Webrwanda Backend

Author: webrwanda

  • Iradukunda umaze imyaka 18 mu Rwanda, arifuza guhabwa ubwenegihugu – #rwanda #RwOT

    Avuga ko yageze mu Rwanda afite imyaka irindwi, ahagejejwe na nyirasenge wari umukuye i Burundi nyina amaze gupfa. Icyo gihe nyirasenge ngo yari azanywe mu Rwanda no gupagasa ariko ntiyari inshuro ya mbere.

    Akigera mu Rwanda nta mahirwe yagize yo kurerwa na Nyirasenge ahubwo yagiye amushyira mu miryango itandukanye kubera ko nta bushobozi yari afite bwo kumwitaho bihagije.

    Mu buhamya bwe, Iradukunda avuga ko Nyirasenge yaje gusubira i Burundi atabizi amakuru y’uko yagezeyo ayamenya nyuma.

    Uyu mugore kuri ubu yashakanye na Uzabakiriho Jonas uvuka mu Kagari ka Nyinya, Umurenge wa Rukira mu Karere ka Ngoma, bakaba ari na ho batuye n’umwana wabo ugiye kuzuza umwaka.

    Urukundo rwabo rutangira bombi bari baziranye. Uzabakiriho yari azi neza inkomoko ya Iradukunda ndetse na Nyirasenge [wa Iradukunda] yari yaramenye ko bakundana mbere y’uko ajya mu Nkambi ya Mahama, aho yakomereje asubira i Burundi.

    Kugeza igihe yashakiye [binyuze mu nzira zitemewe n’amategeko], yari atarabasha kugira icyangombwa na kimwe kimuranga kandi ni na ko bikimeze n’uyu munsi.

    Ubwo bombi bashakaga gusezerana mu idini ndetse no mu mategeko, babwiwe n’inzego z’ibanze ko bidashoboka keretse Iradukunda abonye indangamuntu nk’Umunyarwandakazi cyangwa agasubira iwabo agahabwa ikimuranga.

    Yibuka ko Nyirasenge yamubwiye ko ari muri Komini Giteranyi (Intara ya Muyinga) ariko ngo ntiyamenya icyerekezo.

    Ati “Sinteganya kujyayo kuko sinahamenya. Ikindi usibye amakuru namenye ko masenge yasubiyeyo nta kindi nigeze menya kubera ko tutavugana. Ariko iki kibazo kirankomereye kuko ntagira aho mbarizwa. Nifuza ko nabona indangamuntu nkagira uburenganzira nk’ubw’abandi baturage. Sinshobora kuvurwa muri mituweli, gusezerana n’umugabo na byo byaranze.”

    Uzabakiriho Jonas na we avuga ko ikibazo cy’umugore we kitamworoheye. Ati “Nanjye iki kibazo kirankomereye. Twakundanye muzi neza kuko yari yaranyibwiye. Mbere y’uko tubana twagiye mu buyobozi ngo turebe ko badufasha tugasezerana ariko biranga. Icyo twifuza ni indangamuntu ngo na we agire uburenganzira mu gihugu kuko nk’uko iyo arwaye mwishyurira 100% nk’umunyamahanga kuko ntiyemerewe kuvurirwa kuri mituweli.”

    Umunyamabanga Nshingwabikorwa w’Umurenge wa Rukira, Laurent Muvandimwe Mbonigaba, yavuze iki kibazo akimenye vuba. Yavuze ko nibasuzuma bagasanga umugabo w’uyu mugore afite ubwenegihugu bashobora kubishingiraho bakabusabira n’umugore we.

    Itegeko Ngenga no 002/2021.OL ryo ku wa ku wa 16/07/2021 rigenga ubwenegihugu Nyarwanda ryasohotse mu igazeti ya Leta ku wa 28 Nyakanga 2021, riteganya ibishingirwaho kugira ngo umuntu ahabwe ubwenegihugu butangwa.

