Author: webrwanda

Ni umuhigo aka karere kihaye muri Nzeri 2020 nyuma yo gukora isuzuma kagasanga abaturage bagatuye badatera imbere ku muvuduko wifuzwa bitewe n’uko abenshi ari abahinzi bahinga ntibeze kubera kubura ifumbire.

Ikindi ni uko basanze buri rugo rukeneye amata yo guha abana kugira ngo bakure neza badafite ibibazo by’imirire mibi.

Umuyobozi w’Akarere ka Gisagara, Rutaburingoga Jérôme, yabwiye IGIHE ko ubwo bisuzumaga muri Nzeri 2020 basanze imiryango yoroye inka ari 26,872 gusa ingana na 30% by’ingo zose ziri mu Karere kuko hari izigera ku 88,045.

Ati “Turisuzuma tuza gusanga turakorera munsi ya 30% by’umusaruro dukwiriye kuba tubona. Ni ukuvuga ngo ahakwiye kwera ibilo 100 turakuramo 30 gusa uretse mu bishanga.”

Muri izo nka 26,872 harimo izigera kuri 50% zari izatanzwe muri gahunda ya Girinka.

Ibyo byatumye biha umuhigo ko buri rugo rugomba kugira inka, batangira kubiganiraho n’abaturage n’abafatanyabikorwa b’akarere kugira ngo bafatanye kuwesa badategereje inka bazahabwa muri Girinka gusa.

Rutaburingoga ati “Hari gahunda ya Girinka ya Nyakubahwa Perezida wa Repubulika ikomeje, tureraba rero dusanga dukomeje mu ntambwe tugendaho twazamara n’imyaka 20 buri rugo rutaragira inka, kuko twari dufite imiryango irenga ibihumbi 60 idafite inka.”

Kuva bakwiha uwo muhigo udasanzwe, mu gihe cy’umwaka umwe imiryango 14,794 imaze kugira inka kandi itari isanzwe izifite.

Rutaburingoga ati “Ni ukuvuga ngo mu gihe kitarenze umwaka habonetse inka zirenze izo bamaze imyaka myinshi bagura cyangwa bahabwa. Bivuze ngo bifitemo ubushobozi bwo kwigurira kurusha guhabwa, ari cyo cyerekana ko gutegereza ngo umuntu bamuhe kandi afite ubushobozi ari ubujiji.”

Ku bijyanye n’uko bagenda bagera kuri uwo muhigo, inka ziboneka binyuze muri gahunda ya Girinka isanzwe, amakoperative azigurira abanyamuryango, korozanya hagati y’abaturage n’amatsinda bibumbiramo bakazigurirana.

Kugeza ubu Akagari ka Sabusaro ko mu Murenge wa Kansi kamaze kwesa uwo muhigo ku kigero cya 100% kuko ingo zose uko ari 1,237 zoroye inka.

Imidugudu 17 yo mu Karere ka Gisagara niyo imaze kwesa uwo muhigo ku kigero cya 100%. Mu Murenge wa Kansi ni imidugudu umunani, mu wa Mamba ni itatu, mu wa Mugombwa ni ibiri, mu wa Gikonko ni ibiri, mu wa Gishubi naho hari ibiri.

Ati “Kuva twatangira uwo muhigo twavuye kuri 30% none tugeze kuri 50,3% by’ingo zoroye inka. Muri Nzeri 2020 twari dufite imiryango 26,872 yoroye inka none tugeze ku miryango 44,273 . Ni ukuvuga ko mu gihe kitageze ku mwaka imiryango 14,794 yabonye inka.”

Bamwe mu baturage bo mu Karere ka Gisagara bafite ingo zabonye inka zo korora nyuma y’uko hatangijwe gahunda y’inka kuri buri rugo, bavuga ko zatangiye guhindura imibereho yabo.

Ayabagabo Alexis wo mu Murenge wa Mugombwa ati “Niguriye inka nyuma yo kubishishikarizwa, ubu yarabyaye irampa amata ku buryo n’abana banjye bamererwe neza. Urutoki rwanjye na rwo rwabaye rwiza kuko ndufumbira n’imirima yanjye mitoya isigaye yera neza.”

Mukankusi Christine na we avuga ko nyuma yo kubona inka yabahaye ifumbire umusaruro uriyongera.

