Category: Uncategorized

Umumotari Bizumuremyi Saadi wamamaye nka 'Your Motari' cyangwa Motari Wawe ku mbuga nkoranyambaga yahishuye uburyo yatwayemo ibyamamare ku Isi nka IshowSpeed na Shenseea benshi bakaba basigaye bamwita Maneko.

Your Motari umenyerewe ku mbuga nkoranyambaga ndetse anakunze kumvikana ashishikariza abamotari bagenzi be gukurikiza gahunda za leta, akaba amaze iminsi mu mitwe ya benshi nyuma y’uko atwaye kuri moto ye ibyamamare byaje mu Rwanda mu ntangiriro z’uku kwezi kwa Mutarama 2026.

Muri byo harimo umuhanzikazi ukomoka muri Jamaica, Shenseea ndetse n’umunyamerika uzwi cyane kuri Youtube, IshowSpeed wari mu Rwanda mu mpera z’icyumweru gishize.

Mu kiganiro yagiranye n’ikinyamakuru ISIMBI, agaruka ku bantu bamwita Maneko, yagize ati 'Hari nk’umuntu ubona ubwiye nk’abantu ni urugero ba motari bagenzi banjye duse neza mu kazi dukora biduheshe ishema, twambare casque tuzihe n’abagenzi tunazisukure, tugendere ku muvuduko wagenwe, twubahirize ibyapa, dutware neza mu muhanda, agahita avuga ngo polisi yagutumye.'

'Umuntu wese uzavuga ikintu gifitiye rubanda umumaro uzavuga ngo yishyuwe ngo avuge ibyo? None se uruhare rwawe ni uruhe mu gufasha Sosiyete? Niba uri umuntu utagira icyo ukora ngo ufashe sosiyete gukemura ibibazo na we uri mu bibazo Isi ifite.'

Yakomeje agira ati 'Ibyo ntabwo njya mbyitaho mba numva ko ntabayeho nkajye ubwanjye ahubwo mbereyeho rubanda, ejobundi nzapfa ariko ibikorwa byanjye bizasigara.'

Yakomeje avuga ko ubutumwa anyuza ku mbuga nkoranyambaga ze, agaragaza ko afasha abantu gutembera i Kigali ari byo byamuhesheje gutwara ibi byamamare, aho yavuze ko nubwo asanzwe agira isuku ariko umunsi ajya gutwara Shenseea yayitunganyije bitabaho.

Ati 'Nk’umunsi njya gutwara Shenseea, niteguye nk’amasaha abiri mbere, moto narayogeje nyitera n’imibavu isaha bampaye yageze mpari ntegereje, abantu bari mu ikipe ye barambwiye ngo agiye kuza umutembereze abantu bashobora kumufata amafoto birasaba kugenda witonze.'

'Naramutwaye tugezeyo aranshimira, abantu bari batangiye kubibona ariko bataramenya ko ari njye, mfata amafoto ndayapositinga bavuga byinshi ariko urumva niba umuntu nk’uwo aje ashaka gutembera kuri moto, wa mumotari uhora wigagaragaza, ugira isuku unavuga icyongereza ni we bazareba.'

Yakomeje avuga ko na IshowSpeed aza, haje abantu bakamubwira ko IshowSpeed azamutwara kuri moto kuko azasura u Rwanda kandi azaba ari kumwe n’ikipe ngari.

Ati 'Ejobundi nabwo haza abantu barambwira ngo IshowSpeed azasura u Rwanda, wamutwara kuri Moto, azaba ari kumwe n’ikipe ngari ugomba gushaka abamotari bagenzi ba we b’abanyamwuga mukazamutwara.'

'Nari nsanzwe muzi IshowSpeed ariko sinari nzi ko afite abantu bangana kuriya no mu Rwanda numvaga ari ibintu bisanzwe kuko abanyarwanda tudakunda gushamaduka cyane, yaraje mbona abantu ni benshi, ndi ku gitutu cya bagenzi banjye kuko ninjye wabazanye, ngomba kuba niteguye yamvugisha nkamusubiza, yambaza nkamusubiza.'

Yavuze ko yishimiye cyane kumutwara abantu bakamwishimira cyane, akaba yarakoranye n’itsinda rigari ry’abamotari bagera hafi kuri 20.

Yavuze ko kimwe mu bintu yamubwiye barimo bagenda yageze ati 'yarambwiye ngo ndashonje. Ndamubwira aho tugiye kuri hoteli barakwakira kandi abanyarwanda bateka neza.'

Ikindi yamubwiye ni uko yatangariye Stade Amahoro, ati 'Twinjiye muri Stade Amahoro aratangara ngo ni nini, naramubwiye ngo byibuze yakira ibihumbi 45, aratangara cyane ngo ntibishoboka.'

Ikindi yavuze cyamushishije kuri ibi ni uburyo n’umuhanzi Davido yamupositinze kuri Instagram, byamweretse ko ibyo akora bigera kure kandi hari n’ababibona.

