Category: Uncategorized

Diamond Platnumz yavuze ku bihe byihariye yagiranye n’umuraperi w’umunyamerika Sean Diddy Combs uzwi cyane ku izina rya Diddy, agaragaza ko ibyo yamubonyeho bitandukanye n’ibimuvugwaho ubu.

Mu kiganiro yagiranye n’itangazamakuru, Diamond yavuze ko yigeze kugirira uruzinduko mu rugo rwa Diddy ruherereye i Malibu muri Leta Zunze Ubumwe za Amerika, aho yari yagiye aherekejwe n’umuhanzi ndetse n’umu-producer we, Swizz Beatz.

Umuhanzi w’icyamamare muri Tanzania yasobanuye ko ubwo bageraga muri urwo rugo basanze hari abandi bahanzi bashya bari mu bikorwa byo gukora indirimbo.

Nyuma ngo bagiye ku ruhande rwa pisine aho bahuriye n’abana ba Diddy, hanyuma baza gusangira ifunguro rya nimugoroba.

Diamond yagize ati 'Twagiranye ibihe byiza, byari bisanzwe kandi byuzuyemo icyubahiro. Nta kintu kidasanzwe cyabaye muri icyo gihe twari kumwe.'

Ibi Diamond abitangaje mu gihe izina rya Diddy ryavuzwe cyane mu bitangazamakuru mpuzamahanga nyuma yo gukurikiranwa n’ubutabera ku byaha bikomeye birimo ubucuruzi bw’abantu n’ibindi bifitanye isano n’ihohoterwa. Nubwo yaje guhamywa ibyaha bimwe, hari n’ibindi yahanaguweho nyuma y’urubanza rwatwaye igihe kirekire.

Diamond yavuze ko nyuma y’izo nkuru, hari abagerageje guhuza nabi uruzinduko yagiriye kwa Diddy n’ibibazo uyu mugabo yagize, ibintu yavuze ko bidakwiye kuko ibyamubayeho atari byo yiboneye.

Diamond Platnumz yavuze ko ibyo Sean Diddy ashinjwa ntabyo yamubonyeho

Umuyobozi wa Gasogi United, Kakooza Nkuriza Charles [KNC], yavuze ko bajuririye icyemezo cyo guterwa mpaga kandi bagaragaje iki kibazo ku buryo nta muntu uzongera gutobanga umupira.

Ni nyuma y’uko atewe mpaga ku mukino w’umunsi wa 25 wa Shampiyona yagombaga guhuramo na Rayon Sports tariki ya 22 Werurwe 2026 ariko ikipe ye ntiyagaragara ku kibuga.

KNC yandikiye Rwanda Premier League agaragaza ko yaba arenganye kuko bishe amategeko harimo ko Rayon Sports yasabye guhindura umukino iminsi 5 iteganywa n’amategeko itarimo ndetse ko nka Gasogi United batigeze babimenyeshwa, gusa Rwanda Premier yamusubije ko ibyabaye byose byari bikurikije amategeko.

Mu gihe bamwe bemezaga ko iyi kipe yaba yaremeye mpaga, itigeze ijurira, KNC yabiteye utwatsi avuga ko bajuriye kandi uburyo bimeze nta muntu uzongera gutobanga ikigo runaka yitwaje indonke ze.

Mu kiganiro Rirarashe cy’uyu munsi yagize ati “Twebwe ntabwo twajuriye gusa ahubwo twagaragaje ikibazo ku buryo nta muntu uzongera gutoba ikigo yitwaje indonke ntoya cyane kuri we, tugomba kureba mu buryo bwagutse.”

Yashinje Rwanda Premier League kuba yarahuye igasanga yarishe amategeko ariko ikacara igakora ibitemewe.

Ati “Aba bantu aho babera akaga barahuye baravuga ngo amategeko yarapfuye twarayishe tubyandike gutya, bagenda bandika ibyo bandika n’ubundi barishinja bakora n’ibitemewe n’ibihabanyije yaba ingingo ya 3 n’iya 5 barandika baradoda doda.”

