Category: Uncategorized

Ni mu mukino wo ku munsi wa 3 wabaye kuri uyu wa Kane taliki ya 6 z’ukwezi kwa 06 2024 kuri sitade ya Félix Houphouët Boigny yo muri Cote d’Ivoire nyuma yuko Stade de l'Amitie Ikipe y’Igihugu ya Benin isanzwe yakiriraho yanzwe na CAF bitewe nuko itujuje ibyangombwa.

Umukino watangiye ikipe y’igihugu y’u Rwanda, Amavubi, ubona ihererekanya neza gusa ikabikorera mu rubuga rwayo abarimo Manzi Thierry, Mutsinzi Ange na Manguende ari bo bafite umupira ariko babuze uko bawutanga imbere.

Ikipe y’igihugu ya Benin yo ntabwo yahererekanyaga umupira cyane, gusa iyo yawubonaga yahita ishaka uko igera imbere y’izamu ndetse ku munota wa 11 gusa Mounie Steve yinjiye mu rubuga rw’amahina ashaka uko yatsinda igitego gusa birangira Fitina Ombolenga atabaye .

Ku munota wa 19 Amavubi yabonye uburyo bwashoboraga kugira icyo buvamo ku mupira Rubanguka Steve yahaye Mugisha Gilbert gusa birangira umurenganye.

Imanishimwe Emmanuel Manguende wabonaga atari mu mukino neza yakomeje gukina akora amakosa atakaza imipira ndetse binarangira ahawe ikarita y’umuhondo hakiri kare ku ikosa yakoreye Dossou Jodel wa Benin wari umunyuzeho byarangiye.

Nyuma yo kubona koroneri nyinshi ku ruhande rw’ibumoso, ikipe y’igihugu ya Benin yaje kubona igitego ku munota wa 37 gitsinzwe na Dokou Dodo ku mupira n’ubundi wari uvuye muri koroneri.

Benin ikimara kubona igitego yakomeje kotsa igitutu Amavubi ishaka igitego cya 2 ndetse binashoboka ko yanakibona nk’aho Dossou Jodel yarekuye ishoti rirerire nyuma yo kubona ko Ntwari Fiacre yasohotse gusa Mutsinzi Ange Jimmy aratabara.

Igice cya mbere cyarangiye Amavubi yatsinzwe igitego 1-0. Mu gice cya kabiri umutoza w’Amavubi, Frank Spittler yaje akora impinduka mu kibuga havamo Hakim Sahabo na Rafael York hajyamo Muhire Kevin na Samuel Guellette Marie ukinira La Louvière mu Bubiligi.

Izi mpinduka zahise zitangira gufasha Amavubi gukina neza ndetse noneho agakora n’uburyo bwavamo igitego imbere y’izamu cyane cyane binyuze kuri Muhire Kevin.

Ku munota wa 61 ikipe y’igihugu ya Benin yarase igitego kidahushwa aho Kapiteni Sreve Mounie yari asigaranye na Ntwari Fiacre bonyine gusa uyu muzamu w’Amavubi aribamba aratabara akuramo umupira.

Ikipe y’igihugu y’u Rwanda, Amavubi, yakomeje gukora impinduka mu kibuga ashyiramo abakinnyi barimo Mugisha Bonheur, Jojea Kwizera wakinaga umukino we wa mbere mu ikipe y’Igihugu ndetse na Gitego Arthur ngo irebe ko yabona igitego cyo kwishyura ndetse mu minota ya nyuma iranasatira cyane gusa bikomeza kwanga.

Umukino warangiye Benin itsinze igitego 1-0 iba yegukanye amanota 3 ihita ijya ku mwanya wa 2 mu itsinda C n’amanota 4 maze Amavubi nayo akomeza kuba ku mwanya wa 1 n’amanota 4 gusa yo akaba azigamye igitego 1.

Nubwo Amavubi akiri ku mwanya wa 1 ariko kuri uyu wa Gatanu ashobora kuzawutakaza kuko Nigeria izakina na Afurika y’Epfo naho Lesotho ikine na Zimbabwe.

Kuri uyu wa Gatanu, Ikipe y’igihugu y’u Rwanda irahita ifata rutimikirere yerekeza muri Afurika y’Epfo aho izakinira undi mukino na Lesotho taliki 11.