Motari watwaye IshowSpeed yavuze ko byamushimishije cyane

Wari umunsi w’amateka kuri Motari Saadi

Nubwo yegukanye umwanya wa 2 kuri Super Cup, Rayon Sports ntabwo yahawe amafaranga yatsindiye kuko yari yaramaze kuyatangamo ingwate muri FERWAFA.

Rayon Sports yakinnye umukino wa Super Cup na APR FC tariki ya 10 Mutarama 2026, APR FC yegukanye igikombe itsinze ibitego 4-1.

Gusa Rayon Sports y’abagore yo yaje kwegukana igikombe itsinze Indahangarwa WFC bari bahuriye kuri iki gikombe bagihanganiye.

Byari biteganyijwe ko ikipe yegukana Super Cup yaba mu bagabo n’abagore yagombaga guhabwa miliyoni 20 Frw mu gihe iya kabiri yari guhabwa miliyoni 10 Frw (ni nako byagenze).

Amakuru ISIMBI yamenye ni uko Rayon Sports yagize ikibazo cy’amafaranga yo kwandikisha abakinnyi bashya 5 b’abanyamahanga yaguze yifuzaga ko bakina uyu mukino.

Ubu kwandikisha umukinnyi umwe w’umunyamahanga bisaba kwishyura miliyoni 2 Frw, Rayon Sports yahise yigira inama yo kujya kwinginga FERWAFA.

Yagiye ibwira FERWAFA ko byibuze yizeye kuzegukana miliyoni 20 Frw mu mikino ya Super Cup kuko ifitemo amakipe abiri iy’abagabo n’abagore mu gihe yombi yaba yatsinzwe.

Yasabye ko babafasha bakandika abakinnyi bashya yaguze hanyuma Super Cup yarangira baba batsinzwe ntibazagire icyo babaza kuko bihura n’izo miliyoni 10 Frw agomba guhabwa ikipe yatsinzwe itatwaye igikombe, mu gihe batsinda bagahabwa miliyoni 10 Frw.

Rayon Sports ikaba izahabwa miliyoni 20 Frw zatsindiwe na Rayon Sports WFC, ni mu gihe aya Rayon Sports y’abagabo yo agomba kwishyura ideni yafashe muri FERWAFA.

Rayon Sports y’abagabo nta mafaranga ya Super Cup izabona

Umugore w’uwahoze ari umujyanama w’umuhanzi, Diamond Platnumz, witwa Said Mkubwa Fella, aramushinja kumutererana nyuma y’uko umugabo we atangiye guhangana n’indwara ikomeye.

Umufasha wa Mkubwa Fella, Sweet Fella ni we watangaje aya makuru, avuga ko yafashe icyemezo cyo kubivugira mu ruhame nyuma yo kubona ko abantu benshi bari barigeze kugirana umubano wa hafi n’umugabo we bamwihoreye burundu.

Mu kiganiro n’ikinyamakuru Mwananchi, Sweet yagize ati 'Abenshi batekereza ko Diamond Platnumz ari we uri kwita kuri byose, nyamara si byo. Nahisemo kuvuga ibi kugira ngo abantu bamenye ko ndi kurwana jyenyine ngo umugabo wanjye abone ubuvuzi bukwiye.'

Ku bijyanye na Diamond Platnumz, Sweet Fella yemeye ko yamufashije mu rugendo rwo kujya kwivuriza mu Buhinde umwaka ushize, agaragaza ko amushimira byimazeyo kuri iyo nkunga.

Ariko avuga ko nyuma yaho nta yindi mfashanyo yongeye kuboneka. Ati 'Diamond azi neza ko Fella arwaye. Yadufashije kugera mu Buhinde, ariko nyuma haciyeho yaracecetse pe. Numvaga hari ibirenzeho byashobokaga.'

Sweet Fella yanagarutse ku bihe byashize, agaragaza itandukaniro rikomeye hagati y’igihe umugabo we yari muzima neza n’ubu arwaye.

Yagize ati 'Ubwo yari muzima telephone ye ntiyigeze iceceke gusona. Bamuhamagara nijoro, bakamuhamagara mu rukerera. Iyo batamubonaga, bahamagaraga nanjye ngo mumukangure. Ubu byose byarahindutse, nta n’umwe ukimuhamagara.'

Yongeyeho ko ubu ari we witanga wenyine ikiguzi cyose cy’ubuvuzi bwa Mkubwa Fella, nubwo uyu mugabo yagize uruhare runini mu guteza imbere impano n’imyuga y’abantu batandukanye mu ruganda rw’imyidagaduro muri Tanzania.

Uyu muryango usaba inkunga n’ubufatanye bw’abafite umutima mwiza, kugira ngo Mkubwa Fella akomeze kubona ubuvuzi bukenewe muri ibi bihe bikomeye.

Said ararembye

Diamond Platnumz arashinjwa gutererana uwari umujyanama we

Umuhanzi w’indirimbo zo kuramya no guhimbaza Imana, Theo Bosebabireba yavuze ko atazi icyo Pom Pom bisobanuye ahubwo yatunguwe no kubona abantu bamutuka kubera iyi ndirimbo.