“Ibyo byose turabibona tubona ubushobozi bwabo n’imitekerereze yabo aho igarukira.”

Yakomeje yungamo ati “Noneho baravuga ngo Komisiyo y’Amarushanwa iyo igeze ahantu icyemezo cyayo kitajuririjwa.”

Yavuze ko icyo baregera ari amategeko atarubahirijwe kandi ko ari ibintu byabaye na mbere y’umukino.

Ati “Hariya icyo turegera ni amategeko atarubahirijwe kandi ni ibintu byabaye mbere y’umukino kuko mbere y’amasaha runaka message zari zihari ko tutari bukine umukino, ko tutari bukore ibintu bitemewe n’amategeko.”

Kuba harishwe amategeko ni yo mpamvu baregeye Komisiyo y’Amategeko muri FERWAFA.

Ati “Twe rero kutanyurwa kwacu, binyuze muri FERWAFA twaregeye Komisiyo y’Amategeko n’Imiyoborere.”

Biteganyijwe ko Gasogi United izagaruka mu kibuga ejo ku wa Gatanu ikina Kiyovu Sports mu mukino w’umunsi wa 26 wa Shampiyona y’icyiciro cya mbere mu Rwanda umwaka w’imikino wa 2025-26.

KNC yavuze yatanze ikirego ku buryo nta muntu uzongera kwica gutoba umupira

Umunsi wa mbere w’imikino ya nyuma ya Kamarampaka muri Volleyball yahiriye amakipe y’abashinzwe umutekano Police VC na APR WVC.

Ejo hashize ku wa Gatatu ni bwo hatangiye umunsi wa mbere w’imukino wa nyuma mu bagabo n’abagore muri Volleyball aho bagomba gutanguranwa imikino 3 muri 5 bagomba gukina.

Umukino wa nyuma mu bagore ukaba warahuriweho na APR WVC ndetse n’ikipe ya Kaminuza ya Kepler ni mu gihe mu bagabo ari Police VC na REG VC.

Iyi mikino irimo ibera muri Petit Stade, habanje uwa APR WVC na Kepler WVC saa 16h30.’

Ni umukino woroheye cyane APR WVC kuko yawutsinze amaseti amaseti 3-0.

Iseti ya mbere APR WVC yayitsinze ku manota 25-16, iseti ya kabiri iyitsinda amanota 25-20 mu gihe iya gatatu yayitsinze amanota 25-21.

Police VC yatsindiwe ku mukino wa nyuma na APR mu mwaka w’imikino ushize, kuri iyi nshuro yitwaye neza itsinda umukino wa mbere wayihuje na REG VC ku maseti 3-0 (25-18, 25-21, 25-23)

Police VC yubakiye umukino wayo mu kubuza Nicholas Matue gutsinda ndetse biza kuyihira ubwo yatsindaga iseti ya mbere ku manota 25-18, mu gihe kwinjizamo Madol Ayang Maker wafatanyaga Gisubizo Merci byatanze izindi mbaraga ku ruhande rwa REG yatsinzwe iseti ya kabiri ku manota 25-21.

Ni imikino yombi yarebwe n’abarimo Minisitiri wa Siporo, Nelly Mukazayire.

Mu makipe ahataniye umwanya wa gatatu, Kepler VC yatsinze Gisagara VC amaseti 3-1 (21-25, 25-17, 25-22, 25-15) mu bagabo naho Police WVC ifite igikombe giheruka, itsinda Rwanda Revenue Authority (RRA) amaseti 3-0 (25-18, 25-21, 25-15) mu bagore.

Imikino ya nyuma izakomeza ku wa Gatandatu, tariki ya 4 Mata 2026, hakinwa Umukino wa Kabiri ku makipe yose.

APR WVC yatangiye itsinda Kepler WVC

Police VC yatsinze REG VC

Minisitiri Nelly Mukazayire yarebye iyi mikino

Nubwo yamaze gutangazwa nk’umutoza wa Rayon Sports, Haringingo Francis, Kiyovu Sports yarahiriye ko atazigera atoza iyi kipe muri uyu mwaka w’imikino.

