Author: webrwanda

Urwego rw'Igihugu rw'Iterambere (RDB) rwatangaje ko Visit Rwanda yinjiye mu bufatanye bushya n'amakipe abiri akomeye yo muri Leta Zunze Ubumwe za Amerika, Los Angeles Clippers ikina muri shampiyona ya Basketball (NBA) ndetse na Los Angeles Rams ikina muri shampiyona ya Football (NFL).

Nk'uko RDB yabitangaje kuri uyu wa mbere, aya makipe yatoranyijwe bitewe no gukomera kwayo ku rwego rw'isi ndetse n'umubare munini w'abafana bakurikirana ibikorwa byayo, haba kuri televiziyo, ku mbuga nkoranyambaga ndetse no ku bibuga.

Ibi bikaba bizaha u Rwanda amahirwe yo kwigaragaza imbere y'abafana amiliyoni menshi  akurikira shampiyona ya Basketball izwi nka NBA ndetse n'umupira w'Amaguru w'Abanyamerika, NFL.

Ubufatanye bwa Visit Rwanda na LA Clippers ndetse na Los Angeles Rams buzashyira izina ry'u Rwanda mu bikorwa bitandukanye byo kwamamaza, harimo n'ibyapa n'ibirango bigaragara mu mikino y'aya makipe.

Ibi bizafasha igihugu gukurura ba mukerarugendo bashya n'abashoramari bifuza gusura u Rwanda.

RDB ivuga ko iyi gahunda igamije gufasha igihugu kugera ku ntego yo kwinjiza miliyari imwe y'amadolari y'Amerika ($1B) mu bukerarugendo bitarenze 2029, binyuze mu kongera umubare w'abasura igihugu no kongerera agaciro ibikorwaremezo by'ubukerarugendo u Rwanda rumaze igihe rushoramo imari.

U Rwanda rumaze igihe rushora mu bufatanye n'amakipe akomeye ku rwego rw'isi; Uhereye ku masezerano na Arsenal yo mu Bwongereza ndetse na Paris Saint-Germain (PSG) yo mu Bufaransa, byatumye igihugu gitangira kumenyekana ku rwego rwo hejuru mu bakunzi b'umupira w'amaguru.

Aha hiyongeraho kandi Bayern Munich yo mu Budage ndetse na Atletico de Madrid yo mu gihugu cya Esipanye.

Ibi bikaba bisobanuye ikintu kinini ku bufatanye bushya na LA Clippers na Rams ni indi ntambwe ikomeye mu kwagura ubwamamare bw'u Rwanda ku mugabane wa Amerika.

Abakurikiranira hafi aya masezerano mashya bavuga ko ibi bizafasha kongera amahirwe yo kugera ku masoko manini, no gushyira u Rwanda ku ikarita y'ibihugu bikurura ba mukerarugendo ndetse n'abashoramari bo ku rwego mpuzamahanga.

Source : https://rushyashya.net/visit-rwanda-yasinyanye-amasezerano-yubufatanye-namakipe-ya-la-clippers-na-los-angeles-rams-zo-muri-amerika/

Pyramids FC igomba gukina na APR FC mu ijonjora ry’Ibanze rya CAF Champions League yamaze kugera i Kigali aho yamanukanye intwaro za yo zose.

Ku mugoroba w’ejo nibwo iyi kipe ifite igikombe cya Champions League y’umwaka ushize nibwo yahagurutse mu Misiri iza mu Rwanda guhangana na APR FC ikaba ari nabwo yageze mu Rwanda.

Uyu munsi ikaba igomba gukorera imyitozo kuri Stade Amahoro ku kibuga cy’inyuma ni mu gihe ejo izakorera ku kibuga kizakira uyu mukino cya Kigali Pele Stadium.

Yazanye intwaro za yo zose zirangajwe imbere n’abanyezamu batatu ari bo: Ahmed El-Shenawy, Mahmoud Gad na Ziad Haytham.

Ba myugariro: Ali Gabr, Karim Hafez, Mohamed El-Sheiby, Mohamed Hamdy, Tarel Ala’a, Mahmoud Marei na Ahmed Sami.

