Author: webrwanda

Ruth Akoragye, umugore wabyaranye n'umuraperi Victor Kamenyo, yatangaje ko ubu nta mukunzi afite kandi ko atakibana mu rukundo na Kamenyo.

Mu mezi ashize, ibihuha byagiye bica ibintu ku mbuga nkoranyambaga, bivuga ku mubano w'aba bombi. Abatari bake bibwiraga ko ibyo kumvikana ko batandukanye ari amayeri yo gukurura abantu kugira ngo bibafashe guteza imbere umuziki wa Kamenyo. Gusa, Ruth ubwe yamaze gukura abantu mu rujijo, asobanura ukuri ku bijyanye n'ibiri kuba.

Yagize ati:
'Ubu nta mugabo mfite, ndi ingaragu rwose. Abavuga Kamenyo, ndashaka kubamenyesha ko ari we twabyaranye gusa. Ndamwubaha, kandi na we aranyubaha.'

Yakomeje avuga ko hagati yabo nta makimbirane ahari, kandi ko nta mpamvu yo kugira ibyo byitiranya cyangwa gucukumbura ibitandukanye n'ukuri.

Ruth yanavuze ko abantu bakunda kwivanga mu buzima bwite bw'abandi, ariko we ntacyo bimubwiye kuko ibintu ari bisanzwe kandi bidakwiye guhabwa uburemere budasanzwe.

Mu buryo butunguranye kandi, Ruth yemeye ko atakigaragara mu rukundo ndetse nta n'icyo akirukeneyeho.

'Sinshaka kongera gukunda. Nararuhije. Nta gahunda yo kongera gukundana na muntu.'

Uyu mwanzuro wa Ruth uje ukurikira igihe cy'ijyanye no kuvugwa kwinshi ku rukundo rwe na Kamenyo, ndetse n'amakuru yari amaze iminsi acicikana avuga ko baba baratandukanye ku bushake bwo gushaka indonke mu itangazamakuru. Ariko we yahisemo guca inzira y'ukuri, ashimangira ko ibyo ari byo.

Source : https://kasukumedia.com/ruth-akoragye-yitandukanije-na-victor-kamenyo-avuga-ko-urukundo-rwabaye-amateka/

Mu Kwibuka ku nshuro ya 31 Jenoside yakorewe Abatutsi mu Rwanda mu 1994 by'umwihariko mu Murenge wa Ngamba, Umuyobozi w'Akarere ka Kamonyi wungirije ushinzwe iterambere ry'Ubukungu, Uzziel Niyongira yasabye Abanyengamba n'ababatabaye kurangwa n'Urukundo no guharanira kuba umwe. Yabasabye kandi guhora bazirikana Ubutwari bw'Inkotanyi zahagaritse Jenoside zikubaka u Rwanda rukaba Igihugu kitarangwamo amacakubiri n'ivangura iryo ariryo ryose.

Uzziel Niyongira, yasabye abaje kwibuka ko ubutumwa butangwa n'abarokotse Jenoside yakorewe Abatutsi mu gihe cyo Kwibuka budakwiye kuba amasigara kicaro, ko ahubwo bukwiye gusigira buri wese isomo kuko baba bavuga inzira ya Jenoside banyuze, ibyo bahuye nabyo bibi haba mbere ya Jenoside ndetse no mu gihe yabaga.

Yagize ati' Ubutumwa Abarokotse Jenoside yakorewe Abatutsi batanga haba harimo amasomo dukwiye gukuramo cyane cyane amasomo yo gukomeza kubaka Igihugu kitarangwamo amacakubiri n'ivangura iryo ariryo ryose kugira ngo tutazongera kugira ibihe birimo akagana n'akababaro gakabije'.

Yakomeje yibutsa ko nk'Abanyarwanda bakwiye kwishimira ko bafite Igihugu, bafite Abayobozi beza basaba buri wese kubana mu mahoro na mugenzi we, basaba buri wese kwiyubaka hashingiwe ku mahirwe buri wese anganya n'undi nta vangura, nta kurobanura, nta tonesha n'ibindi byatanije Abanyarwanda. Yibukije buri wese guharanira kubaka ibitazasubira inyuma kuko hari urufatiro rw'ubuyobozi bwiza.

Visi Meya Niyongira, yabwiye Abanyengamba n'ababatabaye ko mu gihe cya Jenoside yakorewe Abatutsi, Amahanga n'imiryango mpuzamahanga, Amadini n'Amatorero bose ntacyo bakoze nyamara Jenoside yarabaye bayireba.

Ati' Tweruye twavuga ko batsinzwe!, ari amahanga yaratsinzwe ntabwo yagize icyo akora kugira ngo Jenoside yakorerwaga Abatutsi ihagarare, ndetse n'Amadini n'Amatorero byari muri uru Rwanda no hanze ntacyo byakoze, ariko twagize Imana y'i Rwanda Izana Inkotanyi, iziha imbaraga, iziha gukotana zihagarika Jenoside yakorerwaga Abatutsi, barokora bakeya bari basigaye'.

Akomeza avuga ati' Aho rero niho tuvuga ko Inkotanyi zatsinze iyo miryango mpuzamahanga n'abandi baratsindwa, aho rero niho u Rwanda rwaboneye umucyo rwongera kubona Izuba bundi bushya kuko Igihugu cyari cyacuze Umwijima'.

Yasabye buri wese ko mu Kwibuka Jenoside yakorewe Abatutsi akwiye no kuzirikana Abaguye ku rugamba rwo kubohora Igihugu no guhagarika Jenoside. Ati' Inkotanyi zakuye u Rwanda mu mwijima zizana Umucyo zongera kubaka Igihugu cyacu'.