Ati “Tutaragura inka ngo tubashe gufumbira urutoki twezaga igitoki cy’ibilo 40 cyangwa 45. Ariko ubu turi kweza iby’ibilo 90. Hari n’icyo duherutse gusarura cy’ibilo 110.”

Mu 2020 umurenge wa Kansi wari ufite ingo zoroye inka zingana na 26% ariko uyu munsi zigeze kuri 87,5%. Uwa Mugombwa wavuye kuri 36% none ugeza kuri 74%.

Abafatanyabikorwa b’Akarere ka Gisagara bagira uruhare mu kugafasha kugera ku muhigo kiyemeje w’uko buri rugo rugomba kugira inka

Ingo zamaze kugeramo inka zatangiye guhindura imibereho y’abazituye

Kanakuze Immaculee, ni umwe mu bahawe inka muri gahunda ya Girinka wishimira ko yabonye amata n’ifumbire

Korora inka no kubona ifumbire byatumye bitabira guhinga imboga hagamijwe gukumira imirire mibi

Kugira inka muri buri rugo ni umuhigo Akarere ka gisagara kihaye hagamijwe guteza imbere abagatuye

Zimwe mu nka boroye bazihawe muri gahunda ya Girinka

[email protected]

Ibi birayi byatanzwe ni ibyo kubafasha muri iki gihe bari muri Guma mu Rugo kubera kwirinda Covid-19.

Nyuma yo guhabwa ubufasha, abaturage bo mu murenge wa Rubavu bashimiye bagenzi babo kubwo kubazirikana.

Munyaneza Innocent utuye mu murenge wa Rubavu, akagari ka Rukoko avuga ko yakoreraga mu mujyi wa Goma ubu akaba atakibasha kwambuka.

Yashimye abaturage ba Kanama urukundo baberetse babashyikiriza ibiribwa.

Ati “Kuva badushyira muri gahunda ya Guma mu rugo sinkibasha kwambuka ngo nshakire ibyo kurya umuryango wanjye. Amafaranga nari narizigamiye yanshizeho nirirwa hano mu rugo gusa nkaba nshima abaturage ba Kanama kuba batwibutse. Aho bakuye Imana izabongerere”.

Nzamwita Phocas ushinzwe ubuhinzi mu murenge wa Kanama, yavuze ko iki gitekerezo cyagizwe n’abaturage nyuma y’uko babonye umusaruro mwinshi w’ibirayi .

Ati “Tubifashijwemo n’amaterasi y’indinganire twakorewe n’umushinga wa Sebeya , umusaruro wariyongereye ku buryo twabashije kweza toni 1200 kuri hegitari 600. Ubu umurenge wa Kanama waje mu mirenge itatu, yagize umusaruro mwiza w’ibirayi. Niyo mpamvu byatworoheye gusangiza abaturanyi bacu ngo na bo babone ibyo kurya byiyongera ku byo Leta irimo gutanga’’.

Umunyamabanga Nshingwabikorwa w’Umurenge wa Rubavu, Tuyisenge Annonciata yashimiye abaturage ba Kanama kuba barafashe umwanzuro bakagoboka abaturage ba Rubavu.

Ati “Twari tumaze ibihe muri gahunda ya Guma mu Rugo byaradushegeshe kubera umubare munini w’abari bakeneye ibiryo kuko abaturage benshi dufite ni ababasha kubaho ari uko basohotse. Kuba Kanama yatwibutse bakazirikana abaturage bacu bafite ikibazo, ni ibintu twishimira kandi duha agaciro gakomeye, ibyo baduhaye tugiye kubisangiza imiryango ifite ikibazo kurusha abandi.”

Ubuyobozi bw’umurenge wa Rubavu buvuga ko muri iyi minsi ya Guma mu rugo ku bufatanye n’abafatanyabikorwa bwafashije imiryango 7815 . Buri muryango wahabwaga ibiro bitanu by’akawunga, ibilo bitanu by’umuceri n’ibilo bitanu by’ibishyimbo.

Imiryango igihumbi niyo yahawe ibirayi byavuye mu Murenge wa Kanama.

