Author: webrwanda

Ubushakashatsi bwakozwe na Kaminuza ya London yo mu Bwongereza bwagaragaje ko abagore benshi bishima cyane iyo bafite imyaka 34 kuko benshi ari bwo baba bafite umwana nibura wq mbere ndetse bahagaze neza mu bukungu nyuma yo gukora akazi no gusoza amashuri.

Muri iyi nkuru dukesha Daily Mail turakugezaho ibiranga ubuzima bw’umugore kuva agiye mu mihango, kugeza ku myaka irenga 80 igaragazwa nk’iy’ikigereranyo cy’imyaka y’icyizere cy’ubuzima ku bagore nk’uko bivugwa n’imibare yo mu bushakashatsi butandukanye bwakorewe ku bagore bo mu Bwongereza.

Birashoboka ko hari ibyasa n’ibitandukana ukurikije ko sosiyeti n’imibereho y’abaturage b’Ubwongereza itandukanye n’iyo mu Rwanda cyangwa Afurika muri rusange, ariko umuvuduko w’iterambere ry’isi by’umwihariko iry’ikoranabuhanga watumye iba 'umudugudu' utuma iyi mibereho idatandukana cyane, cyane cyane ko nk’iyi nkuru ya Daily Mail wayisomera mu cyaro kimwe cyo mu Rwanda aka kanya kimwe n’uko uyisomera aho uri nk’uko n’undi uzi Ikinyarwanda yayisomera i Manchester, New York cyangwa Vancouver.

Ni kimwe kandi n’uko uzasanga umusaza wo mu Majyaruguru ya London arara atariye ngo kuko Arsenal yanyabitswe 2-0 na Liverpool ubwo bikaba bibaye undim waka wiyongereye kuri 19 imaze idatwara igikombe cya shampiyona agahinda akakanganya n’umufana wayo wibereye za Gishyita ataranakandagira ku kibuga cy’indege i Kanombe.

12 Ku myaka 12, ni wo mwaka w’ikigereranyo umukobwa ahindukiraho umugore kuko aba umugore anashobora gusama inda no gutwira amaze imyaka 12 n’amezi arindwi — nubwo igihe nyacyo umukobwa aboneraho imihango giterwa n’icyo nyina yayigiriyemo nk’uko abashakakashatsi bo muri Kaminuza ya London babigaragaje.

Aba bashakashatsi bavumbuye ko utunyangingo sano tugira uruhare rukomeye ku gihe imihango y’abakobwa iziraho bwa mbere na none kandi bikagendana n’imiterere y’umubiri wa buri wese ku giti cye, imibereho abayeho n’ibindi.

14 Afite imyaka 14, ku kigereranyo ni bwo umukobwa asomana bwa mbere n’umusore.

Bitekerezwa ko ari bwo ubwo umukobwa aba abayeho mu myaka iteye amakenga cyane, yiyumva nk’inkumi, akarishye kandi ashobora kurakara cyane agaca ibiti n’amabuye. Ibi kenshi ngo biterwa n’amakimbirane agirana na bagenzi be bitewe no kurwanira abasore, ibirungo by’ubwiza yitera cyangwa no kunywa inzoga kuko hari abatangira kuzinywa muri iyi myaka.

Na none kandi igihe afite imyaka 14, bitewe n’imisemburo iba ari myinshi, iki kiba ari igihe kitoroshye. Ababyeyi bafite abana bari muri iyi myaka y’ubugimbi babajiwe mu nyigo imwe bavuze ko agahinda, umujinya muri bo biba biri ku gasongero kabyo kuri iyi myaka ahanini bitewe no kurwanira na bagenzi babo ubusore, kwigereranya ubwiza, no kunywa inzoga.

16 Aha nyamukobwa aba amaze umwaka umwe asomanye n’umusore bwa mbere kuko ibi biba afite imyaka 15, nyuma y’aho rero igikurikira gikomeye mu buzima kinashobora kuba ari kimwe mu biza imbere mu byo badapfa kwibagirwa kugeza bashaje ni uko aha ari bwo haba hari amahirwe menshi [niba atari ibyago] yo gutakaza ubusugi bwe, bivuga ko benshi bakora imibonano mpuzabitsina bwa mbere kuri iyi myaka.

Ni nyuma y’umwaka umwe ugereranije n’igihe abahungu batakarizaho ubumanzi bwabo nubwo ntazi ko mu Rwanda ari uku bimeze.

