Author: webrwanda

Ibi babisabwe ku wa 29 Nzeri 2025, ubwo abayobozi b'Ikigo cy'Igihugu cy'Ibimenyetso bishingiye ku Bumenyi n'Ubuhanga bikoreshwa mu Butabera (RFI), cyaganirizaga bamwe mu bayobozi bo mu Karere ka Ngororero mu bukangurambaga bwiswe ''Sobanukirwa RFI 2025''

Ni igikorwa cyitabiriwe n'abayobozi mu nzego z'ibanze, abo mu nzego z'umutekano, abakozi b'Akarere n'abandi benshi batandukanye.

Umukozi ushinzwe imari n'ubutegetsi mu Murenge wa Kabaya, Nyiransengimana Xaverine, yavuze ko ikintu bungukiye muri ubu bukangurambaga ari uko bamenye ko bashobora kubungabunga ikimenyetso mu gihe habaye ibyaha, bikazafasha mu kwihutisha ubutabera.

Nyirajyambere Marie Chantal uhagarariye abajyanama b'ubuzima yavuze ko bagiye gukora ubukangurambaga bagasobanurira abaturage serivisi zitangwa n'iki kigo cya RFI.

Ati 'Hari ukuntu wasangaga amakuru ya RFI atatugeraho neza, umuntu yibwaga bacukuye inzu, tukarekera, umuntu akakubeshya yifashishije impapuro mpimbano bikarangira ariko ubu twamenye ko twapimisha izo nyandiko muri RFI hagatangwa ubutabera bwizewe.''

Pasiteri w'Itorero ry'Abadivantisiti mu Murenge wa Nyange, Munyawera Elizaphane we yavuze ko agiye gusobanurira abakirisitu be uburyo mu gihe habaye ibyaha babungabunga ibimenyetso bikabafasha kubona ubutabera.

Ati 'Icyo nigiyemo ni ukumenya ko ibimenyetso by'ahabereye icyaha bigomba kubungwabungwa neza, namenye ko mbere y'uko inzego z'umutekano zihagera ngomba kuzitira ahabereye icyaha, ni ibintu nishimiye rero kuko ntabwo narinziko hari ikigo nk'iki cyadutabara mu gihe twibwe cyangwa mu gihe hari uwishwe n'abagizi ba nabi.''

Umuyobozi w'Akarere ka Ngororero Wungirije ushinzwe imibereho myiza y'abaturage, Mukunduhirwe Benjamin, yasabye abayobozi basobanuriwe serivisi zitangwa na RFI kuzikwirakwiza mu baturage kugira ngo bamenye ko iki kigo cyabafasha kubona ubutabera bwizewe.

Ati 'Turifuza ko mu cyumweru gitaha mutangira gusobanurira abaturage serivisi zitangwa na RFI kugira ngo bamenye ko bashobora kubona ubutabera bwizewe binyuze muri serivisi za RFI, ikindi mubabwire ko mu gihe bakoze ibyaha biyoberanya RFI ishobora kubatahura.''

Umuyobozi mukuru ushinzwe serivisi zo gupima imibiri y'abitabye Imana muri RFI, Dr. Innocent Nkurunziza, yasabye abayobozi mu nzego zitandukanye kwigisha abaturage uko basigasira ibimenyetso kugira ngo bifashe mu gutanga ubutabera bwuzuye.

Ati 'Ahabereye ikimenyetso kijyanye n'ihohoterwa, umuntu yitabye Imana n'ibindi byaha, hagomba gukumirwa ko abantu bahagera cyangwa se ko ibyo bimenyetso byangirika kugira ngo ubutabera butangwe neza, mugende mubwire abo muyobora guhera ku nzego zo hasi n'abaturage ko bakwiriye kujya bahazengurutsa akagozi ubundi bagahamagara inzego z'umutekano.''

