Author: webrwanda

Yabigarutseho ku wa 19 Mata 2025, mu kiganiro yahaye icyiciro cya 13 cya ba Ofisiye bari kwiga mu Ishuri Rikuru rya Gisirikare rya Nyakinama (RDF-SCSC) bari basoje urugendo rw'iminsi itanu barebera hamwe amasomo bashobora gukura mu rugamba rwo kubohora igihugu. Yari kumwe n'Umugaba Mukuru w'Ingabo z'u Rwanda, Gen Mubarakh Muganga.

Gen (Rtd ) Kabarebe yavuze ko u Rwanda rutekanye kuko ingabo zarwo zihora ziteguye kurinda igihugu ari na yo ndangagaciro ikomeye yaranze RPA mu rugamba rwo kubohora igihugu.

Yasabye abakiri mu ishuri gutera ikirenge mu cya RPA bagahangana n'ibibazo bigenda bivuka umunsi ku wundi.

Iri somo rihuriza hamwe abanyeshuri n'ababigisha bagasesengura intambara yo kubohora igihugu, bagize umwanya wo gusuzuma ibice nyamukuru bigize urugamba, n'imbogamizi abayobozi ba RPA bagiye bahura na zo bagakuramo amasomo azabafasha.

Muri urwo rugendo abanyeshuri bagize umwanya wo kuganira no gusobanuza abasirikare bakuru b'u Rwanda ku byerekeye urugamba rwo kubohora igihugu rwatangiye ku wa 1 Ukwakira 1990, bibabera amahirwe yo gusobanukirwa no kwiga imitegurire y'urugamba n'uko bakemura ingorane bahuye na zo mu bikorwa bya gisirikare.

Umugaba Mukuru wa RDF, na Gend Rtd James Kabarebe bahuguye abakiri kwiga

Abanyeshuri baboneyeho kubazo

---

Source : http://igihe.com/amakuru/u-rwanda/article/gen-rtd-james-kabarebe-yasangije-ba-ofisiye-bari-ku-masomo-uko-rpa-yabohoye

Rutahizamu w'umunya-Brazil, Antony, uri kurangiza igihe cye cyo gukina nk'intizanyo muri Real Betis, yagaragaje uko abona umutoza Rúben Amorim ndetse n'icyerekezo cye nyuma y'uko mu kwezi kwa Kamena azaba agomba gusubira muri Manchester United ku mugaragaro.

Mu kiganiro yagiranye na ESPN, Antony yagize ati: 'Namaze igihe gito nkorana na Rúben Amorim, ariko ni umutoza mwiza kandi w'umunyabwenge cyane. Yanyeretse ko afite uburyo buhamye bwo gutoza, burimo disipuline n'ubwenge bwo guhuza ikipe. Ni umuntu uzi gufata imyanzuro igoye kandi ugushyira ku murongo mu buryo bwa kimwuga. Nubwo twamaze igihe gito dukorana, namwigiyemo byinshi.'

Antony yakomeje avuga ko nubwo Manchester United ari yo kipe ye y'inkomoko, kubona amahirwe yo gukina ntibyamworoheye, cyane cyane muri ibi bihe bikomeye ikipe irimo gucamo.

'Manchester United iri mu bihe bigoye, ariko ni umutoza mwiza kandi nagiranaga nawe umubano mwiza, gusa nari nkeneye indi nshingano nshya. Ndamwifuriza amahirwe masa,' nk'uko yabibwiye ESPN.

Uyu mukinnyi w'imyaka 24 yashimangiye ko agifitiye icyubahiro gikomeye Erik ten Hag, umutoza wa Manchester United, avuga ko yamubereye umuntu w'ingirakamaro mu rugendo rwe rw'umupira w'amaguru mu Burayi.

'Erik ten Hag ni umutoza nshimira cyane. Yaramfashije cyane haba mu Buholandi no mu Bwongereza, nubwo amahirwe ataje nk'uko nabyifuzaga. Mu gihe twari kumwe muri Ajax, yanyubatsemo icyizere no kumva ko nshoboye. Muri Manchester United, yakomeje kunyubakira icyizere, nubwo ibihe byagiye bigorana.'

'Ahubwo, ndamushima ku bintu byose yankoreye, n'ibiganiro byose twagiranye. Ni umutoza wampaye ubufasha bukomeye kuva ku munsi wa mbere. Yanyigishije kuba umunyamwuga, agira uruhare mu kwagura imitekerereze yanjye nk'umukinnyi, akananyereka ko mu mupira hari byinshi birenze gusa gutsinda.'

Antony yavuze ko igihe azamara muri Real Betis cyamubereye umwanya wo kongera kwisuzuma, kumenya icyo ashoboye, no gushakisha icyatuma asubira muri Premier League afite icyerekezo gishya. Yemeza ko yize byinshi muri shampiyona ya Espagne, ndetse yizeye ko gusubira muri Manchester United bizaza bimufitiye akamaro.

'Nzi ko igihe cyanjye muri Betis cyatumye nongera kwiyubaka no kugira icyizere. Niteguye kugaruka mu Bwongereza nizeye ko nzabona amahirwe yo kugaragaza impano yanjye nk'uko nabyifuzaga kuva kera.'

Source : https://kasukumedia.com/antony-yasobanuye-uko-ahagaze-kuri-ruben-amorim-nigihe-cye-cyo-gukina-nkuwagurijwe-muri-real-betis-kigeze-ku-musozo/

Umukinnyi mpuzamahanga w'umupira w'amaguru ukinira FC Barcelona n'ikipe y'igihugu ya Brezile, Raphinha, yageze ku ntego ikomeye y'impuzangendo 60 yagizemo uruhare rwo gutsinda ibitego muri uyu mwaka w'imikino wa 2024/2025, bikubiyemo ibitego yatsinze n'imipira yatanzemo ibitego (assists).

Uyu mukinnyi w'imyaka 28, witwaye neza cyane mu mwaka w'imikino uri kugana ku musozo, amaze gutsinda ibitego 35 no gutanga imipira 25 yavuyemo ibitego, abikoreye mu mikino yakiniye ikipe ye ya FC Barcelona ndetse n'iyo yakiniye ikipe y'igihugu ya Brezile (Seleção).

Ni urugero rugaragaza ko Raphinha ari umwe mu bakinnyi b'ingenzi ku rwego mpuzamahanga, cyane cyane mu ikipe ya FC Barcelona aho yabaye umwe mu bayoboye ubusatirizi bwayo.

