Author: webrwanda

Abavandimwe be batangaje ko uyu muryango uzaba ari ikimenyetso cy'umurage n'indangagaciro Ingabire yasize, kuko yari umuntu w'intwari, wagiraga ishyaka ryo kurengera inyungu rusange z'Abanyarwanda.

Bimwe mu bikorwa biteganyijwe birimo gutegura ibiganiro mpaka ku burenganzira bwa muntu, gufasha urubyiruko mu burezi n'ubumenyi ku butabera, ndetse no guteza imbere umuco wo kubaha amategeko n'ubunyangamugayo mu bayobozi n'abaturage.

Umuryango wa Ingabire uvuga ko iyi Fondation izafasha gukomeza umurongo wo kurwanya akarengane, kutabogama, no guharanira ukuri ibintu nyakwigendera yaharaniraga mu buzima bwe bwose.

Hazashyirwaho n'igice cyihariye kizita ku gufasha abagore n'abakobwa mu nzego zitandukanye, by'umwihariko mu bijyanye n'ubuyobozi n'imiyoborere.

Abazategura uyu muryango batangaje ko ibikorwa byawo bizatangira mu mezi ari imbere, bikazashyirwa mu bikorwa mu bufatanye n'inzego zitandukanye z'igihugu n'imiryango itegamiye kuri Leta. Ku bw'ibyo, Fondation Ingabire Marie Immaculée izaba ari isoko y'icyizere n'inyigisho z'ukuri, ikazibutsa abanyarwanda ko umurage w'umuntu mwiza udapfa ahubwo ureshya n'ibikorwa bye.

Source : https://kasukumedia.com/nyuma-yibyifuzo-yarafite-hagiye-gushingwa-fondation-ingabire-marie-immaculee/

Perezida wa Rayon Sports, Twagirayezu Thaddée yeruye asasa inzobe avuga byinshi abantu batari bazi n’uko yari agiye guhirikwa ku buyobozi.

Ibi byose yabigarutseho mu kiganiro yagiranye na Radio Rwanda cyagarutse ku mezi 11 amaze ari umuyobozi wa Rayon Sports.

Twagirayezu Thaddée watowe mu Gushyingo 2025, nyuma y’amezi make atowe hatangiye kugenda havugwa umwuka utari mwiza hagati ye n’abagize Inama y’Ubutegetsi (Board) iyobowe na Paul Muvunyi aho byageze no muri Komite Nyobozi ye.

Ibi byose byaterwaga no kuba hari ibintu batabona kimwe cyangwa ibyo bifuza ko bikorwa we ntabibone muri ubwo buryo, ibyo byose byabayoboye kuri gatanya yeruye aho ubu asigaye ameze nk’aho ari nyakamwe kandi bajya kuza Muvunyi Paul umwe mugabo bavuga rikijyana muri Rayon Sports ari we wamuzanye.

Kuri ubu mu itangazamakuru inkuru yari igezweho ni ihagarikwa ry’umutoza Afhamia Lotfi ariko nyuma y’iminsi 30 akazahabwa ibaruwa imusezerera.

Kimwe mu byagarutsweho ni ibaruwa ya Muhirwa Prosper, visi perezida wa Rayon Sports yashyize hanze avuga ko Twagirayezu Thaddée yabikoze ku giti cye batabyumvikanye, ngo nihagira ikiba azabyirengere.

Twagirayezu Thaddée yavuze ko yabeshye kuko inama yafatiwemo uwo myanzuro yari ayirimo kandi yabyemeye.

Ati “Twahavuye twabyemeje, na we [Muhirwa] yabyemeye. Twari twavuze ko hasigaye gushaka amafaranga tugatandukana n’umutoza.'

Yakomeje avuga ko kandi ari icyemezo bafashe nyuma y’umusaruro yagize, baganiriye n’abakinnyi bakuru bavuga ko nta myitozo bakora.

