Author: webrwanda

Ibi babigarutseho ubwo hibukwaga ku nshuro ya 31 Jenoside yakorewe Abatutsi mu Karere ka Ngoma. Muri iki gikorwa hanashyinguwe mu cyubahiro imibiri umunani yabonetse mu mirenge ya Kibungo na Remera.

Habimana Emmanuel bitaga Cyasa kuri ubu wakatiwe igifungo cya burundu nyuma yo guhamwa no kugira uruhare muri Jenoside yakorewe Abatutsi, imodoka yakoreshaga atunda imibiri y'Abatutsi kuri ubu iri ku rwibutso rwa Jenoside rwa Kibungo nka kimwe mu bimenyetso byifashishwaga muri Jenoside yakorewe Abatutsi.

Ndayisenga Simon Pierre watanze ubuhamya, yavuze ko Cyasa ari we watangije Jenoside muri Kibungo ndetse anafasha izindi nterahamwe mu kuzitwara mu modoka zigiye kwica mu bice bitandukanye.

Uyu mugabo ngo imodoka ye ni na yo yakoreshwaga mu gutunda imirambo iyijyana mu byobo bitandukanye mu rwego rwo kujijisha ko bari gukora ubwicanyi.

Ati 'Ahagana saa Saba ni bwo twumvise isasu rimwe gusa bavugaga ko ari Cyasa warirashe kugira ngo arabure bagenzi be ngo batangire bice, baraje bagota kiriya kigo cyose cya Economat bucece bararasa abantu twese dukwira imishwaro, dutangira kwiruka njye nihisha ahantu mu gikoni.''

Ndayisenga yavuze uburyo bagiye bamwicira mu maso bamwe mu bavandimwe be, inshuti ze n'abandi benshi bagiye bica areba n'amaso ye, kugeza ubwo ahasohotse agenda yihishahisha kugeza ubwo ageze i Burundi mu nkambi.

Yashimiye Inkotanyi zabohoye u Rwanda zigatuma yongera kubonana na Mama we, yavuze ko kuri ubu yamaze kwiyubaka aho afite umugore n'abana babiri, kuri ubu afite ibisigisigi bya Jenoside birimo kuvunika imbavu n'ibindi.

Karasira Theophille uvuka muri Kibungo we yavuze ko imodoka yatwaraga amatafari kera kuri ubu iri ku rwibutso rwa Jenoside yakorewe Abatutsi rwa Kibungo, yifashishijwe cyane na Cyasa mu gutwara Interahamwe zigiye kwica Abatutsi mu bice bitandukanye aho yari ikimenyabose.

Yagize ati 'Mu gihe cya Jenoside rero iyi kamyo ya Cyasa yatwarwaga n'umushoferi witwa Canisius, yaranabyireze arabyemera, yatwaragamo Interahamwe zikajya kwica hirya no hino. Ubundi igakoreshwa hatundwa imirambo ikavanwa ahari Komini Birenga no kuri Economat bakaza bakayishyira mu byobo byari hano hari urwibutso byacukuwe bashaka amatafari.''

Yavuze ko kuba iyi modoka iri ku rwibutso rwa Kibungo bayibona nka kimwe mu bimenyetso simusiga byifashishijwe mu kwica Abatutsi hirya no hino mu bice bitandukanye byo muri Kibungo.

Umunyamabanga Nshingwabikorwa w'Intara y'Iburasirazuba, Dr. Nyirahabimana Jeanne, yihanganishije imiryango yashyinguye ababo mu cyubahiro avuga ko Leta y'u Rwanda yagerageje gutanga ubutabera binyuze mu nkiko Gacaca. Yasabye buri wese kurwanya ingengabitekerezo ya Jenoside yivuye inyuma kugira ngo ntizongere kuba.

Urwibutso rwa Jenoside yakorewe Abatutsi rwa Kibungo rushyinguyemo imibiri irenga ibihumbi 25, hakaba haranashyinguwemo indi mibiri umunani yabonetse mu mirenge ya Kibungo na Remera.