Uretse kuba asatira izamu neza, anafite ubushobozi bwo gufasha bagenzi be kugera ku ntego, ibintu bikomeje kumugira umusimbura mwiza wa Neymar mu ikipe y'igihugu.

Mu mikino ya UEFA Champions League, La Liga ndetse n'amarushanwa mpuzamahanga akinirwa mu rwego rw'ibihugu, Raphinha yakomeje kwerekana impano idasanzwe yo guhindura umukino igihe cyose ari mu kibuga.

Abatoza be bose, yaba Xavi Hernández muri FC Barcelona ndetse n'umutoza w'ikipe y'igihugu ya Brezile, bose bamushima cyane kubera uko yitwara mu kibuga, yitanga, agakora ibirenze ibyo asabwa.

Abasesenguzi batandukanye barimo na Thierry Henry na Rio Ferdinand bemeza ko Raphinha ari umwe mu bakinnyi bagaragaje iterambere rikomeye mu myaka ibiri ishize, akaba ari ku rwego rwo hejuru muri ruhago y'uyu munsi.

Kugera ku mpuzangendo ya 60 (ibitego 35 n'imipira 25) si ibintu bisanzwe, kandi bitanga icyizere ko uyu mukinnyi ashobora kurenza ibi mu myaka iri imbere, cyane cyane niba akomeje gukinana ishyaka nk'iryo afite ubu.

Kwamamaza aya makuru, abafana ba FC Barcelona n'aba Brezile bashimira uburyo uyu mukinnyi wabo ari kugenda yitwara, ndetse bamwe batangiye kumusabira ibihembo byihariye mu mpera z'umwaka.

Source : https://kasukumedia.com/raphinha-yageze-ku-ntego-yimpuzangendo-yamanota-ybitego-60-yagizemo-uruhare-60-muri-24-25/

Yabahuguye ku wa 18 Mata 2025, ku ishami rya ILPD riri i Kigali, mu isomo ryitwa 'Universal Jurisdiction', bagaragarizwa ko umwuga w'ubutabera utagarukira mu Rwanda gusa.

Universal Jurisdiction ni Ububasha mpuzamahanga bwo gukurikirana ibyaha, aho amategeko yemerera igihugu icyo ari cyo cyose gukurikirana abantu bakekwaho ibyaha bikomeye cyane nka Jenoside n'ibindi nyambukiranyamipaka.

Minisitiri Dr. Ugirashebuja yabanje yasobanuye aho iri tegeko ryo kuburanisha ibyaha mpuzamahanga ryavuye, itandukaniro n'andi mpuzahanga asanzwe, banasobanurirwa uko rikoreshwa.

Iri tegeko ntiryita ku hantu icyaha cyakorewe, ubwenegihugu bw'uwagikoze, ahubwo ryita ku cyaha ubwacyo. Iyo icyaha kimaze gukorwa, igihugu icyo ari cyo cyose gishobora kugikurikirana.

Umunyeshuri muri ILPD, Murekatete Aline yavuze amasomo biga abafasha gushyira mu bikorwa amahame y'ubutabera neza.

Ati 'Kuba ari kutwigisha ari n'Intumwa Nkuru ya Leta, ni ikigaragaza ko u Rwanda rwifuza gukomeza gutanga ubutabera buboneye kandi n'ababifitiye ubumenyi buhagije no guha agaciro ibyo twigira hano, binagaragaza ko batwitezeho byinshi.'

Twizerimana Jean Baptiste yavuze ko atari azi uburyo imiburanishirize mpuzamahanga ikorwa ariko yabisobanuriwe ku buryo ahuje ubumenyi barahura muri iri shuri ashobora no gukorera hanze y'igihugu.'

Minisitiri w’Ubutabera akaba n’Intumwa Nkuru ya Leta, Dr Ugirashebuja Emmanuel yigishije abiga mu Ishuri rya ILPD ku bijyanye n’imiburanishirize y’imanza mpuzamahanga

Minisitiri Dr Ugirashebuja Emmanuel yabagaragarije ko iri tegeko ritita ku ho icyaha cyakorewe, cyangwa ubwenegihugu bw'uwagikoze

Abanyeshuri bahawe umwanya wo kubaza ibibazo ku byo bifuza kumenya kuri Universal Jurisdiction

Iri shuri ritegura abanyamwuga barimo abunganira abandi mu nkiko, abashinjacyaha n'abacamanza,

Amafoto: Munyemana Isaac

---

Source : http://igihe.com/amakuru/u-rwanda/article/abiga-muri-ilpd-bahawe-ubumenyi-bubafasha-kuburanisha-ibyaha-mpuzamahanga

Imirimo yo gutunganya igishushanyombonera cy'imikoreshereze y'ubutaka yatangiye ku wa 17 Mata 2025.

Umuyobozi w'Urugaga rw'Abikorera mu Karere ka Burera, Munyembaraga Jean de Dieu yabwiye IGIHE ko kutagira igishushanyombonera byabangamiraga ishoramari ryabo.

Ati 'Kutagira igishushanyo mbonera byari bibangamiye ishoramari ryacu, kuko umuntu yakeneraga kubaka hoteli bijyanye n'umwihariko w'Akarere ufite ibiyaga kakagira parike y'ibirunga agasanga ubutaka bubaruye mu buhinzi, ni benshi bifuje kubaka bikababangamira bamwe bakajya kuzubaka mu tundi turere, dore ko n'abaturage bagorwaga no kubona uko bubaka.'

Munyembaraga yavuze byatumye abaturage benshi batabona akazi kagombaga kubafasha kwiteza imbere.

Umuyobozi w'Akarere ka Burera wungirije ushinzwe Iterambere ry'Ubukungu, Nshimiyimana Jean Baptiste yabwiye IGIHE ko igishushanyombonera kizaboneka mu mezi umunani.

Ati 'Ni igishushanyo mbonera dukeneye, kuko kigomba guhuzwa n'imiterere y'Akarere kigafasha mu kuzamura ishoramari, bakora ibikorwa byabo nta ngorane, kuko bakeneraga gutangira imishinga yabo y'amahoteli bagasanga habaruye mu buhinzi kandi ari icyanya cy'ubukerarugendo. Dufite abashoramari barenga 100 baguze mu byanya byagenewe ubukerarugendo ariko bakazitirwa no gusanga ari mu buhinzi.'

Yanavuze ko igishushanyombonera nikimara gukorwa kizafasha abashoramari kumenya aho ubutaka bwabo buherereye n'icyo bahakorera, gutandukanya ibice byagenewe ubuhinzi no gutura.

