Category: Uncategorized

Mu magambo yuzuye amarangamutima n'agahinda kavanze n'urukundo, Jordan Henderson yagaragaje ko urwibutso rwa Diogo Jota ruzahora mu mitima ya benshi, by'umwihariko abo bakinanye umupira w'amaguru. Mu mukino wabaye uherutse, Henderson yatsinze igitego kidasanzwe, maze ahita avuga ko cyari igitego yahariye inshuti ye n'umukinnyi bakundanye cyane mu ikipe imwe, Diogo Jota.

Yagize ati: 'Tuzahora tumwibuka. Nta na rimwe tuzamwibagirwa. Igitego cyanjye cya mbere cyagombaga kuba icye. Ntabwo nzi gutsinda ibitego byinshi, ariko iki cyari icye.' Aya magambo yagaragaje uko umutima we wari wuzuye amarangamutima, ashimangira ko n'ubwo Jota atakiri kumwe na bo mu kibuga, akiri mu mitima yabo.

Diogo Jota yari umukinnyi wihariye, utararanzwe gusa n'impano idasanzwe mu mupira w'amaguru, ahubwo n'ubumuntu, ubunyangamugayo n'urukundo yagiraga ku bandi. Yari umuntu woroshye, wicisha bugufi, kandi wahoraga ashaka gutera imbere bagenzi be. Abakinnyi benshi bamubonagamo inshuti, n'umuvandimwe.

Igitego Henderson yatsinze cyabaye nk'ikimenyetso cy'uko urwibutso rwa Jota ruzahoraho iteka. Abafana, abakinnyi n'abakunzi b'umupira w'amaguru bose bagaragaje ko batamwibagiwe, binyuze mu marangamutima bakmeje kugaragaje n'amagambo yuzuye urukundo.

Jordan Henderson ati: 'Diogo Jota azahora yibukwa nk'intwari y'umupira w'amaguru, kandi izina rye rizahora rihamagarwa n'abamukundaga bose. Mu by'ukuri, ni Diogo Jota ni 'Uwibihe byose'.

Source : https://kasukumedia.com/jordan-henderson-yibukije-abafana-ba-diogo-jota-nyuma-yo-gutsinda-igitego/

Umuhanzi w'icyamamare ukomoka muri Nigeria, Kizz Daniel, yongeye kuvugisha benshi nyuma yo kugaragaza ibyishimo byihariye we n'umuryango we bagize muri iyi minsi isoza umwaka. Uyu muhanzi yatangaje ko baguze inzu iherereye ku kirwa cya Zanzibar muri Tanzania, igiye kujya iba ahantu hihariye ho kwizihiriza iminsi mikuru, cyane cyane Noheri.

Ibi Kizz Daniel yabigarutseho abinyujije ku mbuga nkoranyambaga, aho yasangije abakunzi be amafoto n'amagambo agaragaza ibyishimo n'ishimwe rikomeye. Yavuze ko iki cyemezo cyafashwe nk'impano yihariye yo kwishimira Noheri, ari na ko bahitamo ahantu hatuje, heza kandi hafite umwihariko w'ikirere cyiza, kugira ngo bajye baharuhukira nk'umuryango.

Zanzibar izwiho ubwiza bw'inyanja, amateka n'umuco byihariye, ni kimwe mu bice bikomeje gukundwa n'ibyamamare byinshi byo muri Afurika no ku Isi yose. Kizz Daniel yavuze ko bahisemo kuhagura inzu bitewe n'uko hari umutekano, ituze n'ibidukikije byiza, bikabafasha kuruhuka no gusabana mu buryo burambye.

Abakunzi b'uyu muhanzi bakiriye aya makuru mu byishimo byinshi, bamwifuriza Noheri nziza n'imigisha myinshi mu buzima bwe bwite no mu rugendo rwe rwa muzika. Kizz Daniel akomeje kugaragaza ko, uretse kuba umuhanzi ukunzwe, anashyira imbere umuryango n'ibimushimisha ku giti cye, cyane cyane mu bihe by'iminsi mikuru.

Source : https://kasukumedia.com/kizz-daniel-numuryango-we-bishimiye-umunsi-mukuru-wa-noheri-bagura-inzu-i-zanzibar/

Bamwe mu baturage batuye mu gace kazwi nka Muyebe, mu Murenge wa Rongi Karere ka Muhanga, baravuga ko babangamiwe n'imikorere ya REG ishami rya Muhanga, bayishinja kudaha agaciro ibibazo byabo bijyanye na Cash Power zimaze igihe kinini zidakoze.