    Ingingo ya 16 y’iri tegeko ngenga ivuga ko umuntu ashobora gusaba ubwenegihugu Nyarwanda butangwa hashingiwe ku kuba mu Rwanda. Mu bishingirwaho hakaba harimo kuba ubisaba amaze nibura imyaka cumi n’itanu aba mu Rwanda kandi ari ku butaka bw’u Rwanda mu buryo bwemewe n’amategeko ku munsi w’ubusabe.

    Na none umuntu ashobora gusaba ubwenegihugu Nyarwanda butangwa hashingiwe ku kuba ari umwimukira iyo yimukiye mu Rwanda ku mpamvu z’imibereho, iza politiki cyangwa iz’ubukungu. Ashobora no kuba akomoka ku muntu wimukiye mu Rwanda ku mpamvu z’imibereho nk’uko bigenwa mu ngingo ya 18 y’iri tegeko.

    Umuntu utagira ubwenegihugu na we ashobora kubusabirwa hashingiwe ku kuba ari ku butaka bw’u Rwanda ku munsi w’ubusabe no kuba atahungabanya umutekano w’Igihugu.

    Uzabakiriho Jonas n’umugore we Iradukunda Médiatrice hamwe n’umwana wabo

  • Abakozi ba Afrimax TV bafashwe barenze ku mabwiriza yo kwirinda COVID-19 (Video) – #rwanda #RwOT

    Aba bantu berekanywe kuri iki Cyumweru tariki 1 Kanama 2021 kuri Sitasiyo ya Polisi i Nyamirambo mu Mujyi wa Kigali mu murenge wa Rwezamenyo.

    Abafashwe barimo umuyobozi wa Afrimax Tv uzwi nka Nameless Camposs wamenyekanye akora amashusho y’indirimbo, umunyarwenya Zaba Missed Call; uwitwa Yezu, Afande cyangwa Regis ndetse n’abandi bantu bari mu birori bya mugenzi wabo washakaga kwereka bagenzi be umukobwa benda kurushinga.

    Mu kiganiro n’itangazamakuru, Nameless Camposs yabwiye itangazamakuru ko kugira ngo bafatwe byaturutse ku mashusho basakaje bari kwishimira ko bujuje miliyoni imwe y’ababakurikira kuri Afrimax mu ishami ry’Icyongereza.

    Ati “Ntabwo twafashwe ahubwo ni amashusho yacu yagaragaye turi mu birori. Abantu twari kumwe mu nzu bake niko twakatanye umutsima. Turi benshi hari abatari bahari ariko abo twari kumwe nibo twafatanyije muri ibyo byishimo cyane ko dufite ikipe y’abantu dukorana mu rugo.”

    “Icyo navuga ni uko dusaba imbabazi. Iyo turi muri guma mu rugo turebamo ab’ingenzi. Abo twari kumwe bari abantu duhorana buri munsi.”

    Yabajijwe niba atari isura mbi ku bantu bazwi bakomeje kugenda berekanwa barenze ku mabwiriza, avuga ko ibintu byababayeho bitatwarwa mu cyiciro cy’ibyamamare ahubwo byavugwa nk’ibyabaye ku muntu ku giti cye.

    Ati “Ntabwo ibi bintu biba kubera ko umuntu azwi. Ni ibintu bibaho ku giti cy’umuntu. N’abantu basanzwe byababaho. Ubutumwa natanga ku bantu ni ukwirinda kuko COVID-19 irahari. Ubutumwa natanga ni uko twakurikiza amabwiriza.”

    Umuvugizi wungirije wa Polisi y’u Rwanda, Chief Inspector of Police (CSP) Africa Apollo Sendahangarwa, yavuze ko bashimira abaturage batanga amakuru y’abarenze ku mabwiriza yo kwirinda, anenga abatayubahiriza.

    Ati “Twafashe abantu bari barenze ku mabwiriza benshi muri bo bari muri za house party. Aba bantu bafashwe ejo nimugoroba. Aba mbere ba Afrimax bari bagize miliyoni y’ababakurikira kuri YouTube, abandi ni abantu benshi cyane bari bakoze ibirori banarenga ku ibwiriza bajya kogera muri piscine. Icyo dushima ni uko abaturage aribo baba batanze amakuru. Twashatse kuberekana ngo bisubireho kuko imyitwarire nk’iyi nikomeza tutazatsinda icyorezo.”