Uzziel Niyongira, yasabye ko mu rwego rwo gushyigikira ibyiza bimaze kugerwaho buri wese akwiye guharanira Kwigira, Kurinda Ibyagezweho no kugira uruhare mu iterambere ry'Igihugu ryubakiye ku miyoborere myiza kuko Abanyarwanda bahisemo kuba umwe no kureba kure. Ati' Ibyo bikwiye kuyobora imigirire ya buri wese mu kugira uruhare mu kugena ejo hazaza h'Igihugu kuko aho Abanyarwanda tugeze ubwabyo ni ikimenyetso gitanga icyizere'.

Abanyengamba ndetse n'ababatabaye, basabwe kwimakaza umuco w'amahoro, bamaganira kure ibikorwa byose ndetse n'amagambo agaragaramo Ingengabitekerezo ya Jenoside ariko kandi buri wese agaharanira kwitandukanya n'abagifite imyumvire n'imikorere irangwamo Ingengabitekerezo ya Jenoside.

Ati' Turabasaba kwitandukanya nabo no gutangira amakuru ku gihe kubakiyifite kugira ngo amategeko ayihana abakurikirane. Nta muturage n'umwe wo mu Karere kacu ka Kamonyi ndetse no mu Gihugu twifuza ko yagira imitekerereze n'imigirire irimo Ingengabitekerezo ya Jenoside n'ibyaha bifitanye isano nayo'.

Kwibuka Jenoside yakorewe Abatutsi aha i Ngamba, byabanjirijwe no kujya gushyira indabo muri Nyabarongo mu kagari ka Kabuga ahari urutare hiciwe Abatutsi benshi bakajugunywa muri uyu mugezi wa Nyabarongo. Nyuma y'iki gikorwa, Kwibuka byakomereje ahateguwe mu kibuga cy'ishuri rya Fr. Ramon Kabuga TSS.

Munyaneza Théogène

Source : https://www.intyoza.com/2025/05/11/kamonyi-ngamba-inkotanyi-zakuye-u-rwanda-mu-mwijima-zizana-umucyo-visi-meya-uzziel-niyongira/

 

Kylie Jenner yagaragaye asukura imyenda ya Timothée Chalamet mbere y'ibirori bikomeye, ibintu byashimishije abakunzi babo

Mu gihe abakunzi ba Kylie Jenner na Timothée Chalamet bakomeje kwishimira uburyo aba bombi bakundana bigaragarira buri wese, hamenyekanye ifoto itangaje yagaragaje Kylie asukura imyenda y'uwo yihebeye mbere y'uko bajya mu birori bikomeye byo gutanga ibihembo.

Mu ifoto yashyizwe ahagaragara n'ikinyamakuru Cosmopolitan ku wa Gatandatu, Kylie Jenner, wamamaye cyane kubera umuryango wa Kardashian-Jenner no kuba ari rwiyemezamirimo w'imideli n'ibirungo by'ubwiza, yagaragaye ari mu kiganiro cya FaceTime n'umukunzi we Timothée Chalamet, amukoraho yitonze nk'ushaka gukuraho imyanda cyangwa umukungugu ku mwambaro we. Ibyo yabikoraga akoresheje agikoresho kazwi nka lint roller, gakunze gukoreshwa n'abantu bashaka gusukura imyenda mbere yo kwitabira ibirori.

Bateguraga kwitabira ibirori bya David Di Donatello Awards

Iyi foto y'urukundo yafashwe mbere y'uko aba bombi bagaragaza urukundo rwabo ku mugaragaro ku itapi itukura, ubwo bitabiraga ibirori by'i Roma bizwi nka David Di Donatello Awards, byubahirizwa cyane mu ruganda rwa sinema.

Mu ifoto, Kylie agaragara akora ku gituza cya Chalamet yitonze cyane, ibintu byashimishije abakunzi babo ku mbuga nkoranyambaga, bamwe bakavuga ko byerekana uko yita ku mwambaro w'umukunzi we, abandi bagaragaza uburyo ari urukundo rutuje kandi ruzira uburyarya.

Mu gice cy'iyo foto, hari undi mugabo wagaragaye mu ishusho yo kuri FaceTime, usa na Haider Ackermann, umunyamideli w'Umunyafuransa uzwi cyane ku rwego mpuzamahanga, byakekwa ko yaba yarafashaga Timothée gutegura imyambarire ye.

Agatotsi gato ku rukundo rwabo mu ruhame

Nubwo urukundo rwabo rwari rwuzuyemo ibyishimo kuri iyo tariki, hari akandi kanya kagaragaye gatera abantu impungenge ubwo Kylie yageragezaga gusoma Timothée bwa kabiri ariko undi akamuhunga atabigambiriye. Uko byagenze kwabaye urw'amenyo ku mbuga nkoranyambaga, bamwe bavuga ko bishobora kuba byari impanuka isanzwe, abandi babifata nk'igice cy'ukuri ku rukundo rudahora mu munezero gusa.

Icyakora, ibyo ntibyagize icyo bihungabanya ku rukundo rwabo kuko kugeza ubu bagaragaza ko bakundana byimazeyo kandi bitagihishwa nk'uko byahoze.

