Author: webrwanda

Umuvugizi w'Umujyi wa Kigali yabwiye Televiziyo y'Igihugu ko Shampiyona y'Isi y'Amagare muri rusange yashimangiye ko hari aho u Rwanda n'abarutuye bageze mu kwakira ibikorwa no gusigasira umuco nyarwanda.

Ati 'Bitwereka urwego Igihugu cyacu kimaze kugeraho cyangwa na Kigali yacu kuko bisobanuye ko [ibyo mwabonye abantu baserukanye] bihari bisanzwe binakoreshwa mu bintu bitandukanye ni uko hariya twasaga n'abari kubimurika ngo bigaragare.'

'Nk'Itorero abaturage bo mu gace runaka baba basanzwe barifite ugasanga niba mu mudugudu runaka rihari n'ahandi riraboneka. Iyo baba basanzwe badafite Itorero n'ubundi byari kugorana ko ako kanya bahita barishinga.'

Ntirenganya yavuze ko ikindi cyagenze neza cyane ari ibikoresho byakenewe mu gutegura ku mihanda abaturage bunganiyemo Umujyi wa Kigali bimwe barabyizanira kandi ko na byo hari icyo bigaragaza.

Ati 'Uramutse ubwiye ikindi gihugu runaka kitaragera ku iterambere nk'iryo dufite ngo nibashake ibyo bintu bijya ku mihanda yose bashaka aho babikura bakabibura. […]. Ibyo bitwereka ko hari ahantu tumaze kugera kandi hari ibintu dufite twarabibonye hirya no hino.'

Ntirenganya kandi yaboneyeho gushimira abikorera uburyo na bo bagize uruhare mu gushyira ibikoresho ndangururamajwi ku mihanda kandi babikoranye ubwitange ndetse aboneraho gushima muri rusange uwo muco w'ubufatanye utuma ibintu bigenda neza.

Umujyi wa Kigali wanyuzwe n'uko abaturage bawo baserutse ku munsi wa nyuma w'isiganwa ry'amagare

Ni amakuru yatangajwe kuri uyu wa 29 Nzeri 2025. Ni ubwa mbere ikigo gikomoka muri Afurika cyamamaje muri Shampiyona ya Basketball muri Amerika (NBA) ndetse n'iy'umukino wa American Footbal (NFL).

Byitezwe ko ubu bufatanye buzafasha u Rwanda kugera ku ntego yo kwinjiza miliyari 1$ bitarenze mu 2029, binyuze mu bukerarugendo.

Hashize igihe Visit Rwanda igaragara muri Leta Zunze Ubumwe za Amerika mu bikorwa bitandukanye ariko byiganjemo iby'umupira w'amaguru, ibiheruka bikaba byari urugendo yakoranye na Arsenal mu kwitegura umwaka w'imikino wa 2024/25.

Icyo gihe Visit Rwanda yamamajwe ku kibuga cya SoFi Stadium iri mu mujyi wa California, aho yongeye kugaraga mu mukino wa NFL wahuje Los Angeles Rams na Indianapolis Colts.

Nyuma y'uyu mukino, RDB yahise itangaza ko yatangiye kugirana imikoranire na Los Angeles Rams iri mu makipe meza kugeza ubu, akaba ari amasezerano azageza mu 2029.

Si iyi gusa kuko Leta y'u Rwanda yanatangaje ko yanagiranye amasezerano na Los Angeles Clippers yo muri Shampiyona ya Basketball muri Leta Zunze Ubumwe za Amerika.

LA Clippers izafasha u Rwanda kuvugurura ibibuga bya Basketball mu Rwanda, ndetse n'ikipe ishamikiye kuri yo ikina mu cyiciro cyo hasi G League ya San Diego Clippers, itange amahugurwa ku batoza b'Abanyarwanda buri mwaka.

Si ukujyayo gusa ahubwo bazajya banahabwa amahugurwa mu buryo bw'ikoranabuhanga, banagire igihe cyo kugera mu Rwanda babereke uko bazamura impano z'abakiri bato muri Basketball.