Abakina hagati: Abdelrahman Magdy, Ahmed Atef Qotta, Mostafa Zizo, Everton Dasilva, Mohamed Reda Bobo, Mahmoud Zadaqa, Ahmed Tawfik, Mahmoud Donja, Mohanad Lasheen, Blati Toure, Mostafa Fathi na Walid El-Karti

Ba rutahizamu: Dodo El-Gabbas, Yousef Obama, Fiston Mayele na Marwan Hamdi

Source : http://isimbi.rw/spip.php?article11954

Perezida w’Ishyirahamwe ry’Umupira w’Amaguru mu Rwanda, Shema Fabrice yahuye n’abakinnyi babiri bakomeye bamaze igihe bifuzwa n’u Rwanda, Ndayishimiye Mike Tresor na Warren Kamanzi.

U Rwanda rumaze igihe kinini rwifuza aba bakinnyi ariko bo akaba atari yo mahitamo ya bo ya mbere ahubwo bari bafite izindi nzozi.

Uwa mbere ni Ndayishimiye Mike Tresor wa Burnley uvuka kuri se w’Umurundi na Nyina w’Umunyarwandakazi.

Uyu rutahizamu yifuje kuba yakinira u Bubiligi ndetse ubwo muri 2023 ibiganiro byari bigeze kure n’u Rwanda nibwo bamuhamagaye ariko akaba atarongeye guhamagarwa akaba yemerewe kuba yakinira u Rwanda.

Amakuru ISIMBI yamenye ni uko kuva yatorwa muri Kanama 2025, perezida wa FERWAFA, Shema Fabrice yashyize imbaraga mu gushaka aba bakinnyi bafite inkomoko mu Rwanda bakina i Burayi.

Uwo yahereyeho ni Mike Tresor wa Burnley mu Bwongereza wanagarageje ko gukinira u Rwanda ntacyo byamutwara, ISIMBI yamenye ko yahuye na Mama we ndetse ibiganiro bikaba byaragenze neza gusa biragoye ko imikino mu kwa 10 yayikinira.

Na Camarade wari umunyamabanga wa FERWAFA mbere yo kuvaho yari afitanye gahunda na Tresor Ndayishimiye yo kujya kumureba bakaganira akaza gukinira u Rwanda.

Undi ni myugariro wo ku ruhande rw’iburyo muri Toulouse mu Bufaransa, uyu mukinnyi wifuzaga gukinira Norway akaba na we yaraganiriye na Shema ndetse we bisa n’ibyarangiye na we isaha n’isaha abanyarwanda bazamubona mu mwambaro w’Amavubi.

Source : http://isimbi.rw/spip.php?article11955

Umukinnyi wo hagati w'ikipe ya Manchester City yo mu Bwongereza, Rodri, yongeye kugaragaza ikibazo cy'imvune mu ivi, bikaba aribyo byatumye atabasha kugaragara mu mukino uheruka ku munsi wo ku wa gatandatu taliki 27 Nzeri 2025 ubwo Manchester City yahuraga n'ikipe ya Burnley mu mukino wa English Premier League, nk'uko umutoza w'ikipe ya Manchester City Pep Guardiola yabitangaje ku mugaragaro.

Guardiola yavuze ko mbere y'umukino, mu myitozo ya nyuma, Rodri yegereye abatoza ababwira ati: 'Ndumva ntabasha gukina. Mfite uburibwe bwinshi mu ivi ryanjye, sinshobora kujya mu kibuga.' Nyuma y'ayo magambo, Guardiola yamusubije amubwira ko ntacyo bitwaye, kuko ikipe ifite abandi bakinnyi bashobora kumusimbura: 'Niba udashobora gukina, ntukine. Hari undi ugiye gufata umwanya wawe.'

Uyu mukinnyi ukomoka mu Igihugu cya Espaigne amaze igihe agaragaza imvune zisubiramo mu ivi rye, ibintu bishobora kugira ingaruka ku mikino y'ikipe ye, cyane cyane ko ari umwe mu nkingi za mwamba za Manchester City hagati mu kibuga.

Abasesenguzi b'imikino mu gihugu cy'Ubwongereza bavuga ko kumubura bishobora gusigira icyuho gikomeye ikipe, kuko ari we utuma hagati h'ikibuga cya City hubahirizwa neza uburyo bwo gukina.

