Category: Uncategorized

Iki kigo kizatangira kubakwa mu mpera z'uyu mwaka, mu nshingano kizaba gifite harimo no gusuzuma ibihingwa ku buryo umuhinzi uzajya abona imyaka ye yarwaye, azajya aca akababi akakajyana kuri iki kigo bakagapimisha ibyuma byabugenewe mu kumenya iyo ndwara iyo ariyo.

Musabyimana Theophile, umuhinzi-mworozi ntangarugero wo mu murenge wa Nyabitekeri mu kiganiro na IGIHE yavuze ko mu byo yiteze kuri iki kigo harimo kumufasha kongera umusaruro kuko hari ubwo yajyaga ahinga adakoreshe inyongeramusaruro.

Ati 'Hari ubwo nabonaga kubona ingongeramusaruro bingoye ngapfa gutera bigatuma ntabona umusaruro uhagije'.

Igiraneza Berthe yashimye kuba muri iki kigo kigiye kubakwa harimo n'isuzumiro ry'ibihingwa avuga ko rizaba ari igisubizo kuko hari ubwo bahingaga imyaka ikuma ntibabone umusaruro kandi wenda bashoboraga gutera umuti igakira.

Umukozi w'Umushinga Hinga Wunguke uterwa inkunga na USAID, Nyabyenda Jean Paul, yavuze ko impamvu bahisemo kubaka iki kigo mu karere ka Nyamasheke ari uko mu turere bubatsemo ikigo nk'iki babonye gitanga umusaruro.

Ati 'Ikigo Farm Service Center mu byo kizakemura harimo ibura ry' inyongeramusaruro ku bahinzi kuko bazajya bayibonera hafi. Kizaba gifite abakozi bajya hasi mu mirenge guhugura abaturage bakora ubuhinzi n'ubworozi,”

“Umuhinzi uzajya abona imyaka ye yarwaye yemerewe gusoroma ibabi akarizana bakamubwira icyo icyo gihingwa kirwaye. Muri iki kigo kandi hazaba harimo ikoranabuhanga ku buryo umuhinzi cyangwa umworozi ashobora gufata umwanya akareba mu mashusho uko ubuhinzi n'ubworozi bikorwa kinyamwuga'

Akarere ka Nyamasheke kagiye kubakwamo iki kigo kari mu turere dufite abaturage benshi batihagije mu biribwa kuko mu baturage barenga ibihumbi 400 bagatuye abihagije mu biribwa ari 74% mu gihe ku rwego rw'igihugu Abanyarwanda bihagije mu biribwa ku kigero cya 80%.

I Nyamasheke hagiye kubakwa Ikigo cy'Ikitegererezo mu buhinzi n’ubworozi

---

Source : http://igihe.com/amakuru/u-rwanda/article/nyamasheke-hagiye-kubakwa-ikigo-cy-ikitegererezo-mu-buhinzi-n-ubworozi

Javier Tebas, Perezida wa La Liga, yanenze Real Madrid kubera kutitabira ibirori bya Ballon d'Or no kwijujutira uburyo France Football itanga iki gihembo. Yavuze ko kwerekana ko ikipe irengana bidakwiye kandi bigaragaza kubura ikinyabupfura, bikaba bigaragarira no mu makimbirane yo mu gihugu imbere.

Rodri yegukanye Ballon d'Or ya 2024, ibintu byateje impaka mu bafana n'abayobozi ba Real Madrid, batishimiye ko Vinícius Jr. atahawe agaciro. Ibi byatumye Real Madrid yirinda kwitabira ibirori, icyemezo Tebas yamaganye.

Umubano wa Real Madrid na La Liga umaze igihe urimo amakimbirane, by'umwihariko ku ngingo z'imari n'ubuyobozi bwa shampiyona. Iki kibazo gishya kigaragaza ko ubushyamirane bukomeje, kandi Tebas yihanangirije Real Madrid, avuga ko guhora yitwara nk'iyarenganye bishobora kwangiza isura ya ruhago ya Espagne.