Urutonde rw'agateganyo rwatangajwe kuri uyu wa 6 Kamena 2024 nyuma yo gusuzuma kandidatire zatanzwe n'abakandida barenga 665 bakiriwe na NEC, aho abagera kuri 207 batujuje ibisabwa.

Ubwo Perezida wa NEC, Oda Gasinzigwa, yatangazaga urutonde rw'agateganyo rw'abakandida bujuje ibisabwa na Komisiyo y'Igihugu y'Amatora, yagaragaje ko hakiriwe abakandida bigenga 26 bigenga ariko umwe ari we wujuje ibisabwa.

Mu bakandida bigenga uwujuje ibisabwa ni Nsengiyumva Janvier, mu gihe mu batujuje ibisabwa barimo Mugisha Jessy watanze kandidatire yambaye ikabutura, Musinguzi Frank n'abandi.

NEC igaragaza ko harimo abatujuje ibyangombwa biherekeza kandidatire kandi ko bose batujuje ibisabwa kuri lisiti y'abashyigikiye kandidatire zabo.

Ku rundi ruhande ariko Komisiyo y'Igihugu y'Amatora yatangaje ko yakiriye Imitwe ya Politiki itandatu yatanze amalisiti ntakuka y'Abakandida bagomba kuyihagararira.

Umuryango FPR-INKOTANYI n'indi mitwe ya Politiki bafatanyije ari yo PDC, PPC, PSR, PSP, na UDPR batanze urutonde rw'abakandida 87 ariko abujuje ibisabwa ni 80.

Ishyaka Riharanira Ukwishyira Ukizana kwa buri Muntu (PL) ryatanze abantu 54 ariko NEC yagaragaje ko abujuje ibisabwa ari 39, Ishyaka Riharanira Demokarasi n'Imibereho Myiza y'Abaturage (PSD) ryatanze abakandida 59 ariko abujuje ibisabwa ari 52.

Ku ruhande rw'Ishyaka Riharanira Demokarasi no Kurengera Ibidukikije mu Rwanda (DGPR) ryatanze urutonde rw'abakandida 64 ariko abujuje ibisabwa ni icyenda, Ishyaka Ntangarugero muri Demokarasi (PDI) ryatanze abantu 55 mu gihe abujuje ibisabwa ari 41.

Ishyaka ry'Imberakuri Riharanira Imibereho Myiza PS IMBERAKURI ryatanze abakandida 80 mu gihe abujuje ibisabwa ari 28.

Muri rusange NEC yatangaje ko yakiriye abakandida bo mu mitwe ya Politiki 392 ariko abujuje ibisabwa ni 246.

Ku byiciro byihariye ku matora y'abadepite 24 bahagarariye abagore mu Nteko bagize 30% biteganywa n'Itegeko Nshinga hakiriwe abakandida 200 ariko abujuje ibisabwa ni 181.

Bitewe n'uko batorerwa muri buri turere, n'abatanze kandidatire bagaragaje ko hari aho baziyamamariza nko mu Ntara y'amajyarugu bari 33 abujuje ibisabwa ni 30, Amajyepfo ni 60 ababyujuje bakaba 56.

Mu Ntara y'Iburasirazuba hatanze kandidatire abantu 46 mu gihe 42, mu Burengerazuba hatanze 44 abajuje ibisabwa akaba ari 39 mu gihe mu Mujyi wa Kigali hatanzwe kandidatire 17 abujuje ibisabwa akaba ari 14.

Mu bakandida batanze kandidatire mu rubyiruko bari 34 ariko abujuje ibisabwa ni 23 mu gihe abafite ubumuga hatanzwe kandidatire 13 abujuje ibisabwa bakaba barindwi gusa.

NEC yagaragaje ko nyuma yo gutangaza kandidatire zemejwe by'agateganyo, nk'uko biteganywa n'Itegeko Ngenga rigenga amatora, umukandida utujuje ibisabwa afite iminsi itanu y'akazi yo kubyuzuza.

Iyo minsi iratangira ku wa 7 Kamena 2024 ikagera kuwa Kane tariki ya 13 Kamena 2024 kuko urutonde ntakuka ruzatangazwa ku wa 14 Kamena 2024.

Oda Gasinzigwa yagaragaje ko kuri kuri lisiti y'abashyigikiye umukandida ibibura bidashobora kuzuzwa nyuma y'itariki 30 Gicurasi 2024 bityo ko umuntu ufite ikibazo mu bamusinyiye adashobora kongera gusinyisha.