Imodoka ya Cyasa yagize uruhare rukomeye mu gutiza umurindi Jenoside yakorewe Abatutsi muri Kibungo

Kuri ubu iyi modoka iri ku Rwibutso rwa Kibungo nka kimwe mu kimenyetso cya Jenoside yakorewe Abatutsi muri ako gace

Habimana Emmanuel uzwi nka Cyasa yakatiwe igifungo cya burundu kubera uruhare muri Jenoside yakorewe Abatutsi

Umunyamabanga Nshingwabikorwa w'Intara y'Iburasirazuba, Dr. Nyirahabimana yasabye buri wese kurandura ingengabitekerezo ya Jenoside

Ndayisenga Simon Pierre yavuze ko isasu rya mbere ryarashwe muri Kibungo ryarashwe na Cyasa kugira ngo n'abandi batangire kwica

Hashyinguwe imibiri umunani mu cyubahiro

---

Source : http://igihe.com/amakuru/u-rwanda/article/ngoma-hasobanuwe-uruhare-rw-imodoka-ya-cyasa-mu-gutiza-umurindi-jenoside

Hamenyekanye ko i Doha muri Qatar hari kubera ibiganiro biziguye hagati y'ubutegetsi bwa Repubulika ya Demokarasi ya Congo (RDC) n'ihuriro rya Alliance Fleuve Congo (AFC) ribarizwamo umutwe wa M23 n'uwa Twirwaneho.

Aya makuru yatangajwe n'Ikigo cy'Itangazamakuru mpuzamahanga cy'Abafaransa, RFI, cyavuze ko ibiganiro bimaze iminsi ine bikomeje hagati y'impande zombi, bikaba bibera mu ibanga i Doha, umurwa mukuru wa Qatar.

Ibiganiro bikomeje mu gihe impande zombi zinyuza ubutumwa bwazo ku muhuza, Emir wa Qatar, Sheikh Tamim bin Hamad Al Thani, nk'uko RFI yakomeje ibitangaza.

Nubwo hari igihe cyari gishize impande zombi zidahuza, iyi radiyo yemeza ko hari intambwe imaze guterwa kuko hari bimwe mu byo baganiriyeho bamaze kumvikana.

Harimo no gutegura inyandiko ihuriweho, nubwo hataramenyekana niba izashyirwa ahagaragara nk'amasezerano yo guhagarika imirwano cyangwa niba izaguma mu bwiru.

Ibi biganiro byatangiye nyuma y'uko umutwe wa M23 wafashe imijyi itandukanye irimo nka Goma na Bukavu mu Burasirazuba bwa RDC, ibintu byateje impungenge nyinshi mu karere.

Perezida wa RDC, Felix Tshisekedi, wari waravuze ko atazigera yicarana n'umutwe wa M23, yaje kwemera kujya mu biganiro nyuma y'uko Sheikh Tamim bin Hamad abaye umuhuza hagati ye na Perezida w'u Rwanda ku itariki ya 18 Werurwe 2025.

AFC/M23 yifuza ko ikibazo cyayo n'ubutegetsi bwa Kinshasa kitavangwa n'umubano mubi hagati ya RDC n'u Rwanda, ariko Leta ya RDC yo ikomeje gushinja iri huriro kuba igikoresho cy'u Rwanda, ibyo AFC ihakana yivuye inyuma.

Mu biganiro biri kubera i Doha, Leta ya RDC yasabye ko AFC/M23 iva mu duce twose yafashe mu Burasirazuba bwa Congo, ariko AFC yo yagaragaje ko ibyo bidashoboka burundu, yemeza gusa ko yavuye mu mujyi wa Walikale.

Iri huriro risaba Leta ya RDC: Gukuraho igihano cy'urupfu cyahawe bamwe mu bayobozi baryo; Gufungura abanyamuryango baryo bafungiwe i Kinshasa; Gusubiza ingabo za SADC ziri muri Kivu y'Amajyaruguru iwabo.

Ibi byose ariko ntibiragerwaho, bikaba bigaragaza ko urugendo rwo kugera ku mahoro arambye ruracyari rurerure nubwo intambwe ya mbere yatewe.

Source : https://kasukumedia.com/doha-hategerejwe-umwanzuro-ukomeye-urava-mu-biganiro-byahuje-leta-ya-rdc-na-afc-m23/

Ibi byabereye mu Murenge wa Mushonyi, Akagari ka Magaba ho mu Mudugudu wa Gakomeye, kuri uyu wa 20 Mata 2025 mu masaha ashyira Saa Saba z'amanywa.

Umuyobozi w'Akarere ka Rutsiro wungirije ushinzwe iterambere ry'ubukungu, Uwizeyimana Emmanuel, yahamirije IGIHE aya makuru avuga ko uru rupfu rwatunguranye.

Ati “Uru rupfu rwatunguranye mu mvura yagwaga ubwo inkuba yakubitaga umudamu witwa Izabayo wari iwe mu rugo ahita apfa, yasize abana babiri n'umugabo.”

Yaboneyeho kwibutsa abaturage ko imiterere y'Akarere ka Rutsiro yibasirwa n'inkuba, muri ibi bihe by'imvura, ababwira ko bakwiriye kwitwararika bakirinda gukoresha ibyuma by'ikoranabuhanga bikurura amashanyarazi, bakirinda kugenda mu mvura no kugama munsi y'ibiti.