Umukozi ushinzwe imikoreshereze y'ubutaka mu kigo cy'Igihugu gishinzwe ubutaka, kizafatanya n'Akarere gukora igishushanyo mbonera cy'Akarere ka Burera, Rutagengwa Alex, ahamya ko baramutse batagize imbogamizi bahura na zo umushinga batangije mu mezi umunani uzaba ugeze ku musozo.

Ati 'Hatabayemo ikibazo nta kabuza mu mezi umunani kizaba cyarangiye kuko ni igikoresho cy'iterambere, ubu tugiye gukurikizaho ikusanyamakuru kandi n'abaturage bakigiremo uruhare.'

Burera, ni kamwe mu turere dukora kuri parike y'ibirungadukora, ifite kandi ibiyaga by'impanga bya Burera na Ruhondo gusa bidafite umwaro (Plage), ibituma kaba mu tubereye ubukerarugendo by'umwihariko ubushingiye ku mahoteli n'ingendo zo mu mazi.

Ikiyaga cya Burera giherereye muri aka karere, mu birenge by’ibirunga kiri mu byo abantu bifuza kubyaza umusaruro mu bukerarugendo

---

Source : http://igihe.com/amakuru/u-rwanda/article/burera-batangiye-kuvugutira-umuti-ikibazo-cy-abifuza-gushora-imari-mu

Ku munsi nk'uyu w'itariki ya 18 Mata mu 1994, Leta y'abicanyi yari ikomeje umugambi wayo mubisha wo gutsemba Abatutsi hirya no hino mu gihugu. Iyi nyandiko iragaragaza hamwe mu hantu hashoboye kumenyekana hiciwe Abatutsi kuri iyi tariki mu 1994.

Leta y'abicanyi yakomeje gukangurira abaturage gukora Jenoside

Tariki ya 18/4/1994, abagize Leta y'abicanyi barimo Édouard Karemera, wagombaga kuba minisitiri w'Ubutegetsi bw'Igihugu baje i Gitarama gushishikariza abaturage gukora Jenoside.

Kuri uwo munsi Perezida Théodore Sindikubwabo yagiye ku Gikongoro akorana inama n'abategetsi ba perefegitura ya Gikongoro, hategurwa uko Jenoside igomba gukorwa i Kaduha, i Murambi, mu Cyanika no muri Perefegitura yose ya Gikongoro. Avuye ku Gikongoro, Sindikubwabo yagiye ku biro bya Komini Nyakizu (Butare) ashishikariza abicanyi gutangira Jenoside. Ibyo bikorwa byo gushishikariza abaturage gukora Jenoside Sindikubwabo yabikoreraga mu ruhame, aho abaturage babaga baje kumwumva, bateguwe n'abategetsi ba Komini.

Perefe Kayishema Clement yarimbuye Abatutsi kuri Stade Gatwaro, Kibuye

Sitade ya Gatwaro yari yubatse muri Perefegitura ya Kibuye, Komine ya Gitesi, Segiteri ya Bwishyura. Ubu ni mu Karere ka Karongi, Umurenge wa Bwishyura, Akagari ka Kibuye mu Mudugudu wa Gatwaro. Abatutsi bajyanywe muri Sitade n'abategetsi ba perefegitura Kibuye, ku isonga hari KAYISHEMA Clément, bababeshya kubarindira umutekano bari hamwe. Impunzi zajyanywe muri sitadi Gatwaro inyinshi zari ziturutse ahandi zari zarokokeye nko kuri Kiliziya ya Kibuye na Home Saint Jean, Kiliziya ya Mubuga, n'ahandi henshi. Hari abandi benshi bavuye kuri Komine Mabanza, I Rubengera, n'amaguru (19 Km), berekeza kuri Perefegitura ya Kibuye, bagezeyo babasabye kujya muri Sitade ya Gitwaro.

 

Mbere yo kwinjira muri Sitade ya Gatwaro bamburwaga ibyo bari bitwaje byose birimo nk'inkoni n'ibindi. Bamaze kugeramo babafungiye amazi, baraharwarira kubera umwanda, abinjiyemo ari inkomere cyangwa abari barwaye bageragezaga kujya kwivuza mu Bitaro bya Kibuye byari bifatanye na Sitade Gatwaro ariko basubizwaga inyuma n'amasasu iyo bagiraga amahirwe ntibicwe.

Perefe KAYISHEMA yabuzaga abagira neza gutabara impunzi; umuganga w'umudage Dr Wolfgang Blam yakomeje gukora mu bitaro afatanya na Dr HITIMANA Léonard mu kuvura no kwita ku nkomere z'Abatutsi mu bwitange bukomeye. Umugore wa Dr Blam bashatse kumwica kubera ko yari umututsikazi, nawe asaba ko bamwicana nawe n'abana be. Uwabigizemo uruhare ni Dr Charles TWAGIRA wari umuganga ku Kibuye, Joseph MPAMBARA Interahamwe yo ku Mugonero, uvukana na Obed Ruzindana wahamijwe icyaha cya Jenoside n'urukiko mpanabyaha mpuzamahanga rwashyiriweho U Rwanda ahanishwa igifungo cy'imyaka 25. Joseph MPAMBARA yahungiye mu Buholandi, aburanishwa n'inkiko zaho, tariki ya 9/7/ 2011 zamuhamije icyaha cyibasira inyoko muntu nka kimwe mu bikorwa bigize umugambi wa Jenoside, akatirwa gufungwa burundu.

Jenoside muri Stade yatangiye ku cyumweru tariki ya 18/04/1994 itangizwa na Perefe KAYISHEMA Clément akaba ari nawe wishe Umututsi wa mbere witwaga MUNYAKARAGWE Ezechiel (Pasteur Adventiste) akoresheje imbunda yasabye umujandarume. Yaje ari kumwe n'interahamwe, abajandarume, abapolisi, abasirikare n'abasivile bari bitwaje intwaro. Batangiye kugota Sitade ndetse abandi bazamutse ku musozi wa Gatwaro hejuru kugira ngo hatagira ubacika. Perefe KAYISHEMA yatanze itegeko ryo gutangira kwica Abatutsi. Abatutsi bicishijwe imbunda, gerenade, imipanga, imihoro n'izindi ntwaro gakondo. Kuri uwo munsi wa mbere bahagaritse kwica Abatutsi ahagana 18h00'. Abasirikare berekeje mu Bisesero ariko interahamwe zasigaye zigose Sitade kugira ngo hatagira abasohoka mu ijoro bari bataricwa. Batinye kwinjira muri Sitade ninjoro ahubwo bahitamo kuguma hanze hamwe n'Interahamwe zari zije kubafasha ziturutse i Cyangugu na Gisenyi.