Urukundo rutakiri urw'ibanga

Ibihe bya mbere by'urukundo rwabo byaranzwe no kugerageza kwihisha amaso y'itangazamakuru n'abafana babo. Hari igihe bafotowe bajya gufata tacos bari mu modoka, bagize isoni ndetse bagerageza guhisha amaso. Ariko uko iminsi yagiye ihita, urukundo rwabo rwatangiye gufata indi ntera, aho bagaragaye kenshi bari kumwe mu ruhame, bifotozanya, bakitabira ibirori no gukurura benshi kuri internet.

Ubu, Kylie na Timothée bamaze kugera ku rwego rwo kwishyira ahabona nta bwoba, ndetse n'uduce duto tw'urukundo, nko gukuraho umukungugu ku mwambaro wa mugenzi wawe mbere yo gusohoka, bigahinduka ibihe by'urukundo bigaragarira buri wese.

Bagaragaye henshi bari kumwe

Uretse kwitabira ibirori bya David Di Donatello i Roma, aba bombi banagaragaye bicaye hafi y'ikibuga mu mukino wa NBA wa Los Angeles Lakers, barikumwe bafite akanyamuneza kagaragara. Mu mafoto atandukanye yashyizwe ku mbuga nkoranyambaga, bigaragara ko bishimiraga akanya bari bafite, banaseka batikandagira.

Abasesenguzi b'imyitwarire y'ibyamamare bavuga ko uburyo aba bombi bitwara ari ubwa kinyamwuga kandi bubamo umwihariko w'urukundo rurambye. 'Kuba Kylie Jenner, usanzwe afite ubuzima buri ku karubanda, yifotoza yita ku isuku y'umukunzi we mbere y'ibirori, bituma abantu benshi bababona nk'abantu basanzwe nk'abandi bose,' umwe mu banditsi ba Cosmopolitan yatangaje.

Abafana babo babaryohewe n'ibihe byabo

Iyi foto ya FaceTime yakurikiwe n'ubutumwa bwinshi bw'inkunga n'urukundo ku mbuga nkoranyambaga nka Instagram na Twitter, aho abafana babo bagaragaje uburyo bishimira kubona Kylie yita kuri Timothée mu buryo butangaje. Abandi bavuze ko bibutsa iby'urukundo rw'ukuri aho umuntu akwitaho ku giti cyawe, atitaye ku rwego uriho cyangwa aho mugiye.

Umwe mu bafana yanditse kuri X (Twitter ati:

'Kylie gukoresha lint roller ku mwambaro wa Timothée ni ikimenyetso cy'urukundo nyakuri! Aba bombi bari gukora ibyo abashakanye beza bajya bakora.'

Undi yongeraho ati:

'Ntabwo ari urukundo rw'abamamare rusanzwe. Rurimo urugwiro, iteka n'ubufatanye. Koko baruzinutswe.'

Umubano uhamye witezweho byinshi

Nubwo hari abatari bacye batekerezaga ko urukundo rwa Jenner na Chalamet rutazaramba kubera ubuzima bwabo butandukanye, ubu ibintu birasa n'ibihindutse. Timothée, umusore uzwi cyane kubera sinema nka Dune na Call Me by Your Name, usanzwe yitonda kandi adakunze kugaragara mu nkuru z'ibihuha, n'uyu mukobwa usanzwe akundwa cyane n'abakobwa ku isi yose kubera ubucuruzi bwe bwa Kylie Cosmetics, barasa nk'aho bashyize hamwe bagahuza isi ebyiri zitandukanye.

Abakurikiranira hafi ibya sinema n'imideli barateganya ko uyu mubano ushobora gutera imbere, cyane ko hari amakuru avuga ko bashobora kuzakorana n'imishinga y'ubucuruzi cyangwa imideli mu gihe kiri imbere.

 

Source : https://kasukumedia.com/kylie-jenner-yita-ku-isuku-ya-timothee-chalamet-mu-gihe-cyurukundo-cyagaragaye-kuri-facetime/

Sophia Umansky, umukobwa wa Kyle Richards na Mauricio Umansky, yongeye kwibutsa abantu ko ubuzima bwe abugenga ku giti cye, nyuma yo kwamaganira kure abamunenga ku bwo gukoresha imiti igabanya ibiro — nubwo benshi bamubwira ko nta mpamvu afite kuko ngo asanzwe ari muto bihagije.

Mu kiganiro yagiranye n'ikinyamakuru People ku wa Gatanu, Sophia yavuze mu magambo adaciye ku ruhande ati: 'Buri wese akwiye gutuza agakurikira ubuzima bwe.' Ayo magambo yari igisubizo gikakaye ku bakomeje kumuvuga nabi kuva ubwo yatangaje ko akoresha imiti izwi nka Mounjaro, ikoreshwa n'abarwaye diyabete yo mu bwoko bwa kabiri, ariko ubu ikaba imaze kumenyekana cyane nk'iyifashishwa mu kugabanya ibiro.

Yatangaje Benshi Ku Mbuga Nkoranyambaga

Mu mpera za Mata, Sophia Umansky yatangarije abamukurikira kuri TikTok ko amaze igihe akoresha Mounjaro. Yavuze ko yatangiye kubona ingaruka zimwe zirimo nko kugabanuka k'umusatsi. Icyo cyemezo cye cyateje impaka nyinshi ku mbuga nkoranyambaga, bamwe bamubwira ko akomeje kumenyekanisha igitekerezo kibi cy'ubwiza bushingiye ku kubura ibiro, ndetse bamwe bamushinja kwamamaza 'anorexia' — indwara ishingiye ku kwiyicisha inzara hagamijwe kugira umubiri muto cyane.