Aba baturage bavuga ko hari imiryango imaze umwaka urenga ifite Cash Power zangiritse, nyamara n'ubwo bakomeje kwegera REG kenshi basaba ko zasimbuzwa, nta gisubizo gifatika barabona. Bagaragaza ko ikibazo cyabo cyakomeje kwirengagizwa, ibintu bavuga ko bibateza igihombo n'ingaruka ku buzima bwabo bwa buri munsi.

Umwe mu baturage yagize ati: 'Twagiye kuri REG inshuro nyinshi, twandika ibisabwa byose, ariko kugeza ubu nta Cash Power nshya twabonye. Turacana n'abaturanyi cyangwa tukagura umuriro ahandi bigatwara amafaranga menshi.' Bavuga ko ibi byatumye hari abafite amashanyarazi mu ngo ariko bakabaho nk'abatayafite.

Abandi na bo bavuga ko kubura Cash Power ikora bibagiraho ingaruka zikomeye zirimo kudacana nijoro, kudashobora kwishyuza telefone, no kubura serivisi z'ibanze zishingiye ku muriro w'amashanyarazi, cyane cyane ku miryango ifite abana biga.

Aba baturage basaba ubuyobozi bwa REG ishami rya Muhanga kwihutira gukemura iki kibazo, bagasimburizwa Cash Power zangiritse, bityo bagahabwa serivisi ikwiye nk'abandi banyarwanda. Banifuza ko hakongerwa itumanaho n'abakiriya kugira ngo bamenye aho ibibazo byabo bigeze gukemurwa, aho gukomeza gusezeranwa batabona ibisubizo.

Source : https://kasukumedia.com/muhanga-abatuye-muyebe-barinubira-reg-ku-bibazo-bya-cash-power/

Umutoza wa Bugesera FC, Banamwana Camarade yavuze ko kimwe mu bintu biryoha ari ugutsinda Rayon Sports.

Yabitangaje nyuma y’umukino wa Shampiyona yaraye atsinzemo Gikundiro ibitego 2-1.

Yavuze ko Rayon Sports ari ikipe nziza, ifite abakunzi benshi bityo kuyitsinda biryoha cyane.

Ati 'Rayon ni ikipe nziza uba ubona ukabona ko abantu bahari kuyishyigikira, ukabona ko kuyitsinda biryoha. Hahandi bikomeye ikipe nziza nka Rayon Sports y’Abafana urayitsinda nawe ukumva uratashye uraryamye urasinziriye, ukumva uraruhutse ni ikipe nziza ifite abafana benshi.'

Yakomeje avuga ko ikintu cyamufashije ari uko atigeze atuma imutsinda mu gice cya mbere kuko yari abizi ko mu gice cya kabiri ntacyo yakora.

Ati 'Rayon Sports iyo ubashije gutuma itagutsinda mu gice cya mbere, igice cya kabiri iba iri hasi.”

Uyu ubaye umukino wa kabiri wikurikiranya Bugesera FC itsinda Rayon Sports itozwa na Camarade, n’umwaka ushize yari yayitsinze 2-1.

Camarade yavuze ko gutsinda Rayon Sports biryoha

Source : http://isimbi.rw/gutsinda-rayon-biraryoha-uraryama-ugasinzira-camarade.html

Nyampinga w’u Rwanda 2016, Miss Mutesi Jolly yaguze ibitabo 100 bya Miss Nishimwe Naomie.

Ku mugoroba w’ejo hashize ku Cyumweru tariki ya 14 Ugushyingo 2025, Nyampinga w’u Rwanda 2020, Nishimwe Naomie yamuritse igitabo cye yanditse yise ‘More Than Crown’.

Uyu muhango wabereye muri Kigali Convention Centre witabiriwe n’ibyamamare bitandukanye barimo Miss Mutesi Jolly, Nimwiza Meghan, Iradukunda Liliane, Muyango Claudine, Minisitiri w’abakozi ba Leta n’umurimo, Amb. Nkurikiyinka Christine.

Hari kandi abandi bakobwa bitabiriye irushanwa rya Miss Rwanda nka Kayumba Darina, Muyango Claudine, Uwicyeza Pamella, Umunyana Shanitah.

Abakinnyi ba APR BBC Adonis Filer, Ntore Habimana na Axel Mpoyo bari bahari. Hari abahanzi nka Bull Dogg, Juno Kizigenza, Christopher, Ruti Joel.

Hari kandi inshuti, abavandimwe be ndetse n’umugabo we Michael Tesfay.

