Webrwanda Backend

Author: webrwanda

  • Minisitiri Gatabazi yasabye abanyamadini kwigisha abayoboke babo kwirinda Covid-19 – #rwanda #RwOT

    Ibi yabigarutseho kuri uyu wa 4 Kanama 2021 mu nama yahuje Minisiteri y’Ubutegetsi bw’Igihugu [MINALOC], abayobozi b’Intara n’Umujyi wa Kigali, abahagarariye inzego z’umutekano n’abayobozi b’Ihuriro ry’Amadini n’Amatorero mu Rwanda. Yigaga ku busabe bwabo bw’uko bakoroherezwa insengero zikongera gufungura.

    Kuva Covid-19 yagaragara mu Rwanda hagiye hafatwa ingamba zo gukomeza kuyirinda zirimo no kuba insengero n’andi materaniro bihagarikwa.

    Nubwo insengero zagiye zifungwa ariko hirya no hino hagenda hagaragara abantu barenga ku mabwiriza yo kwirinda Covid-19, bakajya gusengera mu ngo z’abantu no ku misozi.

    Urugero ni abagore 38 bo mu Karere ka Bugesera bafashwe tariki ya 18 Nyakanga 2021 bari gusengera aho bita muri Mbyo. Tariki ya 17 Nyakanga 2021, nabwo hafashwe abantu 239 bari gusengera ku Musozi wa Kanyarira, usibye aba hari n’abandi benshi bagenda bafatwa barenze ku mabwiriza aba yafashwe.

    Minisitiri Gatabazi yasabye abanyamadini n’amatorero bitabiriye iyi nama kwigisha abayoboke babo kwirinda kujya gusengera ahantu hatemewe hashyira ubuzima bwabo mu kaga ndetse no kwitabira gufata inkingo za Covid-19.

    Yabasabye kandi ko bakihangana muri iki gihe cy’ibyumweru bibiri insengero zifunze bagashaka ubundi buryo batangamo ubutumwa nka radiyo na televiziyo, mu gihe bategereje gukomorerwa.

    Inama y’Abaminisitiri yateranye ku wa 30 Nyakanga 2021, yafatiwemo imyanzuro itandukanye yo kurushaho kwirinda Covid-19, irimo n’uko insengero zifunze.

    Minisitiri w’Ubutegetsi bw’Igihugu, Gatabazi Jean Marie Vianney, yasabye abayobozi b’amadini n’amatorero kwigisha abayoboke babo kwirinda Covid-19

  • Rwamagana: Abandi bakozi batatu b’umurenge bahagaritswe mu kazi bazira agatama – #rwanda #RwOT

    Aba bakozi bahagaritswe mu kazi amezi abiri barimo umukozi ushinzwe ubworozi ku Murenge, ushinzwe ubutaka n’umukozi w’urwego rushinzwe kunganira uturere mu by’umutekano Dasso bose bakaba basanzwe bakorera ku Murenge wa Gishari.

    Amakuru agera ku IGIHE avuga ko aba bakozi mu cyumweru gishize ubwo bari bagiye mu kazi bafatiwe ahantu mu kabari bari kurya ndetse bananywa inzoga mu gihe Akarere ka Rwamagana kari mu turere turi muri guma mu rugo, ubuyobozi ngo bwahise bubahagarika mu kazi mu mezi abiri.

    Umuyobozi w’Akarere ka Rwamagana, Mbonyumuvunyi Radjab, yabwiye IGIHE ko koko aba bakozi bahagaritswe amezi abiri batari mu kazi nyuma yo gufatwa bishe amabwiriza ya COVID-19.

    Ati “Baragiye bararya bamaze kurya bafata n’inzoga baranywa nyuma turabimenya turabahana, bahagaritswe amezi abiri.”

    Abajijwe ku kijyanye niba aba bakozi bazakomeza guhembwa muri aya mezi abiri bahagaritswe yavuze ko hari ibyo batari bafataho umwanzuro ariko icy’ingenzi bafashe ni umwanzuro wo Kubahagarika by’agateganyo mu gihe cy’amezi abiri.

    Meya Mbonyumuvunyi yasabye abayobozi mu nzego zitandukanye n’abakozi kwitwararika muri iki gihe bakubahiriza amabwiriza yashyizweho yo kurwanya COVID-19 kugira ngo abaturage bayobora babarebereho.

    Ati “Bakwiriye kuba intangarugero ahantu hose kugira ngo abaturage bayobora babarebereho.”

    Si ubwa mbere abakozi n’abayobozi mu nzego zitandukanye bafatwa barenze ku mabwiriza yo kwirinda COVID-19 mu Karere ka Rwamagana, kuri ubu hamaze kwirukanwa abanyamabanga Nshingwabikorwa b’utugari bane bazira gufatirwa mu tubari basinze barenze ku mabwiriza yo kwirinda COVID-19.

  • Abagororwa barimo abagore baherutse kubabarirwa na Perezida Kagame batashye – #rwanda #RwOT

    Aba bagore bose uko ari 10 batashye kuri uyu wa 4 Kanama 2021, nyuma yo guhabwa imbabazi n’Umukuru w’Igihugu nk’uko byasohotse mu Iteka n° 087/01 ryo ku wa 03/08/2021 ritanga imbabazi.