Ninjoro, Abatutsi begeranyije imirambo y'abishwe n'indembe baziha ubufasha bw'ibanze bari bashoboye. Muri iryo joro interahamwe zaje gufata umwanzuro wo kuva kuri sitade ariko basiga babwiye abarimo ko bazagaruka bukeye bwaho. Bagiye mu kabare kari hafi ya Sitade kunywa inzoga no kubyina bishimira ibyo bari bakoze. Bukeya bwaho kuwa 19/04/1994 nka 6h00' za mugitindo nyuma yo kwishimira uburyo bari baraye bakoze Jenoside bagarutse muri Sitade nk'uko babivuze kugira ngo bakomeze kwica by'umwihariko abari batarashiramo umwuka bakoresheje imipanga n'ibindi bikoresho gakondo.

Kayishema yahamijwe icyaha cya Jenoside n'Urukiko mpanabyaha mpuzamahanga rwashyiriweho Urwanda ahanishwa igifungo cya burundu.

Iyicwa ry'Abatutsi muri Kamonyi, kuri Kayumbu

Ikiraro cya Kayumbu giherereye mu Mudugudu wa Nyarusange, Akagari ka Karengera mu Murenge wa Musambira, Akarere ka Kamonyi. Tariki ya 18/04/1994, Abatutsi bari barahungiye kuri paruwasi ya Kamonyi bari baturutse impande zitandukanye, bangiwe kwinjira muri iyo kiriziya na Padiri mukuru wayo Pio NTAHOBARI n'umwarimu witwa Rwakayigamba ndetse n'umukarane wo kwa padiri witwa NYAGAHENE bavuga ko badashaka ko babasenyera Kiriziya. Icyo gihe Abatutsi bagiye mu isoko ryari imbere ya kiriziya. Abicanyi ntibanyuzwe kuko baje no kwirukanwa aho ngaho, bavuga ngo Imana y'Abatutsi iri i Kabgayi nibagende.

 

Bafashe umuhanda bose baramanuka, bageze mu Kibuza (kuri ubu hubatse urwibutso rwa Kamonyi) bahasanga igitero ariko barakirokoka, basanze ikindi gitero ahitwa mu Gaperi cyicaga abana b'abahungu n'abagabo. Icyo gitero abakirokotse bakomeje umuhanda bagera kuri Paruwasi ya Musambira, bahasanga Padiri mukuru, babashyira mu kiriziya. Bukeye, tariki 19 mata haza imodoka yuzuye abasirikare binjira mu gikari cyo kwa padiri bakorana inama n'impunzi za Kivuye zari zihari. Mu kanya gato Padiri mukuru ati mujyende nta mpunzi dushaka bavuze ko zose zigenda cyane cyane izaje nyuma. Interahamwe zarabirukanye n'imipanga. Abasirikare b'abajepe bajya ku kiraro cya Kayumbu, kuhabategera batangira kubarasa, imirambo yuzura aho ku kiraro cya Kayumbu n'impande zacyo.

Abasirikare barangije kubarasa barigendeye, haza abaturage n'interahamwe batangira kwica abakirimo umwuka bakoresheje intwaro gakondo ndetse banabacuza. Abenshi mu bakoze ubu bwicanyi ntabwo bamenyekanye kuko bwakozwe n'abasirikare batari bamenyerewe aho ngaho.

Iyicwa ry'Abatutsi kuri Paruwasi ya Nkanka, Rusizi

Guhera ku itariki ya 08/04/1994 Abatutsi batangiye guhungira kuri Paruwasi ya Nkanka kuko ubwicanyi bwari bwatangiriye ahitwa Gitwa na Murambi kandi interahamwe zatangiye gutwikira Abatutsi. Impamvu yatumye Abatutsi bahungira kuri iyi Paruwasi ya Nkanka ni uko bari batuwe bahahungira ntibahicirwe kandi na Burugumestre wari uwa Komini Kamembe yari yabeshye ko Abatutsi umutekano wabo uri bucungirwe kuri Paruwasi ndetse yoherezayo n'Abapolisi bo kubarinda. Icyo yari agamije, kwari ukugira ngo amenye Abatutsi bahari uko bangana no gucunga ngo hatagira abahungira muzi Zayire.

Kuwa 17/04/1994 Burugumesitiri wa Komini Kamembe MUBILIGI Jean Napoléon afatanyije n'uwari Padiri mukuru wa Nkanka, NGIRINSHUTI Thaddée, bakoranye inama n'interahamwe zari zikomeye zakoreraga muri Komini Kamembe bategura kwica Abatutsi. Bucyeye bwaho kuwa 18/04/1994 interahamwe zaraje zirabica bakoresheje Gerenade, nta mpongano, imipanga, inkota, n'izindi ntwaro zitandukanye. Kugira ngo Abatutsi bari bahungiye muri Paruwasi ya Nkanka batazirwanaho nibaterwa, Padiri NGIRINSHUTI Thaddée yamburaga Abatutsi intwaro zose (amacumu, imihoro, inkoni, imiheto n'imyambi) babaga bahunganye ababwira ati: 'nta mpunzi ihungana intwaro, yagiragango nibaterwa hatazagira uwitabara'.

Ikindi ni uko abapolisi bari babarinze bari bafite icyumba kwa Padiri cyari kirunzemo imbunda na Gerenade, bikaba byarakoreshejwe n'interahamwe kuwa 18/04 zije kubica.

Kuri Komini ya Kamembe kuwa 19/04/1994 hiciwe Abatutsi 60 bari bahahungiye. Mbere y'uko bicwa Burigadiye wa Komini Kamembe witwa GATERA Casimir yabanje kubarwanaho abahisha muri Komini noneho Burugumesitiri wa Kamembe MUBIRIGI Jean Napoléon aramubwira ati: 'interahamwe ziribeshya zigasenya iyo Komini zishaka abo Batutsi wahishe urwigendeho, sohora abo Batutsi bicwe vuba'. Burigadiye yahise abasohora hanze interahamwe zirabica bose.

Tariki ya 18/4/1994, i Cyangugu, Abatutsi biciwe no kuri paruwasi Nyabitimba muri Komini Karengera no ku bitaro bya Mibilizi muri Cyimbogo.