    Yavuze ko ikintu bagamije atari uguhana abantu ahubwo ari ugukomeza gukora ubukangurambaga ngo abantu birinde kuko Coronavirus idatoranya.

    Ati “Ikigamijwe si uguhana ahubwo ni ukugira ngo icyorezo gicike. Guhana ni byiza ariko tugendeye no ku bindi byaha ntabwo turabona icyaha cyacitse kubera ko gifite igihano kiremereye. Icya mbere ni ukwigisha abantu.”

    Aba bafashwe nyuma y’aho ku wa 29 Nyakanga 2021, Polisi y’u Rwanda yafashe ibindi byamamare birimo Ruhumuliza James uzwi nka King James, Muhire William (K8 Kavuyo) na Mbabazi Shadia uzwi nka Shaddyboo, bafatiwe i Rutsiro barenze ku mabwiriza yo kwirinda Covid-19.

    Zaba Missed Call ari mu bafashwe barenze ku mabwiriza yo kwirinda Coronavirus

    Uyu musore asanzwe akina ari afande mu rwenya runyuzwa kuri YouTube

  • Umuganura ugiye kongera kuba mu bihe bidasanzwe, Abanyarwanda basabwe kuganuza abaturanyi babo – #rwanda #RwOT

    Muri uyu mwaka ibirori byo kuwizihiza ntabwo bizaba nk’uko byari bisanzwe ahubwo uzizihizwa hifashishijwe ikoranabuhanga mu rwego rwo kwirinda ikwirakwira ry’icyorezo cya Covid-19 gikomeje gukaza umurego mu Gihugu.

    Nk’uko byagenze umwaka ushize n’ubundi ibikorwa byo kuwizihiza byabaye hifashishijwe ikoranabuhanga n’ibitangazamakuru, na bwo ni ko bizagenda.

    N’ubwo abantu batazahurira hamwe ari benshi ngo basabane ariko hateganyijwe ibikorwa bitandukanye mu cyumweru cy’Umuganura.

    Iki cyumweru gishobora no kurenga bitewe n’uko Abanyarwanda batuye mu mahanga hari ibikorwa bazajya bakora mu bihe bitandukanye bijyanye na wo kugera tariki ya 31 Kanama 2021.

    Muri uyu mwaka ufite insanganyamatsiko igira iti: “Umuganura, isoko y’ubumwe n’ishingiro ryo kwigira”, ishingiye ku ndangagaciro z’umuco w’u Rwanda ari zo gukunda Igihugu, kurangwa n’ubupfura, gukunda umurimo n’ubumwe.

    Abanyarwanda basabwe kuganuzanya

    Ubusanzwe umunsi w’Umuganura warangwaga no kwishimira ibyagezweho no guhamya ingamba z’igihe kirekire.

    Aha ni ho hashimwaga abakoze neza kurusha abandi ndetse abandi na bo bagasuzuma impamvu yaba yaratumye badatera imbere uko babyifuzaga, bagafata ibyemezo bigamije kugera ku musaruro ushimishije umwaka ukurikiyeho.

    N’ubwo ari ibihe bidasanzwe ariko ubundi kwizihiza umunsi mukuru w’Umuganura wari umwanya mwiza wo gusabana kw’abayobora n’abayoborwa, inshuti n’abavandimwe, uwejeje n’utarejeje, bikagaragaza ubufatanye n’ubumwe bw’abagize umuryango nyarwanda.

    Kuri iyi nshuro bitewe n’icyorezo cya Covid-19 gikomeje gutwara ubuzima bw’abatari bake hirya no hino ku Isi, Abanyarwanda basabwe kuzawizihiza bifatanya na bagenzi babo bashegeshwe na cyo.

    Itangazo Inteko y’Umuco yashyize ahagaragara rigira riti “Mu guhangana n’ingaruka z’icyorezo cya Coronavirus, Abanyarwanda barakangurirwa gukomeza kugira umutima uzirikana abandi cyane cyane abo iki cyorezo cyagizeho ingaruka ntibabashe kugira icyo basarura aho bari babibye. Umutima uzirikana abandi ntusaba kuba ufite byinshi kandi uduke ufite twaramira udafite na mba kuko ubusabusa buruta ubusa gusa.”

