Webrwanda Backend

Author: webrwanda

  • IBYAKOZWE N'INTUMWA EP#30: Byinshi ku masezerano ya Arusha yarangiriye mu mpapuro gusa #rwanda #RwOT

    Ikiganiro IBYAKOZWE N'INTUMWA EP#30 kiragaruka ku masezerano y'Amahoro ya ARUSHA yasinywe taliki 04/08/1993 yo guhagarika intambara, kuvanga ingabo no gusangira ubutegetsi hagati ya FPR Inkotanyi na Leta ya Habyarimana!

    Aya masezerano yasinywe na Col Kanyarengwe Alexis ku ruhande rwa FPR, ba Gen Maj Habyarimana Juvenal wari Perezida w'u Rwanda ariko ntiyamara n'amezi 10 atarashwanyuka! Byagenze gute ngo amasezerano yatangaga ikizere arangire igihugu ari imiborogo? Hari ibivugwa n'ibitavugwa! Tubane muri iki kiganiro.

    IBYAKOZWE N'INTUMWA EP#30: Col KANYARENGWE na Gen Maj HABYARIMANA Juvenal basinya amasezerano ARUSHA:

    Source : https://umuryango.rw/amakuru/mu-rwanda/politiki/article/ibyakozwe-n-intumwa-ep-30-byinshi-ku-masezerano-ya-arusha-yarangiriye-mu

  • Musanze: Hari abanyamahanga bakomeje gusura Umudugudu w’icyitegererezo wa Kinigi #Rwanda #RwOT via @kigalitoday #rwanda #RwOT

    Abasura uwo mudugudu bose bashima ibikorwa by
    Abasura uwo mudugudu bose bashima ibikorwa by’ingabo z’igihugu cy’u Rwanda

    Mu kwezi kumwe uwo mudugudu ufunguwe ku mugaragaro, abashyitsi biganjemo inzego za Gisirikare baturutse mu bihugu binyuranye, bakomeje gushima uburyo uwo mudugudu wahinduriye abaturage ubuzima, biturutse ku bufatanye bw’abaturage n’ingabo z’u Rwanda, dore ko uwo mudugudu wubatswe ku bufatanye bwa Leta n’Ingabo z’igihugu, umutwe ushinzwe inkeragutabara.

    Honorable OCZ Mushinguri Kashiri, Minisitiri w’Ingabo mu gihugu cya Zimbabwe, wari uyoboye itsinda ry’abayobozi mu nzego zinyuranye muri Zimbabwe, ubwo basuraga uwo mudugudu bari kumwe na Minisitiri w’ingabo z’u Rwanda, Maj Gen Albert Murasira, ku wa Kabiri Tariki 03 Kanama 2021.

    Nyuma yo gutambagizwa uwo mudugudu n’umuyobozi w’Akarere ka Musanze wungirije ushinzwe iterambere ry’ubukungu, Andrew Rucyahana Mpuhwe, bishimiye ubwiza bwawo.

    Abanyamahanga bakomeje gukorera ingendoshuri muri uwo mudugudu, basura ibikorwa binyuranye
    Abanyamahanga bakomeje gukorera ingendoshuri muri uwo mudugudu, basura ibikorwa binyuranye

    Bishimiye ubuzima bwiza bw’abawutuye, nyuma yo gusura ibikorwa binyuranye birimo Ikigo mbonezamikurire, Ishuri ry’incuke n’ibindi, bishimira ibikorwa by’iterambere Ingabo z’u Rwanda zikomeje kugeza ku baturage.

    Minisitiri w’Ingabo muri Zimbabwe ati “Ni ibyo gushima kuba ingabo z’u Rwanda zikomeje kwegereza abaturage iterambere, nabonye ibikorwaremezo binyuranye kandi byubatse neza cyane, birategurira umuturage iterambere rirambye”.

    Ni nyuma y’uko na none, uwo mudugudu wari uherutse gusurwa n’umugaba mukuru w’Ingabo mu gihugu cya Angola, General Egidio Santos, ubwo yari kumwe n’Umugaba mukuru w’Ingabo z’u Rwanda, Gen Jean Bosco Kazura, ku itariki 28 Nyakanga 2021.

    Abana bishimira gutaha iwabo mu nzu zigezweho, iyo bavuye kwiga
    Abana bishimira gutaha iwabo mu nzu zigezweho, iyo bavuye kwiga

    Mu bikorwa basuye muri uwo mudugudu, birimo Agakiriro, Ikigo mbonezamikurire cy’abana, Ikigo nderabuzima, amashuri n’amacumbi agezweho yubakiwe abaturage.