Iyicwa ry'Abatutsi kuri paruwasi ya Simbi, Huye

Umurenge wa Simbi uherereye mu yahoze ari Komini Maraba yayoborwaga na Burugumesitiri Habineza Jean Marie Vianney guhera mu mpera za 09/1990. Uyu mu Burugumesitiri yaranzwe no gutoteza Abatutsi bikomeye kuko aricyo bari bamushyiriye ku butegetsi:

-Habineza yagiye mu kigo cya CERAI i Simbi mu gitondo afata Mazimpaka Gregoire wayiyobaraga, arazamuka i Cyendajuru afata mwarimu Kanobayire Jean Baptiste abajyana baboshye bari hagati y'abapolisi babiri bafite imbunda, bajya mu ngo zabo i Gisakura kubasaka ngo bashaka imbunda bahawe n'inkotanyi.

-Yashyize imbaraga mu gutoza interahamwe kwikorera ibikoresho byicishijwe abatutsi(impiri zitwaga nta mpongano y'umwanzi, imiheto n'imyambi, amacumu), no kuziha ibindi bikoresho bitandukanye birimo imihoro, imbunda na grenades. Yakoresheje listes z'abatutsi n'aho batuye kugira ngo kuzabica bizaborohere kandi ntihazagire numwe ubacika kuko babaga bafite imyirondoro yuzuye. Kuva Inkotanyi ziteye nta mututsi wavaga muri Komini Maraba adafite laisser-passer ya Komini.

Hagati y'itariki 10-17/04/1994, Abatutsi bo mu cyahoze ari Komini Maraba bakusanyirijwe muri Kiriziya y'I Simbi ari benshi cyane. Abapolisi batatu aribo Nkuriza, Kanani Antoni na Nyirimana Kaniziyo babanje kuza gucunga impunzi ku Kiriziya ngo hatagira izicika.

Mbere yuko babica, Perezida Sindikubwabo avuye ku Gikongoro, yaje kubashishikaza anabagaya ko batinze kwica abatutsi, hanyuma ageze i Butare, aboherereza abasirikare bo kubafasha. Kuri uwo munsi, interahamwe ziturutse ku Gikongoro zifatanyije n'iza Maraba, abasirikare, abajandarume n'abapolisi babagabyeho igitero gikomeye. Hari ku manywa y'ihangu ubwo interahamwe ebyiri zuriye kiriziya zisambura ibati zibasukaho essence, uwitwa Bushakiro abamenamo ifu y'urusenda rubabuza guhumeka. Nyuma, baciye inzugi babatera amagrenades n'amabuye, birangiye interahamwe zirinjira zifata abagihumeka ziratemagura zirabarangiza. Hiciwe abatutsi bagera ku bihumbi 40.000.

Bamaze kwica Abatutsi bo mu Kiriziya ya Simbi, Burugumesitiri Habineza yatumye interahamwe yitwa Ruzindana Celestin ku babikira ko bagiye kuza kwica abatutsi bahahungiye mu kigo nderabuzima cya Simbi. Interahamwe ntizatinze zahise zijyayo zica ababikira (mama Petero Claver, mama Pawulo na mama Pelajiya), mama Gerivasi bamukubise impiri mu mutwe nyuma aza guhembuka ariko yahumye amaso. Bishe n'abatutsi bari bahungiye muri iryo vuriro.

Abari ku isonga mu bwicanyi :

— Abari abapolisi ba Komini: Nkuriza, Antoni Kanani, Nyirimana Kaniziyo Sebarinda Celestin yari yarasezerewe mu gipolisi.

Nshimyumukiza Clement yari ” Assistant Bourgmestre “

-Rwabuhungu Sylvestre yari perezida wa MDR Power muri Komini

-Mujyambere Antoinne yari umwarimu, akaba na perezida wa MRND muri Komini n'abandi baturutse Gikongoro.

Uwo munsi muri Komini Kigembe i Butare hishwe Abatutsi hagati y'ibihumbi 2000 na 3 000.

Iyicwa ry'Abatutsi kuri OPROVIA, Rusizi

Mu Karere ka Rusizi mu Mujyi wa Kamembe hiciwe Abatutsi benshi bakurwaga mu mpande n'impande zigize uyu Mujyi. Kuva ku itariki ya 18/04/1994 interahamwe zatangiye kugenda zitera mu ngo zigakuramo Abatutsi zikabajyana kubicira mu mujyi wa Kamembe impande y'isoko rishyashya no mu ikawa zari ziri impande y'ahubatse banki y'abaturage (BPR) ya Rusizi ahari Segiteri ya Kamembe. Izo nterahamwe zikaba zari ziyobowe na Napoléon MUBIRIGI wari Burugumesitiri wa Komine Kamembe, Haruna Rizinde wari uhagarariye MRND na Konseye wa Segiteri Kamembe witwaga MURUKU, bakaba barahuriye kurya 2 aho bitaga ku kazu k'amazi, bakoresha interahamwe inama nyuma yayo abagabanyamo ibyiciro 3, bigomba gushakisha ahihishe Abatutsi muri Centre ya Kamembe.

Mu mujyi wa Kamembe, hishe interahamwe z'Abanyarwanda ndetse n'Abicanyi b'Abarundi bari barahungiye mu Rwanda. Mu nterahamwe zari zikomeye zo muri site harimo: Kanyarukiko Cassim, Ngenzenuku Hassan, Haluna Nsengiyumva Alias Cenga, Shuwayibu Alias Epis, Kimputu, Nsengiyumva n'abandi benshi.

Iyicwa ry'Abatutsi i Mwulire, Rwamagana no ku kigo cy'amashuri cya Sovu

Mbere gato ya Jenoside, Abatutsi bari batuye mu cyahoze ari Komini Bicumbi baratotejwe cyane n'uwahoze ari Burugumesitiri Lawurenti Semanza ndetse n'uwamusimbuye Juvenal Rugambarara. Nyuma y'uko indege y'uwari perezida Habyarimana Yuvenal iguye, Abatutsi bo muri uyu Murenge babujijwe kugira aho bongera kujya bategekwa kuguma mu ngo zabo.

Tariki ya 07/04/1994 ibitero by'abahutu byatangiye gusanga abatutsi mu ngo zabo zikabica. I Mwurire habayeho bamwe mu Bahutu bafatanije n'Abatutsi gukumira abicanyi mu rwego rwo kwirwanaho, bakumira abicanyi babaga bavuye mu duce duturanye bababuza kwinjira muri segiteri yabo. Abo Bahutu baje gutumizwa mu nama yari yateguwe n'abayobozi ba MRND muri Komini Bicumbi, babashishikariza kudakomeza gufatanya n'abatutsi. Abatutsi bakomeje kwirwanaho bimara iminsi hafi 12.