Miss Nishimwe Naomie yavuze ko iki gitabo gikubiyemo byinshi byerekeranye n’ubuzima bwe.

Ati 'Uyu munsi mwakoze cyane kuza, ndashimira Imana yatumye uyu munsi ushobora kubaho, ntewe ishema nanjye ubwanjye kuba nabashije kwandika iki gitabo. Mfite amashimwe kuri buri wese wagize uruhare mu kugira ngo ibi mbigereho.'

Muri iki gikorwa abantu banyuranye bahise bagura iki gitabo, aho nka Miss Jolly Mutesi yaguze ibitabo 100, aho igitabo kimwe kigura ibihumbi 40 Frw. Bivuze ko yatanze miliyoni 4 Frw.

Iki gitabo gikubiyemo amateka ye kuva mu bwana kugeza ku rugendo rwe muri Miss Rwanda, yavuze ko afite gahunda yo kuzengeruka mu mashuri asobanurira abakiri bato byinshi bigize iki gitabo.

Miss Muheto Divine na Miss Mutesi Jolly

Miss Nishimwe Naomie yari yazanye n’umugabo we kumushyigikira

Adonis na Akaliza Amanda

Abakinnyi ba APR BBC barimo Adonis, Ntore Habimana na Axel Mpoyo bari bahari

Byari ibyishimo kuri Miss Nishimwe Naomie

Miss Nimwiza Meghan na Iradukunda Liliane bari mu bitabiriye iki gikorwa

Miss Mutesi Jolly yaguze ibitabo 100

Miss Nishimwe Naomie yamuritse igitabo gikubiyemo amateka ye

Source : http://isimbi.rw/miss-mutesi-jolly-yaguze-ibitabo-100-bya-miss-naomie-uko-ibyamamare-byaserutse.html

Umuhanzi nyarwanda Yampano yatangaje ko ari mu myiteguro yo gukora ibitaramo bizenguruka umugabane w'u Burayi, mu rwego rwo kwegera abakunzi b'umuziki we batuye muri uwo mugabane no kwagura izina rye ku ruhando mpuzamahanga. Ibi bitaramo bitegerejwe cyane n'abakunzi be, nubwo kugeza ubu ataratangaza amatariki nyayo azatangiriraho ndetse n'imijyi azabikoreramo.

Yampano, uri mu bahanzi bakomeje kwigarurira imitima ya benshi mu Rwanda no hanze yarwo, yerekeje mu gihugu cy'u Bubiligi tariki ya 02 Ukuboza 2025. Uru rugendo rufitanye isano n'ibikorwa by'akazi birimo ibiganiro ari kugirana n'abantu n'ibigo bimufasha gutegura no gushyira mu murongo iyi gahunda y'ibitaramo. Abo bafatanyabikorwa barimo abategura ibitaramo, abashinzwe itangazamakuru n'abandi bafite ubunararibonye mu gukorana n'abahanzi bakorera i Burayi.

Nk'uko amakuru abivuga, intego ya Yampano ni ugushyira ku rwego rwo hejuru ibitaramo bye, akabihuza n'umwimerere w'abafana b'Abanyarwanda n'inshuti z'u Rwanda batuye i Burayi. Biteganyijwe ko ibi bitaramo bizaba bigamije kumenyekanisha indirimbo ze, guteza imbere umuziki nyarwanda no guha amahirwe impano zo mu Rwanda kwigaragaza ku masoko mpuzamahanga.

Nubwo amakuru arambuye ku migi n'amatariki ataratangazwa, abakunzi ba Yampano basabwe gukomeza gukurikira itangazamakuru n'imbuga nkoranyambaga ze kugira ngo bazamenye ibishya ku gihe. Ibi bitaramo bitegerejwe nk'intambwe ikomeye mu rugendo rw'uyu muhanzi mu kuzamura izina rye ku rwego rw'Isi.

Source : https://kasukumedia.com/yampano-ari-gutegura-ibitaramo-bizenguruka-i-burayi/

Nyuma y'imyaka irenga 23 amaze mu mikino njyarugamba ya World Wrestling Entertainment (WWE), John Cena yatangaje isezerano rye rya nyuma, asezera burundu ku gukina iyi siporo yamugize icyamamare ku Isi. Uyu mukino w'amateka wabaye mu ijoro ryo ku wa Gatandatu tariki ya 13 Ukuboza 2025, wabereye muri Capital One Arena i Washington D.C muri Leta Zunze Ubumwe za Amerika.