N'ubwo atagaragaye muri uyu mukino, Guardiola yizeje abafana ko ikipe izakomeza guhatana uko byagenda kose, ashimangira ko abakinnyi bose bafite ubushobozi bwo gusimbura mugenzi wabo igihe cyose byaba ngombwa. Abafana bifuza ko Rodri yakira vuba, kuko umusanzu we ari ingenzi mu rugamba City irimo rwo kwitwara neza mu marushanwa yose.

 

Source : https://kasukumedia.com/rodri-yagize-imvune-yivi-yatumye-atagaragara-mu-kibuga/

Ibi yabigarutseho mu ruzinduko yagiriye muri iri shuri ryubatswe mu Mudugudu wa Musagara, Akagari ka Kanazi, mu Murenge wa Nyamata, Akarere ka Bugesera, rwabaye ku wa 27 Nzeri 2025.

Muri uru ruzinduko, Cardinal Kambanda yasuye ibice bitandukanye bigize iri shuri, aganira n'abanyeshuri ndetse n'ababyeyi babo bari bitabiriye iki gikorwa.

Cardinal Kambanda yashimiye Leta y'u Rwanda ikomeje gushyira imbaraga mu burezi izana ibigo mpuzamahanga mu gihugu, ndetse agaragaza ko ari amahirwe ku Banyarwanda kubera ko bizafasha abana babo kugira uburezi buhamye kandi buboneye.

Ati 'Iri shuri rero rifata abana b'abahanga ba mbere bafite impano nyinshi zikomeye, bakiga neza ariko kandi bakanatozwa n'ikinyabupfura.'

Yakomeje yibutsa ababyeyi barerera muri iri shuri ko umurage ukomeye umuntu ashobora guha umwana we kugira ngo azavemo umuntu ukomeye ari uburezi bufite ireme.

Ati 'Ubundi umurage ukomeye ubaho ushobora kuraga umwana ni ukumwigisha, icyo gihe uba umuhaye inkingi y'ubuzima, uba umuhaye umunani wuzuye kubera ko uwo mwana ejo ni we ejo uzavamo umuganga, injenyeri n'abandi mu guteza imbere igihugu ndetse n'ahandi.'

Cardinal Kambanda usanzwe ari umwe mu bagize Urwego rushinzwe Uburezi Gatolika ku Isi yagaragaje ko uburezi ari ngombwa mu buzima kubera ko bufasha umuntu kugira ubushobozi bwo gukora ibintu bitandukanye gusa agaragaza ko hari ibindi biba bisabwa kugira ngo ubashe kububyaza umusaruro.

Ati 'Mu burezi ubumenyi ni ngombwa kuko butuma umuntu agira ubushobozi bwo gukora ibintu binyuranye ariko ubumenyi ntibuhagije kubera ko busaba no kurera umutima kugira ngo bwa bumenyi afite abubyaze umusaruro.'

Umuyobozi wa Ntare Louisenlund School, Damien Vassallo, yavuze ko uruzinduko rwa Cardinal Kambanda rushimangira ihame iri shuri risanzwe rigenderaho ry'uko ubumenyi buhabwa abanyeshuri budakwiriye gushingira ku byo biga gusa mu ishuri.

Ati 'Icya mbere twakuye muri uru ruzinduko ni uko ruje rushimangira intego z'iki kigo gisanzwe kigenderaho kubera ko uburezi butangwa ntabwo bwita ku masomo yo mu ishuri gusa ahubwo gitanga uburezi bwuzuye ku mwana burimo gufasha umwana gukura mu mitekerereze, ibyiyumviro, indangagaciro, umutima ndetse no gushyira mu bikorwa ibyo baba bize.'

Iri shuri rya NLS, ryatangiye kubakwa mu 2019 bivuye ku gitekerezo cy'ihuriro ryiswe NSOBA rigizwe n'abize mu ishuri ryisumbuye rya Ntare School muri Uganda, ku isonga harimo Perezida Paul Kagame na Yoweri Kaguta Museveni.

Ryatangiranye abanyeshuri 145 bari mu mwaka wa mbere w'amashuri yisumbuye [Level Seven], ndetse biteganyijwe ko igihe imyaka yose izaba yuzuye rizaba rifite abagera ku 1000.