Ku musozi wa Gisanza, akagali ka Mwurire, Umurenge wa Mwurire ku wa 18/04/1994 imodoka yazanye interahamwe, abapolisi bo muri komini n'abasilikare bafite imbunda zitandukanye, batangira kuzirashisha Abatutsi bari bateraniye kuri uwo musozi wari wahuriyeho n'abaturutse segiteri ya Nzige, Gahengeli, Rubona, Rutonde ndetse na Bicumbi. Abicanyi baje gukomeza kurasa, abirwanagaho bagezaho bacika intege kuko n'intwaro zabo bakoreshaga zagendaga zishira zari zirimo amabuye n'inkoni kandi abishi babo bakomeje umurego.

Abatutsi basaga 15.000 barahaguye, hari n'abandi biciwe mu nzira no kuri za bariyeri zitandukanye nka bariyeri yari hafi y'urusengero rw'ababaptiste hiciwe Abatutsi basaga 400 no mu gishanga cya Kabuya hiciwe abari hejuru y'ibihumbi 50 no kwa Konseye Bakundukize Yohani.

Uwo munsi kandi Abatutsi bari bahungiye ku kigo cy'amashuri cya Sovu, i Rwamgana hiciwe abana, abagore n'abakecuru mbere yo kubica barabanje bagafata ku ngufu abana b'abakobwa ndetse n'abagore nyuma babajugunyamo insenda aho bari mu byumba by'ayo mashuri. Ku wa 18/04/1994 igitero cyari giturutse kwica i Mwurire nicyo cyafatanije n'abahutu ba Sovu barabica barabamara.

Jenoside yakorewe Abatutsi yarateguwe ishyirwa mu bikorwa na Leta. Kubona guhera tariki ya 7 mata 1994 mu gitondo, abatutsi bicwa icyarimwe ahantu hantandukanye mu gihugu hose byerekana ku buryo budashidikanywaho ko ari umugambi wari warateguwe na Leta.

Dr Bizimana Jean Damascene

The post Tariki 18 Mata 1994: Perefe Kayishema Clement yarimbuye Abatutsi kuri Stade Gatwaro, Kibuye appeared first on RUSHYASHYA.

Source : https://rushyashya.net/tariki-18-mata-1994-perefe-kayishema-clement-yarimbuye-abatutsi-kuri-stade-gatwaro-kibuye/?utm_source=rss&utm_medium=rss&utm_campaign=tariki-18-mata-1994-perefe-kayishema-clement-yarimbuye-abatutsi-kuri-stade-gatwaro-kibuye

Ibyo abagabo bashaka ku mukunzi cyangwa uwo bazabana bitandukana cyane bitewe n'abantu. Ariko se, kuki hari abagabo bamwe bahitamo abagore bafite umubiri muto kurusha abafite ubundi buryo bw'imibiri? Nubwo buri wese afite uburyo abona ubwiza n'ibimushimisha, hari impamvu zimwe na zimwe zituma abagore bafite umubiri muto bashobora gukundwa cyane n'abagabo bamwe. Reka dusuzume zimwe muri izo mpamvu nyamukuru.

1. Abagore bafite umubiri muto bakundwa cyane n'abantu benshi

Si ibanga ko abagore bafite umubiri muto bakunze gufatwa nk'abahiga abandi mu bijyanye n'ubwiza nk'uko bisobanurwa mu binyamakuru, amafilimi, ndetse no ku mbuga nkoranyambaga. Imibiri yabo isa nk'iteguye, amaboko magufi, inda itarimo ibinure, n'ibindi bigaragaza isuku n'uburanga, akenshi bifatwa nk'ikimenyetso cy'ubwiza n'ubuhanga.

Akenshi, aba bagore baba bafite uko bahagaze gutunganye, bituma bambara imyenda ibegereye, inkweto ndende, n'imyambaro idasanzwe batikandagira. Bityo, abagabo benshi babafata nk'icyitegererezo cy'ubwiza bujyanye n'igihe.

Ibi ntibisobanura ko abandi bagore bafite ubundi buryo bw'imibiri batari beza—ubwiza buri mu buryo bwinshi. Ariko se, mu isi igengwa n'imyitwarire y'imbuga nkoranyambaga n'amafilimi, birumvikana ko hari abagabo bagira ibyo bitaho cyane.

2. Bafatwa nk'abanyamaboko n'abanyabuhanga mu ngendo

Nubwo buri mubiri ugomba kubahwa kandi ugakundwa, hari ukwiyumvisha ko abagore bafite umubiri muto baba bafite ubuhanga mu kugenda cyangwa gukora ibikorwa bitandukanye. Mu rukundo aho gukora imibonano mpuzabitsina bifite agaciro, hari abagabo bumva ko gufata cyangwa kwimura umugore muto biborohera.

Ibi biterwa ahanini n'uko mu bitabo cyangwa amafilimi, abagore bafite umubiri muto bakunze kugaragara nk'abanyabugenge, banyamujyo, kandi basukuye. Ku bagabo bakunda ingendo, siporo, kubyina cyangwa ibindi bikorwa bifata ingufu, kubona uwo bahuje ibi bintu ni inzozi.

Nubwo atari buri gihe ko umugore muto aba afite ingufu nyinshi, iyo umugabo yifuza ubuzima bufite ibikorwa byinshi, ashobora gutekereza ko umugore muto ari we wamubera umufatanyabikorwa mwiza.

3. Bafitwaho igitekerezo cy'uko baba bafite ubuzima buzira umuze

Kuva kera, hari uko abantu bumva ko kuba umubiri uri muto bishobora kugaragaza ubuzima bwiza. Abagore bafite umubiri muto bashobora gufatwa nk'abakora siporo kenshi kandi barya neza. Imibiri yabo isa neza kandi itarimo ibinure bibaranga nk'abafite isuku mu mirire no mu mibereho.

Nubwo ubunini bw'umubiri budahora bugaragaza uko umuntu amerewe mu by'ubuzima, hari abagore bunanutse baba batarya neza cyangwa badakora imyitozo. N'ukuri, hari n'abagore bafite umubiri munini bafite ubuzima bwiza cyane. Ariko kubera imyumvire ishingiye ku mico n'amateka, hari abagabo bashobora gutekereza ko abagore bato bafite ubuzima bwiza.

Ku bagabo baha agaciro ubuzima n'imyitozo ngororamubiri, kubona umugore ugaragara nk'ufite ubuzima bwiza bishobora kuba intandaro yo kumuhitamo.