Ariko Sophia ntabwo yacitse intege. Mu magambo ye, yagize ati:
'Mfite imyaka 25, ndakuze, mfite uburenganzira bwo gukora icyo nshaka.'
Yongeyeho ko yabanje kugisha inama muganga mbere yo gutangira gukoresha iyo miti, kandi nyina, Kyle Richards — uzwi cyane muri filime za Real Housewives of Beverly Hills — ari mu bamushyigikiye cyane.

'Nashakaga Kwiyumvamo Icyizere Kurushaho'

Sophia yagaragaje ko atari uko yari yiyumva nabi cyangwa yibona nabi mbere y'uko atangira gukoresha Mounjaro. Yagize ati:
'Nashakaga kumva mfite icyizere kurushaho, nsa neza kurushaho. Si uko nabonaga nta kintu ndi cyo, ahubwo ni ugushaka kumva meze neza mu mubiri wanjye.'

Ayo magambo yatumye benshi bamushyigikira, bavuga ko buri muntu agomba kugira uburenganzira bwo gufata ibyemezo ku mubiri we cyane cyane iyo bibaye mu buryo bwemewe n'abaganga kandi budafite ingaruka mbi ziremereye.

Abandi Bamamare Bakoreshaga Iyi Miti

Sophia si we wamamaye wenyine wemeye ko akoresha imiti igabanya ibiro. Ibindi byamamare birimo Meghan Trainor, Amy Schumer, Tracy Morgan, na Kelly Clarkson nabo bavuze ko bifashishije imiti nk'iyi kugira ngo bagabanye ibiro, bitewe n'impamvu zabo bwite zirimo ubuzima cyangwa uburyo biyumva.

Icyo Abantu Biga Ku Mibereho Rusange Bavuga

Abasesengura imyitwarire n'imibereho rusange bavuga ko ikoreshwa ry'iyi miti rigomba kugenzurwa, ariko kandi bagahamya ko abantu bakuru bafite uburenganzira bwo kwifatira ibyemezo ku mibiri yabo. Bongeraho ko gutanga amakuru ku mugaragaro nk'uko Sophia yabikoze bishobora gufasha abandi mu myanzuro yabo, cyane cyane iyo bikorwa mu mucyo kandi bikagendana no gushaka inama z'ubuvuzi.

Ushaka kugira icyo utangaza ku ikoreshwa ry'imiti igabanya ibiro mu rubyiruko rw'iki gihe? Tanga igitekerezo cyawe hasi mu gice cyagenewe ibitekerezo.

Source : https://kasukumedia.com/sophia-umansky-asubije-abamunenga-nzajya-nkoresha-imiti-igabanya-ibiro-niba-mbishaka/

Aba bakozi basobanuriwe amateka yaranze aka gace kuva mu 1959 kugeza ubwo Jenoside yashyizwe mu bikorwa muri Mata 1994.

Basangijwe kandi amateka yihariye y'uko Abatutsi bari bahungiye kuri Kiliziya ya Ntarama bishwe urw'agashinyaguro kandi bari bizeye ko ari ho barabona amakiriro.

Nyinawumuntu Clementine wo mu Karere ka Bugesera, Umurenge wa Ntarama, yatanze ubuhamya bw'uburyo yarokotse ari umwe mu bana barindwi bavukanaga ndetse na we agasigarana ubumuga.

Ati 'Twari twahungiye hano kuri Kiliziya ya Ntarama twizeye ko byibura Interahanwe zihatinya kuko ari mu nzu y'Imana ariko byarangiye bahagize ibagiro ry'Abatutsi.'

Visi Perezida w'Inama y'Ubutegetsi ya COPEDU Plc, Ntabwoba Joseph, yihanganishije abarokotse Jenoside yakorewe Abatutsi, ababwira ko bari kumwe na bo ndetse bazahora hafi.

Ati 'Abateguye n'abakoze Jenoside bashatse kubamara ariko ntimwashize. Icyiza cyatsinze ikibi, umucyo watsinze umwijima ndetse ubuzima bwatsinze urupfu mukomere kandi mukomeze Kwibuka mwiyubaka.'

Ntabwoba yasabye urubyiruko kuba imbere mu guharanira ko ibyabaye bitazongera kubaho ukundi, barwanya ingengabitekerezo ya Jenoside ndetse baharanira kumenya amateka kugira ngo bazakomeze guhangana n'abakomeza kuyayagoreka.

Umuyobozi Wungirije w’Inama y’Ubutegetsi ya COPEDU PLC, Ntabwoba Joseph, yasabye urubyiruko kuba umusemburo w’impinduka bagaharanira kumenya amateka kugira ngo bahangane n’abayagoreka

Nyinawumuntu Clementine warokotse Jenoside yakorewe Abatutsi mu 1994 ni we wenyine warokotse mu bana barindwi bavukanaga

Hacanywe urumuri rw’icyizere

Abakozi ba COPEDU Plc batemberejwe Urwibutso rwa Jenoside rwa Ntarama

Abayobozi n'abakozi ba COPEDU PLC baganirijwe amateka mabi yagejeje kuri Jenoside yakorewe Abatutsi mu 1994

Abayobozi n’abakozi ba COPEDU Plc bashyira indabo ku mva ishyinguwemo imibiri y’Abatutsi bishwe muri Jenoside

Abayobozi ba COPEDU Plc bunamiye Abatutsi bishwe muri Jenoside bashyinguwe mu Rwibutso rwa Ntarama

---

Source : http://igihe.com/amakuru/u-rwanda/article/abakozi-ba-copedu-plc-basuye-urwibutso-rwa-jenoside-rwa-ntarama

Ubuyobozi bwa BPR Bank Rwanda Plc bwatangaje ko bugiye kugabanya abanyamigabane urwo rwunguko kuko mu mwaka wa 2024 yagize inyungu ishimishije bityo n'abanyamigabane bayo bakwiye kuyibonaho.

