Author: webrwanda

Ikipe ya Liverpool FC yo mu Bwongereza iri mu biganiro bikomeye byo kugura myugariro ukina ku ruhande rw'iburyo, Jeremie Frimpong, ukinira Bayer Leverkusen yo mu Budage. Amakuru aturuka mu binyamakuru bitandukanye byemeza ko Liverpool yamenye neza ibisabwa kugira ngo uyu mukinnyi ibe yamwegukana , bikubiyemo ko amafaranga  ashobora gutangwaho mu byiciro.

Jeremie Frimpong, ukomoka mu Buholandi, yarangije umwaka w'imikino wa 2023/24 ari mu bakinnyi b'ingenzi bafashije Bayer Leverkusen kwegukana igikombe cya Bundesliga batatsinzwe umukino n'umwe, banegukana igikombe cya DFB-Pokal. Uyu mukinnyi w'imyaka 24, azwiho umuvuduko ukomeye, ubuhanga mu gutanga imipira, no gutanga umusaruro imbere y'izamu nubwo ari myugariro.

Liverpool yiteguye gutanga hagati ya miliyoni 35 na 40 z'ama-euro kugira ngo ibashe kumwegukana, bikaba byaravuzwe ko ikipe imushaka igomba kwishyura iyo release clause mu byiciro, ibintu Liverpool yamaze kumenya neza. Nk'uko ikinyamakuru Anfield Index cyabitangaje, umutoza mushya wa Liverpool Arne Slot, nawe w'Umuholandi, ari mu biganiro bya hafi n'uyu mukinnyi kugira ngo amwumvishe akerekeza muri Premier League.

Biteganyijwe ko Jeremie Frimpong yaba asimbuye Trent Alexander-Arnold uri kuganirizwa n'ikipe ya Real Madrid. Ibi bisobanuye ko Liverpool iri gushaka umukinnyi ushobora kuziba icyuho cya Trent, ndetse akaba yahuzwa neza n'abakinnyi b'Abaholandi bari muri Liverpool barimo Virgil van Dijk, Ryan Gravenberch na Cody Gakpo.

 

Hari andi makipe arimo Arsenal na Manchester United nayo yamaze kugaragaza inyota yo kubona Frimpong, ariko Liverpool ifite amahirwe menshi kubera ko yatangiye ibiganiro mbere ndetse ifite ubushobozi bwo kuzuza ibisabwa byose birimo no guha Celtic FC, ikipe Frimpong yakinnyemo mbere ya Leverkusen, amafaranga angana na 30% y'inyungu izava kuri iyi transfer.

Nubwo Liverpool ifite umukinnyi ukiri muto Conor Bradley ushobora gukina kuri uwo mwanya, kugura Frimpong byatanga imbaraga n'ubundi buryo butandukanye ikipe yashingiraho mu mikino iteganyijwe y'umwaka utaha, cyane cyane mu gihe Alexander-Arnold yaba agiye kwifashishwa mu kibuga hagati nk'uko Slot abiteganya.

Igihe isoko ry'igura n'igurisha ry'abakinnyi ryo mu mpeshyi rizaba rifunguye, Liverpool izaba iri ku isonga mu makipe ashobora gusinyisha Jeremie Frimpong mu gihe byaba byagenze uko babyifuza.

Source : https://yegob.rw/liverpool-amaso-iyahanze-muri-bayern-leverkusen-gushaka-umusimbura-wa-trent-alexander-arnold/

Byabereye Mudugudu wa Rubona, Akagari ka Nyarusange, Umurenge wa Kirimbi, Akarere ka Nyamasheke ku wa 9 Gicurasi 2025.

Umugabo yasabye umugore ko bajya gusarura ikawa umugore yanga ko bajyana avuga ko atagiye gukomeza kuvunikira bakeba be kuko yakekaga ko umugabo ahonga inshoreke amafaranga.

Umugabo abonye yanze, ahamagara undi mugore wo mu Kagari ka Jarama, Umurenge wa Gihombo uhana imbi na Kirimbi, aza kumufasha kuzisarura agomba kumuhemba, ariko mu nshoreke umugore akeka n'uwahawe akazi akabamo.

Saa tatu za mu gitondo umugore wa nyakwigendera yari ahishije ibiryo abishyira umugabo ariko ari mu buryo bwo kuneka ngo arebe niba koko bari gusarura kawa nk'umukozi n'umukoresha yahaye akazi cyangwa bitwaza kawa bakabona umwanya wo gusambana.

Yagezeyo asanga bari gusambana ashaka gukata uwo mugore aramucika akata umugabo we, amuca imitsi yo ku kizigira cy'akaboko, aguma iruhande agaragurika ataka yanga kumutabara no kumutabariza, bituma atakaza amaraso menshi.

