Author: webrwanda

Umugabo ukekwaho icyaha cy’ubwicanyi buturutse ku bushake yaba yarakoreye umugore we, cyabereye mu Murenge wa Rugendabari, Akarere ka Muhanga, Intara y’Amajyepfo, ku itariki ya 13/1/2022.

Ukekwa akaba yarishe umugore we amunize mu ijosi nk’uko byagaragaraga ko harimo ibikomere by’inzara hanabyimbye, akingirana umurambo ahita acika.

Ukekwa amaze kwica nyakwigendera, yakingiranye umurambo, atwara n’imfunguzo z’inzu, abana batashye bavuye ku ishuri basanga harakinze bajya ku baturanyi, nyuma nibwo umukuru muri bo yagiye kubashaka barataha, bageze mu rugo yica umusumari wari ukingishije idirishya, acishamo umwana muto yinjira mu nzu ajya kuzana izindi mfunguzo babikaga mu nzu, binjiyemo basangamo umurambo wa nyina.

Ukekwa ndetse n’umugore we bari basanzwe ku rutonde rw’ingo zibanye nabi, hari n’igihe ukekwa yari aherutse gutaha yanyoye inzoga yasinze aniga umugore we, bamujyana ku Kagali, agezeyo umugore we amusabira imbabazi baramureka arataha.

Ukekwa akaba yari yarafungiwe icyaha cya Jenoside kuva mu mwaka wa 1994 kugeza mu wa 2009, akaba yari yararangije igihano cy’imyaka 15 yari yarakatiwe kuri icyo cyaha cya Jenoside yakorewe abatutsi muri Mata 1994.

Ukekwa aramutse ahamwe n’icyaha akurikiranyweho, yahanishwa igifungo cya burundu, giteganywa mu ngingo ya 107 y’Itegeko N°68/2018 ryo ku wa 30/08/2018 riteganya ibyaha n’ibihano muri rusange.

UKWEZI.RW

Bariyanga Sylvestre na Ryumagabe Jean d’Amour barezwe n’Ubushinjacyaha kugurisha abantu bane bose bavutse mu mwaka wa 2002.

Ubushinjacyaha bwaregeye Urugereko rwihariye rushinzwe kuburanisha ibyaha mpuzamahanga n’ibyambukiranya imipaka ruri i Nyanza mu Majyepfo y’u Rwanda.

Kuri uyu wa 20 Mutarama 2022 ubwo Urukiko rwaburanishaga uru rubanza hifashishijwe ikoranabuhanga rya 'Skype’, Ubushinjacyaha bwabwiye Urukiko ko bariya bagabo bafashe abana bane (amazina yavuzwe mu rukiko) mu mwaka wa 2019 babajyana mu gihugu cya Uganda gusarura ibigori.

Ubushinjacyaha bwabwiye Urukiko ko bariya bantu babikoze babishaka bagiye gucuruza abantu barabambutsa ababyeyi babo batabizi.

Ubushinjacyaha bushingiye kuri raporo y’Akagari buvuga ko bariya bagabo ari bo bajyanye bariya bantu kubagurisha.

Ati 'Ababyeyi bamenye amakuru batanga ikirego ko babuze abana babo kandi bazi ababatwaye bagiye kubacuruza, cyane ko banahageze bakamara amezi ane badahembwa batanazi n’uko bagiyeyo kuko bajyanwe n’abaregwa.'

Ubushinjacyaha burasaba abaregwa ko ibyaha bibahama bagahanishwa igihano cy’igifungo cy’imyaka 25.

Umucamanza ahaye umwanya abaregwa ngo biregure, Ryumugabe Jean d’Amour yavuze ko iriya miryango ya bariya bana ubusanzwe bari bafitanye amakimbirane menshi y’umuryango.

Uyu wakunze kumvikana atavuga ururimi rw’Ikinyarwanda neza kimwe na mugenzi we (bombi bavuga Urukiga), yavuze ko abamureze kiriya cyaha bamubeshyera, ngo bagenda ntabwo yari abizi.

Ati 'Barijyanye cyangwa bajyanye n’undi bagenda simbizi njye nari niriwe mu kabari.'

