Category: Uncategorized

Umuhanzi w’icyamamare wo muri Jamaica, Vybz Kartel, yahakanye amakuru yavugaga ko ateganya kuzataramira mu bihugu byo muri Afurika y’Iburasirazuba birimo Uganda, u Rwanda na Kenya muri Gicurasi 2026.

Mu minsi ishize nibwo ku mbuga nkoranyambaga hatangiye gukwirakwira amakuru avuga ko uyu muhanzi azagirira ibitaramo muri ibi bihugu mu rwego rw’uruzinduko rwe rw’ibitaramo rwiswe 'East African Tour.”

Nk’uko ayo makuru yabivugaga, Kartel yari kuzataramira i Kampala ku wa 1 Gicurasi 2026 kuri Lugogo Cricket Oval, agakomereza i Kigali ku wa 2 Gicurasi muri BK Arena, mbere yo gusoza uru ruzinduko i Nairobi ku wa 8 Gicurasi.

Nyuma y’ikwirakwira ry’ayo makuru, Vybz Kartel n’itsinda rimureberera inyungu bahise bayahakana, bavuga ko nta gitaramo na kimwe cyigeze gitegurwa cyangwa gitangazwa ku mugaragaro ko kizakorerwa muri aka karere.

Mu butumwa yashyize hanze, uyu muhanzi yavuze ko yaba we cyangwa ubuyobozi bumushinzwe nta makuru bafite kuri uru ruzinduko rwavugwaga. Yashimangiye ko nta bitaramo byo muri Afurika y’Iburasirazuba byigeze byemezwa n’itsinda rye.

Kartel kandi yaburiye abakunzi be ko hari abantu bashobora kuba bakoresha izina rye mu buryo butemewe bagamije kuyobya abantu cyangwa kubabeshya ibitaramo bidafite aho bihuriye n’ukuri.

Yagize ati 'Abantu bose cyangwa abategura ibitaramo bavuga ko banditse cyangwa bategura ibi bitaramo mu izina ryanjye barimo kuyobya abantu. Ndagira inama abakunzi banjye, abategura ibitaramo n’ahabera ibirori kudaha agaciro ayo makuru cyangwa kohereza amafaranga ku babivuga.'

Uyu muhanzi yibukije ko amatangazo yose ajyanye n’ibitaramo bye cyangwa ingendo ze atangazwa gusa ku mbuga ze zemewe cyangwa n’abamuhagarariye byemewe n’amategeko.

Yanavuze ko abantu bonyine bemerewe kuvuga cyangwa gukora ibikorwa mu izina rye ari umujyanama we, Linton T.J. White, ndetse n’umunyamategeko we Jason Mitchell, ashimangira ko abazagaragara bakoresha izina rye mu buryo bunyuranyije n’amategeko bazabiryozwa.

Vybz Kartel yahakanye ibyo kuza gutaramira mu bihugu birimo n’u Rwanda

Source : http://isimbi.rw/vybz-kartel-yateye-utwatsi-ibyo-gutaramira-mu-bihugu-birimo-n-u-rwanda.html

Kuva itangazo ry'ibi bihano ryasohoka ku mugoroba wo ku wa 2 Werurwe 2026, abayobozi bo muri Guverinoma ya RDC bari kwicinya icyara, bashimira Amerika ko yasubije icyifuzo bamaze imyaka myinshi bafite.

Minisitiri w'Ububanyi n'Amahanga wa RDC, Thérèse Kayikwamba Wagner, yatangaje ko icyemezo cya Amerika cyagaragaje ko nta muntu ugomba guhora arenga ku masezerano, yongeraho ko abayobozi bo muri RDC bahagaze bashikamye.

Makolo yasubije Kayikwamba ko ibinyoma n'imbaraga zose Leta ya RDC ikomeje gushyira mu icengezamatwara, ukuri kugaragaza ko ari yo ya mbere ifasha umutwe w'iterabwoba wa FDLR ubangamiye umutekano w'u Rwanda kuzagumaho.

