Category: Uncategorized

Police FC nyuma yo kwegukana igikombe cy’Amahoro yamaze kugera ku isoko ishaka abakinnyi izifashisha mu mwaka utaha w’imikino cyane ko izakina imikino Nyafurika ya CAF Confderation Cup.

Iyi kipe y’abashinzwe umutekano yabanje gukanga benshi bitewe n’abakinnyi yarekuye aho yarekuye umubare munini.

Benshi bari bafite amatsiko yo kubona uburyo iyi kipe iziyubuka, gusa yatangiye gukangana bitewe n’abakinnyi yamaze gusinyisha n’abo ishaka.

Abakinnyi babiri bamaze gusinyira iyi kipe ni umugande wahoze ukinira Rayon Sports, Joackiam Ojera ndetse na rutahizamu wa Bugesera FC ukomoka muri Nigeria, Ani Elijah.

Police FC kandi ikaba iri mu biganiro bya nyuma n’abakinnyi batandukanye nk’Umurundi ukinira Kiyovu Sports, Kilongozi Bazombwa Richard. Uretse uyu kandi ikomeje ibiganiro na Ishimwe Christian.

Uyu mukinnyi ukina ku ruhande rw’ibumoso yugarira, ntabwo APR FC izamwongerera amasezerano yamusabye kujya kwishakira indi kipe. Ntabwo arahuza na Police FC kubera ko we amahitamo ye ya mbere ari ukujya gukina hanze ariko na none mu gihe Police FC yamuha amafaranga yifuza yahita asinya.

Police FC ikeneye umukinnyi kuri uyu mwanya na yo ikaba irimo gukora ibishoboka byose ngo abe yayisinyira.

Andi makuru avuga ko bamwe mu bayobozi ba Police FC banatekereje kuzana Omborenga Fitina ariko ntibabihurizaho bakaba basa n’ababiretse.

Abandi bakinnyi bavugwa muri iyi kipe ni abakinnyi ba Kiyovu Sports, Cherif Bayo na Niyonzima Olivier Seif aho ngo bashobora gukuramo umwe akaba yakwerekeza muri iyi kipe. Umutoza Mashami yifuza Seif mu gihe ubuyobozi bwo bubona amahitamo meza ari Bayo.

Aba bakaba biyongera ku bakinnyi Muhadjiri bifuza kongerera amasezerano akaba atarasubiza, hari rutahuzamu Peter Agblevor waje mu mikino yo kwishyura y’umwaka ushize ariko akaba yarahise avunika.

11 b’inzozi kuri Police FC mu gihe bose baboneka))

Umunyezamu: Rukundo Onesime

Ba Myugariro: Omborenga Fitina, Ndizeye Samuel, Rwabuhihi Aime Placide na Ishimwe Christian

Abakina Hagati: Niyonzima Olivier Seif, Bigirimana Abedi na Hakizimana Muhadjiri

Ba Rutahizamu: Richard Bazombwa Kilongozi, Ani Elijah na Peter Agblevor

Ishimwe Christian ari mu biganiro na Police FC

Kilongozi mu muryango winjira muri Police FC

Ani Elijah yamaze gusinyira Police FC

Ikipe y’Igihugu y’u Rwanda y’umupira w’amaguru, Amavubi yaraye atsinzwe igitego 1-0 na Benin mu mukino w’Itsinda C mu ijonjora ryo gushaka itike y’igikombe cy’Isi cya 2026.

Ni umukino Benin yakiririye u Rwanda muri Côte d’Ivoire kuri Stade Félix Houphouët Boigny mu ijoro ryakeye ryo ku wa 6 Kamena 2024.

Muri iyi nkuru tugiye kugaruka ku bintu bimwe na bimwe byagaragaye muri uyu mukino bikwiye kuba isomo cyangwa byo gushima.

Guhagarara nabi k’ubwugarizi

Mu by’ukuri nubwo u Rwanda rwatsinzwe igitego kimwe na cyo cyaturutse kuri koruneri, ariko ubwugarizi bw’u Rwanda bwagiye bugaragaza guhagarara nabi, ni kenshi Benin yagiye yinjira mu rubuga rw’amahina biturutse ku mipira abakinnyi ba yo bahererekanyaga bakayinyuza kuri Manzi na Ange bari mu mutima w’ubwugarizi ndetse na Mangwende na Omborenga bakinaga ku mpande.

Nko mu gice cya mbere ku munota wa 40, Benin iba yabonye igitego cya kabiri ni nyuma yo kunyuza umupira hagati ya Ange na Thierrybakenda kugongana ariko Fiacre yasohotse awukuraho wahise wifatirwa n’umukinnyi wa Benin ashyira mu izamu ariko asanga Ange yahageze awukuramo.

Mu gice cya kabiri nabwo byabayeho nk’incuro 3 harimo n’iyo Steve Mounie yafashe umupira akinjira mu rubuga rw’amahina ateye mu izamu umupira ukubita igiti cy’izamu, ni mu gihe muri izo nshuro hari iyo Fiacre yasigaranye na rutahizamu Dokou awukuramo.