Mu banyeshuri biga muri iri shuri harimo abishyurirwa na Leta y'u Rwanda barimo ababaye aba mbere mu gihugu mu kizamini cya Leta gisoza amashuri abanza, abandi bakishyurirwa n'imiryango yabo.

Ibyishimo byari byose ku bana biga muri iki kigo basuwe na Cardinal Kambanda

Cardinal Kambanda yatemberejwe ibice bitandukanye bigize Ntare Louisenlund School

Cardinal Kambanda yashimiye imikorere inoze y’iri shuri ry’icyitegererezo

Umuyobozi wa Ntare Louisenlund School yaginiriye na Cardinal Kambanda

Abanyeshuri biga muri Ntare Louisenlund School bageneye impano Cardinal Kambanda wabasuye akabagenera impanuro zitandukanye

Ababyeyi barerera muri iri shuri basabwe kuba hafi aba bana

---

Source : http://igihe.com/amakuru/u-rwanda/article/umurage-mwiza-wo-kuraga-umwana-ni-uburezi-cardinal-kambanda-ku-barerera-muri

Perezida wa Repubulika y'u Rwanda, Paul Kagame, ku Cyumweru tariki ya 28 Nzeri 2025, yakiriye mu biro bye i Kigali umukinnyi mpuzamahanga w'iteramakofe Carlos Takam, umwe mu bamenyekanye cyane muri iyi siporo ku rwego rw'Isi. Carlos Takam, ufite inkomoko ku mugabane wa Afurika, asanzwe ari umukinnyi wabigize umwuga kandi wigeze kwegukana ibikombe bikomeye bya shampiyona y'Isi.

Mu kiganiro bagiranye, Takam yashimye uburyo u Rwanda rwashyize imbere iterambere ry'imikino itandukanye, avuga ko ari isoko y'ibyishimo kubona igihugu cy'Afurika kigaragaza ubushake bwo guha urubyiruko amahirwe yo kwitoza no kwiyubaka mu rwego mpuzamahanga.

Yagize ati: 'Naje mu Rwanda kuko mbona ari ahantu heza ho gutangiza impinduka z'iteramakofe mu rubyiruko. Ibyo Perezida Kagame akora mu guteza imbere siporo ni urugero rwiza ku bihugu byinshi by'Afurika.'

Carlos Takam yanatangaje ko amaze gushinga Ishuri Nyafurika ry'Iteramakofe i Kigali, rifite intego yo gutegura abakinnyi bato bafite impano kugira ngo bazavemo intwari nshya z'iyi siporo ku mugabane wa Afurika no ku rwego rw'Isi.

Mu rwego rwo gushimira Perezida Kagame ku bufasha n'ubuyobozi bwe bufasha siporo, Takam yamuhaye impano y'umukandara w'umwimerere wegukanywe n'umukinnyi wahize abandi (champion) muri shampiyona y'Isi y'iteramakofe. Ni ikimenyetso cy'icyubahiro gikomeye mu Isi y'iteramakofe.

Perezida Kagame yashimye iyi mpano ndetse anashimira Carlos Takam ku gikorwa cy'ubutwari cyo gushinga ishuri rizafasha urubyiruko rw'u Rwanda n'Afurika muri rusange. Yavuze ko siporo ari urufunguzo rwo kurwanya imyidagaduro mibi, guhanga akazi, no gushyigikira ubuzima buzira umuze.

Ibi biganiro byagaragaje ko u Rwanda rukomeje gufungura amarembo ku bakinnyi mpuzamahanga, ndetse ko iterambere rya siporo ari kimwe mu byubaka igihugu mu buryo burambye.

 

Source : https://kasukumedia.com/carlos-takam-yashimiye-perezida-kagame-amuha-umukandara-wumukinnyi-wahize-abandi-ku-isi-mu-iteramakofi/

Ikipe ya Arsenal yo mu Bwongereza ikomeje kugaragaza uburyo bwo gutsinda ibitego bivuye mu mipira y'imiterekano (set-pieces), cyane cyane mu gukoresha amakosa y'amakipe bahanganye igihe baba batsinzwe koruneri. Guhera muri Kanama 2023 kugeza ubu, Arsenal imaze gutsinda ibitego 36 byose bikomoka muri koruneri muri shampiyona ya Premier League, bikaba ari umusaruro ukomeye ugaragaza imbaraga n'imyitozo yihariye iyi kipe yashyizeho.

