Author: webrwanda

Uku ni ko Biryogo izaba isa mu minsi mike iri imbere

Ni Agace gasanzwe karangwamo uruja n’uruza rw’abantu bitewe n’ibikorwa by’ubucuruzi bihakorerwa byiganjemo ubucuruzi bwa Thé Vert, aho ibikorwa by’ubugeni byatangiye gukorwa kuri uyu wa Gatanu tariki 22 Mutarama 2022, bitangirira mu mihanda itatu ariyo KN 115 St, KN 113 St na KN 126 St.

Mu butumwa bugaragara ku rubuga rwa Twitter y’Umujyi wa Kigali, buvuga ko iyi ari gahunda igamije impinduka zishingiye ku byifuzo by’abaturage, aho Umujyi wa Kigali urimo kwifashisha ubugeni mu guhindura Biryogo Car Free Zone, ahantu rusange h’ibikorwa n’urujya n’uruza rw’abantu.

Ubwo bugeni burimo gukorerwa mu mihanda ngo buzatuma Umujyi urushaho kugaragara neza no kugendwa, akaba ari gahunda yiswe #KigaliYacu.

Mu rwego rwo gusubiza ibyifuzo by’abaturage kandi, urubyiruko rwize mu ishuri ry’Ubugeni n’Ubuhanzi rya Nyundo, nirwo rwahakoreye igishushanyo cy’ubugeni, ibi ngo bikaba ari ingufu zihindura uburyo abanyakigali bari basanzwe bamenyereye kuba mu Mujyi wabo, ahubwo zigakurura abawusura ari nako zizamura imibereho y’abahatuye.

Mu gutangiza ibi bikorwa umuyobozi w’Umujyi wa Kigali wungirije ushinzwe imiturire n’ibikorwaremezo, Dr Merard Mpabwanamaguru, niwe wifatanyije n’abanyabugeni gusiga amarangi bashushanya uko byateganyijwe.

Umujyi wa Kigali ni umwe mu Mijyi 15 yo ku isi iheruka gutsindira igihembo muri 'Mayors Challenge', mu irushanwa ryari ryitabiriwe n’imijyi 631 yo mu bihugu 99 byo hirya no hino ku isi.

Ni irushanwa riba rigamije kugaragaza udusha imijyi yahanze, aho umushinga w’Umujyi wa Kigali wari mu cyiciro cyo kubungabunga ibidukikije, ukaba wari uwo gufata amazi mu duce tudafite imiturire myiza.

CSP Francis Muheto asanga abamotari bishora mu byaha bakurikiye inyungu basiga icyasha bagenzi babo

Ibyo yabigarutseho ku wa Gatanu tariki 21 Mutarama 2022, mu biganiro byahuje Polisi na bamwe mu bakora umwuga wo gutwara abagenzi kuri moto (abamotari) bo mu Turere twa Musanze, Burera na Gakenke; bigamije kurebera hamwe uko barushaho kunoza ibyo bakora.

CSP Muheto, yagarutse ku byaha bimwe na bimwe abamotari bakunze kugiramo uruhare, harimo gutwara abantu bambukiranya imipaka mu buryo butemewe n’amategeko, batunda magendu n’ibiyobyabwenge, gutwara abajura n’ibyo baba bibye, abarenza amasaha agenwe yo kuba bageze mu ngo zabo n’ibindi.

Abishora muri ibyo byaha, CSP Muheto, abasanisha n’abatifuriza igihugu ineza nk’uko yabigarutseho.

Agira ati 'Icyo dusaba abamotari cyane cyane bishora muri ibyo byaha, ni ukuzibukira, ahubwo bakajya baduha amakuru, kuko akenshi nk’abo bantu batwara b’abanyabyaha, baba baziranye cyangwa banamenyeranye na bo. Ufite magendu cyangwa ibiyobyabwenge akuye ahantu runaka, aba afite abamotari akorana na bo bamufasha kubigeza iyo abijyana'.

Ati 'Umujura wibye mu rugo rw’umuturage, aba afite umumotari umwe cyangwa babiri ndetse yewe banarenga aziranye na bo, ku buryo harimo uwo yiyambaza akaza kumutwaza ibyo yibye. Tukaba rero duhamagarira abamotari kuba abafatanyabikorwa beza ba Polisi, bo kujya bayiha amakuru atuma duhita dufata abo banyabyaha hakiri kare'.

Mu Ntara y’Amajyaruguru habarirwa abamotari basaga ibihumbi 4,000 muri Koperative 15

Abamotari na bo bemera ko hari uruhare runini bagiraga mu byaha bitandukanye bigaragara, bakurikiye inyungu z’amafaranga.