Perezida wa NEC, Oda Gasinzigwa, yagaragahe ko abagera kuri 200 batanze kandidatire zutujuje ibisabwa ku bahatanira umwanya w’ubudepite

Banki y'Isi ni umwe mu bafatanyabikorwa batanga amafaranga Leta y'u Rwanda ifite ndetse ntibigarukira aho gusa kuko ifasha mu gusesengura ibyo igihugu gikeneye ngo gitere imbere mu buryo bwihuse.

Umunyamabanga wa Leta muri Minisiteri y'Imari n'Igenamigambi Ushinzwe Imari ya Leta, Richard Tusabe yatangaje ko Banki y'Isi ifasha u Rwanda mu mishinga igamije iterambere rirambye.

Ati 'Idufasha no gutegura inyigo, kureba ngo ese iterambere ryacu rirasaba iki kugira ngo turebe aho tuzashora bikadufasha kugera ku iterambere rirambye. Hari imishinga myinshi dufite ikirimo gushyirwa mu bikorwa hari iyo turimo kuganira izaza kunganira iyo ngiyo, ariko ikigaragara ni uko ni abafatanyabikorwa beza badufasha natwe ibyo dukora barabishima kandi turizera ko ibyo twaganiriye biri imbere biganisha ku iterambere rirambye tuzabikora ku buryo bwihuse kandi neza.'

Banki y'Isi ifasha u Rwanda mu mishinga y'ibikorwaremezo, kubaka ingomero z'amashanyarazi no kuyageza ku baturage, uburezi, ubuhinzi, iterambere ry'abaturage n'ibindi byinshi.

Umuyobozi Mukuru wungirije wa Banki y'Isi muri Afurika y'Iburasirazuba n'Amajyepfo, Dr. Victoria Kwakwa, yagaragaje ko imishinga yose iyi banki ifatanyamo n'u Rwanda igenda neza.

Yagaragaje ko kugira ngo iterambere rikomeze kwihuta ari ngombwa gufatanya mu kubaka ubushobozi bw'abaturage uhereye mu bato no kuzamura ubushobozi bw'urwego rw'abikorera.
Ati 'Iterambere ridaheza ni ingenzi cyane, iterambere rishingiye ku rwego rw'abikorera kandi ni ikibazo cy'ibihugu bya Afurika byose. Rero birasaba ngo abikorera by'umwihariko ab'imbere mu gihugu bakangukire gushora imari bashyigikiwe na guverinoma. Igihugu cyakoze ibishoboka cyoroshya ingeri z'ubukungu zikorwaho n'abikorera benshi kandi ni byiza.'

Dr. Kwakwa yavuze ko mu byo impande zombi zifatanyamo harimo no guteza imbere urwego rw'ingufu no kugeza amashanyarazi ku baturage bose.

Ati 'Twagarutse ku rwego rw'ingufu kuko Banki y'Isi ifata uru rwego nk'inkingi ya mwamba, rero urugero rw'u Rwanda, ibyo mwagezeho mu myaka 15 ishize, mukava kuri 6% by'abagerwaho n'amashanyarazi banayakoresha mukagera hejuru ya 65% ageraho bakanayakoresha ni ikintu gikomeye abantu bagomba kwigiraho.'

Yahamije ko banarebye ku buryo umuntu wese ugerwaho n'amashanyarazi aba akwiye kuba yabasha kuyagura kandi akayakoresha uko abikeneye, ariko ngo yamenye ko hari umushinga wo kuvugurura ibiciro by'amashanyarazi mu bihe biri imbere.

Mu ngengo y'imari ya 2023/2024, iyo gukwirakwiza amashanyarazi mu gihugu hose yateganyijwe ingana na miliyari 193 Frw, aho hakubiyemo umushinga ugamije kugeza amashanyarazi ku baturage hirya no hino mu gihugu ufite agaciro ka miliyari 74,3 frw, u Rwanda rufatanyamo na Banki y'Isi.

Dr. Victoria Kwakwa yanavuze ko hakozwe byinshi mu kubaka ingomero z'amashanyarazi zifatiye ku mazi y'imigezi kandi ko bigikomeza kuko ari yo ahenduka kuyatunganya bityo igihe yaba abonetse bikazanatuma ibiciro bigabanyuka.