Ku kuba yicuza kuba yarabaye umuyobozi wa Rayon Sports, yavuze ko atabyicuza kuko Rayon Sports ayikunda.

Ati “Ntabwo nakwicuza ikintu nkunda. Kereka ntayikunda, nakwicuza kuba muri Rayon Sports kandi nyikunda? Wakicuza kuba warabyawe n’umubyeyi wawe.”

Ibyo kwegura yavuze ko atabiteganya kandi atabikora kubera umuntu runaka yabimusabye, nabikora azabikora ku giti cye.

Mu gihe na ba nyiri ikipe (abarayon) babimusabye, bakamwereka uzamusimbura akabona ari mu murongo mwiza yabyemera ariko ngo ntiyasiga ikipe mu maboko y’abashaka kuyinyunyuza.

Agaruka ku modoka yatangajwe na board ko yaguzwe ubwo hamurikwaga umushinga w’akanyenyeri muri Kanama 2025, yavuze ko na we ayiheruka ku ifoto.

Ati “nta makuru mfite, nanjye nyiheruka ku ifoto.”

Yagaragaje ko kandi hari abayobozi bayoborana bagerageje kurwanya 'Rayon Day 2025' ngo ntibe ndetse banga kuyitabira.

Ubwo yari abajijwe impamvu y’imvano y’amarira mu Nteko Rusange yabaye muri Nzeri 2025, yavuze ko kari agahinda n’ubugambanyi akorerwa aho yanahishue ko bari bateguye kumukuraho muri iyo nama ariko biranga.

Ati “Mu Nteko Rusange [iheruka], njye nagombaga kuvaho.'

Umwenda bavuga w’amatike ya Yanga, yavuze ko atari byo kuko bayishyuye ahubwo amatike batarishyura ari ayabatwaye muri Tanzania gukina na Singida Black Stars.

Source : http://isimbi.rw/spip.php?article12059

Bamwe mu banyamakuru ba Siporo bakunzwe mu Rwanda, bagaragaje amakipe babona azitwara neza ndetse n’ayo babona azamanuka.

Shampiyona y’icyiciro cya mbere mu Rwanda umwaka w’imikino wa 2025-26 iri mu ntangiriro aho guhera uyu munsi hakinwa umunsi wa 4.

ISIMBI yagerageje kuvugana n’abanyamakuru ba Siporo mu Rwanda maze bavuga uko babona Shampiyona izarangira.

Aha bashingiye kuko amakipe yiyubatse, uko yatangiye shampiyona ndetse no mu bunararibonye bwayo mu cyiciro cya mbere.

Muri rusange ISIMBI yavuganye n’abanyamakuru 7 ariko bose ku bwiganze bw’amajwi 100% bemeje ko APR FC izatwara igikombe.

Ikindi bahurijeho ni uko ikipe ya Police FC na Rayon Sports ziri mu makipe babona azaza muri 4 (Top 4).

Ikindi ni uko amakipe nka AS Muhanga na Gicumbi yazamutse muri uyu mwaka w’imikino benshi bavuze ko ashobora gusubirayo.

Dore abanyamakuru twavuganye n’uko babona ibintu

Sam Karenzi

Uyu munyamakuru akaba ba nyiri SK FM, mu mboni ze abona APR FC izatwara igikombe cya shampiyona, igakurikirwa na Police FC, Rayon Sports ikaba iya gatatu mu gihe Kiyovu Sports abona izaba iya kane.

Amakipe abona azamanuka ni AS Muhanga na Gicumbi.

Benjamin Gicumbi / B&B Kigali FM

Uyu munyamakuru ukunzwe wa B&B Kigali FM, yirinze kuvuga amakipe azamanuka ariko uko abona amakipe 4 ya mbere azakurikirana ni APR FC, Police FC, Rayon Sports na Gorilla FC.