Hakim Sahabo na Rafael York bagaragaje urwego ruri hasi

Kimwe mu bintu byagoye Amavubi mu gice cya mbere, yari ameze nk’aho akina atuzuye kubera ko Hakim Sahabo wa Standard de Liege mu Bubiligi na Rafael York wa Gefle IF muri Sweden ntabwo bari mu mukino.

Aba bakinnyi wabonaga bagatakaza imipira bya hato na hato ndetse ntibanagire uruhare mu kongera kuyaka. Ibi byanatumye n’umutoza abona ko bitaza koroha maze mu gice cya kabiri ahita abakuramo azana Muhire Kevin na Samuel Gueulette. Nubwo bitahise bikunda ariko wabonye ko hari impinduka zabaye.

Jojea Kwizera ni uwo kwitega

Uyu mukinnyi ukina asatira anyuze ku mpande mu ikipe Rhode Island muri Leta Zunze ubumwe za Amerika, wari umukino we wa mbere mu ikipe y’igihugu Amavubi.

Yinjiye mu kibuga ku munota 70 asimbura Mugisha Gilbert. Kuva yagera mu kibuga yafashije Amavubi gusatira cyane, ayifasha kurema uburyo bwinshi nubwo igitego cyabuze ariko yagaragaje ko ari umukinnyi uzafasha ikipe y’igihugu Amavubi.

Umusimbura wa Migi ntaraboneka

Ikindi cyagaragaye ni uko kuva Migi yasezera ndetse na Yannick Mukunzi akaba amaze igihe adahamagarwa kubera imvune, nta musimbura wa bo uraboneka.

Nimugoroba hakinnye Rubanguka Steve wakoze ibyo ashoboye ariko ukabona ko adahagaze neza nk’abakuru be. Yaje gusimburwa na Mugisha Bonheur na we usa n’uwasubiye inyuma ugereranyije no mu myaka itambutse.

Sahabo ntabwo yagize umukino mwiza

Ange Mutsinzi ni we wari ufashe ubwugarizi bw’Amavubi

Nshuti Innocent (19) byanze, ni mu gihe Rubanguka Steve (8) ntabwo arafatisha mu kibuga hagati

Rafael York (16) na we yaraye agize umukino mubi

Jojea Kwizera yagaragaje ko ari umukinnyi wo kwitega

Manzi Thierry (17) na Mutsinzi Ange (5) bari bafite guhagarara nabi mu kibuga

Habimana Dominique agiye kuri uwo mwanya asimbuye Ngendahimana Ladislas uheruka kwegura ku mirimo nyuma y'imyaka itandatu akora muri urwo rwego.

Habimana yemejwe kuri uyu wa 6 Kamena 2024 ubwo hateranaga Inteko rusange y'uru rwego ruhuza inzego z'ibanze.

Uyu mugabo watowe ntabwo ari mushya mu bijyanye n'imiyoborere kuko yakoze mu nshingano zinyuranye mu bigo bitandukanye birimo imiryango mpuzamahanga ikorera mu Rwanda.

Uyu mugabo usanzwe ari umuhanzi afite inararibonye mu miyoborere kuko yakoze mu bigo bitandukanye birimo n'Ikigo cy'Abasuwisi gishinzwe Iterambere n'Imikoranire yari amazemo imyaka itandatu guhera muri 2018.

Yakoze kandi mu kigo cy'Abadage cya GIZ ari impuguke ishinzwe uruhare rw'umuturage mu bimukorerwa aho yakoraga ibikorwa birimo inshingano zo gukorana n'imiryango itari iya Leta, gutanga ubujyanama ku bafatanyabikorwa, guhanga udushya no gudutangaza n'ubundi bujyanama butandukanye imirimo yakoze guhera mu 2013-2015.

Mu 2016 yakoze kandi muri GIZ Rwanda nk'umujyanama Mukuru mu bijyanye n'imiyoborere ishingiye ku muturage.

Muri izo nshingano yakoranye bya hafi n'imiryango itari iya Leta, inzego z'ibanze n'ibigo bya Leta bitandukanye. Ni inshingano yamazemo imyaka ibiri kuko yazikoze guhera mu 2016-2018.

Habimana yakanyujijeho nk'umuhanzi w'Indirimbo ziramya zikanahimbaza Imana mu myaka 10 ishize mu ndirimbo zamenyekanye zirimo, Njyewe Na Yesu, Umunyarwanda, Icyiza Gitsinde Ikibi, Ndagukunda, New Generation, Oh Rwanda, Il est Rois, Imirimo itangaje, Narababariwe Izina Rizima, We need Peace, Naremeye, icyiza gitsinde ikibi n'izindi nyinshi.

RALGA ifite inshingano zirimo kongerera ubushobozi abakozi bo mu nzego z'ibanze no gutanga ibizamini muri izi nzego, nyamara izi nshingano zo gutanga ibizamini zimaze iminsi zihagaritswe kubera imikorere itaravuzweho rumwe mu mitangire y'ibi bizamini.