Mu mpera z’ukwezi gushize ni bwo Kiyovu Sports yakiriye ibaruwa ya Haringingo Francis yifuza gusesa amasezerano yari afitanye n’iyi kipe ariko yo iramwangira imubwira ko agomba gusoza amasezerano y’imyaka ibiri yari asigaranye.

Tariki ya 31 Werurwe, Rayon Sports yatangaje ko yamaze kumvikana na Haringingo Francis ndetse agomba gutangira akazi tariki ya 1 Mata 2026.

Kiyovu Sports ikaba yamaze kumenyesha FERWAFA iki kibazo bafitanye na Haringingo Francis ndetse bayisaba ko batamuha license yo gutoza Rayon Sports.

Umunyamabanga wa FERWAFA, Bonnie Mugabe yavuze ko mu gihe batarasuzuma iby’iki libazo Haringingo Francis atemerewe kugira indi kipe atoza.

Ati “Kiyovu Sports yatumenyesheje ko ifitaye ikibazo n’umutoza wayo Haringingo Francis idusaba kutamuha License yo gutoza indi kipe yaba mu Rwanda no hanze.”

“Kiyovu Sports yatugaragarije ikibazo ifitanye n’umutoza kumuha uburenganzira ngo ajye gutoza indi kipe, ikibazo afitanye n’indi kipe kitarakemuka ntabwo byaba ari byo.”

Yavuze ko abanyamategeko bayo bagomba kwicara bakiga kuri iki kibazo, mu gihe bataricara ngo babifateho umwanzuro nta kipe Haringingo yemerewe gutoza cyane ko bo bakimufata nk’umukozi wa Kiyovu Sports ibya Rayon Sports batabizi.

Kiyovu Sports ikaba yemeje ko yamaze gutanga ikirego muri FIFA ivuga ko umutoza wayo Haringingo Francis yasheshe amasezerano binyuranyije n’amategeko.

Rayon Sports ikaba yaragerageje kumusabira ibyangombwa muri ‘System’ kuko Kiyovu Sports yagombaga kubyemeza ahubwo ihita ibihakana, FERWAFA ikaba ari yo igomba kureba niba ikirego cya Haringingo gifite ishingiro.

Ubwo yakoreshaga imyitozo ya mbere, Haringingo Francis yirinze kugira byinshi atangaza kuri iki kirego.

Ibya Haringingo Francis muri Rayon Sports bikomeje kugorana

Perezida w’Ishyirahamwe ry’Umupira w’amaguru mu Rwanda, Shema Ngoga Fabrice yavuze umutoza w’Ikipe y’Igihugu, Stephen Constantine akibona umukino wa mbere wa Kwizera Olivier yamubwiye ko udafite umutima ukomeye byakugora kumureba mu kibuga akina.

Ubwo hahamagarwaga Ikipe y’Igihugu Amavubi izakina imikino ya FIFA Series ntabwo Kwizera Olivier yigeze ahamagarwa maze itangazamakuru rirasakuza ribaza impamvu atahamagawe maze Shema Fabrice asaba ko yakongerwamo ariko Stephen Constantine arabyanga.

Ubwo yaganiraga n’Ikigo cy’Igihugu cy’Itangazamakuru, perezida wa FERWAFA yabajijwe uko byagenze ngo Kwizera ahamagarwe kandi umutoza yari yabyanze.

Ati 'Ntabwo nivanga mu mihamagarire y’ikipe y’igihugu ariko ikintu kimwe Constantine yasanze kandi twagombaga kubikora kuko twari dufite igihe ntarengwa cya FIFA idusaba ko dushyiramo abakinnyi muri sisitemu (System) hakiri kare na we ntabwo yari amuzi muri make, icyo yashakaga kuvuga hariya ntabwo umuntu yaza nyuma twamaze guhamagara ngo tumwongeremo.'

Yavuze ko umutoza atari azi Kwizera Olivier ndetse n’umukino wa mbere yamurebyeho yamubwiye ko ashobora kurwaza abantu umutima bitewe n’imikinire ye.

