Webrwanda Backend

Author: webrwanda

  • Rocky Kimomo yavuze imyato Junior Giti ahishu… – #rwanda #RwOT

    Mbere y'uko baba ibyamamare, aka gasobanuye kari kicaweho nya nyakwigendera Yanga akaba ari nawe mwami wako ufatwa nk'uw’ibihe byose, nyuma y'uko agakundishije abantu batagira ingano, bakagakunda koko.

    Mu kugakunda kwabo ni nako abinjira muri uyu mwuga wo gusobanura bawinjiyemo ari benshi, ari ho Rocky Kimomo na Junior bahoraga bawuhanganiyemo, umunsi ku munsi ugasanga abakunda agasobanuye bari kubahanganisha.

    Mu mvugo za bamwe wumvaga bavuga ko Rocky ari we urenze, abanda bati ‘Junior ararenze’, ugasanga hari n'abatangiye kugereranya filime babaha bavuga ko umwe arenze kuri filime z'Ibihinde, undi ku nyakoreya, undi ku ziteye ubwoba, undi nawe ku zirimo ubwenge cyangwa tekinoroji.

    Nyamara nubwo byavugwaga ndetse bigahabwa intera, aba bagabo bo ku ruhande rwabo babaga biturije bafite intumbero yo gukora, ndetse nta kibazo cyabaga gihari kuko ari umuryango nk'ibisanzwe.

    Rocky Kimomo aganira na inyaRwanda.com, yavuze ko yubaha cyane Junior ndetse ko yamufunguriye inzira cyane cyane ku byo yagiye akora, ahishura ko no mu gihe yarwaraga nta wundi wamurwazaga atari we.

    Yavuze ko ari ihangana rye nawe kuko hatariho Junior nawe atakora cyane ndetse na Rocky adahari atakora cyane. Ibi butuma avuga k ikintu yishimira cyane “nuko nkora cyane nawe agakora cyane.''

    Rocky Kimomo yasohoye filime ye ya mbere “Wrath of Soldier” cyangwa se umujinya w'umusirikare, aho iri kunyuzwa ku rubuga rwa Eastflix.tv.Wifuza kureba iyi filime wishyura amafaranga 5,000 gusa ukayireba yose.


    Rocky Kimomo yavuze ko we na Junior Giti ari abavandimwe nbwo hataburaho ihangana

    Junior Giti ni umwe mu babereye inzira Rocky Kimomo

    Filime Rocky Kimomo yashyize hanze

    KANDA HANO UREBE IKIGANIRO TWAGIRANYE NA ROCKY KIMOMO

    “>

    Source : https://inyarwanda.com/inkuru/127531/rocky-kimomo-yavuze-imyato-junior-giti-ahishura-byinshi-kuri-we-no-kubakunda-kubagereranya-127531.html

  • Perezida Kagame yahaye umukoro abayobora utugari wo kwita ku kibazo cy'abana bataye ishuri #rwanda #RwOT

    Perezida Paul Kagame yibukije abanyamabanga nshingwabikorwa b'utugari tugize igihugu ko aho bayobora bakwiye kwita ku kibazo cy'abana bata ishuri kuko gikomeje guftaa indi ntera.

    Ni abagitifu basaga 2000 bahuriye ku Intare Arena mu murenge wa Rusororo kuri uyu wa Kabiri tariki 28 Werurwe 2023.

    Perezida avuga ko mu gihe abayobozi badakorana ngo bakemure ibibazo baba bari guta igihe.

    Ati 'Aho muba muri, ku rwego muriho mukoreraho, urwego rw'akagari, iyo hari abana bavuye mu mashuri, bagahinduka inzererezi, nabyo biri mu nshingano mwagombaga kuzuza kugwiza umubare w'inzererezi kuri ako Kagari?Biri mu nshingano mufite? Uzasubira inyuma ubwire abantu uti njyewe mfite inzererezi zingana zitya? Umubare uko uzamuka abe ariko wujuje inshingano wari ufite? Kugira ngo umubare w'inzererezi wiyongere  haba habaye iki?Haba habaye iki cyangwa haba hatakozwe iki?'

    The post <strong>Perezida Kagame yahaye umukoro abayobora utugari wo kwita ku kibazo cy'abana bataye ishuri</strong> appeared first on FLASH RADIO&TV.

    Source : https://flash.rw/2023/03/28/perezida-kagame-yahaye-umukoro-abayobora-utugari-wo-kwita-ku-kibazo-cyabana-bataye-ishuri/?utm_source=rss&utm_medium=rss&utm_campaign=perezida-kagame-yahaye-umukoro-abayobora-utugari-wo-kwita-ku-kibazo-cyabana-bataye-ishuri

  • Mu kwitegura amatora, Tshisekedi yiteze umutego uzamushibukana, ashyira Bemba na Kamerhe muri guverinoma. #rwanda #RwOT

    Kuva mu mwaka wa 2018 Félix Tshisekedi yajya ku butegetsi muri Kongo amaze kwiba amajwi, yaranzwe n'ikinyoma, gusahura ibya rubanda, ruswa iruta n'iyo ku butegetsi bwa Mobutu, kutubahiriza amasezerano yagiranye n'abantu, harimo n'abafite imitwe yitwaje intwaro, imwe mu mpamvu yanatumye yubura imirwano.

    Ibi byose abaturage barabizi, ku buryo batekanya kwihorera mu matora ateganyijwe mu mpera z'uyu mwaka wa 2023. Mu buswa cyangwa ubwana muri politiki, Tshisekedi yasanze aya amahano adahagije, maze ejobundi ashyira muri guverinoma abantu bafite ubusembwa bukabije, ku buryo iri kosa naryo azarihanirwa muri ayo matora.

    Nyamara Tshisekedi ajya gushyira mu myanya ikomeye Jean-Pierre Benmba, Vitatal Kamerhe n'abandi bagizi ba nabi bagombye kuba bari muri gereza, yibeshyaga ko yungutse amaboko azamugoboka mu matora, dore ko yikangaga ko bashobora gushyigikira abarwanya ubutegetsi bwe. Byahe byo kajya, ko ahubwo yicukuriye imva !