Ubwo twakoraga iyi nkuru umurambo wa nyakwigendera wari ukiri mu rugo rwe, hategerejwe Urwego rw'Igihugu rw'Ubugenzacyaha ngo ruhagere rukore iperereza ku cyateye urupfu, umurambo ubone kujyanwa ku bitaro bya Murunda gukorerwa isuzuma mbere y'uko ushyingurwa.

Umuyobozi Mukuru ushinzwe ubutabazi bwihuse muri Minema, ACP. Egide Mugwiza aherutse gutangariza IGIHE ko inkuba ari ikibazo by'umwihariko mu bice by'icyaro, kuko mu bice by'imijyi usanga inyubako nyinshi zifite imirindankuba.

Umugore wo mu Karere ka Rutsiro yakubiswe n’inkuba ahita apfa

---

Source : http://igihe.com/amakuru/u-rwanda/article/rutsiro-inkuba-yahitanye-umugore-wari-iwe

Nyuma y'uko Joseph Kabila wahoze ari Perezida wa Repubulika Iharanira Demokarasi ya Congo (RDC) agiriye uruzinduko mu mujyi wa Goma ugenzurwa n'umutwe wa AFC/M23, ubutegetsi bwa Kinshasa bwafashe icyemezo gikakaye cyo guhagarika ishyaka rye PPRD, ndetse bunafatira imitungo ye.

Ni ibyatangajwe mu itangazo ryasohowe mu ijoro rishyira kuri iki Cyumweru tariki ya 20 Mata 2025. Iryo tangazo ryashyizweho umukono na Shabani Lukoo Bihanga.

Umwe mu bayobozi bakuru mu nzego z'ubutegetsi, rivuga ko Kabila agiye gukurikiranwa n'ubutabera kubera icyaha ashinjwa cyo kugambanira igihugu.

Muri iryo tangazo, Leta yavuze ko yafatiye imitungo yimukanwa n'itimukanwa ya Kabila mu bice birimo Kingakati, Kashamata, n'ahandi.

Byongeye, ibikorwa by'ishyaka rye, Parti du Peuple pour la Reconstruction et la Démocratie (PPRD), byahagaritswe mu gihugu hose, kubera uruhare ruvugwa perezida waryo yaba afite mu ntambara irimo kuba mu Burasirazuba bwa Congo.

Ubutegetsi bwanavuze ko ingendo n'ibikorwa by'abanyapolitiki n'abandi bose bakorana na Kabila bigomba kugenzurwa no kugabanywa, mu rwego rwo gukumira ibikorwa byiswe ko bishobora guhungabanya umutekano w'igihugu.

Iryo tangazo rinavuga ko icyemezo cyo kujya i Goma cyafashwe na Kabila ari ubugambanyi ku rwego rwo hejuru, kuko yakoze urugendo mu gace kagenzurwa n'umutwe wa M23.

Umutwe ushinjwa intambara n'ibikorwa byo guhungabanya umutekano, kandi ukaba ugenzura imijyi ya Bukavu na Goma, ndetse n'ibindi bice byinshi byo muri Kivu y'Amajyepfo n'Amajyaruguru.

Kugeza ubu, ishyaka PPRD nta tangazo rirashyira hanze ku ngamba Leta yarifatiye. Joseph Kabila yayoboye RDC imyaka 18, kuva mu 2001 kugeza mu 2019, ubwo yasimburwaga na Félix Tshisekedi. Uru ruzinduko rwe rufashwe nk'urwongereye ubushyamirane hagati ye n'ubutegetsi buriho.

Source : https://kasukumedia.com/ubutegetsi-bwi-kinshasa-bwafatiye-ibihano-bikomeye-joseph-kabila-nyuma-yurugendo-rwe-i-goma/

Mu magambo ye bwite yanyujije ku rubuga rwa X-Space (rwahoze ari Twitter), Sadate Munyakazi yagize ati: 'Mwaramutse aba hano, maze iminsi mbona kuri iyi mihanda amakuru anyuranye menshi avuga ku wari Meya w'Akarere ka Nyanza.

Abenshi nabonaga mwandika ku mibanire ye n'uwo bivugwa ko bakundana (niba banakundana, njye simbizi, kandi si n'ikibazo). Ibyo byahindutse inkuru.

Sinigeze nganira na we ngo menye byinshi kuri uwo mugore ugaragara nk'aho bakundana, kuko ntibyandebaga, nta na deal ibyara amafaranga nabibonagamo ngo ntegereho umwanya. Icyo nshaka kuvugaho ni ibi bikurikira:

1. Kuki Abanyarwanda dukunda kuvuga no gukina ku mubyimba umuntu uri mu kaga, kandi igihe yari ku butegetsi twamubonaga tukamusuhuza twunamye, tumwita 'Nyakubahwa'?