18 Nyuma y’imyaka ibiri atakaje ubusugi, ku myaka 18 y’amavuko, hano uyu mugore ukiri muto aba afite ubunararibonye buhagije mu byo guhuza ibitsina ku buryo muri icyo gikorwa aba anashobora kukigereramo ku byishimo byitwa ibya nyuma byo mu ihuzabitsina, ikizwi nko kurangiza k’umugore 'orgasm’.

Ikigereranyo cy’imyaka umukobwa asomaniraho bwa mbere n’uw’igitsina gabo ni 15, maze nyuma y’umwaka, agatakaza ubusugi nk’ikintu kibaguma mu mutwe cyane

20 Nubwo iki gihe umukobwa ku kigereranyo aba amaze imyaka ine akora imibonano mpuzabitsina kuri iki cyiciro, mu by’ukuri, yakabaye yarategereje ko agira imyaka 20 ngo abone amahirwe yo guhura n’umukunzi bakundana mu mubano w’urukundo gabo gore wamubyarira ibyishimo n’inyungu mu myaka izaza amaze gukura no kubaka.

Abashakashatsi bo muri Kaminuza ya Texas basanze ko abakobwa bategereje ko bajya mu by’urukundo bwa mbere igihe bari bafite ubumenyi buruseho bwo mu ishuri, byarangiye bagize imirimo myiza ihemberwa menshi kurushaho kandi bakagira ingo zirangwa n’ibyishimo ugereranije n’abishoye mu mibonano n’urukundo n’abagabo hakiri kare.

22 Ku myaka 22 ibyo kurya abakobwa bakundaga bakiri abana ntibiba bikibanurira nka mbere.

Ni igihe uduce two ku rurimi dufasha mu kumva uburyohe dutangira gusa n’utwiyuburura tuba dushya ku buryo uburyo amafunguro yamuryoheraga bishobora guhinduka bituma hari n’ibintu bitamuryoheraga mbere noneho yumva nk’ibinurira.

25 Ushobora kutamenya umurebeye inyuma ko afite iyo myaka icyakora ku myaka 25 ni bwo umugore aba ahangayitse, atishimye cyane cyane mu byerekeye ubuzima bw’imibonano mpuzabitsina kuko icyizere aba yifitiye mu byerekeye iyo ngingo kiba ari gike, bitewe no guhangayikishwa n’uko imiterere y’umubiri we idashamaje ndetse no kwigereranya n’abandi bagore n’uko bitwara mu buriri.

Ku myaka 25 ngo abagore baba bifitiye icyizere gike kabone nubwo bashobora kugaragara nk’uko Taylor Swift yasaga ari muri icyo kigero

27 Abagore, uretse aka kateye i Kigali aho usanga umwana wa 17 wamaze gutandukana n’abasore 8, ubundi abagore ku kigereranyo bakunda 'fall in love’ inshuro enye mu gihe cy’ubuzima bwabo ndetse benshi 'bagafata umwanzuro' wo kureka kwiruka ku basore ku myaka 27— aho kimwe cya gatatu cyabo ari bo baba bashobora kugira amahirwe yo kugumana n’abakunzi babo ba mbere.

28 Nubwo abagore benshi baba bari mu rukundo rw’igihe kirekire, ni ukuvuga bafite umugabo bemeranije kubana, bisa n’aho ngo benshi baba bagifite ubushake bukomeye bwo 'gukina’. Aha ngo ni ho benshi baba bashobora guca inyuma abakunzi babo babana.

29 Ikigero cy’imyaka umugore avanga umutungo n’umukunzi we. Ibi bimuha umwanya wo kujya mu nzu nini kuko benshi baba baratangiye no kubyara, umuryango umaze kuzamo abana.

Umwaka wa 29 ufatwa nk’umwaka mwiza ajya kubana mu nzu nini n’umukunzi we.

30 Ntibisobanutse neza ikiza mbere y’ikindi muri iyi minsi — ariko ubundi ku kigereranyo ku mwaka wa 30 bavutse ni bwo abagore benshi bashakaho abagabo mu Bwongereza, nk’uko imibare iva mu kigo cy’ibarurishamibare cyo muri icyo gihugu ibyerekana, gusa kuri iyo myaka ngo ni na yo ku kigereranyo umugore abyariraho umwana wa mbere.

Aha mu Rwanda, ku myaka 30 hari aho umukobwa byakwitwa ko yagumiwe ariko hari benshi bafite iyo myaka nzi ibyo gushaka bidafite icyo bibwiye cyane, bize, bafite akazi keza, mbese bari aho barategereje, gusa nzi n’ababyaye n’abashatse mbere y’aho gato.