    Aba bantu barakibuka akagambane yabakoreye, bakaba bashobora kuzamuhinduka ku munota wa nyuma, cyangwa bagakoresha ububasha bahawe mu kurushaho guhindanya isira y'ubutegetsi bwa Tshisekedi, busanzwe n'ubundi ari umwanda. Jean-Pierre Bemba yagizwe Minisitiri w'Ingabo z'igihugu, ufite inshingano zo kurengera ubusugire bwa Kongo.

    Nyamara Abanyekongo ntibaribagirwa ko ari mu ba mbere bavogereye ubwo busugire, ubwo yari Perezida wa MLC, umutwe witwara gisirikari wamennye amaraso y'izirakarengane zitabarika, ndetse aza no kubifungirwa imyaka 10 muri gereza y'Urukiko Mpuzamahanga Mpanabyaha. Nubwo yaje gufungurwa ku mpamvu zitasobanutse, Bemba ubwe nawe ntiyibagiwe ko Tshisekedi ari umwe mu bamubangamiye, ubwo yashakaga kwiyamamariza kubobora Kongo, amushinja ubwo bwicanyi ndengakamere.

    Vital Kamerhe yabaye umufatanyabikorwa wa Tshisekedi, dore ko banabanye mu ishyaka rya UDPS. Kamerhe yemeye guharira Tshisekedi umwanya wa Perezida wa Repubulika, ariko mu masezerano aba bagabo bombi bagiranye, Tshisekedi yemerera Kamerhe ko ariwe mukandida wa UDPS mu matora ataha, ni ukuvuga ay'uyu mwaka. Muri bwa buhemu n'ubugambanyi bwe, Tshisekedi yafungishije Kamerhe amuziza kwiba miliyoni 46 z'amadolari y'Amarika yagombaga kubaka amacumbi y'abasirikari n'abapolisi.

    Ababikurikiraniye hafi bazi neza ko ubwo bujura Khamere yari abuziranyeho n'ishumi ye Tshisekedi, ahubwo amufungisha agirango amusige ubwandu butazamwemerera kwiyamamaza nk'uko babyumvikanyeho. Kamerhe yaje kurekurwa kugirango atamena amabanga, ariko se yibagiwe uwo mutego yagushijwemo n'uwo yitaga “ inshuti “ ?

    Birumvikana rero ko atakongera kumushyigikira nk'uko yabikoze muw'2018. Iyo usomye ibyo abanyekongo bavuga mu itangazamakuru no ku mbuga nkoranyambaga, usanga bafitiye inzika aba bagabo uko ari batatu, bitandukanye n'uburyo Abanyekongo bari bazwi, dore ko imyaka yose bafatwaga nka ba “  Humirizankuyobore “.

    Ntibishimiye uyu muco wo kwimika abicanyi n'ibisambo, mu gihe bo ubukene bubageze habi. Jean-Pierre Bemba na Vital Kamerhe ariko nabo si abana. Kwemera bwangu kujya muri Leta y'umuntu bafata nk'umugambanyi, biravugwa ko ari umwanya mwiza batari kwitesha wo guhirika umwanzi. Hari abanyapolitiki bafite ihame ko kugirango usenye ubutegetsi, ugomba kuba uburimo. Bemeye kwirira inoti muri aya mezi make asigaye ngo amatora abe, kandi n'undi uzatorwa azabaha imyanya kubo bamukiniye ikarita nziza, yo guca mu mizi Tshisekedi bakarushaho kumwangisha abaturage, n'ubwo nabo badakunzwe ku buryo rubanda ibajya inyuma.

    Jean-Pierre Bemba na Vital Kamerhe kandi bongeye kugwa mu mutego wo kwibwira ko Tshisekedi ayuafa umufatanyabikorwa wo kwizerwa, nabyo byaha imbaraga abamurwanya, kuko bakwereka abaturage ko ubutegetsi bwe ari ubwa ba “ Bihemu “, badakwiye icyizere na mba.

    Nguko uko umugezi w'isibo wisiba.

    The post Mu kwitegura amatora, Tshisekedi yiteze umutego uzamushibukana, ashyira Bemba na Kamerhe muri guverinoma. appeared first on RUSHYASHYA.

    Source : https://rushyashya.net/mu-kwitegura-amatora-tshisekedi-yiteze-umutego-uzamushibukana-ashyira-bemba-na-kamerhe-muri-guverinoma/?utm_source=rss&utm_medium=rss&utm_campaign=mu-kwitegura-amatora-tshisekedi-yiteze-umutego-uzamushibukana-ashyira-bemba-na-kamerhe-muri-guverinoma

  • Ibihano byahabwaga abatinze kwishyura imisoro byagabanyijwe, guteza cyamunara biranozwa – #rwanda #RwOT

    Muri iri tegeko, ingingo zijyanye n'uburyo bwo guteza cyamunara zaranogejwe ngo hirindwe amakimbirane yakomoka ku ivuguruzanya ry'iri tegeko n'andi mategeko agenga icyamunara.

    Hashyizweho kandi ingingo nshya yo guhana abasora basaba gusubizwa umusoro mu buriganya. Igihe cyo kubika ibitabo by'ibaruramari cyarongerewe kiva ku myaka 5 kijya ku myaka 10.

    Perezida wa Komisiyo y'Imari n'Umutungo by'Igihugu, ari nayo yasesenguye iri tegeko, Prof. Omar Munyaneza, yasobanuye ko mu byongerewe muri iri tegeko harimo ko nta mucuruzi uzongera guterezwa cyamunara ku bicuruzwa byafatiriwe kubera kutishyura umusoro.

    Ati 'Nk'umusoro wenda wa miliyoni eshanu, ugasanga ibihano, amahazabu birazamutse bigeze ku kuba arimo kubazwa nka miliyoni 20Frw cyangwa izirenga, ibyo rero byagabanutse kuko hari ingingo nshya yashyizwe muri uyu mushinga w'itegeko ivuga ko 'ibihano by'ubukererwe bidashobora kurenga umusoro fatizo wari ubereyemo ikigo cy'imisoro n'amahoro'.