2. Kuki tuvuga imibereho bwite y'abandi bantu, bikaducira ishabure, tugashishikara, tugata n'isura?

Ibisubizo natekereje:

• Muri abatindi

• Muraciriritse

• Muri imburamukoro

• Muri barwivanga

• Muri abagome

Birababaje kubona abantu bahora mu matiku, inzangano, ubujajwa, ububwa n'ibindi bisa nabyo. Mwaretse tukaganira kuri business, ikoranabuhanga, iterambere, udushya n'ibindi nkabyo, aho kwivanga mu buzima bw'abandi?

Niba ari cyo cyatumye yirukanwa ku mirimo ye, uyu munsi murimo kumutuka, ariko ejo ashobora kwandikwa mu mateka nk'umuntu wagize urukundo rurenze, rukamugeza n'aho yitangira uwo akunda.

Nimugende gake, mugire ubupfura. Birababaje kugira injajwa, abany'amashyari, abatindi muri sosiyete. Ibyo kwamagana sibyo kurebera.

Ubuzima bwite bwa muntu bugomba kubahwa. Mbisubiyemo neza: bugomba kubahwa.'

Source : https://kasukumedia.com/sadate-munyakazi-yamaganye-abasakaza-amakuru-yimibereho-bwite-yuwari-meya-wa-nyanza/

Abo banyeshuri bahawe buruse binyuze muri gahunda yitwa ALX Pathway Program ishyirwa mu bikorwa na ALX Rwanda.

ALX Rwanda ni umuryango utegamiye kuri Leta ugamije guteza imbere impano mu ikoranabuhanga no gutegura abayobozi b'ejo hazaza.

Ni mu gihe ALX Pathway Program ari gahunda y'amasomo y'amezi umunani igamije gufasha abarangije amashuri yisumbuye kubona ubumenyi bw'ingenzi mu kwihangira imirimo, ubumenyi mu micungire y'imari, imibare no gutegura ahazaza habo mu kazi.

Abagiye kwiga mu Birwa bya Maurice bazishyurirwa amafaranga yose y'ishuri, amacumbi, bahabwe amafaranga yo kubatunga buri kwezi, amafunguro ndetse na mudasobwa zo gukoresha mu masomo.

Abo banyeshuri bagaragaje ko biteguye kujya guhatana mu masomo n'abandi bazahasanga bagahesha ishema imiryango yabo ndetse n'Igihugu.

Ikuzwe Kevin ati 'Ndi uwa mbere mu muryango wanjye ugiye kwiga muri kaminuza. N'ubu sindabyumva neza, nsa n'uri kurota. Aya ni amahirwe ntari nzi ko nanjye yangeraho.'

Tumusifu Pacifique we yagize ati 'Niyandikishije muri Pathway mvuga ko n'iyo batampa buruse ariko nzahakura ubundi bumenyi nakoresha mu kubona akazi. Kubona iyi buruse, ni amahirwe akomeye kuko numvaga kwiga muri kaminuza ari nk'umutwaro ku babyeyi.'

Umuyobozi Mukuru wa ALX mu Rwanda, Nimie Chaylone, yavuze ko ALX Pathway Program ari umusanzu ukomeye mu gufasha abanyeshuri gukabya inzozi zo kwiga mu mahanga.

Ati 'Kwiga muri kaminuza mpuzamahanga byari inzozi zidashoboka kuri benshi. Ariko binyuze muri ALX Pathway, dufatanya n'amashuri nka Code Berlin, Northwestern University na Vanderbilt University, ALU, ndetse n'andi ku migabane itandukanye, abana bakabona aho biga. Turi gufasha abanyeshuri b'Abanyarwanda kubona amahirwe yo kwiga muri Kaminuza nziza ku rwego rw'Isi.”

Kwiyandikisha muri ALX Pathway Program mu cyiciro cya kabiri birarimbanyije kuko bizarangira ku wa 21 Mata 2025.

Bikorwa unyuze aha cyangwa ugahamagara kuri 0796163394.

Amasomo yose atangwa ku buntu ku nkunga ya Mastercard Foundation.

Abiga muri ALX Rwanda bagomba kuba ari Abanyafurika, bafite kuva ku myaka 18 kandi bazi Icyongereza neza.

Muri iyo gahunda umunyeshuri umwe yishyurirwa arenze 320.000$ mu myaka ine bamara muri kaminuza zo mu mahanga.