Visit Rwanda ni yo izaba iri mu baterankunga bakuru ba Los Angeles Rams, yerekanwe kuri SoFi Stadium ijyamo abafana ibihumbi 70, no kuri Hollywood Park, inzu y'imikino iri kubakwa izajya yakira imikino itandukanye, no kuri Intuit Dome yakira imikino ya LA Clippers.

Visit Rwanda izajya yambarwa ku myambaro y'imyitozo n'iyo gukinana kuri aya makipe yombi.

Umuyobozi Mukuru wa RDB, Jean-Guy Afrika, yavuze ko ari amasezerano azashimangira umubano w'u Rwanda na Los Angeles.

Ati 'Binyuze mu bufatanye bwa LA Clippers na LA Rams, u Rwanda na Los Angeles bizagirana ubumwe mu guteza imbere imikino.'

Aya masezerano yo kwamamaza ubukerarugendo bw'u Rwanda yiyongereye ku yo u Rwanda rufitanye na Arsenal yo mu Bwongereza, Paris Saint-Germain yo mu Bufaransa, Atlético de Madrid yo muri Espagne na FC Bayern Munich yo mu Budage izamura impano z'abakiri bato mu Rwanda.

Umuyobozi Mukuru wa RDB, Jean-Guy Afrika, yavuze ko ari amasezerano azashimangira umubano w'u Rwanda na Los Angeles

Visit Rwanda yabaye umuterankunga wa LA Clippers na Los Angeles Rams zo muri Amerika

Wold Vision Rwanda yatangiye kwigisha abana bakiri ku mashuri uko bategura indyo yuzuye na bo bakajya ku byigisha mu miryango bakomokamo. Ubu ku bigo by'amashuri 129 byo muri aka Karere bahawe umurama w'imboga zitandukanye kugira ngo ku ishuri abana bajye babasha kurya indyo yuzuye.

Ibi ni bimwe mu byagarutsweho ku wa 27 Nzeri 2025 mu bukangurambaga bwakorerwaga muri GS Saint Kizito Gakeri iherereye mu Murenge wa Rusebeya, ibarurwamo abanyeshuri bose hamwe 1.150, barimo abiga mu ishuri ry'inshuke 155, mu mashuri abanza bagera kuri 707 n'abiga mu yisumbuye 288.

Imibare ya 2024 igaragaza ko binyuze muri gahunda zitandukanye zo kwita ku mikurire y'umwana, mu Karere ka Rutsiro babashije kugabanya igwingira mu bana bari munsi y'imyaka ibiri ku kigero cya 14% mu myaka itanu ishize, bagera kuri 30 % bavuye kuri 44,4% bariho muri 2020.

Raporo yakozwe muri Mutarama 2025 mu cyumweru cyahariwe ubuzima bw'umubyeyi n'umwana yagaragaje ko Akarere ka Rutsiro ari ko kari ku isonga mu kugira abana benshi bagwingiye mu Rwanda.

Hagaragaye ko aka karere kari gafite abana bose muri rusange 11.979, muri bo 3.652 bangana na 30,5% bagwingiye.

Umunyeshuri mu mwaka gatatu w'icyiciro kibanza cy'ayisumbuye, kuri GS Saint Kizito Gakeri Tuyishime Pasika w'imyaka 16 mu kiganiro na IGIHE we na bagenzi be bahamije ko amasomo bahawe yatumye barushaho gusobanukirwa indyo yuzuye kandi bagiye kubisobanurira ababyeyi.

Ati 'Naryaga indyo imwe nkumva ko yuzuye kubera nabaga mpaze, ariko ubu nasobanukiwe n'ibigize indyo yuzuye kandi nkayirira ku gihe, turaza kubikangurira ababyeyi kuyitugaburira.'