    Abo bashyitsi bagarutse ku bufatanye bw’ingabo z’u Rwanda n’abaturage, aho Gen Egidio yagize ati “Ibi bikorwa Ingabo z’u Rwanda zikomeje kugeza ku baturage birerekana urukundo ntagereranywa Ingabo zikunda abaturage, nabonye inyubako nziza, amashuri, amavuriro byerekana uruhare rw’Ingabo z’u Rwanda mu mibereho myiza y’umuturage”.

    Uretse abakuriye ingabo mu bihugu binyuranye, uwo mudugudu kandi ugenda usurwa n’abayobozi banyuranye mu rwego rw’isi aho bagera bakishimira, bavuga ko bahigiye byinshi bizabafasha kuzamura iterambere ry’abaturage mu bihugu byabo.

    Abashyitsi bakomeje gusura umudugudu wa Kinigi
    Abashyitsi bakomeje gusura umudugudu wa Kinigi

    Ni umudugudu ucumbikiye imiryango 144, yari ituye mu kajagari muri ako gace ka Kinigi, ahadakunze korohera umuturage kubaka, dore ko ari agace karangwa n’amakoro.

    Ibyo bikorwa remezo muri uwo mudugudu birimo inzu 144 zigenewe amacumbi y’abaturage, Agakiriro, ikigo nderabuzima, amashuri mu byiciro binyuranye, imihanda, byose byatwaye agera kuri Miliyari 27 z’Amafaranga y’u Rwanda.

    Bashimye urwego ikoranabuhanga rimaze kugeraho mu mashuri yo mu mudugudu wa Kinigi
    Bashimye urwego ikoranabuhanga rimaze kugeraho mu mashuri yo mu mudugudu wa Kinigi
    Urugo mbonezamikurire rukomeje gusurwa
    Urugo mbonezamikurire rukomeje gusurwa


  • Umunyamakuru Jean Luc wa B&B FM Umwezi yahawe inshingano nshya #rwanda #RwOT

    Bikubiye mu itangazo ryasohowe n’ubuyobozi bw’iyi radio B&B FM Umwezi, rivuga ko Jean Luc Imfurayacu wari usanzwe ari Umunyamakuru usanzwe yagizwe umuyobozi mukuru ushinzwe ibikorwa by’iyi Radio.

    Iri tangazo kandi rinavuga imyato uyu musore w’Umunyamakuru ko azi byimbitse ubuzima bw’iki gitangazamakuru yahawemo umwanya wo ku rwego rw’ubuyobozi.

    Iri tangazo rivuga kandi ko yakomeje gusigasira indangagaciro za kiriya gitangazamakuru. Riti 'azi kandi intego yacu kandi afite ubunararibonye bwa kinyamwuga bizafasha iki kigo kugera ku cyerekezo n’intego byacyo.'

    Risoza rivuga ko ubuyobozi bw’iki gitangazamakuru buzakomeza kuba hafi uyu munyamakuru wahawe inshingano nshya haba mu kumuha inkunga ubundi bumwifuiza amahirwe masa.

    Jean Luc Imfurayacu wahawe inshingano nshya muri iyi radio imaze umwaka itangiye gutambutsa ibiganiro, yanyuze mu binyamakur binyuranye aho yakoze kuri Radio 10 aho ari na ho yavuye yerecyeza muri B&B FM Umwezi.

    UKWEZI.RW

    Source : http://www.ukwezi.rw/Imikino/article/Umunyamakuru-Jean-Luc-wa-B-B-FM-Umwezi-yahawe-inshingano-nshya

  • Kamonyi: Babiri bafatiwe mu cyuho bagerageza guha ruswa umupolisi #Rwanda #RwOT via @kigalitoday #rwanda #RwOT

    Umuvugizi wa Polisi mu Ntara y’Amajyepfo, SP Theobald Kanamugire, yavuze ko gushaka gutanga iyi ruswa byaturutse ku kuba hari moto abapolisi bari bamaze amezi abiri bafatiye mu Karere ka Kamonyi mu Murenge wa Runda basanga irimo amadeni y’amande angana n’ibihumbi 635Frw, nk’uko bitangazwa ku rubuga rwa Internet rwa Polisi y’u Rwanda.

    Nyiri moto yabonye ayo mafaranga atazayabona, yatangiye gushaka uko atanga ruswa kugira ngo umupolisi wayifashe ayimusubize.