Umugabo yaje kuzanzamuka, agera ahari abaturage bagerageza guhagarika amaraso banamushyira kuri moto bamujyana ku Kigo Nderabuzima cya Karengera ahageze ahita ashiramo umwuka.

Umugore we wakurikiraniraga hafi ibiba ku mugabo we yabonye moto imujyanye kwa muganga, na we ashaka uburyo agerayo, umugabo ashiramo umwuka na we ahageze avuga ko ari we umwishe n'impamvu amwishe muri icyo gitondo, ni bwo yahitaga atabwa muri yombi.

Umunyamabanga Nshingwabikorwa w'Umurenge wa Kirimbi, Habimana Innocent yabwiye IGIHE ko uyu mugore yahageze abaturage bagashaka kumugirira nabi kuko bari bamaze kumenya ibyo yakoze, ubuyobozi bumucungira umutekano kugeza RIB na Polisi bahageze bamuta muri yombi.

Umurambo wahise woherezwa ku Bitaro bya Kibogora gukorerwa isuzuma kugira ngo hakorwe raporo izifashishwa mu bugenzacyaha, naho umugore ajya gufungirwa kuri RIB sitasiyo ya Kanjongo.

Ati 'Ntawungukira mu kwica uwo bashyingiranywe kuko nk'aba bari babyaranye abana 9 banuzukuruje. Umugabo arishwe, umugore agiye gufungwa, abana bateragirane nubwo dutekereza ko abato bazagenda basanga bakuru babo bashatse, ariko ntibyari bikwiye.''

Gitifu Habimana yihanganishije umuryango avuga ko ari inkuru ibabaje ku muryango no mu murenge asaba abaturage kwirinda amakimbirane kuko byagaragaye ko wari umuryango usanzwe ufitanye amakimbirane ashingiye ku mitungo no gucana inyuma.

Umugore yishe umugano we yari afatiye mu ikawa asambana

---

Source : http://igihe.com/amakuru/u-rwanda/article/nyamasheke-umugore-yishe-umugabo-we-yafatiye-mu-cyuho-asambana

Ibi yabigarutse kuri uyu wa 09 Gicurasi 2025, mu gikorwa cyo kwibuka abarezi, abakozi n'abanyeshuri bigaga muri Kaminuza y'u Rwanda Ishami ry'i Gikondo bazize Jenoside yakorewe Abatutsi mu 1994.

Mu kiganiro kigaruka ku mateka y'u Rwanda yatanze, Dr. Gakwenzire yasobanuye ko uko Jenoside yateguwe kugeza ishyizwe mu bikorwa, agaragaza ko kwibuka ari umwanya wo guhozanya, gufatana mu mugongo no kwiyomora ibikomere basigiwe.

Yagize ati 'Ntidushobora guhindura amateka ariko umurongo w'ejo hazaza wo dushobora kuwufatira icyemezo ubu. Aha ni ho wa mutwaro w'amateka mabi twanyuzemo twagenda tuworoshya, tugakomeza urugendo rwo kubaka igihugu kizira Jenoside, irondabwoko, amacakubiri ukundi.'

Yakomeje ati 'Amateka akwiriye kutubera urufunguzo rudufungurira n'umuryango ukurikiraho. Ibi biganiro tugira ku mateka yacu n'ibindi bidukomeza ni icyomoro ku bikomere byacu.'

Nyinawumuntu Clarisse yari hafi kugira imyaka umunani mu gihe cya Jenoside yakorewe Abatutsi, nyuma aza kurokoka asigara wenyine mu muryango.

Yaje kwiga asoreza muri Kaminuza y'u Rwanda, abifashijwemo na FARG, ari na ho urugendo rwo kwiyubaka rwatangiriye.

Mu buhamya yatanze yakomeje ati 'Muri kaminuza nahaboneye abavandimwe, bambereye umuryango mu rugendo rwanjye aho abanjye batari bari. Ubu nishimira ko nize neza, igihugu cyacu kimenyera byose ntacyo nigeze mbura. Nanjye ndi gutanga umusanzu mu iterambere nyuma y'amateka mabi twavuyemo.'

Tengera Kayitare Françoise uri mu bayobozi ba UR yavuze ko iyo kaminuza yatakaje abantu benshi bishwe muri Jenoside yakorewe Abatutsi mu 1994, ariko kandi ari na ko abayobozi n'abanyeshuri na bo bagize uruhare rukomeye mu bwicanyi.

Yavuze ko ibyabaye bikwiriye kubera isomo urubyiruko mu kurwanya ingengabitekerezo ya Jenoside, ingingo yahurijeho na Senateri Ngarambe Télésphore.

Uyu musenateri yabwiye urubyiruko rw'abanyeshuri biga muri UR gukaza ingamba zo kurwanya ingengabitekerezo ya Jenoside ikigaragara mu miryango, aho bagenda hose no ku mbuga nkoranyambaga kuko ari bo u Rwanda rw'ejo hazaza rwishingikirijeho.