Ati 'Twagize amahirwe uwo hari umukino wa Rayon Sports turagenda turawureba, yego Olivier hari 'saves’ zingahe yakoze ariko icyo twaganiriye n’umutoza aravuga ngo hari ugukura mu mutwe agomba kuba afite niba ashaka kujya gukina mu ikipe y’igihugu, akoresha ijambo ati 'yakurwaza umutima.’ Yakora ibintu byiza ijana ariko agakora ikosa rimwe bakadutsindisha, ni uko twabiganiriyeho.'

Kugira ngo Kwizera Olivier ahamagarwe byatewe n’uko Ntwari Fiacre yari yamaze kuvunika babwiwe ko atazaza, asaba umutoza guha amahirwe Kwizera Olivier ariko amubwira ko atazigera amukinisha.

Ati 'Reka mbivuge niba ari ku mahirwe y’umwe cyangwa ibyago by’undi, tuza kumenya ko Fiacre atakije ko bamubaze, ndamubwira nti ko utarakora urutonde rwa nyuma kuki utafata Olivier ukamugerageza, ntabwo nkubwiye ngo umukinishe, mugerageze, aremera ariko avuga ko atazamukinisha, nanjye ndamubwira ngo sinkubwiye ngo umukinishe.'

Yavuze ko na we yatunguwe no kubona Kwizera Olivier yabanje mu kibuga kuko yari yamubwiye ko atazamukinisha, bivuze ko yasanze ibyo yabwirwaga kuri uyu munyezamu atari byo maze ahitamo kumugira umunyezamu wa mbere.

Umukino wa mbere Constantine yarebye wa Kwizera Olivier yabwiye Shema Fabrice ko ashobora kurwaza umuntu umutima

Kwizera Olivier mu ikipe y’igihugu ku mugereka ahita abanzamo

Nyuma y’uko umunyamakuru Niyigaba Clement atawe muri yombi akurikiranyweho kwangiza ikintu cy’undi no kurwanya ububasha bw’amategeko, yaciye bugufi asaba imbabazi aho yavuze ko yabikoreshejwe n’umujinya.

Uyu munyamakuru wamamaye nka DC Clement, yatawe muri yombi ejo hashize tariki ya 31 Werurwe 2026 nyuma y’uko asenyewe ishuri yarimo yubaka muri Jabana ariko mu buryo bunyuranyije n’amategeko.

DC Clement na mugenzi we bahawe icyangombwa cyo kuvugurura inzu ahubwo bahita bubaka ishuri, binyuranye n’ibyo bari bemerewe cyane ko n’aho iyo nzu iri ari mu kibanza cy’ubuhinzi atari icyo kubakamo.

Mu mashusho yashyize ku mbuga nkoranyambaga ze yaherekejwe n’amagambo asobanura uko byagenze ndetse na we akiyemerera ko yahawe icyangomvwa cyo kuvugurura ariko akubaka bushya kuko yari yabigiriwemo inama na Engeneer w’Umurenge wa Jabana, yavugaga ko yarenganye bakaba bahonbye miliyoni 70 Frw

Nyuma yo gutabwa muri yombi aho afungiwe muri afungiye kuri sitasiyo ya RIB ya Jabana yanditse ibaruwa ifunguye asaba imbabazi.

Ati 'Banyarwanda, Banyarwandakazi mbandikiye nshaka kubamenyesha ko nciye bugufi nsaba imbabazi ku bw’inyandiko, amashusho, amajwi yasakaye ku mbuga nkoranyambaga, mu by’ukuri twakoze ibinyuranyije n’amategeko maze tugasenyerwa inzu, byaje kuvamo kugira umujinya utari ngombwa nkakora ibyaha.'

'Rero nsabye imbabazi ntakamba ko ibyabaye ari ubwa mbere n’ubwa nyuma byari bibaye. Aho ndi meze neza, ibyo nemererwa n’amategeko ndabihabwa kandi niteguye ko ningaruka nzaba urugero rwiza.'

Yasoje abwira abakunzi be ko abakumbuye ndetse ko ahari arinzwe ameze neza.

DC Clement kuva ejo arafunzwe

Yanditse asaba imbabazi