Ati 'Leta ya RDC iracyari nimero ya mbere mu gufasha FDLR, ibikomeza kubangamira umutekano w'u Rwanda. Ibinyoma byose n'umutungo washyirwa mu icengezamatwara hagamijwe guhisha ubufasha Leta ya RDC iha FDLR, ntibizakuraho iki kibazo.'

Yashimangiye ko ibihano Amerika yafatiye RDF na bamwe mu bayobozi bayo bibogamye kandi ko bizatuma Leta ya RDC ikomeza kwifashisha imbaraga z'igisirikare, ibyo bikazenyegeza intambara n'ubugizi bwa nabi, ubuzima na bwo bukahatikirira.

Yagize ati 'Ikibabaje ni uko ibihano bibogamye bisunikira gusa Leta ya RDC mu kwizirika ku gushaka igisubizo cya gisirikare. Ingaruka ni ibyo tubona ubu: gukururuka kw'intambara, kwiyongera k'ubugizi bwa nabi, gupfusha ubusa amahirwe, igikomeye kikaba kubura ubuzima.'

Leta ya RDC na Amerika bishinja u Rwanda gufasha AFC/M23, gusa Makolo yatangaje ko iri huriro ryavutse kugira ngo rirwanye itotezwa rikorerwa Abanye-Congo rishingiye kuri politiki ya Leta ya RDC yo gushyigikira abamunzwe n'ingengabitekerezo ya jenoside.

Makolo yagaragaje ko amagambo menshi yibasira Abatutsi arimo ayavuzwe n'uwahoze ari Umuvugizi w'Ingabo za RDC, Gen Maj Sylvain Ekenge, ubwo yari kuri Televiziyo y'Igihugu (RTNC) ari yo atera ubugizi bwa nabi bushingiye ku moko, bushobora gukwirakwira mu karere kose.

Umuvugizi wa Guverinoma y'u Rwanda yavuze ko mu gihe abantu bashaka igisubizo cy'ibibazo, baba badakwiye kugoreka ukuri, cyangwa ngo bakwirengagize, kuko kubikora uko ari byo bituma ibibazo bidakemuka mu buryo burambye.

Amasezerano ya Washington yashyizweho umukono muri Kamena 2025, agashimangirwa mu Ukuboza uwo mwaka, yateganyaga ko Leta ya RDC igomba gusenya umutwe wa FDLR mu buryo bufatika, u Rwanda na rwo rugakuraho ingamba z'ubwirinzi rwashyizeho.

Nubwo raporo y'impuguke z'Umuryango w'Abibumbye yemeza ko Leta ya RDC yakomeje guha FDLR ubufasha na nyuma y'aya masezerano y'amahoro yasinyiwe i Washington, Amerika ntacyo yabikozeho, nta n'icyo ibivugaho.

Yolande Makolo yatangaje ko ibi bihano bibogamye bidateze guhagarika intambara yo muri RDC

Source : https://rushyashya.net/igisubizo-cyumuvugizi-wa-guverinoma-yu-rwanda-yahaye-drc-ku-kinya-cyibihano-amerika-yashyize-ku-rwanda-kirasobanutse/

Ishyirahamwe ry'Umukino wa Volleyball mu Rwanda (FRVB), ryasinyanye amasezerano n'Impuzamashyirahamwe y'Umukino wa Volleyball muri Afurika (CAVB) yo kwakira irushanwa rya CAVB Men's Club Championship 2026, rizabera i Kigali kuva ku wa 20 Mata kugeza ku wa 3 Gicurasi 2026.

Aya masezerano yashyizweho umukono kuri uyu wa Kane tariki ya 5 Werurwe 2026, mu muhango wabereye muri Kigali Convention Centre (KCC).

Ku ruhande rwa FRVB yari hahagarariwe na Perezida wayo Raphaël Ngarambe, mu gihe CAVB yari ihagarariwe na Perezida wayo Madamu Bouchra Hajij.

Uyu muhango wanitabiriwe na Minisitiri wa Siporo, Madamu Nelly Mukazayire, hamwe n'abahagarariye amakipe yo mu Rwanda azitabira iri rushanwa, arimo APR VC, Police VC na Kepler VC.