Umuyobozi wa BPR Bank Rwanda Plc, Mutesi Patience, yagaragaje ko iyi banki yagize urwunguko rwa miliyari zirenga 29 Frw mu 2024.

Yavuze ko nyuma yo kubona inyungu basabye ko abanyamigabane bayihababwa ndetse Inteko Rusange yateranye ku wa 10 Gicurasi 2025, yemeje ko bazagabanywa 13,7% by'inyungu yabonetse.

Ati 'Gahunda twari dufite uyu munsi ni yo guha Inteko Rusange uburenganzira bwo kugabanya abanyamigabane bacu inyungu ku mugabane ingana na 13,7%, ni amafaranga angana na miliyari 4 Frw. Twabyemerewe, Inama rusange yemeje ko izo miliyari 4 Frw zizishyurwa abanyamigabane.'

Yerekanye ko inyungu yagejejwe ku 50 Frw ku mugabane umwe kandi ko izatangwa bitarenze ku wa 15 Nyakanga 2025.

Yavuze ko kugeza ubu KCB Bank ari yo ifite imigabane myinshi muri iyi banki ingana 87% mu gihe imigabane y'Abanyarwanda ingana na 12,4%.

Kuva mu myaka 50 ishize itangiye gukora, Abanyarwanda bafitemo imigabane barenga ibihumbi 576 ariko mu gikorwa cyatangiye cyo kongera kwibaruza hamaze kwakirwa abarenga ibihumbi 238 bangana na 41,5%.

Umuyobozi Mukuru w'Inama y'Ubutegetsi, George Rubagumya, yavuze ko abanyamigabane ba BPR Bank Rwanda batariyandikisha bari bakwiye kubyitabira kugira ngo hamenyekane imyirondoro yabo kuko ari uburenganzira bwabo kubona inyungu ku migabane bashoye.

Ati 'Abantu bose bafite uburenganzira ku migabane yabo. Abitabye Imana, bafite abana, abuzukuru cyangwa abo mu miryango yabo. Amategeko y'u Rwanda avuga uburyo umuntu wapfuye azungurwa. Ni yo waba nta byangombwa ugifite, ujye ku ishami ryacu ubabwire imyirondoro yawe, n'uko wari umunyamigabane. Biradufasha kumenya imyirondoro y'ukuri y'abanyamigabane bacu, tubashe kubatandukanya.'

Yagaragaje ko hari gukorwa isuzuma rigamije kugena agaciro k'umugabane muri iyo banki ku buryo na banyirayo bazoroherwa no kuba bayigura cyangwa bakayigurisha.

Perezida w'Abanyamigabane b'Abanyarwanda, Munyazikwiye, yashimye intambwe imaze guterwa na banki mu guha agaciro abanyamigabane.

Ati 'Nkurikije urugendo tumaze gukora ni ugushima aho ibintu bigeze, nshima ubuyobozi bwacu dufite uyu munsi. Twagize ibibazo byinshi mu bihe byatambutse, ibibazo byo guhomba, ibyo kutagira amakuru kuri banki n'ibibazo abanyamigabane batubazaga by'amakuru y'imigabane yabo. Uyu munsi byose birahari. Igishimishije rero ni ukugira amakuru yuzuye ku migabane yacu.'

Nyiringango Pascal yagaragaje ko amafaranga make y'imigabane yashyizwemo atari munsi ya 15000 Frw mu gihe uwashoye menshi yari afitemo miliyoni 10 Frw.

Mu kwiyandikisha ku banyamigabane barasabwa kwitwaza udutabo tugaragaza imigabane batanze, inyandiko igaragaza ko ari abanyamigabane ariko n'abatabifite bashobora gufashwa mu gihe bakegera ubuyobozi bwa BPR Bank Rwanda Plc.

Abanyamigabane ba BPR Bank Rwanda Plc bagiye kugabana arenga miliyari 4 Frw

Umuyobozi Mukuru wa BPR Bank Rwanda Plc, Patience Mutesi, yavuze ko abanyamigabane bayo bagiye guhabwa inyungu ku migabane

Umuyobozi w'Inama y'Ubutegetsi ya BPR Bank Rwanda Plc, George Rubagumya, yasabye abanyamigabane batariyandikisha kubikora

Ubuyobozi bwa BPR Bank Rwanda Plc bwatangaje ko bugiye guha abakiliya bayo inyungu kuko iyi banki yagize urwunguko rushimishije

Nyiringango Pascal yagaragaje ko amafaranga make y'imigabane yashyizwemo atari munsi ya 15000 Frw

---

Source : http://igihe.com/amakuru/u-rwanda/article/abanyamigabane-ba-bpr-bank-rwanda-plc-bagiye-kugabana-arenga-miliyari-4-frw

RDF yatangaje ko ibiganiro bya Gen. Mubarakh Muganga yatanze ikiganiro, yifashishije urugero rw'u Rwanda n'uburyo rugira uruhare mu gushakira umuti ibibazo by'umutekano ku mugabane wa Afurika binyuze mu masezerano y'ubufatanye.

Iki kiganiro cyabaye kuri uyu wa Gatandatu tariki ya 10 Gicurasi 2025, kuri iryo shuri riherereye i Kimaka muri Uganda cyari gifite insanganyamatsiko igira iti 'Guharanira ibisubizo by'Abanyafurika ku bibazo byugarije Afurika: Ingero z'uruhare rw'u Rwanda mu bufatanye ku mugabane wa Afurika.'