    Aba bagore bafunguwe bari barakatiwe ibihano by’igifungo kiri hagati y’umwaka umwe n’itatu barimo batatu bo mu Karere ka Musanze, babiri b’i Nyamagabe, batatu bo muri Muhanga, umwe wo muri Ngoma n’undi w’i Nyarugenge.

    Kuri uyu wa Gatatu kandi abandi bagororwa 4781 bari barahamijwe n’inkiko ibyaha bitandukanye bakaba bari bafungiye muri gereza ziri hirya no hino mu gihugu, bafunguwe by’agateganyo n’Iteka rya Minisitiri, batangiye gusubizwa mu miryango yabo.

    Imbabazi zatanzwe na Perezida Kagame zatangajwe mu byemezo by’Inama y’Abaminisitiri yateranye ku wa Gatanu, tariki ya 30 Nyakanga 2021.

    Ingingo ya 227 y’Itegeko ryerekeye imiburanishirize y’imanza z’inshinjabyaha ryo mu mwaka wa 2019, iteganya ko Perezida wa Repubulika afite ububasha bwo gutanga imbabazi ku muntu wakatiwe n’urukiko, abisabwe cyangwa abyibwirije, amaze kugisha inama Urukiko rw’Ikirenga.

    Imbabazi zitanzwe na Perezida wa Repubulika zivanaho ibihano byose cyangwa bimwe uwakatiwe yahawe cyangwa zikabisimbuza ibindi bihano byoroshye.

    Gusaba imbabazi bikorwa mu nyandiko uwakatiwe igihano cyangwa umuhagarariye mu buryo bwemewe n’amategeko yandikira Perezida wa Repubulika.

    Inyuzwa ku buyobozi bw’Urwego rw’Igihugu rushinzwe imfungwa n’abagororwa iyo usaba imbabazi afunze, bikamenyeshwa Minisitiri ufite ubutabera mu nshingano ze. Usaba imbabazi agaragaza impamvu ashingiraho azisaba.

    Hari ibyo uwahawe imbabazi asabwa kubahiriza

    Uwahawe imbabazi agomba kwiyereka Umushinjacyaha wo ku Rwego rw’Ibanze rw’aho aba, aho ubushinjacyaha bukorera, no kumumenyesha Umudugudu, Akagari, Umurenge n’Akarere by’aho aba, mu gihe cy’iminsi cumi n’itanu.

    Agomba kandi kwitaba Umushinjacyaha ku Rwego rw’Ibanze rw’aho atuye, aho ubushinjacyaha bukorera, inshuro imwe mu kwezi ku munsi wagenwe n’Umushinjacyaha ku Rwego rw’Ibanze.

    Ibindi asabwa birimo gusaba Minisitiri ufite ubutabera mu nshingano ze uruhushya igihe cyose ashatse kujya mu mahanga.

    Iyo hari imbogamizi uwahawe imbabazi atitaba ku rwego ruteganywa n’itegeko, yifashishije ikoranabuhanga mu itumanaho, yoherereza umushinjacyaha wo ku rwego rw’ibanze rw’aho atuye ubutumwa amumenyesha aho aherereye n’impamvu atashoboye kumwiyereka.

    Uwahawe imbabazi kandi yiyereka ubuyobozi bw’Umudugudu atuyemo bukabikorera raporo ishyikirizwa umushinjacyaha iyo izo mpamvu zivuyeho.

    Ibyo uwahawe imbabazi agomba kubahiriza birangirana n’igihe cy’igifungo cyari gisigaye uwahawe imbabazi yababariwe.

    Uwahawe imbabazi ashobora kuzamburwa

    Imbabazi za Perezida zishobora kwamburwa uwazihawe bitewe n’imwe mu mpamvu zirimo kuba yakatirwa kubera ikindi cyaha, mu rubanza rwabaye ndakuka cyangwa akaba atubahije kimwe mu byategetswe n’iteka rimufungura.

    Iteka rya Perezida ryambura imbabazi rigaragaza impamvu imbabazi zambuwe. Uwazambuwe afungwa igice cy’igihano cy’igifungo yari asigaje igihe yahabwaga imbabazi.

    Kurangiza icyo gihano cy’igifungo bitangira kubarwa kuva ku munsi uwambuwe imbabazi yazamburiweho. Icyakora, mu kubara icyo gihe cy’igifungo ntihitabwa ku gihe uwakatiwe yihungishije ubwe igihano.

    Aba ni abagore barekuwe nyuma yo guhabwa imbabazi n’Umukuru w’Igihugu

    Abagore 10 bafunguwe ku mbabazi za Perezida wa Repubulika babanje kwigishwa mbere yo gutaha

    Ubwo basohokaga muri Gereza ya Ngoma batashye

    Umwe mu bahawe imbabazi mbere yo gutaha yabanje guhabwa icyangombwa cyemeza ko afunguwe

  • Rubavu: Abakobwa basabwe ruswa y’igitsina bagatanga amakuru birukanywe – #rwanda #RwOT

    Aba bakobwa bavuga ko bari bamaze igihe badahembwa, bitewe n’uko umwe mu bayobozi b’ikigo bakoragamo yabakaga ruswa y’igitsina. Baje kubiganiraho basanga ari ikibazo rusange, biba ngombwa ko bitabaza Urwego rw’Ubugenzacyaha, RIB, kugira ngo rukurikirane uwo muyobozi.

