakoze ubukwe na Danny Usengimana ku wa Kane tariki ya 10 Ukuboza 2020, umuhango wo gusaba no gukwa ukaba warabereye Kicukiro mu murenge wa Niboye kuri Rainbow Hotel, nyuma abatumiwe ni naho bakiriwe.

    Kuri uwo munsi kandi ni nabwo basezeranye imbere y'amategeko mu murenge wa Niboye Kicukiro.

    Danny Usengimana yakiniye amakipe atandukanye, yigiye umupira mu ishuri ry'Isonga, akinira Police FC kuva 2015 aho batandukanye muri 2017 yerekeza muri Tanzania mu ikipe ya Singida United, mu ntangiriro za 2019 ni bwo yerekanywe nk'umukinnyi wa APR FC batandukanye umwaka ushize asubira muri Police FC yahozemo ari nayo agikinira kugeza uyu munsi.

    Source : https://umuryango.rw/imyidagaduro/article/mu-magambo-y-urukundo-umugore-wa-rutahizamu-w-amavubi-yifurije-isabukuru-nziza

  • Kim Kardashian yararitse abafana be inkuru y’urukundo rwe na Pete Davidson yasimbuje Kanye West – YEGOB #rwanda #RwOT

    Umunyamideli Kim Kardashian uri mu rukundo n'umunyarwenya ukomeye muri America, yararikiye abafana be kuzakurikira ikiganiro 'The Kardashian' azaba atangazamo inkuru y'urukundo rwe rushya.

    Kim Kardashian wahoze ari umugore wa Kanye West yagiranye ikiganiro na Variety, avuga ko mu kiganiro The Kardashians kinyura kuri Hulu ariho azavugira byinshi ku rukundo rwe na Pete Davidson.

    Yatangaje ko muri icyo kiganiro azavugamo ubuzima bw'urukundo rwe na Pete Davidson ndetse ngo icyo kiganiro abafana be bacyitege vuba aha nyuma y'ikizatambuka mu minsi iri imbere.

    Mu kiganiro nyir'izina azavugamo iby'urukundo rwe na Pete Davidson, inzira byanyuzemo ngo bakundane ndetse n'ibindi byinshi abantu bibaza kuri bo.

    Urukundo rwa Kim Kardashian na Pete Davidson rwatangiye kuvugwa mu mpera z'umwaka ushize ndetse bitangira kuba kimomo ubwo aba bombi basomanaga mu kiganiro kitwa Saturday Night Live [SNL], ikindi kandi batangiye no kugenda basohokana ahantu hagiye hatandukanye.

    Kim Kardashian afitanye abana bane na Kanye West bahoze babana, barimo abakobwa babiri: North w'imyaka umunani na Chicago ufite itatu n'igice. Hari kandi abahungu barimo: Saint, ufite itanu n'igice na Psalm ufite imyaka ibiri.

    Muri Gashyantare 2021 ni bwo uyu muraperi na Kim Kardashian bahisemo kwaka gatanya. Mu gihe hashize iminsi mike Kim Kardashian agizwe ingaragu n'urukiko nyuma y'igihe kinini abisaba.

    Source : https://yegob.rw/kim-kardashian-yararitse-abafana-be-inkuru-yurukundo-rwe-na-pete-davidson-yasimbuje-kanye-west/

  • Bombori bombori mu ruganda rwa mbere rwatunganyaga zahabu mu Rwanda,Leta yashyizwe mu majwi #rwanda #RwOT

    Amakuru yizewe ni uko urwo ruganda rutagikora kuko umushoramari Alain Goetz ufite izindi nganda nk’izo zirimo Aldabra, yakuyemo ake karenge mu gihe yari afitemo imigabane ingana na 50 %.

    Aldango Ltd yatangiye gukora mu 2017 nyuma y’amasezerano yasinywe tariki 23 Gashyantare 2017. Alain Goetz na Sosiyete Ngali Holdings buri umwe yari ifitemo imigabane ya 50 %.

    Yatangiye ari sosiyete icuruza zahabu bisanzwe ariko ku busabe bwa Guverinoma y’u Rwanda iyo sosiyete yaje kubaka uruganda, kugira ngo aho kujyana zahabu ku masoko yo mu mahanga idatunganyije rubanze ruyitunganyirize.