Uwitwa Kalisa Claude ati 'Hari igihe umuntu yaturukaga mu misozi cyangwa mu mayira atazwi, afite nk’ibintu mu bipfunyika, kandi bigaragara ko ari magendu cyangwa ibiyobyabwenge. Kubera kwirukankira icyashara cy’amafaranga, nkihutira kumushyira kuri moto, hakaba ubwo tugeze nko mu nzira tugahura na Polisi, ikaduhagarika, ikadufata, tugahanwa twembi. Ubu ingamba ntahanye ni ukujya ntwara umugenzi mbanje kugenzura, nkamenya ibyo afite mu muzigo we, nasanga ari ibitemewe nkamutangira amakuru'.

Ineza Jean Marie Vianney na we ati 'Abatobora amazu y’abaturage biba za Flat n’ibindi bikoresho byo mu ngo, babikora mu masaha ya nijoro. Ayo masaha nta magare cyangwa imodoka ziba zikora akazi ko gutwara abagenzi uretse za moto. Ugasanga bamwe muri twe tugira uruhare mu gutwara abo bajura baba bavuye kwiba mu ngo. Ubu rero icyo njye niyemeje, ni uko n’igihe nemereye gutwara uwo mujura aho agiye, nzajya mujijisha mpite mutangira amakuru mu nzego zishinzwe umutekano, zize zimufate, zimuryoze icyo cyaha'.

Abamotari bemeza ko ibyaha byinshi bigaragara mu mwuga wabo, bibagiraho ingaruka zirimo, gucibwa amande, gufatira ibinyabiziga byabo cyangwa gutabwa muri yombi; imiryango yabo igasigara ihanganye n’ingaruka z’ubukene.

Muri ibi biganiro, abamotari babyitabiriye bahamije ko basobanukiwe uburemere bw’icyaha cyo kwirengagiza amategeko n’amabwiriza bakuriye inyungu z’amafaranga, aho biyemeje kugicikaho.

Mu bindi abamotari basabwe na Polisi y’u Rwanda, ni ukubahiriza amategeko y’umuhanda bayitwararika kugira ngo birinde impanuka, ari na ko barushaho kurengera ubuzima bwabo n’ubw’abagenzi batwara.

Ubuyobozi bw’Akarere ka Musanze bwari buhagarariwe na Bagirishya Pierre Claver, Umunyamabanga Nshingwabikorwa wako, wibukije Abamotari ko iterambere baharanira, badashobora kurigeraho badafite ubuzima bwiza. Akaba ariho yahereye abasaba kwirinda icyorezo cya Covid-19 no kukirinda abagenzi batwara. By’umwihariko bitabira kwikingiza byuzuye, nk’uburyo bwo guhashya ubukana bwacyo.

Mu Ntara y’Amajyaruguru, habarurwa Koperative 15 z’abamotari, zibumbiyemo abanyamuryango basaga 4000.

Abanyamideli batandukanye bakomeje kwerecyeza mu Bufaransa ahagiye kubera ibitaramo bitandukanye byo kumurika imideli. Muri abo harimo umukobwa ukiri muto witwa Claire Uwamahoro wamaze kugerayo. 

Mu kiganiro n'INYARWANDA, uyu mukobwa yatangaje byinshi ku mwuga we wo kumurika imideli. Ati:'Natangiye kumurika imideli niga mu mwaka wa mbere w'amashuri yisumbuye bisanzwe gusa nkajya ngenda mpiga abandi mu marushanwa y'imideli yabaga yeteguwe nk’aho nabaye Best Model niga mu mwaka wa gatatu (S3).'

Akomeza agira ati: 'Naje kandi no kuba Top Model niga mu mwaka wa gatanu (s5) nza kumva nifuza kuzajya muri Miss Rwanda ngo mbone amahirwe yo kuzavamo umunyamideli ukomeye nyamara byaje kuba mbere yuko njyamo.'

Yemeza ko kugeza ubu atagitekereza kuba Miss Rwanda kuko icyo yayifuzagamo yabonye inzira yindi ituma abasha kukigeraho, gusa akemeza ko bishoboka ati:'Nta nzozi zo kuba Miss Rwanda ngifite cyeretse nibiza nyuma ariko ubu ntazo kugeza ubu.'

Claire Uwamahoro witwa La_Claire ku mbuga nkoranyamabaga, kugeza ubu afitanye amasezerano na Agency zitandukanye zirimo izo mu Rwanda n’izo mu mahanga nka Rwandan Models Academy, Isis Models Rwanda na Select Models Paris iri mu zikomeye ku mugabane w'Uburayi imaze imyaka irenga mirongo ine.Claire ari kubarizwa mu murwa mukuru w’u Bufaransa, Paris

Yakuranye inzozi zo kuzaba Miss Rwanda ngo azabone uko avamo umunyamideli ukomeye nyamara byatangiye kugerwaho atarayikandagiramo