Abanyarwanda umunani bahawe buruse yo kujya kwiga mu Birwa bya Maurice binyuze muri ‘ALX Pathway Program’

Gahunda ya ‘ALX Pathway Program’ igenewe abasoje amashuri yisumbuye

---

Source : http://igihe.com/amakuru/u-rwanda/article/abanyarwanda-bahawe-buruse-zo-kwiga-mu-birwa-bya-maurice-binyuze-muri-alx

IGIHE yasuye insengero z'amadini n'matorero atandukanye i Kigali kuri uyu wa 20 Mata 2025, aho abakirisitu bizihiza uwo munsi mukuru bavuga ko ubatera imbaraga mu myemerere yabo.

Muri Paruwasi Gatolika ya Saint Michel misa yasomwe na Arikiyepisikopi wa Kigali, Antoine Cardinal Kambanda.

Ashingiye ku nyigisho zo muri Bililiya zasomwe kuri uyu munsi wa Pasika yasabye abakirisitu kwirinda ivangura kuko nta shingiro rifite haba mu myizerere no mu mibanire y'abantu.

Yagize 'Hari abanyamahanga bibaza icyo dupfa, bati 'ese ni abapagani cyangwa abayisillamu batoteza abakiristu? […]. Ariko usanga [abafite iryo vangura] bose ari abakirisitu cyangwa abayislamu hagati yabo. Bati 'none se mupfa iki?. Ivangura n'irondakoko ni ibintu bidafite igisobanuro.'

Umuyobozi w'Umuryango Women Foundation Ministries, Apôtre Alice Mignonne Kabera, yibukije abakirisitu ko Pasika atari umunsi wo kugaragara neza ngo baze mu materaniro gusa ko ahubwo umuzuko wa Yesu ugomba guhindura byinshi mu buzima bwabo bw'imyizerere.

Musenyeri Rusengo Amooti watanze ikibwirizwa muri Angilikani Paruwasi ya Remera yavuze ko umunsi wa Pasika ufite igisobnauro gikomeye mu gusubiza imbaraga abagize itorero.

Yagize ati 'Umunsi wa Pasika ni umunsi w'impinduramatwara mu buzima bw'abakirisitu kuko ni uw'abanyantege nke bongeye bagira intege bahabwa agaciro. Ni umunsi w'abantu batari bazwi bamenyekanye. Murumva ko rero ari umunsi ukomeye mu buzima bw'abantu b'Imana.'

Abakirisitu bo mu matorero n'amadini atandukanye bari baje mu materaniro y'umunsi mukuru wa Pasika babwiye IGIHE ko bawufata nk'umunsi ubongerera imbagara mu myemerere yabo.

Habimana Jean Baptiste usengera mu Itorero rya ADEPR Paruwasi ya Muhima yavuze ko kwizihiza Pasika ku mukirisitu bimwongerera imbaraga mu myemerere kuko ibafasha kuzirikana icyo urupfu rwa Yesu rusobanuye kuri bo.

Ati 'Pasika idutera izindi mbaraga zo gukomeza urugendo kuko itwibutsa igikorwa Kirisitu yakoreye ku musaraba. Ibyo bituma dukomeza urugendo rw'agakiza rujya mu ijuru. Abantu tuba tunezerwe iyo twizihiza Pasika ariko tunibuka aho twavuye mbere yo gucungurwa tugasaba Imana imbaraga kugira ngo tudazasubirayo.'

Natukunda Henriette uteranira muri Angilikani Paruwasi ya Remera we yavuze ko Pasika isobanuye intsinzi ikomeye cyane mu buzima bwe bwa gikiristu.

Yagize ati 'Pasika inyibutsa ko Umwani wange ari nge yitangiye akajya ku musaraba ariko uyu munsi akaba yazutse.Kuzuka kwa Kirisito bisobanuye intsinzi ikomeye ku buzima bwange bikanyibutsa ko igihe cyose ntagomba guheranwa b'ibinsikamiye kuko Umwami wange yazutse kandi yabinesheje.'

Pasika kandi avuga ko imwibutsa ko atagomba gutinya urupfu nk'umukirisitu kuko na Yesu ataheranwe n'urupfu ahubwo yazutse.