Kuri ubu RFI itanga serivisi zirimo gupima uturemangingo ndangasano, gupima ibiyobyabwenge mu mubiri w'umuntu, gupima ibinyobwa n'imiti bitemewe, gupima imikono n'inyandiko hagamijwe kugaragaza umwimerere wabyo mu gukemura impaka n'izindi nyinshi.

Umuyobozi muri RFI, SP Ashimirwe Japhet asobanura serivisi zose zitangwa na RFI

Umuyobozi w’Akarere ka Ngororero Wungirije ushinzwe imibereho myiza y’abaturage, Mukunduhirwe Benjamine, yavuze ko bagiye kurushaho kwegera abaturage bakabasobanurira serivisi zitangwa na RFI

Umuyobozi mukuru ushinzwe serivisi zo gupima imibiri y'abitabye Imana muri RFI, Dr. Innocent Nkurunziza yasabye abayobozi b’Akarere ka Ngororero gusobanurira abaturage serivisi iki kigo gitanga kugira ngo zibafashe mu butabera

Bamwe mu bayobozi bahagarariye serivisi zitangwa na RFI ni bo basobanuriye abayobozi mu nzego zitandukanye serivisi batanga

Abayobozi mu nzego zitandukanye bitabiriye ubukangurambaga bwa RFI

Abahanzi b’indirimbo zo kuramya no guhimbaza Imana, Vestine na Dorcas bagiye kwerekeza muri Canada aho bazataramira abakunzi babo.

Ni nyuma y’igihe n’ubundi aba bahanzi bakunzwe cyane baragombaga kujya gutaramira muri Canada ntibyakunda. Cyagombaga kuba muri 2023.

Iki gitaramo kizabera mu Mujyi wa Vancouver tariki ya 18 Nzeri 2025

Si iki gitaramo gusa kuko binateganyijwe mu mwaka utaha bazasubirayo gutaramira no mu yindi Mijyi.

Amakuru avuga ko abantu badakwiye kuzatungurwa no kubona Hakim Sahabo na Samuel Gueulette mu bakinnyi b’Ikipe y’Igihugu izifashisha ku mukino wa Benin na Afurika y’Epfo mu gihe umutoza Adel Amrouche yari yaraciye iteka ko atazongera kubahamagara.

Umutoza w’ikipe y’Igihugu y’u Rwanda, Adel Amrouche muri Kamena 2025 nibwo yavuze ko mu gihe akiri umutoza w’Amavubi atazongera guhamagara Hakim Sahabo wa Standard de Liège mu Bubiligi, Samuel Gueulette wa RAAL La Louvière na yo yo mu Bubiligi ndetse na Rafael York wa Oddevold muri Sweden.

Hari nyuma yo kutishimira ko Rafael York na Hakim Sahabo batitabiriye ubutumire bw’Ikipe y’Igihugu Amavubi kandi yabahamagaye mu gukina imikino ya gicuti na Algeria yabaye muri Kamena 2025. Samuel Gueulette we bivugwa ko we yagiranye ikibazo n’umutoza wungirije Eric Nshimiyimana.

Mu mikino iheruka ntabwo aba bakinnyi bose bahamagawe, gusa perezida wa FERWAFA, Shema Fabrice yavuze ko hari ibyo batazihanganira cyane mu mihamagarire ko nta bakinnyi bagomba kuba ibicibwa mu ikipe y’igihugu.

Bivugwa ko yicaranye n’umutoza bakaganira buri kimwe kerekeye aba basore ndetse akemera kuva ku izima ku buryo bashobora no guhamagarwa mu mikino isoza Itsinda C mu gushaka itike y’Igikombe cy’Isi cya 2026 u Rwanda ruzakinamo na Benin na Afurika y’Epfo mu kwezi gutaha. Yemereye perezida wa FERWAFA ko mu gihe bazaba bari ku rwego rwiza abifuzaho azabahamagara nta nzika z’ibibazo byo hanze y’ikibuga.