Source : https://yegob.rw/perezida-wa-la-liga-javier-tebas-yanenze-imyitwarire-ya-real-madrid-ayishinja-ibintu-bikomeye/

Ku mugoroba wo kuri uyu wa Kane tariki ya 31 Ukwakira 2024 nibwo Perezida Kagame yagaragaye muri Sitade Amahoro aje gushyigikira ikipe y'igihugu AMAVUBI.

Ni mu mukino wo kwishyura mu gushaka itike y'igikombe cya Afurika cy'abakina imbere mu gihuhugu wahuje u Rwanda na Djibouti.

Ni umukino warangiye u Rwanda rutsinze Djibouti ibitego 3-0, ibitego bibiri muribyo byatsinzwe na Dushimimana Olivier uzwi nka Muzungu ndetse ikindi kimwe gitsindwa na Tuyisenge Arsène.

Gutsinda uyu mukino ku ruhande rw'uRwanda bisobanuye ko bageze mu kiciro cya kabiri cy'iri rushanwa aho bitegura ko igikombe cya Afurika kizabera muri Tanzania, Uganda na Kenya, Amavubi yazisangayo.

Uyu mukino kandi wakurikiwe na Perezida Kagame ari kumwe na Minisitiri wa Siporo Nyirishema Richard na Perezida wa FERWAFA, Munyentwari Alphonse.

Ubwo uyu mukino wari urangiye, ishyirahamwe ry'Umupira w'Amaguru mu Rwanda bashimiye Perezida Kagame.

Bagize bati 'Tubashimiye byimazeyo ku mwanya wanyu muba mwatugeneye, biratwubaka kandi bikadutera imbaraga zo gukomeza gukora cyane. Mwakoze cyane kudufasha gukosora.'

Gusezerera Djibouti ku giteranyo cy'ibitego 3-1 mu mikino yombi byatumye u Rwanda ruzahura na Kenya mu ijonjora rikurikiyeho.

The post Perezida Paul Kagame yakurikiye umukino u Rwanda rwatsinzemo Djibouti 3-0 hashakwa itike ya CHAN 2025 appeared first on RUSHYASHYA.

Source : https://rushyashya.net/perezida-paul-kagame-yakurikiye-umukino-u-rwanda-rwatsinzemo-djibouti-3-0-hashakwa-itike-ya-chan-2025/?utm_source=rss&utm_medium=rss&utm_campaign=perezida-paul-kagame-yakurikiye-umukino-u-rwanda-rwatsinzemo-djibouti-3-0-hashakwa-itike-ya-chan-2025

Kuri uyu wa kane saa tatu za mu gitondo ku rukiko rw'ibanze rwa Kicukiro ,haburanishijwe urubanza Nyampinga Muheto Nshuti Divine aregwamo ibyaha bifitanye isano n'ubusinzi.

Nyuma yo kujya kumva urubanz rwa Miss Muheto Divine na Fatakumavuta, Yaka Mwana yatawe muri yombi kubwo guteza akavuyo ku rukiko nyuma yo kunywa inzoga.

The post Yaka Mwana yatawe muri yombi kubwo guteza akavuyo kurucyiko appeared first on KASUKUMEDIA.COM.

Source : https://kasukumedia.com/yaka-mwana-yatawe-muri-yombi-kubwo-guteza-akavuyo-kurucyiko/

Ku wa 29 Ukwakira 2024, Bishop Harerimana n'umugore we bakekwaho ibyaha bitatu birimo kwihesha ikintu cy'undi hakoreshejwe uburiganya, gukangisha gusebanya no gukwirakwiza amafoto y'imikoreshereze y'ibitsina, bagejejwe imbere y'ubutabera baburana ifungwa n'ifungurwa ry'agateganyo.

Nyuma yo kumva impande zombi mu rubanza rwabaye mu muhezo, kuri uyu wa kane tariki ya 31 Ukwakira 2024 nibwo urukiko rwasomye umwanzuro warwo rwemeza ko Bishop Harerimana n'umugore we barekurwa by'agateganyo.

Aba bombi batanze inzu yabo ifite agaciro ka Miliyoni 60 nk'ingwate y'ikimenyetso cy'uko batazigera batoroka ubutabera.