Undi munyeshuri bigana mu mwaka wa gatatu witwa Uwayo Sugira Felecien ati 'Ntabwo nari nzi ko umwanda ugira uruhare mu mirire mibi, gusa amasomo twahawe n'ingirakamaro ku mirire ariko haracyari icyuho mu kubona amafi kuko twigishijwe ko na yo ari ingirakamaro ku ndyo yuzuye, ababyeyi duturanye tugiye kubasaba kugaburira abana babo indyo yuzuye, kugira ngo turandure imirire mibi.'

Umukozi wa World Vision Rwanda, Ntimugura Jean Yves, yavuze ko muri uyu mushinga uhuriweho wo guteza imbere imirire myiza harwanywa igwingira bahisemo gukorana n'abana kuko ubumenyi bagira ku mirire bwagira uruhare mu mpinduka mu kunoza imirire myiza mu miryango bakomokamo.

Ati 'Umwihariko wo gukora ubukangurambaga bunyuze ku bana bakiri ku mashuri twasanze kubigisha byagira uruhare runini mu mpinduka z'imirire yo mu muryango, kandi na bo baba bakeneye indyo yuzuye, aho tubigisha imirire myiza, isuku n'ubuziranenge bw'ibiribwa.'

Akomeza agira ati 'Mu biganiro umwana agirana n'ababyeyi akwiriye kugira uruhare mu guhitamo indyo agaburirwa kandi babe umusemburo w'impinduka ku mirire myiza yo mu muryango.'

Umukozi w'Akarere ka Rutsiro ushinzwe gukurikirana Amarerero no kurwanya imirire mibi, Ntawuruhunga Abdulmadjid, mu kiganiro na IGIHE yavuze ko kwigisha abanyeshuri gutegura indyo yuzuye ari kimwe mu byagabanyije umubare w'abana bagwingira.

Ati 'Ku ishuri ni ho haba abana benshi kandi iyo bize ikintu kugishyira mu bikorwa biraborohera, kandi amasomo bigishijwe mu bukangurambagangiro ku ndyo yuzuye, dukeneye ko bayajyana mu giturage aho baturuka bakajya kwigisha no gukangurira ababyeyi babo akamaro ko kuyibatekera, ariyo mpamvu turimo gukorana n'abana bya hafi.'

Akomeza agira ati 'Ibi bizafasha abana gutsinda amasomo biga, kuko iyo bariye neza bibaha gukura no gutekereza ibifiteye sosiyete umumaro, bakazabasha guhangana ku isoko ry'umurimo, kandi bagende bicarane n'ababyeyi babasobanurire ibyo bigishijwe ku gutegura indyo yuzuye.'

Ntawuruhunga yavuze ko mu cyegeranyo giheruka cyagaragaje ko Umurenge wa Rusebeya ari wo uri inyuma mu kugira abana bagwingiye, kuko ufite igipimo cya 48% ari na yo mpamvu bahisemo kuhakorera ubukangurambaga ku buryo barimo kuhashyira imbaraga.

Uyu munsi mu Karere kose ka Rutsiro habarurwa abana 359 bari munsi y'imyakaka ibiri babarurwa mu mirire mibi, barimo abana 39 bafite ikibazo cy'imirire mibi gikomeye n'abana 320 bafite ikibazo cy'imirire cyoroheje.

Umukozi wa World Vision, Ntimugura Jean Yves avuga ko bahisemo gukorana n'abana kuko ubumenyi bagira ku mirire bwagira uruhare mu mpinduka z'imitekere yo mu miryango baturukamo

Umunyamabanga Nshingwabikorwa w’Umurenge wa Rusebeya, Niyodusenga Jules yasabye abana gufasha ababeyi babo gusobanukirwa indyo yuzuye

Abana bigishwa gutegura indyo yuzuye babanje kuyigaburirwa

Abana bibukijwe ko indyo yuzuye itagomba kuburaho ibitera imbaraga, ibyubaka umubiri n’ibirinda indwara

Riek Machar yahagaritswe ku mwanya wa Visi Perezida wa Sudani kuva muri Werurwe uyu mwaka ndetse afungirwa iwe mu rugo ashinjwa kugira uruhare mu gitero cyagabwe n'umutwe witwaje intwaro witwa White Army.