32 Nyuma y’imyaka yo kugerageza inyogosho no kuzihindagura, ku myaka 32 ni bwo umugore amenya inyogosho imubereye kandi nziza y’umusatsi we.

34 Uyu ni wo mwaka mwiza ushoboka uruta indi wo kubyariraho. Ukaba ari na wo kigereranyo cy’imyaka abagore benshi bagiriraho ibyishimo kurusha ikindi gihe cyose mu buzima.

Abahanga mu bumenyi bw’imibanire bakoze ubushakashatsi ku byabaye ku bagore 3.000, babutangaza mu Kinyamakuru cy’Ubuzima n’Imyitwarire (Journal of Health and Social Behaviour) aho basanze ko abagore batinze kugira umwana kugeza icyo gihe bari baragize ibibazo bike mu kubyara (mbere y’uko ariko havuka ibibazo byo kubyara biterwa n’imyaka myinshi), kandi ngo bari bakuze mu buryo bw’amarangamutima, banahagaze neza mu bukungu kurusha ababyaye kare.

Ikigereranyo cy’imyaka umugore abyariraho umwana wa mbere ni 30 mu gihe 34 ari yo myaka myiza kurusha indi ishoboka yabyariraho kuko agira ibibazo bike mu kubyara kandi akaba anafite agafaranga

35 Mu gihe bahanganye n’akazi hiyongereyeho no kurera, iki ni cyo gihe cy’imyaka abagore bumva umujagararo w’ubwonko (stress) kurusha ikindi gihe cy’ubuzima bwabo.

Iyo ubu umugore ataraba umubyeyi nyamara yarabigerageje kenshi, ni kuri iyi myaka benshi baba bashobora kugerageza kubyara bakoresheje uburyo bwo guhuza intanga buzwi nka IVF, nk’uko bitangazwa n’Ikigo Gishinzwe Ibyo Guhuza Intanga z’Abantu n’Uburumbuke.

38 Nyuma yo gushyira akarenge hasi, ku myaka 38 ni wo mwaka aba ashobora gufata ikiruhuko cy’umwuga cyangwa kujya gutembera mu mahanga.

Abashakashatsi babonye ko bene iki gihe abagore baba bumva bihagije mu bukungu kandi bahagaze neza ku buryo bashobora gufata ikuruhuko ntibigire ingaruka ku mwuga cyangwa umurimo bakora.

39 Ikigereranyo cy’imyaka umugore azaba ahembwa umushahara uri hejuru kurusha indi yahembwe, icyakora nk’uko imibare y’Umuryango w’Ubumwe bw’Uburayi ibyerekana, amafaranga ahembwa aba ari make 20% ugereranije n’ayo umugabo bari mu mwanya umwe w’umurimo ahembwa.

Nk’uko imibare y’Ikigo cy’Ibarurishamibare cy’Ubwongereza ibyerekana, 40 ni wo mwaka w’ikigereranyo umugore aba afiteho ibyago byinshi byo gutandukana n’uwo bashakanye byemewe n’amategeko mu gihe abagabo ibyo gukora 'divorce’ yabo ya mbere biba bafite imyaka 43.

Ku kigereranyo, umugore mu Bwongereza azatandukana n’uwo bashakanye afite imyaka 40 na ho umugabo atandukane n’umugore bwa mbere n’umugore we afite imyaka 40

47 Birashoboka ko hari abagore barengeje imyaka 50 yewe n’abagejeje kuri 62 uzabona ku Kivu, kuri Pisine cyangwa mu mafoto bambaye bikini ntacyo bibabwiye ariko ubundi imyaka 47 ni yo myaka umugore yumviraho ko ashaje, ko akwiye kureka kwambara akambaro nk’ako akifotoza nk’abakiri bato. Ni kuri iyi myaka kandi abagore bumva ko imigaragarire yabo igenda ihinduka nabi 'byihuse’.

49 Ni cyo gihe ngo wongere uterure uruhinja ku bagore benshi bo kuri iyi myaka. Iki ni igihe benshi mu bagore baba bafite amahirwe yo kuba nyogokuru ku nshuro ya mbere, nk’uko abashakashatsi bo muri Future Foundation babigaragaza.