 

Source : https://inyarwanda.com/inkuru/148213/bishop-harerimana-wa-zeraphat-holy-church-yafunguwe-byagateganyo-atanga-ingwate-yinzu-ye-148213.html

Kuri uyu wa gatatu, tariki 30 Ukwakira 2024, Perezida Félix Tshisekedi wa Repubulika Iharanira Demokarasi ya Kongo yagiriye uruzinduko muri Uganda, aho yakiriwe na mugezi we w'icyo gihugu, Yoweri Kaguta Museveni.

Itangazo risoza urwo ruzinduko rivuga gusa ko abakuru b'ibihugu byombi baganiriye ku buryo amahoro yagaruka mu burasirazuba bwa Kongo no ku mubano 'mwiza'usanzwe hagati ya Kongo na Uganda.

Ibikubiye muri iryo tangazo ni ubuhendabana, kuko nta mubano mwiza usanzwe hagati y'ibyo bihugu.

Icya mbere, ubutegetsi bwa Kongo ntibusiba gushyira Uganda n'uRwanda mu gatebo kamwe, bishinjwa gushyigikira umutwe wa M23, ndetse Perezida Museveni akaba atarya indimi iyo avuga ko 'M23 irwanira impamvu yumvikana'.

Icya kabiri, ntiwashyira Uganda mu nshuti za Kongo, kandi bizwi ko Tshisekedi afata nk'umugambanyi umuntu wese umugira inama yo gushyikirana na M23, we yita umutwe w'iterabwoba. Nyamara Museveni yamaze kuvuga ko amahoro muri Kongo adashoboka hatabayeho gutega amatwi ibyifuzo bya M23, we asanga ' bitanagoranye'.

Icya gatatu, Perezida Museveni ni umwe mu bababajwe n'agasuzuguro Tshisekedi yagaragarije Umuryango w'Afrika y'Uburasirazuba(EAC), ubwo yirukanaga nabi ingabo z'uwo muryango zari zoherejwe kubungabunga amahoro muri Kongo, akazisimbuza iza SADC, atanagishije inama bagenzi be bahuriye muri EAC.

Rushyashya yashoboye kumenya impamvu nyakuri yajyanye Tshisekedi muri Uganda:

Umutwe wa M23 ukomeje kugaragaza imbaraga zidasanzwe, zituma buri munsi yigarurira uduce dushya. Nyuma yo gufata ibice binini muri teritwari za Nyiragongo, Masisi na Rutshuru, ubu abarwanyi b'uwo mutwe bamaze kwinjira no muri Teritwari ya Walikale.

Bukurikije ingufu n' umuvuduko wa M23, ubutegetsi bw'i Kinshasa bufite ubwoba ko mu gihe gito yaba yigaruriye na Butembo muri teritwari ya Lubero, na Buniya mu ntara ya Ituri, kandi iramutse ihafashe byayorohera kugera no mu zindi ntara nka Tshopo, Haut-Uele na Bas-Uele.

Kubera rero ko muri utwo duce hari ingabo za Uganda zagiye kurwanya umutwe wa ADF, Tshisekedi yari muri agiye muri Uganda gutakambira Museveni ngo ingabo ze zizakumire M23, ziyibuze gushinga ibirindiro muri utwo duce. Mu rwego rw'agahimbazamusyi ndetse, Tshisekedi ngo yiteguye kwegurira Uganda ibirombe by'amabuye y'agaciro muri Ituri, nk'uko yari yahaye Abarundi na Afrika y'Epfo ibirombe bya Rubaya nubwo M23 yahise ibibambura.

Amakuru yizewe aravuga ko Perezida Museveni yirinze kugira izeserano iryo ari ryo ryose aha Tshisekedi, kuko agisanga ibibazo bya Kongo bidashobora kurangizwa n'imbaraga za gisirikari. Yongeye gusaba ubutegetsi bwa Kongo kuva ku izima bugashyikirana na M23, maze Tshisekedi udakozwa ibiganiro n'uwo mutwe arahambira, arataha.