    Uruganda rwafunguye imiryango muri Kamena 2019, rutangira rutunganya zahabu, ruyipima, rukayishongesha, ikayungururwa rukayikorera ibyangombwa byose ku buryo ijya ku isoko mpuzamahanga ikaba yakoreshwa mu nganda zikora imikufi, imidali, igashyirwa mu bubiko bw’amabanki n’ibindi.

    Nubwo rwari rwitezweho ibitangaza, si ko byaje kugenda kuko hashize amezi make, rwatangiye kutumvikana n’inzego zishinzwe imisoro mu gihugu, kubera kutishyurira ku gihe.

    Bivugwa ko uru ruganda rwari rufite ubushobozi bwo gutunganya nibura ibilo 480 bya zahabu mu masaha 30.

    Hari makuru avuga ko mu mpera za 2019, urwo ruganda rwari rugezemo imisoro n’ibirarane bya miliyari 113 Frw yo guhera mu 2017.

    Ikigo cy’Imisoro n’Amahoro cyagerageje kwegera ubuyobozi bw’uruganda ngo bwishyure, ariko umushoramari Goetz akavuga ko adashobora kwishyura imisoro, ngo kuko ubwo yemererwaga gukorera mu Rwanda yasonewe.

    Uwo mushoramari yasabwe kwerekana inyandiko n’ibyangombwa ashingiraho avuga ko yasonewe imisoro arabibura, biba ngombwa ko ikibazo kizamurwa kigezwa mu nkiko.

    Hari andi makuru avuga ko uwo mushoramari ashobora kuba yarivangaga mu bucuruzi bw’amabuye y’agaciro bwa magendu, bikaza kumenyekana kandi bigashyira icyasha ku Rwanda.

    Tariki 27 Mutarama 2021, Guverinoma y’u Rwanda yahagaritse burundu icyangombwa cya Aldango kiyemerera kohereza hanze zahabu yatunganyirijwe mu Rwanda.

    Mu nkiko naho, hemejewe ko imitungo y’iyo sosiyete igurishwa hakishyurwa imisoro uruganda rutishyuye, nubwo IGIHE dukesha iyi nkuru itabashije kubona inyandiko z’urukiko zigaragaza uko urubanza rwose rwagenze.

    Ku rubuga rwa Aldango, hariho itangazo uhingukiraho aho umushoramari agaragaza ko atishimiye ibyemezo byafatiwe uruganda rwe.

    Agaragaza ko bimwe mu byo yijejwe mbere yo gufata icyemezo cyo gushinga uruganda mu Rwanda bitubahirijwe. Yavuze ko hari nk’aho yari yemerewe 'gusonerwa imisoro kuko intego nyamukuru ya Aldango ari ukongerera agaciro ibikorerwa mu Rwanda.'

    Umushoramari Goetz avuga ko yarenganyijwe na Guverinoma y’u Rwanda kandi ko azakomeza kujuririra icyo cyemezo kuko ifite ibimenyetso simusiga.

    Umwe mu bazi neza iby’iki kibazo utifuje ko izina rye ritangazwa, yavuze ko Goetz yari yarinangiye cyane.

    Ati 'Imisoro yari imaze kuba myinshi cyane, kugeza ubwo RRA imukuriraho amande ariko nabwo biranga. Byageze aho bamanutse bajya no kureba umutungo wa Aldango, barabarura.'

    Amakuru ahari ni uko umushoramari Goetz ashobora kuba yaragannye inkiko mpuzamahanga zo mu Bufaransa kugira ngo zimurenganure.

    Twagerageje kuvugana na RRA kuri iki kibazo ariko ntibyadukundira kugeza ubwo twasohoraga iyi nkuru.

    Source : http://www.ukwezi.rw/1-1/Amakuru-anyuranye/article/Bombori-bombori-mu-ruganda-rwa-mbere-rwatunganyaga-zahabu-mu-Rwanda-Leta-yashyizwe-mu-majwi

  • Ni byose! Ni perezida akaba n’umutoza, muri Gasogi United ibintu si shyashya #rwanda #RwOT

    Ntabwo ibintu byifashe neza mu ikipe y’umuherwe Kakooza Nkuriza Charles [KNC], ni nyuma yo kugenda itakaza imikino imwe n’imwe bitari ngombwa, uyu musaruro nkene wose ushyirwa ku mutwe w’umuyobozi w’iyi kipe nka nyirabayazana.

    Amakuru ISIMBI yamenye ni uko yaba abakinnyi, abatoza bayifite kugeza ubu batishimiye uburyo iyobowemo kuko perezida wayo adatuma buri umwe akora akazi ke ahubwo inshingano zose ari we uzikorera bigatuma byinshi bipfa.