50 Haba uruvange rw’imigisha ku bagore igihe bagize imyaka 50. Inkuru nziza ni uko ari icyo kigereranyo cy’imyaka abagore nta deni baba bafite, kuko imishahara yabo iba igeze yiyongera ari na ko bazungura imirage y’ababyeyi babo. Icyakora kuri iyi myaka, ibimenyetso by’ubukecuru na byo ruba rugeretse, ushobora guhura na we ukamuhamgara uti 'Uraho, mukecuru, urakomeye mbe mukaka'.

Ni imyaka abagore batangira kumera imvi. Inyigo imwe yatangajwe n’Ikinyamakuru cyo mu Bwongereza gitangaza ku Bumenyi bw’Uruhu (British Journal of Dermatology) yagaragaje ko ku myaka 50, hagati y’abagore 63 na 78 % bari barameze imvi.

51 Iki ni cyo kigero cy’imyaka abagore benshi noneho bahagarika kujya mu mihango. Ntabwo ari ibintu bihuriranye gusa n’uko ari cyo kigero cy’imyaka abagore batangira gutekereza ko abagabo batakibareba nka mbere, ndetse bareka no kubamwenyurira nk’ababakunze cyangwa ngo babakingurire imiryango.

52 Kuri iyi myaka hari abagore nk’umukinniyi wa filimi Demi Moore, uzasanga basa n’inkumi ukibwira rwose ko bakiri mu bwangavu. Saga magazine yagaragaje ko iki ari cyo gihe kuruta ikindi gihe cyose abagore baba biteguye gushyira mu bikorwa igitekerezo cyo kwibagisha uruhu n’ibindi bice by’umubiri (plastic surgery), kuvanaho ibitsike cyangwa bakabyogosha babihindura bakabigira uko bashaka bikaba biri mu biza imbere mu byo bakora muri iki gikorwa, kigakurikirwa no guhindura isura umuntu akikiza iminkanyari n’izindi nenge yibonaho mu isura.

Ku myaka 52, Demi Moore aragaragara nk’uri mu myaka y’urubyiruko. Bitekerezwa ko iki ari cyo kigero cy’imyaka abagore benshi batekereza kwibagisha ibice by’umubiri

55 Kuri iki cyiciro mu buzima bwe, umugore yiyumva cyane nk’aho agomba kugirira abandi umumaro. Inyigo yakozwe na Kaminuza ya London yakurikiranye ubuzima bw’abagore 17,000 bavutse mu cyumweru kimwe yasanze ko abakecuru b’imyaka 55 bari mu bakora ku bwinshi inshingano zo kwita ku bakiri bato ndetse n’abakuze bo mu miryango yabo.

Na none kandi, 55 ni cyo kigereranyo cy’imyaka usangaho abamiliyoneri benshi mu Bwongereza aho 40 ku ijana yabo baba ari abagore.

58 Ni igihe gishobora kuba cyaratinze ariko noneho cyageze, ariko ku myaka 58 ni igihe abagore ku kigereranyo bwa nyuma bumva ko bafite ububasha ku kugenzura ubuzima bwabo n’akazi, mbese akazi katakiri ikintu kikibatera ubwoba nka hamwe bakiri bato bumvaga ngo umukoresha ageze ku kazi bati 'Turashize.'

Hari inyigo yerekanye ko iki ari cyo gihe aba bashiki bacu, ba mama cyangwa ba nyogokuru batangira kujya bajya mu biruhuko byo ku manywa bakabijyamo bakizigura, bagatangira kugabanya ibihe bamaraga bakora amasaha y’ikirenga kandi bakagira igihe gikwiriye cyo kwidagadura no kwishimira ubuzima bwabo 'baryoshya'.

60 Mu gihe noneho bafite igihe gihagije kirenzeho cyo kuruhuka batanahangayikishijwe no gutwita, bisa n’aho gutera akabariro bikomeza kuba igikorwa gikorwa cyane muri iyi myaka y’ubukure. Ni ukuvuga ko bikomeza kubaho cyane kurusha uko umuntu yabitekereza.

Mirongo itatu na barindwi ku ijana mu bubatse ingo bafite hejuru y’imyaka 60 bakora imibonano mpuzabitsina n’abo bashakanye rimwe mu cyumweru cyangwa se inshuro zirenze imwe, na ho 16% bo bakaba bakora icyo gikorwa inshuro nyinshi nk’uko ubushakashatsi bwabyerekanye.

63 Imyaka mirongo itandatu n’itatu n’ukwezi kumwe ni cyo kigero cy’imyaka abagore bwa nyuma batangira koroshya ibintu ndetse bakanajya mu kiruhuko cy’izabukuru iyo baba bakiri mu kazi, nk’uko Ishami ry’umurimo n’Ubwizigame bw’izabukuru kibyerekana. Abagabo bo bakomeza kwinjiza amafaranga iyo bafite imyaka 64 n’amezi arindwi.