    Yakomeje avuga ko igihe usora ageze igihe cyo kuba yaterezwa cyamunara, ubu afite uburenganzira bwo gusaba ubuyobozi bw'imisoro kugira ngo yigurishirize uwo mutungo we, bakamuha amezi atatu yo kuba yakwishakira umukiriya akaba ari we wigurishiriza noneho akishyura wa musoro yabazwaga.

    Ihazabu yo mu rwego rw'ubutegetsi icibwa usora wamenyekanishije umusoro mu gihe giteganyijwe n'amategeko ariko ntawishyure mu gihe cyagenwe yagabanyijwe mo kabiri hagamijwe gufasha usora kwikura mu ngorane zibangamira umurimo we 'igihe nta buryarya yabikoranye'.

    Amafaranga yacibwaga umucuruzi muto watinze kumenyekanisha azaba ibihumbi 50Frw mu gihe itegeko ryari risanzwe yari ibihumbi 100Frw, umucuruzi uzajya utinda kwishyura mu gihe kitarenze amezi atandatu azajya acibwa amande angana na 0.5% nageza ku mezi 12 ahanishwe kwishyura 1% by'agaciro k'umusoro ugomba kwishyurwa kandi nawo awutange.

    Umunyamabanga wa Leta muri Minisiteri y'Imari n'Igenamigambi, ushinzwe Imari ya Leta, Richard Tusabe, avuga ko kugabanya ibihano ku basora bigamije kubashishikariza gutanga ibyo bagomba igihugu batarindiriye guhanwa.

    Yavuze ko iyo witegereje amafaranga abasora batanga umwaka ku wundi ubona ko bagenda basobanukirwa inshingano zabo, bityo akaba ari na ngombwa gusuzuma ibihano bihabwa abatabyubahirije.

    Ati 'Itegeko mu by'ukuri si ukoroshya ibihano ahubwo ni ukugenda ubinoza, ukareba uwabikoze abigambiriye umuhana gute, uwabikoze atabigambiriye ni ikihe gihano umuca'.

    Iri tegeko nirisohoka mu igazeti ya leta rizasimbura iryakoreshwaga ryo mu 2019. Ni itegeko ryateguwe hagamijwe gushyiraho uruhando rw'ishoramari rikurura abashoramari mpuzamahanga, kubahiriza amahame mpuzamahanga no kuziba ibyuho byagaragaye mu Itegeko ryari risanzwe.

    Umutwe w'Abadepite watoye itegeko rigena uburyo bw'isoresha

    Source : http://igihe.com/amakuru/u-rwanda/article/ibihano-byahabwaga-abatinze-kwishyura-imisoro-byagabanyijwe-guteza-cyamunara

  • Kigali: Umuturage yageneye Umurenge wa Remera imodoka – #rwanda #RwOT

    Yayitangiye mu Nteko Rusange y'Abanyamuryango ba FPR Inkotanyi iherutse kubera mu Murenge wa Remera.

    Mu bikorwa byakozwe harimo imihanda yubatswe n'abaturage ahazwi nko mu Gihogere yatwaye asaga miliyoni 300 Frw, gufasha abaturage hafi 300 kuva mu bucururuzi butemewe n'ibindi.

    Ndagijimana yashimiwe umusanzu we nk'uwatanze imodoka igiye kunganira iyari isanzwe mu bikorwa byo gucunga umutekano n'isuku mu bice bitandukanye.

    Ni modoka iri mu bwoko bwa Toyota Hilux.

    Umunyamabanga Nshingwabikorwa w'Umurenge wa Remera, Rugabirwa Deo, yagaragaje ko kuba umuturage ashobora gutanga imodoka yo kwifashisha mu bikorwa bitandukanye ari igisobanuro cyiza cy'ubufatanye mu iterambere.

    Ati 'Ingengo y'imari buri gihe ntabwo iba iri bukemure ibibazo byose, haba hari ibikorwa byinshi bikenewe kugerwaho kandi vuba, rero iyo hari abaturage bashobora kubigiramo uruhare kandi bikagerwaho, kuba ari ukunganira ingengo y'imari y'igihugu bituma ibikorwa byihuta bikagera hose kandi birafasha cyane.'

    Yagaragaje ko inzego z'ibanze zirajwe ishinga no guhashya ikibazo cy'abakora ubucuruzi butemewe bakigaragara muri uyu murenge n'abafite ibindi bibazo by'imibereho bagaherekezwa kwivana mu bukene.

    Umuyobozi Nshingwabikorwa w'Akarere ka Gasabo, Umwali Pauline, yavuze ko abanyamuryango ba FPR Inkotanyi bakwiye gukomeza kugira uruhare mu bibakorerwa mu gufatanya mu iterambere ry'igihugu.

    Yagaragaje ko Akarere gafite gahunda yo kurwanya igwingira ry'abana binyuze mu gufasha umuryango mu kurinda igwingira, asaba abagize umuryango guharanira iterambere ry'imibereho myiza y'abagize umuryango.

    Ni imodoka yatanzwe n’umuturage ku bushake bwe

    Imodoka yatanzwe izajya yifashishwa mu bikorwa bitandukanye by’umurenge

    Source : http://igihe.com/amakuru/u-rwanda/article/kigali-umuturage-yageneye-umurenge-wa-remera-imodoka

  • ARCOS yatangije umushinga wa miliyari €16 wo kurengera ibidukije hafi y'ikiyaga cya Kivu – #rwanda #RwOT

    Uyu Umushinga wiswe 'Building resilience to climate change and sustainable agriculture value chains in agro-systems around Mukura Forest and Lake Kivu Catchment Landscape, Western Rwanda)”, mu mpine ukitwa MuLaKiLa, uzarangira utwaye miliyoni 16 z'Amayero mu gihe cy'imyaka 20.

    Uzagira n'uruhare mu guzamura imibereho myiza y'abaturage binyuze mu guteza imbere uruhererekane nyongeragaciro rw'ibikomoka ku buhinzi mu nkengero z'ishyamba rya Mukura mu turere twa Rutsiro na Ngororero no mu nkengero z'Ikiyaga cya Kivu.

    Mu muhango wo kuwutangiza ku mugaragaro wabaye ku wa 23 Mutarama 2023, ARCOS n'abafatanyabikorwa bayo bagaragaje ko igice cya mbere cy'umushinga MuLaKiLa kizatwara 1,227,407 z'Amayero mu mwaka umwe, icya kabiri gitware 16,268,803 z'amayero mu myaka 20.