Abakirisitu bari bishimiye cyane kwizihiza Pasika

Abana bo mu Itorero Zion Temple bari mu bizihije Pasika ari benshi

Korali zari zabucyereye mu gususurutsa abakirisitu kuri Pasika

Mu Itorero Zion Temple ku Kicukiro abakirisitu bari benshi kandi bizihiwe

Angilikani Paruwasi ya Remera abakiristu bari baje ari benshi kwizihiza Pasika

Muri Angilikani Paruwasi ya Remera ikibwirizwa cyatanzwe na Musenyeri Rusengo Amooti

Mu rusengero rwa ADEPR Paruwasi ya Muhima bari banyotewe no kwizihiriza Pasika mu rusengero

Muri Paruwasi Gatolika ya Saint Michel mu Kiyovu abakirisitu bari babukereye

Arikiyepisikopi wa Kigali, Antoine Cardinal Kambanda yasabye abakirisitu kwirinda ivangura kuko nta shingiro rifite haba mu myizerere no mu mibanire yabo

Ababyeyi bagiye bazana n’abana gusenga kuri Pasika

Apôtre Alice Mignonne Kabera yibukije abakirisitu ko Pasika atari umunsi wo kugaragara neza ngo baze mu materaniro gusa

Urusengero rwa Women Foundation Ministries ku Kimuhurura rwari rwakubise rwuzuye

Natukunda Henriette uteranira muri Angilikani Paruwasi ya Remera we yavuze ko Pasika isobanuye intsinzi ikomeye cyane mu buzima bwe bwa gikiristu

---

Source : http://igihe.com/amakuru/u-rwanda/article/akanyamuneza-kari-kose-uko-abanya-kigali-bizihije-pasika-amafoto

Ikipe ya Rayon Sports yisubije umwanya wa mbere w'agateganyo muri shampiyona y'u Rwanda, ni nyuma yo gutsinda ikipe ya Muhazi United naho APR FC inganya na Etincelles FC.

Ubwo shampiyona y'u Rwanda yakinwaga ku munsi wa 24, habayeho impinduka ku myanya amakipe atandukanye yariho bitewe n'umusaruro w'Amakipe amwe n'amwe.

Kuri uyu wa Gatandatu ikipe ya Muhazi United yahatsindiwe na Rayon Sports ibitego 2-0 byatsinzwe na Adama Bagayogo na Biramahire Abeddy.

Ibi bitego byafashije kugera ku mwanya wa mbere w'agateganyo aho yagejeje amanota 50, ikaba ikurikirwa na APR igejeje amanota 49 nyuma yaho inganyije kuri iki cyumweru.

Mu mukino wabereye i Nyamirambo kuri Pele Stadium, APR FC yatsindiwe na Djibril Outarra ku munota wa 9 na 45 w'umukino.

Kuri Etincelles FC yari imaze iminsi idatsinda  ikipe y'ingabo z'igihugu yo yatsindiwe na Nsabimana Hussein na Ishimwe Djabilu.

Mu yindi mikino yabaye kuri uyu munsi, Police FC yatsinze Gasogi United 2-0, Kiyovu SC yari ku mwanya ubanziriza uwa nyuma yaraye itsinze Mukura VS igitego kimwe ku busa.

Marines FC yatsinze Gorilla 2-1, AS Kigali yatsinze Amagaju FC 2-1, Musanze FC yanganyije na Vision FC 0-0, ikipe ya Rutsiro FC yatsinze Bugesera FC ibitego 4-2.

The post Umunsi wa 24 wa RPL usize Rayon Sports iyoboye urutonde rwa Shampiyona nyuma yo kunganya kwa APR FC na Etincelles FC appeared first on RUSHYASHYA.

Source : https://rushyashya.net/umunsi-wa-24-wa-rpl-usize-rayon-sports-iyoboye-urutonde-rwa-shampiyona-nyuma-yo-kunganya-kwa-apr-fc-na-etincelles-fc/?utm_source=rss&utm_medium=rss&utm_campaign=umunsi-wa-24-wa-rpl-usize-rayon-sports-iyoboye-urutonde-rwa-shampiyona-nyuma-yo-kunganya-kwa-apr-fc-na-etincelles-fc

Rutahizamu w'Umufaransa ukinira Chelsea, Christopher Nkunku, ntiyagaragaye ku rutonde rw'abakinnyi bakinnye umukino wo kuri uyu munsi ubwo Chelsea yatsindaga Wolves, bikaba byatangaje abakunzi ba ruhago by'umwihariko abafana ba Chelsea.

Nyuma y'umukino, umutoza wa Chelsea Enzo Maresca yatangaje ko impamvu yo gusiga Nkunku hanze atari ikibazo cy'imvune cyangwa indi mpamvu ifatika, ahubwo ari 'impamvu z'umwuga.' Ati: 'Nta mukino afite, ni icyemezo cyafashwe n'umutoza.'

Ibi byateje urujijo mu bakunzi ba Chelsea bibaza niba hari ikindi kibyihishe inyuma, cyane ko Nkunku ari umwe mu bakinnyi bari biteguwe gufasha ikipe mu gice cya nyuma cy'iyi shampiyona.

Nkunku, umaze igihe agaruka mu kibuga nyuma y'imvune zimaze kumunaniza kuva yagera muri Chelsea, yagiye yitwara neza mu mikino mike yakinnye. Gusa biragaragara ko umutoza ataramwongera icyizere gihagije kugira ngo amuhe umwanya mu mikino ikomeye.