Uwase Carine usigaye ukundana na The Major umucuranzi wa 'Guitar Solo’ wamenyekanye muri Symphony Band, yamuhundagajeho imitoma mu gihe yizihiza isabukuru ye y’amavuko.

Ejo hashize The Major yizihizaga isabukuru ye y’amavuko maze umukunzi we Carine Uwase amuhundagazaho imitoma.

Abinyujije ku rukuta rwe rwa Instagram yagize ati 'isabukuru nziza kuri wowe unyuzuza. Ni The Major, ndagukunda ubuziraherezo.'

Yakomeje agira ati 'uzahora iteka uri umuntu nkunda cyane, ugire umunsi mwiza nk’uko na we uri.'

Uwase Carine yamenyekanye mu myidagaduro muri 2019 ubwo rutahizamu Issa Bigirimana wakiniraga APR FC yamwambikaga impeta ya fiançailles ariko muri 2022 Issa Bigirimana akerura ko batandukanye.

Muri uwo mwaka ni nabwo hagiye hanze amakuru y’urukundo rwa Carine na The Major uheruka gusohora indirimbo yise 'Downtown’, ahishura ko yayikoreye umukunzi we, Uwase Carine bamaranye imyaka itanu.

Nubwo Carine yambitswe impeta na Issa Bigirimana muri 2019, we yatangiye gukundana na The Major muri 2020, ibintu uyu muhanzi yavuze ko atari azi ib’urukundo rwe na Issa Bigirimana.

Igikomangoma Albert II uri no mu batanze ibihembo ku batsinze muri Shampiyona y'Isi y'Amagare yabwiye RBA ko icya mbere ashima ari uburyo u Rwanda rwateguye neza iryo rushanwa ryari ribereye muri Afurika bwa mbere rikagenda neza cyane.

Yavuze ko bishimangira ubushobozi bwarwo mu kwakira ibikorwa bikomeye ku rwego mpuzamahanga ariko avuga ko ikirenze ibyo yanyuzwe cyane na politiki y'igihugu mu kurengera ibidukikije.

Ati 'Naganiriye na Perezida Paul Kagame ku byerekeye ibidukikije mushimira cyane uruhare rwe n'u Rwanda muri rusange mu kurwanya ihumana ry'ikirere. Na twe muri Monaco twahagaritse ikoreshwa iry'ibikoresho bya pulasitiki bikoreshwa inshuro imwe rero hari byinshi duhiriyeho.'

Igikomangoma Albert II kandi yanyuzwe n'uburyo kurengera ibidukikije byuzuzanya n'isuku hose mu buryo bufite umurongo uhamye kandi bwamaze kuba umuco.

Ati 'Umuntu arabibona cyane kuva ku kibuga cy'indege kugera rwagati mu Mujyi wa Kigali abona Kigali ikeye kandi itoshye. Ni ibintu bigaragarira buri wese kandi hari n'ibikorwa bitandukanye bishishikariza abantu kurwanya umwanda n'ahandi bikorwa ariko hano ubona bifite umurongo uhamye kandi byabaye nk'umuco ndetse ubona abantu baba bishimiye kubikorera hamwe.'

Igikomangoma Albert II kandi yongeyeho ko asanga uwo murongo u Rwanda rwafashe uzashinga imizi kuko abaturage barwo benshi bari mu myaka y'urubyiruko ku buryo bazabikurana bikaba umuco.

Igikomangoma Albert II wa Monaco yahembye Magdeleine Vallieres watsinze isiganwa ry'abagore muri Shampiyona y'Isi y'Amagare ya 2025

Igikomangoma Albert II wa Monaco, yashimiye Perezida Paul Kagame ku muhate washyizwe mu kurengera ibidukikije n’isuku

Ku wa 29 Nzeri 2025, RDB yatangaje ko yabaye umufatanyabikorwa wa LA Clippers ikina ya Shampiyona ya Basketball muri Leta Zunze Ubumwe za Amerika (NBA) ndetse na Los Angeles Rams ikina muri National Football League (NFL).