Abategetsi bombi kandi banagarutse ku mushinga wa Tshisekedi wo guhindura itegekonshinga rya Kongo. Perezida Museveni yabwiye Tshisekedi ko atifuza kwivanga muri icyo kibazo kireba gusa Abakongomani, ariko amugira inama ko mu gihe abaturage bagaragaza ko batishimiye uwo mushinga, yawureka, kuko warushaho koreka Kongo, n'ubundi isanganywe ibibazo bikigoye kubonerwa umuti.

Ngibyo rero ibyajyanye Tshisekedi muri Uganda, aho yavuye nta nkunga ifatika ya Perezida Museveni atahanye.

The post Ukuri kutavuzwe ku rugendo rwa Tshisekedi muri Uganda appeared first on RUSHYASHYA.

Source : https://rushyashya.net/ukuri-kutavuzwe-ku-rugendo-rwa-tshisekedi-muri-uganda/?utm_source=rss&utm_medium=rss&utm_campaign=ukuri-kutavuzwe-ku-rugendo-rwa-tshisekedi-muri-uganda

Iby'abanyeshuri batsindwa amasomo ya siyansi byatangiye kuvugwa cyane nyuma y'uko abatsinze ibizamini bya Leta mu mashuri abanza n'ayisumbuye bamenyeshwaga ibigo bazigaho mu mwaka w'amashuri wa 2024/2025, bagasanga harimo abagize zeru mu masomo ya siyansi boherejwe kuyiga mu cyiciro cya kabiri cy'amashuri yisumbuye.

Uretse ibizamini bya Leta, isuzuma rikorwa ku banyeshuri bo mu burezi bw'ibanze harebwa ubumenyi bafite mu Kinyarwanda, Icyongereza n'Imibare rigaragaza ko abanyeshuri bo mu mwaka wa gatatu w'amashuri abanza mu 2021 batsinze imibare bari 69,94% bigeze mu 2023 biragabanyuka bagera kuri 55.6%.

Mu biganiro abadepite bagize Komisiyo y'Uburezi, Ikoranabuhanga, Umuco, Siporo n'Urubyiruko bagiranye n'ubuyobozi bwa NESA kuri uyu wa 31 Ukwakira 2024, Depite Niyongana Gallican yagaragaje ko igihugu gishaka ko abana benshi bashobora kubona aho biga amasomo ya siyansi bakwiye kuyiga ariko ikibazo kikaba ko usanga mu nguni zitandukanye bazitsindwa.

Ati 'Ikibazo cyabaye ni uko bavugaga ngo babashyize muri siyansi kandi barazitsinzwe. Umuti ni ugushaka impamvu bazitsindwa nyine. Numva ari ho hashakirwa ingamba kuko ubundi turifuza ko abana biga siyansi kandi nemera ko ubundi umwana wese afite ubwo bushobozi bwo kuziga ateguwe uko bikwiye, kandi ninabyo twifuza, twifuza ko abafite ayo mahirwe yo kuba bakwiga siyansi baziga.'

Umuyobozi Mukuru wa NESA, Dr. Bahati Bernard yagaragaje ko amasomo ya siyansi asaba ibintu byinshi birimo abarimu bayize neza n'ibikoresho kenshi usanga bihenze.

Ati 'Siyansi isaba icya mbere abarimu bayize neza, reka tuvuge ko tubafite ariko igasaba ibikoresho ari byo bidahari ari na yo mpamvu usanga mu masuzuma yaba ayo twavuze mbere yaba no mu bizamini bya Leta, mwavuze mu mibare, n'andi masiyansi rwose ntabwo abana bayatsinda neza.'

Yavuze ko hari igenzura ryakozwe basanga integanyanyigisho ikoreshwa ikubiyemo ibintu byinshi ku buryo umwalimu atabasha kuyigisha mu buryo buboneye.

Ati 'Hari impamvu nyinshi abantu barebaho harimo uko kubura kw'ibikoresho, abantu bareba ku barimu, integanyanyigisho burya na yo igira uruhare. Hari ibyo tumazemo iminsi ubwo twari turi guhuza isuzuma rya LARS n'ibipimo mpuzamahanga abantu baje kubidufashamo barebye integanyanyigisho yacu batubwira ko iremererye, ni ukuvuga ngo dushaka kwigisha abana byinshi cyane bikarangira tubahaye bikeya.'