Abaturage ba Kanama batanze toni eshanu z’ibirayi

Abaturage bishimiye ubufasha bahawe na bagenzi babo

Abaturage igihumbi nibo bahawe ibirayi

Amabwiriza n’ingamba nshya zatangiye kubahirizwa kuri uyu wa 1 Kanama 2021, ateganya ko ibikorwa bitandukanye birimo iby’abikorera n’iby’inzego za leta bifunguye birimo ingendo zihuza Umujyi wa Kigali n’utundi turere.

CP Kabera kuri uyu wa Gatandatu yabwiye RBA ko n’ubwo ibikorwa bimwe na bimwe byakomorewe, abaturage bakwiye kumenya ko hari izindi ngamba ziriho kandi bagomba kuzubahiriza kuko icyorezo ntaho cyagiye.

Ati “Navuga ko bigikomeye kuko Covid-19 iracyahari. Gahunda ya Guma mu rugo abari bayirimo n’abari bari muri gahunda ya guma mu karere bumve ko kuba hari ibihindutse, bakaba bagiye gukora ibintu bitandukanye, bitavanyeho ko icyorezo kigihari cyangwa se ingamba zo kukirinda zivuyeho, ziracyahari, zahindutse gusa ariko ziracyahari kandi barasabwa kuzubahiriza.”

Yakomeje agira ati “Polisi iriteguye nk’ubusanzwe kugira ngo ibafashe, ariko turagira ngo tubabwire ko inshingano nyinshi ziri kuri bo kubera ko nibo ba mbere bagomba kwirinda, polisi ikagenzura ko bubahiriza amabwiriza.”

CP Kabera yavuze ko akenshi byagaragaye ko iyo ibihe bihindutse, hakavanwaho gahunda ya Guma mu rugo cyangwa guma mu karere, abantu bahita birara bakananirwa kubahiriza amabwiriza aba yashyizweho.

Ati “Iyo urenze ku mabwiriza, bishobora kukugiraho ingaruka ukarwara cyangwa ukaba wanabibazwa.”

Umuvugizi wa Polisi y’Igihugu yavuze ko abantu basabwa kwirinda kwitiranya ibintu, by’umwihariko ntibumve ko kuba ingendo zifunguye bivuze ko bajya gusura imiryango yabo iri hirya no hino kugira ngo bakore ubusabane.

Amabwiriza mashya ari kubahirizwa mu bice birimo Umujyi wa Kigali n’utundi turere umunani, yashyizweho n’Inama y’Abaminisitiri yo ku wa 30 Nyakanga 2021. Ni amabwiriza azamara ibyumweru bibiri aho yatangiye kubahirizwa ku wa 1 Kanama kugeza ku wa 15 Kanama 2021.

CP Kabera yavuze ko icyorezo cya Covid-19 ntaho cyagiye, bityo abaturage bakwiriye gukomeza kwitwararika

Muri uyu mwaka ibirori byo kuwizihiza ntabwo bizaba nk’uko byari bisanzwe ahubwo uzizihizwa hifashishijwe ikoranabuhanga mu rwego rwo kwirinda ikwirakwira ry’icyorezo cya Covid-19 gikomeje gukaza umurego mu Gihugu.

Nk’uko byagenze umwaka ushize n’ubundi ibikorwa byo kuwizihiza byabaye hifashishijwe ikoranabuhanga n’ibitangazamakuru, na bwo ni ko bizagenda.

N’ubwo abantu batazahurira hamwe ari benshi ngo basabane ariko hateganyijwe ibikorwa bitandukanye mu cyumweru cy’Umuganura.

Iki cyumweru gishobora no kurenga bitewe n’uko Abanyarwanda batuye mu mahanga hari ibikorwa bazajya bakora mu bihe bitandukanye bijyanye na wo kugera tariki ya 31 Kanama 2021.

Muri uyu mwaka ufite insanganyamatsiko igira iti: “Umuganura, isoko y’ubumwe n’ishingiro ryo kwigira”, ishingiye ku ndangagaciro z’umuco w’u Rwanda ari zo gukunda Igihugu, kurangwa n’ubupfura, gukunda umurimo n’ubumwe.

Abanyarwanda basabwe kuganuzanya

Ubusanzwe umunsi w’Umuganura warangwaga no kwishimira ibyagezweho no guhamya ingamba z’igihe kirekire.