    Nyuma y’ibi amakuru avuga ko abo bakobwa baje kwirukanwa mu kazi, ibintu bavuze ko bishobora kuba bifitanye isano n’uko batanze amakuru.

    Umwe muri abo bakobwa yagize ati “Nyuma y’uko dutanze amakuru ntabwo badusubije mu kazi, banze kuduhemba banatwirukana mu kazi. Twazize ko twasebeje ikigo. Tubona ari ihohoterwa twakorewe n’ubwo tutasubizwa mu kazi ariko tugahembwa takanishyurwa imyambaro yabo twaguze, ubundi tukajya gushakisha ahandi.”

    Undi nawe yagize ati “Ninjiye ntanze amafaranga ibihumbi 30 Frw y’imyambaro, sinigeze mpembwa kuko nanze gutanga ruswa y’igitsina. Nitabaje ubuyobozi bw’ikigo bumbwira ko buzabikurikirana, igihe kigeze uwari udukuriye avuga ko ntazahembwa ntamuhaye igitsina ariko RIB iradutabara iramufata. Gusa kuva ejo ubuyobozi bwatubwiye ko buzaduhemba tubanje gutanga imyambaro, natwe tubona ari ukutugora kuko ikimenyetso dufite [cy’uko twabakoreye] ni imyambaro kuko nta makarita dufite, none ubu badukuye mu kazi.”

    Umuyobozi Ushinzwe Ibikorwa muri HIGHSEC CO Ltd, Murayire Hermess, avuga ko aba bakobwa atari abakozi babo kuko batabazi.

    Ati “Abo bakobwa amakuru bari gutanga si ukuri, kandi n’inama twabagiriye ntibayumva. Ntabwo ari abakozi bacu, uriya ufunzwe yarababeshyaga ko abahaye akazi ariko nta rutonde na rumwe babaho, ntibarahembwa na rimwe. Ni umukozi wacu w’umutekamutwe wababeshye abambika imyenda, n’ubu natwe turimo kumurega kuko twasanze ari benshi yashyizemo. Bose twabasabye ko bakuzuza dosiye tukazabashyiramo mu buryo bwemewe.”

    Yakomeje avuga ko niba aba bakobwa koko barakoze akazi k’ikigo, bazahembwa.

    Tariki ya 27 Nyakanga 2021, ni bwo RIB yataye muri yombi Umuyobozi mu Kigo cya HIGHSEC CO Ltd. gikorera mu Mujyi wa Rubavu, akurikiranyweho icyaha cyo gusaba ruswa y’igitsina.

    Abakobwa batswe ruswa y’igitsina bagatanga amakuru birukanwe

  • Inteko Ishinga Amategeko yasoje igihembwe itoye amategeko 23 – #rwanda #RwOT

    Muri iki gihembwe, abadepite bemeje ishingiro ry’imishinga y’amategeko 28, hatorwa amategeko 23, amwe muri yo akaba yaroherejwe gutangazwa, andi akaba akinozwa mbere y’uko yoherezwa. Hari n’akirimo gusuzumirwa muri komisiyo zihoraho.

    Mu mateko yemejwe harimo itegeko rigenga Urwego Rushinzwe Ubutasi ku Mari (Financial Intelligence Centre – FIC) ruzajya rugenzura ibyaha byo mu rwego rw’imari birimo iyezandonke, gutera inkunga iterabwoba cyangwa ikwirakwizwa n’ikoreshwa ry’intwaro n’ibindi.

    Andi mategeko arimo itegeko ryemeza burundu amasezerano hagati ya Repubulika y’u Rwanda na Repubulika Iharanira Demokarasi ya Congo, n’amategeko yemeza burundu amasezerano anyuranye u Rwanda rwasinyanye n’ibigega mpuzamahanga.

    Abadepite kandi bemeje ishingiro ry’umushinga w’itegeko rigenga gutwara abantu n’ibintu ku butaka no mu mazi mu Rwanda, aho amategeko yari asanzweho hari ibyo atashyiragaho bya ngombwa nk’amategeko agenga ibyaha n’ibihano byo mu muhanda.

    Perezida w’Inteko Ishinga Amategeko, Umutwe w’Abadepite, Mukabarisa Donathile, yashimiye abadepite umuhate bagaragaje kugira ngo imirimo yihute kandi ikorwe mu buryo bunoze.

    Ati “Iki igihembwe cyabayemo imirimo myinshi cyane ahanini irebana no gusuzuma no kwemeza imishinga y’amategeko yihutirwaga cyane.”

    Mu kumenya no kugenzura ibikorwa n’imikorere bya Guverinoma, Inteko yagejejweho na Minisitiri w’Uburezi, Dr Uwamariya Valentine, ibisubizo mu magambo no mu nyandiko ku bibazo bimaze igihe bigaragara muri Kaminuza y’u Rwanda bijyanye n’imicungire y’imari n’umutungo ndetse n’ikoranabuhanga rya IEBMIS.

    Minisitiri Dr Uwamariya yagaragarije abadepite mu buryo burambuye ikibazo kiri m ikoranabuhanga rya IEBMIS, abereka gahunda yo guhugura abakozi bongererwa ubumenyi buzabafasha mu ikoreshwa ry’iri koranabuhanga, kugira ngo ibice byaryo byose bibashe gukoreshwa, ritange umusaruro uko bikwiye.