    Ibiganiro bijyanye no kwizihiza Umuganura bizanyuzwa mu bitangazamakuru bitandukanye kandi bikurikiranwe mu miryango y’Abanyarwanda bari mu Gihugu no mu mahanga.

    Ibikorwa biteganyijwe mu cyumweru cy’Umuganura

    Nk’uko bisanzwe mu cyumweru cy’Umuganura hategurwa ibiganiro mu ngeri zitandukanye bigamije gufasha abanyarwanda baba mu Rwanda no mu mahanga gusobanukirwa agaciro ko kwizihiza Umunsi Mukuru w’Umuganura.

    Inteko y’Umuco yatangaje ko kwizihiza uyu munsi bizakorerwa mu miryango kandi abantu babana mu nzu akaba ari bo bawizihiriza hamwe, aho gutumira abanyamuryango bataba muri urwo rugo mu rwego rwo kwirinda ikwirakwira rya Covid-19.

    N’ubwo icyumweru cyo kwizihiza uyu munsi gishobora kurenga ariko hari amatariki y’ingenzi y’ibikorwa bizakorwa.

    Tariki ya 3 Kanama 2021: Ikiganiro n’Abanyarwanda baba mu mahanga kizakorwa mu buryo bw’ikoranabuhanga “Webex”. Ni ikiganiro kizibanda ku nsanganyamatsiko yo kwizihiza Umuganura uyu mwaka.

    Tariki ya 5 Kanama 2021: Hateganyijwe Inama nyunguranabitekerezo ku Muganura no kwimakaza indangagaciro ziwukubiyemo. Iyi nama izagirwamo uruhare n’inzego n’inararibonye zinyuranye.

    Tariki ya 6 Kanama 2021: Hari Ikiganiro Dusangire Ijambo kizatambuka kuri Televiziyo Rwanda ndetse na Radiyo Rwanda, kizatumirwamo Minisitiri w’Ubutegetsi bw’Igihugu, Minisitiri w’Urubyiruko n’Umuco n’umwe mu bayobozi ba Unity Club Intwararumuri.

    Icyo kiganiro kizibanda ku gutanga ubutumwa bujyanye n’Umunsi w’Umuganura no gutanga ubutumwa bwo gutangiza ibikorwa byo kuganuza Abanyarwanda bagizweho ingaruka na Covid-19 , bigakorwa ku rwego rw’umuryango.

    Mu bindi bikorwa bizakorwa kuri uwo munsi harimo kuganuza abahanzi ba muzika umusaruro wavuye mu bihangano byabo ku bufatanye bw’Inteko y’Umuco na RSAU (Rwanda Society of Authors) ndetse n’igikorwa cy’Umuganura muri gahunda ya E-itorero Indahanganwa cyateguwe na Komisiyo y’Igihugu y’Itorero. Unity Club Intwararumuri, ubwo izaba yizihiza imyaka 25 igiyeho, izagaragaza uruhare rwayo mu kuganuza Abanyarwanda ubumwe n’ubwiyunge.

    Abanyarwanda bongeye kwibutswa ko kwizihiza Umuganura ari umwanya mwiza wo kwishimira uburyo Leta y’u Rwanda iha agaciro abaturage kandi ikanafasha buri wese kugira ubuzima buzira umuze.

    Ni umwanya kandi wo gufatanyiriza hamwe gukomeza urugendo rw’iterambere Abanyarwanda batangiye, bahuriza hamwe imbaraga mu miryango mu kwirinda icyahungabanya ubuzima bwa buri wese.