Kayishema Tity Thierry / RBA

Kayishema Tity Thie ni umunhamakuru w’Ikigo cy’Igihugu cy’Itangazamakuru, abona APR FC ari yo izatwara igikombe, igakurikirwa na Police FC, Rayon Sports na Mukura VS.

Rutsiro FC na Gicumbi FC niyo makipe abona azamanuka.

Musangamfura Lorenzo / SK FM

Lorenzo ni umunyamakuru wa SK FM, abona amakipe azamanuka ari Etincelles FC na Musanze FC ni mu gihe igikombe abona ari APR FC, Police FC ya kabiri, Rayon Sports ya gatatu na AS Kigali.

Aime Niyibizi / Fine FM

Ni umunyamakuru w’imikino wa Fine FM umwe mu bakunzwe cyane we mu mboni ze abona APR FC izaba iya mbere, Police FC, Rayon Sports na Mukura VS.

Gicumbi na AS Muhanga abona ari zo zizamanuka mu cyiciro cya kabiri.

Ishimwe Adelaide Ida / Radio&TV10

Ni umunyamakurukazi wa Radio&TV10 we abona APR FC izasoza imbere, Rayon Sports iya kabiri, Police FC na Mukura VS.

Ku makipe azamanuka yifashe.

Cynthia Naissa / SK FM

Cynthia Naissa umunyamakurukazi wa Siporo ukora kuri SK FM, igikombe yagihaye APR FC, Police FC iya kabiri, Gorilla FC iya gatatu mu gihe Rayon Sports abona izaba iya kane.

Amakipe abona azamanuka ni AS Muhanga na Gicumbi FC.

Source : http://isimbi.rw/spip.php?article12060

Perezida wa Rayon Sports, Twagirayezu Thaddée yavuze ko ipfundo ry’ibibazo yagiranye na ‘Board’ iyobowe na Paul Muvunyi ari uko yanze kuba igikoresho cyabo.

Ibi yabitangarije mu kiganiro Urubuga rw’Imikino cyo kuri uyu wa Gatanu aho yari abajijwe icyabaye kugira ngo ntiyumvikane n’iyi Nama y’Ubutegetsi kandi ajya gutorwa bari bamushyigikiye bikanavugwa ko ari bo bagize uruhare rwo kumushyiraho.

Yavuze ko ari uko yasanze abo binjiranye mu buyobozi by’umwihariko muri ‘board’ barashakaga kumugira igikoresho cyabo.

Ati “sinzi niba wenda naba igikoresho, niryo jambo, nutekereza ko naba igikoresho byaba ari ikindi kindi, ariko bisa nabyo.”

“Ariko reka mbahe urugero rumwe rwabaye abantu bose bazi, byanavuzwe mu itangazamakuru, iyo ushobora kubona ukabona board iraguhamagaye ngo ngwino tuguhe CEO, ubwo se uri ahantu uyobora cyangwa uri ahantu uyobora ariko hayoborwa n’abandi? Niyo mpamvu nabyanze.”

Twagirayezu Thaddée kuva yatorwa mu Gushyingo 2024, nyuma y’iminsi mike hatangiye gusohoka amakuru y’uko atumvikana n’abasaza.

Bakomeje kugenda bihishwa hishwa ariko biza gusohoka hanze bitewe n’uko umwuka wakomeje kugenda uba mubi cyane hagati ya Twagirayezu Thaddée na Board.

Source : http://isimbi.rw/spip.php?article12058

Nyuma y'uko umunyamidelikazi, Alliah Cool, yagaragaye ari kugaragaza imodoka ifite agaciro karenga miliyoni 200 Frw, ku mbuga nkoranyambaga hakomeje kuvugwa byinshi. Hari abamushimye bamwita intwari y'abagore bafite umurava, abandi bakabifata nk'ukwishongora no kwiyemera.