    Ministiri w’Ibikorwa remezo, Gatete Claver, na Minisitiri w’Imari n’Igenamigambi, Dr. Uzziel Ndagijimana, nabo bagejeje ku Nteko Rusange y’Abadepite ibisubizo mu magambo ku bibazo byagaragaye muri bimwe mu bigo biyobowe na minisiteri bayoboye zireberera.

    Nk’uko biteganywa n’ingingo ya 133 y’Itegeko Nshinga rya Repubulika y’u Rwanda, Nyakubahwa Minisitiri w’Intebe yagejeje ku Mitwe yombi y’Inteko Ishinga Amategeko [Abadepite n’Abasenateri] ibikorwa bya Guverinoma byo guteza imbere amashuri y’imyuga n’ubumenyingiro.

    Inteko Ishinga Amategeko yasoje igihembwe cya gatatu itoye amategeko 23

  • Ubuzima bwanjye ni morale! Miss Muyango yahis… – #rwanda #RwOT

    Mu minsi ishize ni bwo hagiye hanze amafoto yerekana ko Miss Uwase Muyango Claudine, umaze igihe mu rukundo na Kimenyi Yves, ubu akaba atwite inda y'uyu musore. Nyuma y'aya mafoto abatari bake bamwifurije kubyara neza ariko na none hari n'abandi benshi bamututse, bavuga ko yakoze ibidakwiye umuntu ufite ikamba rya Miss Photogenic 2019.

    Ibi byakuruye impaka ndende ku bantu batandukanye kugeza n'aho bamwe batangiye kwinjira mu buzima bwite bwa Muyango Claudine baramutuka baramwandagaza, kugeza aho we ubwe yagiye ku rukuta rwe rwa instagram yerekana umuntu wamwandikiye amutuka ku mugaragaro kandi atanamuzi.

    Miss Muyango avuga ko abayeho  mu buzima bw’ibyishimo gusa atajya yita ku bamuvuga

    Mu kiganiro cyihariye Miss Muyango yahaye InyaRwanda.com, abajijwe uburyo abasha kwakira abantu batandukanye banafite imico itandukanye bamutuka cyangwa bakamuvugaho ibitari byo umunsi ku munsi, yavuze ko yabimenyereye kandi ko ubuzima bwe abufata nka morale.

    Yagize ati': 'Hhhh njyewe ibimvugwaho byose narabimenyereye kuvugwa rwose isi ntabwo iba yandangiriyeho ndakomeza nkaba njyewe rwose, njyewe mba meze neza ubuzima bwanjye ni morale, mbaho mu buzima bwishimye iyo abantu bari kumvuga cyangwa bakantuka ahubwo biransetsa nta n’ubwo njyewe rwose biba bimbabaje”.

    Miss Muyango atwite inda nkuru ya Kimenyi Yves

    InyaRwanda: Ntabwo ujya wumva isi ikurangiriyeho iyo ubibonye?

    Muyango: Nta by’isi kurangira, isi se kurangira gute njyewe ko mba numva rwose ubuzima bwanjye ari ibyishimo gusa! Ikinsetsa cyane hari umuntu wambajije amakuru nkanga kumusubiza koko? Njyewe rwose ntabwo bimbabaje rwose kuko mba numva narabimenyereye.''

    Miss Muyango aherutse guhakana ko atibarutse mu kiganiro yagiranye na InyaRwanda. Byari nyuma y'amakuru yavugaga ko  yibarutse imfura ye yabyaranye na Kimenyi. Yabiteye utwatsi avuga ko ayo makuru atariyo ndetse ko ari bwo akibimenya. Yongeyeho ko bitamutunguye cyane kuko ibimuvugwaho ari byinshi. 

    Miss Muyango icyo gihe anyomoza amakuru y’uko atibarutse, yaragize ati “Ariko icyakoza reka nkubwire ubu ndi kumva uri kunsetsa, ubu iri jwi ryanjye uri kumva ndi kuvuga nk'umuntu wabyaye koko. Ntabwo ari byo rwose ubungubu nari niryamiye rwose nanjye nta n’ubwo nari mbizi ariko ntabwo bintunguye kubera ko ibimvugwaho ni byinshi. Ikintungura ni uko nta muntu njya nima amakuru ariko njya gutungurwa nkabona abantu batwanditseho ibintu bitandukanye nyamara atari byo hhhh.''

    Kimenyi Yves yatangiye gukundana na Miss Muyango muri Kanama 2019. Tariki 13 Ukwakira 2019 Muyango yateguye ibirori by'isabukuru y'umukunzi we amushimira urwo yamukunze. Kuva icyo gihe kugeza n'uyu munsi, ibyabo ni inkuru idasiba gusomwa bitewe n’umunyenga w’urukundo aba bombi bahoramo.

    Uwase Muyango Claudine yabaye Miss Photogenic muri Miss Rwanda 2019, yambitswe impeta y'urukundo n'umukunzi we w'igihe kirekire Kimenyi Yves, umukinnyi w'ikipe y'Igihugu Amavubi ndetse n'ikipe ya Kiyovu Sports tariki 28 Gashyantare 2021.