Ni ikiganiro cyibanze ku kugaragaza uruhare rw'u Rwanda mu gushakira ibisubizo ibibazo by'umutekano bihangayikishije ibihugu by'inshuti n'abafatanyabikorwa kuri uwo mugabane.

Gen. Mubarakh yashimangiye ko ibihugu bya Afurika bifite ubushobozi bwo kwikemurira ibibazo by'umutekano bikibangamiye, binyuze mu gukoresha neza amahirwe y'ubufatanye hagati y'ibihugu (bilateral) ndetse n'ubufatanye busesuye bw'ibihugu byinshi (multilateral).

Ingabo z'u Rwanda (RDF) zimaze imyaka igera kuri 20 zitanga umusanzu mu bikorwa byo kugarura amahoro no kubungabunga umutekano ku mugabane wa Afurika, binyuze mu butumwa bw'amahoro bw'Umuryango w'Abibumbye (UN), Umuryango wa Afurika yunze Ubumwe (AU), ndetse no ku bufatanye n'ibihugu by'inshuti.

U Rwanda ni kimwe mu bihugu 10 bya mbere ku Isi bitanga ingabo nyinshi mu bikorwa by'amahoro bya Loni.

Ingabo zarwo zagiye zoherezwa mu bihugu nka Sudani y'Epfo mu butumwa bwa Loni (UNMISS) ndetse hakaba n'abapolisi bafasha abaturage.

U Rwanda kandi rufite ingabo muri Centrafrique mu butumwa bwiswe (MINUSCA), RDF ihafite ingabo zifasha mu kurinda abaturage no gushyigikira ibikorwa bya Guverinoma aho zinacungira umutekano abayobozi bakuru b'icyo gihugu.

U Rwanda rujya kohereza ingabo ku busabe bw'ibindi bihugu byahuye n'ibibazo bikomeye by'umutekano nka Mozambique.

Mozambique kuva mu 2021 kugeza ubu, RDF yoherejwe mu ntara ya Cabo Delgado mu bufatanye na Mozambique, aho ifasha ingabo z'icyo gihugu kurwanya ibikorwa by'iterabwoba.

Muri ibyo bikorwa kandi ingabo z'u Rwanda, zitanga ubuvuzi n'ubutabazi (Humanitarian Assistance) aho zitanga serivisi z'ubuvuzi ku baturage muri ibi bihugu, harimo kubaga, kuvura indwara z'ibanze no gutanga inkingo.

Zinafasha mu kubaka ibikorwa remezo, harimo imihanda, ibitaro, amashuri n'ibindi bikorwa bituma abaturage bongera kwizera Leta zabo.

RDF kandi itanga amahugurwa y'ingabo n'abapolisi b'ibindi bihugu, by'umwihariko mu bijyanye no kubungabunga amahoro no guhangana n'iterabwoba.

U Rwanda rutanga uwo musanzu nk'imbaraga zikomoka ku mateka ya Jenoside yakorewe Abatutsi mu 1994, aho rwiyemeje kutarebera izindi Jenoside n'ibikorwa byibasira abaturage.

Ubwo Gen Mubarakh Muganga yageraga ku Ishuri Rikuru rya Gisirikare muri Uganda

Gen Mubarakh Muganga yagaragaje umwihariko w’u Rwanda mu gukemura ibibazo by’umutekano muri Afurika

Gen. Mubarakh Muganga yatanze amasomo mu Ishuri Rikuru rya Gisirikare muri Uganda

---

Source : http://igihe.com/amakuru/u-rwanda/article/gen-mubarakh-muganga-yatanze-amasomo-mu-ishuri-rikuru-rya-gisirikare-muri

Byagarutsweho ku wa 09 Gicurasi 2025, ubwo ILPD yibukaga ku nshuro 31 Jenoside yakorewe Abatutsi, igikorwa cyahuje abayobozi, abakozi n'abanyeshuri b'iri shuri, kinitabirwa na Minisitiri w'Ubutabera akaba n'Intumwa Nkuru ya Leta, Dr. Ugirashebuja Emmanuel.

Mudederi Berchmas, wakoraga mu rukiko i Nyabisindu mbere ya Jenoside yakorewe Abatutsi, wanaharokokeye, yagaragaje uko umuco wo kudahana wari waramunze u Rwanda rwo hambere, aho Umututsi yicwaga ntibigire inkurikizi.

Yagaragaje uko mbere ya Jenoside Abatutsi baraswaga cyangwa abantu bakajya gutera amabuye ku nzu z'abayobozi b'Abatutsi ariko ntihagire igikorwa.

Ati ''Ngaho nimumbwire, uyu munsi hari uwahirahira ngo ajye kwa Mudugudu, ahateze umutekano muke bimugwe amahoro? Ariko mbere abantu baricwaga, ntihagire igikorwa.''

Amb. Karega Vincent yagaragaje uko u Rwanda rwagize akaga, rucengezwamo amacakubiri n'abakoloni b'Ababiligi.

Yerekanye ko imyuga y'ubworozi ku Batutsi, ubuhinzi ku Bahutu n'ubuhanzi, ubugeni n'ubukorikori ku Batwa byari ibyiciro magirirane by'ubuzima kandi byose byubakaga u Rwanda, bitari amoko.

Yanavuze uko Ababiligi bacengeje inzangano z'iwabo mu Banyarwanda, aho bagereranyaga Abatutsi n'Aba-Flamands, Abahutu bakabisanisha n'Aba-Wallons.