Mu bavuze kuri iyi modoka harimo umunyamakuru DC Clement, wanditse amagambo ku mbumbuga nkoranyambaga ze nk'aho agambiriye kumucyurira. Ati: 'Aho kwitwa umukire ufite imodoka y'Inkongomani nakitwa umukire i Nyarugenge nifitiye imodoka ya 'caterpillar' yanjye yambaye purake y'inyarwanda. Ndakubwiza ukuri ko igitutu cyo kwemeza abantu kizahitana benshi.'

Ibi byatumye Alliah Cool atuza ariko nyuma y'amasaha make, yandika ubutumwa burebure asubiza Clement mu buryo bwuje ubwenge n'ubupfura.

Yavuze ko kuba yarabaye mu Rwanda bitari amahitamo ye, ahubwo ari amateka y'umuryango we ukomoka muri Congo, wigeze kubuzwa uburenganzira. Yakomeje ashimira cyane u Rwanda rwabakiranye n'urukundo.

Mu magambo ye yagize ati: 'Iteka dushimira u Rwanda rwaduhaye amahirwe yo kuhakurira, kuhakorera, kuhatura no kuhatungira mu mahoro n'umutekano usesuye. Kuba bamwe muri twe uyu munsi turi mu gihugu cyacu Congo byasabye imbaraga, ubwitange n'amaraso y'abasore n'inkumi za M23 (Nzahora nshimira iteka).'

Yongeyeho ko abantu bakwiye kumenya gutandukanya ibintu: 'Wakina n'ibindi ariko ntiwakina n'inkomoko y'umuntu. Ubutaha mujye mukina indi mikino.'

Alliah yasozaga agaragaza ko agaciro k'ikintu katagaragarira aho katurutse, ati: 'Imodoka nubwo wayitungira mu gihugu ikorerwamo ntibyayikuraho agaciro kayo. Uyu munsi sinibaza ko Congo ari yo igomba gutuma ikintu gita agaciro.'

Ibi byavugishije benshi ku mbuga nkoranyambaga, bamwe bamushyigikira nk'umugore uzi icyo ashaka kandi wifitiye icyizere, abandi bavuga ko amagambo ye arimo ishema rirenze. Ariko abamukurikira bavuga ko Alliah Cool ari umwe mu bantu bazi kwisobanura mu buryo buciye bugufi, kandi atabangamira igihugu yakuriyemo u Rwanda ahubwo akigaragaza nk'ufite amateka yihariye y'abakomoka mu bihugu byombi.

 

Source : https://kasukumedia.com/imodoka-ya-alliah-cool-igura-arenga-miliyoni-200-zamafaranga-yu-rwanda-ikomeje-kuvugisha-amangambure-abatari-bake/

Mu birori byo kwizihiza umunsi ngaruka mwaka wahariwe Umugore wo mu cyaro wabaye ku wa 15 Ukwakira 2025, Umunyamabanga nshingwabikorwa w'Umurenge wa Rugalika, Jean de Dieu Nkurunziza yabwiye Abagore ko Imana yaremye muntu yabagize ab'Agaciro gakomeye, ko ndetse n'Amateka y'u Rwanda yerekana ko bahoranye Agaciro n'Ijambo, bityo ko bakwiye guhora bashimira Perezida Paul Kagame we wabasubije Agaciro akabaha Ijambo bahoranye. Yabasabye gukoresha neza izo mbaraga bafite mu kubaka Igihugu.

Gitifu Nkurunziza, yagarutse ku mitegekere y'Igihugu cy'u Rwanda muri Repubulika uko zagiye zisimburana, yerekana ko Umugore yagiye yimwa agaciro ariko Perezida Paul Kagame mu Bushishozi bwe, mu Buhanga bwe, mu Bwenge bwe Imana yamuhaye ngo ayobore u Rwanda n'Abanyarwanda asubiza Abagore Agaciro, abasubiza Ijambo.