Habimana Dominique ni we watorewe kuyobora RALGA

RALGA yabonye umuyobozi mushya

Kuva mu 2022 hatangiye ubwo u Rwanda n'u Bwongereza byasinyaga amazerano yo kohereza abimukira mu gihugu, benshi mu batarwifuriza ineza bahise batangira kuzamura amajwi atesha agaciro ibikorwa byose ndetse bavuga ko igihugu kidatekanye ku buryo abimukira n'abashaka ubuhungiro batakigiriramo ubuzima bwiza.

Banyuze inzira y'inkiko no mu bitangazamakuru mpuzamahanga ngo basebye u Rwanda ariko byose bisozwa aya masezerano abaye itegeko mu 2024, haba mu Rwanda no mu Bwongereza.

Gusa haracyari abantu benshi barwanya iyi gahunda barimo ishyaka ry'Abakozi mu Bwongereza rivuga ko niritorerwa kuyobora igihugu rizahita ribihagarika.

Inkuru ya BBC yasohotse kuri uyu wa 7 Kamena 2024, igaruka ku banya Sri Lanka bane u Bwongereza bwohereje mu Rwanda ngo bahabwe ubuvuzi nyuma y'uko bagiye bagerageza kwiyahura aho bari bari mu nkambi yo ku kirwa cya Diego Garcia.

Bose uko ari bane baba mu nzu zishyurwa n'u Bwongereza, bukabaha amadorali ya Amerika 50 yo kubatunga buri cyumweru ariko ntibemerewe kugira umurimo bakora.

Abaganiriye n'iki kinyamakuru bavuze ko bagereranyije ubuzima bwo ku kirwa cya Diego Garcia no mu Rwanda, ubu ari bwo babayeho neza, ariko ngo bahorana ubwoba ndetse ngo ubuvuzi bahabwa bukaba ntacyo bubafasha ku buryo bahisemo kutazasubira kwivuza.

Aba bagabo n'umugore umwe barimo abasanganywe ibibazo byo mu mutwe bishingiye ku ihungabana [post-traumatic stress disorder] ndetse umwe yavuze ko kuba bari ahantu ha bonyine bituma baremba kurushaho.

Umuhuzabikorwa w'Itsinda rishinzwe ishyirwa mu bikorwa ry'amasezerano y'ubufatanye mu iterambere ry'ubukungu no kwita ku bimukira, Dr Doris Uwicyeza Picard yabwiye BBC ko aba bantu bari mu Rwanda ku mpamvu zo kwivuza kandi bahabwa 'ubuvuzi ku rwego rwiza rushoboka mu gihugu.'

Nubwo aba bantu bavuga ko no mu Rwanda bagenda bahura n'ibibazo bitandukanye by'umutekano bagaragaje ko batigeze babibwira inzego z'umutekano.

Dr Uwicyeza ati 'Ntabwo tuzi uburyo twabafasha niba batarigeze begereza inzego z'ubuyobozi bw'igihugu.'

'Ibyerekeye umutekano w'abimukira ntabwo ari ingingo ireba buri wese. Ntireba abanyarwanda bose, ntireba abaturage. Nshenguwe umutima no kumva hari umuntu ushobora kumva adatekanye muri iki gihugu, by'umwihariko twarakoze ibishoboka byose ngo kibe igihugu gitekanye kuri buri wese.'

Inteko Ishinga Amategeko y'u Bwongereza iheruka kwemeza ko u Rwanda ari igihugu gitekanye ndetse itora itegeko ryemera kohereza abimukira mu Rwanda.

Gusa Dr Uwicyeza yagaragaje ko amasezerano agenga abantu bavuye muri Diego Garcia ntaho ahuriye n'ay'abimukira bashobora koherezwa mu Rwanda kuko bo bafashwa kwinjira mu muryango Nyarwanda.

Yavuze ko ighugu gihora cyiteguye gufasha mu kwimura mu buryo buhoraho, ndetse ngo mu gihe byaba bibayeho na bo bahabwa uburenganzira bwo gukora ibikorwa bitandukanye mu muryango mugari.

Ati 'Ubu bari gufashwa nk'abantu boherejwe ngo bahabwe ubuvuzi.'

Nta mafaranga u Rwanda rwahawe yo kwakira aba bantu bavuye muri Diego Garcia, u Rwanda rukavuga ko byashingiye ku mubano w'ibihugu byombi usanzwe ari mwiza.

Dr Doris Uwicyeza Picard yagaragaje ko ababazwa n’abantu bavuga ko u Rwanda rudatekanye

Si ngombwa ko amoko yose y'imboga aboneka ku ifunguro ryawe rya buri munsi, ariko na none ni ngombwa ko byibuze buri funguro ryawe hagomba kubonekaho ubwoko bw'imboga.

Ibitunguru n'inyanya biri mu mboga zigira akamaro gakomeye ku buzima bw'umuntu kandi bikaba bihendutse cyane. Urebye nk'ibitunguru, kimwe wakigura 50 Frw ku isoko mu gihe ikiro (1kg) cy'inyanya kitarengeje 700 Frw, umufungo w'imboga za dodo ni 200 Frw.