Tariki 30 Nzeri 1963 nibwo u Rwanda rwabaye umunyamuryango wa Banki y'Isi ndetse mu mwaka wa 1970 inama y'ubutegetsi y'iyi Banki yemeza inguzanyo ya mbere yahawe u Rwanda ingana na miliyoni 18.8$.

Kugeza mu mpera za 2023, Banki y'Isi yari imaze kuguriza u Rwanda asaga miliyari 8 $ yakoreshejwe mu iterambere ry'inzego zirimo uburezi, ibikorwa remezo, ubuhinzi n'ubworozi n'izindi.

Impande zombi zaganiriye ku mishinga itandukanye Banki y’Isi iteramo inkunga u Rwanda

Basuzumiye hamwe aho imishinga igeze n’igikenewe kugira ngo yose izasozwe neza

Umuyobozi Mukuru wungirije wa Banki y'Isi muri Afurika y'Iburasirazuba n'Amajyepfo, Dr. Victoria Kwakwa yavuze ko u Rwanda rutera imbere ku muvuduko wo hejuru

Amafoto: Herve Kwizera

Ibinyamakuru mpuzamahanga 17 bimaze icyumweru kirenga bisohora inkuru bise 'Rwanda Classified' zigamije guharabika Leta y'u Rwanda, zagizwemo uruhare n'abanyamakuru 50 bibumbiye mu ihuriro 'Forbidden Stories'.

Muri izi nkuru harimo igaragaza ko Leta y'u Rwanda yaba yaragize uruhare mu rupfu rwa Ntwali rwabaye muri Mutarama 2023, nyamara Polisi y'u Rwanda yo yarahamije ko uyu munyamakuru yishwe n'impanuka, ubwo moto yariho yagongwaga n'imodoka.

Byansi yagaragaje ko Ntwali ashobora kuba yarishwe azira ubucukumbuzi ku ngabo z'u Rwanda amahanga ashinja kuba mu ntara ya Kivu y'Amajyaruguru muri RDC, aho ngo bari barajyanye gushakisha ibihamya by'abasirikare baba barapfiriyeyo.

Byansi uvuga ko yahungiye mu Buholandi, yatangaje ko mu Ugushyingo 2022 yajyanye na Ntwali muri Kivu y'Amajyaguru muri iyi gahunda kuko Ntwali ari we wagombaga kumufasha kubera we yavugaga Igifaransa n'Igiswahili; indimi Abanye-Congo basanzwe bavuga.

Yagize ati 'Twagiye i Goma, duhura n'abantu, dukora ubushakashatsi.'

Gonzaga Muganwa kuri uyu wa 5 Kamena 2024 yatangaje ko azi Byansi na Ntwali cyane kuko bahuriraga ahakorera umuryango ARJ w'abanyamakuru mu murenge wa Remera mu karere ka Gasabo. Yahamije ko bombi batacanaga uwaka ku buryo batagombaga kugira umushinga bahuriramo.

Yagize ati 'Ntwali John Williams muzi neza cyane, nzi Samuel Baker cyane. Inkuru ntemera ni iyo bavuga ko Ntwali na Baker bakoranye ku mushinga wo muri Congo. Ntabwo byari gushoboka. Ugushoboka ko kwicarana, bagakorana umushinga umwe kwari kuri zeru.'

Mugenzi we, Mugabe Robert 'Bob', na we yahamije ko Ntwali na Baker bari bafitanye urwango rutari gutuma bagira icyo bahurizaho.

Ati 'Ndakuzi, uranzi, tuzi Baker, na we aratuzi kandi tuzi umubano wari hagati yabo bombi. Ndahamya ko batashoboraga kwicarana ngo bakorane inkuru.'

Muganwa yatangaje ko kumenya umubano wa Ntwali na Byansi byari korohera abanyamakuru ba Forbidden Stories kuko byari kubafasha kumenya ko amakuru Byansi yabahaye batagombaga kuyizera. Ati 'Iryo ni ikosa rikomeye ryakozwe n'abatozi ba Forbidden Stories.'

Uyu munyamakuru yemera ko Ntwali yakoraga inkuru zinengwa na bamwe, ariko ko nta nkuru n'imwe yakoze yagombaga gutuma Leta imwica, bitandukanye n'ibyo ibi binyamakuru biri gutangaza. Ati 'Nta kimenyetso kigaragaza ko Leta yishe Ntwali John Williams.'