65 Bisa n’aho abagore badata icyizere ngo bihebe mu byerekeye urukundo. Inyigo ya Age UK yasanze ko hafi ya buri umwe mu bagore 10 bari hejuru y’imyaka 65 badafite abo bashakanye, ni ukuvuga wenda barapfakaye cyangwa baratandukanye n’abagabo babo baba bacyifuza kwinjira mu mubano mushya gabo gore ubaganisha ku guhuza ibitsina.

Igihe bafite abo babana bwo, umwe mu bakecuru umunani — 12 ku ijana — yavuze ko yifuza kugerageza ibintu bishya mu buriri hamwe n’umukunzi we.

82 Ikigereranyo ku cyizere cyo kubaho ku bagore cyarazamutse kigera ku myaka 83 — cyiyongereyeho amezi 12 ugereranije no mu 2002, bakaba bari hejuru y’abagabo hafi imyaka ine kuko babaho bakaramba imyaka 79.

APR BBC izahagararira u Rwanda mu irushanwa rya Basketball Africa League rigiye kuba ku nshuro ya kane (BAL 2024) yisanze mu itsinda rya 3 na US Monastir yo Tunisia rya 'Sahara Conference.’

Ni nyuma ya tombola yabereye Dakar muri Senegal ku cyicaro gikuru cya BAL, ni umuhango wayobowe n’umuyobozi wa BAL, Amadou Gallo Fall.

APR BBC yegukanye shampiyona ikaba ari yo izahagararira u Rwanda muri iri rushanwa, yisanze mu itsinda rya 3 rya 'Sahara Conference’ kumwe n’amakipe ya US Monastir yo muri Tunisia, AS Douane yo muri Senegal na Rivers yo muri Nigeria.

Iri tsinda rizakinira Dakar muri Senegal kuva tariki ya 4 kugeza 12 Gicurasi 2023.
Itsinda rya 1 rya Karahari Conference rizakinira Pretoria muri Afurika y’Epfo guhera tariki ya 9 kugeza 17 Werurwe 2023, rigizwe na Cape Town Tigers yo muri Afurika y’Epfo, Dynamo BBC y’i Burundi, Petro de Luanda yo muri Angola ndetse na FUS de Rabat yo muri Maroc.

Itsinda rya kabiri 'Nile Conference’ rigizwe n’ikipe ya Al Ahly yo mu Misiri, Al Ahly Benghazi yo muri Libya, City Oilers yo muri Uganda na Bangui SC yo muri Sudani. Iri tsinda rizakinira mu Mujyi wa Cairo mu Misiri tariki ya 19-27 Mata 2023.

Buri tsinda hazazamuka amakipe 2 bivuze ko ari 6, muri aya matsinda uko ari 3 hazatoranywamo andi makipe 2 muri 3 yabaye 3 ubundi asange ya yandi 6 bibe 8, azahita ahurira i Kigali muri ¼ cya BAL guhera tariki ya 24 Gicurasi kugeza ku wa 1 Kamena 2024.

Mu gihe hari abahanzi benshi bo mu bihugu bya Africa bakirwana n’ubuzima, hari abandi twavuga ko bamaze kugera aho bajya, aho babayeho mu buzima buhenze bakesha ifaranga bibitseho. Nubwo hari abahanzi badatunze ikinyabiziga na kimwe, hari abafite indege bwite zabo!

Dore abahanzi 5 nyafurika batunze indege bwite zabo zihenze:

1. P-Square

Itsinda rya P-Square rigizwe n’abavandimwe b’impanga aribo Peter na Paul Okoye, bari mu bahanzi bateje imbere injyana ya Afro Beat mu myaka yashize ndetse bakanaharurira inzira bagenzi babo. 

Kuba P-Square imaze imyaka myinshi mu muziki, yanawukuyemo amafaranga menshi kuburyo mu 2012 babaye abahanzi ba mbere muri Nigeria baguze indege bwite mu gihugu cya Saudi-Arabia baguze Miliyoni 31 z’Amadolari.

2. Black Coffee

Umuhanzi, akaba n’utunganya indirimbo afatanya no kuba umuvanzi w’umuziki (DJ), Nkosinathi Innocent wamamaye ku izina rya Black Coffee, unayoboye abahanzi bakize muri Afrika y’Epfo. Uyu muhanzi yaguze indege bwite ye mu 2017 yo mu bwoko bwa D-IEMO Raytheon Premier 1A ayiguze asaga miliyoni 28 z’amadolari.