John Cena yasoreje urugendo rwe mu mukino wamuhuje na Gunther, uzwi ku izina rya 'The Ring General', umwe mu barwanyi bakomeye kandi bubashywe muri WWE y'iki gihe. Ni umukino wari witezwe cyane, wiganjemo imbaraga, ubuhanga n'amarangamutima menshi, aho abafana bari bitabiriye ku bwinshi bashimangiye ko bari baje gusezera intwari yabo.

Mu gihe yari amaze igihe gito agaragara muri WWE kubera imirimo ye muri sinema n'indi mishinga, John Cena yakomeje kuba ishusho y'icyitegererezo ku bakunzi ba wrestling. Yamenyekanye cyane kubera imico ye yo kutigunga, ubutwari no guharanira gutsinda, ibintu byatumye yegukana ibikombe bikomeye birimo n'inshuro nyinshi yatwaye igikombe cya shampiyona ya WWE.

Nyuma y'umukino, John Cena yashimiye abafana, abatoza n'abarwanyi bagenzi be bagendanye na we muri uru rugendo rurerure. Yavuze ko n'ubwo asezeye gukina nk'umwuga, WWE izahora ari igice cy'ubuzima bwe. Isezera rya John Cena ryasize amateka akomeye muri WWE, rinasiga isomo ku rubyiruko rwinshi rwifuzaga kumwigiraho byinshi mu mikino njyarugamba.

Source : https://kasukumedia.com/john-cena-yasezeye-gukina-burundu-imikino-njyarugamba-ya-wwe/

Impera z’icyumweru zasize amakipe abiri akunzwe mu Rwanda, APR FC na Rayon Sports nta n’imwe ibashije gutsinda, Police FC ikomeza kwidegembya ku mwanya wa mbere.

Shampiyona y’icyiciro cya mbere mu Rwanda umwaka w’imikino wa 2025-26 yari yakomeje hakinwa umunsi umunsi wa 12 n’ubwo APR FC na Rayon Sports zakinaga umunsi wa 11.

Shampiyona yakinwe guhera ku wa Kane tariki ya 11 Ukuboza 2025 aho Rutsiro FC yatsinze Amagaju 2-1 mu gihe Al Hilal itsinda Bugesera FC 3-1.

Ku wa Gatanu, Police FC inayoboye urutonde rwa shampiyona yatsinze Gasogi United 1-0, cya Ani Alejah.

Ku wa Gatandatu, APR FC yari imaze iminsi ititwara neza, benshi bakekaga ko iza kwiyunga n’abakunzi bayo itsinda Gorilla, gusa byaje kugorana kuko umukino warangiye nta kipe ibashije kureba mu izamu ry’indi.

Kuri uwo munsi kandi AS Muhanga yanganyije na AS Kigali 0-0, Etincelles itsinda Musanze FC 3-1.

Ku Cyumweru, Rayon Sports yari yasuye Bugesera FC mu Bugesera aho yaherukaga gutsindirwq 2-1 mu mukino waranzwe n’imvuru aho abafana bateye amabuye mu kibuga.

Benshi bibazaga niba Rayon Sports igiye kwihorera muri iyi ‘Derby y’Amabuye’ nk’uko yiswe, gusa yaje kongera kuhatsindirwa ibitego 2-1.

Indi mikino yabaye ku Cyumweru, Marines FC yatsinze Kiyovu 1-0 , Mukura VS itsinda Gicumbi FC 2-0, Al Merreikh itsinda Amagaju 1-0.

Uyu munsi shampiyona irakomeza Al Hilal yakira Rutsiro FC.

Kugeza ubu Police FC iyoboye urutonde rwa shampiyona n’amanota 26, Marines FC 21, APR FC 20, Gasogi United 18, Rayon Sports 17 mu gihe AS Kigali ari iya nyuma n’amanota 10.

Rayon Sports yongeye gutsindirwa mu Bugesera

APR FC imbere ya Gorilla FC byaranze

Source : http://isimbi.rw/rayon-yatsinzwe-derby-y-amabuye-apr-fc-yibutswa-ko-atari-yo-nyir-umujyi.html

Uwase Muyango Claudine yavuze ko nabona uyu mwaka urangiye azapfukama agashima Imana kuko yamukoreye ibikomeye.

Ibi uyu mugore wa Kimenyi Yves yabitangarije abanyamakuru ubwo yari yitabiriye imurikwa ry’Igitabo ‘More Than Crown’ cya Nyampinga w’u Rwanda 2020, Nishimwe Naomie.