    Icya mbere uyu muyobozi ashinjwa kuvangira abatoza be, nubwo baba bari ku kibuga batoza ariko baba bameze nka gakingirizo, kuko ibyemezo byose ari KNC ubifata kabone n’iyo atari muri Stade yumva umupira kuri radio ahamagara akababwira ibyo bakora.

    Nko ku mukino batsinzwemo na APR FC 2-0, umwe mu bakinnyi yiganirira n’umunyamakuru bisanzwe (ntabwo byari interview), yagize ati 'none se umuntu azashaka gukora ibintu byose, bariya batoza baba bari hariya hari icyo bakora? Nta cyemezo bafata ni we ubifata, arahamagara ngo mushyiremo runaka, niyo atareba umukino awumva kuri Radio nabwo afata ibyemezo akurikije ibyo yumva, ntabwo twatsinda bimeze gutya.'

    Ibi bikaba byiyongera ku kuba umuyobozi w’iyi kipe KNC, yarahagaritse umutoza mukuru Guy Bukasa, amakuru akaba avuga ko bapfuye ko uyu mutoza atumva ibyo abwirwa n’umuyobozi we cyane cyane ku bijyanye n’abakinnyi agomba gukinisha.

    Iyi kipe ikaba imaze iminsi itozwa n’umutoza Shabani ari we wayisigaranye, na we bivugwa ko nta cyemezo ajya yifatira nk’umutoza ahubwo abwirwa abakinnyi agomba gukinisha.

    Mu mikino 5 iheruka Gasogi United yatsinzemo imikino 2 itsindwa imikino.

    Si ubwa mbere KNC avuzweho kuvangira abatoza be kuko no mpera za 2020 yatandukanye n’umutoza Cassa Mbungo Andre nyuma y’uko uyu mutoza yanze ko uyu muyobozi amwereka uburyo azajya akinisha iyi kipe n’abakinnyi azajya akinisha.

    KNC ashinjwa imyitwarire mibi ya Gasogi United muri iyi minsi

    Gasogi United ntabwo ibintu byifashe neza

    Source : http://isimbi.rw/siporo/article/ni-byose-ni-perezida-akaba-n-umutoza-muri-gasogi-united-ibintu-si-shyashya

  • Ndimbati yatawe muri yombi….Umukobwa yateye inda y’impanga #rwanda #RwOT

    Amakuru ahamya ko Uwihoreye yatawe muri yombi kuri uyu wa 10 Werurwe 2022.

    Ni amakuru twahamirijwe n’Umuvugizi wa RIB, Dr. Murangira B. Thierry, yagize ati 'RIB yafashe umugabo witwa Uwihoreye Jean Bosco uzwi nka Ndimbati w’imyaka 51 acyekwaho icyaha cyo gusambanya umwana.'

    Yavuze ko Ndimbati ubu afungiye kuri Sitasiyo ya RIB ya Rwezamenyo mu gihe hagikomeje iperereza kugira ngo hakorwe dosiye ishyikirizwe Ubushinjacyaha.

    Ndimbati yatawe muri yombi nyuma y’amakuru amaze iminsi aca ku mbuga nkoranyambaga agaragaza umugore uhamya ko yabyaranye na we impanga n’uyu mugabo ariko akaba yaranze kwita ku nshingano zo kurera abo bana.

    Uyu mukobwa avuga ko yasambanyijwe na Ndimbati yabanje kumusindisha ndetse icyo gihe yari atarageza imyaka y’ubukure.

    IGIHE yamenye ko nyuma y’amakuru yatangajwe mu itangazamakuru ko Ndimbati yasambanyije umwana yari yatangiye gushaka uko atoroka.

    RIB yaboneyeho gutanga ubutumwa busaba abantu kwirinda icyaha cyo gusambanya abana, yitsa by’umwihariko ku bafite amazina akomeye mu myidagaduro yo mu Rwanda.

    Umuvugiz wa RIB, Dr Murangira Thierry, yagize ati 'RIB irihanangiriza abantu bose bafite umugambi wo gusambanya abana ko bitazabahira. Nibabivemo rwose kuko iki cyaha gitera ingaruka ku mpande zombi.'