3. Davido

Icyamamare mu muziki mpuzamahanga, Davido, ari mubahanzi bacye muri Nigeria batunze indege bwite zabo. Uyu muhanzi ukunze kwiyita ‘Omo Baba Olowo’ bisobanuye ngo ‘Umwana wo mu bakire’, ni na byo koko dore ko mu 2018 Se wa Davido w’umuherwe witwa Adedeji Adeleke yamuhaye impano y’indege bwite yo mu bwoko bwa Bombardier Challenger 604 ihagaze miliyoni 34 z’amadolari.

4. Casper Nyovest

Umwanditsi w’indirimbo akaba n’umuraperi w’umuhanga Refiloe Maele Phoolo wamamaye ku izina rya Casper Nyovest nawe ari mubahanzi bacye bo muri Afrika y’Epfo batunze indege bwite. Uyu muraperi uherutse gutaramira i Kigali yaguze indege ye bwite mu 2019 yo mu bwoko bwa 1984 Gulfstream III Model 1159 ihagaze miliyoni 18 z’amadolari.

5.Wizkid

Umuhanzi uri mu bahetse umuziki nyafurika ku bitugu bye, Ibrahim Balogun uzwi cyane nka Wizkid, nawe ari mubahanzi  batunze agatubutse muri Africa ndetse banabigaragaza. Mu 2020 uyu muhanzi yibitseho indege bwite yo mu bwoko bwa Propeller Plane ihagaze miliyoni 27 z’amadolari.

Ikinyamakuru Daily Africa gitangaza ko muri Africa aba aribo bahanzi 5 babashije kwerekana indege bwite baguze, mu gihe hari abandi bashyirwa mu majwi ko bazitunze gusa batarabyemeza ku mugaragaro barimo nka D’Banj,Diamond Platnumz, Burna Boy, Tiwa Savage, Don Jazzy n’abandi.

Ibi byemerejwe mu masezerano y’ubufatanye SKOL isanzwe itera inkunga Rayon Sports WFC yagiranye n’ikipe ya Orion BBC agamije gutera ibiti mu Rwanda, muri gahunda ya #OneShootOneTree. Aya masezerano yashyizweho umukono ku wa Gatatu, tariki ya 10 Mutarama 2024. Ni umuhango witabiriwe n'ubuyobozi bwa SKOL Brewery Ltd na Orion Basketball Club ndetse n'ubw'amakipe ya Rayon Sports.

#OneShootOneTree Campaign yatangijwe na Orion BBC, yiyemeza ko buri nota rizajya ritsindwa mu mukino rihwanye n'igiti cyo guterwa kandi yatanze umusaruro kuko binyuze mu bufatanye n'inzego zitandukanye hamaze guterwa ibiti birenga ibihumbi 51 mu turere twose tw'igihugu.

Umukozi muri Skol ushinzwe Iyamamazabikorwa, Benurugo Kayinamura Emilienne, yavuze ko binyuze muri aya masezerano bifuza gukomeza kugira uruhare muri gahunda yo kubungabunga ibidukikije no gutera ibiti.

Yagize ati 'Nk'uruganda twabonye ko ibyo Orion iri gukora ari igikorwa cyiza kuko kigamije kubungabunga ibidukikije, tubona ko twakigiramo uruhare, twanzura ko twagirana amasezerano tugafatanya gutera ibiti byinshi.''

Aya masezerano avuga ko igitego Rayon Sports izajya itsinda mu gihe cy'amarushanwa, kizaba gihwanye n’ibiti 50, bivuze ko hazajya harebwa ibitego byose yatsinze ubundi bagatera ibiti bingana nabyo.

Perezida wa Orion BBC, Mutabazi James, yishimiye kunguka umufatanyabikorwa mushya mu rugendo rwo kubungabunga ibidukikije. Ati 'Orion BBC ntiyari koroherwa no kugera ku ntego zayo zo gutera ibiti byinshi idakoranye n'uruganda nka Skol.''

Mutabazi yavuze ko kujya mu kibuga ugakina ugatsindwa ukababara cyangwa ugatsinda ukanezerwa bidakwiye kuba iherezo ry'umukino. Ati 'Orion ni ikipe ishaka gukora ibikorwa biteza imbere umuryango dutuyemo i Kigali no mu ntara.''