Yagarutse kuri zimwe mu mpamvu zerekana ko Umugore ari uw'Agaciro kandi afite ijambo, haba mu Mateka y'u Rwanda ndetse no ku bemera Imana. Yagize ati' Abagore nibo batubyara, nibo baturera, nibo benshi mu Gihugu, barize ni abahanga kandi ibyo bakora n'ibyo bayobora byose, Abagore babikora neza'.

Yakomeje abibutsa ko na cyera bari bakomeye ndetse n'ubu bakomeye kuko Perezida wa Repubulika, Paul Kagame yabasubije Agaciro n'Ijambo bahoranye. Ati' Cyera iyo Umwami yatangaga, mu bana be habaga harimo ugomba kumusimbura ku Ngoma, ku Bwami. Uwo Abiru babaga barahisemo yashoboraga kuba ari umwana w'Imyaka ine, Itanu, Irindwi, icyenda cyangwa Icumi utashobora kuyobora Igihugu, kuyobora Ingabo n'Imitwe yazo, kuyobora Urugamba, Guca Imanza n'ibindi'.

Akomeza ati' Ubundi mu myumvire ya benshi muri mwe, mwumva ko umuntu w'Umugabo Apfuye yari afite ibyo ashinzwe, mwumva ko umwana muto wamusimbura mu nshingano yafatanya na Se wabo! Ariko cyera siko byari biri. Bahitagamo ko wa Mwana afatanya ubuyobozi na Nyina'.

Yababwiye ko zimwe mu mpamvu bahaga agaciro Umugore mu kuba ariwe ufasha Umwana we gutegeka ari uko bumvaga ko uwo mwana mu gihe ari kumwe na Nyina nta wamuroha kuko Nyina aramukunze, aramutekerereza, niwe umurera, niwe umutoza Umuco n'Ikinyabupfura kugira ngo azakure akore neza.

Yabibukije kandi ko no mu Kinyarwanda baca umugani ugira uti' Urusha nyina w'Umwana Imbabazi aba ashaka ku murya'. Akomeza ababwira ko iyo ari imwe mu mpamvu ibereka ko Umugore muri uru Rwanda yahoranye Agaciro ndetse ari nayo mpamvu mu cyivugo cyabo uyu munsi bavuga ko Umukuru w'Igihugu, Paul Kagame yakabasubije.

Indi mpamvu yerekana Ugukomera ku Mugore no kugira Ijambo kwe, yababwiye ko iyo Ingabo z'u Rwanda zagabaga ibitero mu kwagura u Rwanda, Abagore bari bafite mo inshingano ikomeye. Ati' N'ubu mujya mubivuga uretse ko bitagikorwa, baravuga ngo Abagore barwambariye Impumbya'.

Hanyuma bagiraga Igicaniro bacaniraga hakaba hari Impfizi bakoma Isazi, bivuga ngo aho Ingabo z'u Rwanda ziri nti hagire ikizihungabanya. Abagore bakambara Impumbya, bagakomeza bakenyegeza muri cya Gicaniro kuko bo nti bajyaga ku rugamba, ariko mu muco no mu myemerere y'Abanyarwanda babaga bumva akazi gakomeye gafitwe n'Ingabo ziri ku rugamba aka Kabiri gafitwe n'Abagore bambariye Impumbya Igihugu barimo banakoma ya Mpfizi isazi ngo idahungabana n'Ingabo zikaba zigize ikibazo.

Indi mpamvu ya Gatatu ni; Iyo mu rugo habaga hari ikibazo Umugabo agashaka nko kugira aho arwana, aho akora ibitemewe!, Umugore agakenyurura Umweko akawushyira mu bikingi by'Amarembo, cyaraziraga kikaziririzwa ko mu Muco w'u Rwanda ko Umugabo aharenga icyo yaba agiye gukora cyose, Umugore atacyemeye.