    SP Kanamugire yagize ati “Moto yafatanwe Nsanzipfura kuko yayikoreshaga ubumotari, yafatiwe mu Karere ka Kamonyi. Nsanzipfura yabonye amaze gufatwa abitekerereza Nzanana (umusekirite mu bamotari mu Mujyi wa Kigali), Nzanana yamubwiye ko aziranye n’umupolisi wayifashe, amubwira gushaka Amafaranga y’u Rwanda ibihumbi 100 bakabimugiramo ikarekurwa”.

    SP Kanamugire akomeza avuga ko guhera tariki ya 3 Kanama 2021 saa saba z’amanywa, Nzanana yatangiye guhamagara umupolisi wari wafashe moto amubwira ko hari amafaranga ashaka kumuha akabarekurira moto yafashe. Umupolisi yaramwemereye, basezerana aho baza guhurira akayamuha, gusa umupolisi yari yateguye uburyo baza gufatirwa mu cyuho bazanye ayo mafaranga.

    Ati “Umupolisi yakomeje kuvugana na Nzanana bumvikana aho amusanga mu Karere ka Kamonyi. Habanje kuza Nsanzipfura azanye ruswa ingana n’amafaranga y’u Rwanda ibihumbi 50 kuko ngo yari yabwiye Nzanana ko atabona ibihumbi 100 kuko na we yari yamuhaye ibihumbi 30 kugira ngo amuteretere umupolisi”.

    Umuvugizi wa Polisi mu Ntara y’Amajyepfo yavuze ko Nsanzipfura yafatiwe mu cyuho arimo gutanga iyo ruswa, yafashwe saa kumi n’ebyiri z’umugoroba kuri uwo munsi. Amaze gufatwa hahise haza na Gakara nawe ahita afatwa.

    SP Kanamugire yibukije abantu bagifite imyumvire yo kumva ko bazajya baha ruswa abapolisi, ko ruswa ari icyaha gihanwa n’amategeko kandi Polisi y’u Rwanda ikaba iri mu nzego zishinzwe kurwanya ruswa, yabibukije ko uzajya agerageza guha ruswa umupolisi azajya ahita amwifatira ako kanya.

    Abafashwe baremera icyaha bakanagisabira imbabazi, bahise bashyikirizwa Urwego rushinzwe Ubugenzacyaha (RIB) rukorera muri sitasiyo ya Polisi ya Runda kugira ngo bakorerwe idosiye.

    Itegeko n°54/2018 ryo kuwa 13/08/2018 ryerekeye kurwanya ruswa Ingingo ya 4 ivuga ko umuntu wese usaba, utanga cyangwa wakira, mu buryo ubwo ari bwo bwose, indonke iyo ari yo yose, kuri we cyangwa ku wundi muntu cyangwa wemera amasezerano yabyo kugira ngo akore cyangwa adakora ikiri mu nshingano ze cyangwa yifashishije imirimo ye kugira ngo gikorwe cyangwa kidakorwa aba akoze icyaha.

    Iyo abihamijwe n’urukiko, ahanishwa igifungo kirenze imyaka itanu (5) ariko kitarenze imyaka irindwi (7) n’ihazabu y’Amafaranga y’u Rwanda yikubye inshuro kuva kuri eshatu (3) kugeza kuri eshanu (5) z’agaciro k’indonke yatse cyangwa yakiriye.

    Ibihano bivugwa mu gika cya 2 cy’iyi ngingo ni na byo bihabwa umuntu wese utanga cyangwa usezeranya gutanga, mu buryo ubwo ari bwo bwose, indonke iyo ari yo yose, kuri we cyangwa ku wundi muntu kugira ngo hatangwe cyangwa hadatangwa serivisi.

    Iyo ibikorwa bivugwa mu gika cya mbere n’icya 3 by’iyi ngingo byakozwe kugira ngo hakorwe ikinyuranyije n’amategeko, igihano kiba igifungo kirenze imyaka irindwi (7) ariko kitarenze imyaka icumi (10) n’ihazabu y’Amafaranga y’u Rwanda yikubye inshuro kuva kuri eshatu (3) kugeza kuri eshanu (5) z’agaciro k’indonke yatse, yakiriye cyangwa yatanze.

  • Mangwende yahawe ikaze muri ASFAR yo muri Maroc avuga imigabo n’imigambi bye #rwanda #RwOT

    Uyu wahoze akinira APR FC imaze imyaka ibiri itwara ibikombe bya Shampiyona idatsinzwe umukino n’umwe, yerecyeje muri Maroc muri iki cyumweru aho yari agiye mu ikipe ya ASFAR ifite ibigwi muri Maroc.