    Miss Muyango ubwo yambikwaga impeta n’umukunzi we Kimenyi Yves

    Source : https://inyarwanda.com/inkuru/108299/ubuzima-bwanjye-ni-morale-miss-muyango-yahishuye-byinshi-ku-buzima-bwe-anavuga-uko-yakiriy-108299.html

  • Imvano yindirimbo nshya ‘Rwambyaye’ ya Clari… – #rwanda #RwOT

    Ni indirimbo yakubiyemo amarangamutima ye ku gihugu cyamubyaye (u Rwanda), kikamurera ndetse Imana ikamuha amahirwe n'inganzo yo kugikorera. Avuga ko “u Rwanda ni umutima, indangagaciro, aho uri hose rukubamo iyo utari ikigaande”.

    Yabwiye INYARWANDA, ko iyi ndirimbo yamujemo muri Mutarama 2021 ubwo yari yatembereye n'inshuti ze bageze i Rulindo ku kirenge cya Ruganzu.

    Avuga ko icyo gihe iyi ndirimbo yamujemo iri mu njyana y'ikinyemera, nyuma aza kuyivugurura igenda nk'uko yasohotse imeze. Ati 'Yaje ubwo twitegerezaga ibyo binyaburanga n'ingoro z'umurage wacu muri ubwo butembere.'

    Clarisse Karasira aherutse guhembwa n'Inteko y'Umuco ku bwo guteza imbere Ikinyarwanda. Avuga ko Inteko y'Umuco yamusabye guhitamo indirimbo yakora bamuteye inkunga ahitamo 'Rwambyaye'.

    KANDA HANO UREBE AMASHUSHO Y'INDIRIMBO 'RWAMBYAYE' YA CLARISSE KARASIRA

    Iyi ndirimbo yagombaga gusohoka muri Gicurasi 2021 ariko bategereza kuyishyira hanze muri ibi bihe ubusanzwe Abanyarwanda bizihiza umuganura.

    Ijambo 'Umuganura' rikomoka ku “Kuganura” bisobanuye kurya cyangwa kunywa ku musaruro bwa mbere. Uwo musaruro umuntu yashoboraga kuwusangiza abandi baba abavandimwe, inshuti n’abaturanyi; icyo gihe icyo gikorwa kikitwa “Kuganuza”.

    Umuganura wizihizwaga buri mwaka ku mwero w'amasaka n'uburo, abami b'u Rwanda bakawizihiriza ahantu hatandukanye bitewe n'umurwa werejwe.

    Tariki ya 06 Kanama 2021, u Rwanda ruzizihiza umunsi ngarukamwaka w'Umuganura ku nsanganyamatsiko igira iti 'Umuganura, isôoko y'ubumwe n'ishingiro ryo kwigira'

    Clarisse avuga ko n'ubwo u Rwanda n'Isi bari mu bihe bitoroshye byo guhangana na Covid-19, ariko ari 'Ingenzi nabyo gukomeza kwibuka ko dufite igihugu cyiza kirimo ibyiza biduteza imbere none n'ejo, bityo ko tutabura gutaramira mu ngo twizihiza u Rwatubyaye'.

    Yasabye abafana be n'abakunzi b'umuziki gukomeza guharanira kwiyumvamo ko ari bamwe, bityo uburyarya, kwishishanya, gusebanya, n’ibindi byose biranga ubukene bw’imyumvire bibavemo bubake igihugu cyiza.

    Yashishikarije buri wese guharanira kubiba icyiza mu bandi ndetse no kwimakaza indangagaciro nziza ziri mu muco Nyarwanda.

    Clarisse Karasira yasohoye amashusho y'indirimbo ye nshya yise 'Rwambyaye' yagaragajemo amarangamutima ye ku Rwanda Clarisse avuga ko n'ubwo u Rwanda ruri mu bihe bitoroshye, ariko n'igihe cy'Abanyarwanda cyo kuzirikana bafite igihugu kibateza imbere none n'ejo

    KANDA HANO UREBE AMASHUSHO Y'INDIRIMBO 'RWAMBYAYE' YA CLARISSE KARASIRA


    Source : https://inyarwanda.com/inkuru/108302/imvano-yindirimbo-nshya-rwambyaye-ya-clarisse-karasira-yamarangamutima-ye-ku-rwanda-video-108302.html

  • Dore abasore babiri bakuri imbere, hitamo umw… – #rwanda #RwOT

    Iteka ryose uzitondere umuntu nk'uwo: Niba ari umusore, azakora ibiri mu bushobozi bwe byose, ndetse yiyime n'akaruhuko. Azashaka uburyo aba mwiza inyuma rwose (Attractive), azakurura amarangamutima yawe, maze akore uko ashoboye nawe ukururwe n'ibyo ubona inyuma kuri we, ubundi atangire akwigarurire. Uyu musore akenshi akoresha amarenga y'ibiganza bye cyane, amaso ye, uzajya uyabonamo ubuhehesi. Azahagarara mu ruhame rw'abantu, yambare neza, yitere ibihumura kugira ngo abe ari we umubona.