Yasabye abarezi gushyira imbaraga mu gukora ubushakashatsi butomoye mu kurushaho kubafasha kwiga no kumenya neza amateka.

Dr. Gakwenzire Philbert yavuze ko kwibuka byomora ibikomere abarokotse Jenoside yakorewe Abatutsi mu 1994

Mu bitabiriye igikorwa cyo wibuka abarezi, abakozi n’abanyeshyuri bigaga muri Kaminuza y’u Rwanda, ishami rya Gikondo barimo Dr. Charles Murigande

Abagize inzego z’umutekano bifatanyije n’abo muri Kaminuza y’u Rwanda kwibuka Jenoside yakorewe Abatutsi

Nyinawumuntu Clarisse, wari hafi kugira imyaka umunani mu gihe cya Jenoside yakorewe Abatutsi mu 1994, mu muryango we ni we wenyine warokotse

Abanyeshuri ba Kaminuza y’u Rwanda, ishami rya Gikondo basomaga amazina y’Abatutsi bishwe muri Jenoside mu 1994, barimo abahigaga n’abahakoraga

Senateri Ngarambe Télésphore yabwiye urubyiruko rw'abanyeshuri biga muri kaminuza gukaza ingamba zo kurwanya ingengabitekerezo ya Jenoside ikigaragara ahantu hatandukanye

Urubyiruko rwiga muri kaminuza rwibukijwe ko rugomba kugira uruhare rukomeye mu kurwanya ingengabitekerezo ya Jenoside

---

Source : http://igihe.com/amakuru/u-rwanda/article/kwibuka-ni-icyomoro-cy-ibikomere-twagize-dr-gakwenzire

Guhuza ubutaka ni kimwe mu byo Leta ishishikariza abahinzi gukora kubera ko bifasha abahinzi kwiteza imbere, abishyize hamwe bashakirwa amasoko bakagezwaho inyongeramusaruro n'imbuto mu buryo bworoshye.

Bamwe mu bahinzi bo mu Murenge wa Nyabirasi mu Karere ka Rutsiro bahamya ko ibyo babigezeho binyuze mu mushinga SAIP wabahaye amahugurwa y'uburyo bashobora guhinga bahuje ubutaka, bakibumbira no mu matsinda kugira ngo bazabashe kubona umusaruro mwinshi.

SAIP ni umushinga ugamije kongera umusaruro w'ubuhinzi, kuwushakira amasoko no kwihaza mu biribwa.

Ugenzurwa n'ishami rishinzwe gukurikirana imishinga mu Ikigo cy'Igihugu gishinzwe guteza imbere ubuhinzi n'ubworozi (RAB).

Sifa Jeanette utuye mu Kagari ka Mubuga, Umurenge wa Nyabirasi, ahamya ko mbere y'uko SAIP iza bahingaga mu kajagari kandi ko bitari ubuhinzi bugezweho kubera ko bavangaga ibihingwa bitandukanye.

Ati 'Icyo gihe twahingaga kuri hegitari tugafata ibirayi tukabivanga n'ibigori noneho ugasanga byose ari umusaruro w'ibirayi n'ibigori urabuze. Nyuma y'aho SAIP iziye ahavaga toni ziri hagati y'esheshatu na zirindwi hasigaye havanwa toni ziri hagati ya 15 na 17.'

Ntirenganya Jean Maurice, ubarizwa muri Koperative KOABUNYA Twiteze Imbere, yavuze ko SAIP yabafashije kongera umusaruro binyuze mu mbuto yabahaye ndetse n'amahugurwa atandukanye yo guhinga kijyambere.

Umukozi ushinzwe ubuhinzi n'iterambere ry'abahinzi murri RAB-SPIU mu Karere ka Rutsiro, Bizimana Jean Claude, yasobanuye uburyo SAIP yafashije abahinzi bo mu Murenge wa Nyabirasi guhuza ubutaka kugira ngo umusaruro w'ibyo bahinga wiyongere.

Ati 'SAIP dukorana n'abahinzi binyuze mu matsinda ya Twigire Muhinzi agizwe hagati y'abantu 15 na 20, abo bahinzi akenshi baba batuye ahantu hamwe bagahuza ubutaka ku buryo bahinga igihingwa kimwe.'

Babereka ubuhinzi bugezweho, uko hacibwa imyobo, intera iri hagati y'umwobo n'undi gusura umurima nibura buri cyumweru n'uburyo bwo gusarura bugezweho.

Mu cyanya cya Nyabirasi, SAIP ikorera ku buso bwa hegitari 700 aho hahinzweho ibishyimbo biri kuri hegitari 453, ibigori biri kuri hegitari 210, ibirayi biri kuri hegitari 35 ndetse n'imboga ziri kuri hegitari ebyiri.