    Ku munsi w’Umuganura Abanyarwanda basangira ibyo bejeje, abana bagahabwa umwanya wihariye

    Mbere ya COVID-19 uyu munsi wizihizwaga mu birori bikomeye

    Abanyamahanga basura u Rwanda n’abarutuyemo nabo ntibibagirana ku munsi w’Umuganura

    Umusaruro w’amata ni umw mu byishimirwa ku munsi w’Umuganura

    Mbere y’iki cyorezo, ibirori by’Umunsi w’Umuganura byitabirwaga n’abayobozi bakuru b’Igihugu, aha Minisitiri w’Intebe, Edouard Ngirente yari ari kumwe na Senateri, Espérance Nyirasafari

    Umunsi w’Umuganura wakunze kurangwa no gusangira imyaka Abanyarwanda bejeje

  • Menya ibikubiye mu ruzinduko rwa Perezida wa Tanzania Samia Suluhu mu Rwanda #Rwanda #RwOT via @kigalitoday #rwanda #RwOT

    Samia Suluhu Hassan
    Samia Suluhu Hassan

    Biteganyijwe ko kuri uyu wa Mbere tariki 02 Kanama 2021 akigera mu Rwanda yakirwa na Perezida Kagame muri Village Urugwiro, ndetse bagirane n’ibiganiro.

    Baraganira kandi n’itangazamakuru, bashyire n’umukono ku masezerano ahuriweho n’ibihugu byombi u Rwanda na Tanzania.

    Ku mugoroba wo kuri uyu wa Mbere, Perezida Kagame arakira mugenzi we wa Tanzania Suluhu Hassan ndetse n’abamuherekeje ku meza mu nyubako ya Kigali Convention Centre.

    Biteganyijwe ko ku wa Kabiri tariki 03 Kanama 2021 Perezida Kagame na Perezida Suluhu Hassan bazasura amakompanyi atandukanye harimo n’akorera mu cyanya cyahariwe inganda (Special Economic Zone) ahakorera amakompanyi abarirwa mu 120. Ibikorerwa muri iki cyanya bigira uruhare rukomeye mu guteza imbere ibyoherezwa mu mahanga no gutanga imirimo, dore ko cyatumye hahangwa imirimo ibihumbi cumi na bitatu (13.000).

    Perezida Samia Suluhu Hassan yatangiye kuyobora Tanzania muri Werurwe uyu mwaka wa 2021 asimbuye Dr. John Pombe Magufuli wari umaze kwitaba Imana, icyakora n’ubundi Samia Suluhu akaba yari asanzwe yungirije Magufuli.

  • #COVID19: Abantu 13 bitabye Imana, abanduye bashya ni 648 #Rwanda #RwOT via @kigalitoday #rwanda #RwOT

    Iyo Minisiteri itangaza kandi ko kuri uwo munsi abasezerewe mu bitaro ari 19 mu gihe ababyinjiyemo bashya ari 24, abarembye ni 56.

  • Umusimbura wa Usain Bolt mu kwiruka metero 100 mu mikino Olempike yabonetse #rwanda #RwOT

    Guhera 2008 kugeza 2016,umunya Jamaica Usain Bolt niwe wegukanaga uyu mudali mu mikino Olempike ndetse no muri shampiyona z'isi zimwe na zimwe gusa yaje gusezera isi isigara yibaza uzamusimbura.

    Impaka zari nyinshi mu binyamakuru aho benshi bahaga amahirwe uwitwa Christian Coleman waje kwivangira yanga kwipimisha ibiyobyabwenge bituma ahagarikwa mu mikino Olempike y'uyu mwaka.

    Uyu mugabo wari ufite ibihe byiza mu mikino y'isi ya Doha aho muri 100m yakoresheje amasegonda 9,70 yashyizwe ku ruhande umupira usigarana abarimo Andre de Grasse,Akani Simbini Justin Gatlin n'abandi.

    Kuri iki cyumweru benshi bashyize amatsiko kuko Umutaliyani utari witezwe na benshi Lamont Marcell Jacobs w'imyaka 26 yasize bariya bagenzi be yegukana uyu mudali wa zahabu wa metero 100 ukundwa na benshi.

    Jacobs yakoresheje amasegonda 9.80 mu gihe Fred Kerley wamukurikiye yakoresheje 9.84. Andre de Grasse, wari wabaye uwa 3 mu mikino ya olempike 2016 I Rio yakoresheje 9.89.