    Nyuma y’iminsi micye yerecyeje muri Maroc, uyu mukinnyi wari mu bakomeye muri APR FC, yahawe ikaze muri iriya kipe yo muri Maroc ubundi avuga icyo agiye kuyifasha.

    Mu mashusho yatambutse ku mbuga nkoranyambaga z’iriya kipe, agaragaza Mangwende yakirwa n’abana babiri bakamuhereza indabyo ubundi agatambagizwa mu cyumba kibitsemo ibikombe by’iriya kipe na we akagenda abisuzuma areba n’igihe igihe babyakiriye.

    Aya mashusho asozwa n’ubutumwa bwa Imanishimwe Emmanuel aho agaruka ku myaka ye ndetse n’umwanya akinaho ubundi akavuga ko yishimiye kuba umukinnyi wa ASFAR.

    Ati 'Nzatanga buri bushobozi n’imbaraga zanjye muri iyi kipe kugira ngo izamuke. Ndashimira buri wese, ndabifuriza ibyiza muri iki gihugu, muri iyi kipe.'

    Mangwende w’imyaka 26 y’amavuko, bivugwa ko yaguzwe ibihumbi 130 USD ubwo ni ukuvuga Miliyoni 130 Frw, we ubwe akaba yarahawe ibihumbi 300 USD bingana na miliyoni 300 Frw masezerano y’imyaka itatu ubundi akajya ahembwa 5,700 USD angana namiliyoni 5,7 Frw buri kwezi.

    UBWO YAHAGURUKAGA MU RWANDA

    UKWEZI.RW

    Source : http://www.ukwezi.rw/Imikino/article/Mangwende-yahawe-ikaze-muri-ASFAR-yo-muri-Maroc-avuga-imigabo-n-imigambi-bye

  • Rihanna yabaye umugore wa mbere muri Muzika ukize ku Isi #rwanda #RwOT

    Rihanna ubu arabarirwa umutungo wa miliyari irenga y'amadorari, akaba n'umugore ukize kurusha abandi muri muzika ku isi, nk'uko bitangazwa na Forbes. Iki cyamamare muri pop kibarirwa agaciro ka miliyari $1.7, mu gihe kompanyi ye ikora ibikoresho byo kunogereza uburanga bw'abagore Fenty Beauty ibarirwa agaciro ka miliyari $1.4

    Ibisigaye ku mutungo we biva ahanini kuri kompanyi ye Savage x Fenty, ikora utwambaro tw'imbere tw'abagore ibarirwa agaciro ka miliyoni $270. Undi mutungo usigaye ni uwo avana muri muzika no gukina filimi.

    Rihanna nkuko BBC ibitangaza, ubu ni uwa kabiri inyuma ya Oprah Winfrey nk'umugore ukize cyane mu bijyanye n'imyidagaduro.

    Rihanna, amazina ye nyakuri ni Robyn Fenty — yafunguye Fenty Beauty mu 2017 afatanyije na kompanyi y'imirimbo ihenze LVMH. Icyo gihe, yavuze ko intego y'ibikorwa bye ari ukuneza 'buri mugore wese uko ateye' atangirana amoko 40 y'ibyo gusiga uburanga, ibintu icyo gihe bitari byitezwe.

    Kubera uko ibicuruzwa bye byakunzwe byaganishije ku cyo bise 'Fenty Effect' aho kompanyi zindi zikora nk'ibyo byabaye ngombwa ko zagura ibicuruzwa zakoraga byo kunoza uburanga.

    Fenty Beauty yinjije arenga miliyoni $550 mu mwaka wayo wa mbere, nk'uko bivugwa na LVMH. Gusa business zose za Rihanna ntabwo zamuhiriye.

    Rihanna n'umukunzi we A$AP Rocky baherutse kuboneka bari gufata amashusho y'indirimbo yabo.

    Mu ntangiriro z'uyu maka, uyu mukobwa w'imyaka 33 yumvikanye na LVMH bafunga ishami rya Fenty rikora imyenda nyuma y'imyaka itageze kuri ibiri rikora.

    Rihanna ukomoka ku kirwa cya Barbados yagurishije kopi zirenga miliyoni 250 za muzika ye, ariko kuva mu 2016 ntarasohora album y'indirimbo. Gusa aherutse kuboneka ari gufata amashusho y'indirimbo yakoranye n'umusore w'inshuti ye,'Umuraperi' A$AP Rocky.