    Umusore ugiye kugukinishiriza umutima nimuhura, mwembi muzahindukira, azagukuruza ingaragaro ye, birangirire aho atahe, kandi ntuzagaruka uko wagiye

    Mu nkuru tugenda tubagezaho umunsi ku munsi, tugaruka ku magambo yagiye avugwa n'abahanga ndetse n'ayanditswe n'ibinyamakuru bikomeye mu kubaka urukundo n’imibanire y'abantu. Mu by'ukuru, iyi ngingo twayigarutseho kenshi cyane. Ibyiyumviro by'ako kanya bimeze nk'urukundo rufatiyeho (Love At First Sight).

    Jay Shetty yaragize ati 'Urukundo rufatiyeho ni rwiza, ariko ni ikintu umuntu wese akwiriye kwitondera, kuko uru rukundo ruzanwa n'amarangamutima adafashije, adafite icyo ashingiyeho, yubatse ku busa. Uru rukundo rurangirana n'umuhuro wa mbere w'abahuye kubera ko buri wese yakunze uko undi ateye nta kindi arebyeho. Urukundo rugira icyo rushingiraho'. Ibi uyu mugabo yabivuze mu gitabo cye yise ngo 'I'm a Monk', kimaze igihe gito gisohotse.

    Uyu musore azakunda ko umusura ahantu atuye cyane, ndetse ashake n'uburyo bwose uzahagera yitwaje icyo ari cyo cyose kuko ntagukunda ahubwo agushaka by'akanya gato. Erega urukundo rw'ukuri rugira ibintu bifatika rugenderaho kandi kurubona ntabwo bisaba ako kanya. Bisaba umwanya no kwicara ukabona koko ko bihari kandi bihagije, ukitegurira inzira nziza aho kwitegurira aho amarira yawe azamenekera.

    Uyu musore numuha umwanya azagufata ikiganza, akube iruhande mukomezanye nk'aho mukundana. Uyu musore, azafungura imiryango ye, ubundi agutize agakoti mu gihe wagize imbeho kugira ngo ukunde ushukwe n'uburyarya bwe, ejo uzakamushyire, azagutuma guhaha kugira ngo umushyire ibyo wahashye,…

    Azakubwira ko uri umuntu udasanzwe, mbese ko uruta abantu bose yahuye nabo. Uyu musore azakwereka ko uri uwa mbere kuri we. Nawe uzasanga wakuruwe nk'umuntu uri guca mu munyururu w'igare utabizi. Azakubwira ko afite inzu, afite amafaranga kugira ngo umwizere. Kumwizera ni ryo kosa rya mbere uzaba ukoze.

    TUGANIREHO GATO.

    Ubundi umuhungu ugukunda akwiriye kwitwara gute? Ese ubundi niba uyu musore akora uko ashoboye kuki tuvuga ko hari ikindi agushakira? Ese kuki tumwita uw'agahe gato?. Mu nyandiko nto cyane nasomye ahantu ariko ntibuka neza uwayanditse, hari aho banditse ngo 'Urukundo ntabwo urwiyumvamo mu mutima wawe gusa, ahubwo ruzerera mu mubiri wawe no muri roho yawe'. 

    Urukundo rwawe, byanga bikunze nawe uzumva ko ruhari hagati yawe n'umuntu ugushaka cyangwa nuba wicaye ujye wibaza uti 'Ariko se harya uyu musore kuva twahura ni iki nkwiriye gushingiraho, nkomeza kumuha umwanya wanjye?. Icara hamwe, nushaka ufate ikaye n'ikaramu, ubundi wandike, A na B. Uvuge ngo nshingire kuki? Ese uyu musore turahuje? Ese amarangamutima niyo yonyine ari kunkoresha? Icyo gihe kuri iyo ntebe uzahavana igisubizo.

    Umunsi umwe naganiriye n'inshuti yanjye, ntabwo byaba byiza kuyivuga izina, gusa ni umukobwa, yarambwiye ati 'Umuhungu dukundana kugeza ubu, njye byatangiye ntamukunda, bitangira ntamwiyumvamo, ku buryo kumubwira ngo Chr, biri mu bintu byangoraga, we yabimpamagaraga nkabyikiriza ariko bitandimo. Uyu musore yari yaranyeretse ko ankunda pe, kandi yari yaranyeretse ko atankurikiyeho ikindi, kuko nta n’ubwo yigaragazaga uko atari wenda ngo atire imyambaro cyangwa yambere iy'umusore wundi babana kugira ngo akunde yambare nk'igitangaza, yari we ubwe.

    Uyu musore yigeze ambwira ngo 'Rero kuba hamwe nawe ntagufite, simbishoboye hitamo tube inshuti mu ruhame, cyangwa nguhe umwanya n'abo ushaka. Ni ukuri icyo gihe nta nshuti nagiraga nari njyenyine, byansabye kwicara hamwe, ndandika ngereranya abantu babiri, nsanga uyu musore sinkwiriye kumureka.

    Nabonye ko nimureka akagenda, nzaba mbuze inshuti nziza, nzaba mbuze umwunganizi mu buzima, nzaba mbuze uwambaye iruhande mu bihe bibi n'ibyiza, nzaba mbuze njye, ndangije muha amahirwe, ndamwemerera. Kuko yankundaga njye nta mbaraga nasabwaga gushyira mu rukundo rwacu kuko sinamwiyumvagamo, ariko uko iminsi yagiye ihita niko nagiye mukunda nirengagiza abandi, ndetse nsanga ari nawe wari we kuri we njye. Kugeza ubu ntawamundutira.'.

