Author: webrwanda

Urujijo ni rwinshi ku myitwarire y’Ikipe y’Igihugu Amavubi yaraye itsinzwemo na Afurika y’Epfo 3-0, benshi mu mitwe haracyazengurukamo ibitego yatsinzwe.

Wari umukino usoza itsinda C mu gushaka itike y’Igikombe cy’Isi cya 2026 kizabera muri Leta Zunze Ubumwe za Amerika, Mexico na Canada.

Wari umukino u Rwanda rwakinnye rudafite ikintu na kimwe ruharanira kuko itike yari yaragiye kera, Afurika y’Epfo yo yasabwaga gutsinda gusa ikajya mu Gikombe cy’Isi.

Mbere y’umukino havuzwe u Rwanda rwashyiriweho amafaranga menshi niruramuka rutsinze Afurika y’Epfo aho perezida wa FERWAFA, Shema Fabrice we ku giti cye yari yemereye abakinnyi miliyoni 2 z’Amfaranga y’u Rwanda asanga amadorali 1500 nk’agahimbazamusyi basanzwe bemerewe. Byari bivuze ko buri mukinnyi yagombaga kubona arenga miliyoni 4 Frw batsinze uyu mukino.

Benshi bumvaga uyu mukino uri buze kuba ukomeye ariko abarebye umukino babonye ibitandukanye n’ibyo bakekaga.

Kuba Afurika y’Epfo ishaka kujya mu Gikombe cy’Isi gutsinda Amavubi adafite icyo irwanira ntabwo ari inkuru ariko uburyo yatsinzwemo nibyo nkuru.

Amavubi ni ikipe yari isanzwe ikina neza nubwo gutsinda byagiranaga ariko ntabwo abanyarwanda baherukaga kubona ikipe y’igihugu itsindwa isuzuguwe cyane.

Uyu mukino Amavubi iyo wumvise amafaranga yari yashyirweho n’uko yakinnye byari bihabanye cyane, yakinnye nabi ku rwego rwose rushoboka.

Mu bitego bitatu Ntwari Fiacre yatsinzwe bibiri muri byo (icya 1 n’icya 3) hakabaye hakozwe ibirenze kugira ngo ntibijyemo kuko nk’igitego cya mbere cya Thalente Mbatha yamuteye umupira aho yari ahagaze ariko uburyo yawukuyemo wakomeje ujya mu izamu.

Iyo urebye igitego cya gatatu cy’umutwe cyatsinzwe na Evidence Makgopa ku mupira wari uvuye muri koruneri, nabyo biragoye kwemera ko bagitsinze umunyezamu nka Ntwari Fiacre ariko na none wakibaza uko Manzi Thierry wari umufashe yamuretse agatera umutwe.

Gusa nubwo tuvuga umunyezamu ariko iyo urebye ibitego byose uko byatsinzwe abakinnyi ntacyo bamufashije nabo wabonaga batashyizemo imbaraga zose, guhagarara nabi nibyo byabaranze.

Muri rusange ikipe yose yakinnye nabi ku buryo wa mugani w’abakoresha imbuga nkoranyambaga bavuga ko haba habaye kuganira hagati ya Afurika y’Epfo n’Amavubi byaba ari ukuri wabiha ishingiro.

Umutoza Adel Amrouche yagambaniye Ntwari Fiacre

Mbere y’uyu mukino abakoresha imbuga nkoranyambaga cyane cyane abo muri Afurika y’Epfo bavugaga ko ari we byiringiro byabo kugira ngo bajye mu Gikombe cy’Isi.

Uyu munyezamu yari ku gitutu cyinshi cyane, bamwe bibaza niba yabuza Igihugu ahahiramo (akinira Kaizer Chiefs) kujya mu gikombe cy’Isi.

Ibyo byose byaje kwiyongera ku kuba uyu munyezamu yagize umukino mubi cyane bitewe n’ibitego yatsinzwe, abantu batangira kugenda babihuza huza, gufata ko yagize umukino mubi nk’ibintu bisanzwe hari abatabyemera ahubwo bakagendera ku byavuzwe mbere y’umukino.