    Munyaneza Theogene / intyoza.com

    Source : https://www.intyoza.com/rihanna-yabaye-umugore-wa-mbere-muri-muzika-ukize-ku-isi/

  • Ruhango : Abagore 2 bakora uburaya bagundaguranye bapfa umugabo bombi batasezeranye #rwanda #RwOT

    Iyi nkundura y’abagore, yabaye kuri uyu wa Gatatu tariki 04 Kanama 2021 ndetse umwe muri bo yageze aho afata icyemezo cyo kujya kugura urwembe ubundi arukatisha mugenzi we.

    Mukanyandwi Rosine wakatishijwe urwembe avuga ko uyu mugabo yaje kumusura ubundi baza kumva umugore witwa Irene abinjiranye mu nzu kugera aho yaje gukatagura n’inzembe uyu witwa Mukanyandwi amusanze mu nzu ye.

    Ati 'Narenganye kuko umuntu yansanze mu nzu iwanjye, mfite ubwoba ko yanyanduje ubwandu kuko abufite.'

    Mukanyandwi avuga ko uwo mugabo yari yaje kumusura ngo baganira ku bijyanye n’umubano kuko uwo mugabo yari yarabimusabye undi amubwira ko bazafata umwanya bakabitekerezaho, ngo yari yaje gufata umwanzuro.

    Abaturanyi ba Mukanyandwi bavuga ko uriya mugore wakatishije mugenzi we inzembe yavuye mu wundi Mudugudu akaza kurwana muri Gataka, ngo bombi ariko basanzwe bakora umwuga wo kwicuruza uzwi nk’uburaya.

    Uyu ati 'Bose ni indaya kandi buri muntu yemerewe gucuruza ibye kandi umugabo yemerewe kugura aho yumva ibiryoshye biri.'

    Umwe mu bacyecuru bari ahabereye iki gikorwa yavuze ko bibabaje n’ubwo abo bombi bicuruza ariko Mukanyandwi yakorewe ihohoterwa agakatishwa n’inzembe ku buryo hari n’ubwoba ko yaba yamuteye indwara.

    Ati 'Niba umugore yaje agasanga umugabo ari aha ngaha kandi batarasezeranye nta n’umwana bafitanye nta mpamvu yo gukora ibi, umugabo ubwe ngo yarivugiye ngo uriya mugore nta kigenda mu buriri, dufite n’ubwoba ko ziriya nzembe zamutera na SIDA kuko uriya asanzwe ayivugwaho.'

    Abaturage bo mu Mudugudu wa Gataka bavuga ko uriya mugore witwa Irene agomba guhanwa kuko yateye Umudugudu wabo akarenga agakata n’inzembe Mukanyandwi.

    Bati 'Icyo tureba ni ukugira ngo umuntu aterwe mu rugo rwe asangwe mu nzu bamukomeretse n’inzembe, turasaba ko arenganurwa kuko iri ari ihohoterwa yakorewe kuko kugeza ubu yabuze uko ajya kwivuza kuko nta bushobozi afite.'

    Amakuru avuga ko bariya bombi baje kugezwa kuri Sitasiyo ya Polisi ya Ruhango nyuma bombi bakarekurwa bagasaba ko Mukanyandwi yajya kwivuza ariko abaturage bakavuga ko ibyo Polisi yakoze atari byo ko uriya Irene wakatishije mugenzi we inzembe yari akwiriye guhanwa n’amategeko.

    Umunyamabanga Nshingwabikorwa w’Umurenge wa Ruhango, Nemeyimana Jean Bosco, avuga ko iby’iriya nkuru y’umugore wakatishije mugenzi we izembe yayimenye abibajijwe na BTN TV.

    Yagize ati 'Ngiye kubikurikirana menye amakuru yabyo, BTN ubwayo ni yo yampaye inkuru, ubundi abaturage iyo bagize ibyo bapfa baregera ubuyobozi ariko nta kirego cyabo kugeza uyu munsi mfite.'

    Source : http://www.ukwezi.rw/mu-rwanda/Amakuru-anyuranye/article/Ruhango-Abagore-2-bakora-uburaya-bagundaguranye-bapfa-umugabo-bombi-batasezeranye

  • Umuhanzikazi Tonzi yahaye ubutumwa Rocky wihaye imvugo ya ‘Nta Gikwe'(VIDEO) #rwanda #RwOT

    Umuhanzikazi nyarwanda mu ndirimbo zo kuramya no guhimbaza Imana, Uwitonze Clementine uzwi nka Tonzi, yakebuye Rocky Kirabiranya wazanye imvugo ya ‘Nta Gikwe’.