Ugendeye kuri ibyo biciro, biragaragara ko mu mafaranga umuntu yaguramo icupa rimwe ry'inzoga mu kabari (1,000 Frw), harimo imboga zihagije umuryango wose mu minsi itanu, kandi mukaba muriye neza ibiryo byuje intungamubiri mu cyimbo cy'inzoga zangiza ubuzima bwawe.

Kurya imboga ku ifunguro rya buri munsi ni ingirakamaro ku bantu bakuru n'abana, kuko zikungahaye ku ntungamubiri zituma umubiri ugira ubudahangarwa, bityo tugaca ukubiri n'indwara. Healthline ivuga ko kurya imboga bigabanya ibiro bitewe n'uko zifite 'Calories' nke.

Imboga kimwe n'imbuto zikungahaye kuri Vitamini nyinshi; zirimo Vitamine A irinda ubuhumyi n'igwingira ry'abana, hakabamo Vitamini zo mu itsinda rya B, harimo B9 cyangwa 'Acide follique' ifasha cyane umwana uri mu nda gukura neza. Ibi byose bikubiye mu gitabo Journal of Medicine cyandikiwe mu Bwongereza kigasohoka mu mwaka wa 1991.

Nk'uko tubikesha ikigo gishinzwe kugenzura no kurinda indwara, Centers for Disease Control and Prevention (CDC), kurya ibitunguru byongerera umubiri ubudahangarwa kuko bikungahaye kuri Selenium na Quercétine byongerera umubiri ubudahangarwa.

Ubu budahangarwa bw'umubiri ububona ku mafaranga macye cyane kandi akenshi bikunze guhingwa mu turima tw'igikoni muri buri rugo. Gusa si bose kuko hari bamwe mu baturage bataracengerwa n'akamaro ko kurya imboga bitewe n'imyumvire no kutabona amakuru, ariko igihe ni iki bagatangira kubiha agaciro kuko uzaba uramiye ubuzima bwawe.

Uwitwa Emily Ho, umwarimu w'ibijyanye n'imirire akaba n'umuyobozi w’ikigo cya Linus Pauling muri Oregon State University, mu bushakashatsi bwe bwahuriranye n'ubwa kaminuza ya Havard, basanze kurya imboga rwatsi bigabanya ibyago byo kurwara indwara y'umutima.

Ubu bushakashatsi kandi bwasanze kurya imboga byongera ubushobozi bwo kureba, bigabanya ibyago byo kurwara indwara z'umuvuduko w'amaraso, kandi bikaba akarusho iyo zitetswe kuko ari bwo umuntu yakwizera ko nta myanda izo mboga zifite.

Albert Einstein umuhanga mu bugenge ukomoka mu Budage wavutse mu mwaka wa 1879, yaravuze ngo 'Nta kintu kigirira umumaro ubuzima bwacu kikongera amahirwe yo kuba kuri iyi si nko kurya intungamubiri zo mu mboga.'

Ku bw'ibi byiza byose imboga zikungahayeho, ntabwo mu muryango hagakwiye kuburamo imboga uko byagenda kose. Mu gihe haba hari umuntu ubonye utari wasobanukirwa neza n'ibyiza byo kurya imboga, ntabwo wagakwiye kugenda udasangije ibyiza by'imboga abandi.

Inyungu ziri mu kurya imboga, zatumye Minisiteri y'Ubuhinzi n'Ubworozi (MINAGRI), ku bufatanye n'Ikigo cy’Iterambere cy’u Bubirigi (Enabel), bashyira imbaraga mu bukangurambaga bwo gusobanurira abantu ibyiza byo kurya imboga. Ni ubukangurambaga bwatewe inkunga n'Umuryango w’Ubumwe bw’u Burayi (Union européenne) na Luxembourg.

MINAGRI iributsa ko ari ingirakamaro cyane, iti: 'imboga tuzihinge mu ngo iwacu, yewe no ku butaka buto nko mu karima k'igikoni, mu busitani, mu bikoresho tutagikoresha n'ahandi, ubundi izo tubura tuzihahe. Mbere yo kuzirya ariko tuzitegurane isuku, ikindi twirinde kuziteka mu mazi menshi no kuzitinza ku ziko, kugira ngo zidatakaza intungamubiri zazo'.

Nyuma y'uko kurya imboga ubigize umuco mu rugo rwawe, ukwiriye no gusangiza inshuti zawe ayo makuru meza yabafasha mu kwita neza ku buzima bwabo, ukabakundisha kurya imboga. Mu gihe hari abo wasuye bakakuzimanira kenshi amafunguro atariho imboga, ushobora kubikora mu kinyabupfura ukabakundisha kurya imboga, ntizihenda kandi zuje intungamubiri.

