Author: webrwanda

Amavuriro yigenga ashinja ibyo bigo kutishyura mu gihe abayobozi babyo bahakana bivuye inyuma ko nta mwenda batarishyura, uretse ibibazo biri mu nyemezabwishyu batarumvikanaho.

Umuyobozi w’ishyirahamwe ry’amavuriro yigenga mu Rwanda Dr. Dominique Savio Mugenzi, avuga ko byari birambiranye igihe kikaba cyari kigeze kugira ngo ibigo by’ubwishingizi bimenye ko bigomba kujya byishyurira igihe amavuriro yigenga.

Ati 'Mwibaze namwe ikigo cy’ubwishingizi kimara kitishyura ivuriro, murabyumva ko iryo vuriro ridashobora gukora kuko rirahomba, ugasanga riraka imyenda muri banki kugira ngo ribashe gutanga imishahara, ibyo rero twasanze birambiranye. Turagira ngo birangire, bibonerwe umuti wa burundu bye kuzongera, ibigo by’ubwishingizi bijye byishyura amavuriro yigenga ku gihe'.

Akomeza agira ati 'Icyo cyemezo rero ntabwo twagifashe kubera ko tutari twarakiganiriyeho n’ibyo bigo, birabizi ko twagiranye ibiganiro bitandukanye, ari amavuriro ku giti cyayo yandika avuga ati kuki mutatwishyura, ishyirahamwe naryo rikandika riti kuki mutinda kwishyura ariko nta gisubizo cyabonetse'.

Ibigo by’ubwishingizi bifitanye ibibazo n’amavuriro yigenga ntibyemera ko hari ibirarane bafitiye amavuriro yigenga, kuko bavuga ko inyemezabwishyu arizo zifite ibibazo batemeranyaho.

Umuyobozi wa Radiant, Marc Rugenera, avuga ko amafaranga bari barimo bayishyuye.

Ati 'Rwose amafaranga twari tubarimo twarayishyuye yose bitarengeje ukwezi kwa 11, icyo nemera cy’uko wenda hari inyemezabwishyu zishobora kuba zitarishyuwe, ni kwa kundi umuntu akora inyemezabwishyu akayohereza, twavuga tuti ibi ntabwo bitunganye, turanamwandikira tukamubwira ngo aze twumvikane ku bigomba kwishyurwa n’ibitagomba kwishyurwa'.

Akomeza agira ati 'Iyo ikintu cyishyurwa amafaranga ibihumbi 10, wowe ugaca ibihumbi 15, ibyo bitanu birenzeho tutabyumvikanyeho aba agomba kuza kugira ngo tubyumvikaneho turebe ibigomba kwishyurwa. Usibye ko izo nyemezabwishyu zifite ibyo bibazo gusa cyangwa izitaratugeraho cyangwa aribwo zikitugeraho bigomba gusaba igihe cyo kubisuzuma, twebwe turishyura'.

Abaganga kandi baninubira uburyo ibyo bigo bibategeka kubyo bagomba gukorera umurwayi n’ibyo batagomba kumukorera, kandi bo ari abanyamwuga bazi neza icyo umurwayi akeneye.

Umwe muri bo ati 'Nitwe twabyigiye, nitwe tuzi serivisi z’ubuvuzi ariyo mpamvu aritwe dukwiye kugira ijwi hanyuma ibigo by’ubwishingizi bikagendera kubyo tuba twabahaye kuko twebwe dukora ku buzima bw’Abanyarwanda kuruta uko ibigo by’ubwishingizi byaza bitegeka cyangwa bafata umwanzuro ku bijyanye n’imivurire n’uburyo tuvura abantu'.

Iki cyemezo gishobora kuzagira ingaruka ku banyamuryango basaga ibihumbi 100, mu Rwanda habarirwa amavuriro yigenga agera kuri 315 yakiriye abasaga miliyoni muri 2020 ariko uyu mubare ukaba wariyongereyeho 30% mu mwaka wa 2021.

Inzu abo batirage barimo kubakirwa zizuzura muri Mata uyu mwaka

Uwo mushinga watangiye kubakira inzu imiryango 40 itari ifite aho kuba, bityo iture itekanye inabashe gukora yiteze imbere, cyane ko igizwe n’abatishoboye, bikaba biteganyijwe ko zizaba zuzuye muri Mata uyu mwaka.