Yavuze ko umukuru w’uriya Mudugudu atuyemo abizi ko atari we wabajyanye agasaba kugirwa umwere.

Bariyanga Slyvestre wahawe umwanya na we ngo yiregure, yavuze ko abamureze bamubeshyera ngo igihe abo bana bagenda yari yiriwe mu kabari, ngo ntiyari ahari kandi baturiye umupaka wa Uganda, ngo kwijyana cyangwa kujyanwa n’abandi birashoboka.

Ati 'Bariho baranjyendaho bambeshyera ibyo ntakoze.' Bariyanga yasabye ko yagirwa umwere ku byo aregwa.

Bariyanga Sylvestre na Ryumagabe Jean d’Amour bafungiye muri Gereza ya Gicumbi. Umucamanza yapfundikiye urubanza avuga ko bitewe n’imanza nyinshi urubanza rwabo ruzasomwa tariki 02 Werurwe, 2022.

Minisitiri Gatabazi n’abamuherekeje basura ubuyobozi bwa Pariki ya Gishwati-Mukura

Icyo kibazo cyatangiye kuva muri Kanama 2020 kugeza ubu, ubuyobozi bw’Urwego rw’igihugu rw’iterambere (RDB), bukemeza ko bumaze kugezwaho ibibazo 99 bijyanye n’inka zariwe n’inyamaswa, ihene 9 n’intama 10.

Uretse amatungo yariwe, inyamaswa zangije imyaka y’abaturage 49, na ho umuntu umwe yakomerekejwe na zo.

Ubuyobozi bwa Pariki ya Gishwati-Mukura buvuga ko ibibazo byatewe n’inyamaswa zivuye muri Pariki ya Gishwati-Mukura ari 168, na ho izikekwaho guteza ibyo bibazo zirimo ni impyisi, imbwa, ingunzu, imondo n’urutoni.

Abashyitsi baganirira n’abakozi b’iyo Pariki

Minisitiri w’Ubutegetsi bw’igihugu, Jean Marie Vianney Gatabazi, avuga ko hari inama zatanzwe, kandi Ubuyobozi bugiye kujya bwihutisha igikorwa cyo kwishyura abangirijwe n’izo nyamaswa, ariko asaba aborozi gushaka ubwishingizi bw’amatungo.

Agira ati 'Turifuza ko abaturage baba inshuti na Pariki ndetse n’inyamaswa ziyirimo zikaba inshuti n’abaturage, ku buryo ku kibazo cy’inyamaswa ziva muri Pariki zikajya kurya amatungo y’abaturage, ubuyobozi bwayo bugaragaza ingamba zo kubirinda, ndetse abaturage bafite amatungo yariwe n’inyamaswa bakajya batangira raporo ku gihe. Abaturage bafite imitavu bayubakire ibiraro ku buryo inyamaswa zitazapfa kuyisangamo.”

Minisitiri Gatabazi avuga ko ingamba zo kurinda amatungo bijyana no gukora uburinzi bw’ijoro ndetse aborozi bakagira ubwishingizi bw’amatungo.

Akomeza avuga ko amafaranga yinjira avuye muri Pariki hari ibikorwa bimwe iyashoramo bifasha abaturage kwiteza imbere.

Minisitiri Gatabazi yakiriwe n’umuyobozi w’Akarere ka Rutsiro

Agashimira abafatanyabikorwa bagiye kugira uruhare mu kuyagura ikava kuri Ha 35,5 ikagera ku buso bwa ha 55.

Abaturage baririwe amatungo n’inyamaswa bavuga ko bishyurwa bitinze ndetse n’abishyuwe bagahabwa amafaranga makeya kuko inka y’ingweba igenerwa amafaranga ibihumbi 250 kandi icyo giciro ari gito.

Indirimbo Ndakomeje ni imwe mu ndirimbo z'uyu muhanzikazi wumva zikagusubizamo imbaraga ndetse uburyo iririmbwemo n'aho yafatiwe, ni indirimbo ifite igisobanuro kinini kubayumva.

Kugeza ubu indirimbo Senga B yasohoye imaze kurebwa n'abarenga ibihumbi 25 ku rubuga rwe rwa youtube rwitwa Senga & Byuzuye, ikaba imaze ibyumweru bitatu isohotse, abamaze kuyireba bakaba bahamya ko bafashijwe nk'uko bigaragara mu bitekerezo biyiriho.