    Rocky Kirabiranya umusobanuzi wa filime ukunzwe cyane mu Rwanda, akunze kumvikana avuga ko ‘Nta Gikwe’ azakora.

    Nyuma y’uko Meddy asohoye indirimbo My Vow ikarebwa n’abantu benshi, ikaba ari indirimbo yakoreye umugore we amusezeranya kuzamukunda iteka, harimo n’amashusho y’ubukwe bwabo.

    Uyu musore yifashe amashusho agira ati “nabonye hari umuhanzi wasohoye indirimbo agumura abantu ndetse yarebwe cyane, ariko rwose ndagira ngo mbabwire ko nta kudohoka.”

    Umuhanzikazi Tonzi uherutse gusohora indirimbo ‘Ubukwe’ yabwiye ISIMBI ko kugira umuryango ari gahunda y’Imana kandi ko umuntu utazi inkomoko ye bimubabaza cyane.

    Ati “Aha nagisubiza mu ijambo ry’Imana iyo uri kure y’Imana, iyo utazi inkomoko yawe bikugora no kumenya ahazaza hawe rero kugira ngo ikiremwamuntu kibeho kisobanukiwe ni uko umenya Imana ukamenya umuremyi wawe, uzarebe abantu bafite ibikomere byo kuba batazi ababyeyi babo, niyo wakira gute uhora uvuga uti uwazanyereka inkomoko yanjye”.

    “Rero kuba abantu tuzi ko tubeshejweho natwe n’ibintu bifatika ariko twibuke ko umuremyi wacu ari Imana iyo uri kure y’Imana utakaza orginalite yawe ariko iyo uri mu Mana ukurikiza umugambi w’Imana ugakurikiza amategeko yayo ibyo byose bikakuryohera niyo mpamvu ngo hahirwa abasogongeye”.

    Agaruka k’umvugo ya Rocky yavuze ko ashobora yarabihiwe n’aho yaturutse kuko ngo nubwo umuntu ashobora kuba agenda mu modoka nziza ariko hari ikindi abura.

    Ati “Rero kuba uriho wishimye ubona ugendera mu modoka ni uko wabyawe n’umugore wahuye n’umugabo, rero wowe niba utishimiye kuzagira umuryango ushobora kuba warabihiwe n’aho waturutse, nanjye ndi mu bukangurambaga bw’ubukwe nabo bari mu bukangurambaga bwabo ngo bwo kudakora igikwe.”

    Nubwo Rocky Kirabiranya akunze kumvikana avuga izi mvugo, nta muntu uzi neza ko aba akomeje kuko nta muntu mu buzima utakwishimira kugira umuryango.

    Rocky amenyerewe mu mvugo ya ‘Nta Gikwe’

    Tonzi avuga ko Rocky ashobora kuba yarabihiwe n’aho akomoka

    Source : http://isimbi.rw/imyidagaduro/article/umuhanzikazi-tonzi-yahaye-ubutumwa-rocky-wihaye-imvugo-ya-nta-gikwe

  • Kuba muri Amerika (USA) ntibyoroshye – Mike Davis #Rwanda #RwOT via @kigalitoday #rwanda #RwOT

    Mike Davis
    Mike Davis

    Mu butumwa burebure yanditse kuri Twitter, Mike Davis aravuga ko ku bwe asanga abantu baba bifuza kujya kwibera muri Amerika, ngo hari ibintu byinshi baba batazi, ari yo mpamvu yiyemeje kugira ibyo abasobanurira nk’umuturage w’icyo gihugu kandi ukizi neza mu mizi.

    Mu butumwa bwe kuri Twitter, Mike Davis aterura agira ati:
    “Kuba Umunyamerika mbere na mbere bivuze ko hari ibyo igihugu cyawe kigomba kugukorera, ni ukuvuga wowe, umugore wawe n’abana bawe, ariko nawe hari ibyo ukigomba kandi bikomeye.

    Ku myaka 18, abana bawe b’abahungu basabwa kwitabira ibikorwa byihariye bifitiye inyungu igihugu – urugero nko kujya mu gisirikare bakoherezwa aho rukomeye. Mbese iyo utararenza imyaka 25 utegetswe kwiyandikisha mu gisirikare! Abakobwa na bo biri hafi kubageraho.

    Ugomba kwishyura imisoro muri Leta Zunze Ubumwe za Amerika (USA) buri mwaka kugeza igihe uzapfira. Abana bawe na bo basabwa kubyubahiriza igihe bamaze kuzuza ibisabwa, kandi bakabikora iteka ryose aho baba bari hose ku isi, bapfa kuba bafite ubwenegihugu bwa USA.