Ni igitero cyagabwe mu kigo cya gisirikare kiri mu Majyaruguru ashyira Uburasirazuba bwa Sudani y'Epfo gihitana ababarirwa muri 250 barimo abasirikare n'abasivili.

Riek Machar yashinjwe na Guverinona ya Sudani kuba ari we watanze amabwiriza yo kugaba icyo gitero ndetse imushinja ubwicanyi, ubugambanyi n'ibyaha byibasiye inyokomuntu agezwa imbere y'ubutabera.

Urubanza rugitangira abunganizi mu mategeko ba Riek Machar n'abandi bantu barindwi bareganwa bagaragaje ko hari imbogamizi yo kuba urukiko rwo muri Sudani y'Epfo radafite ububasha bwo kuburanisha urwo rubanza.

Abo bunganizi bavuze ko bashingiye ku masezerano y'amahoro yo mu 2018 yashyize iherezo ku ntambara za gisivili muri icyo gihugu, urwo rubanza rugomba kuburanishwa n'urukiko rwa Afurika yunze Ubumwe ruburanisha imanza z'imbere mu bihugu na mpuzamahanga.

Gusa umucamanza witwa James Alala yateye utwatsi izo mbogamizi zatanzwe n'abunganira Riek Machar n'abo bareganwa agaragaza ko mu gihe urwo rukiko rutarashyirwaho na Afurika yunze Ubumwe, inkiko z'imbere muri icyo gihugu zifite ububasha bwo kuburanisha urwo rubanza hashingiwe ku Itegeko Nshinga.

Uwo mucamanza kandi yateye utwatsi imbogamizi yari yatanzwe n'abunganzi ba Riek Machar bavuga ko Visi Perezida aba afite ubudahangarwa butuma atagezwa imbere y'inkiko avuga ko bugenerwa perezida gusa.

Yagize ati 'Visi Perezida wa Mbere nta budahangarwa agenerwa n'Itegeko Nshinga tugenderaho'.

Urwo rukiko kandi rwategetse ko urubanza rugomba gukomeza ku itariki ya 1 Ukwakira 2025.

Riek Machar ahakana ibyo ashinjwa byose avuga ko bishingiye ku mpamvu za politiki ndetse hari impungenge muri Sudani y'Epfo ko ibyo bishobora gutera izindi ntambara za gisivili.

Urukiko muri Sudani y'Epfo rwateye utwatsi ubusabe bwa Visi Perezida, Riek Machar

Ibi babigarutseho kuri uyu wa Mbere tariki ya 29 Nzeri 2025, ubwo mu Karere ka Nyabihu, hakomerezaga ubukangurambaga bwiswe 'Sobanukirwa RFI 2025'' Ni ubukanguraba bw'aho RFI isobanurira serivisi itanga abayobozi mu nzego zitandukanye kugira ngo bazimenye bazanazisobanurire abaturage.

Zimwe muri serivisi RFI itanga yeretse aba bayobozi harimo gupima uturemangingo ndangasano, gupima ibiyobyabwenge mu mubiri w'umuntu, gupima ibinyobwa n'imiti bitemewe, gupima imikono n'inyandiko hagamijwe kugaragaza umwimerere wazo mu gukemura impaka n'izindi serivisi nyinshi.

Umunyamabanga Nshingwabikorwa w'Akagari ka Birembo mu Murenge wa Rambura,Twagirayezu Benoit, yavuze ko icyo yungukiye mu bukangurambaga bwa RFI ari uko bakwiriye kuganiriza abaturage bakabungabunga ibimenyetso by'ahabereye ibyaha.