Umusaruro w’ibirayi wariyongereye i Rutsiro uva kuri toni zirindwi kuri hegitari ugera kuri toni 15 kuri hegitari

Sifa Jeanette ahamya ko umusaruro w’ibirayi wikubye kubera guhinga bahuje ubutaka

I Rutsiro umusaruro w’ibishyimbo wavuye ku bilo 700 ugera kuri toni ebyiri kuri hegitari kubera guhuza ubutaka

---

Source : http://igihe.com/amakuru/u-rwanda/article/ahavaga-toni-eshanu-harava-15-ishimwe-ry-ab-i-rutsiro-ku-iterambere-ry-ubuhinzi

Mu gace ka Kabembe, Cheferi ya Kaziba, Teritware ya Walungu, Intara ya Kivu y'Amajyepfo muri Repubulika Iharanira Demokarasi ya Congo, abaturage baratabaza basaba ko ihuriro ry'ingabo za Leta ryirukanwa muri aka gace kuko rikorera abaturage ihohoterwa rishingiye ku gitsina.

Ubutumwa aba baturage bageneye ubwanditsi bwa Kasuku Media mu ijoro ryo ku wa Gatanu rishyira ku wa Gatandatu, tariki ya 10 Gicurasi 2025, bugaragaza ko hari ibice bya grupema ya Kabembe bikiri mu maboko y'ingabo za Leta, cyane cyane mu misozi ya Bumbu na Rhanga.

Aba baturage bavuga ko ingabo za FARDC, FDLR, iza Leta y'u Burundi ndetse n'imitwe ya Wazalendo zikomeje kubanyanyasa, zibambura ibyabo, zikanafata abagore n'abakobwa ku ngufu.

Bagira bati: 'Abaturage bakomeje kugirirwa nabi i Rhanga na Bumbu. Baradusambura, badutwara ibyo dufite byose, banafata ku ngufu abagore n'abakobwa.'

Basoza basaba ko umutwe wa M23 wabatabara, ukanirukana burundu ingabo zose za Leta ziri muri ako gace. 'Turasaba ko M23 iza ikadukiza izi ngabo zitugirira nabi. Aho M23 yageze hagiye hagaruka amahoro, natwe tuyikeneye.'

Mu butumwa bwatanzwe mu Giswahili, baragize bati: 'Wa pumbafu wanatesa watu huko mu vilima, ya faa kuwafukuza kabisa wote waliotoka Uvira. Na wasirudi tena huku.'

Aba baturage, banze ko amazina yabo atangazwa ku mpamvu z'umutekano, banavuze ko hari benshi bari guhunga ibice bikigenzurwa na Leta bakerekeza mu byafashwe na M23.

Bagize bati: 'Abaturage benshi barahunga bihishe berekeza mu bice byamaze kubohozwa.'

Cheferi ya Kaziba ifite igice kinini kigenzurwa na M23, ariko haracyari ibice byo mu misozi birimo ingabo za FARDC, FDLR, iz'u Burundi na Wazalendo. Aka gace gatuwe n'amoko arimo Abashi, Abasharishari n'Ababangubangu bake.

Source : https://kasukumedia.com/fdnb-ivuga-ko-yatsinze-ibitero-byinshi-byinyashyamba-nubwo-nayo-yagabweho-ibitero-bikomeye/

Uwahoze ari umwe mu bakinnyi b'uruhererekane rwa televiziyo rwakunzwe cyane 'The Real Housewives of New Jersey' (RHONJ), Siggy Flicker, yatangaje ko karma (ingaruka z'ibikorwa bibi) iri hafi kugwa kuri Kanye West kubera imvugo ye idashira isesereza Abayahudi ndetse n'indirimbo ye nshya yise 'Heil Hitler', benshi bafata nk'isesereza ry'urugomo rwakozwe n'Abanazi.

 

Ibi Siggy yabivuze nyuma y'uko Perezida Donald Trump amutoranyije ngo ajye mu nama y'igihugu y'Urwibutso rw'Abazize Jenoside yakorewe Abayahudi (Holocaust Memorial Council). Mu kiganiro yagiranye n'TMZ binyuze kuri Zoom, Siggy yavuze ko nubwo yemera uburenganzira bwa Kanye bwo kuvuga ibyo atekereza, imvugo ye yuzuyemo ibitekerezo by'Abanazi izamugaruka.

Siggy yongeyeho ko Kanye atabasha kugera ku 'mpano nyakuri y'ubuzima,' kuko atari we urera abana be bane yabyaranye na Kim Kardashian. Ahubwo, avuga ko Kanye ari mu byaha byo kugaragaza umugore we mushya, Bianca Censori, wambaye ubusa cyangwa hafi yo kubura uburanga imbere y'abantu mu ruhame ku isi hose.