Umwe wabaruwe mu bazahabwa inzu ku ikibitiro, ni Uwanyirigira Sophia wo mu Murenge wa Rubaya mu Kagari ka Nyamiyaga, avuga ko yishimiye icyo gikorwa kuko atatekerezaga ko yazabona inzu ye.

Ati 'Imvura yaguye ari nyinshi noneho amazi aramanuka aduhirikira inzu, nyuma baducumbikira mu mashuri. Icyakora baje kutubarura batubwira ko bagiye kutwubakira inzu nziza nkumva ari inzozi, none ndabona ibyari inzozi bigiye kuba impamo kuko inzu barimo kuzitwubakira. Ndishimye cyane kandi ndashimira umushinga Green Gicumbi ugiye kudukura muri ntuye nabi'.

Uretse kuba ategereje ko inzu ye yuzura akayitahamo, Uwanyirigira ubu yahawe akazi mu mudugudu wubakwamo izo nzu, ku buryo akora agahembwa akagira ayo yifashisha n’umuryango we ndetse akanizigamira.

Undi na we utegereje inzu ni Nyirabashyitsi Josiane, avuga ko agize amahirwe akomeye kuko atazongera guhangayika.

Ati 'Ndashimira cyane ubuyobozi bwabonye ko nkeneye inzu none ikaba igiye kuzura. Ni ibyishimo byinshi kuri jyewe, kuko ubu sinzongera kugira impungenge zo kuba nasiga umwana mu nzu ngiye gushaka igitunga urugo, kuko uko mbibona ari inzu nziza, ikomeye kandi yubatse ahatari mu manegeka'.

Umuyobozi w’Umushinga Green Gicumbi, Kagenza Jean Marie Vianney, avuga ko uretse kubakira inzu abagenerwabikorwa, bazanahabwa ubundi bufasha kuko ari imiryango itishoboye.

Ati 'Abagenerwabikorwa b’uyu mushinga ni abo mu cyiciro cya mbere n’icya kabiri by’ubudehe, bivuze ko ari abakene bafashwa kwiyubaka. Muri bo abafite imbaraga bose tubaha akazi, haba hano twubaka, mu materasi, mu gutera ibiti n’ahandi, ni bo b’ibanze. Nyuma yo kubaha inzu tuzabaha n’inka, bazafashwa guhinga imboga n’ibindi'.

Biteganyijwe ko umushinga Green Gicumbi uzubakira imiryango 200, aho inzu 100 zizubakwa mu Murenge wa Rubaya ari na ho hagiye kuzura izo 40, naho izindi 100 zikazubakwa mu Murenge wa Kaniga, uwo mushinga ukazarangira utwaye miliyari 1.6 y’Amafaranga y’u Rwanda.

Hazaba harimo n’inzu zigeretse

Umushinga Green Gicumbi umaze mu Karere ka Gicumbi imyaka ibiri ariko ibikorwa byawo bikaba bikomeje kuko biteganyijwe ko uzamara imyaka itandatu. Uwo mushinga ukora ibikorwa byo kurengera ibidukikije, aho bacukura amaterasi, gutera ibiti, gusazura amashyamba yaba aya Leta n’ay’abantu ubwabo, guha abaturage imbuto nziza no kubahugura ku buhinzi butanga umusaruro utubutse n’ibindi.

Uwo mushinga ukorera mu mirenge icyenda y’Akarere ka Gicumbi, ari yo Rubaya, Cyumba, Kaniga, Mukarange, Rushaki, Shangasha, Manyagiro, Byumba na Bwisige.

Umukino utari uwo kwibuka kuri Rayon Sports, nyuma yo kwandagazwa na Marine FC ivuye i burengerazubwa bw’u Rwanda. Wari umukino wo ku munsi wa 14 wa shampiyona, gusa uyu mukino ukaba watinze gutangira kuko amasaha yageze hakirimo umukino wa shampiyona mu bagore.

Abakinnyi Rayon Sports yabanje mu kibuga: Kwizera Olivier 

Mugire Kevin 

Mujyanama Fidele Mitima Isaac 

Ndizeye Samuel 

Iranzi Jean Claude Mugisha François 

Mico Justin 

Niyigena Clement, Manace Mutatu

Elo Manga Steve.