Ati 'Ni ibintu bigayitse cyane! aho umwana wavukaga ku babyeyi, Se ari Umuhutu, nyina ari Umututsi akaba Umuhutu, Se yaba ari Umutusi nyina ari Umuhutu akicwa, ariko kandi n'uwabaga atazwi Se umubyara wenda ari n'umunyamahanga, yahitaga ahabwa ubwoko bwa nyina akicwa, byari ibintu bidafite ukuri kwa siyansi.''

Minisitiri Dr. Ugirashebuja yagaragaje ko kwibuka ari ngombwa cyane ko hafi ya ¾ by'Abanyarwanda batarengeje imyaka 35, bityo ko bakwiye kubwirwa amateka mabi y'u Rwanda, na bo bazayabwire abazabakomokaho.

Yahaye urubyiruko rwiga amategeko umukoro wo guhangana n'abagipfobya Jenoside biyambitse umwenda w'umwuga w'ubutabera, atanga urugero rw'urubanza rwa Shalom Ntahobari i Arusha.

Mu rubanza umwunganizi we Duncan Mwanyumba, yabajije uwo yahohoteye muri Jenoside gusubiramo uko yabigenje, niba yaramwambuye imyenda, yarafashe igitsina cye, niba yarakoresheje agakingirizo n'ibindi bibazo bitesha agaciro umutangabuhamya.

Yakomeje avuga ko hari n'ahandi nko mu Bubiligi baha urw'amenyo abatangahumya babafata nk'ababeshyi, asaba urubyiruko rwiga amategeko kubirwanya bivuye inyuma.

Umuryango mugari wa ILPD urimo n'abanyeshuri b'abanyamahanga, biyemeje kurwanya ingengabitekerezo ya Jenoside aho ari ho hose ku Isi kuko ubumenyi bwo kubikora babufite.

Amb. Vincent Karega, yagaragaje uburyo urwango rwigishijwe n’abakoloni rwacengejwe mu Banyarwanda rukabarenga rukageza ku ndunduro ya Jenoside

Minisitiri Dr. Ugirashebuja Emmanuel, yasabye urubyiruko rwiga amategeko kurwanya abapfobya Jenoside yakorewe Abatutsi

Mudederi Berchmas watanze ubuhamya, yagaragaje uko umuco wo kudahana wari warokamye u Rwanda rwa mbere ya Jenoside

Habayeho umwanya wo gucana urumuri rw’icyizere

Hibutswe abari abakozi n’abanyeshuri ba CNFJ yaje guhinduka ILPD

Hafashwe umunota wo kwibuka abazize Jenoside yakorewe Abatutsi

Hakozwe urugendo rwo kwibuka rwavuye kuri ILPD rugera ku Rwibutso rwa Jenoside yakorewe Abatutsi rwa Nyanza

Umuhanzi Musinga Joe na we yafashije abantu kwibuka mu butumwa bw’indirimbo ze

N’inzego z’umutekano zunamiye abishwe muri Jenoside baruhuhukiye mu Rwibutso rw’Akarere rwa Nyanza

Umuyobozi Mukuru wa ILPD, Dr. Karimunda Muyoboke Aimé yashyize indabo ku mva ishyinguyemo Abatutsi barenga ibihumbi 31 baruhukiye mu Rwibutso rwa Nyanza

Umuryango Mugari wa ILPD wagize umwanya wo kunamira abishwe muri Jenoside yakorewe Abatutsi mu 1994

---

Source : http://igihe.com/amakuru/u-rwanda/article/abiga-muri-ilpd-basabwe-gukoresha-amategeko-bigishwa-mu-kurwanya-abapfobya

Ni igikorwa cyabaye ku wa 9 Gicurasi 2025, ubwo iki kigo cyizihizaga n'umunsi mpuzamamanga w'abakozi bishimira byinshi bamaze kugeraho.

Algorithm Inc ifasha abacuruzi kumenya amakuru y'ubucuruzi nk'ibyacurujwe, ibyaranguwe, ibisigaye mu bubiko, aho warangurira, ahari ibiciro byiza, imisoro, gukurikirana umusaruro w'abakozi, icungamutungo, kubona inguzanyo ntangwate n'ibindi, byose biciye muri porogaramu ya mudasobwa ya 'Ishyiga'.

Umuyobozi Mukuru wa Algorithm Inc, Kimenyi Aimable, yavuze ko muri iki gihe bidakwiye ko umuntu akoresha impapuro kugira ngo amenye uko ubucuruzi bwe buri kugenda, kuko ashobora kwibeshya cyangwa kwibagirwa agahomba.

Yavuze ko umuntu ukoresha ikoranabuhanga rya 'Ishyiga' adashobora guhura n'ibyo bibazo.

Ati 'Umuntu utaratangira gukoresha uburyo bwa Ishyiga yari akwiye kubufata vuba kugira ngo acunge ndetse amenye n'uko ubucuruzi bwe bugenda, kandi mu buryo bwizewe ntabe yanahomba.'

Akomeza avuga ko intego yabo ari kuva ku bakiliya barenga 2,000 bakagera ku barenga ibihumbi 100, muri Afurika yose.

Avuga ko mu myaka 10 iri imbere Algolithm Inc izaba ari ikigo gifite ubushobozi bwo kuzaba cyarakoreye miliyari 1$ kivuye ku bushobozi bw'arenga miliyoni 20$ kimaze gukorera ubu.