Uretse ibyo birego bireba Kanye, Siggy yavuze ko yishimiye kuba yarahawe inshingano zo kuba umunyamuryango mushya w'Inama y'igihugu y'Urwibutso rwa Jenoside yakorewe Abayahudi, aho yabaye igikorwa gikomeye kuri we nk'umukobwa w'umwe mu barokotse Jenoside yakorewe Abayahudi. Yavuze ko yiteguye kwigisha Abanyamerika amateka ya Jenoside, nubwo hari ibihuha bigenda bivuga ko Abayahudi miliyoni 6 n'abandi batabarika batishwe nk'uko amateka abivuga.

Uyu mwamamare wa televiziyo akaba n'umwanditsi yavuze ko ibyo biguhu bitamushobora kuko se yamutoje kwirwanaho no kurwanya urwango rushingiye ku idini kuva akiri muto.

Abafana be baracyibuka igihe yahagarariraga Abayahudi byimazeyo muri 2017, ubwo bari muri RHONJ, aho yatonganye bikomeye na mugenzi we Margaret Josephs wari wazanye izina rya Adolf Hitler ashaka kugaragaza ikintu mu mpaka zari zifitanye ubukana. Icyo gihe Siggy yagaragaye nk'umuntu w'inyangamugayo uharanira kwigisha ibijyanye na Jenoside yakorewe Abayahudi.

Nubwo yagaragaje impamvu zikomeye, yaje kugirana ibibazo n'abandi bakinnyi ndetse n'abatunganyaga gahunda kubera ukutita ku bijyanye n'ayo mateka, bituma afata icyemezo cyo kuva muri iyo gahunda ya televiziyo.

Siggy yavuze ko kwinjira muri RHONJ byari kimwe mu bintu byamubereye byiza ariko kandi binamugiraho ingaruka mbi. Ariko nta na rimwe yigeze yicuza icyemezo yafashe cyo kwirwanaho no kugaragaza aho ahagaze.

Icyo cyemezo nticyamugizeho ingaruka mbi, kuko ubu ni umwe mu bantu bahawe inshingano zikomeye mu bijyanye no kwibuka Jenoside yakorewe Abayahudi, akaba yiteguye gutangira akazi nta gutinya abamuca intege cyangwa abagerageza kumuhagarika.

 

Source : https://kasukumedia.com/siggy-flicker-yihanangirije-kanye-west-karma-igiye-kumugwaho-kubera-imvugo-ye-isesereza-abayahudi/

Ni igikorwa cyabaye ku wa 9 Gicurasi 2025 ubwo abakozi ba AOS bibukaga ku nshuro ya 31 Jenoside yakorewe Abatutsi mu 1994. Iki gikorwa cyabereye ku rwibutso rwa Mwulire ruherereye mu Karere ka Rwamagana.

Munyakazi Jean Bosco uri mu bahawe inka, yavuze ko yishimiye iryo tungo yahawe, arakomze ati 'Izabyara maze abana banywe amata, iterambere riboneke mu rugo kandi n'abaturanyi nabo tubahe amata.''

Bagwaneza Emiliana we yavuze ko iyo nka igiye kumufasha kubona ifumbire, abone amata ateze imbere umuryango we. Ati 'Nayishimiye cyane kuko ije isanga inzu baheruka kunyubakira, ubu ubuzima bwanjye bugiye guhinduka bube bwiza.''

Umuyobozi Mukuru wa AOS, Kevin BC Koo, yavuze ko bagiye i Mwulire kugira ngo bifatanye n'abaho kwibukwa Jenoside yakorewe Abatutsi, no gufata mu mugongo abayirokotse.

Yavuze ko nka AOS batanze inka icumi kugira ngo zifashe imiryango yarokotse gukomeza kugira ubuzima bwiza.

Ati 'Kwibuka ni igikorwa cy'abantu twese. Ni ukuzirikana amateka yabayeho ariko na none no kwiyemeza ko ibyabaye bitazongera kubaho. Ntabwo bivuze ko ari ukwibuka ngo duhereyo. Ni uguhuza amateka y'aho turi ndetse no kureba uko ejo hazaza twahagira heza kurushaho, tugomba kwigira ku mateka kugira ngo duhuze n'ibyo sosiyete ikeneye uyu munsi.''

Muzungu Theoneste usanzwe ari na Perezida wa IBUKA mu Murenge wa Mwulire, yagaragaje uburyo Umusozi wa Mwulire wari wahungiyeho Abatutsi benshi, ariko baricwa harokoka mbarwa.

Muzungu yanashimiye Inkotanyi zabohoye Igihugu asaba abakiri bato kurangwa n'urukundo, bakirinda amacakubiri n'ibisa na yo kuko byagejeje u Rwanda ahabi.

Umuyobozi w'Akarere ka Rwamagana Wungirije ushinzwe Iterambere ry'Ubukungu, Kagabo Richard, yashimiye AOS ku nka yageneye imiryango icumi y'abarokotse Jenoside yakorewe Abatutsi avuga ko zizabafasha mu mibereho yabo.