Mu gusoza, Gitifu Jean de Dieu Nkurunziza yagarutse ku bemera Imana abereka Ugukomera k'Umugore mu iremwa rya Muntu. Ati' Twikoze mu itangiriro( uko ijambo ry'Imana rivuga), Imana ibanza kurema yabanje Umugabo imurema mu Mukungugu, ariko ngo yaramurebye Isanga atuzuye maze Imuremera Umufasha Umukwiye, Imurema Imukuye mu Rubavu(Igufa). None Ari Umukungugu n'icyondo n'Igufa hakomeye Iki? Ubwo se uwaremwe mu gikoresho gikomeye ni inde?'.

Ahereye ku Mateka y'u Rwanda uko agaragaza Ugukomera ku Mugore, Ijambo yari afite n'ibyo yakoraga bikomeye, ahereye uko Bibiliya cyangwa Ijambo ry'Imana rigaragaza Imbaraga z'Umugore, ahereye uko Perezida wa Repubulika y'u Rwanda, Paul Kagame yasubije Umugore Agaciro, akamusubiza Ijambo, yabasabye ati' Ni mukoreshe Agaciro mwasubijwe neza. Ni mushaka muhite mujya mu cyivugo cyanyu ko muri ba Mutima w'Urugo, muri ba Nyampinga, Umugore ubereye u Rwanda, ko mutazatesha Agaciro uwakabasubije'. Akomeza abibutsa ko uwo ariwe Mugore uwabasubije agaciro akabaha Ijambo abakeneyemo, ko Umugore ubereye u Rwanda arurerera kandi neza.

Munyaneza Théogène

The post Kamonyi-Rugalika: Gitifu Nkurunziza yagarutse ku gaciro no gukomera k'Umugore, abaha umukoro first appeared on Intyoza.

The post Kamonyi-Rugalika: Gitifu Nkurunziza yagarutse ku gaciro no gukomera k'Umugore, abaha umukoro appeared first on Intyoza.

Source : https://www.intyoza.com/2025/10/17/kamonyi-rugalika-gitifu-nkurunziza-yagarutse-ku-gaciro-no-gukomera-kumugore-abaha-umukoro/

Mu kwizihiza umunsi mpuzamahanga w'Umugore wo mu cyaro wabaye kuri uyu wa 15 Ukwakira 2025, Abagore (ba Nyampinga) b'Umudugudu wa Ruramba, Akagari ka Masaka, Umurenge wa Rugalika ho mu Karere ka Kamonyi, batashye inzu y'Ihaniro( Igikari cy'Umubyeyi), aho bicara bajya inama zubaka Umuryango, aho bazana Abagore n'Abakobwa bagaragarwaho n'imico n'Imyifatire bidakwiye bakabagira inama ndetse bakabahana bagamije kubaka Umugore, Umukobwa urangwa n'indangagaciro zikwiye Umunyarwandakazi.

Dativa Murebwayire, ahagarariye Abagore mu Kagari ka Masaka. Yabwiye intyoza.com ko iyi nyubako igizwe n'icyumba cy'Uruganiriro ariko kandi hakaba mu 'IHANIRO' ku bagore n'Abakobwa babonaho imyitwarire idakwiye mu muryango.

Avuga ku mpamvu aha bahise 'IGIKARI CY'UMUBYEYI', yagize ati' Ni Ihaniro duhuriramo. Hari igihe Ababyeyi haba hari utuntu twinshi dukeneye guhuguranamo tutagenda neza ariko tukabona kubishyira hanze bidakwiye. Twahisemo rero kubaka inzu twise Igikari cyacu tugomba kujya duhuriramo tugahaniramo abantu, natwe tukajya inama, tugahugurana kugira ngo dusigasire indangagaciro zikwiye Umugore n'Umukobwa u Rwanda rukeneye mu iterambere ryubakiye ku muryango ushoboye kandi ushobotse'.