Leta y'u Rwanda yahakanye kenshi ibirego biyishinja kohereza ingabo mu burasirazuba bwa RDC, isobanura ko bishingiye ku binyoma bikwirakwizwa na Leta ya RDC, igamije kurangaza amahanga n'abaturage kugira ngo batita ku nshingano yananiwe gukora.

Abanyamakuru bakorera mu Rwanda bemeza ko Byansi yabeshye abo mu ihuriro Forbidden Stories

Umunyamakuru Ntwali yishwe n’impanuka muri Mutarama 2023

Ibi byasabwe n'umuvugizi w'Umuryango wa Bibiliya mu Rwanda, Nyiricyubahiro Antione Cardinal Kambanda ubwo hibukwaga abari abakozi b'uyu muryango bazize Jenoside yakorewe Abatutsi mu 1994, ku cyicaro gikuru cyawo kiri i Kigali mu Karere ka Gasabo.

Umuvugizi wa Bibiliya Kambanda yavuze ko kwibuka mu magambo gusa bidahagije kuko bizagera aho abazi ayo mateka mabi yaranze igihugu basaza, ati 'Ndagira ngo nsabe Umuryango wa Bibiliya mu Rwanda ndetse n'abandi, ubuyobozi bwa Leta ibi bintu ni ukureba uko byajya byandikwa abana bacu, abuzukuru bakazajya bakomeza kubimenya.'

Yavuze ko abihaye Imana bafite inshingano yo gusana imitima y'Abanyarwanda, ati 'Mwebwe abantu mwihaye Imana inshingano mufite zikomeye cyane ni ugusana imitima no kuvuga ubutumwa bwiza ndetse no kubabwira ngo ibyabaye ni amahano, kubisubiramo biragoye.'

Umwe mu barokotse Jenoside yakorewe Abatutsi, Urujeni Eugenie, yatanze ubuhamya bw'ibyamubayeho muri ibyo bihe bitari byoroshye, ariko yemeza ubu yabashije gukira ibikomere.

Ati 'Ubuzima bwari bugoye, ndacyivuza ariko Imana yabanye nanjye numva nyiringiye, ndashimira rero Nyakubahwa Perezida wa Repubulika ndetse n'Ingabo yari arangaje imbere bitangiye igihugu. By'umwihariko ndashima Imana yagiye idukura mu mfu zitandukanye.'

Muri uku kwibuka abazize Jenoside yakorewe Abatutsi mu 1994 biri kuba ku nshuro ya 30, uyu Muryango wibutse abari abakozi babo barimo Karangwa Thomas Kitoko wari Umubitsi, Pasiteri Nkurunziza Alphonse wari mu nama y'ubuyobozi ashinzwe gusobanura Bibiliya, Pasiteri Iyamuremye Amon wari mu nama y'ubuyobozi na Kanamugire Theogene wari umunyamabanga mukuru w'umuryango wa Bibiliya mu Rwanda.

Urwibutso rushyinguyemo abakozi b’Umuryango wa Bibiliya mu Rwanda bazize Jenoside yakorewe Abatutsi mu 1994

Hacanywe urumuri rw’icyizere

Antoine Cardinal Kambanda yashyize indabo ku rwibutso rushyinguyemo abari abakozi b’Umuryango wa Bibiliya mu Rwanda bazize Jenoside yakorewe Abatutsi mu 1994

Hashyizwe indabo ku rwibutso rw’abari abakozi b’Umuryango wa Bibiliya mu Rwanda bazize Jenoside yakorewe Abatutsi

Hacanywe urumuri rw’icyizere

Kuri uyu wa 06 Kamena 2024 ni bwo Prosper Nkomezi na Gentil Misigaro bashyize hanze indirimbo ya kabiri bakoranye ariyo “Nyemerera”. Yasohokeye kuri shene ya Prosper, mu gihe iya mbere “Ndaje” yasohokeye kuri shane ya Gentil kuwa 19/09/2020, ariko nyuma yaho na Prosper aza kuyishyira kuri shene ye.

Igitekerezo cy’indirimbo ya kabiri bakoranye, “Nyemerera”, cyazanywe na Prosper Nkomezi. Ni indirimbo irimo ubutumwa bw’isengesho ryo gusaba Imana ngo ihembure ibyumagaye kandi itange ubuzima ku bitabufite. Misigaro ati “Nyituye umuntu wese uri kunyura mu bihe bigoye yifuza ko Imana yazura ibyapfuye cyangwa guhembura ibyumagaye”.