Umuyobozi ushinzwe ikoranabuhanga muri Algorithm Inc, Mvuyekure Corneille, avuga ko iyi ntego izagerwaho binyuze mu kongera serivisi batanga haba mu Rwanda ndetse no mu mahanga, cyane ko 60% y'ingengo y'imari bakoresha ishyirwa mu bushakashatsi n'iterambere.

Yagize ati 'Bivuze ko hari gukorwa byinshi cyane bizatuma ejo Algorithm Inc isohora serivisi nziza, zizewe, kandi zigendanye n'igihe nk'ikoranabuhanga ry'ubwenge buhangano, haba ku isoko ry'imbere mu gihugu cyangwa muri Afurika.'

Umuyobozi ushinzwe serivisi muri Algorithm Inc, Bizimana JMV, avuga ko icyiza cyo gukoresha serivisi zabo ari uko yerekana n'aho ibicuruzwa bihendutse ukaba wabasha kurangura udahenzwe.

Yagize ati 'Serivisi zacu zikwereka abacuruza ku giciro gito ukaba wabona n'inguzanyo yo kubirangura byihuse nta ngwate, urumva atari nk'inzozi? Abacuruzi bose bari bakwiye kutugana uyu munsi bakanatangira kubyimenyereza.'

Iki kigo kandi gitanga amahugurwa ku bijyanye n'imikoreshereze ya serivisi zabo ndetse gifitanye imikoranire n'ibigo bitandukanye by'amashuri.

Aya mahugurwa atangwa mu buryo bubiri, agenerwa abize ikoranabuhanga ngo bamenye uko ibyo bize byakoreshwa mu buzima busanzwe n'agenerwa abantu bose bifuza kumenya uko ikoranabuhanga rikoreshwa mu bucuruzi.

Umukoresha uzajya ukoresha umukozi ufite impamyabushobozi mu bijyanye no gukoresha Ishyiga, azajya ahabwa iri koranabuhanga umwaka wose atishyura.

Ishyiga ni ikoranabuhanga rishyirwa muri mudasobwa, urikoresha yishyura ibihumbi 50 Frw ku kwezi. Rifasha abacururuzi bose ariko cyane cyane abakora mu nganda, hoteli, utubari, restaurents, butiki, ahacururizwa ikawa n'ahandi.

Algorithm Inc ikorera mu bihugu byo muri Afurika birimo u Burundi, Ghana, Zambia, Eswatini, Repubulika ya Centrefrique, RDC n'u Rwanda. Intego yabo ni gukorerwa mu bihugu byose byo muri Afurika mu myaka icumi iri imbere.

Ushaka ibisobanuro byabo wanyura kuri serivisi zabo wabasanga aha cyangwa ukabahamagara kuri 0798687932.

Umuyobozi Mukuru wa Algorithm Inc, avuga ko abona ikigo cye mu myaka 10 iri imbere azaba ari ikigo gifite miliyari 1$

Umuyobozi Ushinzwe ibikorwa muri Algorithm Inc, yavuze ko hashize imyaka icumi Algorithm yigisha inatanga imenyerezamwuga, akaba ari ho bakura abakozi bashoboye

Ishyiga ni ikoranabuhanga rishyirwa muri mudasobwa kugira ngo rifashe umucuruzi kumenya uko ubucuruzi bwe buri kugenda

Algorithm Inc, ishyira imbere n’ubuzima bwiza bw’abakozi bakora siporo

Buri wa gatanu abakozi ba Algorithm Inc bakora siporo ziromo gukina Volleyball na Basketball

Algorithm Inc yizihije umunsi w’abakozi

---

Source : http://igihe.com/amakuru/u-rwanda/article/algorithm-inc-yihaye-intego-yo-gukorera-miliyari-1-mu-myaka-10-iri-imbere

Nyuma yo gufasha Kiyovu Sports kwirinda kumanuka mu cyiciro cya kabiri, Ndorimana François Régis uzwi nka 'General' yatangaje ko agiye kugabanya uruhare rwe mu mikorere y'iyi kipe, kuko intego yamuteye kugaruka yayigezeho. Ni icyemezo yafashe nyuma y'intsinzi ya 1-0 ikipe y'Urucaca yabonye kuri AS Kigali ku munsi wa 27 wa shampiyona, bigatuma igira amanota 34 igakomera ku mwanya wa 8.

Ndorimana yavuze ko yaje ari ukugira ngo afashe ikipe mu bihe bikomeye, akayishyiramo imbaraga n'ubushobozi byatumye itangira gutsinda. Yagize ati: 'Nawe urabyumva, icyanzanye kirangiye. Naje kugira ngo ikipe igume mu cyiciro cya mbere, ubu ndumva ntakiri ngombwa mu buzima bwa buri munsi bw'iyo kipe.'

Nubwo agiye guhagarika uburyo yari asanzwe ayifashamo, Ndorimana yavuze ko azakomeza kuyishyigikira nk'umufana wayo, ndetse ko n'agahimbazamusyi yajyaga atanga ashobora kuzajya akomeza kugatanga igihe yishimiye imikino. Yashimangiye ko ashimira Imana yamuhaye imbaraga zo kuyoboka ikipe mu bihe bigoye, akanishimira impinduka yatewe n'ubufatanye bwa benshi.

Yasoje yizeza abakunzi ba Kiyovu Sports ko kumanuka bitakiri mu byashoboka, kandi ko yishimira uburyo abafana n'abayobozi batangiye kugarura icyizere bari barabuze.

Source : https://yegob.rw/general-ndorimana-yasezeye-kiyovu-sports-ubu-igiye-kwirwanaho-ati-icyanzanye-naragisoje/