Dativa, ahamyako babikesheje iyi nzu y'Ihaniro bamaze kugarura ku murongo imiryango 10 yabagaho mu makimbirane muri uyu Mudugudu wa Ruramba. Avuga kandi ko hari n'izindi Ngamba zikarishye zifasha mu gukumira ukwiyandarika no kwitesha agaciro ku Bagore n'Abakobwa, aho muri uyu Mudugudu bashyizeho umurongo ntarengwa ubuza Abagore n'Abakobwa bajya mu tubari ko ntawe bahakeneye nyuma ya saa Moya z'Ijoro. Ibyo ngo byagaruye amahoro n'Ituze byubaka imibanire myiza mu muryango.

Agira ati' Kubera izi ngamba ndetse n'Ihaniro kuko abo dufashe tubizanira, Abagore bamaze gucika mu kabari, ibintu byo kwandagara ku misozi, Ubusinzi, Ubusambanyi n'ibindi bidakwiye ku muntu w'Umubyeyi, rwose izo ngamba twongeraho no kuba hano Ruramba Abagore twikorera irondo, byaradufashije cyane ku buryo bidutera Ishema'.

Shyiracyera Pierre Claver, atuye mu Mudugudu wa Ruramba. Ahamya ko Ihaniro cyangwa se Igikari cy'Umubyeyi ari ahantu hagaruriye Abanyaruramba agaciro mu muryango ndetse hagatuma benshi bagira imyitwarire iboneye.

Agira ati' Igikari cy'Umubyeyi cyangwa se Ihaniro, navuga ngo ku Banyaruramba uwo wabaza wese yakwihera ubuhamya, abe Umugabo cyangwa Umugore bubatse n'abatubatse. Ubu nta mugore wabona mu bubari mu masaha y'ijoro, ntawe wabona yasinze agenda yandika umunani mu muhanda, ntawe wakumva ngo yataye urugo yagiye kuzerera cyangwa ngo umwumve mu mafuti yandi. Kiriya gikari, ba Mutimawurugo batumye Umugore n'Umukobwa wa hano bongera kwikebuka. Yego ntabwo wenda byose biratungana neza ariko n'uwagira akageso ke ubwo kaba muri we ariko ku bibona hanze ni nk'ikizira, ubwo nyine ajyanwa mu Ihaniro'.

Kuri uyu munsi mpuzamahanga w'Umugore wo mu cyaro, Umunyamabanga Nshingwabikorwa w'Umurenge wa Rugalika, Jean de Dieu Nkurunziza yasabye Abagore kwerekana mu mvugo n'ibikorwa ko koko bahawe Agaciro ko kandi bagahawe bagakwiye bityo nabo bagaharanira kuba ab'Agaciro aho batuye n'aho bagenda.

Gitifu Nkurunziza yagize ati' Namwe murabyivugira kandi ni nako kuri, Nyakubahwa Perezida wa Repubulika, Paul Kagame mu bushishozi bwe, mu buhanga bwe, mu bwenge atuyoborana yabasubije Agaciro, abasubiza Ijambo cyane ko murikwiye'.

Yakomeje agira ati' Impamvu murikwiye ni mwe mutubyara, ni mwe muturera, ni mwe benshi mu Gihugu, mwarize, ibyo muyobora abagore mubiyobora neza. Ni mwereke uwabasubije Agaciro, uwabasubije ijambo ko mwari mubikwiye koko. Mujyane mu ngamba zihamye zo kubaka Umuryango muzima, mwubaka ahazaza heza h'Igihugu'.

Mu birori byo kwizihiza uyu munsi ngarukamwaka w'Umugore wo mu cyaro, Abanyaruramba by'umwihariko Abagore n'Abakobwa bamuritse bimwe mu byo bakora haba mu buhinzi n'Ibikorwa bindi bakora bagamije kwiteza imbere birimo; Ubudozi bw'imyenda, gukora Inkweto, Amasakoshi n'ibindi. Bagabiye kandi umuturage Inka muri Gahunda ya Girinka, banaremera Umuryango wabyaye abana batatu utishoboye.