Amashu ni ngenzi cyane, arahendutse kandi nawe wayahinga yaba mu murima wawe no mu karima k’igikoni

MINAGRI irasaba abanyarwnda guhinga imboga kuko zuje intungamubiri

Ibitunguro biri mu mboga zifite akamaro gakomeye mu buzima bwawe

MINAGRI iri mu bukangurambaga bwo kwibutsa abanyarwanda akamaro k’imboga

Uyu mugore yiyongereye ku bandi barimo Ruti Joel, Itorero Inganzo Ngari ndetse na Mariya Yohana bazifatanya na Cyusa Ibrahim muri iki gitaramo kizabera muri Kigali Conference and Exhibition Village ahazwi nka Camp Kigali.

Ni ubwa mbere, Chrisy Neat agiye kugaragara mu gitaramo nk'iki cyagutse. Asanzwe ari Producer, ndetse ni umwe mu bize umuziki ku ishuri rya muzika rya Nyundo.

Muri iki gihe akorera muri Studio Ibisumizi ya Riderman. Ubwo yari mu kiganiro n'itangazamakuru, kuri uyu wa Gatatu tariki 5 Kamena 2024, Chrisy Neat yavuze ko atabona amagambo asobanura uko yiyumva, kuko gushyirwa mu bahanzi bazafasha Cyusa Ibrahim ari amahirwe adasanzwe.

Ati 'Murakoze cyane! Ndumva nishimye cyane naratoranyijwe n'umuvandimwe kuzaririmba mu gitaramo cye, navuga ko yampaye amahirwe akomeye kuko nzaririmba mu gitaramo cye, kandi ndi mu bantu nanjye bazatuma kiba cyiza cyane.'

Akomeza ati 'Rero, ni iby'igiciro kinini cyane! Ndanabimushikira cyo kimwe na Alex Muyoboke. Nanjye nashimira ibyo yavuze ko igitaramo kizaba cyiza cyanye.'

Kanoheli Christmas Ruth wafashe izina rya muzika rya Chrisy Neat, yatangiye gukorera muri Studio 'Ibisumizi' y'umuraperi Gatsinzi Emery 'Riderman' mu Ukwakira 2021. 

Ni nyuma y'iminsi micye yari ishize asoje amasomo ye ku ishuri rya Muzika rya Nyundo. Yinjiye mu mwuga wo gutunganya indirimbo z'abahanzi (Music Production) mu gihe uyu mwuga wari umaze igihe kinini wihariwe n'abagabo.

Mu 2016 ni bwo yagiye kwiga amasomo y'umuziki ku Nyundo. Yigeze kuvuga ko ubwo yahataniraga kwiga muri ririya shuri yagize ubwoba, ahanini biturutse ku banyempano yabonaga bari bahatanye ariko kandi 'nishimira ko nahawe umwanya nkagaragaza impano yanjye'. 

Ati 'Icyo gihe nahisemo gucuranga Piano nkanaririmba, banyuze abari bagize Akanama Nkemurampaka, ni uko natangiye urugendo rwanjye.  

Uyu mugore yabanje gukorera muri studio ya Capital Records mbere y'uko yerekeza mu Ibisumizi. Avuga ko kwinjira mu batunganya indirimbo, ahanini byaturutse ku kuba yarakuze yiyumvamo gukora ibintu bitandukanye n'ibyo abandi bakora. 

Ati 'Nakunze gusura studio zitandukanye, aba Producer bagashima ibikorwa byanjye, ibyo rero byampaye imbaraga zo kumva nakora umuziki.'

Muri muzika, uyu mugore aherutse gushyira hanze indirimbo ‘Yarakuze’ yakoranye na Riderman, ‘You got Me’, ‘Imaragahinda’ yasubiyemo, ‘Urungano’, ‘Urukundo’, ‘Ndakwiye’, ‘Ikibondo’ n’izindi. 

Igitekerezo cy'iki gitaramo 'Migabo Live Concert' cyavuye ku ndirimbo yakunzwe n'Abanyarwanda, uyu muhanzi yaririmbiye Umukuru w'u Rwanda, amushimira imiyoborere myiza n'ubutwari bwe bwayoboye urugamab rwo guhagarika Jenoside yakorewe Abatutsi mu 1994;

Gucyura no gutuza Abanyarwanda mu gihugu cyababyaye ndetse akaba arugejeje aho ruba ikitegererezo muri Afurika mu kwiyubaka n'iterambere rirambye kandi ryihuse. 

Nk'umuhanzi, avuga ko yumvise umusanzu we ari uko yahuriza hamwe abakunzi b'umuziki w'u Rwanda n'abahanzi b'indirimbo gakondo batandukanye, abatuye Umujyi wa Kigali n'inkengero zaweo guhurira hamwe bagatarama u Rwanda ruganje, banakeza 'iyo ntore izirusha intambwe'.

Akomez ati 'Kandi twishimira ibyagezweho muri iyi myaka 30, tunakundisha abato izo ndangagaciro bibutswa kandi gusigasira ibyagezweho.'

Kwinjira muri iki gitaramo ni ukwishyura 8,000 Frw mu myanya isanzwe, 15,000 Frw muri VIP, 30,000 Frw ku meza y’umuntu na 220,000 Frw ku meza y’abantu umunani. Ushobora kugura itike yawe unyuze ku rubuga www.ibitaramo.com  cyangwa se uguhamagara Nimero: 0787837802.