    Uyu mushinga uzashyirwa mu bikorwa n'umuryango ARCOS Network, Reforest'Action, Circular Bioeconomy Alliance n'ikigo cy'igihungu cy'amashyamba, uturere twa Rutsito na Ngororero ku nkunga y'Ikigo gikora imiti n'inkingo cya AstraZeneca.

    Igice cya MuLaKiLa, kizarangira hatewe ibiti 901000 kuri hegitari 3000, birimo 506000 bihinganwa n'imyaka, ibiti 60 000 byera imbuto ziribwa , ibiti bya kawa 175,000 n'ibiti 160,000 bizaterwa mu buryo bw'udushyamba dutoya.

    Umwaka kandi uzarangira hashyizweho amarerero y'ibiti (pépinières) 16 zizaterwa mu tugari 16 two mu mirenge itandukanye y'utwo turere, amarerero azagurwa akagera kuri 31 mu tugari 31.

    Biteganyijwe ko ibikorwa byavuzwe bizagirira akamaro ingo zigera ku 6000 zigizwe n'abaturage ibihumbi 24 ndetse n'amatsinda 200 y'inshuti z'ibidukikije (Friends of Nature Association).

    Umushinga kandi uzateza imbere uruhererekane nyongeragaciro k'ikawa n'icyayi bihinze ku buryo burambye.

    Igice cya kabiri cy'imyaka 20 kizarangira byibuze hatewe ibiti 4,505,000 ku buso bwa hegitari 14,100, birimo ibihinganwa n'imyaka 2,530,000, ibyera imbuto ziribwa 300 000, ibiti 800 000 bizaterwa mu dushyamba duto n'ibiti bya kawa 875, 000.

    Umuyobozi Mukuru wa ARCOS Network, Dr Sam Kanyamibwa yagaragaje ko umushinga w'ibanze, uzagira uruhare mu kubaka ubudahangarwa ku mihindagurikire y'ibihe dore ko utwo turere turangwaho n'ingaruka mbi zigateza ibibazo bitandukanye ku baturage no ku bidukikije muri rusange.

    Ati 'Ni ahantu harangwa n'isuri ku buryo buri mwaka tubura amatoni n'amatoni y'ubutaka. Tugomba gukora ku buryo abahinzi babona uko bahangana n'ibyo bibazo mu gihe kirambye, binyuze mu bikorwa byo guca amaterasi n'ibindi himakazwa ubuhinzi burambye.'

    Dr Kanyamibwa yavuze kandi ko iki gice kiri no mu hantu mpuzamahanga hatoranyijwe nk'igicumbi kibungabunga urusobe rw'ibinyabuzima mu Karere k'Umuhora wa Albert (Albertine Rift), bityo ko bagomba gufasha ingo zigera ku bihumbi 30 kungukira muri uwo mushinga.

    Umushinga MuLaKiLa uri muri gahunda yatangijwe ku mugaragaro n'Umwami Charles III ubwo yari akiri Igikomangoma cya Wales mu 2020, ari nabwo hatangizwaga ikigo giteza imbere uburyo ibikorwa bya muntu byunganirana n'ibidukijije nta gihutajwe (The Circular Bio-economy Alliance).

    Na none kandi umushinga uzatera inkunga amatsinda 1000 y'inshuti z'ibidukikije binyuze mu bigega 30 bizwi nk'Umusave Funds bizafasha abaturage kwihangira imirimo ibyara amafaranga, ikanita ku bidukikije.

    U Rwanda rukeneye arenga miliyari 11$ azifashishwa mu bikorwa byo kurwanya imihindagurikire y'ibihe, ndetse rwiyemeje kugarura amashyamba ku buso bwa hegitari miliyoni ebyiri kugera mu 2030.

    Umuyobozi Mukuru ushinzwe ubutaka, amazi n'amashyamba muri Minisiteri y'Ibidukikije, Kwitonda Philippe yavuze ko umushinga MuLaKiLa uzafasha igihugu muri izo gahunda hanabungabungwa umutungo kamere nk'amazi, amashyamba n'ibindi.

    Ati 'Uzashyirwa mu bice byagaragaye ko bigira isuri iri ku rwego rwo hejuru n'izindi ngaruka z'imihindagurikire y'ibihe. Abo muri iki kigero tugezemo icyo tuzibukirwaho ni uruhare tuzagira mu kurwanya imihindagurikire y'ibihe ku rugero rufatika cyane ko tugira imvura nyinshi, yakwiyongera ku kuba turi mu gihugu kigizwe n'imisozi bikaba ibindi.'

    Ubuyobozi bwa AstraZeneka bwavuze ko burajwe ishinga no gufasha Afurika ibirenze gutanga imiti binyuze mu gutera inkunga gahunda zitandukanye kuko 'ibidukikije bibungabunzwe bigira ingaruka nziza ku buzima bwa muntu n'Isi muri rusange.'

    Kuri ubu ubukungu bw'uturere twa Rutsiro na Ngororero bushingiye ku buhinzi ku kigero cya 90% ndetse inyungu abaturage bakuramo ingana na 49%, binyuze mu buhinzi bw'ikawa, icyayi, ibiti byera imbuto no gusarura ibiti bikavamo imbaho.

    Umuyobozi w'Akarere ka Rutsiro wungirije ushinzwe ubukungu n'iterambere, Havugimana Ethienne yavuze ko umushinga MuLaKiLa uje kubunganira muri gahunda zashyizweho mu kongerera imbaraga ubuhinzi nka rumwe mu rwego rutunze benshi.