Biteganyijwe ko muri uku kwa Mbere, hazaterwa icyiciro cya mbere cy’ibiti, aho ubu hari kurebwa ibitego byose Rayon Sports imaze gutsinda muri shampiyona bikazaba ari byo biterwa.

Umunyamabanga wa Rayon Sports WFC, Kana Benie Axella, yagaragaje ko ayo masezerano agiye gutuma barushaho gutsinda nubwo ari yo ntego yatumye ikipe igera mu cyiciro cya mbere. 

Yagize ati: “Ubu tugiye gutangira kubara ibitego twatsinze mu mikino ibanza tumenye ibitego tuzatsinda. Nyuma yaho noneho turatangira gutsinda dufite intego, ndetse kugira ngo tuzatere ibiti byinshi.”

Yakomeje avuga ko aya masezerano azatuma ikipe ya Rayon Sports y’abagore izarushaho kumenyekana.

Ati” Aya masezerano aradufasha kumenyekana. Imikino y’abagore usanga ititabwaho cyane, ariko uburyo dukoramo, nihiyongeraho aya masezerano, bizadufasha kurushaho kumenyekana ndetse tunatange umusanzu ku gihugu cyacu mu kubungabunga ibidukikije”.

Orion BBC yatangije iki gikorwa, ubuyobozi bwayo bwemeza ko uyu mwaka bazazenguruka igihugu cyose ndetse biteguye gutera ibiti byinshi kurusha ibyo bateye bwa mbere, kuko hiyongereyeho andi maboko ya Rayon Sports y’abagore. 

Uwayezu Jean Fidele uyobora umuryango wa Rayon Sports agerageza gutereka umupira mu nkangara 

Rayon Sports y’abagore yihaye intego yo gutera ibiti bisaga ibihumbi 6 mu gihe cy’umwaka 

“>

AMAFOTO: Freddy Rwigema – InyaRwanda.com

VIDEO: Munyantore Eric – InyaRwanda Tv

Uyu mugabo wagaragaye ku mbuga nkoranyambaga mu mashusho yahakwirakwijwe, yari asanzwe ashinzwe amasomo mu Rwunge rw’Amashuri rwa Bugumira.

Ibaruwa yanditswe n’Ubuyobozi bw’Akarere ka Rusizi mu mpera z’ukwezi gushize k’Ukuboza 2023, yirukanye uyu mukozi wari usanzwe mu burezi.

Muri iyi baruwa, ubuyobozi bw’Akarere bwavuze ko uyu murezi yagaragaje imyitwarire idakwiye umuntu nka we uri mu mwanya wo kubera urugero abo abereye umurezi.

Iyi baruwa hari aho igira iti 'maze gusuzuma iyi raporo, ngasanga imyitwarire yawe yarakomeje kuba mibi, kuva wakwimurirwa kuri GS BUGUMIRA, aho ugereye muri iki kigo ukaba wararanzwe n’ubusinzi bukabije, gutukana ibishizi by’isoni mu ruhame, ntutinye no kubibwira ababyeyi n’abana ushinzwe kurera, inama wagiriwe n’ubuyobozi bwo kwirinda inzoga igihe uri mu kazi na zo ukaba utarazubahirije, ibi bikaba bikomeje kwangiza isura y’ikigo wigishaho, iy’Akarere ka Rusizi, n’iy’uburezi muri rusange, iyi myitwarire ikaba itakomeza kwihanganirwa.'

Umuyobozi w’Akarere akomeza agira ati 'Nshingiye ku ngingo ya 61 y’Iteka rya Perezida No 064/01 ryo ku wa 16/03/2020 rishyiraho sitati yihariye igenga abarimu b’amashuri y’incuke, abanza, ayisumbuye n’ay’imyuga n’ubumenyingiro, nkwandikiye nkumenyesha ko uhagaritswe ku mirimo by’agateganyo guhera ku wa 22/12/2023 kubera amakosa akomeye y’akazi ukurikiranyweho.'

UKWEZI.RW

Ni inshingano yahawe kuri uyu wa Gatatu tariki 10 Mutarama 2024 nk’uko tubikesha ibiro bya Ambasade y’u Rwanda muri LONI.

Mu butumwa bwatangajwe n’ibi biro bya Ambasade y’u Rwanda mu Muryango w’Abibumbye, bagize bati 'Ambasaderi Ernest Rwamucyo yatoranyijwe nka Perezida w’Inama y’Ubutegetsi ya UNICEF.'