Mu busanzwe, amakipe akomeye akunda kwibanda ku buryo bwo gucenga, guhererekanya no kwihuta mu kibuga hagati, ariko Arsenal yagaragaje ko no mu mpande zose z'umukino ishobora gutanga isomo rikomeye.

Abakinnyi nka William Saliba, Gabriel Magalhães, Declan Rice ndetse na Ben White, bakunze kuba ari ingenzi cyane mu gutsinda ibitego byo mu mitwe bivuye kuri koruneri ziterwa na Martin Ødegaard cyangwa Bukayo Saka.

Umutoza Mikel Arteta amaze kubaka ikipe ifite ubuhanga mu mikino y'amakosa ndetse anashimangira ko bituma ikipe ibona amahirwe yo gutsinda mu mikino ikomeye. Mu mikino myinshi, harimo n'iyo bahura n'amakipe akomeye nka Manchester City cyangwa Liverpool, ibitego biva muri koruneri byabaye intwaro ikomeye yo gutandukanya amanota, doreko no mu ijoro ryashize taliki ya 28 Nzeri 2025 ubwo hari ku Cyumweru ubwo batsindaga ikipe ya Newcastle ibitego biri kuri kimwe kandi ko ari Newcastle yari yabanje gutsinda ibyo bikarangira Arsenal ibikoze nkuko isanzwe ibikora mu mipira y'imiterekano.

Ibi bituma Arsenal ifatwa nk'ikipe iri ku rwego rwo hejuru mu buryo bwo gucunga imipira y'imiterekano, bikaba ari uburyo bushobora gukomeza kuyifasha mu rugamba rwo guhatanira igikombe cya Premier League no mu marushanwa yo ku rwego rw'i Burayi.

Source : https://kasukumedia.com/arsenal-iyoboye-amakipe-mu-bwongereza-afite-ibitego-byinshi-biva-muri-koruneri/

Perezida Paul Kagame yatangaje ko u Rwanda rutewe ishema no kuba rwarakiriye Shampiyona y'Isi y'Amagare ya 2025, ashimira abakinnyi bayitabiriye n'Abanyarwanda babashyigikiye bigatuma igenda neza cyane.

Shampiyona y'Isi y'Amagare yakiniwe mu Rwanda kuva ku wa 21-28 Nzeri 2025, iba iya mbere ibereye ku mugabane wa Afurika.

Yegukanywe n'Umunya-Slovenia, Tadej Pogačar, akurikirwa n' Umubiligi Remco Evenepoel, uwa gatatu aba Umunya-Irlande, Ben Healy.

Perezida Kagame abinyujije ku rukuta rwe rwa X, yashimiye inzego zitandukanye zagize uruhare mu gutegura iri rushanwa kugeza ku wa 28 Nzeri 2025 risojwe.

Ati 'U Rwanda rutewe ishema no kuba rwarakiriye Shampiona y'Isi y'Amagare. Ndashimira abakinnyi bose bahanganiye mu Murwa Mukuru wacu ku musaruro w'indashyikirwa bagezeho no kwihangana. Ndashimira byimazeyo inshuti yanjye, David Lappartient, abakozi ba UCI, abafatanyabikorwa bacu, inzego z'umutekano zafashije ngo irushanwa ribere mu mihanda itekanye, n'imbaraga z'Abanyarwanda barishyigikiye batuma Shampiyona y'Isi y'Amagare i Kigali koko itazibagirana.'

Isiganwa ryo mu muhanda ryasojwe Shampiyona y'Isi y'Amagare ryatangiwe n'abakinnyi 165 hasoza 30 gusa ndetse nta Munyarwanda warisoje muri batandatu barikinnye.

Impuzamashyirahamwe y'Umukino w'Amagare ku Isi (UCI), yatangaje ko abafana bagera kuri miliyoni ari bo barebeye ku muhanda isiganwa ry'abagabo ryasoje Shampiyona y'Isi yaberaga i Kigali.