Gusa ku rundi ruhande umutoza Adel ameze nk’uwagambaniye uyu munyezamu kuko nk’umutoza wari uzi igitutu yari afite kandi ikipe y’Igihugu nta kintu irwanira kuko yamaze kubura itike yakabaye yatekereje kabiri mbere yo kumushyira muri iri zamu.

Yakabaye yashyizemo Buhake Twizere Clement na we akamuha umwanya wo gukina aho gushyiramo Fiacre umukino ukamubera inzozi mbi. Ikindi si na we gusa yakabaye yahaye abandi bakinnyi umwanya batakoreshejwe mu rwego rwo gutegura ikipe azakoresha mu minsi iri imbere.

Umuherwe Munyakazi Sadate wayoboye Rayon Sports, yagaragaje ko yishimiye bikomeye ubutumwa umugore we yamugeneye mu gihe barimo bizihiza isabukuru y’imyaka 30 bamaze barushinze.

Uyu munsi Sadate n’Umugore we bakaba bizihiza isabukuru y’imyaka 30 bamaze bakoze ubukwe aho nabo bafite amashami yabashibutseho, babyaranye abana batanu.

Yifashishije imbuga nkoranyambaga, Sadate yagaragaje ubutumwa burimo amagambo asize umunyu, bwuje imitoma umugore we yamugeneye kuri uyu munsi.

Yagize ati “Isabukuru nziza y’ubukwe bwacu mukundwa. Warakoze cyane mbere na mbere kuba warampisemo no ku bw’urukundo rwawe rutagira icyo rushingiraho. Bibaye ngombwa ko nongera kubikora, naguhitamo amaso mfunze. Ndagusaba rero ko wazongera kumpitamo mu buzima bw’iteka. Imana Ishoborabyose iduhe indi myaka myinshi y’ibyishimo no gusaza turi kumwe.”

Yasoje ubutumwa bwe amubwira ko amukunda kuruta ikindi kintu cyose ku Isi akaba urukundo rw’ubuzima bwe ndetse ni na byose kuri we.

Uyu mugabo umwe mu bavuga rikijyana ku mbuga nkoranyambaga akaba inshuti y’urubyiruko nk’uko akunda kwiyita, ni kenshi yagiye akunda kuvuga ko iterambere afite abikesha umugore we mwiza.

Sadate Munyakazi aheruka kwemeza ko ari mu batunze agatubutse ariko akaba ataragera aho yifuze, ni we nyiri Kompanyi y’Ubwubatsi ya Karame Rwanda Ltd, yabaye umuyobozi wa Rayon Sports hagati ya 2019 na 2020.

Ubu inkuru igezweho ku mbuga nkoranyambaga ni ukwiyogoshesha kw’abakinnyi ba APR FC biyogoshesheje bakaba bagaragara mu isura nshya.

Benshi bibajije ibyo kuba bahinduye inyogosho ariko amakuru akavuga ko babisabwe n’ubuyobozi bwa APR FC.

APR FC ikaba ari ikipe y’Ingabo z’Igihugu izwiho kuba n’abakozi bayo bagomba kuba bagendera ku murongo bafite ikinyabupfura.

Mu minsi ishize havuzwemo abakinnyi badafite imyitwarire aho nka Mamadou Sy na Seidu Dauda bahagaritswe kubera myitwarire mibi.

Kubona rero aba bakinnyi biyogoshesheje benshi bahise babihuza no kuba ari zimwe mu ngamba bafashe zigendanye no gukaza ikinyabupfura mu ikipe.

Abakinnyi benshi bari bafite ‘dreadlocks’ bazikuyeho bakaba bafite inyogosho isanzwe ubona ko bahindutse cyane.

Abakinnyi nka Niyigena Clement, William Togui, Memel Dao na Hakim Kiwanuka bigaragara ko bahindutse cyane ku mutwe wabo.

Rutahizamu w’umunyarwanda ukina anyuze ku mpande, Sibomana Patrick Papy yamaze gusinyira ikipe ya Ethio Electric yo muri Ethiopia.