Mu kiganiro na inyaRwanda, Gentil Misigaro ushobora gutaramira mu Rwanda mu gihe cya vuba, yavuze ko Prosper Nkomezi ari umuramyi akunda, “tukaba n'inshuti mu buzima busanzwe”. Ati “Nkunda ibihangano bye kandi iyo dukoranye project [umushinga] biratworohera kuko twembi numva duhuje iyerekwa mu bijyanye n'umuhamagaro.”

Kuba bamaze gukorana indirimbo ebyiri mu gihe gito, ndetse buri umwe akaba afata mugenzi we nk’umuvandimwe, inshuti banahuye iyerekwa, wakwibaza niba bazakorana izindi ndirimbo kugeza kuri Album. Aba barambyi bavuze ko Imana ibishimye babikora. Gentil Misigaro ati “Album rero ntiturabiganiraho, ariko usibyeko nabyo byazashoboka Imana nibishima”.

Nyuma y’umwaka urenga yicishije irungu abakunzi be, Gentiil Misigaro avuga ko abizi neza ko amaze iminsi adasangiza abakunzi b'ibihangano bye indirimbo nshya, “ariko rwose ntabwo nari nsinziriye, nabanje gufata igihe cyo kubisengera”.

Uyu muhanzi wamamaye mu ndirimbo “Biratungana”, “Buri Munsi” Ft Adrien Misigaro na “Umbereye Maso” Ft Nice Ndatabaye, yavuze ko ibindi yari ahugiyemo ari ugutegura ibyo bihangano “ariko ndizera ko mu gihe gito tuzatangira kubagezaho ibindi bihangano, ndetse harimo n’izindi Collaboration”.

Ubwo bashyiraga hanze indirimbo ya mbere bakoranye “Ndaje”, Prosper Nkomezi yadutangarije ko nayo ari isengesho buri wese yakabaye asenga, asaba Imana ‘kumukoresha icyo ishaka uko wa buri kose'. Ati “Imana yaguhindura igikoresho cyayo cyiza iyo wayemereye kuyiha wese”.

Prosper Nkomezi uherutse gukora igitaramo gikomeye “Nzakingura Live concert” cyabereye muri Camp Kigali kuwa 12 Gicurasi 2024, ni umusore ukiri muto dore ko yavutse mu 1995. Yigeze kumena ijerekani ashyiramo Radio kugira ngo ajye abasha kumva neza umuziki udunda. Ngo byari ibimenyetso by'urukundo rw'umuziki rwashibutse muri we.

Nkomezi yakuriye mu muryango w'Abakristo, kandi igihe kinini cy'ubuto bwe yakimaze yiga gucuranga Piano. Yaririmbye muri Korali yo muri ADEPR mbere y'uko yerekeza muri Zion Temple. Avuga ko umwaka wa 2014, udasanzwe mu buzima bwe, kuko ari bwo Nyirarume yamwemereye kumufasha agatangira umuziki nk'umuhanzi wigenga.

Prosper Nkomezi wamamaye mu ndirimbo zirimo Ibasha “Gukora”, yigeze kubwira The New Times ati “Nari mfite Marume wacurangaga Piano. Yangiriye inama yo gutangira umuziki nk'umuhanzi. Yambonye ndirimba, aranshima, iyo n'iyo yabaye intangiriro y'umuziki wanjye.'

Mu 2017, ni bwo Nkomezi yasohoye indirimbo ye ya mbere yise 'Sinzahwema'. Yarakunzwe bimutera imbaraga zo kurushaho mu rugendo rw'umuziki we. Hari igihe cyageze indirimbo ze zikaririmbwa mu rusengero n'ahandi nawe ahari, ariko abantu ntibamenye ko ari ize.

Gentil Misigaro urambye mu muziki usingiza Imana, ni umuhanzi akaba n'umu Producer. Atuye muri Canada aho abana n’umuryango we. Yigisha umuziki muri Canada na cyane ko ari byo yize muri Classical & Contemporary Music. 

Yigishije umuziki mu mashuri anyuranye yaba aya Leta n’Ayigenga ndetse na n'ubu ni ko kazi akora muri Canada mu buryo bw'umwuga. Abitse mu rugo ibihembo (Awards) bitandukanye birimo na Top Canadian Immigrant of the year yahawe mu mwaka wa 2014. Ni umuhanzi ukora ibihangano mu rurimi rw’icyongereza, Ikinyarwanda n’Igiswahili. 