Yagize ati 'Biradufasha kugabanya ibyaha, bidufashe kubwira abaturage kugira ngo birinde amanyanga yose bakoraga kugira ngo bahimbe ibimenyetso. Turagenda rero tuganirize abaturage izi serivisi RFI itanga nabo bazimenye, uko babungabunga ibimenyetso hagamijwe kubafasha mu kubona ubutabera.''

Umunyamabanga Nshingwabikorwa w'Akagari ka Rubaya mu Murenge wa Mukamira,Muhawenimana Sarah, we yavuze ko mu byo yungutse harimo gushishikariza abaturage kugana RFI kugira ngo babashe kubona ubutabera bwuzuye, yavuze ko hari ibyaha byakorwaga ariko kubera kutagira amakuru bakabyihorera bikarangira birimo nk'ubujura bwo gutobora inzu n'ibindi byinshi ahamya ko kuri ubu bamenye ko bagana iki kigo kikabafasha.

Umukozi w'Akarere ka Nyabihu ushinzwe imibereho myiza y'abaturage, Niyonizeye Ignace we yagize ati 'Abenshi mu baturage ntabwo baziko RFI bapima ibiyobyabwenge, ntabwo baziko bapima uturemangingo ndangasano n'izindi nyinshi rero turabibaganiriza kandi tuziko bizagira uruhare mu kugabanya ibyaha inaha.''

Umuyobozi w'Inama Njyanama y'Akarere ka Nyabihu, Habanabakize Protais, yashimiye RFI kuba yaje kubasobanurira serivisi batanga, abizeza ko basobanukiwe kandi ko nabo bagiye kugenda bakabisobanurira abaturage ku buryo barushaho kubimenya.

Ati 'Hari icyo tugiye gukora, tugiye gusobanurira abaturage serivisi RFI itanga bitume birinda ibyaha, binabakebure ku gufata ibimenyetso byabafasha kubona ubutabera bwihuse. Ikindi twamenye ko uwakora icyaha ikoranabuhanga ryamutahura, turabibabwira nabo babimenye bitume barushaho kwitwararika no kubana neza n'abandi.''

Umuyobozi mukuru ushinzwe serivisi zo gupima imibiri y'abitabye Imana muri RFI, Dr. Innocent Nkurunziza, yashimiye abayobozi mu nzego zitandukanye mu Karere ka Nyabihu kuba bitabiriye ari benshi, abasaba gusobanurira abaturage uburyo serivisi za RFI zabafasha mu kubona ubutabera.

Ati 'Icyo tubifuzaho ni uko izi serivisi zacu mudufasha kuzikwirakwiza mu baturage, turifuza ko babungabunga ibimenyetso, umuturage ugeze ahabereye icyaha nk'aho umuntu yapfiriye, uhageze ahazengurutse umugozi kugira ngo ibimenyetso bibungwabungwe neza bizatume hatangwa ubutabera.''

Dr Nkurunziza yakomeje avuga ko yaba abibwa bapfumuriwe inzu n'ibindi byaha byinshi bikorerwa mu giturage bakwiriye kugana iki kigo kikabafasha kubona ibimenyetso byabafasha mu butabera.

Umuyobozi muri RFI, SP Ashimirwe Japhet, yasobanuriye aba bayobozi serivisi RFI itanga zose

Abo mu nzego z’umutekano bitabiriye ubu bukangurambaga

Umuyobozi muri RFI, Dr Nkurunziza Innocent yasubije bimwe mu bibazo yabajijwe n’abayobozi batandukanye kuri iki kigo

Umuyobozi w’Akarere ka Nyabihu wungirije ushinzwe imibereho myiza y’abaturage, Simpenzwe Pascal, yavuze ko serivisi za RFI bagiye kurushaho kuzisobanurira abaturage

Umuyobozi w’Inama Njyanama y’Akarere ka Nyabihu, Habanabakize Protais, yashimiye RFI yabasobanuriye serivisi itanga avuga ko bizafasha abaturage kwirinda ibyaha

Minisiteri y'Uburezi yatangaje ko mu byo izashyiramo imbaraga mu mwaka wa 2025/26 harimo kugabanya w'abanyeshuri basibira mu mashuri abanza nibura bakazagera kuri 25%, bivuze ko bazagabanyukaho nibura 4,2%.