Ku munota wa 21 gusa nibwo Marine FC yafunguye amazamu ku gitego cyatsinzwe na Amiku Nahimana, ndetse yereka Rayon Sports ko ibintu bishobora kutaba byiza 

Abakinnyi Marine FC yabanje mu kibuga:

1.TUYIZERE Jean Luc

22.DUSINGIZEMUNGU Ramadhan 

13. HAKIZIMANA Felicien

4. RUSHEMA Chris

20. HIRWA Jean de Dieu

12. NTAKIRUTIMANA Theotime

5. GIKAMBA Ismael (C) 

10. ISHIMWE Fiston

25. NIYITANGA Emmanuel

19. NAHIMANA Amimu

21. NDAYISENGA Ramadhan

Igice cya mbere cyarangiye nta zindi mpinduka zibayeho, bikiri igitego kimwe ku busa bwa Rayon Sports.

Mu gice cya kabiri, Marine FC yagarutse ifite imbaraga n’umuvuduko nk'ibyo yatangiranye mu gice cya mbere. Ishimwe Fiston yaje gutsinze ibitego 2 byikurikiranya, harimo icyo yatsinze ku munota wa 69 ndetse n’umunota wa 70.

Iminota 90 y’umukino yarangiye nta mpinduka zibaye, ndetse Rayon itarebye mu izamu. Ni ubwa mbere kuva Marine FC yazamuka mu kiciro cya mbere itsinze ibitego 3 mu izamu rya Rayon Sports mu mukino umwe.

Ishimwe Fiston watsinze ibitego bibiri

Marine FC ihise igira amanota 18 ndetse ijya ku mwanya wa 7, naho Rayon Sports ubu iri ku mwanya wa 4 n’amanota 23.

Iyi ni inzu ya Mukamusoni, yanahawe ibikoresho by’ibanze ndetse n’ibiribwa

Izo nzu uko ari enye, harimo iyubatswe mu Kagari ka Nyabigoma mu Murenge wa Kinigi, iyubatswe mu Kagari ka Birira Umurenge wa Kimonyi, iyubatswe mu Kagari ka Gakingo mu Murenge wa Shingiro n’indi yubatswe mu Kagari ka Sahara, Umurenge wa Busogo.

N’ibyishimo byinshi batewe no gutuzwa mu nzu nshya, bubakiwe n’Abagore bo mu rugaga rushamikiye ku muryango FPR-Inkotanyo, zirimo n’ibikoresho byose by’ibanze nkenerwa, abazihawe bahamya ko baciye ukubiri n’ikibazo cyo kubaho batagira aho bakinga umusaya.

Mukamusoni Dativa yavuze ko yari abayeho mu buzima bugoye bitewe n’inzu mbi, none yishimiye inshya yashyikirijwe

Mukamusoni Dativa, agaruka ku buzima bushaririye yari amazemo imyaka myinshi, aho yabaga mu nzu iva kandi ishaje.

Yagize ati “Nshimishijwe n’ukuntu abagize Urugaga rw’abagore rushamikiye kuri FPR-Inkotanyi, barebye akababaro nari maranye imyaka n’imyaka, ko kuba mu nzu y’ibishagari by’ibitusi. Yari inzu iteye ubwoba, iva, y’ibitobore, nyibanamo n’abana banjye batanu twenyine kuko umugabo yarambiwe ubwo buzima akaduta. Twahoraga mu bwoba bw’uko inyamashwa zizanyura muri ibyo bitobore zikaba zaturya, hakaba n’ubwo dutekereza ko twazayihiramo kuko byari ibyatsi'.

Ati 'Aho twaryamaga ni ku rutindo rw’amabuye twarenzagaho amashara, tukiyorosa ikirago. Bwari ubuzima bugoye, mbese buri mu kaga. Nshimishijwe n’uko aba bagore bankuye muri ako kangaratete”.

Igikorwa cyo gushyikiriza izo nzu abazubakiwe cyitabiriwe na Chairman wa FPR Inkotanyi mu Karere ka Musanze, Ramuli Janvier

Yongeyeho ati “Ntangajwe n’uburyo biyegeranyije, bagahuza amaboko bakanyubakira iyi nzu nziza iteye sima ku bikuta no hasi, ikaba isizwe n’amarangi. Mundebere ukuntu irimo na parafo, ikagira igikoni. Ifite imbuga yisanzuye, igikari kinini yewe n’akarima k’igikoni kagutse nzajya mpingamo imboga n’imbuto'.