Uyu muhanzikazi yakunzwe cyane mu ndirimbo Ndabizi imaze amezi icyenda isohotse yakoranye n'umuhanzi Adrien Misigaro, nayo yaje gukundwa n'abatari bake bitewe n'amajwi meza yumvikana muri yo.

Senga B afite umunezero w’ibyo Imana imukorera umunsi ku munsi

Ibyihariye kuri Senga B, umuramyi ukorera umuziki we muri Canada

Senga B. ni umuramyi, uririmba indirimbo zihimbaza Imana, akaba yubatse ndetse akaba atuye mu gihu cya Canada. Ni umuramyi usengera mu itorero rya Source Of Life, akaba ari Music director cyangwa se umutoza wamajwi mu rurimi rw'ikinyarwanda.

Mu kiganiro Kirambuye yagiranye na InyaRwanda, umuramyi Senga B yasobanuye uburyo impano yo kuririmba yaje, ahereye muri korari y'abana kugeza abaye umuyobozi w'amajwi mu rusengero

Yagize ati'' Mu byukuri nakuze nsanga ndirimba, natangiriye muri korari y'abana mu itorero nasengeragamo, kugeza mbaye n'umuyobozi w'amajwi muri korari nkuru y'itorero, nakomeje kuririmba”.

Yakomeje avuga uko impano yaje agira ati'' Gusa mu mwaka wa 2020 nibwo umutima wanjye wampamirije ko aricyo gihe cyanjye cyo gutangira umurimo wo kuririmba ku giti cyanjye. Nkaba maze gushyira hanze indirimbo 3 z'amashusho”.

Senga B. yabwiye InyaRwanda ko indirimbo ya mbere yatangiriyeho yayise NDABIZI  yakoranye n'umuhanzi Adrien Misigaro yasohotse muri 2021, iya 2 ayita BIREMERA. Nayo yasohotse mu 2021 ndetse n'iyi ya 3 nshya yise ‘Ndakomeje’ yasohotse mu byumweru bibiri bishize.

Senga B. asanzwe ari umutoza w’amajwi mu rusengero

Mu gisobanuro ndetse n'ibyiyumviro yari afite ajya gusohora indirimbo Ndakomeje, Senga B avuga ko nyuma y'umwaka umwe atangiye, iyi ndirimbo yayanditse ifite igisobanuro gikomeye cyane mu rugendo rwe rwo gukorera Imana.

Senga akomeza avuga ko yayanditse nk'igihamya cy'uko akomeje gukorera umwami wamuhagaye, ndetse nta gifite kumusubiza inyuma n'ubwo ari urugendo rutoroshye, ariko afite Umufatanyabikorwa we Yesu udashobora kumuhemukira,  Agira ati''Niwe untera imbaraga zo gukomeza icyo niyemeje gukora. Ni ukuri nasanze nta gihombo kiri mu gukorera Imana, ihemba neza. Niyo mpanvu nabihamije mvuga nti 'NDAKOMEJE'

Senga B. ni umumama wubatse

Senga B yavuze ko intego nyamukuru afite nta yindi uretse kwagura ubwami bw'Imana biciye mu ndirimbo avuga ko abakunzi be n'abakunzi b'umuziki wo kuramya bakwitega izindi ndirimbo, hatagize igihinduka mu mezi make ari imbere hari indi ndirimbo ye ateganya gushyira hanze.

Senga B. atuye muri Canada

         KANDA HANO UREBE INDIRIMBO NDAKOMEJE BY SENGA B.

Umubyeyi wahawe ibikoresho by’amashanyarazi akomoka ku mirasire y’izuba yishimiye kuva mu icuraburindi

Yabibasabye ku wa Kane tariki ya 20 Mutarama 2022, ubwo ingo 1,000 zashyikirizwaga amashanyarazi akomoka ku mirasire y’izuba binyuze muri gahunda ya CanaChallenge, ihuriwemo na RDB, Banki ya Kigali ndetse n’ubuyobozi bw’Intara y’Iburasirazuba.