    Umuyobozi Mukuru wa ARCOS, Dr Sam Kanyamirwa yagaragaje ko MuLaKiLa Project izasiga hatewe ibiti birenze miliyoni enye

    Umuyobozi muri ARCOS ushinzwe ishyirwa mubikorwa rya MuLaKiLa Project, Dr Festus Maniriho yagaragaje ko umushinga uzanafasha abaturage mu guhanga indi mishinga ibateza imbere

    Umuyobozi ushinzwe ibijyanye n’imishinga muri Reforest' Action yagaragaje ko batewe ishema gufatanya na ARCOS mu kurengera urusobe rw’ibinyabuzima

    Visi Meya wa Rutsiro ushinzwe ubukungu n’iterambere yagaragaje ko MuLaKiLa Project ije kunganira imishinga itandukanye batangije ku kurengera ibidukikije

    Ubwo abitabiriye bari bakurikiye uburyo intego za MuLaKiLa Project zizashyirwa mu bikorwa

    Dr Sam Kanyamibwa yagaragaje ko umushinga MuLaKiLa Project uzashyiraho ibigega byo gufasha abaturage 30 mu tugari tugize imirenge ya Rutsiro na Ngororero biziyongera kuri 50 basanzwe bafite

    Dr Sam Kanyamibwa ubwo yasubizaga ibibazo bijyanye n’ishyirwa mu bikorwa ry’umushinga

    David Toovey ni we wayoboye umuhango wo gutangiza MuLaKiLa Project

    Umuhango wo gutangiza MuLaKiLa Project witabiriye n’abantu bo mu bigo bitandukanye byita ku kurengera ibidukikije

    Amafoto: Shumbusho Djasiri

    Source : http://igihe.com/amakuru/u-rwanda/article/arcos-yatangije-umushinga-wa-miliyari-eur16-wo-kurengera-ibidukije-hafi-y

  • Abasaga 200 bitabiriye Inama mpuzamahanga yiga ku mpinduka mu burezi – #rwanda #RwOT

    Ni inama yateguwe na Kaminuza y'u Rwanda, Ishami ry'Uburezi, UR-CE binyuze muri gahunda yayo yo kubakira ubushobozi abarimu n'abanyeshuri bitegura kuzakora mu burezi, gahunda UR-CE iterwamo inkunga na Mastercard Foundation binyuze muri porogaramu ya 'Leaders in Teaching Initiative Program: LIT'.

    Ni inama igiye kuba mu minsi itatu uhereye ku wa 28 Werurwe 2023 muri Kigali Conference and Exhibition Village ahazwi nka Camp Kigali, yitabiriwe n'abashakashatsi banyuranye mu burezi, inzego zinyuranye z'uburezi n'abandi.

    Biteganyijwe ko muri iyi nama hazagaragarizwamo ibyakorwa n'uburyo bushya bushobora gushyirwamo imbaraga mu myigishirize igezweho, ubushakashatsi n'uko bwakongerwamo imbaraga ndetse n'ibindi bitandukanye bigamije guteza imbere uburezi.

    Kaminuza y'u Rwanda izayakira ku bufatanye n'Ihuriro ry'Amashuri Makuru na Kaminuza n'ibigo by'ubushakashatsi.

    Umuyobozi wa Kaminuza y'u Rwansa, Ishami ry'Uburezi Dr. Florien Nsanganwimana, yagaragagaje ko ari nama yitezweho kurebera hamwe ingamba zikwiye gushyirwa mu bikorwa hagamijwe guteza imbere uburezi bujyanye n'ibikenewe mu buzima bwa buri munsi.

    Ati 'Ndizera ko ibiganiro tugiye kugirana, bizatuma tubona ubumenyi bushya bukenewe. Ni ugutekereza ku buryo busanzwe bukoreshwa hagamijwe guteza imbere imibereho y'abaturage binyuze mu bushakashatsi butandukanye no gusangira ibitekerezo binyuranye.'

    Umuyobozi Wungirije ushinzwe Imari n'Imiyoborere, muri Kaminuza y'u Rwanda, Françoise Kayitare Tengera, yagaragaje ko intego y'iyi nama ihuye neza n'icyerekezo cy'u Rwanda mu 2030.

    Ati 'Inama nk'iyi itanga umwanya mwiza wo kuganira ku bintu bitandukanye bigamije guteza imbere ireme ry'uburezi mu iterarambere rirambye. Ndabasaba ko buri wese yakoresha iyi nama kuzamura no gusangira ibitekerezo byubaka mu kuzamura uburezi.'

    Umukozi ushinzwe porogaramu y'Uburezi muri Mastercard Foundation, Byusa Isabelle, yagaragaje ko gahunda yo guha ubushobozi abanyeshuri n'abarimu (LIT Academic Lead)yatangijwe hagamije kuzamura ireme ry'uburezi mu Rwanda.

    Ati 'Yaje nk'igisubizo ku mbogamizi ku kibazo twabonaga mu burezi, kirimo kuba abarimu bari bafite ubumenyi buke ariko n'umubare munini w'abanyeshuri bavaga mu ishuri.

    Yagaragaje ko gukorana na Kaminuza y'u Rwanda harimo ibintu bitandukanye bahereye mu itangwa ry'akazi, amahugurwa y'abarimu, abahugurwa y'abayobozi b'ibigo by'amashuri n'ibindi.

    Yagaragaje ko binyuze muri iyi gahunda hari byinshi ubufatanye bwagejeje ku mpande zombie nk'ibigo 842 byahuguwe, abitegura kwinjira mu mwuga w'uburezi 600, ibyumba by'ikoranabuhanga bigezweho na Laboratwari, mudasobwa zirenga 100 zahawe abarimu muri Kaminuza n'ibindi bitandukanye.

    Yagaragaje ko Mastercard Foundation yifuza kugabanya ubushomeri nibura ku rubyiruko hahangwa imirimo irenga ibihumbi 300 mu 2030, binyuze mu mahugurwa ashingi ku nzego zirimo ubukerarugendo n'ubuhinzi.