Perezida w'Impuzamashyirahamwe y'Imikino yo Gusiganwa ku Magare ku Isi, David Lappartient, na we abinyujije ku mbuga nkoranyambaga yavuze ko amagambo adashobora kugaragaza amarangamutima bafite nyuma y'uko irushanwa ryagenze neza kuruta uko babikekaga.

Ati 'Mwakoze mwese ku bw'uyu munezero, wakoze Kigali, wakoze Rwanda. Mbega Kigali! Amagambo ntiyasobanura amarangamutima dufite uyu munsi. Mwakoze cyane ku rukundo mwagaragaje mu muhanda no hanze yawo, ubwo Tadej Pogačar yegukanaga umwambaro wa kabiri w'umukororombya, Remco Evenepoel akabona umudali wa Feza, na Ben Healy agatwara Umulinga.'

Pogačar wisubije umudali wa zahabu mu gusiganwa mu muhanda bisanzwe [Road Race], yari yavuze ko yabonye isiganwa ryo mu Rwanda riteguye neza agereranyije n'iryo muri Australia.

Ati 'Iri ni ryiza kurushaho. Mwihangane ariko imiterere y'inzira ziri aha ikubye inshuro 10 iyo muri Australia. Munyihanganire ni ko kuri, sinshaka kwibasira Abanya-Australia bashushanyije inzira zaho, ariko ntabwo nayisanzemo.'

Shampiyona y'Isi y'Amagare ya 2026 izabera i Montreal muri Canada.

Source : https://rushyashya.net/u-rwanda-rutewe-ishema-no-kwakira-shampiyona-yisi-yamagare-2025-yagenze-neza-kurusha-uko-byari-byitezwe-perezida-kagame/

Ibi yabivuze ku wa 27 Nzeri 2025 mu muganda rusange wabereye mu Karere ka Nyabihu umurenge wa Shyira, aho iyi banki yateye ibiti bigera ku 7000.

Umuyobozi ushinzwe ishami ry'ubuhinzi muri Equity Bank Rwanda Plc, Nkuriza Clement Darius, yavuze ko nk'ikigo cy'imari serivisi zabo zitarangirira mu gutanga amafaranga gusa ahubwo bita no ku mibereho y'abaturage.

Ati ' Nubwo turi abacuruzi ariko tugira n'ikindi gice cyihariye cya Equity Foundation, gishinzwe ibikorwa byo guteza imbere abaturage. Twizera ko muri banki tuzatera imbere ari uko aho dukorera hateye imbere, rero inshingano zacu ni kubateza imbere

Akomeza avuga ko mu guteza imbere abaturage bakora ibikorwa byo guteza imbere ubuhinzi n'ubworozi aho byiharira 30% by'ibikorwa bakora.

Ati 'Guteza imbere ubuhinzi n'ubworozi si uguhinga gusa si ukorora gusa ahubwo ni no kurinda ikirere no kurengera ibidukikije ari yo mpamvu tuza no mu bikorwa nk'ibi byo gutera ibiti.'

Minisitiri w'Ubutegetsi bw'Igihugu, Habimana Dominique, yasabye abaturage kwitabira gutera ibiti no kubungabunga ibihari hagamijwe kurengera ibidukikije no kurwanya ibiza cyane cyane mu bihe by'imvura nyinshi.

Habimana yavuze ko nk'umurenge ukunze kwibasirwa n'ibiza ari ingenzi cyane ko batera ibiti ndetse n'ibihari bakabibungabungwa.

Ati ' Gutera ibiti tumaze kumenya akamaro kabyo cyane cyane hano mu Karere ka Nyabihu. Gutera ibiti bituma tubungabunga ibidukikije, bituma twirinda ibiza bya hato na hato biza bikatwangiriza ubuzima.'

Akomeza avuga ko kandi ibigo by'Imari bikwiye kugira uruhare mu gutera ibiti nk'uko Equity Bank Rwanda yabikoze.

Ati 'Igikorwa twakoze uyu munsi ni igikorwa cyiza kandi cy'ingenzi ari na yo mpamvu nshimira abafatanyabikorwa ba Equity baduhaye ibiti twateye uyu munsi bigaragaza bwa bwuzuzanye n'ubufatanye hagati ya Leta, abaturage nk'abafatanyabikorwa kugira ngo twihute mu rugendo rw'iterambere.'