    Reka tuve kuri icyo gitekerezo cyacu twari dufashe ho gato.

    Nuhura n'uyu musore bizarangira ari wowe, uri kujya ushaka ko muhura, ari wowe uri kumukunda cyane, ari wowe uri kurwana ku rukundo rwanyu:

    Uyu mwiza inyuma ari mubi ku mutima, ni muhura akagushobora neza, bizarangira umwiyeguriye neza, birangire ari we ukunda cyane, birangiye umeze nk'igitebo kirimo inyanya ariko gifunguriye umwana ukiri imbere. Uzisanga umutekereza buri kanya, na buri munota (Ku mukobwa rero ubyange ubyemere, urwo ntabwo ari urukundo akwiriye). Uyu musore intego ye kwari ukukugira nk'ikinyugunyugu akakwigisha kuguruka, ubundi ukajya wigurutsa. Azatuma wiyumva nk'uwakora ku nyenyeri.

    Umuhungu ugukinishiriza umutima nawe ubwawe uzamubona ariko bizagusaba gufungura amaso. Uyu musore azifuza ko musangira agacupa, rimwe na rimwe, azajya agusaba ibintu ubona ko akugoye ariko kubera uri gutangira kutabona, nawe uzajya uhumuriza wemere. Umuntu utagukunda, ajya mu rukundo kubera irari ry'umubiri we. Uku ni nako azarusohokamo mu gihe iryo yakwerekejeho rizaba rirangiye. Nta n’ubwo uzongera kumubera mu mutima habe na gato, kuko ntiwigeze uhaba ubusanzwe.

    N'UBWO BIMEZE BITYO, HARI UMUHUNGU TWAKWITA UW'ITEKA RYOSE NAWE UGUSHAKA (KIND BOY AND FOREVER BOY).

    Uyu musore ntazitwara bitandukanye cyane n'uwa mbere ariko nta n’ubwo azaba ameze nkawe, uyu musore ntazihindura uko atari kugira ngo umubone, ikindi nta n’ubwo azaguhindura kandi nta n’ubwo azagusaba ibirenze. Uyu musore ibintu bye abikora yitonze buhoro buhoro ariko bikakugeraho. Uyu musore agira isoni, nta n’ubwo akunda kukwiyegereza cyane.

    Uyu musore ntagira ijambo avuga ridaherekejwe n'igikorwa kandi kivuye ku mutima, ntakunda kwigaragaza mu maso yawe. Uyu musore ibyo akora byose agukorera, ntaba ategereje icyo nawe uzamukorera. Ntabwo ategereza ngo abe ari we uhabwa mbere, kuko nta n’ubwo aba ashaka ibivuye kuri wowe cyane kuko abifata nko kukugora, n'ubwo nawe uri umuntu.

    Uyu musore azishimira kuyoborwa nawe kugeza umweretse inzira yinjira mu mutima wawe. Amarangamutima azamusaga akureke ubimenye ariko agusabe kumufasha. Azemera ko agukunda abihamishe ibikorwa bitarimo kwiyemera.

    UZABANZA GUSHIDIKANYA MURI WOWE, KUKO UMUSORE W'ITEKA RYOSE AZAZA AGUTUNGUYE, NTA N’UBWO AZABA ASHAMAJE

    Reka tugaruke gato kuri cya gitekerezo cy'inshuti yanjye twaganiriye, nawe yabanje gushidikanya cyane, ariko nyuma asanga bikwiriye. Kenshi uyu musore w’iteka azakubwira ko agukunda, uzabanza ushidikanye kuko erega nta n’amarangamutima uzaba umufitiye kuko na cyane ko adashamaje rwose, uzabanza wange kubera ko hari undi ku ruhande uri kukwatsa, cyangwa waguhemukiye kubera ko yari umukinnyi gusa. Ntabwo ushaka kongera kwirekura nka mbere kubera ko utekereza ko ushobora kuba ugiye kongera kubeshywa.

    Gusa gahoro gahoro, uyu musore uzamusanga imbere mu mutima wawe kandi muzakundana bitinde. Uyu musore ntazakwirukansa mu gihe gito gusa nanone ntazemera gutegereza cyane. Azagutegereza ndetse anakubwire ko agutegereje akubwire ko ukwiriye kwishima. Nta n’ubwo yizeye neza ko uzamurebaho, ariko azi ko uzatekereza kuba yazakubabaza. Uyu muntu ni we wenyine uzagufata uko wahoze wifuza gufatwa. Gusa ntabwo azagufata uko ubyifuza.

    'Umusore wa burundu, azagufata ikiganza, ntazakirekura, nta n’ubwo azigera akureka ngo ugende'. 

    'Wibabaza ugukunda, ngo ushimishe uzakubabaza ejo'.

    'Wibabaza urukundo rwawe rw'ubu n'ejo'

    'Kunda umuntu ugukunda cyane kuko uwo utekereza ko ukunda wasanga akunda abandi ari kugukoresha'.

    'Ese umuntu ugukunda wamuyoberwa? Ese nawe ugendera ku marangamutima ashingiye ku busa? Urukundo rubaho kandi ugukunda ntazigera agenda'.