Aha ni ho hashimwaga abakoze neza kurusha abandi ndetse abandi na bo bagasuzuma impamvu yaba yaratumye badatera imbere uko babyifuzaga, bagafata ibyemezo bigamije kugera ku musaruro ushimishije umwaka ukurikiyeho.

N’ubwo ari ibihe bidasanzwe ariko ubundi kwizihiza umunsi mukuru w’Umuganura wari umwanya mwiza wo gusabana kw’abayobora n’abayoborwa, inshuti n’abavandimwe, uwejeje n’utarejeje, bikagaragaza ubufatanye n’ubumwe bw’abagize umuryango nyarwanda.

Kuri iyi nshuro bitewe n’icyorezo cya Covid-19 gikomeje gutwara ubuzima bw’abatari bake hirya no hino ku Isi, Abanyarwanda basabwe kuzawizihiza bifatanya na bagenzi babo bashegeshwe na cyo.

Itangazo Inteko y’Umuco yashyize ahagaragara rigira riti “Mu guhangana n’ingaruka z’icyorezo cya Coronavirus, Abanyarwanda barakangurirwa gukomeza kugira umutima uzirikana abandi cyane cyane abo iki cyorezo cyagizeho ingaruka ntibabashe kugira icyo basarura aho bari babibye. Umutima uzirikana abandi ntusaba kuba ufite byinshi kandi uduke ufite twaramira udafite na mba kuko ubusabusa buruta ubusa gusa.”

Ibiganiro bijyanye no kwizihiza Umuganura bizanyuzwa mu bitangazamakuru bitandukanye kandi bikurikiranwe mu miryango y’Abanyarwanda bari mu Gihugu no mu mahanga.

Ibikorwa biteganyijwe mu cyumweru cy’Umuganura

Nk’uko bisanzwe mu cyumweru cy’Umuganura hategurwa ibiganiro mu ngeri zitandukanye bigamije gufasha abanyarwanda baba mu Rwanda no mu mahanga gusobanukirwa agaciro ko kwizihiza Umunsi Mukuru w’Umuganura.

Inteko y’Umuco yatangaje ko kwizihiza uyu munsi bizakorerwa mu miryango kandi abantu babana mu nzu akaba ari bo bawizihiriza hamwe, aho gutumira abanyamuryango bataba muri urwo rugo mu rwego rwo kwirinda ikwirakwira rya Covid-19.

N’ubwo icyumweru cyo kwizihiza uyu munsi gishobora kurenga ariko hari amatariki y’ingenzi y’ibikorwa bizakorwa.

Tariki ya 3 Kanama 2021: Ikiganiro n’Abanyarwanda baba mu mahanga kizakorwa mu buryo bw’ikoranabuhanga “Webex”. Ni ikiganiro kizibanda ku nsanganyamatsiko yo kwizihiza Umuganura uyu mwaka.

Tariki ya 5 Kanama 2021: Hateganyijwe Inama nyunguranabitekerezo ku Muganura no kwimakaza indangagaciro ziwukubiyemo. Iyi nama izagirwamo uruhare n’inzego n’inararibonye zinyuranye.

Tariki ya 6 Kanama 2021: Hari Ikiganiro Dusangire Ijambo kizatambuka kuri Televiziyo Rwanda ndetse na Radiyo Rwanda, kizatumirwamo Minisitiri w’Ubutegetsi bw’Igihugu, Minisitiri w’Urubyiruko n’Umuco n’umwe mu bayobozi ba Unity Club Intwararumuri.

Icyo kiganiro kizibanda ku gutanga ubutumwa bujyanye n’Umunsi w’Umuganura no gutanga ubutumwa bwo gutangiza ibikorwa byo kuganuza Abanyarwanda bagizweho ingaruka na Covid-19 , bigakorwa ku rwego rw’umuryango.

Mu bindi bikorwa bizakorwa kuri uwo munsi harimo kuganuza abahanzi ba muzika umusaruro wavuye mu bihangano byabo ku bufatanye bw’Inteko y’Umuco na RSAU (Rwanda Society of Authors) ndetse n’igikorwa cy’Umuganura muri gahunda ya E-itorero Indahanganwa cyateguwe na Komisiyo y’Igihugu y’Itorero. Unity Club Intwararumuri, ubwo izaba yizihiza imyaka 25 igiyeho, izagaragaza uruhare rwayo mu kuganuza Abanyarwanda ubumwe n’ubwiyunge.