Iri rushanwa ngarukamwaka rigiye kuba ku nshuro ya 47, rikazahuza amakipe 24 yabaye aya mbere iwayo mu bihugu bitandukanye bya Afurika. Byitezwe ko iri rushanwa rizatanga n'itike ku makipe azabona amahirwe yo kwitabira Igikombe cy'Isi cy'amakipe (Club World Championship).

Perezida wa FRVB, Raphaël Ngarambe, yavuze ko bishimiye gusinya aya masezerano yo kwakira irushanwa rikomeye nk'iri mu Rwanda, anagaragaza ko ari amahirwe akomeye ku gihugu ndetse no ku mukino wa Volleyball muri rusange.

Perezida wa CAVB, Bouchra Hajij, yashimiye u Rwanda rwemeye kwakira iri rushanwa, agaragaza ko igihugu kimaze kwigaragaza mu kwakira amarushanwa mpuzamahanga no gutanga serivisi nziza ku bayitabira.

Yagize ati: 'U Rwanda ni umufatanyabikorwa wacu. Korohereza Abanyafurika kubona visa biri mu bituma ibyo rukora bigenda neza. U Rwanda rwerekanye ubushobozi bwo kwakira amarushanwa mpuzamahanga kandi mfite icyizere ko irushanwa rya 2026 rizagenda neza.'

Yakomeje agaragaza ko ubuyobozi bw'igihugu cy'u Rwanda bwagize uruhare runini mu guteza imbere siporo no guteza imbere impano z'urubyiruko.

Minisitiri wa Siporo, Nelly Mukazayire, na we yashimiye CAVB yagiriye u Rwanda icyizere cyo kwakira iri rushanwa, avuga ko ari ishema rikomeye ku gihugu.

Yagize ati: 'Ni ishema kuba ku nshuro ya mbere tuzakira Shampiyona Nyafurika ihuza amakipe yabaye aya mbere iwayo. Nk'abazakira, tuzereka abazitabira ko u Rwanda rufite ubushobozi bwo kwakira amarushanwa akomeye kandi rufite aho abakinnyi bashobora kugaragariza impano zabo.'

Mbere y'isinywa ry'aya masezerano, hanamuritswe ikirango cy'iri rushanwa rizabera i Kigali.

Iri rushanwa riheruka kuba mu 2025 mu Mujyi wa Misurata muri Libya, ryegukanywe na Swehly Sports Club yo muri icyo gihugu, mu gihe APR VC yo mu Rwanda yasoje iri ku mwanya wa kane.

Amateka agaragaza ko mu 2022, ikipe ya Gisagara VC yakoze amateka yo kuba iya mbere mu Rwanda yegukanye umudali muri iri rushanwa, ubwo yabaga iya gatatu itsinze Port de Douala amaseti 3—1 mu mukino wabereye i Kelibia muri Tunisia.

Iri rushanwa rya 2026 rizabera muri BK Arena na Petit Stade i Remera, rikazahuza amakipe akomeye ku Mugabane wa Afurika, bikaba byitezwe ko rizaba ari amahirwe yo gukomeza guteza imbere umukino wa Volleyball mu Rwanda no kuwumenyekanisha ku rwego mpuzamahanga.

Source : https://rushyashya.net/u-rwanda-rwasinyanye-na-cavb-amasezerano-yo-kwakira-shampiyona-nyafurika-yamakipe-yabagabo-2026/

Rayon Sports yageze muri 1/4 cy’Igikombe cy’Amahoro isezereye City Boys yo mu cyiciro cya kabiri iyinyagiye 11-0.

Kuri uyu wa Kane ni bwo habaye umukino wo kwishyura wa 1/4 kuri Kigali Pelé Stadium saa 15h30′.

Umukino ubanza Rayon Sports ikaba yari yatsinze City Boys yo mu cyiciro cya kabiri ibitego bibiri ku busa.

Uyu munsi Rayon Sports ikaba yakomeje nyuma yo gutsinda ibitego 9-0.

Habimana Yves akaba yatsinzemo ibitego bine, Fall Ngagne atsinda 2, Joachim Vigninou, Sinda Paul Jesus na Aziz Dao batsinze.

Rayon Sports ikaba izahura n’izakomeza hagati ya Police FC na Gicumbi FC zizakina ejo.