Yashimiye kandi iyi sosiyete kuba yajyanye abakiri bato kwiga amateka ya Jenoside yakorewe Abatutsi ku musozi wa Mwulire.

Abarokotse Jenoside yakorewe Abatutsi bo mu Murenge wa Mwulire borojwe inka

Imiryango icumi ni yo yahawe inka kugira ngo zibafashe mu iterambere

Umuyobozi w’Akarere ka Rwamagana wungirije ushinzwe Iterambere ry’Ubukungu, Kagabo Richards, yashimiye AOS yatanze inka ku miryango icumi y’abarokotse Jenoside yakorewe Abatutsi

AOS yiyemeje kugira uruhare mu kubaka Urwibutso rwa Mwulire

Muzungu Theoneste usanzwe ari Perezida wa IBUKA mu Murenge wa Mwulire ni we watanze ubuhamya bw’ibyabereye ku musozi wa Mwulire

Abakozi ba AOS bashyira indabo ku mva ishyinguyemo imibiri irenga ibihumbi 27 by’Abatutsi biciwe ku musozi wa Mwulire

---

Source : http://igihe.com/amakuru/u-rwanda/article/rwamagana-aos-yoroje-inka-imiryango-icumi-y-abarokotse-jenoside-yakorewe

I Kabembe, muri Cheferi ya Kaziba, Teritwari ya Walungu mu Ntara ya Kivu y'Amajyepfo, abaturage barasaba ko ihuriro ry'ingabo za Leta ya Congo (FARDC), FDLR, iz'u Burundi n'imitwe ya Wazalendo rirukanwa muri ako gace, bazira kubanyaga no kubakorera ubundi bugizi bwa nabi.

Ibi bikubiye mu butumwa aba baturage batuye muri ako gace bagejeje ku Bwanditsi bwa Minembwe Capital News mu ijoro rishyira kuri uyu wa Gatandatu tariki ya 10 Gicurasi 2025.

Aba baturage batangaje ko hari uduce tugize grupema ya Kabembe M23 itarageramo, cyane cyane utwo mu misozi ya Bumbu na Rhanga.

Bagaragaza impungenge ko aho ingabo za Leta zituruka i Uvira ziyongera, ari nako abaturage bagirirwa nabi, banyagwa ibyabo, ndetse abagore n'abakobwa bagafatwa ku ngufu.

Ubutumwa bwabo bugira buti: 'Abaturage bakomeje guteswa hano i Rhanga na Bumbu. Barya bajinga baratunyaga uko bishakiye, batunyaga guhera ku cyo bagusanganye, ntibareka no gufata abagore n'abakobwa ku ngufu, bakabasambanya.'

Bakomeza basaba ubufasha bagira bati:
'Turasaba ko M23 iza ikabirukana, kandi ikabirukana iteka ryose ku buryo batongera kutugeraho.'

Basoza ubutumwa bwabo bageneye Minembwe Capital News bagira bati: 'Banyamakuru ba Minembwe Capital News, mudutabarize nyabuna M23 ize hano yirukane FARDC, FDLR, ingabo z'u Burundi na Wazalendo. Turabizi ko aho yafashe nko muri centre ya Kaziba n'ahandi, amahoro yarahagarutse. Natwe nize idutabare idukure mu kaga ko kuyoborwa n'aba bajinga.'

Mu rurimi rw'Igiswahili, ubutumwa bwabo bugira buti: 'Hao wa pumbafu wanatesa watu huko mu vilima, ya faa kuwafukuza limoya na limoya wote wakutaniwe huko Uvira. Na wasirudi tena uku hata limoya.'

Aba baturage, banze ko amazina yabo amenyekana ku mpamvu z'umutekano wabo, banagaragarije Minembwe Capital News ko hari abaturage benshi bari guhunga bihishe bava mu bice bikigenzurwa n'ingabo za Leta, berekeza mu bice byamaze gufatwa na M23.

Umwe muri bo yagize ati: 'Abaturage benshi bari guhungira mu bice byamaze kubohozwa. Bagenda bihishe.'

Tubibutse ko Cheferi ya Kaziba imaze gufatwa ku kigero kinini n'umutwe wa M23, nubwo hakiri uduce two mu misozi tukirimo ingabo za FARDC, FDLR, Wazalendo n'ingabo z'u Burundi. Uduce two muri Kaziba dutuwe n'Abanye-Congo bo mu bwoko bw'Abashi, Abasharishari, n'Ababangubangu bake

Source : https://kasukumedia.com/abaturage-ba-kabembe-muri-kaziba-basabye-ingabo-za-fardc-nabafatanyabikorwa-kurekera-imirwano/

Tom Cruise yagaragaje ko agifitiye icyubahiro uwahoze ari umugore we, Nicole Kidman  nubwo batandukanye hashize imyaka irenga 20 nyuma yo kumushimira cyane ubwo yavugaga ku mukino wabo w'inkuru 'Eyes Wide Shut' wo mu 1999, wavuzweho cyane.