Abanyarwanda bongeye kwibutswa ko kwizihiza Umuganura ari umwanya mwiza wo kwishimira uburyo Leta y’u Rwanda iha agaciro abaturage kandi ikanafasha buri wese kugira ubuzima buzira umuze.

Ni umwanya kandi wo gufatanyiriza hamwe gukomeza urugendo rw’iterambere Abanyarwanda batangiye, bahuriza hamwe imbaraga mu miryango mu kwirinda icyahungabanya ubuzima bwa buri wese.

Ku munsi w’Umuganura Abanyarwanda basangira ibyo bejeje, abana bagahabwa umwanya wihariye

Mbere ya COVID-19 uyu munsi wizihizwaga mu birori bikomeye

Abanyamahanga basura u Rwanda n’abarutuyemo nabo ntibibagirana ku munsi w’Umuganura

Umusaruro w’amata ni umw mu byishimirwa ku munsi w’Umuganura

Mbere y’iki cyorezo, ibirori by’Umunsi w’Umuganura byitabirwaga n’abayobozi bakuru b’Igihugu, aha Minisitiri w’Intebe, Edouard Ngirente yari ari kumwe na Senateri, Espérance Nyirasafari

Umunsi w’Umuganura wakunze kurangwa no gusangira imyaka Abanyarwanda bejeje

Iki kigo kivuga ko uducuramo ari zimwe mu nyamaswa zigira uruhare rukomeye mu rusobe rw’ibinyabuzima kuko dusakaza imbuto, tugafasha mu kurwanya udukoko twona ndetse no kororoka kw’ibimera.

Nubwo bimeze gutya ariko Rwanda Wildlife Conservation Association igaragaza ko uducurama ari zimwe mu nyamaswa zifite ibyago byo gukendera kuko abantu bagenda bangiza aho tuba ndetse bakanatwirukana kubera imyumvire itandukanye badufiteho.

Mu bushakashatsi iki kigo cyakoze kuva mu 2018 kivuga ko cyasanze hirya no hino mu Rwanda habarizwa uducurama two mu bwoko bw’uturya imbuto tuzwi nka Eidolon helvum turenga 54,581, hakwiyongeraho n’utwo mu bundi bwoko tukagera ku bihumbi 70 gusa ngo utu twose turi mu byago kuko ibiti dukunzemo kubamo bigenda bitemwa.

Nyuma yo kubona ibi, iki Kigo cyatangije ubushakashatsi bukubiyemo n’ubukangurambaga mu rwego rwo kumvisha abaturage akamaro ku ducurama.

Akarere ka Ruhango nka kamwe mu tubarizwamo uducurama twinshi ni kamwe mu twakorewemo ubu bukangurambaga kuko byagaragaye ko hari abaturage bagenda batema ibiti tubamo.

Umwe mu batuye hafi y’ahaba utu ducurama mu karere ka Ruhango Jean Bosco Umuhoza yabwiye Deutsche Welle ko uducurama tubabangamira ariyo mpamvu batwirukana.

Ati “Urabona ko ubu twajyaga mu mirima y’abantu tukona, turatwirukana ariko sinzi impamvu nanjye uducarama tutajya tuva aha hantu.”

Umukozi ushinzwe umushinga wo kubungabunga uducurama muri Rwanda Wildlife Conservation Association, Marie Claire Dusabe yavuze ko ubu bushakashatsi n’ubukangurambaga bugamije kumvisha abantu akamaro k’uducurama.

Ati “Ubushakashatsi twabutangiye mu 2018 muri Gashyantare tugira ngo tugaragaze umumaro w’uducurama hanyuma tubashe guhamagarira abaturage badufashe kububungabunga.”

Yakomeje avuga ko Abanyarwanda basanzwe bafite imyumvire itariyo k’uducurama, yemeza ko yarushijeho kwiyongera muri iki gihe cya COVID-19 kuko bumvaga ko dushobora kuyibanduza.