Undi mukino wabaye Gorilla FC yasezereye Muhazi United iyitsinze ibitego 6-0, ni nyuma y’uko umukino ubanza banganyije 0-0. Gorilla muri 1/4 izahura na AS Kigali yasezereye Marines FC.

Indi mikino ya 1/4, APR FC izahura na Gasogi United, Etincelles FC ihure na Bugesera FC.

Rayon Sports yanyagiye City Boys 11-0

Source : http://isimbi.rw/rayon-sports-yageze-muri-1-4-inyagiye-city-boys-11-0.html

Mu rwego rwo kongera kubaka icyizere no kugarura amahoro arambye, Délion Kimbulungu, Perezida wa Komisiyo ishinzwe gusubukura ubutabera ku ruhande rwa AFC/M23, yatangaje ko hagiye gushyirwa mu bikorwa gahunda nshya igamije kongera imbaraga mu butabera mu Turere twahuye n'ingaruka z'intambara.

Mu myaka ishize, Uturere twinshi twibasiwe n'amakimbirane ashingiye ku butaka, imiyoborere n'inyungu zitandukanye, ibintu byasize inzego z'amategeko zidakora neza ndetse n'abaturage badafite aho bahera basaba ubutabera. Ibyo byakurikiwe n'ihungabana, ubukene n'akajagari mu mibereho ya buri munsi.

AFC/M23 ivuga ko gahunda yayo izashyira imbere ubutabera bushingiye ku kuri no ku bwisanzure bw'abaturage. Hazashyirwaho uburyo bwihuse bwo kwakira no gukurikirana ibirego, hanatunganywe imikorere y'inzego z'ubucamanza n'iperereza kugira ngo imanza zicirwe mu mucyo.

Mu by'ingenzi bigize iyi gahunda harimo gukurikirana ibyaha byakozwe mu gihe cy'intambara, kongerera ubushobozi abacamanza n'abashinzwe iperereza binyuze mu mahugurwa, no kwegera abaturage babasobanurira uburenganzira bwabo. Hazanashyirwaho uburyo bwo gutanga raporo ku bikorwa byagezweho no gukumira amakimbirane ashobora kongera kubaho.

Ubuyobozi bwa AFC/M23 buvuga ko intego atari ugucira imanza gusa, ahubwo ari ugusigasira agaciro k'abaturage no kubaka amahoro arambye ashingiye ku butabera buboneye.

Source : https://kasukumedia.com/afc-m23-yatangije-gahunda-yo-gusubukura-ubutabera-mu-turere-twaranzwe-nintambara/

Imvune Cristiano Ronaldo yagize ishobora gutuma adakina imikino ibiri ya gicuti Portugal izakina yitegura igikombe cy’Isi, ni nako abakunzi be bari ku mavi ngo atazakiburamo.

Ni imvune yagize y’inyama zo mu itako izwi nka ‘Hamstring’ ku wa Gatandatu tariki ya 28 Gashyantare 2026 mu mukino batsinzemo Al Fayha 3-1, yavuye mu kibuga ku munota wa 81.

Ibizami bya mbere byagarageje ko ashobora kumara hanze y’ikibuga ibyumweru bibiri kugera kuri bine, akaba arimo gukorana n’itsinda ry’abaganga ngo azagaruke vuba bishoboka.

Cristiano amahirwe menshi ni uko atazitabira umwiherero wa nyuma w’ikipe y’igihugu ya Portugal izaba yitegura imikino ibiri ya gicuti uwa Mexico na Leta Zunze Ubumwe za Amerika izaba tariki ya 28 na 31 Werurwe 2026, bazaba bitegura igikombe cy’Isi cya 2026 kizabera USA, Mexico na Canada.

Abakunzi b’ikipe y’igihugu ya Portugal n’abakunzi ba Cristiano Ronaldo by’umwihariko barimo gusenga ngo akire vuba kandi iki gikombe kizaba guhera tariki ya 11 Kamena kugeza 19 Nyakanga 2026 kizasange ari muzima agikine kuko ni cyo cya nyuma azaba akinnye kandi gishobora no kumufasha kugera ku gahigo yiyemeje ashaka kwesa ko gutsinda ibitego 1000.