Ubwo yari abajijwe uko umwaka wa 2025 wamugendekeye, Muyango Claudine yavuze ko wamusigiye isomo rikomeye cyane.

Ati “Uyu mwaka rero kuri njyewe waranzwe n’amasomo menshi, narize cyane, waranzwe n’amasomo menshi, narize cyane meze nk’umuntu uvuye ku ikosi. Warimo imigisha myinshi ariko urimo ibibazo ntitukabeshye, ndashimira abantu banshyigikiye, haba kuri YouTube channel n’ahandi hose ndabashimiye cyane.”

Yakomeje avuga ko tariki ya 1 Mutarama 2026 azapfukama agasenga Imana kuko yamukoreye ibikomeye.

Ati “Ni uko umuntu aba avuga isomo ariko amasomo ni menshi umuntu aba yarize, niba hari umwaka… Tariki ya mbere z’ukwa mbere, nzapfukama mvuge nti Mana urakoze.”

“Hari akantu njya mbona bavuga ngo nta kintu ushobora kunyishyura ngo nsubire muri uyu mwaka, nanjye ayo mafaranga ntabaho.”

Muyango Claudine yavuze ko ibitangazwa ku mbuga nkoranyambaga ababikora bamaze kurengera cyane mu gihe abantu babifashe nk’ibisanzwe kandi byangiza benshi aho yabasabye guhinduka.

Uwase Muyango Claudine ni umwe ku bantu bavuzwe cyane ku mbuga nkoranyambaga muri 2025.

Gusa yagarutse cyane mu mitwe y’itangazamakuru ku nkuru zivuga ku itandukana rye n’umugabo we, Kimenyi Yves.

N’ubwo hari ibimenyetso byinshi byagendaga bihuzwa, nta n’umwe muri bo wigeze abyemeza ko batandukanye.

Kimenyi Yves amaze iminsi atari mu Rwanda, gusa amakuru avuga ko aba bombi nta kibazo bagifitanye biyunze bigizwemo uruhare n’inshuti n’imiryango.

Uwase Muyango Claudine yavuze ko atari we uzarota uyu mwaka urangira

Source : http://isimbi.rw/tariki-ya-1-mutarama-nzapfukama-nshime-imana-muyango-claudine.html

Guhera kuri uyu wa Gatanu, tariki ya 12 Ukuboza 2025 muri BK Arena habereye irushanwa rya Volleyball ryiswe, BK Arena Volleyball Cup2025 risozwa Gisagra Volleyball Club na Police Women Volleyball Club arizo zegukanye ibikombe.

Ni irushanwa ryakinwe mu minsi ibiri aho ryasojwe kuri uyu wa Gatandatu, nyuma yaho amakipe ane ya mbere mu Bagabo ndetse n'abagore yari yitabiriye iri rushanwa.

Amategeko ya BK Arena Volleyball Cup 2025 yemeje ko hazakina amakipe yari yasoje ari ane ya mbere mu gice kibanza cya shampiyona ya Volleyball mu byiciiro byombi.

Ikipe ya Police Volleyball Club mu bagore yegukanye igikombe nyuma yaho yari yatsinze Kepler WVC muri 1/2 amaseti 3-0 , mu mukino wari wakinwe kuwa Gatanu.

Iyi kipe ikaba kandi yaregukanye igikombe cyakinwaga bwa mbere itsinze APR Volleyball Club ku mukino wa nyuma amaseti 3-0 (25-21, 26-24, 27-25).

Police Women Volleyball Club yegukanye igikombe iba iya mbere, yahawe imidali ndetse na sheke ya Miliyoni ebyiri n'igice, ni mu gihe APR yabaye iya Kabiri naho Kepler WVC yegukanye umwanya wa Gatatu itsinze RRA WVC.

Mu kiciro cy'Abagabo, ikipe ya Gisagara Volleyball Club niyo yegukanye igikombe itsinze APR Volleyball Club ku mukino wa nyuma, amaseti atatu ku busa (25-22, 25-12, 25-10).

Kimwe na Police WVC, Gisagara VC nayo yegukanye imidali n'igikombe biherekejwe na Moliyoni ebyiri n'igice.

Kepler Volleyball Club yegukanye umwanya wa Gatatu mu bagabo aho yari yatsinze Police  Volleyball Club, amaseti atatu kuri imwe.

Source : https://rushyashya.net/gisagara-vc-na-police-women-vc-begukanye-bk-arena-volleyball-cup-2025-yakinwaga-ku-ncuro-ya-mbere/