    Iyo abana bawe bagiye kugurisha imitungo yawe utakiriho, bagomba kuyimenyekanisha nk’inyungu ziyongereye ku byo batunze kandi bagasobanura ibyo ari byo.

    Ikindi kandi niba ufite konti ubitsamo ziri hanze ya USA, utegetswe kuzitangira raporo buri mwaka. Ni raporo izwi nka FBAR (Report of Foreign Bank and Financial Accounts). Igihe utabyubahirije, ibihano birahari kandi biremereye!

    Ugomba kuzuza imbonerahamwe (form) izwi nka 8939 (FATCA) kuri buri gikorwa, igikoresho, konti, ishoramari ufitemo imigabane n’uburenganzira ku micungire yabyo. Igihe utabyubahirije, ibihano birahari kandi biremereye!

    Ibikorwa na serivisi muri USA *BIRAHENZE*. Abarera abana, abakozi bo mu rugo, abashoferi, abita ku bantu – wabona icyo ubahemba se?

    Amafunguro nyayo na yo abona umugabo agasiba undi. Ntibigutangaze ninkubwira ko ifunguro ry’ibanze (ridahenze) muri USA rigura hagati ya $20-25 (25.000FRW) ku muntu umwe. Ariko wifuza n’ifunguro rihendutse (iryo muri USA bita ingirwa-funguro), naryo rirahari kandi igihe cyose ku 1000FRW ($1) kuri resitora za McDonalds!”

    Mike Davis akomeza ati:
    “Serivisi z’ubuvuzi zo ni urwenya muri USA. Ni ukuri pe, yego zifite ubuziranenge buri hejuru, ariko kubwigondera ni nko kurota ku manywa. Urugero: hari ubuvuzi bubayo buzwi nka ‘ultrasound’, kubuhabwa mu gihe cy’amezi atatu – ane bigusaba kwishyura $374 (asaga ibihumbi 370FRW).

    Kugura inzu byo birahendutse mu bice byinshi bya USA (uvanyemo imijyi yihagazeho nka San Francisco, New York City), NABWO igihe ufite ikikwingiriza agatubutse KANDI ufite n’akazi katajegajega. Kugura imodoka nabyo ni kimwe. Ufite akazi wizeye? Warizigamiye? Inzu n’imodoka byo si ikibazo.

    Kubona inguzanyo *BIROROSHYE* kandi urebye ntabwo bihenze. Amakarita ya banki ya ‘Credit cards’ aguhesha inguzanyo y’inyungu ya 20% APR; mu gihe ideni rya banki ritangirwa ingwate ryo riri ku nyungu ya 2,8% (ubu tuvugana).”

    Mike Davis ariko ngo hari ibintu bimubabaza ajya abona hirya no hino ku isi biba ku Banyamerika. Aragira ati:

    “Iyo uri Umunyamerika ntuhwema guhura n’abantu bakubaza ubutitsa niba ufite abantu muziranye muri Ambasade. Ashwi ntabo pe! Ariko byibuze tuzi uko akazi kaho gakorwa. Hari n’abakubaza niba “wabafasha kubona visa” cyangwa “kubona ubwenegihugu”. Ibi duhura nabyo buri cyumweru, inshuro nyinshi, byibuze kabiri mu cyumweru.

    Mu by’ukuri mbabazwa no guhora mpatwa ibibazo n’abantu bo hirya ni hino ku birebana na politiki n’ibikorwa bya USA. Ngabo abambaza iby’intambara yo muri Afghanistan, ibya Donald Trump kugera no kuri politike y’imihindagurikire y’ikirere.

    Abantu benshi bibwira ko nkomoka mu baherwe kubera ko ndi Umunyamerika. Ashwi! Mama yari umushoferi wa bisi mu gihe data yari umukozi usanzwe wo mu ruganda ushinzwe kwakira ibyinjira, kubibika, gutunganya ibisohoka, no kugenzura ububiko.

    Ikindi kimbabaza ni ukubona aho ngiye hose bashaka kunyishyuza amafaranga y’umurengera ku gicuruzwa cyangwa serivisi runaka mba nkeneye kubera gusa ko ndi Umunyamerika. Ibi ariko ntabwo binca intege kuko mparanira guciririkanya nk’abandi bose, byananirana nkigendera ariko nagerageje kuko mba nzi neza ko ndimo guhendwa.