    Uyu Jacobs yavukiye muri USA yari mu karongo ka 3 yaje gukoresha neza imbaraga ze asiga bagenzi be birangira aguye mu maboko ya Gianmarco Tamberi,mwene wabo w'Umutaliyani wari umaze gutwara umudali wa zahabu mu gusimbuka urukiramende [high jump] barishimana.

    Guhera I Anthens mu bugereki muri 2004,iyi niyo mikino ya Olempike ya mbere ikinwe nta kizigenza Bolt kuko yakinnye iya Beijing, London na Rio de Janeiro, yose ayitwaramo imidali ya 100 na 200 m 6 muri ibyo byiciro.

    Nibwo bwa mbere mu mikino ya Olempike ku mukino wa nyuma wa 100m habuze umunya Jamaica byaherukaga muri 2000 I Sydney.Uwagombaga kuhagera ni Yohan Blake ariko yasezerewe muri ½ cy'irangiza.

    Ku munsi w'ejo,mu gusiganwa 100m mu bagore,imidali yose yegukanwe n'abanya Jamaica uhereye kuri Elaine Thompson Herad wegukanye zahabu akoresheje amasegonda 1o,61, Shelly-Ann Fraser-Pryce, yatwaye silver ku masegonda 10.74 naho Shericka Jackson aba uwa 3 akoresheje amasegonda 10.76.

    Kugeza ubu,igihugu cy'Ubushinwa nicyo kiyoboye ku midali myinshi kuko gifite zahabu 24,silver 14,Bronze 13.USA ni iya 2 aho ifite zahabu 20,silver 23 na Bronze 16.Ubuyapani bufite zahabu 17 mu gihe Australia ifite zahabu 14.

    Umukinnyi mwiza kurusha abandi bose muri iyi mikino Olempike n'Umunyamerika w'umuhanga cyane mu koga witwa Caeleb Dressel w'imyaka 24,umaze gutwara imidali 5 ya zahabu n'umwe wa Silver aho amarushanwa yose yakinnye yabaye uwa mbere.

    Uwa kabiri n'umukobwa w'umunya Australia nawe w'umuhanga cyane mu koga,Emma Mckeon w'imyaka 27, ufite zahabu 4 na Bronze 3.


    Source : https://umuryango.rw/imyidagaduro/imikino/article/umusimbura-wa-usain-bolt-mu-kwiruka-metero-100-mu-mikino-olempike-yabonetse

  • 🔴 LIVE: IGITARAMO 26: Intambwe 4 ziranga Umukristo w’ukuri || Ev. Adda Darlene K. #rwanda #RwOT

    Source : https://agakiza.org/????-LIVE-IGITARAMO-26-Intambwe-4-ziranga-Umukristo-w-ukuri-Ev-Adda-Darlene-K-8240.html

  • RIB yataye muri yombi Baba banyeshuri barangije ikizami cya Leta bagatwika ibikoresho #rwanda #RwOT

    Aba banyeshuri biga muri Esecom Rugano TVET School, bakoze igisa n’imyigaragambyo kuri uyu wa Kane tariki ya 29 Nyakanga 2021, Saa mbili n’igice z’umugoroba. Batwika ibitanda by’ishuru, bamenagura ibirahure banasenya uruzitiro rw’aho bararaga (dortoire) bishimira ko bari gusoza ibizamini bya Leta.

    Iri shuri riherereye mu Karere ka Ngororero, Umurenge wa Hindiro, Akagari ka Gatega mu Mudugudu wa Kagarama.

    Kuri uyu wa Gatandatu, tariki ya 31 Nyakanga 2021, RIB yataye muri yombi batanu bakekwaho kugira uruhare muri ibi bikorwa barimo babiri bafite imyaka 21, uwa 25, 18 n’uw’imyaka 20 bivugwa ko ari we watanze ikibiriti.

    Ibyaha bakurikiranweho ni ukwangiza cyangwa konona ikintu cy’undi gihanwa n’ingingo ya 186 mu itegeko ritegenya ibyaha n’ibihano muri rusange.