'Twabiganiriyeho na REB tunabereka raporo baduhaye nkeka ko mu minsi iri imbere hazabaho kugenzura ryo kureba uburemere ngo harebwe ibigomba kwigwa ibyo ari byo kuko ni na kimwe mu ntego Minisitiri w'Uburezi afite cyo kuvugurura integanyanyigisho abana bakiga iby'ingenzi aho kugira ngo dushake kubaha byinshi twibone twabahaye duke cyane kubera ko aba ari byinshi abarimu bakabinyuramo biruka.'

Imibare ya Minisiteri y'Uburezi igaragza ko abanyeshuri binjiye mu mashuri y'uburezi rusange bw'amashuri yisumbuye bavuye kuri 168.595 mu 2022 bagera kuri 170.399 mu 2023.

Perezida wa Komisiyo, Rubagumya Furaha Emma yavuze ko hakwiye kwitabwa ku buryo bw'imyigishirize n'abigisha kuko ahari umwalimu mwiza ireme ry'uburezi riba ari ryiza umunyeshuri agasohokana ubumenyi buzamugirira akamaro.

Umuyobozi Mukuru wa NESA, Dr Bahati Bernard yavuze ko hakiri ikibazo cy’ibikoresho n’integanyanyigisho iremereye

Depite Niyongana Gallican yavuze ko hakwiye gushaka umuti w’ikibazo gituma abana batsindwa siyansi

Perezida wa Komisiyo Rubagumya Furaha Emma yavuze ko ari byiza kwita ku buryo bw’imyigishirize

---

Source : http://igihe.com/amakuru/u-rwanda/article/dushaka-kwigisha-abana-byinshi-cyane-bikarangira-tubahaye-bikeya-dr-bahati-wa

Fatakumavuta usanzwe ari umunyamakuru wa Isibo FM binyuze mu kiganiro 'Isibo Radar' yitabye Urukiko rw'Ibanze rwa Kicukiro, kuri uyu wa Kane tariki 31 Ugushyingo 2024.

Mu rukiko, Umunyamategeko yasabye ko urubanza rw'umukiriya we rusubikwa kubera ko batabonye dosiye muri sisiteme ngo bategure urubanza. Urukiko rwanzuye ko urubanza rwe ruzakomeza tariki 5 Ugushyingo 2024.

Umunyamategeko yavuze ko bamenyeshejwe itariki yo kuburana ku wa 30 Ukwakira 2024, ariko ntibabashije kubona dosiye yari kubafasha gutegura urubanza ku ifunga n'ifungurwa ry'agateganyo.

Umushinjacyaha ariko yavuze ko ibivugwa n'uruhande rw'uregwa nta shingiro bifite. Ariko yongeraho ko bafite uburenganzira bwo gusaba ko rusubikwa.

Umunyamategeko yavuze ko bakeneye igihe cyo kwitegura no guhabwa dosiye, cyane ko ibyaha Fatakumavuta akurikiranyweho bishobora kumujyana muri gereza, ari nayo mpamvu bagomba kwitegura kugirango bazaburane kuri buri kimwe, kuko hari ibyaha byagiye byongerwa muri dosiye.

Urukiko rwafashe umwanzuro w'uko urubanza ruzaburanishwa ku wa Kabiri tariki 5 Ugushyingo 2024. 

Ku wa 18 Ukwakira 2024, ni bwo Urwego rw'Igihugu rw'Ubugenzacyaha (RIB) rwatangaje ko rwataye muri yombi Sengabo Jean Bosco uzwi nka 'Fatakumavuta', akurikiranyweho ibyaha birimo gukoresha imvugo zishyamiranya abantu mu myidagaduro, gutukana mu ruhame no kubuza amahwemo hifashishijwe imbuga nkoranyambaga.

Icyo gihe, Umuvugizi wa RIB, Dr Murangira B. Thierry yabwiye InyaRwanda ko Fatakumavuta yafashwe 'nyuma yo kwihanangirizwa inshuro yinshi ndetse agirwa inama ariko ahitamo kwinangira.'