    Yanihanangirije abafite amazina akomeye bakomeje kugaragara muri ibi byaha. Ati 'Uyu ni umwanya mwiza wo kwibutsa abantu bose bafite iyo migambi ko nta rwitwazo rubaho rwo kuvuga ngo umwana mwumvikanye, ni we wizanye mu nzu yawe, ko igihe byabaga atigeze atabaza cyangwa ngo yagaragaraga nk’umuntu mukuru. Umwana ni umwana yemera, atemera ntibizakubuza guhanwa kuko kwemera k’umwana nta gaciro bifite.'

    Ati 'Turasaba abantu bose kurwanya ibi byaha byo gusambanya umwana, turasaba abahanzi gushyiramo uwabo musanzu mu kwamagana ibyaha byo gusambanya abana. Um-star mwiza arangwa no kuba icyitegererezo cyiza muri rubanda akimika ibyiza, uwishora mu byaha byo gusambanya abana bakaba ibyago muri rubanda.'

    Ndimbati yubatse izina muri Sinema Nyarwanda, by’umwihariko akaba azwi muri filime y’uruhererekane ya Papa Sava.

    Ivomo:Igihe

    Source : http://www.ukwezi.rw/1-1/Amakuru-anyuranye/article/Ndimbati-yatawe-muri-yombi-Umukobwa-yateye-inda-y-impanga

  • Ferwafa yamenyesheje Mashami Vincent ko atakiri umutoza w’Amavubi #Rwanda #RwOT via @kigalitoday #rwanda #RwOT

    Nyuma yo gusoza amasezerano ye mu ntangiriro z’uku kwezi, umutoza Mashami Vincent kumenyeshwa ko atazongererwa amasezerano yo gutoza ikipe y’igihugu y’u Rwanda Amavubi.

    Mashami Vincent ntakiri umutoza w

    Mashami Vincent ntakiri umutoza w’Amavubi

    Tariki 03/03/2021, ni bwo FERWAFA yari yatangaje ko Mashami Vincent ari we ugomba gukomeza gutoza Amavubi aho yari yasinye amasezerano y’umwaka umwe, aho mu nshingano yari yahawe kugeza Ikipe y’Igihugu mu mikino ya kamparampaka yo gushaka itike y’igikombe cy’Isi cya 2022.

    Mu ibaruwa yandikiwe na Ferwafa kuri uyu wa Kane tariki 10/03/2022, yashimiwe akazi yakoze mu ikipe y’igihugu, akaba yemerewe kuba yakwishakira akandi kazi.

    Ferwafa ibinyujije ku rubuga rwa Twitter yagize iti “FERWAFA iramenyesha abakunzi b’umupira w’amaguru ko amasezerano y’uwari umutoza Mukuru w’ikipe y’igihugu nkuru Bwana Mashami Vincent atazongerwa nyuma yo kurangira Tariki 02/03/2022, ibirebana no gushaka no gushyiraho undi mutoza mukuru bizatangazwa mu gihe cya vuba.”

    “Turashimira Umutoza Mashami Vincent byinshi yakoze mu gihe cye cy’amasezerano,ubu akaba atongerewe. Turamwifuriza imirimo myiza n’amahirwe mu mwuga we wo gutoza umupira w’Amaguru. Murakoze.”

    Source : https://www.kigalitoday.com/imikino-11/football/article/ferwafa-yamenyesheje-mashami-vincent-ko-atakiri-umutoza-w-amavubi

  • Icyifuzo cya Pologne cyo koherereza Indege z'intambara Ukraine cyashyuhije umutwe US na NATO #rwanda #RwOT

    Kuwa kane saa kumi n'ebyiri za mu gitondo i Kyiv (isaha imwe n'i Kigali) intabaza ziburira ibisasu zongeye kuvuzwa ngo abantu bikinge ibisasu by'abarusiya byaramutse biraswa ku murwa mukuru.

    Uyu ni umunsi wa 15 w'intambara ikomeje muri Ukraine irangwa ahanini n'ibitero by'indege no kurasa imizinga ku mijyi itandukanye.

    Aya ni amwe mu makuru y'ingenze yo mu masaha 12 ashize;

    Kamala Harris US muri Pologne

    Visi perezida wa Amerika Kamala Harris yageze i Warsaw muri Pologne kugira ngo avugane imbonankubone n'abategetsi baho ku cyifuzo cyo koherereza Ukraine indege z'intambara.

    Iyi ngingo yagaragaje kutumvikana kuri mu bihugu bigize ishyirahamwe ry'ibihugu ryo gutabarana rya OTN/NATO.