    Iyi nkuru ikorwa nta muntu n'umwe yafatiyeho, ni ibitekerezo twahuje twifashishije inkuru yanditswe n'ikinyamakuru Relrules, ibitekerezo by'umwanditsi Jay Shetty, ndetse n'ikiganiro umunyamakuru Kwizera Jean de Dieu wa InyaRwanda.com yagiranye n'inshuti ye. Ujye wibuka gusoma. Igitekerezo cyawe ni inyamibwa.

    Source : https://inyarwanda.com/inkuru/108268/dore-abasore-babiri-bakuri-imbere-hitamo-umwe-uwubu-gusa-nuwa-burundu-108268.html

  • Abantu 6 bahitanwe na Covid-19 mu Rwanda abandi 769 barayandura #rwanda #RwOT

    Minisiteri y'Ubuzima yatangaje ko kuri uyu wa Gatatu tariki ya 4 Kanama 2021,bantu 6 bahitanwe na Covid-19 bituma umubare w'abamaze kwicwa n'iki cyorezo ugera kuri 850.Abapfuye n'abagore 4 n'abagabo 2.

    Habonetse kandi abantu bashya 769 (5.3%) basanganywe icyorezo cya COVID-19,mu bipimo 14.337 byafashwe.Akarere ka Karongi ni ko kabonetsemo abanduye benshi bagera kuri 80

    Abavuye mu bitaro ni 24 mu gihe ababihawe ari 20.Kuri uyu munsi hakingiwe abantu 44,227.

    Ku wa 30 Nyakanga 2021, Guverinoma y'u Rwanda yavanyeho Gahunda ya Guma Mu Rugo mu Mujyi wa Kigali no mu Turere twa Burera, Gicumbi, Kamonyi, Musanze, Nyagatare, Rubavu, Rwamagana na Rutsiro.

    Ni mu gihe indi Mirenge igera kuri 50 yo mu tundi Turere yashyizwe muri Guma Mu Rugo kuko ifite ubwandu buri hejuru cyane, yo ikomeje kubahiriza ayo mabwiriza, na ho ahandi hose ingendo zikaba zibuhijwe guhera saa kumi n'ebyiri z'umugoroba kugeza saa kumi n'imwe za mugitondo.

    Ingendo hagati y'Umujyi wa Kigali n'lntara ndetse n'Uturere tw'lgihugu zirasubukuwe, uretse izo kujya no kuva mu Mirenge iri muri Gahunda ya Guma mu rugo.

    Mu gihe u Rwanda rutaragera nibura ku rugero rwa 60% bagomba gukingirwa, buri wese arasabwa kwitwararika no kubahiriza amabwiriza yo kwirinda ari yo gusiga intera ya metero, kwambara neza agapfukamunwa no gukaraba intoki kenshi bakoresheje amazi meza n'isabune cyangwa umuti wabugenewe.


    Source : https://umuryango.rw/amakuru/mu-rwanda/ubuzima/article/abantu-6-bahitanwe-na-covid-19-mu-rwanda-abandi-769-barayandura

  • Umubyeyi yarize ayo kwarika abonye umwana we ahawe ishuri adashaka. – YEGOB #rwanda #RwOT

    Umubyeyi witwa Rachel Amogola utuye mu Karere ka Murang'a muri Kenya yaririye mu ruhame, arahogora, abitewe n'uko Leta yohereje umukobwa we kwiga ku ishuri avuga ko ridasobanutse ndetse atanashaka.

    Uyu mubyeyi yabwiye televiziyo K24 ko umukobwa we witwa Hildah Anatwa yari yaratoranyijwe mu bagomba kwiga mu ishuri rya Leta ryiza ryigaho abakobwa gusa ryitwa Mugoiri Girls, ubwo yari amugejejeyo bafite ibyangombwa byose, amenyeshwa ko yoherejwe mu rindi rya Wambasa.
    Yabisobanuye arira cyane ati: 'Twaje hano mu gitondo saa mbiri, nyuma yo gutegereza amasaha, tubwirwa ko umukobwa atakwemerwa ku ishuri kubera ko yajyanwe ku rindi.

    Amogola yakomeje asobanura ko izi mpinduka zakozwe kugeza ubwo bagereye kuri iri shuri yari azi ko umwana we azigaho. Ati: 'Impinduka zakozwe tutabimenyeshejwe, ntituzi uko byagenze kuko ntitwanasabye ko ahindurirwa ishuri. Twakoze ubushakashatsi tumenya ko Mugoiri ari ishuri ryiza cyane.'

    Uyu mubyeyi yasabye Leta ya Kenya kumufasha, umwana we akoherezwa kuri iri shuri, cyane ko yujuje ibisabwa byose kugira ngo aryigeho. Yagize ati: 'Ndasaba Leta kwinjira muri iki kibazo, igaha umukobwa wanjye amahirwe yo kubakira ahazaza he muri iri shuri.'

    Ikinyamakuru Tuko kuri uyu wa 3 Nyakanga 2021 cyatangaje ko nyuma y'aho uyu mubyeyi agaragaye arira cyane, Leta ya Kenya yasubije umukobwa we ku ishuri rya Mugoiri Girls yashakaga.

    Source : https://yegob.rw/umubyeyi-yarize-ayo-kwarika-abonye-umwana-we-ahawe-ishuri-adashaka/