Tariki ya 2 Mutarama 2026 ni bwo Bruce Melodie yasohoye indirimbo yakoranye na Diamond Platnumz bise 'Pom Pom’, indirimbo yakiriwe neza n’abakunzi b’uyu muhanzi.

Hagiye habaho 'Challenge’ abantu bakifata amashusho barimo baririmba iyi ndirimbo, benshi baje gutungurwa no kubona Theo Bosebabireba ari muri abo bantu bayiririmbye.

Muri aya mashusho yashyize kuri Tiktok, abantu baramututse bamubaza uburyo umuhanzi w’indirimbo zo kuramya no guhimbaza Imana ashobora kuririmba indirimbo z’Isi noneho zinarimo ibishegu.

Mu kiganiro yahaye ikinyamakuru ISIMBI, Theo Bosebabireba yavuze ko we yumvise iryoshye ahitamo na we kuyiririmba ariko akaba atari azi icyo bisobanuye.

Ati 'Njye nta nubwo, none se Pom Pom ni uruhe rurimi? Ni ikinyarwanda? Mu ndimi ziri ku Isi ni uruhe? Njye naririmbye umuziki kuko nkunda umuziki numvise ako kantu karyoshye, ngo 'Niwemera Pom Pom’, numva kararyoshye ariko si nari nzi icyo bisobanura pe, noneho mbishyize kuri Tiktok yanjye mbona abantu bari kuntuka ariko bantuka nkabna ibitutsi biriyongera n’abankurikira (followers) bariyongera.'

Yakomeje avuga ko we atari azi icyo isobanura yumva arayikunze kimwe n’uko yumva indirimbo ya Rihanna ikarangira kandi atumva icyongereza.

Theo Bosebabireba yavuze ko yaririmbye ‘Pom Pom’ ariko atazi icyo bisobanuye

Isimbi Model, yahumurije abagore bamaze igihe bategereje kubona urubyaro, abasaba kudacika intege no gukomeza kwizera isezerano ry’Imana ubwo yahishuraga ko yamaze imyaka irindwi arutegereje.

Uyu mugore, umaze kumenyekana mu myidagaduro no ku mbuga nkoranyambaga, yanyujije ubutumwa bwe ku rukuta rwe rwa Instagram, agaragaza ko nubwo yamaze imyaka irindwi, atigeze areka kwizera ko Imana izamusohoza isezerano yamuhaye.

Yavuze ko uburambe yanyuzemo bumufasha gusobanukirwa n’agahinda, gushidikanya n’amarira abagore benshi bahura na byo mu rugendo rwo gutegereza urubyaro.

Ati 'Ku bagore bagitegereje, ndababona. Nzi ububabare, ugushidikanya n’amarira muririra mu mitima. Ntimucike intege. Iyo Imana yashyize icyifuzo mu mutima wawe, ntabwo ijya ikwibagirwa.'

Isimbi Vestine wamenyekanye cyane nka Isimbi Model yakomeje asobanura ko urugamba rwo kubura umwana rutari rworoshye, ariko yakomeje kugendana icyizere n’isezerano ry’Imana.

Yavuze ko hari igihe yasengaga afite icyizere, akanarira mu bwiru, ariko mu ruhame agahagarara agaseka, agahitamo gukomeza kwizera nubwo hari ibihe byamugoraga.

Ati 'Mu myaka irindwi nategereje, icyizere cyanjye cyarazamukaga kikongera kigabanuka, ariko byari bihagije. Nagendanye isezerano igihe kinini mbere y’uko ntwita uyu mwana, none ubu mpagaze hano mpanya icyo Imana ishobora gukora.'

Yanasanishije ubuhamya bwe n’ijambo ryo muri Bibiliya Yera, mu Umubwiriza 3:11 rigira riti: 'Ikintu cyose yakiremye ari cyiza mu gihe cyacyo.' Asaba abagore batarabona urubyaro gukomeza gutegereza Imana batacitse intege, kuko gutegereza bayiringiye bitajya biba imfabusa.

Isimbi yasabye abagore babuze urubyaro gutegereza bihanganye

Rutahizamu wa Rayon Sports, Ndikumana Asman yahagaritswe n’umutoza icyumweru kubera kutumvikana n’umutoza Bruno Ferry.

Iki ni icyemezo cyafashwe n’umutoza mukuru Bruno Ferry kubera ko uyu mukinnyi atumva ibyo amubwira gukina.

Amakuru ISIMBI yamenye ni uko aba bombi batangiye gushwanira ku mukino batsinzwemo na APR FC 4-1 ku wa Gatandatu ikanabatwara Super Cup.

Bivugwa ko uyu mukinnyi yagombaga gukina nka rutahizamu (typical striker) ariko agasaba kunyura ku ruhande umutoza aremera, bigeze mu mukino hagati yasabye gukina nka rutahizamu nabwo arabyemererwa, nyuma ngo yongeye gusaba guhindurirwa umwanya.

Umutoza Bruno Ferry akaba atarashimishijwe n’iyi myitwarire ya Ndikumana Asman akaba yahise amuhagarika icyumweru cyose.

Ndikumana Asman yahagaritswe icyumweru

Umutoza Bruno Ferry yahagaritse Ndikumana Asman