Indirimbo ze nyinshi azitunganyiriza muri studio ye iri muri Canada. Amaze gukora indirimbo zinyuranye zahembuye imitima ya benshi zirangajwe imbere na “Biratungana”. Tariki 10 Werurwe 2019 ni bwo yakoreye igitaramo cy’amateka mu Rwanda, cyakurikiwe n’ubukwe bwe na Rhoda Mugiraneza.

Prosper Nkomezi yongeye gukorana indirimbo na Gentil Misigaro

Gentil Misigaro yateguje indirimbo nshya mu bihe bya vuba

“Nyemerera” ibaye indirimbo ya kabiri Gentil Misigaro akoranye na Prosper Nkomezi

Byatangajwe kuri uyu wa Kane tariki 6 Kamena 2024, binyuze kuri Televiziyo Rwanda. Umuyobozi w’iyi Komisiyo, Oda Gasingizwa yavuze ko abajuje ibisabwa bemerewe guhatanira ku mwanya w’Umukuru w’Igihugu, ari Kagame Paul watanzwe n’umuryango FPR Inkotanyi, Habineza Frank watanzwe n’Ishyaka Green Party ndetse na Mpayimana Philippe, umukandida wigenga.

Umuyobozi w’iyi Komisiyo, Oda Gasinzigwa yavuze ko abajuje ibisabwa bemerewe guhatana ku mwanya w’Umukuru w’Igihugu, ari Kagame Paul watanzwe n’umuryango FPR Inkotanyi, Habineza Frank watanzwe n’Ishyaka rihanira Demokarasi no kurengera ibidukikije mu Rwanda (Green Party) ndetse na Mpayimana Philippe, umukandinda wigenga.

Abakandinda batujuje ibisabwa barimo Manirareba Hereman utaratanze Ilisiti y’abantu 600 bemewe gutora bashyigikiye Kandidatire ye.

Hakizimana Innocent

Ntiyujuje abantu nibura 12 bafatiye ikarita ndangamuntu mu karere ka Nyagatare na Gatsibo bari no ku ilisii y’itora y’utwo turere.

Mu Karere ka Nyagatare, Gatsibo, Gisagara na Kirehe harimo Nimero z’ikarita Ndangamuntu z’abamushyigikiye zimwe zitari zo, izindi zitabo n’izidahuye n’amazina y’abantu ku ilisiti y’itora yatanze.

Mu bamusinyiye kandi harimo abantu bagaruka ku ilisite irenze imwe, nyamara imikino y’abo itandukanye. Hari abantu bagaragara ku ilisite y’abamushyigikiye bemeza ko batigeze bamusinyira.

Barafinda Sekikubo Fred:

Ku ilisite yatanze y’abashyigikiye Kandidatire ye ntiyujuje abantu nibura 12 bafatiye ikarita ndangamuntu mu turere, kandi barino ku Ilisiti y’itora yatwo, harimo Nyabihu, Musanze, Nyagatare, Kirehe, Gakenke, Rubavu, Burera, Bugesera, Ngororero, Gatsibo na Kayonza.

Kuri Lisite yatanze hari ahari amazina gusa, nta nimero z’ikarita ndangamuntu ziriho. Hari ahari amazina n’imero z’indangamuntu ariko nta mikino ya banyirazo iriho.

Habimana Thomas:

Kuri Lisite yatanze z’abashyigikiye Kandidatire ye, ntiyujuje abantu nibura 12 bafatiye ikarita ndangamuntu mu turere, kandi bari no ku ilisite y’itora, ari two: Nyaruguru, Nyamasheke, Bugesera, Kireke na Rwamagana.

Mu karere ka Nyaruguru, Nyamasheke, Bugesera, Gisagara, Rwamagana na Gatsibo yatanze nimero z’ikarita ndangamuntu z’abamushyigikiye zitabaho n’izindi zidahuye n’amazina y’abari kuri Lisite. Hari kandi abantu bagaragara kuri Lisite y’abamushyigikiye, bemeza ko batigeze bamusinyira.

Rwigara Nshimyimana Diane:

Mu mwanya w’icyemezo kigaragaza ko umuntu yakatiwe cyangwa atakatiwe n’inkiko yatanze kopi y’urubanza.