Mu kiganiro yagiranye n'ikinyamakuru gishya cya Sight and Sound cy'umuryango British Film Institute, Cruise yavuze ko ari we wasabye umuyobozi w'uyu mukino, Stanley Kubrick, ko Nicole Kidman yaba ari we mukinnyi wamuhanganye na we muri filime, avuga ati: 'Byari ukuri ko ari umukinnyi w'umuhanga cyane.'

Icyo cyemezo cyaje kugaragara ko cyari gikwiye nubwo hari abantu batishimiye amwe mu mashusho y'iyo filime yagaragayemo ubusambanyi, Nicole na Tom bashimiwe cyane ku buryo bitwaye. Ariko, byaje kurangira batandukanye hashize imyaka mike gusa.

Aya magambo ya Tom Cruise ku wahoze ari umugore we, bari bamaze imyaka 11 babana, aje mu gihe hibazwa byinshi ku bucuti budasanzwe yaba afitanye na Ana de Armas, umukinnyi wa filime nawe uzwi cyane.

Bombi bamaze igihe baboneka bari kumwe mu bice bitandukanye aheruka kugaragara bari kugera i London n'indege y'akataraboneka mbere gato y'isabukuru ye y'amavuko.

Nta makuru yemeza ko bari mu rukundo aratangazwa ku mugaragaro … ariko ibimenyetso by'uko bamara igihe kinini bari kumwe biriyongera. Guma hafi kugira ngo wumve ibizakurikiraho.

 

 

 

Source : https://kasukumedia.com/tom-cruise-ashimira-uwahoze-ari-umugore-we-nicole-kidman-hagati-mu-ibihuha-byurukundo-na-ana-de-armas/

Ubwo Robert Francis Prevost w'imyaka 69, ukomoka i Chicago, yatangazwaga nk'uwatorewe kuba Papa mushya, amateka yari akoze. Ku nshuro ya mbere mu mateka, Umunyamerika ni we uyoboye Kiliziya Gaturika ku isi.

Ariko icyatangaje benshi si uko ari Umunyamerika, ahubwo ni izina yahisemo kwitirira Papa Leo wa XIV ari na ryo ryahaye iyi papacy umurongo n'icyerekezo. Nk'uko bamwe babivuga, iri zina si uko ari umuco gusa, ahubwo ririmo ubutumwa.

Gukora Amateka

Mu minsi yari ishize, isi yose yari ibereye maso, amaso yose areba ku bacunga umwotsi hejuru ya Vatikani. Abatari bake bari bafite amatsiko menshi, ndetse n'agahinda, mu gihe Kiliziya Gaturika yiteguraga gutangaza umuyobozi wayo mushya. Ku itariki ya 8 Gicurasi, nibwo byabaye—umwotsi w'umweru waturutse muri Chapelle ya Sistine, bisobanura ko Papa mushya yari amaze gutorwa.

Nyuma y'akanya gato, abantu bari bateraniye ku rubuga rwa Bazilika ya Mutagatifu Petero bacitse ururondogoro ubwo imiryango y'igitambaro cy'umutuku yasamurukaga, haje kugaragara Papa mushya. Ni ho hatangajwe ko Robert Prevost ari we watowe n'Inama y'abakaridinali 133, agahabwa izina rya Papa Leo wa XIV. Nubwo izina rye ryari ryaravuzwe mu banyamahirwe, Prevost ntabwo ari we wari uhabwa amahirwe menshi.

Hari abandi benshi bari bifuzwa n'abantu ariko ntibabashije kubona amajwi ahagije.

Imibanire na Trump

Abatuye isi benshi barimo gutinda ku kuba Papa Leo wa XIV akomoka muri Leta Zunze Ubumwe za Amerika, ibintu byishimirwa cyane n'Abanyamerika barenga miliyoni 50 b'Abagatolika.

Bamwe banavuga ko ashobora no kugabanya urumuri Perezida Donald Trump yari afite.

Ntibyatinze, Donald Trump ubwe yatanze igitekerezo kuri aya mateka, ayita 'ishema rikomeye' ku gihugu cye.

Yifashishije urubuga rwe rwa Truth Social, yanditse ati: 'Ndashimira Karidinali Robert Francis Prevost, wahawe izina rya Papa. Ni ishema rikomeye kubona Umunyamerika wa mbere abaye Papa. Ni ibyishimo bikomeye, kandi ni ishema ku gihugu cyacu. Ntegereje guhura na Papa Leo wa XIV. Icyo gihe kizaba icy'agaciro gakomeye!'