    Umukozi ushinzwe porogaramu y'Uburezi muri Mastercard Foundation, Byusa Isabelle yagaragaje ko Mastercard ikomeje kugira uruhare rukomeye mu guteza imbere uburezi

    Ni Inama yitabiriwe n’abaturutse mu nzego zinyuranye

    Impuguke mu burezi, abashakashatsi n’abandi bitabiriye inama igamije kwigira hamwe impinduka mu burezi

    Iyi nama yitabiriwe n’abantu batandukanye

    Basabwe gukora ubushakashatsi bugamije iterambere

    Umuyobozi Wungirije ushinzwe Imari n'Imiyoborere muri Kaminuza y'u Rwanda, Françoise Kayitare Tengera yasabye abitabiriye iyi nama gushaka igisubizo ku burezi bukenewe

    Babonye umwanya wo kungurana ibitekerezo

    Abitabiriye iyi nama bagaragaje ko uburezi bukwiye gushyirwamo imbaraga

    Amafoto: Nezerwa Salomon

    Source : http://igihe.com/amakuru/u-rwanda/article/abasaga-200-bitabiriye-inama-mpuzamahanga-yiga-ku-mpinduka-mu-burezi

  • U Rwanda rukeneye ibyumba by'amashuri ibihumbi 17 – #rwanda #RwOT

    Ni ukuvuga ko urebye ingengo y'imari ya miliyari 300 Frw yakoreshejwe mu kubaka ibyumba by'amashuri ibihumbi 22, bivuze ko n'ubundi akenewe iyenda kungana gutyo.

    Minisitiri w'Uburezi, Dr Uwamariya Valentine, kuri uyu wa Kabiri tariki 28 Werurwe 2023, yari yitabye iyo Komisiyo ari kumwe n'Umuyobozi Mukuru w'Urwego rw'Igihugu rushinzwe guteza imbere Imyuga n'Ubumenyingiro (RTB), Eng Paul Umukunzi.

    Yari kumwe kandi n'Umuyobozi w'Ikigo cy'Igihugu Gishinzwe Uburezi bw'Ibanze (Rwanda Basic Education, REB), Dr Nelson Mbarushimana ndetse n'Umuyobozi Mukuru ushinzwe Politiki muri Mineduc, Rose Bagumya.

    Basubizaga ibibazo byagaragariye Abadepite ubwo bari mu ngendo bakoreye hirya no hino mu gihugu kuva tariki 15 Ukuboza 2022.

    Muri byo harimo icy'inyubako z'amashuri zidahagije ndetse n'izikeneye kuvugururwa.

    Mu bishaje bikeneye kuvugururwa harimo ibyumba by'amashuri, ibikoni, aho abanyeshuri bafatira amafunguro, amacumbi, amasomero, ibyumba by'ikoranabuhanga ndetse n'ubwiherero.

    Visi Perezida wa Komisiyo y'Uburezi, Ikoranabuhanga, Umuco n'Urubyiruko, Madina Ndangiza, yavuze ko hari n'ikibazo cy'abanyeshuri bagikora ingendo ndende bajya ku mashuri.

    Depite Ndangiza yagaragaje ko kugeza ubu mu mashuri y'incuke hakiri ubucucike ndetse hari n'amashuri ubu ataratangiza gahunda yo kwiga rimwe ku munsi.

    Minisitiri w'Uburezi, Dr Uwamariya Valentine, yavuze ko mu myaka itatu ishize hubatswe ibyumba by'amashuri birenga ibihumbi 22, ubwiherero ibihumbi 31 n'ibikoni birenga 2604.

    Yagaragaje kandi ko hubatswe amashuri mashya y'imyuga n'ubumenyingiro agera kuri 81, yongerewe ku mashuri asanzwe n'andi arindwi yahanzwe.

    Ati 'Ikindi ni uko dusabwa kongera amashuri y'imyuga ku buryo nibura muri buri murenge hazaba hari ishuri ry'imyuga.'

    Mu mwaka w'ingengo y'imari 2021/22, hubatswe amashuri y'imyuga n'ubumenyingiro 21. Kuri ubu hari kubakwa kandi amashuri y'imyuga 90 ndetse n'ibyumba by'amashuri y'incuke birenga 360 mu gihe kandi hari no kubakwa ibikoni bigera kuri 317.

    Ati 'Gusa ibi ntibihagije kugira ngo ikibazo mwabonye kibe gikemutse, ingamba zirahari zo kongera ibikorwaremezo, birimo ibyumba by'amashuri n'ubwiherero.'

    Guverinoma kandi ifite gahunda yo kubaka nibura ishuri ry'imyuga muri buri murenge, aho kuri ubu hari kubakwa mu mirenge 12, indi isigaye 24 ikazubakwamo amashuri y'imyuga mu mwaka utaha w'ingengo y'imari.

    Ku kijyanye n'amashuri atagira ibigega bifata amazi, Minisitiri Dr Uwamariya yavuze ko umwaka ushize w'ingengo y'imari muri gahunda yo gushyira ibigega ku mashuri, hakoreshejwe miliyari 1 Frw, zubatse ibigega 1019 ku mashuri atandukanye.

    Mu 2022/23, hagenwe miliyoni 850 Frw yo kubaka no gushyira ibigega ku mashuri. Ku rundi ruhande ariko ibigega byubatswe ni bike ugereranije n'amashuri yubatswe.

    Minisitiri Dr Uwamariya avuga ko hari inkunga yatanzwe na Banki y'Isi ku buryo hari izindi miliyari 5,5 Frw zizajya ku bigega ndetse na miliyari 17 Frw zizashorwa mu gufata imikingo.

    Ati 'Ingamba zihari ni ugukomeza gushyira ibigega ku mashuri, uko ingengo y'imari izagenda iboneka no gufatanya n'abafatanyabikorwa kugira ngo ayo mazi aho kuva ku mashuri yangiza ibintu ahubwo afatwe abyazwe umusaruro, akoreshwe mu zindi gahunda z'ishuri.'

    Minisitiri Dr Uwamariya yavuze ko muri uyu mwaka w'ingengo y'imari hazakoreshwa miliyari 8 Frw zo kubaka amashuri y'imyuga mu mirenge icyenda itandukanye.

    Igisabwa ngo hakemurwe ubucucike n'ingendo

    Minisitiri w'Uburezi, Dr Uwamariya yagaragaje ko n'ubwo hubatswe ibyumba by'amashuri byinshi, ari intambwe yatewe ariko ikibazo kitarakemuka neza.

    Nko mu bijyanye no kugabanya ingendo ndende ku banyeshuri, hahanzwe amashuri mashya agera ku 650.
    Igenzura ryakozwe na Minisiteri y'Uburezi ryagaragaje ko hakenewe ibindi byumba bishya by'amashuri nibura 13 296.