Ati 'Aha rwose ni paradizo. Sinari narigeze ndyama kuri matora none barayimpaye, ibiringiti n’amashuka bya ruzungu. Mu myaka maze, sinari narigeze ndyama mu nzu nk’iyi banyubakiye! Ubu ndaryama nsinzire nk’abandi, muri macye iki ni igitangaza! Paul Kagame, Perezida wacu ni Umugabo nyawe usobanutse, arakabaho arambe. Yarakoze gutoza abagore kurangwa n’ubumuntu nk’ubu mbonye. Umuryango FPR-Inkotanyi ayoboye umbyaye bwa kabiri, unyinjije mu iterambere rihambaye rigiye kunsajisha neza. Mumunshimire cyane!”

Yanashyikirijwe ibikoresho by’ibanze bigizwe na matora n’ibiryamirwa, ishyiga rya gaz ryifashishwa mu guteka amafunguro, ibiribwa bitandukanye ndetse n’ibikoresho by’isuku bigizwe n’amasafuriya, amabasi, indobo n’ibindi.

Nyiransengimana Eugénie, Umuyobozi w’Urugaga rw’Abagore rushamikiye ku muryango FPR-Inkotanyi mu Karere ka Musanze, avuga ko kubaka umuryango utekanye bijyana no gutura heza. Akaba ariyo mpamvu abagore bagize urwo rugaga biyemeje guhindurira ubuzima abadafite amikoro, binyuze mu kububakira amacumbi.

Yagize ati “Umuryango ntushobora gutekana mu gihe udatuye heza. Ni muri urwo rwego rero twiyemeje guhagurukira ikibazo cy’abadafite aho kuba, tukabatuza ahantu hasobanutse”.

Yongera ati “Ni gahunda tumaza imyaka hafi itatu dutangiye, aho twahereye ku kubaka inzu imwe mu Karere, nyuma tuza kubona ko no kubaka inzu imwe muri buri Murenge bishoboka. Ubu uyu munsi twashyikirije imiryango ine yo mu Mirenge itandukanye izo twayubakiye, kandi igikorwa kirakomeje”.

Inzu yashikirijwe utishoboye mu Murenge wa Shingiro

Akomeza avuga ko uyu mwaka wa 2022, ari icyiciro cya kabiri cyo kubakira imiryango itishoboye. Ukaba ugomba kurangira, bubatse inzu 15, ziyongera kuri 16 bubatse umwaka ushize.

Chairman wa FPR Inkotanyi mu Karere ka Musanze, Ramuli Janvier, yashimiye umusanzu ukomeye ba mutima w’urugo bagize Urugaga rushamikiye kuri FPR Inkotanyi, bakomeje gutanga mu bikorwa byubaka umuryango wifuzwa.

Yagize ati “Ibikorwa bya mutima w’urugo mu rwego rw’Umuryango FPR Inkotanyi, byigarariza muri wa murongo n’urubuga abagore bahawe, wo gutekereza icyo bakora mu kubaka u Rwanda twifuza. Imishinga nk’iyi igamije guhindura ubuzima cyane cyane bw’abatishoboye, dukwiye gufatanyiriza hamwe kuyishyigikira. Ni ngombwa ko mutima w’urugo agira umutuzo, akarindwa urwikekwe, urutoto, ihohoterwa n’ibindi byamubangamira, kugira ngo abashe kubona umwanya wo gukomeza gutekereza neza no gushyira mu bikorwa ibiteza imbere igihugu mu buryo buhamye, nk’ibi tubona barimo gukora”.

Uyu muturage wo mu Murenge wa Kimonyi na we yahawe inzu n’ibikoresho kimwe n’abandi

Mu Mirenge uko ari ine yubatswemo inzu bashyikirijwe, abazitujwemo, bemeje ko bazazifata neza kugira ngo zitangirika.

Ni umuhango wabereye muri Seminali nkuru Philosophicum ya Kabgayi

Ni umuhango wabereye muri Seminali Nkuru Philosophicum y’i Kabgayi ku wa Gatanu tariki 21 Mutarama 2022, ari nayo izwiho kugira umwihariko wo kwigisha amasomo ajyanye na Filosofiya mu Rwanda.

Musenyeri Alexis Kagame, ufatwa nk’umwe mu bahanga muri Filozofiya, yashimiwe ibikorwa byamuranze mu guteza imbere ururimi rw’Ikinyarwanda n’umuco nyarwanda, dore ko yanditse ibitabo binyuranye n’ubu Abanyarwanda bakigenderaho.

Musenyeri Firipo Rukamba, Perezida w’Inama y’Abepisikopi akaba n’Umushumba wa Diyosezi Gatolika ya Butare witabiriye uwo muhango, yashimiye cyane Musenyeri Alexis Kagame ku ruhare yagize mu iterambere ry’umuco nyarwanda.