Visit Rwanda ifite gahunda yo kwerekana ishusho y'u Rwanda, umuco, imiterere y'igihugu n'ibyiza nyaburanga byarwo hagamijwe gukurura ba mukerarugendo, ishoramari n'ibindi birimo no kugaragaza isura nyayo ya Afurika, kenshi ukunze gusanga ifatwa nabi mu mahanga.

Ubu bufatanye si ubwa mbere kuko u Rwanda rusanzwe rufitanye imikoranire myiza n'amakipe nka Arsenal FC yo mu Bwongereza, Atlético de Madrid yo muri Espagne, Bayern Munich yo mu Budage na Paris Saint-Germain yo mu Bufaransa.

Kuba Visit Rwanda yinjiye muri NBA ubu, biri muri gahunda yo gukomeza kwagura ibikorwa byayo ku ruhando mpuzamahanga.

Visit Rwanda kandi isanzwe ikorana na Basketball Africa League (BAL) yatangijwe mu 2019.

Imyaka ine ya mbere ya BAL imikino ya kamarampaka yabereye muri BK Arena iherereye mu Karere ka Gasabo, mu Mujyi wa Kigali.

Ni ku nshuro ya mbere mu mateka ya NBA na NFL habayeho ubufatanye nk'ubwo bwo kwamamaza ubukerarugendo bw'igihugu cyo muri Afurika.

Aya makipe yombi azamamaza Visit Rwanda mu buryo butandukanye aho kuri Clippers, ibaye umuterankunga wayo wa gatatu ugiye gushyirwa ku mwambaro guhera mu 2017, NBA yakwemerera amakipe kwambara imyambaro iriho ibirango by'abafatanyabikorwa.

Perezida wa Kroenke Holdings, Otto Maly yavuze ko gukorana na Visit Rwanda ari amahirwe adasanzwe.

Ati 'Aya ni amahirwe adasanzwe kugira Visit Rwanda nk'umuterankunga muri Stade ya SoFi na Hollywood Park. SoFi Stadium na Hollywood Park byubakiwe kuba ku rwego mpuzamahanga n'icyerekezo mpuzamahanga nyacyo. Twishimiye kuba RDB yarahisemo kwamamariza ubukerarugendo no gusura u Rwanda hano kuri Hollywood Park, izakira ibikorwa mpuzamahanga bikomeye mu myaka mike iri imbere.'

Umuyobozi Mukuru wa RDB, Jean-Guy Afrika yabwiye Forbes ko guteza imbere ubukerarugendo ari ibintu byari bimaze igihe bitegurwa kuko ari urugendo rw'imyaka myinshi igera kuri 22.

Yavuze ko ubushake bw'u Rwanda bwatangiye mu 2003 ubwo igihugu cyiyemezaga gushyira imbere ubukerarugendo.

Nyuma yo gushyiraho ingamba zihamye, u Rwanda rwatangiye gushyiraho no gutunganya ahantu hashobora gusurwa ari na bwo hatangiraga ibikorwa byo gucunga ingagi, kuvugurura Pariki nka Pariki y'Igihugu ya Nyungwe ahashyizwe Canopy walks, ibikorwa byo kurira imisozi byatumye Pariki y'Igihugu y'Ibirunga isurwa cyane ndetse n'ibindi.

Ikindi yagaragaje ni uko u Rwanda rwashoye mu kugira sosiyete y'indege no gukorana n'izindi kugira ngo rubashe kwihuza n'abatuye Isi mu bice bitandukanye mu buryo bworoshye.

Uyu muyobozi yashimangiye ko bigeze ku rwego rwo gukorana n'amakipe, intambwe ya mbere harebwe ku mupira w'Abanyaburayi aho rwabonaga hari inyungu.