Mu mwanya w’icyemezo cy’ubwenegihugu Nyarwanda bw’inkomoko gisabwa n’abwiriza ya Komisiyo yatanze inyandiko y’ivuka.

Kuri Lisite yatanze z’abashyigikiye Kandidatire ye, ntiyujuje abantu nibura 12 bafatiye ikarita ndangamuntu mu turere, kandi bari no ku ilisite y’itora yatwo ari two: Kamonyi, Gatsibo, Gasabo, Musanze, Nyagatare, Burera, Nyabihu na Kayonza.

Muri Lisite z’abamushyigikiye mu turere twa Huye na Gisagara, ikarita ndangamuntu z’abo ntizibaho. Hagaragaye kandi zimwe mu Nimero z’ikarita Ndangamuntu zidahuye n’amazina y’abo yanditse kuri Lisite y’abamushyigikiye.

Mbanda Jean: Ntiyasinyishije abantu nibura 12 bafatiye ikarita ndangamuntu mu turere 27, no ku ilisite y’itora yatwo. Yatanze Ilisite y’abamushyigikiye mu turere dutatu twonyine ari two: Gasabo, Bugesera na Kicukiro.

Oda Gasinzigwa yavuze ko ‘ibituzuye kuri Lisite y’Abashyigikiye Umukandida ntibishobora kuzuzwa nyuma y’itariki 30 Gicurasi 2024’.

Perezida Paul Kagame watanzwe n’umuryango FPR-Inkotanyi, yemejwe nk’umukandida ku mwanya w’Umukuru w’Igihugu 

Habineza Frank yatanzwe n’ishyaka Green Party, yemerewe guhatana ku mwanya w’Umukuru w’Igihugu 

Mpayimana Philippe yemerewe guhatana ku mwanya w’Umukuru w’Igihugu

Amavubi yatsinzwe igitego 1-0 na Benin mu mukino w’umunsi wa 3 w’itsinda C mu ijonjora ryo gushaka itike y’igikombe cy’Afurika, akomeza kuyobora iri tsinda.

Benin ikaba yakiririye Amavubi muri Côte d’Ivoire. Ikipe y’igihugu ikaba yatangiye uyu mukino neza ubona abakinnyi barimo kubonana bahererekanya neza.

Gusa bageragezaga kurema uburyo butandukanye bw’ibitego ariko nta mahirwe afatika yabonetse uretse umupira Rafael York yahinduye imbere y’izamu hakabura uwutera mu izamu.

Benin wabonaga itari mu mukino neza, yaje kubona amahirwe amwe ihita iyabyaza umusaruro, ni kuri koruneri yatewe na Jodel Dossou maze Dodo Dokou ahita atsinda igitego cya mbere ku munota wa 37.

Ku munota wa 41, Mutsinzi Ange Jimmy yarokoye Amavubi ni nyuma y’uko Umunyezamu Ntwali Fiacre yasohotse agakuraho umupira maze ukifatirwa n’umukinnyi wa Benin wahise atera mu izamu ariko Mutsinzi akahagoboka akawushyira muri Koruneri itagize icyo itanga. Amakipe yagiye kuruhuka ari 1-0.

Amavubi yatangiye igice cya kabiri akora impinduka, Rafael York na Hakim Sahabo bavamo hinjiramo Samuel Gueulette na Muhire Kevin ni nako ku munota wa 67 Rubanguka Steve yahaye umwanya Mugisha Bonheur, ku munota wa 70 Mugisha Gilbert aha umwanya Jojea Kwizera ni nako ku munota wa 82 Nshuti Innocent yahaye umwanya Gitego Arthur.

Ku munota wa 65, Ntwali Fiacre yakuyemo umupira ukomeye wa Steve Mounie.

Kuva ku munota wa 72, Amavubi yasatiriye cyane ashaka kwishyura iki gitego, arema uburyo bwinshi ariko ubwugarizi bwa Benin n’umunyezamu bababera ibamba. Umukino warangiye ari 1-0.

Gutsindwa uyu mukino Amavubi yakomeje kuyobora itsinda C n’amanota 4 anganya na Benin, Afurika y’Epfo ni iya gatatu n’amanota 3 izakina ejo na Nigeria ifite amanota 2 inganya na Mozambique na Lesotho zifitanye umukino ejo.

Amavubi azagaruka mu kibuga tariki ya 11 Kamena 2024 ikina Lesotho muri Afurika y’Epfo.