Inyandiko igaragaza imihigo ya Minisiteri y'Uburezi igaragaza ko abanyeshuri basibira mu mashuri abanza bangana na 29,2%. Kugira ngo ubyumve neza, mu banyeshuri 10 biga mu mashuri abanza, batatu basibira mu mwaka barimo.

Imibare igaragaza ko abanyeshuri barenga miliyoni 4 biga mu mashuri y'u Rwanda barimo abarenga miliyoni 3,1 biga mu mashuri abanza.

Bigaragazwa ko gahunda nzamurabushobozi Leta yatangije mu bihe bishize izongerwamo imbaraga, by'umwihariko mu ishyirwa mu bikorwa ryayo kandi imfashanyigisho zigatangirwa igihe.

Minisitiri w'Uburezi, Joseph Nsengimana, aherutse gutangaza ko abanyeshuri bayitabiriye neza mu mwaka w'amashuri wa 2024/25 ari bo bazamutse neza ugereranyije n'abayisuzuguye.

Ati 'Iyi gahunda nzamurabushobozi umusaruro wari mwinshi cyane ku buryo tuzayitangira muri Nzeri [2025] itangirane n'umwaka kugira ngo ikomeze ifashe aba bana bakeneye ubufasha. Bizatuma aba bana na bo bashobora gutera imbere…ariko birasaba ko abana bahagurukira kwiga, birasaba ko abarimu bahagurukira kwigisha.'

Mineduc igaragaza ko hari ibitabo birenga miliyoni 6 byasohowe ndetse byoherezwa mu mashuri abanza mu cyiciro cya mbere (kuva mu wa mbere kugeza mu wa gatatu), muri uyu mwaka hakazatangwa ibitabo miliyoni 3,9.

Ku ruhande rw'abarimu n'abayobozi b'amashuri kugeza mu 2024/25 hari abarenga ibihumbi 107. Bigaragara ko Urwego rw'Igihugu rushinzwe Uburezi bw'Ibanze (REB) na Minisiteri y'Abakozi ba Leta n'Umurimo bizafasha gushyira mu myanya abarimu 5000.

Abana bava mu ishuri bagomba kugabanyuka

U Rwanda rugaragaza ko abanyeshuri bava mu mashuri biganjemo abahungu bo mu bice bikorerwamo imirimo itanga amafaranga irimo ubucukuzi bw'amabuye y'agaciro, ubuhinzi bw'icyayi n'ibindi bikenera abakozi bakoresha amaboko. Gusa hari n'abakobwa bake baterwa inda zitateganyijwe bikabaviramo kudakomeza kwiga.

Imibare ya Mineduc iheruka igaragaza ko abava mu ishuri muri rusange ari 5,2% ariko intego bihaye ari ukumanura uyu mubare ku buryo ugera kuri 4,8% mu mwaka wa 2025/26.

Minisitiri Nsengimana Ati 'Ni ngombwa ko aba bana tubafasha, cyane cyane ababyeyi mubafasha kugira ngo bagume mu ishuri kandi mwegere amashuri, mwegere abarimu kugira ngo mumenye uko abana banyu barimo gukora mu ishuri.'

Mu mwaka w'ingengo y'imari wa 2025/2026 gahunda yo kugaburira abanyeshuri ku mashuri izagera ku banyeshuri bo mu bigo byose bya Leta n'ibifashwa na yo kubw'amasezerano. Yagenewe arenga miliyari 130 Frw.

Inzego zitandukanye zivuga ko iyi gahunda yatumye abana benshi bari barataye ishuri barisubiramo, kuko hari n'abarivagamo kubera kubura ibibatunga.

Ubushakashatsi busohorwa mu bitangazamakuru….