4. Hari ababona ko bashobora kubyarana neza

Nubwo ibi bitashingirwaho nk'ukuri kwa gihanga, hari abagabo batekereza ko abagore bafite umubiri muto bashobora kubyarana neza. Benshi babishingira ku gitekerezo cy'uko bagira ibyago bike byo kugira ibibazo mu gihe batwite kuko batarengeje ibiro byinshi.

Hari n'imyumvire ivuga ko abagore bunanutse baba bafite imibiri 'iteguye' kwakira impinduka za kirazira zitandukanye mu gihe cyo gusama no kubyara. Ibi bishingirwa ku myumvire y'uko kugira ibinure byinshi bishobora gutera indwara ziterwa n'inda nko kugira isukari nyinshi mu maraso cyangwa umuvuduko w'amaraso.

Ibi si itegeko. Buri mugore afite umubiri we, kandi kubyara bisaba ibirenze gusa uko umuntu agaragara. Ariko ku bagabo bashyira imbere ingo n'abana, bashobora kugira ubushake bwo guhitamo umugore batekereza ko ashobora kubyarana neza, ndetse bikaba bimwe mu bituma bamwe bahitamo abagore bunanutse.

5. Baba batekerezwa nk'abagira ibyago bike byo kurwara

Abagabo bafite inyota yo kubaho igihe kirekire kandi neza bashobora kumva bashishikajwe n'abagore bafite umubiri muto kuko baba babona nk'aho bafite ibyago bike byo kurwara indwara zifitanye isano n'ibinure.

Nk'uko ubushakashatsi butandukanye bubyerekana, kugira ibiro byinshi bishobora gutuma umuntu agira ibyago byinshi byo kurwara umutima, diyabete, cyangwa izindi ndwara z'ibinure. Nubwo abagore bunanutse nabo bashobora kurwara, hari igitekerezo cy'uko kugira umubiri muto bishobora gufasha mu gukomeza umutima ukora neza n'isukari ihamye mu maraso.

Ku bagabo bifuza umubano urambye ushingiye ku buzima bwiza n'imyitozo, kubona umugore ugaragara nk'umunyamugisha mu buzima bishobora kuba impamvu ituma bamuhitamo.

Icyitonderwa cya nyuma

Nubwo ibyifuzo n'imyumvire ku bijyanye n'ubwiza bitandukanye ku bantu, hari impamvu zitandukanye zituma bamwe mu bagabo bakunda abagore bunanutse. Bimwe mu byo bareba harimo isura y'ubwiza, uburyo bagaragara nk'abanyamaboko, cyangwa uko bashobora kugira ubuzima bwiza.

Icyakora, ni ingenzi kwibuka ko ubwiza bufite amasura menshi, kandi kugirana umubano mwiza bisaba byinshi birenze gusa uko umuntu agaragara. Ubusabane nyakuri bushingiye ku rukundo, kubahana, no gusangira ibyiyumvo kurusha ishusho y'inyuma.

Source : https://kasukumedia.com/impamvu-5-zidasanzwe-zishobora-gutuma-umugabo-ashaka-umugore-munanutse-niba-ufite-umubiri-munini-ibi-biraguhangayikishije/

Yabigarutseho ku wa 18 Mata, 2025, umunsi hibukwaho abasaga ibihumbi 40, biciwe kuri Paruwasi Gatolika ya Simbi, mu yari Komini Maraba, Perefegitura ya Butare, ubu ni mu mirenge ya Maraba na Simbi mu Karere ka Huye.

Mu buhamya bwa Nsengimana Jean Bosco, warokokeye i Simbi afite imyaka 11, yagaragaje ubugome ndengakamere abari bahungiye i Simbi bicanwe, burimo no gutwikishwa lisansi.

Yavuze ko we n'abo bari kumwe bahungiye kuri Paruwasi ya Simbi, kuko ngo abakuru bari kumwe bavugaga ko kera abahungiraga kuri paruwasi nta kibazo bagiraga.

Bakihagera, uwitwaga Habineza Jean Marie wari umuyobozi, yabohereje mu Kiliziya ngo abe ari ho abacungira umutekano.

Ati ''Byarangiye bibaye urupfu, kuko interahamwe zari zaratojwe hamwe n'abayobozi ndetse n'abaturage, baje bagatobora ibisenge bya kiliziya ngo babone aho bacisha lisansi babatwike, barabica.''

Perezidante wa Ibuka mu Murenge wa Simbi, ‎Mutamuriza Judith, yavuze abafite abarokotse Jenoside bagiterwa intimba no ''kutatwereka abacu aho baguye. Icyo kintu kiratubabaza, kuko Leta iradufata mu mugongo, ariko abakoze Jenoside ntibabohoka ngo batwereke aho abacu baguye, intimba iracyari ku mutima.'

‎Minisitiri w'Ububanyi n'Amahanga n'Ubutwererane Amb. Nduhungirehe Olivier, yagaragagaje ko ijambo rutwitsi ry'uwari Perezida wa Leta yiyise iy'Abatabazi, Sindikubwabo Théodore, ari ryo ryakongeje Jenoside mu cyahoze ari Perefegitura ya Butare.

Ati 'Jenoside yakorewe Abatutsi ahahoze ari Perefegitura ya Butare, ishimangira koko ko yari yarateguwe, bigahinyuza ba bandi bakibishidikanya bavuga ko byatewe n'ihanurwa ry'indege ya Habyarimana, kuko ubwicanyi hano bwatangiye nyuma y'ibyumweru, bikagaragaza ko ku wa 7 Mata 1994, nta burakari bw'abaturage bwari buhari.'

'Jenoside yagombye kuzanwa n'abayobozi, muribuka ko Sindikubwabo yagombye kwiyizira muri iyi Perefegitura no muri uyu murenge, n'inama yakoresheje ababurugumesitiri ba komini 20 zari zigize Butare, byose bigamije gukwiza umugambi wa Jenoside, cyane cyane muri iyi Perefegitura yari yaranangiye.'

Mu Kwibuka31 kandi hashinguwe mu cyubahiro umubiri umwe wabonetse.

Urwibutso rwa Jenoside yakorewe abatutsi rwa Simbi ruruhukiyemo imibiri y'abatutsi irenga ibihumbi 40 bari bahahungiye baturutse ahantu hanyuranye higanjemo ahahoze ari Perefegitura ya Gikongoro.
‎

Minisitiri Nduhungirehe Olivier, yagaragaje ko Jenoside yakorewa Abatutsi mu yari Perefegitura ya Butare ishimangira uburyo yari yarateguwe

---

Source : http://igihe.com/amakuru/u-rwanda/article/minisitiri-nduhungirehe-yahinyuje-abavuga-ko-jenoside-yakorewe-abatutsi

Yabitangarije mu Karere ka Karongi, ku wa 18 Mata 2025, mu gikorwa cyo kwibuka ku nshuro ya 31 Abatutsi biciwe muri sitade Gatwaro no mu nkengero zayo.