Yagize ati 'Nishimiye uyu munsi wahariwe kwibutsa inyandiko za Musenyeri Alexis Kagame, no kumuha icyubahiro, ni umwe mu banditsi bakomeye b’Abanyarwanda, wamenyekanishije umuco nyarwanda n’imibereho y’Umunyarwanda'.

Uretse Musenyeri Filipo Rukamba washimye ibikorwa byaranze Musenyeri Alexis Kagame, hari n’abandi bahanga muri Filosofiya bamushimiye cyane basaba ko Kiliziya yagirana ubufatanye na Leta, mu kumenyekanisha no gusigasira inyandiko za Musenyeri Kagame.

Kajuga Jerôme ati 'Tuboneyeho umwanya wo gusaba inzego za Kiliziya na Leta ko bafatanya mu kumenyekanisha no gusigasira umurage n’inyandiko bya Musenyeri Alexis Kagame, kuko bibitse ubukungu n’ubuhanga byagirira akamaro abantu muri iki gihe.

Filozofiya ifatwa nk’ubumenyi bwa mbere bwabaye ku isi, ni nka bumwe mu buryo bwo gushyira inyurabwenge mu mitekerereze ya muntu, bikamufasha gutekereza neza kugira ngo abashe gushyira mu gaciro no gusubiza amaso inyuma yibaza ku mibereho y’isi n’inkomoko ya muntu.

Musenyeri Alexis Kagame yarize kugeza ku rwego rw’impamyabumenyi ihanitse muri Filizofiya (Doctorat) yakuye muri Kaminuza yitiriwe Mutagatifu Geregori mu mwaka wa 1956, impamyabumenyi yabonye mu myaka ine yari yize, aho yakiriwe nk’umunyeshuri udasanzwe.

Musenyeri Filipo Rukamba yashimye ubutwari bwaranze Musenyeri Alexis Kagame

Nyuma yo kubona impamyabumenyi yigishije muri kaminiza zinyuranye zirimo Kaminuza nkuru y’u Rwanda no muri Kaminuza zikomeye zo mu bindi bihugu, anandika ibitabo binyuranye birimo, La philosophie bantu de l’être, Inganji Karinga (1943), Isoko y’Amäjyambere, 3 vol. (1949—51), La Poésie dynastique au Rwanda (1951).

Hari kandi Introduction aux grands genres lyriques de l’ancien Rwanda (1969), La Philosophie Bantu comparée (1976), Umulirimbyi wa Nyili-ibiremwa, gikubiye mu bitabo 3 (1950), Matabaro Ajya Iburayi (1938—39), Umwaduko w’Abazungu muli Afrika yo hagati (1947), Indyoheshabirayi n’ibindi.

Alexis Kagame yavutse ku ngoma ya Yuhi V Musinga, tariki ya 15 Gicurasi 1912 i Kiyanza, mu Buliza, Umurenge wa Murambi, Akarere ka Rulindo, Intara y’Amajyaruguru, atabaruka tariki ya 2 Ukuboza 1981 ubwo yari arwariye mu bitaro by’i Nairobi muri Kenya.

Gasogi United itsinzwe irushwa na Etincelles FC ibitego 2 ku busa ihita izamuka mu manota. Ni umukino watangiye utinze bitewe n’uko umukino wa Rayon Sports wabanje, nawo wari watinze kurangira.

Gasogi United yagize igice cya mbere cy’umwijima, kuko Etincelles FC yafunguye amazamu ku munota wa 19, ku gitego cyatsinzwe na Ciza Hussain ndetse ku munota wa 43 Songa atsinda igitego cya kabiri. Gasogi United itsinzwe umukino wa kabiri wikurikiranya, nyuma yo gutsindwa na Musanze FC igitego kimwe ku busa mu mukino wari wabanje.

Mukura Victory Sports ku kibuga cyayo yongeye kubona amanota atatu, itsinze Musanze FC ibitego 3-2. Wari umukino Mukura yinjiyemo imaze gutandukana n’umutoza wayo Ruremesha Emmanuel. Ben Ocen niwe wafunguye amazamu atsindira Musanze FC, mu gihe Mukura yatsindiwe na Mugisha Patrick, Aboubakar Djibrine  na Muhoza Trésor.

Etincelles FC yahise izamuka ku rutonde, ubu iri ku mwanya wa 13 n’amanota 11, naho Mukura ubu iri ku mwanya wa 8 n’amanota 17 izigamye n’umukino.