Imibare ya Mineduc igaragaza ko ibigo by'icyitegererezo biri muri kaminuza zitandukanye byasohoye ubushakashatsi 67 mu bitangazamakuru bikomeye ku Isi bijyanye n'inzego zitandukanye.

Ikigo cyigisha Uburezi, Imibare na Siyansi [African Centre of Excellence for Innovative Teaching and Learning Mathematics and Science, ACEITLMS] cyatangaje mu bitangazamakuru bikomeye ubushakashatsi 21, Ikigo Nyafurika cyigisha ibijyanye n'ikoranabuhanga rya internet rikoresha ibintu bitandukanye [African Center of Excellence in Internet of Things, ACEIoT] cyasohoye 18.

Ikigo Nyafurika cy'Icyitegererezo cyigisha ibijyanye n'ingufu hagamijwe Iterambere rirambye (African Centre of Excellence in Energy for Sustainable Development [ACE-ESD] cyasohoye ubushakashatsi burindwi, Ikigo cyigisha gukusanya no gusesengura amakuru [African Center of Excellence in Data Science, ACE-DS] cyasohoye 16 na ICTP-EAIFR yasohoye butanu.

Muri uyu mwaka biteganyijwe ko hazasohoka ubushakashatsi 45 mu bitangazamakuru bikomeye ku Isi burimo 10 bwo muri buri kigo Nyafurika cy'Icyitegererezo uretse muri EAIFR hazasohorwa ubushakashatsi butanu.

Minisitiri w’Uburezi Nsengimana Joseph asaba ababyeyi gukora ibishoboka bagafasha abana kuguma mu mashuri

Byabereye mu Kagari ka Gisovu Umurenge wa Twumba ku wa 28 Nzeli 2025 mu masaha ya mu gitondo.

Musabyimana ufite umugore n'abana 10, ubwo abandi bari bagiye gusenga yabonye ari we usigaye mu rugo ajya kwahira ubwatsi bw'inka mu nkengero za Pariki ya Nyungwe.

Akigerayo yabonye inyamaswa nini iryamye, ayitegereje abona ni ingurube y'ishyamba kuko asanzwe ayizi.

Uyu mugabo avuga ko yabonye itanyeganyega agira ngo yapfuye akubita hasi inkoni yari afite, iyo satura ihita imuhagurukana imukubita ihembe agwa hasi itangira kumunyukanyuka.

Yagaruye ubwenge asanga iyo nyamaswa yagiye ariko yamukomerekeje ku ntoki, akaboko, ku maguru no mu isura niko kujya gutekerereza Mutwarasibo ibimubayeho bamufasha kugera ku Kigo Nderabuzima cya Gisovu nacyo kimwohereza ku Bitaro bya Mugonero.

Umuyobozi w'Akarere ka Karongi, Muzungu Gerard yavuze aya makuru bayamenye bari gukurikiranira hafi ubuzima bw'uyu muturage.

Ati 'Ubusanzwe nk'izo satura ntiziza inyuma ya Pariki ahubwo bariya baturage nibo bajya kuzihohotera bazitega cyangwa bazihiga. Ubwo avuga ko yamuririye mu cyanya gikomye nubwo naho batemerewe kujyamo, tugiye gukurikirana aho avuga yaririwe, nidusanga yahohotewe azahabwa indishyi. Nidusanga ari we wayisagariye ikamurya yitabara, namara kwivuza azabikurikiranwaho kuko gusagarira ziriya nyamaswa birahanirwa barabizi.'

Meya Muzungu yasabye abaturiye Pariki y'Igihugu ya Nyungwe kubana neza nayo, bakirinda kuyangiza kuko ubwabo bazi akamaro ibafitiye.

Amakuru IGIHE yamenye ni uko Radio Salus igiye kumara ukwezi itumvikana dore iko iheruka kuvuga mu ntangiriro za Nzeri uyu mwaka.