Mu gitondo cyo kuwa Kane, Trump yabwiye abanyamakuru ko yahawe telefoni n'abahagarariye Papa mushya.

Yagize ati: 'Bamaze kumpamagara. Twavuganye, none turareba uko bizagenda.'

Niba aba bayobozi bombi bazagera ku bumvikane biracyari urujijo. Ariko muri Vatikani, Prevost afatwa nk'umukandida w'impuzandengo—uwumvikana hagati y'Abanyamerika b'aba konservatifu n'Abanyaburayi n'Abanyaziya batekereza ku buryo bugezweho. Mu Kiliziya itandukanye cyane ku bitekerezo, ashobora kuba ari we wari utemeranywaho na benshi.

Iyo bigeze ku bitekerezo no ku bya politiki, ntawabyirengagiza Papa ni umuntu wa politiki. Biteganyijwe ko Papa Leo wa XIV azakomeza umurongo wa Papa Francis mu kurengera impunzi n'abatagira kivurira.

Mu ijambo rye rya mbere, Papa Leo wa XIV yagize ati Kiliziya ye izahagarara ku ruhande rw'abababaye. Yanagaragaje ubushake bwo kwagura ubufatanye, atambutsa ubutumwa bw'ubwiyunge no kuganira ku rwego mpuzamahanga, anashishikariza abantu bo mu yandi madini ndetse n'abatari abakirisitu kugirana ubufatanye na Kiliziya.

Izina yahisemo, Leo wa XIV, rirasa n'irigaragaza ko yifuza kubaka umubano n'ubufatanye. Nubwo guhindura izina atari itegeko, abapapa bose mu myaka irenga 470 ishize barabikoze akenshi bahitamo izina ry'undi Papa wababayeho mbere, nk'uburyo bwo kumwubaha no gutanga icyerekezo bifuza guha Kiliziya.

Papa wa nyuma witwaga Leo yari Leo wa XIII, wayoboye kuva 1878 kugeza 1903. Uwo yari Umunyitali witwaga Gioacchino Vincenzo Raffaele Luigi Pecci, uzwiho kuba yarari umuntu w'inararibonye mu bitekerezo no mu nyigisho z'ubutabera bw'imibereho.

Leo wa XIII yasohoye inyandiko izwi cyane yitwa Rerum Novarum, ivuga ku burenganzira bw'abakozi: igaragaza uburenganzira ku mushahara ujyanye n'akazi, uburyo bwo gukora butekanye, no kwishyira hamwe mu mashyirahamwe y'abakozi. Icyo gihe kandi, iyo nyandiko yashyigikiye uburenganzira ku mutungo bwite n'ubucuruzi bwigenga, ariko yanga burundu ubusosiyalisiti n'ubukungu bwishyira bukizana burenze.

Leo wa XIII yiswe 'Papa w'imibereho' cyangwa 'Papa w'abakozi' kubera uruhare yagize mu ishingwa ry'inyigisho z'imibereho muri Kiliziya Gaturika.

Nk'uko Padiri Vito Crincoli yabibwiye televiziyo ya ABC News:

'Iyo turebye amateka, abitwa Leo bari abapapa b'inkorokoro. Leo wa XIII yakundaga abantu be. Abantu yabafataga nk'abantu, atari imashini. Akazi k'umuntu ni ishusho y'icyubahiro cye. Ntabwo turabimenya neza, ariko birashoboka ko izina Leo rifite igisobanuro gikomeye kuri we.'

Avuga Icyesipanyolo n'Igitaliyani neza

Mu buryo bwa politiki, Papa Leo wa XIV ashobora kwitwara nka Papa Francis mu kwita ku bakene n'abibasiwe. Uburyo yahisemo izina na bwo birabyerekana.

Gusa kandi, biragaragara ko afite imyumvire ya gikonservatifu by'umwihariko ku bijyanye n'uburenganzira bwa LGBTQ no ku ruhare rw'abagore muri Kiliziya. Yigeze no kugaragaza ko atemera burundu ishyingiranwa ry'ab'igitsina kimwe.

Papa Leo wa XIV yabaye Umwepiskopi wa Chiclayo muri Peru kuva 2015 kugeza 2023, ndetse yayoboye Ihuriro ry'Abatagatifu Augustin (Order of Saint Augustine) kuva 2001 kugeza 2013.

Avuga neza Icyongereza, Icyesipanyolo, n'Igitaliyani, kandi yigisha muri ayo ndimi uko ari atatu. Yavukiye kandi arererwa i Chicago, afite impamyabumenyi y'icyiciro cya mbere cya kaminuza yakuye muri Villanova University muri Pennsylvania aho yize Imibare, atari iyobokamana.

 

Source : https://kasukumedia.com/impamvu-papa-wa-mbere-wumunyamerika-yahisemo-kwitwa-leo-wa-xiv/