Mu ijambo rye, Emmanuel K. Gasana yavuze ko gucanira abaturage biri mu murongo wo kugira ngo umuturage abone umutekano, buri Munyarwanda agire amahirwe angana n’aya mugenzi we.

Yagize ati 'Muri wa murongo wo kugira ngo umuturage wese agire umutekano, Umunyarwanda wese agire amahirwe angana n’aya mugenzi we, reka twihe umurongo wo kugenderaho dushyigikire iki gikorwa kandi tuzanakurikirane n’umusaruro wacyo.'

Uretse gucana mu nzu, uyu murasire uzana na Radiyo ku buryo abaturage babasha kumva amakuru n’impanuro z’abayobozi

Yasabye abaturage gufata neza ibikorwa begerejwe kugira ngo badatatira igihango cyangwa bagakora ibinyuranye n’ibyo ubuyobozi bw’igihugu bubifuriza.

Ati 'Ibi bikorwa mugomba kubifata neza kugira ngo mudatatira igihango cyangwa mugakora ibinyuranye n’ibyo ubuyobozi bw’igihugu bubifuriza.'

Iyi gahunda ya CanaChallenge izageza ku baturage 10,000 amashanyarazi akomoka ku mirasire y’izuba, cyane ahatagera umuriro usanzwe w’amashanyarazi mbere y’umwaka wa 2024, aho buri Munyarwanda wese azaba afite amashanyarazi mu nzu ye.

Mu bigenderwaho kugira ngo umusore yemererwe kwiyandikisha muri iri rushanwa harimo kuba afite hagati y’imyaka 18 na 30 y’amavuko.

Byukusenge Moïse uhagarariye sosiyete itegura Mr Rwanda, yatangaje ko abarenga 600 bamaze kwiyandikisha muri Mr Rwanda ,Ubwo kwiyandikisha muri iri rushanwa byatangiraga ku itariki ya 17 Ukuboza 2021, Super Manager ari mu bambere batangaje ko yamaze kwiyandikisha, icyo gihe yavugaga ko afite imyaka 23 ibintu byatunguye benshi.

Byiringiro Moise umuyobozi wa kompanyi itegura iri rushanwa yahamije ko Super Manager yiyandikishije kandi barebye ibyangombwa bye bakabona koko afite imyaka 23 y’amavuko.

Ati 'Super Manager yariyandikishije mu irushanwa, imyaka 23 yavuze ni nayo twabonyeho'.

Moise yakomeje avuga ko kugeza ubu hamaze kwiyandikisha abasore barenga 600, biteganyijwe ko kwiyandikisha bizasozwa kuwa Gatanu tariki ya 28 Mutarama 2022. Abujuje ibisabwa bazahita bamenyeshwa uburyo bazakora amajonjora.

Byukusenge yavuze ko muri iki cyumweru aribwo kwiyandikisha bigomba kuba byarangiye hagatangira igikorwa cyo gutoranya abazahagararira buri Ntara muri iri rushanwa.

Bitewe n’ingaruka z’icyorezo cya Covid-19, iri jonjora ry’ibanze byitezwe ko rizaba hifashishijwe ikoranabuhanga.

Ati 'Itsinda ry’abagize akanama nkemurampaka rigiye kwicara ritegure ibibazo, buri wese wiyandikishije tuzabimwoherereza hanyuma yifate amashusho ayatwoherereze.'

Aya mashusho azatambuka kuri RBA hanyuma babandi bagize akanama nkemurampaka batoranye abitwaye neza kurusha abandi.

Aba nibo bazajya mu mwiherero mbere y’uko hatoranywa Rudasumbwa uzaba yahize abandi n’ibisonga bye, icyakora bitewe n’ingaruka za Covid-19 ingengabihe y’iri rushanwa ikaba yarahindutse.

Byukusenge yavuze ko ibijyanye n’ingengabihe nshya y’irushanwa bazabitangaza mu minsi iri imbere.

Biteganyijwe ko umusore uzabasha kwegukana ikamba rya Mr Rwanda azahabwa ibihembo birimo imodoka nshya yo mu bwoko bwa Toyota Celica n’icumbi ry’umwaka mu nyubako za TomTransfers.