    Iri tegeko riteganya ko uhamijwe n’urukiko icyo cyaha ahanishwa igifungo kitari munsi y’amezi abiri ariko kitagenze amezi atandatu n’ihazabu y’amafaranga y’u Rwanda atari atari munsi y’ibihumbi 300 ariko atarenze ibihumbi 500 cyangwa kimwe gusa muri ibyo bihano.

    Bakurikiranyweho kandi icyaha cyo gusenya cyangwa konona inyubako ku bushake utari nyirayo gihanwa n’ingingo ya 182 y’iryo tegeko.

    Ku wagihamijwe n’inkiko ahanishwa igifungo kitari munsi y’imyaka itatu ariko kitarenze imyaka itanu n’ihazabu y’amafaranga y’u Rwanda atari munsi ya miliyoni eshatu ariko atarenze miliyoni eshanu.

    Nubwo aba banyeshuri bafashwe ariko amakuru dukesha IGIHE ni uko hari undi munyeshuri uri no mu bakekwaho gutangiza iyo nkongi kuko ari we wabanje gucana igitanda, kugeza ubu utaratabwa muri yombi.

    Umuvugizi wa RIB Dr. Murangira B.Thierry yatangaje ko n’abanyeshuri ari nk’abandi baturage bose imbere y’amategeko cyane ko baba bangiza ibikorwa rusange n’abandi bashobora kuzakoresha mu gihe kizaza.

    Ati 'Abanyeshuri ni kimwe n’abandi bose, na bo amategeko arabareba mu byerekeye kubaha aho bari n’ibikoresho bakoresha. Ntabwo bikwiye ngo kuko warangije ishuri ugomba gufata ibyo warayeho, ibitanda na matela ukabyangiza, ukamena ibirahure by’amashuri kuko ayo mashuri n’abandi baba bagomba kuzayigiramo. Rero nk’uko wayasanze ugomba kuyasiga ameze neza'

    Yasabye ko abanyeshuri badakwiye kwitwaza ko barangije amashuri bagakora ibikorwa bigize ibyaha.

    Ati 'Ntabwo ari byo kandi ntibikwiye. Ni utuntu turi kugenda tugaragara ku banyeshuri ngo barangije bakangiza, bakanakora ibikorwa bigize ibyaha.'

    Kugeza ubu aba banyeshuri bafungiye kuri Sitasiyo ya RIB ya Ngororero mu gihe iperereza rigikomeza.

    RIB iributsa buri muntu wese ko itazihanganira uwo ari we wese uzafatwa yakoze ibyaha nk’ibi inibutsa abantu kubyirinda kuko ari ibyaha bihanwa n’amategeko.

    Source : https://imirasire.com/?RIB-yataye-muri-yombi-Baba-banyeshuri-barangije-ikizami-cya-Leta-bagatwika

  • Rwanda: umunyeshuri uherutse gukora ikizamini cya Leta mu yisumbuye yasanzwe yitabye Imana. – YEGOB #rwanda #RwOT

    Mu gitondo cyo kuri iki Cyumweru ariki ya 01 Kanama 2021, nibwo umunyeshuri wari usoje icyiciro cya mbere cy'amashuri yisumbuye (tronc Commun) yasanzwe hejuru yikirundo cy'amatafari yitabye Imana. Ibi byabereye mu murenge wa Gitambi, mu Kagari ka Hangabashi ho mu Karere ka Rusizi.

    Umuseke dukesha aya makuru uvuga ko magingo aya hataramenyekana impamvu uyu musore w'imyaka 17 y'amavuko yaraye hejuru y'amatafari arimo umuriro,ariyo ntandaro y'urupfu rwe.

    Amakuru avuga ko uwo nyakwigendera ku munsi w'ejo ku italiki ya 31 Nyakanga yari kimwe na ba nyiri aya matafari ari bo Uzayisenga Gaston na Hagenimana Eliazard yaje kubasaba akazi ko kugihoma bamubwira ko azagaruka mu gitondo.

    Ubwo ngo cya kirundo cy'amatafari bagishyizemo umuriro bagamije kuyatwika.