Uyu mugabo yatawe muri yombi nyuma y'iminsi yari ishize, bamwe mu bakoresha imbuga nkoranyambaga, bahererekanya amashusho ye 'yibasira umuryango wa Meddy n'umugore we Mimi', ndetse bamwe bagiye bagaragaza ko bitari bikwiriye.

Murangira yavuze ko abakoresha imbuga nkoranyambaga bakwiriye kubahiriza amategeko mu rwego rwo kuzibyaza umusaruro, aho kubiba urwango no kugumura abantu.

Ati 'RIB irasaba abantu gukoresha imbuga nkoranyambaga bubahiriza amategeko kuko kugira imbuga nkoranyambaga wigengaho ntabwo biguha ubudahangarwa bwo kuba utakurikiranwa mu gihe wishe amategeko.'

Arakomeza ati 'Ntabwo imbuga nkoranyambaga zibereyeho ngo zikoreshwe ibyaha, ahubwo zigomba gukoreshwa zibyazwa umusaruro kuko amahirwe arimo ni menshi.' 

Fatakumavuta yasabye ko urubanza rwe rusubikwa kuko batabonye ikirego 

Umunyamategeko wa Fatakumavuta yavuze ko basaba igihe gihagije cyo gutegura uru rubanza

Source : https://inyarwanda.com/inkuru/148204/fatakumavuta-yasubikishije-urubanza-rwe-148204.html

Ibi Irere Claudette aherutse kubitangariza mu Karere ka Gisagara, Umurenge wa Muganza, mu gikorwa cy'umuganda wo gutera ibiti uheruka kuba mu gihugu hose.

Umunyabanga wa Leta muri MINEDUC, Irere Claudette yavuze ko gutera ibiti ari ingenzi cyane kuko ari ukuziba icyuho cy'ibikoreshwa kenshi mu bigo by'amashuri bidafite ikindi gicanwa kibisimbura mu buryo bworoshye.

Ati 'Nkatwe turi mu burezi, twishimira gahunda yashyizweho yo gutekera abana ku ishuri. N'ubwo bimeze bitya ariko igihe byakomeza gutya dutekesha inkwi kandi amashyamba atiyongera, byagaragaye ko byageza mu 2050 nta giti na kimwe gisigaye mu gihugu.''

'Kugira ngo dukomeze tugaburire abana, ndetse no mu ngo zacu twigaburire kandi mu mwaka wa 2050 ntituzagire ikibazo, birasaba gutera ibindi biti, kugira ngo muri iyo myaka bizabe byarakuze biruta ibyo dufite ubu, kandi tugatera byinshi, aho uvanye kimwe ukahatera nka bitatu.''

Minisitiri Irere yakomeje avuga ko abaturage bakwiye kugira umuhate wo kubungabunga ibiti batera bakanabyitaho, kuko byagaragaye ko hari abatererwa ibiti mu mirima, nyuma bakabiragiramo cyangwa ntibabibagare ngo bizakure neza.

Umuyobozi w'Ishuri ryisumbuye rya Kansi riri mu Karere ka Gisagara, Muhire Norbet yabwiye IGIHE ko ishuri ayobora rifite abanyeshuri 648 biga bataha, bivuze ko bo bakenera ifunguro rya saa Sita gusa, bihabanye n'abiga baba mu bigo bo bakenera kurya gatatu ku munsi.

Muhire yavuze ko ku gihembwe kimwe bacana amasiteri y'inkwi agera kuri 70, bagura avuye mu mashyamba y'abaturage, binyuze mu masoko yo kuzigemura batanga.

Mu gihe baba biga babayo iyi mibare y'inkwi bacana yahita izamuka.

Mu mwaka wa 2023, Ikigo Gishinzwe kurengera Ibidukikije mu Rwanda(REMA), cyatangaje ko hari amashuri ari ku kigero cyo gucana inkwi ziri hagati n'amaseteri 150 na 200 ku gihembwe.