    Kuwa kabiri Pologne yasabye Amerika ko yatanga indege 20 zayo za MiG-29 zigahagurukira ku kibuga cya gisirikare cya Amerika kiri mu Budage zijya muri Ukraine, ibyo abanyamerika banze.

    Kare uyu munsi kuwa kane, minisiteri y'ingabo za Amerika yarushijeho guhakana, ivuga ko ibyo “biteye impungenge zikomeye” zo gutuma intambara yaguka.

    Bamwe mu bategetsi muri NATO, bafite ubwoba ko Uburusiya bwafata koherereza indege Ukraine, zivuye muri Pologne cyangwa mu Budage, nk'igitero cya NATO ku Burusiya.

    Bimwe mu bihugu bigize OTAN ariko byaba bitekereza ko nubwo Ukraine itari muri uyu muryango ikwiye gutabarwa mu buryo bwose nk'uko nayo ikomeje kubisaba.

    Biteganyijwe ko Kamala Harris ahura na perezida Andrzej Duda wa Pologne, na minisitiri w'intebe Justin Trudeau wa Canada nawe uri mu ruzinduko muri Pologne.

    Kuki indege Polonge iri gutanga ziteye impungenge NATO?

    Izo ndege, zatwarwa n'abapilote ba Ukraine, byashoboka ko zinywera amavuta kandi zigahabwa intwaro ku kigo kinini cy'ingabo zo mu kirere za Amerika kitwa Ramstein airbase kiri mu Budage, cyangwa mu kindi gihugu kiri muri Nato cyegereye Ukraine.

    Ibi ni ibivugwa na Marc Weller wigisha amategeko mpuzamahanga muri Kaminuza ya Cambridge.

    Yongeraho ko, nk'igihugu cyatewe Ukraine ifite uburenganzira bwo kwirengera. Ko mu buryo bwemewe n'amategeko ishobora kwakira ibikoresho bya gisirikare ngo yirinde.

    Ndetse ko ishobora gusaba OTAN kwinjira mu mirwano ikabafasha, cyangwa igashyira mu bikorwa gufunga ikirere cya Ukraine.

    Ati: “Ariko Moscow nayo ibona ibitero kuri Ukraine nko kwirwanaho kubera gusatirwa na NATO gusa ikavuga ko iri abantu bo mu bwoko bw'abarusiya bageramiwe no gukorerwa jenoside mu burasirazuba bwa Ukraine.

    “Kwinjira uko ariko kose muri iyi ntambara kw'amahanga kuzafatwa na Kremlin nk'igitero cy'intambara kuri bo.”

    Marc Weller avuga ko kugeza ubu Moscow yihanganiye kuba iburengerazuba baroherereje Ukraine intwaro zisanzwe, ariko ko kuyoherereza indege z'intambara “byaba ari intera ikomeye yo gutuma abarusiya nabo bahita basubiza” OTAN.

    Lavrov na Kuleba bageze muri Turkiya kuganira
    Ba minisitiri b'ububanyi n'amahanga Sergei Lavrov w'Uburusiya na Dmytro Kuleba wa Ukraine bose kuwa gatatu bageze muri Turkiya aho biteganyijwe ko batangira ibiganiro byo gushaka amahoro.

    Ibiganiro byabo biraba none kuwa kane mu mujyi wa Antalya ku butumire bwa minisitiri w'ububanyi n'amahanga wa Turkiya Mevlut Cavusoglu.

    Ibi biganiro nibyo bya mbere bihuje abakuru b'ububanyi n'amahanga kuva Uburusiya bwatera Ukraine mu byumweru bibiri bishize.

    Andi makuru

    Abategetsi muri White House batangaje ko Uburusiya bushobora gukoresha intwaro z'ubumara (chemical and biological weapons) mu bitero ku basivile mu minsi iri imbere.

    Ni nyuma y'uko kuwa gatatu minisiteri y'ingabo y'Uburusiya nayo yatangaje ko ingabo za Ukraine zajyanye toni 80 za ammonia (ikorwamo bene izo ntwaro) mu mujyi wa Kharkiv.

    Perezida wa Ukraine we akomeje gusaba ibihugu by'iburengerazuba gufunga ikirere cya Ukraine, mu gihe yerekanaga amashusho y'igitero avuga ko abarusiya bagabye ku bitaro by'abasivile mu mujyi wa Mariupol.