    Bamaze gutaha nibwo wa musore yacyuriye akoresheje urwego ku mpamvu zitaramenyekana, baje kugisura mu gitondo bamusanga hejuru yacyo yanegekaye, bamujyana mu Kigo Nderabuzima cya Mashesha, ahagera yapfuye.

    Umurambo we wajyanywe mu Bitaro bya Mibirizi kugira ngo ukorerwe isuzuma.

    Ubuyobizi bw'Umurenge wa Gitambi bwemeje iby'aya makuru, buvuga ko byamenyekanye mu gitondo.Busaba ababyeyi kujya baba hafi y'abana babo, ndetse gugasaba abana kwitwararika ikibazo bafite bakakibwira ababyeyi babo.

    Iyakaremye Jean Pierre Umunyamabanga Nshingwabikorwa w'Umurenge wa Gitambi, yagize ati 'Ayo makuru ni yo twayamenye mu gitondo saa moya n'igice, bitekerezwa ko uriya musore yaraye hejuru y'amatafari, basanze ameze nabi amaraso yamushizemo.'

    Yakomeje avuga ko amakuru ubuyobozi bufite ari uko nta kibazo umwana yari afite, nta n'icyo yari afitanye n'ababyeyi be.

    Yakomeje agira ati 'Mu gihe nta rindi perereza rirakorwa ngo ryerekane ibitandukanye na byo, n'uko byagenze, muri ibi bihe by'ibiruhuko turasaba ababyeyi kuba hafi y'abana babo, abana na bo.'

    Source : https://yegob.rw/rwanda-umunyeshuri-uherutse-gukora-ikizamini-cya-leta-mu-yisumbuye-yasanzwe-yitabye-imana/

  • Noneho Kwipimisha Covid-19 byashyizwe kugiciro cyoroheye buri wese #rwanda #RwOT

    Izi mpinduka zije nyuma y’iminsi inzego z’ubuzima mu Rwanda zitangaje ko ziri kwiga ku kugabanya igiciro cyo kwipimisha kugira ngo abaturage benshi bajye babasha kumenya uko bahagaze bitagoranye.

    Uyu mwanzuro kandi usa n’uje koroshya ishyirwa mu bikorwa ry’ingamba ziherutse gufatwa n’Inama y’Abaminisitiri, aho ibikorwa bitandukanye bihuza abantu benshi nk’inama, ubukwe n’ibindi kubyitabira bizajya bisaba kubanza kwipimisha Covid-19.

    Ubusanzwe mu Rwanda kwipimisha Covid-19 bikorwa mu buryo bubiri. Hari ikizamini gifatwa cyihuta cyizwi nka 'Antigen Covid-19 rapid test' ari nacyo cyashyizwe kuri 5000 Frw. Iki kiboneka umuntu apimwa mu mazuru ibisubizo bikaboneka mu minota itarenze 15 cyangwa iri hasi yayo.

    Hari ikindi cyitwa 'PCR' gifatwa mu kanwa, cyo kiba kigamije gucukumbura ngo kirebe ko umuntu adafite ubwandu bwa Covid-19, ibisubizo biboneka nyuma y’amasaha 24, umuntu akishyura 47.200 Frw.

    Itangazo RBC yashyize hanze, ntacyo yavuze kuri PCR, ahubwo yatangaje ko mu gihe cya vuba hazatangazwa urutonde rw’amavuriro yemerewe gufatirwamo Rapid test.

    Yagize bati 'RBC iramenyesha abantu bose ko guhera tariki ya 9 Kanama 2021 igiciro cyo gupima Covid-19 mu buryo bwihuse (rapid test) mu mavuriro yigenga kizaba 5.000 Frw. Urutonde rw’amavuriro yigenga ashobora gupima Covid-19 muzarumenyeshwa bidatinze.'

    Abantu basaga miliyoni ebyiri ni bo bamaze gupimwa mu Rwanda kuva Coronavirus yagera mu gihugu. Mu basanzwemo iyo ndwara, 808 yarabahitanye.

    Source : https://imirasire.com/?Noneho-Kwipimisha-Covid-19-byashyizwe-kugiciro-cyoroheye-buri-wese