Gusa hari gahunda zagiye zijyaho zigamije kugabanya ibicanwa haba mu mashuri, muri gereza no mu ngo, zirimo gukoresha biogas, gas, briquettes n'ibindi ariko n'ubundi inkwi ziranga zikaza ku mwanya wa mbere mu bicanwa bikoreshwa cyane mu Rwanda.

Kuri ubu mu gihugu habarurwa amashuri asaga 5000 ya Leta n'afashwa na Leta arimo abanza, ayisumbuye n'avanze, kandi yose atekera abana ku ishuri, hatabariwemo n'ayigenga.

---

Source : http://igihe.com/amakuru/u-rwanda/article/leta-mu-mpungenge-z-uko-ubwinshi-bw-inkwi-zikoreshwa-mu-mashuri-bushobora

Abashishozi baravuze ngo' iminsi iba myinshi igahimwa n'umwe'. Uyu mugani rero urahura neza n'ibyabaye ku mujenosideri Eugène Rwamucyo wari umaze imyaka 30 yidegembya, ariko umunsi w'ejo tariki 30 Ukwakira 2024, ugashyira iherezo ku bwishongozi bwe.

Nyuma y'urubanza rwari rumaze ukwezi kuzuye ruburanishwa mu rukiko rwa rubanda rw'i Paris mu Bufaransa, inyangamugayo z'abacamaza zahamije Eugène Rwamucyo ubufatanyacyaha mu mugambi wo gutegura Jenoside yakorewe Abatutsi no kuwushyira mu bikorwa, maze zimuhanisha igifungo cy'imyaka 27. Yahise atabwa muri yombi, ubwo twateguraga iyi nkuru akaba yari amaze ijoro rye rya mbere muri gereza.

Imiryango irengera inyungu z'abarokotse Jenoside yakorewe Abatutsi, n' amashyirahamwe mpuzamahanha aharanira ubutabera n'uburenganzira bwa muntu, yaregaga Eugène Rwamucyo uruhare rutaziguhe muri Jenoside yakorewe Abatutsi, by'umwiharimo mu mujyi wa Butare no mu nkengero zawo, dore ko yari umuganga aho i Butare, akaba n'umwarimu muri Kaminuza y'u Rwanda.

Nk'uko byari mu kirego, abatangabuhamya benshi, barimo n'abari kumwe na Rwamucyo, bamushinje gutegeka abicanyi bagenzi be gutaba imirambo mu byobo rusange, agamije gusibanganya ibimenyetso, ndetse mu bashyizwe muri ibyo byobo kaba harimo n'abari bagihumeka.

Eugène Rwamucyo kandi yashishikarije abandi kwica abatutsi, cyane cyane mu ijambo yavuze tariki 14 Gicurasi 1994, ubwo yizezaga Minisitiri w'Intebe Jean Kambanda wari wasuye ako gace, ko Abahutu bahagurukiye 'gukora'[kwica abatutsi mu mvugo y'abajenosideri] ku buryo nta 'nyenzi' izabacika. Aho abicanyi basezeraniye niho bahuriye, isezerano rya Rwamucyo na Kambanda ryarubahirijwe, maze Abatutsi baratsembwa karahava.

Kimwe n'abandi bajenosideri, mu myiregurire ya Rwamucyo, abamwunganiraga mu mategeko ndetse n'abaje kumushinjura, bose barwanye no kwerekana ko nta jenoside yabaye mu Rwanda kuko ngo itanateguwe, ko n'abapfuye bazize uburakari kubera ihanurwa ry'indege ya Perezida Habyarimana, abandi ngo bagwa mu isubiranamo kubera urwango rwari rusanzwe hagati y'Abahutu n'Abatutsi.

Ku kirego cyo gutaba imirambo mu byobo rusange, Eugène Rwamucyo yarabyemeye, ariko akavuga ko yabikoze yanga ko iyo mirambo yabora, igakurura indwara ziterwa n'umwanda mu baturage.