Chrisy Neat yatangaje ko ari amahirwe adasanzwe yagize yo kuba agiye guhurira ku rubyiniro na Cyusa Ibrahim

Chrisy Neat aherutse gushyira hanze indirimbo zirimo nka 'Imaragahinda', 'Urugano' n'izindi yasubiyemo

Cyusa yatangaje ko yiteguye gutanga ibyishimo mu gitaramo cye yise 'Migabo Live Concert' 

KANDA HANO UREBE IKIGANIRO N’ITANGAZAMAKURU CYUSA IBRAHIM YAHURIYEMO N’ABO BAZAFATANYA

“>

KANDA HANO UREBE AMASHUSHO Y'INDIRIMBO 'URUNGANO' CHRISY NEAT YASUBIYEMO

“>

Kimwe mu bintu bimaze kuba umuco kiranga injyana ya ‘Rap/Hip Hop’ ni ukwibasirana ‘Beef’ hagati y’abaraperi ndetse ikintu gitangaje akenshi usanga kiba intandaro yo gushwana kwabo ari uko umwe aba avuga ko ariwe urusha undi ubuhanga, bityo bikaba intandaro yo kwibasirana mu ndirimbo.

Magingo aya mu Rwanda inkuru yabiciye bigacika mu myidagaduro ni ‘Beef’ iri hagati y’abaraperi babiri aribo Ish Kevin na Zeo Trap wasohoye indirimbo yise ‘Sinabyaye’ aho yibasiye Ish Kevin kuburyo bukomeye aho yanatutse na Nyina umubyara.

Ibi si ibintu bishya kuko usubiye inyuma mu mateya ya Rap Nyarwanda, usanga n’abaraperi bayubatse barigeze gukozanyaho kakahava. Kwibasirana hagati ya Bull Dogg na P-Fla, K8 Kavuyo na Bull Dogg, Diplpmat na Fireman, Riderman na Bull Dogg n’abandi.

No ku rwego rw’Isi ni uko, abaraperi bakomeye nabo bagiye bibasirana mu bihe bitandukanye. Mu gihe muri Amerika hari hamaze iminsi havugwa ‘Beef’ ya Kendrick Lamar wibasiye Drake mu buryo benshi bavuze ko asa numusibiye amayira mu muziki.

Ubu Billboard ivuga ko injyana ya Rap yongeye kurangwamo intambara y’amagambo, yasohoye urutonde rw’indirimbo 10 zo kwibasirana hagati y’abaraperi bakomeye ku Isi zifatwa nk’izibihe byose bitewe n’amateka zanditse nibyo zahinduye kubaziririmbye nabo babwiraga.

Dore urutonde rw’indirimbo 10 za ‘Beef’ hagati y’abaraperi z’ibihe byose:

1. Hit ‘Em Up

Iyi ni indirimbo ya nyakwigendera Tupac Shakur Makaveli ufatwa nk’umwami w’injyana ya Rap. Iyi yayisohoye muri Kamena mu 1996 mbere gato y’uko yitaba Imana. Iyi ndirimbo ifatwa nk’iya mbere mu mateka bitewe n’amagambo yakoresheje yibasira The Notorious B.I.G bari bahangaye.

Ibitazibagirana Tupac yavugiyemo ni uko atangira yigamba kuri Biggie ko yaryamanye n’umugore we Faith Evans, avuga ko mbere y’uko Biggie amenyekana yajyaga amuha aho kuryama yahabuze, amubwirako we n’itsinda rya ‘Bad Boys’ ari abaswa cyane ndetse ko bamwigana. Mu byinshi bikomeye Tupac yavugiye muri iyi ndirimbo asoza abwira Biggie ati: ”Wowe na Mama wawe n’abana bawe n’abazagukomokaho mbifurije urupfu kandi muzapfe gahoro gahoro mwumve uko urupfu ruryana”.

2. The Story of Adidon

Umwaka wa 2018 ntabwo uzibagirana mu buzima bwa Drake kuko niwo mwaka mubi yagize mu muziki bikagera no mu buzima bwe busanzwe. Ibi byose byatewe n’indirimbo ‘The Story of Adidon’ y’umuraperi Pusha T usanzwe uzwiho kwandika indirimbo zikarishye.

Mbere gato Drake yasohoye iyo yise ‘Duppy Freestyle’ yibasiramo Pusha T, ibi byatumye Pusha T ababara maze yandika ‘The Story of Adidon’ aho yahise abwira isi yose ko Drake ari umugabo w’icyigwari wabyaye umwana akamwihakana ndetse akanamuhisha kuko yamubyaranye n’umugore witwa Sophia Brussaux ukina filime z’urukozasoni (Porn).

Drake warumaze gutamazwa ko yabyaye umwana w’umuhungu witwa Adonis yahishe abantu, yahise atangaza ko kuba yarahishe umwana we bitari ikimwaro ko yamubyaranye n’umukinnyi wa Porn ahubwo ko yagirango amuhishe itangazamakuru mu rwego rw’umutekano we.