U Rwanda rwahisemo kwerekeza amaso muri Los Angeles. Jean Guy Afrika yagaragaje ko Leta Zunze Ubumwe za Amerika zigize igice kinini cy'ibyo ubukerarugendo bw'u Rwanda bwinjiza kandi abatuye muri Los Angeles bajyanye neza n'abantu bakunda kurusura.

Ati 'Guhitamo aho kwibanda na byo byari ikibazo gikomeye, ariko iyo urebye kuri Los Angeles ubwayo, ni imwe mu zituwe n'abinjiza agatubutse muri USA kandi ituwe n'abantu benshi bakunze gutembera. Rero byatumye guhitamo bitatugora cyane.'

Yavuze ko ubwo bufatanye butagamije gusa kuzamura u Rwanda ku ruhando mpuzamahanga, ahubwo bushobora no kugira inyungu nyinshi mu gihe kizaza.

Ati 'Hejuru yo gukoresha siporo nk'inzira yo kuzamura abaterankunga ba siporo nko kumenyekanisha, hari indangagaciro dushaka gushyira muri sosiyete yacu. Nk'uko mubizi nta zindi ndangagaciro nziza nk'izitangwa na siporo nko gukora neza, ikinyabupfura, gushyira hamwe, indangagaciro y'uko na nyuma yo gukina bikomeza kugira uruhare k'uko witwara muri sosiyete.'

Yunzemo ati 'Siporo ifite uruhare rukomeye cyane mu kubaka u Rwanda rw'ejo hazaza, kandi ni urugendo rukomeje. Turishimye cyane ku bufatanye nk'ubu.'

Perezida wa LA Clippers, Gillian Zucker, yavuze ko ubu bufatanye bugamije kuyifasha kugera ku ntego zayo zirambye zo guteza imbere siporo.

Ati 'Muri rusange, NBA iri gushaka guteza imbere uyu mukino ku ruhando mpuzamahanga. Kandi hari icyizere gikomeye mu hazaza ha Afurika. Natekerezaga ko ibi ari nk'ubusazi ariko hejuru ya 20 y'ibihugu bifite ubukungu bwihuta mu Isi biri muri Afurika.'

Yongeyeho ati 'Iyo urebye by'umwihariko ku Rwanda, hari intambwe ikomeye y'ishoramari mu bikorwaremezo byarwo, ikoranabuhanga, uburezi no mu rubyiruko rwarwo. Bafite urubyiruko ruri gukoresha cyane ikoranabuhanga.'

Zucker yavuze ko muri ubwo bufatanye harimo ko Clippers izafasha mu kuvugurura ibibuga bya Basketball no kubaka aho gutorezwa Basketball mu Rwanda.

Ati 'Twakoze ibishoboka ngo buri wese abashe kubona Basketball hafi y'aho atuye hano muri Los Angeles, ni muri urwo rwego, ubu buryo ntabwo buboneka ku Isi hose, ibyo ni bimwe mu byo twashyizemo imbaraga muri ubu bufatanye mu gufasha kurema amahirwe ku rubyiruko mu Rwanda yo gukina Basketball.'

Ku rundi ruhande ubu bufatanye na Los Angeles Rams na Visit Rwanda ni amateka akomeye kuri NFL, aho Amerikan Football ikomeje kwaguka mu bihugu bitandukanye.

Mu gihe abafana bazaba bicaye muri SoFi Stadium imwe mu nini ku Isi kuko ishobora kwagurwa ikakira abantu ibihumbi 100, abayirimo bazajya babona ibirango bya Visit Rwanda.

Visit Rwanda kandi izajya inyuza n'amatangazo yo kwamamaza mu buryo bw'amashusho kuri televiziyo ya rutura iri muri iyo stade no ku bibuga bindi biyishamikiyeho.

Perezida wa Los Angeles Rams, Kevin Demoff, na we yashimangiye ko ubwo bufatanye buzatuma ikipe yabo igira abafana no ku ruhando mpuzamahanga ndetse na NFL muri rusange ikamenyekana.