    Abategetsi ba Ukraine basabye kompanyi zindi zikomeye zirenga 50 zigikorera mu Burusiya guhagarika ibikorwa byazo, izo zirimo Johnson & Johnson ikora imiti, Bridgestone, Yokohama na Pirelli zikora amapine, gusa zimwe muzo bavuze nka Nestle na Sony zo zahise zibikora.

    Source : https://umuryango.rw/amakuru/mu-mahanga/umutekano/article/icyifuzo-cya-pologne-cyo-koherereza-indege-z-intambara-ukraine-cyashyuhije

  • Ubwicanyi bwagizwe ibanga muri FLN : Gen Jeva yaba yarivuganye Lt Col Guado #rwanda #RwOT

    Abatangabuhamya barimo uwahoze akuriye ubutasi muri uyu mutwe wa CNRD/FLN harimo Col Kanyoni ubarizwa mu gihugu cya Uganda yabwiye isoko ya Rwandatribune iri Kampala ko ijwi yumvise atari irya Nyakwigendera Col Rusanganwa Guado. Yagize ati :'Nzineza ijwi rya Col Guado kuko ni umusilikare nayoboye igihe kinini.'

    Undi mutangabuhamya wo wahoze afite ipeti rya Jenerali wahoze muri FLN akaba abarizwa i Lusaka muri Zambia wifuje ko amazina ye atatangazwa ,yahamirije isoko ya Rwandatribune ko ijwi yumvise kuri Radio Ubwiyunge atari irya Col.Guado ko ahubwo amakuru bafite ari uko uwo musilikare yishwe agahambwa ahitwa mu Rushihe, Akaba yarazize amakimbirane yari afitanye na Gen Jeva ibi bikaba birigukorwa na Jeva kugirango asisibiranye urupfu rw’uwo mu koloneri.

    Col.Rusanganwa akaba yarafashwe n’umutwe wa CRAP ya FLN ikuriwe na Lt.Col Appoinaire ,ubwo yari mu bukangurambaga bw’umutwe yashinze afatanije na Twagiramungu Faustin afatirwa muri Komini Rugombo,mu Ntara ya Cibitoki ahitwa azanwa mu ishyamba rya Kibira ari naho yaje kwicirwa.

    Urupfu rwa Col Guado rwaje rukurikirana n’itoroka ry’uwari Komanda wungirije wa Etat Majoro Gen Bemba Bahizi wabarizwaga muri Gurupoma ya Itombwe mu gihe kandi ni ku rwego rwa politiki rw’uyu mutwe harimo ibibazo by’abari bagize Komite nshingwabikorwa bakuriwe na Hategekimana Felicien baherutse kwirukanwa.

    Source : http://www.ukwezi.rw/Mu-mahanga/Amakuru-anyuranye/article/Ubwicanyi-bwagizwe-ibanga-muri-FLN-Gen-Jeva-yaba-yarivuganye-Lt-Col-Guado

  • Ndimbati ari mu maboko ya RIB #rwanda #RwOT

    Uwihoreye Jean Bosco uzwi nka Ndimbati yatawe muri yombi kuri uyu wa 10 Werurwe 2022.

    Umuvugizi wa RIB, Dr. Murangira B. Thierry, yamirije aya makuru IGIHE ati 'RIB yafashe umugabo witwa Uwihoreye Jean Bosco uzwi nka Ndimbati w'imyaka 51 acyekwaho icyaha cyo gusambanya umwana.'

    Yavuze ko Ndimbati ubu afungiye kuri Sitasiyo ya RIB ya Rwezamenyo mu gihe hagikomeje iperereza kugira ngo hakorwe dosiye ishyikirizwe Ubushinjacyaha.

    Ndimbati yatawe muri yombi nyuma y'amakuru amaze iminsi aca ku mbuga nkoranyambaga agaragaza umugore uhamya ko yabyaranye na we impanga n'uyu mugabo ariko akaba yaranze kwita ku nshingano zo kurera abo bana.

    Uyu mukobwa avuga ko yasambanyijwe na Ndimbati yabanje kumusindisha ndetse icyo gihe yari atarageza imyaka y'ubukure.

    Ndimbati yubatse izina muri Sinema Nyarwanda, by'umwihariko akaba azwi muri filime y'uruhererekane ya Papa Sava.

    The post Ndimbati ari mu maboko ya RIB appeared first on IRIBA NEWS.

    Source : https://iribanews.rw/2022/03/10/ndimbati-ari-mu-maboko-ya-rib/