    Icyiza cyo muri USA ni uko ibikorwa byinshi biboneka amasaha 24 kuva kuwa mbere kugera ku cyumweru, cyane cyane mu mazu y’ubucuruzi manini. Ibi ni byo nkumbura cyane – kuva mu rugo saa cyenda za mu gitondo igihe nta bitotsi mfite nkajya guhaha ibyo nkeneye nkabibona.”

    Mike Davis aragira n’icyo avuga ku bugizi bwa nabi bwabaye karande muri USA, akagira ati:
    “Ubugizi bwa nabi burahari muri USA. Reka dufate urugero rwa Chicago: Muri Nyakanga 2021, hishwe abantu 105 barashwe; 517 bakomerekejwe no kuraswa, abishwe bose muri rusange ni 110.

    Mu mujyi wa Chicago buri minota ibiri haba harashwe umuntu umwe, (Chicago ituwe na miliyoni 2,7 z’abaturage mu gihe Kampala ituwe na miliyoni 1,5)”

    Mu kwanzura ubutumwa bwe kuri Twitter aho agerageza kwereka abatuye isi ko kuba muri Leta Zunze Ubumwe za Amerika atari ukuba muri Paradizo, Mike Davis aratanga ubundi butumwa ariko noneho asa n’uwirengera nk’uko abyivugira agira ati: Amerika na none ariko ikunda imanza.

    Mike Davis akongera ati: “Amerika ni igihugu cyiza gifite abaturage beza. Nubanira abaturanyi bawe neza mugafatanya kubaka ubumwe aho mutuye kandi UKABIGIRAMO URUHARE – Amerika rwose ishobora kukubera icumbi ryiza aho abaturanyi bawe bahinduka umuryango wawe kandi mugafatanya muri byose.

    Mboneraho no kubibutsa ko urutonde rw’ibyo nifuzaga kubabwira rutarangirira aha, kandi ko ibitekerezo byanjye nta rwego bihagarariye rwaba urw’amategeko cyangwa urw’imari cyangwa se urundi rwego runaka rutanga inama.”


  • Mu byumweru 2 impinduka zizaba zagaragaye-Minisitire Gatabazi asubiza abasaba ko insengero zifungurwa #rwanda #RwOT

    Minisitiri w’Ubutegetsi bw’Igihugu, Gatabazi Jean Marie Vianney yashimiye amadini n’amatorero muri rusange ubufatanye bwabo na Leta mu kurwanya Covid 19, by’umwihariko n’ubufasha bagaragarije abaturage mu gihe cya guma mu rugo batanga ibyo kurya. Aha niho yahereye abasaba ko bakwihangana ibyumweru bibiri hakaba hafatwa izindi ngamba, bityo insengero zigafungurwa.

    Ibi yabigarutseho kuri uyu wa 4 Kanama 2021 mu nama yahuje Minisiteri y’Ubutegetsi bw’Igihugu [MINALOC], abayobozi b’Intara n’Umujyi wa Kigali, abahagarariye inzego z’umutekano n’abayobozi b’ihuriro ry’Amadini n’Amatorero mu Rwanda. Yigaga ku busabe bwabo bw’uko bakoroherezwa insengero zikongera gufungura.

    Mu kiganiro yahaye Radio Rwanda Minisitire Gatabazi asubiza icyo kifuzo yagize ati' Twakiganiriyeho, ubundi inama y’abaminisitire iyo yateranye igafata imyanzuro iba igomba gushyirwa mu bikorwa kuko iba yasuzumwe mu buryo bw’ubushishozi.

    Twaberetse uko icyorezo gihagaze muri buri ntara, bo bakekaga ko imirenge 50 ari yo ifite ikibazo gikomeye ariko twaberetse ubwandu hirya no hino mu gihugu kuri buri ntara. Baza kubona ko hari imirenge myinshi ifite ubwandu buri hagati ya 5 na 10%.'

    Minisitire gatabazi yijeje ko' Mu gihe cy’ibyumweru bibiri impindua zizaba zagaragaye' , hanyuma bagakomeza kwifashisha ikoranabuhanga n’itangazamakuru nka radiyo, tereviziyo n’ubundi buryo.

    Abayobozi b’amadini n’amatorero kandi barasabwa gushishikariza abayoboke babo kubahiriza amabwiriza yo kwirinda Covid-19 no kwitabira gahunda yo kwakira inkingo.

    [email protected]

    Source : https://agakiza.org/Mu-byumweru-2-impinduka-zizaba-zagaragaye-Minisitire-Gatabazi-asubiza-abasaba.html