Abasesenguzi ba ruhago bavuga ko bishoboka ko Maresca ashaka kurinda uyu mukinnyi kugira ngo atongera gukomereka, cyane ko ari umwe mu bakinnyi bafite ubushobozi bwo guhindura umukino iyo ameze neza. Gusa hari n'abibaza niba hari ikibazo kiri mu myitwarire ye cyangwa mu myitozo, bikaba byaba byatumye asigara hanze.

Nkunku ni umwe mu bakinnyi bakurikirwa n'abantu benshi cyane, by'umwihariko mu gihe cy'igurwa n'igurishwa ry'abakinnyi.

Ibyemezo nk'ibi byongera igitutu ku mutoza ndetse bikanatera urujijo abafana bashaka gusobanukirwa icyihishe inyuma y'icyemezo nk'iki.

Chelsea iri mu rugamba rwo gushaka itike yo gukina amarushanwa Nyafurika y'umwaka utaha, kandi buri mukino basigaje uba ari ingenzi cyane.

Kuba umutoza yahisemo kudakoresha umukinnyi nka Nkunku mu mukino nk'uwo, bishobora kugira ingaruka ku buryo abafana bamwibonamo ndetse n'ukwizera bari bakimufitiye kugashira.

Uko byagenda kose, abakunzi ba Chelsea baracyategereje kureba niba Nkunku azongera kubona umwanya mu mikino iri imbere, cyangwa niba koko 'impamvu z'umwuga' zaba ziri hejuru y'ibyo abantu bibwira.

Source : https://kasukumedia.com/nkunku-ntiyigeze-akinishwa-maresca-yasobanura-icyemezo-cyatangaje-benshi/

Ubuyobozi bw'Umurenge wa Kayenzi, Abaturage n'abandi baturutse hirya no hino baje kubafata mu mugongo, bibutse ku nshuro ya 31 Jenoside yakorewe Abatutsi. Bashimiye Ingabo zahoze ari iza RPF-Inkotanyi(RPA) ku kubohora Igihugi no guhagarika Jenoside yakorerwaga Abatutsi, u Rwanda rukazuka ubu Abanyarwanda bakaba bari mu cyerekezo kigana aheza babikesheje Imiyoborere myiza irangajwe imbere na Perezida wa Repubulika, Paul Kagame.

Gitifu Mwizerwa Rafiki wakiriye Abaje kwifatanya n'Abanyakayenzi Kwibuka ku nshuro ya 31 Jenoside yakorewe Abatutsi, yibukije buri wese, abakuru n'abato ko Kwibuka ari umwanya kwiza wo kuzirikana ko nk'Abanyarwanda bakwiye gufatana urunana, bagashyira hamwe, bagakomezanya bagamije kwigira ku mateka, akababera isomo ryo guharanira ko Jenoside itazongera ukundi.

Yabwiye Abanyakayenzi n'Abaje kwifatanya nabo ko nubwo mu gihe cya Jenoside Abatutsi biciwe ahantu hatandukanye, ariko ko mu Murenge wa Kayenzi by'umwihariko mu Kagari ka Kirwa ahitwa ku Gitwa, kuri Nyabarongo ndetse no ku cyobo kiri inyuma hafi n'isoko rya Kayenzi, ko aha ari hamwe mu ho Interahamwe ndetse n'abandi bicanyi biciye Abatutsi benshi.

Ashima Abanyakayenzi ko muri iki gihe cy'Iminsi 100 yo Kwibuka Jenoside yakorewe Abatutsi kuva Icyunamo gitangira, bakomeje kwitwara neza ndetse bitabira gahunda uko ziba ziteguye, ari nako bagira uruhare mu gikorwa cy'Ubudaheranwa aho basuye ndetse bakaremera Abarokotse Jenoside yakorewe Abatutsi batishoboye. Yasabye kandi Abanyakayenzi gukomeza Ubumwe bafitanye kuko ari nayo ntego y'Igihugu.

Yagize kandi ati' Ibibi n'Ingaruka bya Jenoside yakorewe Abatutsi birakomeye kuko nacyo ni icyaha ndengakamere kuko kuri iyi nshuro ya 31 twibuka, umuntu ubyumva mu mibare yakumva ari imyaka myinshi ariko n'umwana wavutse nyuma ya Jenoside ni mukuru bihagije ariko ku mateka ya Jenoside ni nk'ejobundi. Ni umwanya rero wo kugira ngo dufatane Urunana dukomezanye kugira ngo Amateka yacu atubere inyigisho yo kugira ngo tuvuge ngo 'JENOSIDE' ntizongera ukundi'.