Cristiano Ronaldo yahagaritse imitima ya benshi

Source : http://isimbi.rw/cristiano-ronaldo-yahagaritse-imitima-ya-benshi.html

Perezida wa Gasogi United, Kakooza Nkuriza Charles, (KNC) yavuze ko uko byagenda kose azasezerera APR FC mu mikino ya ¼ cy’Igikombe cy’Amahoro.

Ni nyuma y’uko yasezereye muri 1/8 Musanze FC igera muri ¼ cy’Igikombe cy’Amahoro aho izahura na APR FC yo yasezereye Kiyovu Sports.

Uyu mugabo uzwiho guhiga cyane yavuze ko APR FC ibarusha byose ariko azakuramo iyi kipe akoresheje abakinnyi bakiri bato.

Ati 'Turabizi APR iturusha byinshi mu bushobozi, ifite n’abakinnyi b’amazina. Ariko aho gutunga abakinnyi bageze iyo bajya nagira abashaka kwandika amazina. Iyi APR FC ndayikuzamo abana kandi ndababwiza ukuri bazapfukama. Uzakomeza wese azagenda yikanda ibikomere.'

KNC yakomeje avuga ko atarimo avuga ibi kugira ngo ashyushye umukino abafana bazaze kuko APR FC nta bafana ikigira, ngo bashaka bazakina nta bafana bahari.

Ati 'APR FC nta bafana ikigira, abafana bayo bajya ku mikino yayo yakiriye ni nk’abacu twakinnye na Mukura n’izindi. Nta bafana ifite rwose. Ntihagire uvuga iby’amafaranga kuko ni dushaka tuzakine nta bafana bahari.'

Mu gihe Gasogi United na KNC basezerera APR FC ntibaba babikoze bwa mbere kuko no muri 2024 barayisezereye muri 1/4 kuri 4-3, ni nyuma y’uko amakipe yombi yari yanganyije ubusa ku busa mu mikino yombi.

KNC yahize kubabaza APR FC

Source : http://isimbi.rw/knc-yahize-kongera-kubabaza-apr-fc-yemeza-ko-itakigira-abafana.html

Umunya-Brazil ukina ruhago ku rwego mpuzamahanga, Neymar, yagaragaje agahinda gakomeye nyuma yo kumva ko mugenzi we, Rodrygo, yagize imvune. Mu butumwa bwe bwuje amarangamutima, Neymar yavuze ko uwo munsi wari umwe mu minsi imubabaje cyane mu buzima bwe.

Yagize ati: 'Uyu ni umwe mu minsi ibabaje kuri njye. Nkimara kumva iby'imvune ya Rodrygo, nkiri mu bitekerezo byanjye haciye nk'filime.' Yavuze ko yahise yibuka ububabare, n'ubwoba umuntu anyuramo igihe ahuye n'imvune ikomeye, cyane cyane ku mukinnyi ukiri muto ufite inzozi zo kugera kure.

Neymar yakomeje agaragaza urukundo n'ubuvandimwe amufitiye, amwita 'Nomero yanjye 10, umwana wanjye.' Yamusabye gushyira hafi ye abantu bose akunda muri ibi bihe bikomeye, kuko atari igihe akwiriye kunyuramo wenyine. Yongeyeho ko n'ubwo bigoye, hari ibyo tudashobora gusobanukirwa ku migambi y'Imana.

Yarangije amwihanganisha ati: 'Muvandimwe muto, gira imbaraga. Nzi neza ko uzagaruka uguruka. Nk'uko wambaye hafi igihe nari nkiri mu bihe bikomeye, nanjye nzaba ndi kumwe nawe buri munsi.' Aya magambo agaragaza ko mu mupira w'amaguru, urukundo n'ubufatanye biruta gutsinda ibitego.

Source : https://kasukumedia.com/neymar-ni-umwe-mu-bakinnyi-bagaragaje-amarangamutima-kubera-imvune-ya-rodrygo/

Uwase Muyango Claudine, wamenyekanye cyane nyuma yo kwegukana ikamba rya Miss Photogenic muri Miss Rwanda 2019, yatangaje ko adashyigikiye na gato imvugo ya Kakooza Nkuriza Charles uzwi cyane nka (KNC) wavuze ko akazi ko 'guhostinga' gafatwa nk'uburaya.