    Ibyo ni ibikenewe mu kugabanya ikibazo cy'ubucucike ariko by'umwihariko ku kijyanye n'ingendo ho hakenewe ibyumba by'amashuri 3637.

    Minisitiri Dr Uwamariya ati 'Byumvikane ko ubiteranyije birenda kungana n'ibyumba byubatswe kandi iyo urebye ingengo y'imari yagiye ku byumba byubatswe, ikabakaba miliyari 300 Frw.'

    Yakomeje agira ati 'Kugira ngo dukemura iki kibazo cy'ingendo ndende n'ubucucike, birasaba undi mushinga. Birasaba undi mushinga wo kubaka ibikorwaremezo, dufite ingamba zo gukomeza kongera ibyo bikorwaremezo.'

    Mu 2021, nibwo hatangijwe gahunda yo kwakira abana b'incuke, ku buryo mu kubaka ibyumba by'amashuri hari hagiye hateganywa icyumba kimwe. Ni ibintu bituma kuri ubu hariho ubucucike mu mashuri y'incuke.

    Ati 'Muri iyi gahunda yo kubaka ibikorwaremezo ni yo mpamvu twagaragaje ko muri uyu mwaka hari kubakwa amashuri mashya y'incuke agera kuri 360 n'ubundi ni gahunda igomba gukomeza.'

    Minisiteri y'Uburezi igaragaza ko yatangiye gutekereza uburyo bushya bwo kubaka inyubako zigeretse kubera ko kubona ubutaka ari ibintu bitazaba byoroshye mu bihe biri imbere.

    Minisitiri w’Uburezi, Dr Uwamariya Valentine, yagaragaje ko hari ingamba zafashwe mu kubaka ibikorwaremezo ku mashuri

    Source : http://igihe.com/amakuru/u-rwanda/article/u-rwanda-rukeneye-ibyumba-by-amashuri-ibihumbi-17

  • Polisi y'u Rwanda yihariye imidali mu mikino ya EAPCCO yari imaze icyumweru ibera mu Rwanda #rwanda #RwOT

    Kuri uyu wa Mbere tariki ya 27 Mutarama, muri BK Arena i Remera mu Karere ka Gasabo, habereye umuhango wo gusoza imikino yaberaga mu Rwanda, ihuza abapolisi bo mu bihugu bigize umuryango w'abayobozi ba Polisi mu Karere k'Afurika y'Iburasirazuba (EAPCCO Games).

    U Rwanda rwitwaye neza rubasha gutsinda imikino 9 kuri 13 yitabiriwe muri iri rushanwa ribaye ku nshuro ya Kane.

    Ku nsanganyamatsiko igira iti: 'Guteza imbere ubufatanye bwa Polisi mu kurwanya ibyaha byambukiranya imipaka binyuze mu mikino n'imyidagaduro', iyi mikino yitabiriwe n'amakipe yo mu bihugu 8 muri 14 bigize umuryango.

    Mu gihe cy'icyumweru rimaze ribera ku bibuga bitandukanye mu Mujyi wa Kigali no mu Karere ka Bugesera, u Rwanda rwegukanye imidali ya Zahabu mu mukino w'umupira w'amaguru, umukino w'intoki wa Volleyball, Handball na Basketball.

    Mu yindi mikino u Rwanda rwatsinze harimo Volleyball yo ku mucanga, taekwondo, iteramakofe, Karate no kumasha.

    Kenya yabashije kwitwara neza mu gusiganwa ku maguru, yegukanye umwanya wa Kabiri muri rusange itsindira umudali wa silver, Uganda uba iya mbere mu mukino wa netball itsindira umudali wa bronze.

    Umuhango wo gusoza iyi mikino wayobowe na Minisitiri w'umutekano w'imbere mu gihugu, Alfred Gasana, witabirwa n'abandi banyacyubahiro barimo Umuyobozi Mukuru wa Polisi y'u Rwanda, IGP Felix Namuhoranye, Minisitiri w'ingabo, Maj. Gen. Albert Murasira, Komiseri Mukuru wa Polisi ya Ethiopia akaba n'umuyobozi wa EAPCCO, Demelash Gebremicheal Weldeyes, Umugaba Mukuru w'ingabo z'u Rwanda Jean Bosco Kazura, n'abahagarariye Polisi zo mu bihugu bigize EAPCCO.

    Umuhango wabimburiwe n'umukino w'intoki wa Handball wahuje u Rwanda na Uganda, urangira u Rwanda rutsinze ibitego 41 kuri 27 bya Uganda rwegukana n'igikombe muri uyu mukino ku nshuro ya kane kuva iyi mikino yatangira mu mwaka wa 2017 rwikurikiranya.

    Minisitiri Gasana yavuze ko imikino yubaka umurunga w'ubufatanye bwa Polisi zo mu bihugu binyamuryango.
    Yavuze ko imikoranire hagati y'abakinnyi n'abafana babo ifasha mu kubahuza no guhanahana amakuru atuma habaho imikorere myiza.

    Yagize ati:' Ubufatanye buhamye hagati y'inzego zishinzwe iyubahirizwa ry'amategeko nibwo bushobora gutuma akarere k'Afurika y'Iburasirazuba kagira umutekano mu buryo burambye ari nawo soko y'iterambere. '

    Yakomeje agira ati:' Ku makipe yahuriye mu mikino itandukanye, intego yari ugushimangira ubufatanye bwa Polisi binyuze mu mikino kandi byagezweho bityo buri wese atahukanye intsinzi. '

    IGP Namuhoranye yavuze ko imikino yagaragaje ko abapolisi bayitabiriye bafite ubushake, kwiyemeza, disipulini ndetse no kudacika intege mu gihe baharanira kugera ku ntego.

    Yagize ati:' Mu myaka ishize hakinwa imikino ya EAPCCO, yahindutse inkingi ikomeye y'ubufatanye bw'inzego za Polisi mu karere, ifasha mu kwagura imikoranire y'ibihugu binyamuryango. '

    Yavuze ko abitabiriye imikino babonye umwanya wo kumarana igihe, baramenyana kandi bagirana ubucuti buzabafasha gukorana mu bihe bizaza ari nayo yari intego yayo.