Uwiringira Marie Josee, Umuyobozi w'Akarere ka Kamonyi wungirije ushinzwe imibereho myiza y'abaturage wifatanije n'Abanyakayenzi Kwibuka, yabibukije ko bakwiye kuzirikana ko hari aho Abanyarwanda bavuye ndetse n'aho bageze babikesha Imiyoborere myiza.

Yasabye buri wese kuzirikana ko igihe hibukwa Jenoside yakorewe Abatutsi ari n'umwanya wo kuzirikana no gushimira Ingabo zahoze ari iza RPF-Inkotanyi(RPA).

Yagize ati' Hari aho Igihugu cyacu kigeze, ariko tugomba kwishima dushimira n'Ingabo zahoze ari iza RPA kuko ubwo zari zirangajwe imbere n'Umugaba w'Ikirenga ariwe Nyakubahwa Perezida wa Repubulika, Paul Kagame Igihugu cyacu cyafashe umurongo wo kubaka ubumwe ndetse n'Ubunyarwanda'.

Yakomeje agira ati' Kwibuka ni igikorwa cyo gusubiza abishwe muri Jenoside yakorewe Abatutsi agaciro bambuwe, guhumuriza Abarokotse Jenoside kandi bikaduha n'imbaraga zo kongera kubaka Igihugu twifuza duhangana n'Ingaruka Jenoside yagize kuri buri Munyarwanda'.

Yabwiye Abanyakayenzi ndetse n'Abanyakamonyi muri rusange ko nk'Ubuyobozi ndetse n'Abaturage biyemeje ko mu gihe cy'iminsi 100 yo Kwibuka Jenoside yakorewe Abatutsi, bafatanya muri gahunda y'Ubudaheranwa igamije kuba hafi Abarokotse Jenoside yakorewe Abatutsi by'umwihariko abatishoboye, babaha ubufasha bw'ibifatika ariko kandi banababa hafi mu kubaganiriza no kubahumuriza kugira ngo badakomeza kuba mu bwigunge.

Yibukije ndetse asaba buri wese guca ukubiri n'amagambo, Ibikorwa biganisha ku guhembera Ingengabitekerezo ya Jenoside, byaba abahohotera Abarokotse Jenoside, Abapfobya n'abagoreka amateka ya Jenoside yakorewe Abatutsi. Yabibukije ko iyo myifatire haba mu mvugo cyangwa mu bikorwa ari ibigize ibyaha bihanwa n'Amategeko.
Visi Meya Uwiringira, yibukije ko Jenoside yakorewe Abatutsi mu 1994 yabanjirijwe n'Ingengabitekerezo ndetse n'ibikorwa byahemberewe imyaka isaga 30. Yasabye buri wese kugira uruhare mu kurwanya Ingengabitekerezo ya Jenoside no kugira uruhare mu kubaka Igihugu.

Yagize kandi ati' Turashishikariza buri wese kwita ku biduhuza tugaharanira gutera imbere kugira ngo buri wese aho ari yumve afite icyizere kandi yumve afitiye icyizere Igihugu kuko buriya iyo umuntu yateye imbere, ntabwo agira Amacakubiri '. Yakomeje yibutsa ko mu kubaka Ubumwe n'Ubudaheranwa buri wese akwiye guharanira kwigira, kurinda ibyagezweho no kubibungabunga.

Benedata Zacharie, Perezida wa Ibuka mu Karere ka Kamonyi, yabwiye Abanyakayenzi ko nka IBUKA baje kubafata mu mugongo, kubakomeza no kubabwira ngo bakomere, ko kandi abagiye batazazima kuko hari abasigaye ngo babaheshe agaciro.

Yagize kandi ati' Tugomba kubaho kandi tukabaho neza, tugahobera Ubuzima ndetse no kumurika urumuri bari barabuze muri ino minsi 100 cyane cyane mu 1994 ubwo babaga mu mwijima, ibihuru ndetse babundabunda hirya no hino'. Yibukije buri wese warokotse Jenoside ko kubaho neza kwe ariko guhesha agaciro uwagiye.

Benedata Zacharie, yashimiye INKOTANYI zarokoye u Rwanda n'Abatutsi bahigwaga kuko baharaniye Ubumuntu bitewe n'uko hari ibyari bibabaje bitagakozwe n'ikiremwa muntu. Yagize ati' Twe Abarokotse turemera tudashidikanya ko u Rwanda rwazuwe n'INKOTANYI'.

Munyaneza Théogène

Source : https://www.intyoza.com/2025/04/20/kamonyi-kwibuka31-abanyakayenzi-bibutse-jenoside-yakorewe-abatutsi-bashimira-inkotanyi/