Ati “Bitewe n’imyumvire ihari yo kumva ko dutera COVID-19 abantu bose bumva ko turi guteza ibibazo, abafite ibiti birimo ubucurama barabitema, abaturanye nabwo bakabwirukana niba igisimba kiri mu byago byo gukendera kikaba kiri kwamaganwa gutyo kuki kitagera aho kigakendera.”

“Ubundi ubucurama busanzwe bufitweho imyumvire itari myiza bitewe n’ibintu byinshi bitandukanye, abantu bamwe barabutinya bakumva ko bushoboraa kuba bwabanduza indwara, na mbere y’uko COVID-19 abantu bari basanzwe babufiteho imyumvire itari myiza, rero aho yaziye ibintu byabaye bibi kurushaho. Hari indiri zatwo nyinshi aho ibiti byagiye bitemwa nka Camp Kigali, Rwamagana n’i Nyanza.”

Rwanda Wildlife Conservation Association ivuga ko Abanyarwanda badakwiye bakwiye kumva ko uducurama ari inyamaswa bashobora kubana nayo amahoro igihe birinze kudusagarira.

Ikigo kirengera inyamaswa zo mu gasozi cyasabye Abanyarwanda kudasagarira uducurama baduhora kubanduza indwara

Ubwo Polisi yabageragaho, abafatiwe mu Murenge wa Kimironko bari mu birori bari batumiwemo n’uwitwa Charles Muzahura wari wabatumiye kugira ngo yerekane umukunzi we bateganya kubana, batandatu muri bo bakaba barasanzwe muri pisine (Swimming pool) barimo koga mu gihe bagenzi babo 13 bari bateje urusaku bacuranga imiziki ndetse barimo no kunywa inzoga.

Abandi 6 bafatiwe mu Murenge wa Kacyiru mu rugo rw’uwitwa Rwandarushya Aimable uzwi nka Nameless bari mu birori byo kwishimira ko igitangazamakuru cy’uyu Rwandarushya cyujuje umubare w’abantu miliyoni bagikurikira.

Umunyarwenya Niyonkuru Clinton uzwi nka Zaba Missed Call, yemera ko bakoze amakosa kandi bagakwiye kuba babera abandi urugero.

Ati “Twagakwiye kuba tubera urugero abandi, ariko twabirenzeho, turasaba imbabazi abafana bacu n’abakunzi ba comedy muri rusange kandi tunabasaba kutadohoka bagakomeza kubahiriza amabwiriza yo kwirinda covid-19”.

Mugenzi we witwa Kwizera Martin uzwi nka Afande, avuga ko n’ubwo aho bafatiwe ari ho basanzwe baba ariko kuba hari hatumiwe abandi byatumye barenga ku mabwiriza yo kwirinda Covid-19.

Ati “Twakuyemo isomo rikomeye rigiye gutuma turushaho kwirinda kandi tunakangurira buri wese kwirinda Covid-19”.

Polisi ivuga ko itazihanganira abarenga ku mabwiriza yo kwirinda Covid-19

Umuvugizi wa Polisi wungirije, Chief Superintendent of Police (CSP) Sendahangarwa Africa Apollo, avuga ko Polisi ishinzwe kurinda abantu kandi ari bazima ari na ho yahereye yemeza ko abarenga ku mabwiriza batazihanganirwa.

Ati “Polisi ishinzwe kurinda abantu n’ibyabo kandi abo bantu bagomba kuba ari bazima, abantu nka bariya barimo gushaka gutiza umurindi ikwirakwira rya Covid-19 ntabwo bazihanganirwa. Ntabwo ari ikibazo cy’ibihano bahabwa ahubwo abantu bumve ko iki cyorezo cyica yaba umuto cyangwa umukuru, uwo cyitishe kiramuzahaza”.

Uretse aba banyarwenya, ku wa Gatanu tariki 30 Nyakanga 2021, Polisi yerekanye abahanzi barimo Ruhumuriza James uzwi nka King James, K8 Kavuyo, hamwe na Uwimbabazi Shadia uzwi nka Shaddyboo wamamaye cyane ku mbuga nkoranyambaga bafatiwe mu Karere ka Rutsiro bakurikiranyweho kurenga ku mabwiriza yo kwirinda Covid-19.

Abafatiwe muri Kimironko i Kibagabaga ni uku byari byifashe

Bamwe bari muri iyi pisine