Ibi Muyango yabivuze mu kiganiro yagiranye n'itangazamakuru mbere yo gufata urugendo rwerekeza i Burayi, aho agiye kuyobora igitaramo kizabera mu Mujyi wa Brussels mu Bubiligi. Muri icyo gitaramo hateganyijwe kuzataramira abahanzi barimo Bruce Melodie na Sheebah Karungi, kikazaba ku wa 7 Werurwe 2026.

Ku wa Gatatu tariki ya 4 Werurwe 2026, Muyango yerekeje ku Kibuga Mpuzamahanga cy'Indege cya Kigali giherereye i Kanombe, atangira urugendo rwerekeza mu Bubiligi. Icyo gihe ku mbuga nkoranyambaga hakomeje kuvugwa cyane ku bijyanye n'akazi ko 'guhostinga', gakorwa ahanini mu birori no mu bitaramo.

Mu minsi ishize, KNC, washinze ikipe ya Gasogi United ndetse akaba anayobora Radio/TV1, yumvikanye atangaza ko kuri we 'guhostinga' ari uburaya. Aya magambo yatumye habaho impaka nyinshi ku mbuga nkoranyambaga, aho bamwe bavuze ko adakwiye, mu gihe abandi bo bamushyigikiye.

Muyango we yagaragaje ko 'guhostinga' ari akazi nk'akandi, gasaba ubunyamwuga n'ubushobozi bwo kuyobora ibirori, ashimangira ko bidakwiye guhabwa isura mbi. Yavuze ko buri wese akwiye kubaha imirimo itandukanye, aho kuyigaya cyangwa kuyitesha agaciro.

Source : https://kasukumedia.com/muyango-claudine-yanenze-imvugo-ya-knc-ku-kazi-ko-guhostinga/

Intambara ishobora kuvuka cyangwa kumara igihe kirekire hagati ya Amerika na Israel ku ruhande rumwe, na Iran ku rundi, ishobora guhindura isura ya politiki mpuzamahanga, cyane cyane ku nyungu z'u Burusiya. Mu gihe u Burusiya busanzwe buhanganye na Ukraine bushyigikiwe n'ibihugu by'i Burengerazuba, intambara mu Burasirazuba bwo Hagati ishobora kurangaza no kugabanya imbaraga z'ababushyigikiye.

Ibitero byagabwe kuri Iran n'iyicwa ry'umuyobozi wayo wo ku rwego rwo hejuru, Ayatollah Ali Khamenei, byateje impagarara mu Karere no ku rwego mpuzamahanga. I Moscow, bamwe mu basesenguzi babifata nk'ikimenyetso cy'uko Amerika n'abafatanyabikorwa bayo bashobora gufata ibyemezo bikomeye batitaye ku ngaruka zabyo.

Ku ruhande rw'u Burusiya, intambara nk'iyi ishobora gutuma Amerika igabanya inkunga ya gisirikare n'imari yahaga Ukraine, kuko yakenera kuyohereza mu Burasirazuba bwo Hagati. Ibi byaha u Burusiya amahirwe yo kongera imbaraga ku rugamba rwa Ukraine no gushimangira ibirindiro byabwo.

Nanone kandi, ihungabana ry'isoko ry'ingufu rishobora gutuma ibiciro bya peteroli bizamuka. Nk'igihugu gikomeye mu byohereza peteroli na gaz, u Burusiya bushobora kungukira mu izamuka ry'ibiciro ku isoko mpuzamahanga.

N'ubwo bimeze bityo, iyi ntambara yanateza umutekano muke ku rwego rw'Isi, bikagira ingaruka ku bukungu n'umutekano rusange. Ariko ku nyungu za politiki n'ubukungu, hari ababona ko u Burusiya bushobora kubonamo amahirwe mu gihe amahanga yaba ahugiye ku y'indi ntambara.

Source : https://kasukumedia.com/uko-intambara-ya-amerika-na-israel-kuri-iran-ishobora-kugirira-akamaro-u-burusiya/