Iyi kipe ikina mu cyiciro cya mbere muri Ethiopia ikaba yararangizanyije na Papy ejo hashize ku wa Kabiri tariki ya 14 Ukwakira 2025.

Papy yerekeje muri iyi kipe nyuma yo gutandukana na Al Wehda yo muri Libya.

Sibomana Patrick yakiniye amakipe atandukanye arimo APR FC, Mukura VS, Police FC zo mu Rwanda, Yanga yo muri Tanzania, Gor Mahia yo muri Kenya, Clube Ferroviária de Beira yo muri Mozambique, El Elttihad Almisraty yo muri Libya yanakiniye Shakhter Soligorsk yo muri Belarus.

Perezida wa Rayon Sports ashobora kugana iy’amategeko arega Habimana Hussein umujyanama w’uwari umutoza w’iyi kipe Afhamia Lotfi kubera kumuharabika amushinja gushaka kugena uko umukino uri bugende (match fixing).

Nyuma y’uko Rayon Sports isohoye ibaruwa ihagarika Afhamia Lotfi muri izi nshingano, ejo aganira na SK FM, Habimana Hussein akaba umujyanama wa Lotfi yavuze ko ikintu cya mbere uyu mutoza yapfuye na perezida wa Rayon Sports, Twagirayezu Thaddée ari uko yamusabye kwitsindisha undi ntabikozwe, yari akiri muri Mukura VS bendaga guhura muri 1/2 cy’Igikombe cy’Amahoro.

Ati “Yarambwiye ngo duhurire Mundi Center sinzi ikintu cyari cyahabaye bakiriye Rayon Sports y’Abagore, arambwira ngo 'njye ndumva mfite ubwoba, uriya mutoza amaze kudutsinda inshuro enye. Ni iki dukora?’'

'Icyo gihe byari byarangiye umutoza abizi ko azaza muri Rayon Sports. Noneho iriya ntsinzi yari kubafasha gusohoka, baramubwira bati 'nonese uzaza utoze ikipe itazasohoka?’ Muha telefone ngo yivuganire n’umutoza.'

Hussein yakomeje avuga ko yamubwiye kubyibwirira umutoza Lotfi, maze uyu mutoza abitera utwatsi ndetse ngo yumva ananze uyu muyobozi, ngo aho niho havuye ibindi bibazo byose.

Perezida wa Rayon Sports, Twagirayezu Thaddée yabwiye ISIMBI ko icyo ari ikinyoma cyambaye ubusa, ahubwo ari ugushaka kwanduza izina rye.

Ati “[Hahaha] none se ko wumva yanze kwitsindisha yaradutsinze? Byagenze bite? Mu ijambo rimwe ibyo bintu ntabwo byigeze bibaho rwose.”

Yavuze ko utabuza umuntu kuvuga ibyo ashaka ariko na none hari amategeko.

Ati “ntabwo wabuza umuntu kuvuga ibyo ashaka ariko na none hari amategeko. Ibyo ni ibintu bikomeye, urumva yanshije kugena uko umukino uri bugende (match fixing) turaza kureba ikigomba gukorwa.”

Yakomeje avuga ko ibi ari uguharabika umuntu kandi hari amategeko, aramutse acecetse yaba ameze nk’uwemeye ko byabaye bityo ko agomba kugira icyo akora.

Ati “ntabwo wavugwaho ibintu nk’ibyo ngo uceceke cyane cyane ko uba ushinjwe ikintu gikomeye, iyo ucecetse uba umeze nk’uwagikoze, byanze bikunze hari amategeko agomba kwitabazwa na we akagenda akagaragaza ibimenyetso.”

Afhamia Lotfi wakuruye izi mpaka zose muri Rayon Sports, yahagaritswe amaze gutoza imikino 5 y’amarushanwa, yatsinzwemo ibiri na Singida (0-1 na 2-1) muri Confederation Cup, atsindwa na Police FC 1-0 muri Shampiyona, atsinda Kiyovu Sports muri Shampiyona 2-0 anganya na Gasogi United 2-2.