    Umuyobozi wa EAPCCO, CG Demelash Gebremicheal Weldeyes, nawe yavuze ko imikino yatekerejwe hagamijwe kurushaho kongera ubufatanye mu rwego rwo guhangana n'ibyaha ndengamipaka bihangayikishije isi yose kuri iki gihe.

    Ati:'Duhurira mu mikino kugira ngo turusheho kumenyana no gushimangira ubufatanye bw'inzego z'umutekano mu karere. Gutsinda no gutsindwa n'ubwo byose bibaho ariko ntibibuza ko intego y'irushanwa igerwaho yo guharanira gufatanyiriza hamwe mu kurwanya ibyaha ndengamipaka bishobora kugira ingaruka mu bihugu binyamuryango bitandukanye. '

    The post Polisi y'u Rwanda yihariye imidali mu mikino ya EAPCCO yari imaze icyumweru ibera mu Rwanda appeared first on RUSHYASHYA.

    Source : https://rushyashya.net/polisi-yu-rwanda-yihariye-imidali-mu-mikino-ya-eapcco-yari-imaze-icyumweru-ibera-mu-rwanda/?utm_source=rss&utm_medium=rss&utm_campaign=polisi-yu-rwanda-yihariye-imidali-mu-mikino-ya-eapcco-yari-imaze-icyumweru-ibera-mu-rwanda

  • Abayobozi ba Sacco ya Karangazi iherutse kwibwa batawe muri yombi #rwanda #RwOT

    Ubuyobozi bw'Akarere ka Nyagatare buravuga ko Urwego rw'igihugu rw'ubugenzacyaha RIB rwataye muri yombi umuyobozi wa Sacco ya Karangazi, abakozi bayikoramo n'umusekirite bacyekwaho icyaha cy'ubujura bw'amafaranga asaga miliyoni 25 yibwe muri iyi Sacco mu mpera z'iki cyumweru dusoje.

    Amakuru y'uko Sacco ya Karangazi mu karere ka Nyagatare yibwe yatangiye kucicikana mu gitondo cyo kuri uyu wa mbere ubwo abakozi b'iyi Sacco baje mu kazi gasanga amafaranga yose yari muri iyi Sacco bayacucuye.

    Perezida w'Inama y'ubutegetsi bw'iyi Sacco Bwana Mwesigwa Dan aravuga ko miliyoni zisaga 25 arizo zimaze kubarurwa ko zibwe.

    Ati 'Amakuru twayamenye ejo ku wa Mbere, umukozi uhagarariye abandi ari we 'Manager' yambwiye ko Sacco yibwe. Yampamagaye ambwira ati dufunguye iyi nzu uko bisanzwe hanyuma tugeze mu cyumba cyibikwamo amafaranga aricyo 'coffre-fort'dusa yatewe yagiye. Nashoboye kuhagera mpamagara inzego z'umutekano, mpamagara polisi itwegereye na RIB barahagera. Bibye Miliyoni 25 n'ibihumbi 400 n'andi arenga.'

    Kugeza ubu ntiharamenyekana umunsi iyi Sacco yibiweho, kuko kuva kuwa gatanu kugeza ku cyumweru nta mukozi winjiye muri iyi sacco.

    Umunyamakuru wa Flash yageze kuri iyi Sacco asanga serivisi zongeye gutangwa, nubwo hakoraga umukozi umwe ndetse n'amafaranga yatangwaga yari make cyane.

    Abaturage bari bicaye babuze ayo bacira nayo bamira bategereje guhabwa amafaranga nubwo hari abahisemo gutaha ntayo babonye.

    Aba barasaba ko hakorwa iperereza ryimbitse kuri iki kibazo, kuko batumva uburyo abirye iyi sacco yafunguye umuryango bagatwara amafaranga.

    Umwe ati 'Twumvise ko bibye Sacco ariko nta rugi bamennye nta n'idirishya , ubwo rero hagati aho tukibaza ese ko niba umuzamu, ayo mafaranga yaba yaraciye he? Abagenzuzi bakwiye kureba uko ayo mafaranga yagiye. Ariko twe nk'abaturage ntabwo twahomba amafaranga yacu tugomba kuyabona.'

    Undi ati 'Ikibazo urumva niba hari kwakirwa abantu nka 50 bakirwa n'abantu Babiri kandi bari basanzwe bakirwa n'abantu Bane, serivisi igenda gacye.'

    Umuyobozi w'Akarere ka Nyagatare ushinzwe ubukungu n'iterammbere, Bwana Matsiko Gonzague, avuga ko bamenye iby'aya makuru ndetse ko n'Urwego rw'Igihugu rw'Ubugenzacyaha RIB, rwataye muri yombi umuyobozi w'iyi Sacco ndetse n'abandi bakozi bakurikiranweho ibura ry'aya mafaranga.

    Ati 'Sacco y'umurenge wa Karangazi yibwe amafaranga twagerageje kubikurikirana dufatanyije n'inzego z'ubugenzacyaha. […] Hari 'Manager'(Umuyobozi) wa Sacco ari kumwe n'umucungamutungo wa Sacco na ba 'Cachier'(abakiraga ababitsa n'ababikuza) babiri,'loan recovery officer'(ushinzwe inguzanyo) n'umusekirite umwe, nibo kugeza ubu bari kumwe n'ubugenzacyaha kugira ngo batange amakuru. Bafungiye i Nyagatare aho ubugenzacyaha bukorera.'

    Hari umwe mu barindaga iyi Sacco ya Karangazi waburiwe irengero kuva kuwa gatanu kugeza ubu ntabwo araboneka.

    Amakuru avuga ko mu bihe byashize iyi Sacco yageragejwe kwibwa amafaranga mu ijoro, ariko habaho gutabara amabandi barayatesha ariruka.

    Ntambara Garleon

    The post <strong>Abayobozi ba Sacco ya Karangazi iherutse kwibwa batawe muri yombi</strong> appeared first on FLASH RADIO&TV.

    Source : https://flash.rw/2023/03/28/abayobozi-ba-sacco-ya-karangazi-iherutse-kwibwa-batawe-muri-yombi/?utm_source=rss&utm_medium=rss&utm_campaign=abayobozi-ba-sacco-ya-karangazi-iherutse-kwibwa-batawe-muri-yombi