3.Supa Ugly

Imwe mu ndirimbo zavugishije benshi zigasiga inkuru mu mihanda ya New York ni iyitwa ‘Supa Ugly’ ya Jay Z yibasiyemo Nas warumaze kumutukira mu ndirimbo yise ‘Ether’. Aha Jay Z usanzwe wiyubaha ntiyatinye kuvuga amagambo nyandagazi abwira Nas ndetse icyatunguye benshi ni uko yamubwiye ko yaryamanye inshuro zirenze 5 n’umugore we witwa Carmen Bryan ndetse anamugira inama yo gupima DNA z’umwana wabo kuko ngo yamusamye mu gihe nawe bajyaga baryamana. Ibi Jay Z yakoreye Nas birenda gusa nk’ibyo Tupac yakoreye Biggie.

4. No Vaseline

Mwumva benshi bavuga ngo abagabo baryamana bahuje igitsina (abatinganyi) ngo bakoresha amavuta ya Vaseline bakora imibonano mpuzabitsina. Iyi ndirimbo iri mu ntandaro zatumye benshi bavuga ko Vaseline ari iya batinganyi.

‘No Vaseline’ ni indirimbo y’umuraperi kabuhariwe Ice Cube benshi bita umwami wa ‘West Coast’. Yayikoze mu 1991 ubwo yarakimara kuva mu itsinda rya ‘N.W.A’ yabanagamo na Dr.Dre, Eazy E, MC Ren na DJ Yella. Kuva muri iri tsinda ryanditse amateka ku Isi Ice Cube yabitewe n’umujyanama wabo witwaga Jerry Heller batumvikanaga mu bijyanye n’amafaranga.

Iki gihe N.W.A niyo yabanje kwibasira Ice Cube imushinja ko yamaze kubona amafaranga akabicaho, byatumye nawe ahita asohora ‘No Vaseline’ aho yabwiraga Eazy E na MC Ren ko Dr.Dre abarongora adakoresheje Vaseline. Muri byinshi abashija harimo nko kuba ari abaswa bayobowe n’umuyahudi (Jerry Heller) ubashakaho amafaranga. Iyi ndirimbo Ice Cube kandi avuga ko Eazy E yishwe n’ibiyobyabwenge mu gihe Dr. Dre yirirwa akubita abagore. Kugeza nubu ifatwa nk’imwe muzandagaje aba baraperi cyane ko ari abanyabigwi muri Amerika.

5. Meet The Grahams

Ni indirmbo Kendrick Lamar aherutse gusohora yibasira Drake warumaze kumujomba igikwasi muyo yise ‘Family Matters’. Mu minota 30 gusa Drake ayisohoye, Lamar yahise asohora iyo yise ‘Meet The Grahams’ aho akubita atababarira abagize umuryango wa Drake ahereye ku babyeyi be hamwe n’umuhungu we.

Mubyavugishije benshi harimo nko kuba Kendrick Lamar atangira yibasira umuhungu rwa Drake amubwira ati: ”Birababaje kuba Drake ariwe papa wawe, nakwifuje ko yari kwambara condom aho kugirango akubyare’, akomeza avuga ko atarenganya Drake kuba atari umubyeyi mwiza kuko na Se yari yaramutaye kera akagaruka ariko amaze kuba umusitari. Avuga ko nyina wa Drake ari umubyeyi gito utarigeze amuha uburere nyabwo. Ibi byumije benshi ndetse bavuga ko ariyo ndirimbo yo kwibasira ariko ikoze mu buryo bw’ikinyabupfura (Most respectfull disrespectfull song ever).

6. Ether

Mu mateka ya Rap, ntihazibagirana ‘Beef’ ya Nasir Jones uzwi cyane nka Nas hamwe na Jay Z bigeze gukozanyaho kera. Mu 2001 Nas yasohoye indirimbo yise ‘Ether’ aho yibasiyemo bikomeye Jay Z, amubwira ko ibyo akora byose abimwigana, ko yigana Tupac, ari umucuruzi w’ibiyobyabwenge, amubwira ko mu baraperi 3 beza b’ibihe byose atarimo kuko Tupac na Biggie hamwe na Nas aribo beza kumurusha.

Nas kandi aho kumwita Jay Z yavugaga ngo ni ‘Gay-Z’ ibintu byatunguye benshi. Icyakoze nubwo iyi ndirimbo yayisohoye ikamamara yaje guba amazi imbere yiya Jay Z yamusubirijemo yise ‘Supa Ugly’ ari yaje ku mwanya wa kuri uru rutonde.

7. Family Matters

Mu ntambara y’amagambo Drake yaramazemo iminsi na Kendrick Lamar, yasohoyemo indirimbo yitwa ‘Family Matter’ yibasiyemo Lamar. Mu minota 7 yose Drake ayimara avuga uburyo Kendrick Lamar yatereranye umuryango we ndetse ko akubita umugore, ko yirirwa mu ngendo zidashira ntiyite ku bana be kandi ko guca inyuma umugore we abikora buri munsi. Ibi nibyo byatumye Kendrick Lamar ahita amusubiza muyo yise ‘Meet The Grahams’ yaje ku mwanya wa 5 kuri uru rutonde.