Munyaneza Théogène

The post Kamonyi-Rugalika/Ruramba: Ihaniro(Igikari cy'Umubyeyi) ryashyize Abagore ku murongo first appeared on Intyoza.

The post Kamonyi-Rugalika/Ruramba: Ihaniro(Igikari cy'Umubyeyi) ryashyize Abagore ku murongo appeared first on Intyoza.

Source : https://www.intyoza.com/2025/10/16/kamonyi-rugalika-ruramba-ihaniroigikari-cyumubyeyi-ryashyize-abagore-ku-murongo/

Uwahoze ari umuyobozi wa Transparency International Rwanda, Ingabire Marie Immaculeé yashyinguwe, yari yavuze ko nta ndabo ashaka ndetse ngo ntibazanavuge umwirirondoro.

Ibi yabyangiye ko ngo ngo azaba atarimo gusaba akazi, ni nako byagenze ubwo umubiri we wari umaze gusengerwa muri Kiliziya muri Paruwasi ya Regina Pacis.

Uwari uhagarariye umuryango yavuze ko akiri muzima yasabye ko umwirirondoro we, amashuri yize bitazavugwa ndetse ntibazanamushyiraho indabo ahubwo bazakwita ku bababaye.

Yanavuze ko bafunguye konti muri Banki iri mu mazina ya Ingabire Foundation izajya inyuzwaho amafaranga yo gufasha abatishoboye nk’uko Immaculée yabikoraga.

Ingabire Marie Immaculée yitabye Imana tariki ya 9 Ukwakira 2025 ku myaka 63 akaba yasezereweho bwa nyuma ubundi ashyingurwa mu irimbi rya Rusororo.

Source : http://isimbi.rw/spip.php?article12057

Shampiyona y’icyiciro cya mbere muri Volleyball abagabo n’abagore umwaka w’imikino wa 2025-26 iratangira mu mpera z’iki cyumweru aho amakipe 4 y’ibigugu REG VC, Kepler abagabo n’abagore na APR WVC ari yo azafungura.

Ni Shampiyona izatangira ejo ku wa Gatanu tariki ya 17 Ukwakira 2025 aho hateganyijwe imikino ibiri yombi izabera muri Petit Stade.

Saa kumi n’ebyiri z’umugoroba, mu bagore Kepler WVC izaba ikina na APR WVC. Uyu mukino uzakurikirwa n’undi karundura wo REG VC izakinamo na Kepler VC.

Shampiyona igarutse mu gihe umwaka ushize mu bagabo igikombe cyegukanywe na APR VC mu gihe mu bagore cyatwawe Police WVC.

Source : http://isimbi.rw/spip.php?article12054

Kapiteni w’Ikipe y’Igihugu ya Basketball, Ndizeye Dieudonné Gaston yerekeje muri APR BBC nyuma yo gutandukana n’ikipe yo muri Maroc.

Gaston wabaye MVP wa 2019 yakiniraga MAS Basketball yo muri Maroc bakaba baratandukanye.

Nyuma yo kwegukana Shampiyona iheruka, APR BBC izanahagararira igihugu muri BAL 2026 yamaze kwibikaho uyu mukinnyi wamamaye muri Patriots BBC.

Ntabwo uyu mukinnyi yifuje kugira icyo abivugaho kuko inshuro zose ISIMBI yagerageje kumuvugisha ntibyakunze ariko amakuru yemeza ko yamaze kwerekeza mu ikipe y’Ingabo z’Igihugu.

Ndizeye Dieudonne ni umwe mu bakinnyi beza u Rwanda rufite muri iyi minsi, ishyaka rye no kuba ari umukinnyi uzwiho gutsinda amanota 3 bituma aba inzozi mbi kubo bahanganye kandi nta kipe itamwifuza.

Source : http://isimbi.rw/spip.php?article12055