Icyo kibazo cyatangiye mu mpera za Kanama 2025 ubwo yavaga ku murongo ababishinzwe barabikemura isubiraho ariko bigeze ku itariki ya 1 Nzeri irongera ivaho na bwo ikibazo kiracyemurwa ariko ntibyatinda kuko yongeye kuvaho muri icyo cyumweru cya mbere cya Nzeri kugeza n'ubu.

Umuvugizi wa UR, Kabagambe Ignatius yahamirije IGIHE iby'ayo amakuru gusa avuga ko icyo kibazo ubuyobozi bwa kaminuza buri kugishakira umuti.

Yasobanuye ko kuva ku murongo kwa Radio Salus kwatewe n'icyuma gihuza radiyo n'iminara (Studio Transmitter Link) cyagize ikibazo.

Kabagambe yavuze ko icyatumye hashira hafi ukwezi Radio Salus itarasubira ku murongo kandi ikibazo barakimenye, ari uko byasabye ko bagura icyuma gisimbura icyo mu mahanga ku buryo bizafata ibyumweru bitarenze bitatu biri imbere.

Ati '[Icyo cyuma] cyatumijwe mu Butaliyani kuko ntikiba mu Rwanda. Birashoboka ko mu byumweru nka bibiri bitatu kiba kije.'

Kabagambe yavuze ko icyo cyuma kigura amafaranga atari munsi ya miliyoni 50 Frw, gusa ahamya ko ayo mikoro atabuze ahubwo ari ikibazo ari uko gitumizwa mu mahanga ya kure.

Icyo gikoresho gishya cyatumijwe, Kabagambe yavuze ko cyitezweho gukemura n'ibindi bibazo byo kutumvikana neza kwa Radio Salus mu bice bimwe na bimwe.

Yaboneyeho kandi kwisegura ku bakurikira iyo radiyo ndetse n'abanyeshuri basanzwe bayifashisha mu buryo bw'amasomo.

Radio Salus si ubwa mbere ivuye ku murongo igihe kirekire kuko mu Ugushyingo 2011 yavuyeho yagize ikibazo cy'ibyuma bisakaza amajwi (transmitters) imara amezi menshi itumvikana.

Bigeze muri Kanama 2012 imaze amezi abiri isubiyeho yarongeye ivaho. Ni mu gihe no mu 2010 umurongo wayo wa 101.9 yumvikaniraho i Kigali na wo wigeze kuvaho iba isigaranye uwa 97.0 gusa.

Radio Salus yashinzwe mu 2005 mu yahoze ari Kaminuza Nkuru y'u Rwanda (muri UR Ishami rya Huye uyu munsi) igamije gufasha abanyeshuri biga itangazamakuru muri iyo kaminuza kubona aho bimenyerereza umwuga.

Ubuyobozi bwa APR FC bwahagaritse Lt Col (Rtd) Alphonse Muyango wari umunyamabanga w’agateganyo.

Ni umwanzuro wavuye mu nama yahuje Ubuyobozi bw’iyi kipe mu gitondo cyo kuri uyu wa Mbere tariki ya 29 Nzeri 2025.

Amakuru ISIMBI yamenye ni uko Muyango wari umunyamabanga w’agateganyo anashinzwe logistics yagiye ku kazi bisanzwe yari no mu myiteguro y’umukino wa PyramidsFC, akaba yatunguwe n’iki cyemezo.

Akaba yagiye mu nama bisanzwe n’ubuyobozi bisanzwe akaba ari ho havuye umwanzuro wo kumuhagurikira, ni nyuma yo gusanga hari amakosa yakoze muri izi nshingano yari ashinzwe.

Bivugwa ko hari amakosa yagiye akora mu bihe bitandukanye harimo no kwitambika mu nshingano z’abandi, ibimuhuza n’abafana n’ibindi.

Hakaba hanashingiwe ku kuba nta n’amasezerano uyu mugabo ari afite muri iyi kipe y’Ingabo z’Igihugu.

Lt Col (Rtd) Alphonse Muyango yagizwe umuyobozi ushinzwe ibikoresho (logistics) mu Kuboza 2024.