Mukantaganzwa Domitilla wari umushyitsi yahumurije abarokotse Jenoside yakorewe Abatutsi, abasaba gukomeza kurangwa n'ubutwari no guharanira kubaho neza.

Yavuze ko mu turere dutandukanye tw'u Rwanda hari ahakigaragara ingengabitekerezo ya Jenoside, atanga urugero ku barokotse Jenoside bicwa nabi, nk'uko abishwe muri Jenoside bishwe.

Ati 'Mu karere duherereyemo by'umwihariko muri Repubulika iharanira Demukarasi ya Congo, ingengabitekerezo turayumva, Abatutsi b'Abakongomani bavuga Ikinyarwanda baricwa, baratwikwa, bararibwa, kandi iyo ngengabitekerezo yajyanyweho n'abaturutse aha ngaha bari muri FDLR'.

Mukantanganzwa yasabye Abanyarwanda gukomeza kwitwara neza mu minsi 100 yo kwibuka, no kurangwa n'ibikorwa byo gufata mu mugongo abarokotse Jenoside, abanyantege nke bakitabwaho by'umwihariko.

Ati 'Twirinde amagambo asesereza, twirinde ingengabitekerezo ya Jenoside. Yo ndagira ngo nimutanayirinda mubabariye abo mubwira, muyirinde ku bwanyu, kuko ntabwo izihanganirwa. Ingengabitekerezo ya Jenoside ni icyaha, kirahanwa kandi gihanishwa ibihano biremereye. Nabagira inama yo kuyirinda, nabagira inama yo gucira kuko birarura, ishyamba si rya rindi n'ijoro si rya rindi. Mutuze muturane n'abandi neza, tubane neza twese dufatanye kubaka uru Rwanda kugira ngo turugeze ku kigero twifuza.'

Sitade Gatwaro no mu nkengero zayo hiciwe Abatutsi benshi bitewe n'uwari Perefe wa Kibuye Kayishema Clement wabakusanyirijeyo ababeshya ko bagiye kuhabarindira.

Urwibutso ruri ahahoze iyi sitade rushyinguyemo abarenga ibihumbi 15.

Itegeko ryerekeranye n'icyaha cy'ingengabitekerezo ya jenoside n'ibyaha bifitanye isano na yo riteganya ko umuntu ukorera mu ruhame igikorwa, byaba mu magambo, mu nyandiko, mu mashusho cyangwa ku bundi buryo, kigaragaza imitekerereze yimakaza cyangwa ishyigikira kurimbura abantu bose cyangwa bamwe muri bo bahuriye ku bwenegihugu, ubwoko, ibara ry'uruhu cyangwa ku idini aba akoze icyaha.

Iyo abihamijwe n'urukiko, ahanishwa igifungo kitari munsi y'imyaka itanu ariko kitarenze imyaka irindwi n'ihazabu itari munsi ya y'ibihumbi 500 Frw ariko atarenze miliyoni 1 Frw

Perezida w’Urukiko rw’Ikirenga, Mukantagazwa Domitilla yasabye abafite ingengabitekerezo ya Jenoside kuyireka kuko ingaruka ziremereye zibategereje

---

Source : http://igihe.com/amakuru/u-rwanda/article/mukantaganzwa-domitilla-yeretse-abagifite-ingengabitekerezo-ya-jenoside-ibyago

Mukangarambe yamenye ko ari umututsi ubwo yigaga mu mashuri abanza, abona abana bamwe bakubitwa umunyafu ku kibuno mu gihe abandi bakubitwaga inkoni mu mutwe.

Ati 'Nigishijwe n'umwarimu witwaga Kagabo w'i Nawe. Umwana w'Umututsi waciye mu ishuri rye azi umukoba we wo mu mutwe, abana b'Abahutu bo yabakubitaga utunyafu tw'inturusu ku kibuno.''

Mukangarambe yavuze ko inkoni nyinshi yongeye kuzikubitwa mu mwaka wa kane no mu mwaka wa gatandatu ubwo yigishwaga n'abarimu banga abana b'Abatutsi.

Bongeye kandi kujujubywa ubwo yigaga muri CERAI aho umwarimu umwe yashatse ko baryamana, abyanze yajya yinjira mu ishuri akamusohora kugeza arangije kuhiga.

Mukangarambe yavuze ko tariki ya 8 Mata aribwo Abatutsi batangiye kwicwa kumugaragaro muri Mwulire, bahungiye ku nzu ya Kiliziya Gatolika ya Kabuye hafi y'ahari urwibutso ubu.

Ati 'Twahamaze iminsi ibiri tariki ya 10 Mata batubwira ko bagiye kuza kuyitwika bituma twese duhungira ku Gasozi ka Gasanza muri Mwulire, tuhasanga Abatutsi benshi cyane, dutangira kwirwanaho dukoresheje amabuye.''

Mukangarambe yavuze ko tariki ya 18 Mata ari itariki atazibagirwa mu buzima bwe kuko aribwo haje abasirikare benshi n'Interahamwe mu gitero simusiga bari babagabyeho.

Uwo munsi babanje kwirwanaho bakoresheje amabuye banatwika imodoka yari yazanye abasirikare, mu gihe abasirikare bo bakoreshaga amasasu na grenade ari nazo zabaciye intege bituma Interahamwe zitangira kwica Abatutsi.

Uko bicaga abantu benshi, we yanyereye gake ajya mu gashyamba kari munsi aho aba ari naho arokokera ubwo bwicanyi, yaje kujyana na bake mu batutsi bari baharokokeye batangira kugenda basanganira Inkotanyi kuko bari bamenye ko zageze i Kayonza.

Mukangarambe yashimiye Inkotanyi zamurokoye, zikamukura mu menyo ya rubamba. Yashimiye ubuyobozi bukuru bw'igihugu bwabashije kubakira abarokotse Jenoside, bakagarura ubumwe n'ubwiyunge kuri ubu igihugu kikaba gifite umutekano.

Mukangarambe Josiane warokokeye i Mwulire yavuze ko yamenye ko ari umututsi abimenyeye mu mashuri abanza

---

Source : http://igihe.com/amakuru/u-rwanda/article/umwana-w-umututsi-yakubitwaga-umukoba-mu-mutwe-ubuhamya-bwa-mukangarambe