Kugeza ubu Equity bank Rwanda imaze gutera ibiti ibihumbi 22 birimo ibiti by'imbuto ibihumbi birindwi bizafasha abaturage kurwanya imirire mibi.

Ibihumbi 15 byatewe mu Karere ka Nyagatare mu gihe ibindi 7000 byatewe mu Karere ka Nyabihu.

Equity Bank Rwanda PLC, yateye ibiti 7000 mu Karere ka Nyabihu hagamijwe kurengera ibidukikije

Abaturage bo mu Murenge wa Shyira, mu Karere ka Nyabihu beretswe ibyiza byo gutera ibiti no kubibungabunga

Umuyobozi ushinzwe ishami ry'ubuhinzi muri Equity Bank Rwanda Plc, Nkuriza Clement Darius, yavuze ko nka banki bashyira imbere n'iterambere ry'abaturage

Minisitiri w'Ubutegetsi bw'Igihugu, Habimana Dominique, yasabye abaturage kubungabunga ibiti mu kurengera ibidukikije

---

Source : http://igihe.com/amakuru/u-rwanda/article/equity-bank-rwanda-plc-yateye-ibiti-7000

Ni ubutumwa yatangiye mu nama ya Komite Mpuzabikorwa y'Akarere ka Huye, iherutse kubera muri Huye, yagarutse ku ngingo nyinshi zirimo n'isuku.

Guverineri Kayitesi, yavuze ko abayobozi bakabaye bayobora abaturage mu nzira nziza cyane cyane mu bijyanye n'isuku.

Ati ''Ese mwibuka kwigenzura namwe mukareba niba ubwiherero mufite bunoze, ku buryo buri wese yabugana ntacyo ubikamanga? Ariko buriya muzi ko hari igihe tujya mu muganda ahantu runaka, umuntu akazenguruka umudugudu wose ashaka ubwiherero ukabubura!''

Yavuze ko 'Turifuza isuku hose mu ngo, isuku mu rugo, mu biraro, isuku ku mashuri n'ahandi hose. Ubu turi mu bukangurambaga bwo mu rwego rw'igihugu bugera n'aho kwigisha abantu koza amenyo, kwigisha abagore n'abakobwa kwikorera isuku mu gihe cy'imihango, mbese ubu nta bikiri ibanga, kuko bitugiraho ingaruka twese nk'igihugu.'

Yakomeje asaba abayobozi kugira isuku itarobanura ibyiciro kuko ari yo suku ikwiye abantu bagaragaza ko bayisobanukiwe maze.

Ati ''Ese kuki mugira isuku y'ibice? Ubwiherero umunyeshuri ajyamo ni nabwo diregiteri n'abarimu mwagakwiye kujyamo. Kuko mubujyamo, byatuma mubukorera isuku ihagije. Ubwiherero bw'abakirisitu ni nabwo ba Pasiteri bagakwiye kujyamo, kuko ni mwe mwirirwa mwigisha ko abantu bareshya imbere y'Imana. Tubugiyemo, byatuma tubugira isuku.''

Yakomeje asaba ko abantu bahindura imyumvire kugira ngo ibintu byose bihinduke ku neza y'umuturage wese, bibuka ko isuku itavugwa gusa ahubwo ikorwa, maze ibikorwa byayo bikigisha ababibonye.

Ibi biravugwa mu gihe hirya no hino mu bice bitandukanye by'Intara y'Amajyepfo hari ahakigaragara isuku nke cyane cyane mu bice bihuriramo abantu benshi nko muri za gare, ku bibuga by'umupira, mu bwiherero bw'amasoko, aho abantu bakiherera ku mihanda.

Kuri za Kiliziya n'insengero kandi hakunze kugaragara ikibazo cy'ubwiherero busa nabi ndetse bunuka.

Guverineri w’Intara y’Amajyepfo, Kayitesi Alice, yasabye abatuye Amajyepfo bose kugira isuku

---

Source : http://igihe.com/amakuru/u-rwanda/article/ubwiherero-umunyeshuri-ajyamo-ni-bwo-diregiteri-n-abarimu-mukwiriye-kujyamo