Amavubi asoje urugendo rwo gushaka itike y’igikombe cy’Isi anyagirwa na Afurika y’Epfo 3-0.

Ni umukino wabereye kuri Mbombela Stadium muri Afurika y’Epfo kuri uyu wa Kabiri tariki ya 14 Ukwakira 2025.

Amavubi atari afite ikintu na kimwe arwanira, byaje no kugaragara mu kibuga kuko yakinnye nabi bishoboka kugeza atsinzwe ibyo bitego.

Afurika y’Epfo yabonye igitego hakiri kare ku munota wa 5 cyatsinzwe na Thalente Mbatha ku ishoti yateye aho Ntwari Fiacre yari ahagaze akanawukoraho ariko ugakomeza ujya mu izamu.

Bidateye kabiri ku munota wa 26, Oswin Apollis yatsindiye Afurika y’Epfo igitego cya kabiri ku ishoti rikomeye. Amakipe yombi yagiye kuruhuka ari 2-0.

Afurika y’Epfo yaje gutsinda afashinguracumu ku munota wa 72 cyatsinzwe na Evidence Makgopa umukino urangira ari 3-0.

Muri iri tsinda kandi Nigeria yanyagiye Benin 4-0. Mu itsinda C, Afurika y’Epfo ikaba yahise ibona itike y’igikombe cy’Isi cya 2026 kizabera muri Leta Zunze Ubumwe za Amerika, Mexco na Canada nyuma yo gusoza n’amanota 18, Nigeria ifite 17 ikaba izanyura mu mikino ya kamarampaka. Benin ifite 17, Lesotho 12, U Rwanda 11 na Zimbabwe 5.

Kimenyi Yves yafashe umwanya asubiza umugore we Muyango Claudine wamwifurije isabukuru nziza, amubwira ko amagambo ye yamusubije inyuma yibuka ibihe byiza bagiranye.

Ni nyuma y’uko umubano wabo bombi umaze iminsi uvugwamo agatotsi ndetse bikavugwa ko batandukanye ariko nta n’umwe uragira icyo abivugaho.

Ubwo Kimenyi Yves yizihizaga isabukuru y’imyaka 33 ejo hashize, Muyango Claudine yamwifurije umunsi mwiza akoresheje amagambo meza yuje imitoma.

Yagize ati “Isabukuru nziza kuri wowe ugifite umwanya wihariye mu mutima wanjye. Uko ubuzima bwagenda kose uzahora wihariye kuri njye ku bwo kuba umubyeyi mwiza n’umutima mwiza, nta kindi nkwifuriza uretse urukundo n’umugisha ubuzima butanga. Wishimishe cheri.'

Kimenyi Yves akaba yamubwiye ko aya magambo amubwiye yamusubije inyuma mu ntekerezo yibuka ibihe byiza.

Ati “urakoze cyane, ubutumwa bwawe bungaruriye ibihe byinshi byiza, urakoze ku bw’urukundo rwawe n’amagambo meza, icyaba cyose uzahora uri umwe mu bintu by’ingenzi bigize ubuzima bwanjye. Urakoze cherie.”

Kimenyi Yves na Muyango yabatangiye gukundana muri 2019 hagati, tariki ya 28 Gashyantare 2021 mu birori byiza byabereye Romantic Garden, nibwo yamwambitse impeta ya Fiançailles amusaba kuzamubera umugore undi arabyemera.

Yves na Muyango babanaga nk’umugore n’umugabo, muri Kanama 2021 baje kwibaruka imfura yabo y’umuhungu, Kimenyi Yanis Miguel

Tariki ya 4 Mutarama 2024 basezeranye imbere y’amategeko maze tariki ya 6 Mutarama 2024 nibwo umukinnyi w’umupira w’amaguru wabigize umwuga, Kimenyi Yves yakoze indi mihango y’ubukwe na Uwase Muyango Claudine wegukanye ikamba ry’umukobwa uberwa n’amafoto muri Miss Rwanda ya 2019.