Ni umwanya u Rwanda rwishimiye nk’uko ubu butumwa bukomeza bubivuga, rukizeza kandi ko ruzakomeza gutanga umusanzu mu bikorwa bya UNICEF bigamije kwita ku bana.

Ambasaderi Ernest Rwamucyo yahawe inshinga zo guhagararira u Rwanda mu Muryango w’Abibumbye mu mpera z’umwaka ushize wa 2023 mu kwezi k’Ukwakira, asimbura Ambasaderi Clave Gatete wagizwe Umunyamabanga Nshingwabikorwa UN ECA.

UKWEZI.RW

Umunyezamu w’umugande ufatira Rayon Sports, Simon Tamale, yavuze ko impamvu atagaruka mu kazi ari imvune yagize ategereje ko abanza akamera neza.

Ni nyuma y’inkuru zimaze iminsi mu itangazamakuru zivuga ko uyu mukinnyi na bagenzi bakomoka muri Uganda, Charles Baale na Joackiam Ojera banze kugaruka gusubukura imyitozo na bagenzi ba bo bitegura imikino yo kwishyura ya shampiyona ya 2023-24 izatangira ejo ku wa Gatanu bakina na Gasogi United.

Byavuzwe ko aba bakinnyi bagiye mu kiruhuko muri Uganda bakaba barasabye ubuyobozi bw’iyi kipe kuboherereza itike ngo bagaruke mu kazi ariko ntibwabikora kuko bitari mu masezerano bagiranye.

Abinyujije ku rukuta rwe rwa Twitter, Simon Tamale yavuze ko impamvu ataragaruka mu kazi ari imvune yagize ku mukino wa APR FC wabaye tariki ya 29 Ukwakira 2023 agakomeza kuyikiniraho.

Tamale yakomeje avuga ko yagize ikibazo gikomeye mu ivi ndetse yanyuze muri MRI abaganga bakamubwira ko agomba no kubagwa, ngo azagaruka mu kazi ameze neza.

Ati “Reka dushyireho ibintu umucyo, mu mukino wa Rayon Sports na APR FC nahuye n’ikibazo cy’imvune yo mu ivi ikomeye, nyuma yo kunyura muri MRI nagiriwe inama yo kubagwa nkanaruhuka. Ndi umuntu ukunda nkanubaha akazi kanjye. Nzagaruka mu kazi vuba abaganga nibamara kwemeza ko meze neza.”

Tamale na bagenzi be amakuru avuga ko bakiri muri Uganda ni mu gihe hari n’andi makuru avuga ko bari i Kigali ariko bakaba baranze gutangira imyitozo, gusa bategerejwe mu myitozo y’uyu munsi.

Ifatwa ry’uyu muyobozi w’ishuri ribanza, ryabaye tariki 09 Mutarama 2024, nyuma y’uko iki cyaha akekwa kibaye n’ubundi kuri uwo munsi.

Ni icyaha gikekwa ko cyabereye mu mu Mudugudu wa Karambo, Akagari ka Murama mu Murenge wa Bweramana, ubwo uwo muyobozi w’ishuri yacumbikiraga uwo mwarimu.

Uwatawe muri yombi, afungiye kuri sitasito y’Urwego rw’Igihugu rw’Ubugenzacyaha ya Kabagali mu Karere ka Ruhango mu gihe dosiye ye ikiri gutunganywa ngo ishyikirizwe Ubushinjacyaha.

Hari andi makuru avuga ko uyu muyobozi w’ishuri atari ubwa mbere aketsweho icyaha nk’iki, kuko no mu mpera za 2021 yatawe muri yombi akekwaho gusambanya abana b’abahungu, ariko akaza kurekurwa kuko hari habuze ibimenyetso bimushinja.

Ingingo y’ 134 y’Itegeko ryerecyeye ibyaha n’ibihano muri rusange, ivuga ku cyaha cyo gukoresha undi imibonano mpuzabitsina ku gahato, isobanura ibikorwa bigize iki cyaha aho icya mbere ari 'gushyira igitsina mu gitsina, mu kibuno cyangwa mu kanwa k’undi muntu.'

Iyi ngingo ikomeza igira iti 'Umuntu wese uhamijwe n’urukiko gukoresha imibonano mpuzabitsina ku gahato, ahanishwa igifungo kitari munsi y’imyaka icumi (10) ariko kitarenze imyaka cumi n’itanu (15) n’ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni ebyiri (2.000.000 FRW).'

UKWEZI.RW