Ati 'Intego ya mbere yacu ubwo twasubiraga muri Los Angeles tukubaka SoFi Stadium muri Hollywood Park byari ukuzagira LA Rams izina rikomeye. Ubu dufite uburenganzira muri Aziya, Australia na Mexique. Umwaka ushize twabonye uburenganzira bwo gukorana na UAE, twifuzaga cyane gukorana na Afurika kandi twabonye uburyo bwo kugira Rams izina rikomeye kuri uwo mugabane.'

Yavuze ko bijyanye n'uko Rams isanganywe ubucuti na Arsenal FC yo mu Bwongereza bari bafitanye isano ya bugufi na Visit Rwanda.

Mu masezerano LA Rams izajya yambara Visit Rwanda mu mugongo ndetse n'ibirango byayo bishyirwe muri Stade ku mikino yakiriye.

Byitezwe ko ubu bufatanye buzatuma abakunzi ba NBA n'aba NFL batekereza ku ngendo zo kuba baruhukira mu Rwanda ndetse bakaboneraho kubona amahirwe y'ishoramari ahari, na yo bakaba bayabyaza umusaruro.

Visit Rwanda izaba iri no ku myambaro ya LA Rams muri NFL

LA Clippers izajya yambara imyenda iriho Visit Rwanda

Umuyobozi Mukuru wa RDB, Jean Guy Afrika, yasobanuye impamvu u Rwanda rwerekeje amaso muri Los Angeles

U Rwanda rukomeje kwandika amateka mashya ku ruhando mpuzamahanga

Jean Guy Afrika yashimangiye ko ubu bufatanye bwitezweho umusaruro ukomeye

Ni amasezerano yashyizweho umukono ku wa 25 Nzeri 2025 ubwo impande zombi zitabiraga Inama Mpuzamahanga y'Umuryango ushinzwe Indege za gisivili, ICAO, iheruka kubera i Monreal muri Canada.

U Rwanda rwari ruhagarariwe na Ambasaderi w'u Rwanda muri Canada, Higiro Prosper, mu gihe Maroc yari ihagarariwe na Minisitiri w'Ubwikorezi, Abdessamad Kayouh ari na bo bashyize umukono kuri ayo masezerano.

Ku ruhande rwa Maroc igaragaza ko ifite gahunda yo guhuza Umugabane wa Afurika mu by'ingendo kandi ko ayo masezerano ayifungurira amahirwe mashya na serivisi nshya muri Afurika y'Iburasirazuba.

Sosiyete y'Indege yo muri Maroc, Air Marocco kuri ubu ikorera mu bihugu 27 bya Afurika buri munsi aho nibura ikora ingendo 600 mu cyumweru.

Minisitiri Abdessamad Kayouh yavuze ko intego za Minisiteri ayoboye ari ugukuba kabiri umubare w'abagenzi sosiyete yabo itwara, bakava kuri miliyoni 40 bakagera kuri miliyoni 80 bitarenze mu 2030.

Ambasaderi Higiro Prosper na we yavuze ko ayo masezerano ari intambwe nziza ndetse ashimangira ko ubufatanye hagati y'impande zombi mu bijyanye n'ubwikorezi bwo mu kirere ari intambwe ikomeye.

Ati 'Ni intambwe ifungurira amahirwe mashya y'imikoranire mu by'indege za gisivili.'

Yavuze ko bizafasha u Rwanda kwagura sosiyete yayo ya RwandAir no kwihutisha iyubakwa ry'Ikibuga Mpuzamahanga cya Kigali kiri kubakwa mu Karere ka Bugesera gifite ubushobozi bwo kuzajya cyakira abagenzi barenga miliyoni 14 buri mwaka.