8. Back Down

Indi ‘Beef’ itazigabirana mu muziki ni iya 50 Cent na Ja Rule, mu ndirimbo ‘Back Down’ 50 Cent yakoze yibasira Ja Rule, yanamubwiyeko amwanga kuburyo azamwica hamwe n’umuryango we wose. Yaririmbye ati: ”Nzaguhanagura ku Isi wowe n’abawe, nzakwica, ngukurikize papa na mama wawe, abana bawe, umugore wawe n’undi wese muhuje amaraso”. Aya magambo yabagize abanzi kuburyo hashize ibinyacumi bibibi (2 Decades) Ja Rule na 50 Cent badacana uwaka.

9. Real Muthaphuckkin G’s

Mu 1993 Rap yo muri Amerika yari ishyushye cyane abaraperi badasiba kwibasirana, iki gihe Snoop Dogg afatanije na Dr. Dre bibasiye Eazy-E mu ndirimbo bise ‘Sleazy-E’, ntiyatindijemo yahise abasubiza muyo yise ‘Real Muthaphuckkin G’s”.

Aha yibutsa Dr.Dre ko atari kumenyekana iyo ataba kubwe kuko mbere yacurangaga mu bubari ntawumuzi nyuma yahura na Eazy-E agatangira gukundwa, yongeraho ati: ”Dr.Dre na Snoop biyita aba gangsta kandi bibeshyera, nabagira inama yo gushaka abarinzi babagendaho kuko isaha ku isaha nabarasa ntampuhwe nkibafitiye”’. Iyi iri mundirimbo zitazibagirana Eazy-E yasize aririmbye.

10. Shether

Nk’uko Nas yakoze indirimbo yise ‘Ether’ yibasira Jay Z, umuraperikazi Remy Ma we yakoze iyo yise ‘Shether’ yibasira Nicki Minaj kuburyo budasanzwe. Mu 2017 byari bikomereye Minaj ubwo Remy Ma yasohoraga iyi ndirimbo aho anenga Minaj kuba atarakunze uko Imana yamuremye kugeza ubwo yihinduza imiterere (Plastic Surgery) kuva ku mabere, amazuru, ikibuno kugeza no ku menyo.

Remy Ma warugifungurwa nyuma y’imyaka 5 yaramaze muri gereza azira gukubita umupolisi akamukura amenyo, muri iyi ndirimbo yibasiyemo Nicki Minaj, yamwise ko ari ‘Indaya’ yo mu muziki kuko ngo abahanzi bose yaryamanye nabo kuva kuri Lil Wayne, Trey Songz, Drake, Mac Maine, Birdman, kugeza kuri Lebron James. Anavuga ko Nicki Minaj atariwe wiyandikira indirimbo kuko afite ikipe y’abasore bamwandikira.

Izi nizo ndirimbo 10 za ‘Beef’ z’abaraperi z’ibihe byose zagiye zisohoka mu bihe bitandukanye. Billboard ivuga ko hari indirimbo nyinshi z’abahanzi bibasirana gusa ngo izi ziza ku isonga bitewe n’ubuhanga zakoranywe n’uburyo abazikoze batitangiriye mu kuvuga n’akari imurori.

APR FC irifuza kuba yasoje ibijyanye no kugura abakinnyi n’abatoza bitarenze icyumweru gitaha kugira ngo bahite batangira imyitozo.

Iyi kipe y’Ingabo z’Igihugu izahagararira u Rwanda mu mikino Nyafurika ya CAF Champions League 2024-25, yamaze kwemeza ko izatangira imyitozo tariki ya 17 Kamena 2024 yitegura umwaka w’imikino wa 2024-25.

Amakuru ISIMBI yamenye ni uko igomba gusubukura imyitozo yaramaze kubona umutoza usimbura umufaransa Thierry Froger wayihesheje shampiyona 2023-24.

Bivugwa ko nta n’igihindutse mu ntangiriro z’icyumweru gitaha bibaye byiza baba bamaze kumvikana na we cyane ko hari abagera muri 3 bari mu biganiro na bo.

Si abatoza gusa kuko iyi kipe izanitabira imikino ya CECAFA Kagame Cup mu kwezi gutaha, bivugwa ko yifuza kuba yaranamaze kubona abakinnyi bose yifuza, yaba ari bo yongerera amasezerano, abashya bazagurwa.

Bidasubirwaho amakuru avuga ko APR FC igomba gutangirana imyitozo n’abakinnyi bashya by’umwihariko abakina imbere mu gihugu bagomba kuba bose bahari.

Bivugwa ko igomba kongeramo byibuze abakinnyi 3 b’abanyamahanga na bo byitezwe ko nubwo batatangirana nabo imyitozo ariko byibuze ayo matariki agomba kugera baramaze kumvikana igisigaye ari ukuza gutangira imyitozo.

APR FC izasubukura imyitozo tariki ya 17 Kamena