Iyi myiregurire yaje kugaraga nko kurashya imigeri, kuko bamaze gutaba abo bantu, hejuru y'ibyo byobo bahise bahatera ibiti n'imyaka, kugirango hatazagira n'umenya ko harimo abantu. Ikindi, muri iyo mbwirwaruhame ye yo kuwa 14 Gicurasi 1994, Rwamucyo yarirenze arahira ko nta Mututsi wishwe muri Butare, kandi hari abo ubwe yari amaze gutaba mu byobo rusange.

Twibutse ko mu bashinjuye Eugène Rwamucyo harimo Jean Kambanda wemeye uruhare rwe muri Jenoside yakorewe Abatutsi ndetse urukiko rw'Arusha rukamukatira gufungwa burundu. Harimo kandi Augustin Ndindiriyimana, JMV Ndagijimana, n'abandi bamamaye mu bikorwa byo guhakana no gupfobya Jenoside yakorewe Abatutsi.

Uru rukiko rero rwagaragaje ro rugizezwe n'inyangamugayo koko, maze rwima agaciro ayo matakirangoyi y'umujenosideri Eugène Rwamucyo.

Ubushinjacyaha bwari bwamusabiye gufungwa imyaka 30, ariko urukiko rumukatira 25. Icya ngombwa ariko si umubare w'imyaka azafungwa, ahubwo igikuru ni uko ukuri gutsinze.

Ubutabera bwumvise amajwi y'inzirakarengane zisaga miliyoni Rwamucyo na bagenzi be bambuye ubuzima, zitakamba ngo ubutabera buhabwe ijambo.

Ubutabera bwanze ko Rwamucyo akomeza kugoreka amateka y'uRwanda no gushinyagurira abo yagize impfubyi n'abapfakazi, akabasigira ibikomere bikabije ku mutima no ku mubiri.

Ubutabera kandi butanze isomo ku bahakana bakanapfobya Jenoside yakorewe Abatutsi, kuko rwekanye ko Rwamucyo ari mu bayiteguye bakanashyira mu bikorwa.

Ubu ni ubutumwa bukomeye kandi ku bajenosideri bibwira ko bacitse ubutabera, ko ari ikibazo cy'igihe nabo bakumva icyibatsi cy' amategeko, gikwiye ubugome ndengakamere bakoreye inyokomuntu aho iva ikagera.

Eugène Rwamucyo yavukiye mu yahoze ari Komini Gatonde mu Ruhengeri. Afite imyaka 65 y'amavuko, bivuze ko azarangiza igihano cye afite imyaka 91!

Kuva muw'1994 yabaye umuganga mu Bubiligi no mu Bufaransa. Muw'2010 yafunzwe igihe gito, nabwo aryozwa uruhare muri Jenoside yakorewe Abatutsi, ariko aza gufungurwa ku mpamvu zidasobanutse.

Eugène Rwamucyo abaye Umunyarwanda wa 8 uburanishirijwe mu Bufaransa ku byaha bya Jenoside yakorewe Abatutsi, urubanza rwaherukaga rukaba ari urw'undi muganga Sosthène Munyemana wakatiwe gufungwa imyaka 25. Uyu yarajuriye, urubanza rwe mu bujurire rukazaburanishwa muri Nzeri n'Ukwakira 2025.

Tariki 09 Ukuboza uyu mwaka kandi, aho mu Bufaransa hategerejwe umwanzuro w'urubanza rwa Charles Onana, Umufaransa ukomoka muri Cameroun, akaba akurikiranyweho guhakana Jenoside yakorewe Abatutsi.

The post Umwijuto w'ikinonko ugira ngo imvura ntizagwa: Umujenosideri Eugène Rwamucyo yaraye ijoro rye rya mbere muri gereza azamaramo imyaka 27 appeared first on RUSHYASHYA.

Source : https://rushyashya.net/umwijuto-wikinonko-ugira-ngo-imvura-ntizagwa-umujenosideri-eugene-rwamucyo-yaraye-ijoro-rye-rya-mbere-muri-gereza-azamaramo-imyaka-27/?utm_source=rss&utm_medium=rss&utm_campaign=umwijuto-wikinonko-ugira-ngo-imvura-ntizagwa-umujenosideri-eugene-rwamucyo-yaraye-ijoro-rye-rya-mbere-muri-gereza-azamaramo-imyaka-27