U Rwanda na Maroc byagiranye amasezerano mu by'ingendo zo mu Kirere

Tariki 2-3 Gicurasi 2023 nibwo mu Rwanda haguye imvura idasanzwe yateje ibiza byahitanye abantu 135 binasenya inzu z'abaturage barimo 1126 bo mu Karere ka Rutsiro.

Mu 2024, Akarere ka Rutsiro kashatse ibibanza kubakira imiryango mu yasenyewe n'ibiza 381, hasigara 745 ari nayo izatoranywamo imiryango 434 izatuzwa bitarenze Ukuboza 2025 kuri site 11 ziri kubakwaho inzu z'abasenyewe n'ibiza.

Umuyobozi w'Akarere ka Rutsiro, Umuganwa Marie Chantal yabwiye IGIHE ko imiryango yasenyewe n'ibiza harimo ikodesherezwa n'Akarere indi ikaba icumbikiwe n'abaturanyi.

Ati 'Imbogamizi zituma igikorwa cyo kubakira abasenyewe n'ibiza cyitihuta uko tubyifuza ni uko kubona ibibanza mu Karere ka Rutsiro bigoye. Aba bagenerwabikorwa ahantu bari batuye ni mu manegeka. Nta bibanza bafite bisaba kubibagurira'.

Visi Meya Umuganwa avuga ko nta mwaka runaka bashobora kwizera ko bazaba barangije kubakira abasenyewe n'ibiza bitewe n'uko ibiza isaha ku isaha hashobora kuvuka ibindi, gusa ngo nk'akarere bafashe ingamba zo kubyirinda.

Ati 'Mu ngamba Akarere kafashe harimo gushishikariza abaturage kubaka inzu zikomeye zishobora guhangana n'ibiza bya hato na hato, guca imirwanyasuri n'amaterasi y'indinganire hagaterwaho ibiti, kwimura abatuye ahashobora gushyira ubuzima bwabo mu kaga no guhugura abakorerabushake ba Croix Rouge mu bukangurambaga bwo kurwanya ibiza'.

Imiryango 311 isigaye itarubakirwa nta gihe kizwi izaba yamaze kubakirwa, ngo bizaterwa n'ingengo y'imari Akarere kazabona mu mwaka w'ingengo y'imari 2026/2027 n'uruhare abafatanyabikorwa bazashyiraho.

Izi nzu biteganyijwe ko zizaba zuzuye bitarenze Ukuboza 2025

Imiryango 434 yasenyewe n’ibiza mu Karere ka Rutsiro iri kubakirwa

Ubukerarugendo bw’u Rwanda binyuze muri Visit Rwanda bukomeje kwamamara ku Isi hose, ni nyuma y’uko ubu noneho yasinyanye amasezerano n’amakipe abiri akomeye muri Leta Zunze Ubumwe za Amerika.

Ayo makipe ni LA Clippers ikina muri NBA na Los Angeles Rams ikina muri NFL (National Football League) muri Leta Zunze Ubumwe za Amerika.

Ni amasezerano yatangiye kuri uyu wa Mbere tariki ya 29 Nzeri 2025 nk’uko byemejwe n’Urwego rw’igihugu rw’iterambere (RDB) ko Visit Rwanda ari umuterankunga w’aya makipe.

Ibi bizafasha Visit Rwanda kwamamaza ubukerarugendo bw’u Rwanda ku bibuga bitatu: SoFi Stadium, Hollywood Park na Intuit Dome biherereye mu mujyi wa Inglewood muri Leta ya California.

Aya makipe yo muri Leta Zunze Ubumwe za Amerika yiyongereye ku yandi y’umupira w’amaguru asanzwe yamamaza Visit Rwanda nka Arsenal FC, Paris Saint Germain, Atletico Madrid na FC Bayern Munich.

U Rwanda muri 2024 rwinjije miliyoni 650 z’amadorali binyuze muri ubu bukerarugendo rukaba rufite intego y’uko muri 2029 azaba ageze kuri Miliyari y’Amadolari.